Kewiyaɣ tɔm susuu​—Pɛyɛlɩɣnɩ laŋhɛzɩyɛ tɔm ɛjaɖɛ kpeekpe yɔɔ

SƆNƆ tʋmɩyɛ fɛyɩ. Ŋkʋyɩ tanaŋ tɛɛ cu nɛ ŋñɔɔzʋʋ ña-tɩ se ŋɖɛɛ tɔm susuu. Ŋwɛɛ nɛ ŋhʋʋ ña-ñʋʋ taa, mbʋ pʋyɔɔ yɔ pɩnɩ-ŋ. Ye ŋŋpɩzaɣ se ŋhɩnɩ nɛ ŋhɛzɩ yɔ, pɩɩkɛdɩnɩ-ŋ kpem! Peeɖe ŋtɩmaa nɛ ŋɖʋ ña-taa se ŋɖɛɣ. Ŋwobi tɔm susuu lɛ, ña nɛ koobu halɩñɩnʋ ɛzʋtʋyʋ nɔɔyʋ paɖʋwa se isusi tɔm. Nɛ ŋna ɛ-tɩ ɖɔkʋʋ nɛ ɛ-camɩyɛ lakasɩ lɛ, pitukuni-ŋ. Ɩwɛɛ nɛ isusuu tɔm kpaɣ ɖɩɣa nɛ ŋwolo ɖɩɣa lɛ, ŋtɔzɩ se ño-koobiya halaa nɛ abalaa mba pɛwɛ ɛjaɖɛ kpeekpe yɔɔ yɔ, peɖiɣni susuu tɔm kʋyʋmtʋ ndʋ, palakɩnɩ tʋmɩyɛ takayɩsɩ kʋyʋmsɩ nzɩ nɛ pamʋʋ falɩsʋʋ kʋyʋmʋm mbʋ. Ŋpɩsɩ ɖɩɣa lɛ, pɩɖʋ-ŋ hʋnʋm. Ña-taa la leleŋ kpem se ŋtɩcaɣ ɖɩɣa puwiye!

Tɔm susuu tɔm kɩlɩnɩ cɛyʋʋ Ɛsɔ Kewiyaɣ tʋma tɩŋa taa. Yesu yɔɔdaa se kɛdɛzaɣ kɩyakɩŋ taa lɛ, tʋmɩyɛ nɖɩ pakaɣ labʋ ɛjaɖɛ kpeekpe yɔɔ. (Maatiyee 24:14) Ɛzɩma tɔm ndʋ tɩlaba? Hɔɔlʋʋ kʋnɛ kɩ-taa ɖɩkaɣ yɔɔdʋʋ ɛyaa, nʋmɔŋ nɛ wondu ndʋ tɩɩsɩnaa, nɛ tɩsɩɣnɩ sɔnɔ ɖɔɖɔ se pala tɔm susuu tʋmɩyɛ nɖɩ ɖɩsɩɣnɩ ɛyaa se patɩlɩ se Ɛsɔ Kewiyaɣ kɛ pʋyʋ keekee toovenim taa yɔ.