Wɛɛ kpekpeka tɔm susuu taa ɛzɩ Yesu yɔ

1. Tʋkaɣ ŋga wɛ Yehowa sɛyaa nɛ mba payaɣ pa-tɩ se Krɩstʋ mba yɔ pɛ-hɛkʋ taa?

HƆƆLƖŊ weyi ɩ-taa Yehowa sɛyaa wɛ ndɩ nɛ mba payaɣ pa-tɩ se Krɩstʋ mba yɔ ɩ-taa nakʋyʋ lɛ kpekpeka ŋga pɛwɛnɩ tɔm susuu taa yɔ. (Tiiti 2:14) Ɛlɛ nabʋyʋ taa, pɩpɩzɩɣ nɛ pɩwɛ-ŋ kaɖɛ se ŋsusi tɔm nɛ kpekpeka. Ɛgbɛyɛ taa ɛzʋtʋyʋ kpekpeka tʋ nɔɔyʋ yɔɔdaa se: «Nabʋyʋ taa, pɩɩlakɩ-m liu se monsusi tɔm.» Pɩtɩla, pɩlakɩ-ŋ mbʋ ɖɔɖɔ.

2. Ɛbɛ pɩzɩɣ piyele nɛ nabʋyʋ taa, pɩwɛɛ-ɖʋ kaɖɛ se ɖɩwɛɛ kpekpeka tɔm susuu taa?

² Pɩtɩla, pɩkɛdɩɣnɩ-ɖʋ se ɖɩla tʋma lɛɛna Yehowa sɛtʋ taa nɛ pɩkɩlɩ se ɖiwolo nɛ ɖisusi tɔm. Ɛbɛ yɔɔ? Mbʋ pʋyɔɔ yɔ alɩwaatʋ ndʋ ɖɩmaɣ ɖɛ-Ɛsɔ sɛtʋ kuduyuŋ nɛ ɖɩñɔɔzʋʋ-ɩ yaa ɖɩɖʋʋ nesi mba asɛyʋʋ nakʋyʋ talɩ-wɛ yɔ yaa alɩwaatʋ ndʋ ɖɩkpazɩɣ ɖo-koobiya ɖoŋ yɔ, ɖɩnaɣ pee kɩbana wena pɩlʋlʋʋ yɔ kpaagbaa nɛ pɩhaɣ-ɖʋ taa leleŋ. Alɩwaatʋ ndʋ ɖa nɛ ɖo-koobiya ɖɩkpɛndɩɣ nɛ ɖɩlakɩ tʋmɩyɛ laŋhɛzɩyɛ nɛ sɔɔlɩm taa nɛ ɖɩnaɣ se mbʋ ɖɩlakɩ-wɛ yɔ pɩkɛdɩɣnɩ-wɛ yɔ, pɩhaɣ-ɖʋ taa leleŋ pɩdɩɩfɛyɩ. Ɛlɛ pɩtɩla, ɖɩwɛʋ nɛ ɖisusuu tɔm egeetiye naɖɩyɛ taa yɔ pɩlakɩ pɩnzɩ sakɩyɛ yɔ, ɛlɛ pɩɩlʋlʋʋ pee sakɩyɛ. Yaa pɩtɩla, mba ɖɩkatɩɣ tɔm susuu taa yɔ paamʋʋ-ɖʋ camɩyɛ. Ðɩnawa ɖɔɖɔ se ɖɩwɛɣ nɛ ɖɩñɔtʋʋnɩ ɛjaɖɛ tɛm lɛ, pakaɣ-ɖʋ kaɖɩnʋʋ nɛ pɩkɩlɩ. (Mat. 10:22) Ɛbɛ pɩzɩɣ pɩsɩnɩ-ɖʋ nɛ ɖitaalesi kpekpeka ŋga ɖɩwɛnɩ tɔm susuu taa yɔ yaa halɩ ɖɩwɛɛ kpekpeka nɛ pɩkɩlɩ?

3. Ɛbɛ Luka 13:​6-9 kpɛlɩkɩɣ-ɖʋ Yesu yɔɔ?

³ Yesu kɩɖaʋ pɩzɩɣ kɩsɩnɩ-ɖʋ nɛ ɖɩwɛɛ kpekpeka tɔm susuu taa. Alɩwaatʋ ndʋ esusaɣ tɔm yɔ, etilesi kpekpeka ŋga ɛɛwɛna yɔ kpa. Halɩ alɩwaatʋ wɛɛ nɛ tɩɖɛɣ lɛ, kpekpeka ŋga, kɛwɛɛ nɛ kakpaɣ ɖoŋ nɛ pɩkɩlɩɣ. (Kalɩ Luka 13:​6-9.) Eduuye naɖɩyɛ taa, Yesu kpaɣ ɛ-tʋmɩyɛ nɛ ɛmaɣzɩnɩ abalʋ weyi ɛɛsɔ fiigi tɩʋ ɛ-hayɩm taa yɔ ɛ-tʋmɩyɛ. Abalʋ ɛnʋ ɛcɔnɩ fiigi tɩʋ ŋgʋ kɩ-yɔɔ pɩnzɩ 3, ɛlɛ kɩtɩlʋlɩ pee. Mbʋ ɖɔɖɔ Yesu kpaɣ pɩnzɩ 3 nɛ esusi tɔm Yuuda mba, ɛlɛ pa-taa sakɩyɛ tiwelisini-i. Ɛzɩ hayɩm tʋ wɩlʋʋ se ɛwɛnɩ lidaʋ se fiigi tɩʋ kaɣ lʋlʋʋ pee yɔ, mbʋ ɖɔɖɔ Yesu tɩlɔ lidaʋ Yuuda mba yɔɔ nɛ etiyele-wɛ tɔm susuu. Ɛlɛ ɛtasɩ pana ñaɣʋ nɛ pɩkɩlɩ se etukuni pa-laŋa.

4. Hɔɔlɩŋ 4 weyi taa ɖɩpɩzɩɣ nɛ ɖɩkpɛlɩkɩ lɔŋ Yesu cɔlɔ?

⁴ Tɔm ñʋʋ kʋnɛ kɩ-taa, ɖɩkaɣ yɔɔdʋʋ ɛzɩma Yesu wɩlaa se ɛwɛ kpekpeka yɔ pɩ-tɔm, kɔzɩ kɔzɩ kɛdɛzaɣ fenasɩ 6 nzɩ sɩ-taa esusi tɔm yɔ. (Kalɩ «Après cela» tɛ note d’étude ŋgʋ kɩwɛ Luc 10:1 taa yɔ.) Ye ɖɩkpɛlɩkɩɣ tɔm ndʋ Yesu wɩlaa yɔ nɛ ɖɩmaɣzɩɣnɩ-ɩ yɔ, pɩsɩɣnɩ-ɖʋ nɛ ɖɩwɛɛ kpekpeka sɔnɔ. Iyele nɛ ɖɩna hɔɔlɩŋ 4 weyi ɩ-taa ɖɩpɩzɩɣ nɛ ɖɩkpɛlɩkɩ lɔŋ Yesu cɔlɔ yɔ: (1) Ɛɛkam ɛ-lɩmaɣza mbʋ Yehowa sɔɔlaa yɔ pɩ-yɔɔ, (2) ɛɛkam ɛ-lɩmaɣza natʋ tɔm yɔɔ, (3) ɛɛta Yehowa liu se ɛsɩnɩ-ɩ, nɛ (4) ɛɛwɛnɩ lidaʋ se nabɛyɛ kaɣ-ɩ welisinuu.

ƐƐKAM Ɛ-LƖMAƔZA MBƲ YEHOWA SƆƆLAA YƆ PƖ-YƆƆ

5. Ɛzɩma Yesu wɩlaa se ɛɛkam ɛ-lɩmaɣza mbʋ Yehowa sɔɔlaa yɔ pɩ-yɔɔ?

⁵ Yesu susi «Kewiyaɣ tɔm kɩbandʋ» nɛ kpekpeka, mbʋ pʋyɔɔ yɔ ɛnawa se tʋmɩyɛ nɖɩ Ɛsɔ kaasɔɔlaa se ɛla. (Luka 4:43) Yesu kaasɩ tɔm susuu tʋmɩyɛ kajalaɣ lone taa e-wezuu caɣʋ taa. Halɩ kɛdɛzaɣ fenasɩ nzɩ sɩ-taa esusi tɔm yɔ, ewobi «tɛtʋ sɔsɔtʋ ndɩ ndɩ taa nɛ tɛtʋ cikpetu ndɩ ndɩ taa» nɛ ɛwɩlɩ tɔm. (Luka 13:22) Pɩtasɩ lɛ, ɛtasɩ falɩsʋʋ tɔmkpɛlɩkɩyaa nabɛyɛ se pa nɛ ɩ posusi tɔm.—Luka 10:1.

6. Nɔɔ kʋɖʋmaɣ ŋga wɛ tɔm susuu tʋmɩyɛ nɛ teokrasɩ tʋma lɛɛna hɛkʋ taa? (Cɔnɩ ɖɔɖɔ kɩlɛmʋʋ.)

⁶ Sɔnɔ ɖɔɖɔ Yehowa nɛ Yesu pɔsɔɔlaa se ɖɩka ñʋʋ nɛ tɔm susuu tʋmɩyɛ. (Mat. 24:14; 28:​19, 20) Nɔɔ kʋɖʋmaɣ wɛ tɔm susuu tʋmɩyɛ nɛ teokrasɩ tʋma lɛɛna wena ɖɩlakɩ yɔ a-hɛkʋ taa. Kɩɖaŋ nɩɩyɩ yɔ: ɖɩmaɣ teokrasɩ kuduyuŋ yaa ɖɩlakɩ tʋmɩyɛ Betɛɛlɩ taa se ɖɩɖʋ nesi tɔm susuu tʋmɩyɛ. Alɩwaatʋ ndʋ asɛyʋʋ nakʋyʋ talɩɣ ɖo-koobiya yɔ, ɖɩɖʋʋ-wɛ nesi se pɩsɩnɩ-wɛ nɛ powolo pɩ-yɔɔ nɛ palakɩ fezuu taa tʋma pɩkpɛndɩnɩ tɔm susuu tʋmɩyɛ. Ye ɖiɖiɣzinaa se tɔm susuu tʋmɩyɛ tɔm cɛyaa nɛ ɖɩtɔzʋʋ se tʋmɩyɛ nɖɩ ɖɩkpaɖɩnɩ tʋma wena Yehowa sɔɔlaa se ɖɩla yɔ a-taa yɔ, piseɣtiɣ-ɖʋ se ɖisusuu tɔm ɖoŋ ɖoŋ. János kɛ ɛgbɛyɛ taa ɛzʋtʋyʋ Hɔŋgirii ɛjaɖɛ taa. Ɛyɔɔdaa se: «Mɔntɔzʋʋ man-tɩ se teokrasɩ tʋmɩyɛ naɖɩyɛ ɛɛpɩzɩɣ nɛ ɖɩlɛɣzɩ tɔm susuu tʋmɩyɛ lone taa; nɖɩ kɛnɩ ɖa-tʋmɩyɛ nɖɩ ɖɩ-tɔm kɩlɩ cɛyʋʋ yɔ.»

7. Ɛbɛ yɔɔ Yehowa sɔɔlaa se ɖiwolo pɩ-yɔɔ nɛ ɖisusuu tɔm? (1 Timootee 2:​3, 4)

⁷ Ye ɖɩwɛnɩ lɩmaɣza wena Yehowa wɛnɩ ɛyaa yɔɔ yɔ, ɖɩwɛɣ kpekpeka tɔm susuu taa nɛ pɩkɩlɩ. Yehowa sɔɔlaa se ɛyaa sakɩyɛ ɩnɩɩ tɔm kɩbandʋ nɛ pamʋ-tʋ. (Kalɩ 1 Timootee 2:​3, 4.) Tɔm kɩbandʋ pɩzɩɣ nɛ pɩya ɛyaa ñʋʋ, pʋyɔɔ lɛ Yehowa wɛɛ nɛ ɛfalɩsɩɣ-ɖʋ se ɖɩwɛɛ niye tɔm susuu taa nɛ pɩkɩlɩ. Kɩɖaʋ nakʋyʋ yɔ: Sɔɔlɩm eseɣti-ŋ nɛ ŋla tɔmkpɛlɩkɩyaa hatʋ cabɩ takayaɣ tasɩɣ lɔŋ kɩbaŋ weyi ɩpɩzɩɣ nɛ ɩsɩnɩ-ɖʋ nɛ ɖɩpaɣzɩ kɛdɛsɩ se pɩsa nɛ ɖɩsɩnɩ ɛyaa nɛ papɩsɩ tɔmkpɛlɩkɩyaa yɔ. Paa ɛyaa iitisiɣ se papaɣzɩ sɛʋ Yehowa lɛɛlɛɛyɔ yɔ, pɩtɩla pakaɣ hiɣu waɖɛ se pɛsɛɛ-ɩ pʋcɔ nɛ kʋñɔŋ sɔsɔʋ tɛ. Tɔm ndʋ ɖisusuu-wɛ lɛɛlɛɛyɔ yɔ, pɩtɩla ndʋ kaɣnɩ-wɛ seɣtuu cee wayɩ se pɛsɛɛ Yehowa. Ɛlɛ pɩpɩzɩɣ nɛ pɩla mbʋ ye ɖiwobi pɩ-yɔɔ nɛ ɖisusuu tɔm yɔ.

ƐƐKAM Ɛ-LƖMAƔZA NATƲ TƆM YƆƆ

8. Ɛzɩma Bibl taa natʋ tɔm sɩnɩ Yesu nɛ ɛlabɩnɩ tʋmɩyɛ ɛ-alɩwaatʋ camɩyɛ?

⁸ Yesu kaasɩm ɛzɩma Bibl taa natʋ tɔm kaɣaɣ labʋ yɔ. Ɛɛnawa se pɩnzɩ 3 nɛ hɔɔlʋʋ ɖeke ɛkaɣaɣ labʋ ɛ-tɔm susuu tʋmɩyɛ. (Dan. 9:​26, 27) Ɛɛsɩm ɖɔɖɔ natʋ tɔm ndʋ tɩyɔɔdʋʋ ɖenɖe pakaɣ-ɩ kʋʋ nɛ ɛzɩma ɛkaɣ sɩbʋ yɔ pɩ-tɔm yɔ. (Luka 18:​31-34) Yesu kaasɩm natʋ tɔm ndʋ, pʋyɔɔ ɛlabɩnɩ ɛ-alɩwaatʋ tʋmɩyɛ camɩyɛ. Mbʋ pɩlɩ pɩ-taa yɔ lɛ se esusi tɔm nɛ kpekpeka se pɩsa nɛ ɛtɛ tʋmɩyɛ nɖɩ paaɖʋ-ɩ yɔ.

9. Ye ɖɩnɩ Bibl taa natʋ tɔm taa yɔ, ɛzɩma pɩsɩɣnɩ-ɖʋ se ɖisusi tɔm nɛ kpekpeka?

⁹ Ye ɖɩnɩ Bibl taa natʋ tɔm taa yɔ, pɩpɩzɩɣ nɛ piseɣti-ɖʋ se ɖisusi tɔm nɛ kpekpeka. Ðɩnawa se pɩkazɩ pazɩ lɛ ɛjaɖɛ ɖɩnɛ ɖɩkaɣ tɛm. Ðɩnawa se mbʋ piɖiɣni labʋ ɛjaɖɛ yɔɔ yɔ nɛ wɛtʋ ndʋ ɛyaa wɛnɩ sɔnɔ yɔ, pɩlabɩ nɔɔ kʋɖʋmaɣ nɛ mbʋ Bibl yɔɔdaa se pɩkaɣ labʋ kɛdɛzaɣ kɩyakɩŋ taa yɔ. Ðɩwɛɛ nɛ ɖɩnaɣ ɛzɩma Aŋglo-Amerika Kewiyaɣ nɛ Rusii nɛ ajɛɛ wena aɖʋʋ-kʋ nesi yɔ pɛwɛɛ nɛ pakaɖɩɣnɩ ɖama yɔ. Piyeba nɛ natʋ tɔm ndʋ pɔyɔɔdɩ hayo kiŋ wiyaʋ nɛ hadɛ kiŋ wiyaʋ yɔɔ se tɩkaɣ labʋ «kɛdɛzaɣ alɩwaatʋ taa» yɔ tɩwɛɛ nɛ tɩlakɩ. (Dan. 11:40) Ðɩnɩ pɩ-taa ɖɔɖɔ se Aŋglo-Amerika Kewiyaɣ sɩŋnɩ sɩʋ kpeliɣa ŋga pɔyɔɔdɩ kɔ-tɔm Danɩyɛɛlɩ 2:​43-45 taa yɔ ka-naataŋ. Ɛzɩ natʋ tɔm wɩlʋʋ yɔ, ɖa-taa tɛma se pɩkazɩ pazɩ yem lɛ, Ɛsɔ Kewiyaɣ kaɣ ɖɩzʋʋ ɛyaa kominawaa. Natʋ tɔm ndʋ tɩ-tɩŋa tɩwɩlɩɣ se ɖɩñɔtɩnɩ ɛjaɖɛ tɛm kpam, pʋyɔɔ lɛ, pɩwɛɛ se ɖɩlabɩnɩ ɖa-alɩwaatʋ tʋmɩyɛ camɩyɛ nɛ ɖisusi tɔm kɩbandʋ kpɛdɛyɛ.

10. Ɛzɩma Bibl taa natʋ tɔm seɣtiɣ-ɖʋ se ɖisusi tɔm nɛ kpekpeka?

¹⁰ Tɔm ndʋ ɖɩsɔɔlɩ siŋŋ se ɖisusi yɔ tɩwɛ Bibl taa natʋ tɔm taa. Payaɣ koobu halɩñɩnʋ nɔɔyʋ se Carrie, ɛwɛ Dominiiki ɛjaɖɛ taa. Ɛyɔɔdaa se: «Alɩwaatʋ ndʋ mamaɣzɩɣ cee wayɩ tamasɩ kɩbanzɩ nzɩ Yehowa laba yɔ sɩ-yɔɔ yɔ, piseɣtiɣ-m se meheyi ɛyaa lalaa sɩ-tɔm.» Ɛsɔzaa se: «Alɩwaatʋ ndʋ manaɣ tɩlasɩ nzɩ ɛyaa katɩɣ yɔ lɛ, menɖiɣziɣna se pɩcɛyaa se patɩlɩ se paba ɖɔɖɔ Yehowa labɩ tamasɩ kɩbanzɩ nzɩ.» Bibl taa natʋ tɔm seɣtiɣ-ɖʋ se ɖiwolo tɔm susuu yɔɔ, mbʋ pʋyɔɔ yɔ ɖɩnawa se Yehowa ɖiyiɣni tʋmɩyɛ nɖɩ. Leila wɛ Hɔŋgirii ɛjaɖɛ taa; ɛyɔɔdaa se: «Izaayii 11:​6-9 seɣtiɣ-m se monsusi ɛyaa tɔm kɩbandʋ halɩ pɩkpɛndɩnɩ mba pɩlakɩ-m ɛzɩ paakaɣ-tʋ mʋʋ yɔ. Manawa se Yehowa pɩzɩɣ nɛ ɛsɩnɩ paa weyi nɛ ɛlɛɣzɩ.» Payaɣ koobu abalɩñɩnʋ nɔɔyʋ se Christopher, ɛwɛ Zambii ɛjaɖɛ taa. Ɛyɔɔdaa se: «Maarɩkɩ 13:10 yɔɔdaa se pakaɣ susuu tɔm kɩbandʋ ɛjaɖɛ kpeekpe yɔɔ, nɛ pɩkɛnɩ-m hɩɖɛ ɖʋʋ se mɛwɛɛ nɛ manɖʋʋ nesi se natʋ tɔm ndʋ tɩla.» Nɛ ña yɔ, Bibl taa natʋ tɔm ndʋ seɣtiɣ-ŋ se ŋwolo pɩ-yɔɔ nɛ ŋsusuu tɔm?

ƐƐTA YEHOWA LIU SE ƐSƖƔNƖ-Ɩ

11. Ɛbɛ yɔɔ pɩɩwɛɛ se Yesu ɛtaa Yehowa liu se ɛsɩɣnɩ-ɩ nɛ ewolo pɩ-yɔɔ nɛ esusuu tɔm nɛ kpekpeka? (Luka 12:​49, 53)

¹¹ Yesu ta Yehowa liu se ɛsɩɣnɩ-ɩ nɛ ewolo pɩ-yɔɔ nɛ esusuu tɔm nɛ kpekpeka. Paa Yesu kaayɔɔdaɣnɩ ɛyaa nɛ ñamtʋ alɩwaatʋ ndʋ esusaɣ Kewiyaɣ tɔm kɩbandʋ yɔ, ɛnawa se tɔm ndʋ tɩkaɣ yebu nɛ papaɖɩ-ɩ nɛ pakaɖɩnɩ-ɩ siŋŋ. (Kalɩ Luka 12:​49, 53.) Tɔm ndʋ Yesu susaɣ yɔ tɩtaakɛdɩnɩ Ɛsɔ sɛtʋ ñʋndɩnaa, pʋyɔɔ pañaɣ pana tam sakɩyɛ se pakʋ-ɩ. (Yoh. 8:59; 10:​31, 39) Ɛlɛ Yesu kaawobi pɩ-yɔɔ nɛ esusuu tɔm, mbʋ pʋyɔɔ yɔ ɛnawa se Yehowa wɛ ɛ-cɔlɔ. Ɛyɔɔdaa se: «Mɛnfɛyɩ men-ɖeke; ɛlɛ Caa weyi etiyi-m yɔ, ɛwɛ mɔn-cɔlɔ. . . . Etiyebi-m men-ɖeke, mbʋ pʋyɔɔ yɔ paa ɛzɩmtaa lɛ, malakɩ mbʋ pɩkɛdɩɣnɩ-ɩ yɔ.»—Yoh. 8:​16, 29.

12. Ɛzɩma Yesu ñɔɔzɩ ɛ-tɔmkpɛlɩkɩyaa se powolo pɩ-yɔɔ nɛ posusuu tɔm paa pakaɖɩɣnɩ-wɛ yɔ?

¹² Yesu tɔzɩ ɛ-tɔmkpɛlɩkɩyaa se pɩwɛɛ se pataa Yehowa liu nɛ ɛsɩnɩ-wɛ. Eheyi-wɛ tam sakɩyɛ se Yehowa kaɣ-wɛ sɩnʋʋ pɩkpɛndɩnɩ alɩwaatʋ ndʋ pakatɩɣ nazɩm yɔ. (Mat. 10:​18-20; Luka 12:​11, 12) Pʋyɔɔ eheyi-wɛ se pɛwɛɛ lɛɣtʋ. (Mat. 10:16; Luka 10:3) Eheyi-wɛ ɖɔɖɔ se ye ɛyaa ɩtɩsɔɔlɩ se pewelisini-wɛ yɔ pataañɩɣ pɔ-yɔɔ. (Luka 10:​10, 11) Pɩtasɩ lɛ, eheyi-wɛ se ye panazɩɣ-wɛ yɔ pese. (Mat. 10:23) Yesu kaawɛ kpekpeka nɛ ɛtaɣ Yehowa liu, paa mbʋ yɔ ɛtɩɖʋ e-wezuu kaɖɛ taa yem falaa.—Yoh. 11:​53, 54.

13. Ɛbɛ yɔɔ ña-taa pɩzɩɣ nɛ pɩtɛ se Yehowa kaɣ-ŋ sɩnʋʋ?

¹³ Pɩpɔzʋʋ se Yehowa ɛsɩnɩ-ɖʋ nɛ ɖiwolo pɩ-yɔɔ nɛ ɖisusuu tɔm nɛ kpekpeka alɩwaatʋ ndʋ pakaɖɩɣnɩ-ɖʋ yɔ. (Natʋ 12:17) Ɛbɛ yɔɔ ɖa-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ? Adɩma wena Yesu labɩ Yohanɛɛsɩ ñʋʋ 17 taa yɔ ana yebina nɛ ɖa-taa tɛmnɩ tɔm ndʋ. Adɩma ana a-taa, Yesu pɔzɩ Yehowa se ɛkandɩyɩ apostoloowaa yɔɔ, nɛ Yehowa cosi a-yɔɔ. Tʋma Labʋ takayaɣ kɛdɩ ɛzɩma ɛsɩnɩ apostoloowaa nɛ posusi tɔm nɛ kpekpeka paa panazaɣ-wɛ yɔ pɩ-tɔm. Yesu pɔzɩ Yehowa adɩma ana a-taa ɖɔɖɔ se ɛkandɩyɩ ɛyaa mba pakaɣ tisuu apostoloowaa tɔm susuu yɔɔ yɔ pɔ-yɔɔ. Ña ɖɔɖɔ ŋwɛ ɛyaa mba pa-taa. Yehowa tiyele cosuu Yesu adɩma ana a-yɔɔ; Yehowa kaɣ ña ɖɔɖɔ sɩnʋʋ ɛzɩ ɛɛsɩnʋʋ apostoloowaa yɔ.—Yoh. 17:​11, 15, 20.

14. Ɛzɩma ɖɩlaba nɛ ɖɩna se ɖɩkaɣ pɩzʋʋ nɛ ɖiwolo pɩ-yɔɔ nɛ ɖisusuu tɔm nɛ kpekpeka? (Cɔnɩ ɖɔɖɔ kɩlɛmʋʋ.)

¹⁴ Ɛjaɖɛ tɛm wɛɣ nɛ pɩñɔtʋʋ lɛ, pɩtɩla tɔm susuu kaɣ labʋ kaɖɛ nɛ pɩkɩlɩ. Ɛlɛ Yesu yeba nɛ ɖa-taa tɛ se ɖɩkaɣ hiɣu sɩnʋʋ mbʋ pɩpɔzʋʋ-ɖʋ yɔ nɛ ɖɩla tʋmɩyɛ nɖɩ nɛ kpekpeka. (Luka 21:​12-15) Ɛzɩ Yesu nɛ ɛ-tɔmkpɛlɩkɩyaa paalabʋ yɔ, ɖa ɖɔɖɔ ɖiyeki se paa weyi ɛlɩzɩ se ewelisiɣ tɔm kɩbandʋ yaa eewelisiɣ, nɛ ɖɩɩhɔŋnɩ-wɛ nɛ tɔm. Paa paɖɩɣ ɖɛ-Ɛsɔ sɛtʋ tʋmɩyɛ nʋmɔʋ ajɛɛ naayɛ taa yɔ, ɖo-koobiya wɛɛ nɛ powoki pɩ-yɔɔ nɛ posusuu tɔm kɩbandʋ, mbʋ pʋyɔɔ yɔ paataɣ pa-maɣmaɣ po-ɖoŋ liu ɛlɛ Yehowa pataɣ liu. Ɛzɩ Yehowa haʋ kajalaɣ pɩnzɩ mɩnʋʋ taa Krɩstʋ mba ɖoŋ yɔ, mbʋ ɖɔɖɔ ɛhaɣ-ɖʋ ɖoŋ sɔnɔ se pɩsa nɛ ‘ɖisusi tɔm kiya’ ɛzɩ ɛsɔɔlʋʋ yɔ. (2 Tim. 4:17) Ña-taa pɩzɩɣ nɛ pɩtɛ se ye ŋtaɣ Yehowa liu yɔ, ŋkaɣ pɩzʋʋ nɛ ŋwolo pɩ-yɔɔ nɛ ŋsusuu tɔm nɛ kpekpeka.

ƐƐWƐNƖ LIDAƲ SE NABƐYƐ KAƔ-Ɩ WELISINUU

15. Ɛbɛ wɩlɩɣ se Yesu kaawɛnɩ lidaʋ se ɛyaa nabɛyɛ kaɣ welisuu tɔm kɩbandʋ?

¹⁵ Yesu kaawɛnɩ lidaʋ se ɛyaa nabɛyɛ kaɣ welisuu tɔm kɩbandʋ. Pɩsɩnɩ-ɩ nɛ ehiɣ taa leleŋ nɛ ewolo pɩ-yɔɔ ɖɔɖɔ nɛ esusi tɔm nɛ kpekpeka. Kɩɖaʋ nakʋyʋ yɔ: Pɩnaɣ 30 taa, Yesu kaanawa se ɛyaa sakɩyɛ kaasɔɔlaa se pewelisi tɔm kɩbandʋ, nɛ ɛkpaɣ-wɛ nɛ ɛmaɣzɩnɩ hayɩm mbʋ pɩ-taa tɔɔnaɣ pɩwa nɛ pɩpɔzɩ se pakʋm-kɛ yɔ. (Yoh. 4:35) Pɩlabɩ pɩnaɣ kʋɖʋmaɣ mbʋ yɔ pʋwayɩ lɛ, eheyi ɛ-tɔmkpɛlɩkɩyaa se: «Kʋmtʋ ɖɔwa.» (Mat. 9:​37, 38) Pʋwayɩ ɛtasɩ ñɩɣʋ niye tɔm ndʋ tɩ-yɔɔ; ɛyɔɔdaa se: «Kʋmtʋ ɖɔwa . . . Itendi hayɩm Tʋ se etiyini tʋmlaɖaa ɛ-hayɩm taa.» (Luka 10:2) Yesu kaawɛnɩ lidaʋ se ɛyaa nabɛyɛ kaɣ welisuu tɔm kɩbandʋ; nɛ pewelisi tɔm ndʋ lɛ, ɛ-taa labɩ leleŋ.—Luka 10:21.

16. Ɛzɩma kɩɖaŋ weyi Yesu labɩnɩ tʋmɩyɛ yɔ ɩwɩlɩɣ se tɔm kɩbandʋ ndʋ ɖisusuu yɔ tɩlʋlʋʋ pee kɩbana? (Luka 13:​18-21) (Cɔnɩ ɖɔɖɔ kɩlɛmʋʋ.)

¹⁶ Yesu wɩlɩ ɛ-tɔmkpɛlɩkɩyaa se ye pɔtɔzʋʋ se tɔm ndʋ posusuu yɔ tɩlʋlʋʋ pee kɩbana yɔ, pɩsɩɣnɩ-wɛ nɛ pɛwɛɛ kpekpeka tɔm susuu taa. Iyele nɛ ɖɩna kɩɖaŋ weyi ɛlabɩnɩ tʋmɩyɛ yɔ ɩ-taa 2. (Kalɩ Luka 13:​18-21.) Yesu yɔɔdɩ piye cikpeɖe tɔm se ɛwɩlɩ se Kewiyaɣ tɔm kaɣ yɛlʋʋ kpem nɛ nabʋyʋ ɛɛpɩzɩɣ nɛ pɩsɩnzɩ-tʋ. Ɛyɔɔdɩ ɖɔɖɔ lɔlɔm tɔm se ɛwɩlɩ ɛzɩma Kewiyaɣ tɔm kaɣ yɛlʋʋ kpem nɛ tɩlɛɣzɩ ɛyaa wezuu caɣʋ, paa ɛyaa lalaa ɩɩnaɣ lɛɣzɩtʋ ndʋ kpaagbaa yɔ. Ye mbʋ, Yesu sɩnɩ ɛ-tɔmkpɛlɩkɩyaa nɛ pana se tɔm ndʋ posusuu yɔ tɩkaɣ lʋlʋʋ pee kɩbana.

17. Lɩmaɣza wena yɔɔ pɩwɛɛ se ɖiwolo pɩ-yɔɔ nɛ ɖisusuu tɔm nɛ kpekpeka?

¹⁷ Ye ɖɩmaɣzɩɣ ɛzɩma tɔm susuu tʋmɩyɛ sɩɣnɩ ɛyaa sakɩyɛ ɛjaɖɛ kpeekpe yɔɔ yɔ pɩ-yɔɔ yɔ, pɩsɩɣnɩ-ɖʋ nɛ ɖiwolo tɔm susuu yɔɔ nɛ kpekpeka. Paa pɩnaɣ ŋga, ɛyaa miiliyɔɔwaa mba Bibl tɔm kɛdɩnɩ-wɛ yɔ, powoki Yesu sɩm yɔɔ tɔzʋʋ sɔnzɩ taa, nɛ petisiɣ ɖɔɖɔ se ɖa nɛ wɛ ɖɩkpɛlɩkɩ Bibl. Ɛyaa kudokiŋ mɩnɩŋ sakɩyɛ haɣ pa-tɩ nɛ pamɩyɩsɩɣ-wɛ lɩm nɛ pɛkpɛndɩɣ ɖɔ-yɔɔ nɛ ɖisusuu tɔm. Ðɩɩsɩŋ ɛyaa ɛzɩma kaɣ tasʋʋ welisuu tɔm ndʋ ɖisusuu yɔ, ɛlɛ ɖɩnawa se Yehowa wɛɛ nɛ ekpeɣliɣ samaɣ sɔsɔɔ nakɛyɛ; nɛ samaɣ ŋga kakaɣ hiɣu ñʋʋ yabʋ kʋñɔŋ sɔsɔʋ ŋgʋ kɩkɔŋ yɔ kɩ-taa. (Natʋ 7:​9, 14) Hayɩm Tʋ wɛnɩ lidaʋ se pɩkazɩ ɛyaa sakɩyɛ se pakaɣ welisuu tɔm kɩbandʋ, pʋyɔɔ lɛ ɖɩkaɣ wobu pɩ-yɔɔ nɛ ɖisusuu tɔm.

18. Ɛyaa naɣ-ɖʋ lɛ, ɛbɛ ɖɩsɔɔlaa se peɖiɣzina?

¹⁸ Pɩtɩkɛ sɔnɔ pasɩm Yesu tɔmkpɛlɩkɩyaa se pɛwɛ kpekpeka tɔm susuu taa. Ɛyaa kaana ɛzɩma apostoloowaa susaɣ tɔm kaalɛyɩtʋ yɔ lɛ, «peɖiɣzina se pa nɛ Yesu paawɛna.» (Tʋma 4:13) Tɛtɛ nɛ alɩwaatʋ ndʋ ɛyaa naɣ ɖa ɖɔɖɔ tɔm susuu taa yɔ, peɖiɣzina se ɖɩwɛ kpekpeka ɛzɩ Yesu yɔ.