Pefezi lelu nɔɔyʋ pɩyalʋ

Wɩlɩŋ alɩwaatʋ taa, kɩyakʋ nakʋyʋ Yehowa heyi Eliya se: “Wolo Sarfaatɩ tɛtʋ taa. Lelu nɔɔyʋ kaɣ-ŋ haʋ tɔɔnaɣ peeɖe.” Ɛtalɩ tɛtʋ ndʋ tɩ-nɔnɔsɩ cɔlɔ lɛ, ɛna lelu nɔɔyʋ eɖiɣni ɖasɩ caʋ. Ɛpɔzɩ-ɩ se ɛha-ɩ lɩm nɛ ɛñɔɔ. Lelu wokaɣ se ɛkɔnɩ lɩm lɛ, Eliya yaa-ɩ nɛ eheyi-i se: “Mentendi-ŋ, ha-m kpɔnɔ ɖɔɖɔ.” Ɛlɛ lelu cosi-i se: “Mɛnfɛyɩnɩ kpɔnɔ se maha-ŋ. Num pazɩ nɛ mʋlʋm pazɩ mɛwɛna se mala tɔɔnaɣ nɛ ma nɛ man-pɩyalʋ ɖɩtɔɔ.” Eliya pɩsɩnɩ-ɩ se: “Taanɩɣzɩ. Yehowa yɔɔdaa se ye ŋha-m kpɔnɔ yɔ, ña-mʋlʋm nɛ ño-num paakaɣ tɛm pɩkɔɔ nɛ pɩsɩɩnɩ alɩwaatʋ ndʋ tɛʋ ɖaɣnɩɣ paɣzʋʋ nɩʋ yɔ.”

Lelu ɛnʋ ewolo ɖɩɣa nɛ ɛla kpɔnɔ nɛ ɛkɔnɩ Eliya. Ɛzɩ Yehowa kaayɔɔdʋʋ yɔ, lelu ɛnʋ nɛ ɛ-pɩyalʋ paawɛnɩ tɔɔnaɣ wɩlɩŋ alɩwaatʋ ndʋ tɩ-taa. Mʋlʋm nɛ num mbʋ ɛɛwɛna yɔ, pɩwɛ pi-ɖeɖe mbʋ, pɩtɩtɛ.

Pʋwayɩ lɛ, asɛyʋʋ nakʋyʋ kɔɔ. Lelu ɛnʋ, ɛ-pɩyalʋ kɔm nɛ ɛhɩnɩ kʋdɔŋ siŋŋ nɛ ɛsɩ. Etendi Eliya se ɛsɩnɩ-ɩ. Eliya mʋ pɩɣa e-nesi tɛɛ nɛ ɛkpanɩ-kɛ ɛsɔdaa kuduyuu tɛɛ. Ɛhɩzɩ-kɛ kaɖʋ nakʋyʋ yɔɔ nɛ ɛtɩmnɩ Yehowa nɛ ɛtɔ se: “Yehowa, mentendi-ŋ fezi pɩɣa kanɛ.” Ye Yehowa efezi-kɛ yɔ, pɩkaɣ kɛʋ piti tɔm sɔsɔtʋ kpem. Ŋsɩm mbʋ pʋyɔɔ yɔ? Mbʋ pʋyɔɔ yɔ alɩwaatʋ ndʋ tɩ-taa, pataatiifeziti nɔɔyʋ nɛ sɩɖaa taa. Pɩtasɩ lɛ, lelu ɛnʋ nɛ ɛ-pɩyalʋ patɩkɛ Izrayɛɛlɩ mba.

Abalɩbɩɣa ŋga kapaɣzɩ fezuu nɛ kefe. Eliya heyi ko-ɖoo se: “Na! Ña-pɩyalʋ fema.” Lelu ɛnʋ ɛpaɣzɩ mɛyʋʋ nɛ eheyi Eliya se: “Toovenim taa ŋkɛ Ɛsɔ tɛ ɛyʋ. Mbʋ pʋyɔɔ yɔ tɔm ndʋ ŋyɔɔdʋʋ yɔ, Yehowa cɔlɔ tɩlɩnaa.”