Sɔɔlɩm eseɣti-ŋ nɛ ŋwolo tɔm susuu yɔɔ

1. Tɔm ndʋ posusi pɩnaɣ taa kediɣzaɣ ŋga palabɩ pɩnaɣ 2023 taa yɔ ka-taa?

PƖNAƔ taa kediɣzaɣa ŋga palabɩ pɩnaɣ 2023 taa yɔ ka-taa, pɛlɛɣzɩ ɛzɩma ɖɩnɩɣaɣ wɩlɩtʋ natʋyʋ taa yɔ nɛ pɩ-taa tʋ kpayɩ kpayɩ nɛ pɩkɩlɩ. Paasusi ɖɔɖɔ tɔm ndɩ ndɩ pɩlɩɩnɩ ɖɔ-tɔm susuu yɔɔ. Kɩɖaʋ nakʋyʋ yɔ: Ðɩnɩ pɩ-taa se halɩ paɖɩzɩɣ Babilɔɔnɩ Sɔsɔʋ nɛ pɩtɛ lɛ, pɩtɩla ɛyaa nabɛyɛ kaɣ hiɣu waɖɛ nɛ pɛkpɛndɩ Yehowa samaɣ yɔɔ. Posusaa ɖɔɖɔ se kpaɣnɩ novembre 2023 lɛ, tɔm susuyaa ɩɩtasɩɣ cɛlʋʋ pɔ-tɔm susuu akɔnta tɩŋa. Ɛzɩ lɛɣzɩtʋ ndʋ tɩwɩlɩɣ se tɔm susuu tɔm tɩtasɩ cɛyʋʋ na? Yaa pɩtɩtasɩ cɛyʋʋ se ɖɩla tʋmɩyɛ nɖɩ kpɛdɛyɛ na? Aayɩ.

2. Paa kɩyakʋ ŋgʋ kɩɖɛɣ lɛ, ɛbɛ yɔɔ ɖɔ-tɔm susuu tʋmɩyɛ tɔm cɛyɩɣ ɖɛ-ɛsɩndaa nɛ pɩkɩlɩɣ? (Maarɩkɩ 13:10)

² Paa kɩyakʋ ŋgʋ kɩɖɛɣ lɛ, ɖɔ-tɔm susuu tʋmɩyɛ tɔm cɛyɩɣ ɖɛ-ɛsɩndaa nɛ pɩkɩlɩɣ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ tɩkazaa se ɛjaɖɛ ɛtɛ yɔ tɩtɩɖɔɔ. Iyele nɛ ɖɩna tɔm ndʋ Yesu kaayɔɔdaa nɛ titukuuni tɔm susuu tʋmɩyɛ nɖɩ pakaɣ labʋ kɛdɛzaɣ kɩyakɩŋ taa yɔ. (Kalɩ Maarɩkɩ 13:10.) Maatiyee takayaɣ taa, Yesu yɔɔdaa se pakaɣ susuu tɔm kɩbandʋ tɛtʋ kpeekpe yɔɔ pʋcɔ nɛ ɛjaɖɛ ‘tɛ.’ (Mat. 24:14) Tɔm piye nɖɩ ɖɩwɩlɩɣ se Sataŋ ɛjaɖɛ kɩdɛkɛdɩyɛ ɖɩnɛ ɖɩkaɣ tɛm caɣ caɣ. Yehowa ɖʋ ‘kɩyakʋ nɛ ñɩɣyʋʋ’ ŋgʋ kɩ-yɔɔ lakasɩ nzɩ sɩkaɣ labʋ yɔ. Nɛ pɩkazɩ pazɩ lɛ lakasɩ nzɩ sɩkaɣ labʋ. (Mat. 24:36; 25:13; Tʋma 1:7) Nɛ paa evemiye nɖɩ ɖɩɖɛɣ lɛ, ɖɩñɔtʋʋnɩ kɩyakʋ ŋgʋ nɛ pɩkɩlɩɣ. (Roma 13:11) Ɛlɛ pʋcɔ nɛ kɩtalɩ lɛ, pɩwɛɛ se ɖiwolo pɩ-yɔɔ nɛ ɖisusuu tɔm.

3. Ɛbɛ seɣtiɣ-ɖʋ nɛ ɖisusuu tɔm?

³ Pɩcɛyaa se ɖa-tɩŋa ɖɩpɔzɩ ɖa-tɩ tɔm kɩcɛyɩtʋ tʋnɛ: Ɛbɛ yɔɔ ɖisusuu tɔm kɩbandʋ? Tobi lɛ, sɔɔlɩm seɣtiɣni-ɖʋ nɛ ɖisusuu tɔm. Alɩwaatʋ ndʋ ɖisusuu tɔm yɔ, ɖɩwɩlɩɣ se ɖɩsɔɔlɩ tɔm kɩbandʋ, ɖɩsɔɔlɩ ɛyaa nɛ kɔzɩ kɔzɩ lɛ, ɖɩsɔɔlɩ Yehowa nɛ ɛ-hɩɖɛ. Iyele nɛ ɖɩtazɩ tɔm ndʋ tɩ-taa.

ÐISUSUU TƆM MBƲ PƲYƆƆ YƆ ÐƖSƆƆLƖ TƆM KƖBANDƲ

4. Alɩwaatʋ ndʋ ɖɩnɩɣ tɔm kɩbandʋ natʋyʋ yɔ, ɛzɩma pɩlakɩ-ɖʋ?

⁴ Ŋtɔzʋʋ ɛzɩma pɩɩlabɩ-ŋ alɩwaatʋ ndʋ ŋnɩ tɔm kɩbandʋ natʋyʋ yɔ? Pʋtɔma yɔ, ŋnɩwa se ñɔ-hɔʋ taa tʋ nɔɔyʋ lʋlɩ pɩɣa yaa ŋhiɣ tʋmɩyɛ nɖɩ ŋñɩnaɣ yɔ. Pɩtʋʋ fɛyɩ se piselitaɣ-ŋ se ŋheyi tɔm kɩbandʋ ndʋ ñɔ-hɔʋ taa mba nɛ ña-taabalaa. Alɩwaatʋ ndʋ ŋnɩ tɔm kɩbandʋ ndʋ tɩkpaɖaa yɔ, pʋ-tɔbʋʋ se alɩwaatʋ ndʋ ŋnɩ Kewiyaɣ tɔm kɩbandʋ yɔ, mbʋ pɩlabɩ-ŋ?

5. Ŋŋcalɩ nɩʋ Bibl taa toovenim tɔm lɛ, ɛzɩma pɩlabɩ-ŋ? (Cɔnɩ ɖɔɖɔ kɩlɛmɩŋ.)

⁵ Tɔzɩ ɛzɩma pɩɩlabɩ-ŋ alɩwaatʋ ndʋ ŋcalɩ nɩʋ Bibl taa toovenim tɔm yɔ. Ŋkpɛlɩkaa se ña-Caa weyi ɛwɛ ɛsɔdaa yɔ ɛsɔɔlɩ-ŋ, ɛsɔɔlaa se ŋwɛɛ ɛ-sɛyaa hɔʋ taa, nɛ ɛlabɩ tamaɣ se ɛkaɣ sɩnzʋʋ wɩzasɩ nɛ kʋñɔmɩŋ. Ŋŋkpɛlɩkaa ɖɔɖɔ se lidaʋ wɛɛ se ŋkaɣ naʋ ñɛ-ɛyaa kʋsɔɔlaa mba pasɩba yɔ ɛjaɖɛ kɩfaɖɛ taa, nɛ tɔm lɛɛtʋ sakɩyɛ. (Mark. 10:​29, 30; Yoh. 5:​28, 29; Roma 8:​38, 39; Natʋ 21:​3, 4) Toovenim tɔm ndʋ, tɩɩhɛzɩ ña-laŋɩyɛ. (Luka 24:32) Ŋŋsɔɔlɩ tɔm ndʋ ŋkpɛlɩkaɣ yɔ nɛ ŋŋsɔɔlaa se ŋheyi-tʋ paa anɩ.—Kpaɣ-tʋ nɛ ŋmaɣzɩnɩ Yereemii 20:9.

6. Lɔŋ weyi Ernest nɛ Rose pa-kɩɖaʋ kpɛlɩkɩɣ-ŋ?

⁶ Ðɩna koobu Ernestb kɩɖaʋ. Ɛ-caa sɩbɩ alɩwaatʋ ndʋ ɛɛwɛnɩ pɩnzɩ 10 yɔ. Ernest yɔɔdaa se: «Mɔnpɔzaɣ man-tɩ se: “Ɛzɩ ɛkpa ɛsɔdaa? Yaa ɛsɩba pɩtɛma?” Mansʋsaɣ piya nzɩ sɩ-caanaa kaawɛ wezuu yɔ.» Ernest wokaɣ ɛ-caa pɩlaʋ yɔɔ ɖoŋ ɖoŋ, nɛ eluŋuu pɩlaʋ cɔlɔ nɛ ɛtɩmɩɣ se: «Ɛsɔ, mentendi-ŋ, mɔnsɔɔlaa se mantɩlɩ ɖenɖe man-caa wɛɛ yɔ.» Ernest caa sɩba nɛ pɩla pɩnzɩ 17 lɛ, peheyi-i se ɛkpɛlɩkɩ Bibl, nɛ etisi lɛɛ lɛɛ. Ɛ-taa kaalabɩ leleŋ siŋŋ alɩwaatʋ ndʋ ɛkpɛlɩkaa nɛ ɛna se ɛyʋ ɛsɩba yɔ ɛɛsɩŋ natʋyʋ, nɛ pɩwɛ ɛzɩ ɛwɛ ɖom cukaŋ ñɩmbʋ nabʋyʋ taa yɔ. Ɛ-taa kaalabɩ leleŋ ɖɔɖɔ alɩwaatʋ ndʋ ɛtɩlaa se Bibl labɩ tamaɣ se sɩɖaa kaɣ fem yɔ. (Ekl. 9:​5, 10; Tʋma 24:15) Pɩtɛmnaa se ehiɣ tɔm ndʋ ɛpɔzaɣ ɛ-tɩ pɩnzɩ sakɩyɛ yɔ, tɩ-yɔɔ cosuu. Ɛ-taa kaalabɩ leleŋ kpem nɛ toovenim tɔm ndʋ ɛkpɛlɩkaɣ Bibl taa yɔ. Ɛ-halʋ Rose ɖɔɖɔ paɣzɩ kpɛlɩkʋʋ nɛ ɛlɛ ɖɔɖɔ ɛpaɣzɩ sɔɔlʋʋ tɔm ndʋ ɛkpɛlɩkaɣ yɔ. Pamɩyɩsɩ-wɛ lɩm pɩnaɣ 1978 taa. Posusi pɔ-hɔʋ taa mba, pa-taabalaa nɛ ɛyaa lalaa toovenim tɔm ndʋ pɛkpɛlɩkaa yɔ nɛ kpekpeka. Mbʋ pɩlɩ pɩ-taa yɔ lɛ se ɛyaa mba Ernest nɛ Rose pasɩnaa nɛ pamɩyɩsɩ-wɛ lɩm yɔ pɛcɛzɩ 70.

7. Ye ɖɩsɔɔlɩ tɔm ndʋ ɖɩkpɛlɩkɩɣ Bibl taa yɔ, ɛbɛ piseɣtiɣ-ɖʋ se ɖɩla? (Luka 6:45)

⁷ Pɩnaɣ kpayɩ kpayɩ se ye ɖɩsɔɔlɩ tɔm ndʋ ɖɩkpɛlɩkɩɣ Bibl taa yɔ, piseɣtiɣ-ɖʋ se ɖiheyi-tʋ lalaa. (Kalɩ Luka 6:45.) Pɩlakɩ-ɖʋ ɛzɩ pɩɩlabʋ Yesu tɔmkpɛlɩkɩyaa kajalaɣ pɩnzɩ mɩnʋʋ taa yɔ. Pɔyɔɔdaa se: «Ðɩɩpɩzɩɣ nɛ ɖiyele mbʋ ɖɩnawa nɛ ɖɩnɩɩ yɔ pɩ-tɔm yɔɔdʋʋ.» (Tʋma 4:20) Ðɩsɔɔlɩ toovenim tɔm siŋŋ nɛ pʋyɔɔ lɛ, ɖɩsɔɔlaa se ɖisusi-tʋ ɛyaa sakɩyɛ.

ÐISUSUU TƆM MBƲ PƲYƆƆ YƆ ÐƖSƆƆLƖ ƐYAA

8. Ɛbɛ seɣtiɣ-ɖʋ se ɖisusi ɛyaa tɔm kɩbandʋ? (Kalɩ aɖakaɣ «Sɔɔlɩm eseɣti-ŋ nɛ ŋla tɔmkpɛlɩkɩyaa.») (Cɔnɩ ɖɔɖɔ kɩlɛmʋʋ.)

⁸ Ðɩsɔɔlɩ ɛyaa ɛzɩ Yehowa nɛ ɛ-Pɩyalʋ pɔsɔɔlʋʋ-wɛ yɔ. (Adu. 8:31; Yoh. 3:16) Ɛyaa mba ‘patɩtɩlɩ Ɛsɔ’ nɛ ‘pɛfɛyɩnɩ lidaʋ’ yɔ, pɔ-tɔm lakɩ-ɖʋ pʋtɔdɩyɛ siŋŋ. (Efɛz. 2:12) Tɩlasɩ nzɩ pakatɩɣ yɔ sɩɖɔ kpem ɛlɛ ɖɩwɛnɩ mbʋ pɩpɔzʋʋ-wɛ yɔ, pʋ-tɔbʋʋ se Ɛsɔ Kewiyaɣ tɔm kɩbandʋ. Ðɩsɔɔlɩ ɛyaa mba nɛ pɔ-tɔm lakɩ-ɖʋ pʋtɔdɩyɛ; pʋyɔɔ lɛ, ɖɩlakɩ mbʋ payɩ pɩpɔzʋʋ yɔ se ɖisusi-wɛ tɔm kɩbandʋ. Tɔm kɩcɛyɩtʋ ndʋ, tɩpɩzɩɣ nɛ tɩha-wɛ lidaʋ, tɩpɩzɩɣ tɩsɩnɩ-wɛ nɛ panɩɩ wezuu leleŋ sɔnɔ nɛ tɩhaɣ-wɛ lidaʋ se pakaɣ caɣʋ «wezuu siŋŋ» pʋ-tɔbʋʋ se wezuu maatɛŋ ɛjaɖɛ kɩfaɖɛ taa.—1 Tim. 6:19.

9. (a) Tɔm ndʋ ɖisusuu ɛyaa pɩlɩɩnɩ cee wayɩ yɔɔ? (b) Ɛbɛ yɔɔ? (Ezekɩyɛɛlɩ 33:​7, 8)

⁹ Sɔɔlɩm mbʋ ɖɩwɛnɩ ɛyaa yɔɔ yɔ, piseɣtiɣ-ɖʋ ɖɔɖɔ se ɖiheyi-wɛ se ɛjaɖɛ kɩdɛkɛdɩyɛ ɖɩnɛ ɖɩ-tɛm ñɔtaa. (Kalɩ Ezekɩyɛɛlɩ 33:​7, 8.) Ɛyaa tɩŋa tɔm lakɩ-ɖʋ pʋtɔdɩyɛ pɩkpɛndɩnɩ ɖɔ-hɔʋ taa ñɩma mba paasɛɣ Yehowa yɔ. Paa evemiye nɖɩ, ɛyaa sakɩyɛ nɩɣnɩ pa-tʋma nɛ paasɩŋ mbʋ pɩɖaŋ-wɛ nɛ ɛsɩndaa yɔ. Bibl yɔɔdʋʋ se: «Kʋñɔŋ sɔsɔʋ nakʋyʋ kaɣ lɩʋ, nɛ kɩtɩtɩɩlɩtɩ mbʋ kpaɣnɩ ɛjaɖɛ ɖɩbazɩyɛ nɛ pɩkɔɔ pɩtalɩ lɛɛlɛɛyɔ, aayɩ, kɩɩkaɣ tasʋʋ lɩʋ mbʋ wiɖiyi.» (Mat. 24:21) Ðɩsɔɔlaa se patɩlɩ mbʋ pɩkaɣ labʋ tɔm hʋʋ alɩwaatʋ ndʋ tɩ-taa yɔ: Kajalaɣ lɛ, pakaɣ ɖɩzʋʋ cɛtɩm Ɛsɔ sɛtʋ agbaa nɛ pʋwayɩ lɛ, paɖɩzɩ ɛjaɖɛ kɩdɛkɛdɩyɛ ɖɩnɛ Armaagedɔɔ you taa. (Natʋ 16:​14, 16; 17:​16, 17; 19:​11, 19, 20) Ðɩtɩmɩɣ se ɛyaa sakɩyɛ iwelisi tɔm ndʋ ɖisusuu-wɛ yɔ nɛ pɛkpɛndɩ ɖɔ-yɔɔ nɛ ɖɩsɛɛ Yehowa lɛɛlɛɛyɔ. Ɛlɛ ɛbɛ kaɣ talʋʋ ɛyaa lalaa nɛ ɖɔ-hɔʋ taa ñɩma mba pekiziɣ se paawelisiɣni-ɖʋ lɛɛlɛɛyɔ yɔ?

10. Ɛbɛ yɔɔ pɩcɛyaa siŋŋ se ɖiwolo pɩ-yɔɔ nɛ ɖiheyiɣ ɛyaa mbʋ pɩkaɣ labʋ yɔ pɩ-tɔm?

¹⁰ Ɛzɩ ɖɩyɔɔdʋʋ tɔm ñʋʋ ŋgʋ kɩɖɛwa yɔ kɩ-taa yɔ, pʋtɔma yɔ, Yehowa kaɣ yabʋ ɛyaa mba panaɣ se paɖɩzɩ Babilɔɔnɩ Sɔsɔʋ nɛ petisi ɛ-yɔɔ yɔ pa-ñʋʋ. Ye mbʋ yɔ, pɩcɛyaa kpem se ɖiwolo pɩ-yɔɔ lɛɛlɛɛyɔ nɛ ɖisusuu ɛyaa Babilɔɔnɩ Sɔsɔʋ ɖɩzʋʋ tɔm. Maɣzɩ tɔm tʋnɛ tɩ-yɔɔ: Tɔm ndʋ ɖiheyiɣ-wɛ lɛɛlɛɛyɔ yɔ, pʋtɔma yɔ pakaɣ tɩ-yɔɔ tɔzʋʋ alɩwaatʋ ndʋ tɩ-taa. (Kpaɣ-tʋ nɛ ŋmaɣzɩnɩ Ezekɩyɛɛlɩ 33:33.) Pɩtɩla yɔ, pakaɣ tɔzʋʋ tɔm ndʋ ɖisusi-wɛ yɔ tɩ-yɔɔ nɛ piseɣti-wɛ nɛ pɛkpɛndɩ ɖɔ-yɔɔ nɛ ɖɩsɛɛ Yehowa pʋcɔ nɛ tɔm hʋʋ alɩwaatʋ talɩ. Pɩtɩla yɔ, paɖɩzɩɣ Babilɔɔnɩ Sɔsɔʋ nɛ pɩtɛ lɛ, ɛyaa mba paawelisiɣni-ɖʋ lɛɛlɛɛyɔ yɔ, pakaɣ lɛɣzʋʋ lɩmaɣza ɛzɩ salaka yɔɔ cɔnɩyʋ kaalabʋ Filiipi tɛtʋ taa alɩwaatʋ ndʋ «tɛtʋ ñamsɩ siŋŋ» yɔ.—Tʋma 16:​25-34.

ÐISUSUU TƆM MBƲ PƲYƆƆ YƆ ÐƖSƆƆLƖ YEHOWA NƐ Ɛ-HƖÐƐ

11. Ɛzɩma ɖɩcɛlɩɣ Yehowa samtʋ, hɩɖɛ ɖʋʋ nɛ ɖoŋ? (Natʋ 4:11) (Cɔnɩ ɖɔɖɔ kɩlɛmɩŋ.)

¹¹ Lɩmaɣzɩyɛ sɔsɔyɛ nɖɩ ɖɩ-yɔɔ ɖisusuu tɔm kɩbandʋ yɔ, nɖɩ lɛ se ɖɩsɔɔlɩ Yehowa Ɛsɔ nɛ ɛ-hɩɖɛ kiɖeɖeye. Ðɩkpakɩɣ ɖɔ-tɔm susuu ɛzɩ nʋmɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsa ɖɛ-Ɛsɔ kʋsɔɔlʋ yɔ. (Kalɩ Natʋ 4:11.) Ðitisiɣni ɖa-laŋɩyɛ pilim se Ɛsɔ Yehowa mʋnaa se ɛ-sɛyaa siɣsiɣ tɩnaa ɩcɛlɩ-ɩ samtʋ, hɩɖɛ ɖʋʋ nɛ ɖoŋ. Alɩwaatʋ ndʋ ɖiheyiɣ ɛyaa mbʋ pɩwɩlɩɣ se ɛnʋ lɩzɩnɩ «pɩtɩŋa payɩ» nɛ ɛnʋ hanɩ-ɖʋ wezuu yɔ, ɖɩnɛ ɛlɛ ɖɩwɛɛ nɛ ɖɩcɛlɩɣ-ɩ samtʋ nɛ hɩɖɛ ɖʋʋ. Ðɩcɛlɩɣ Yehowa ɖo-ɖoŋ alɩwaatʋ ndʋ ɖɩkpakɩɣ ɖa-alɩwaatʋ, ɖo-ɖoŋ nɛ mbʋ payɩ ɖɩwɛna yɔ nɛ ɖisusuuni tɔm ɛzɩ ɖɩpɩzʋʋ yɔ. (Mat. 6:33; Luka 13:24; Kol. 3:23) Tobi lɛ, ɖɩsɔɔlɩ yɔɔdʋʋ Ɛsɔ weyi ɖɩsɔɔlɩ-ɩ yɔ ɛ-tɔm. Pɩtasɩ lɛ, piseɣtiɣ-ɖʋ se ɖiheyi lalaa ɛ-hɩɖɛ nɛ Ɛsɔ weyi ɛkɛnaa yɔ pɩ-tɔm. Ɛbɛ yɔɔ?

12. Ðɔ-tɔm susuu taa, ɛzɩma ɖiyeki se Yehowa hɩɖɛ yɔɔ ɛñalɩ?

¹² Sɔɔlɩm mbʋ ɖɩwɛnɩ Yehowa yɔɔ yɔ piseɣtiɣ-ɖʋ se ɖiyele nɛ ɛ-hɩɖɛ yɔɔ ñalɩ. (Mat. 6:9) Pʋ-tɔbʋʋ lɛ se ɖɩsɔɔlaa se ɖiheyi ɛyaa se tɔm ndʋ payɩ Sataŋ yɔɔdɩ Yehowa yɔɔ yɔ tɩkɛ cɛtɩm. (Kiɖe 3:​1-5; Yɔɔb 2:4; Yoh. 8:44) Ðɔ-tɔm susuu taa, ɖɩsɔɔlaa siŋŋ se ɖiheyi ɛyaa mba payɩ pewelisiɣni-ɖʋ yɔ Yehowa yɔɔ toovenim tɩŋa. Ðɩsɔɔlaa se paa weyi ɛtɩlɩ se ɛ-wɛtʋ kɩbandʋ sɔsɔtʋ lɛ sɔɔlɩm, eɖiyiɣ ɛyaa nɛ siɣsiɣ wɛtʋ nɛ toovenim, nɛ pɩkazɩ pazɩ e-Kewiyaɣ kaɣ yebu nɛ kʋñɔmɩŋ tɩŋa sɩɩ tɩnaɣ nɛ ɛyaa wɛɛ laŋhɛzɩyɛ nɛ koboyaɣ taa. (Keɣ. 37:​10, 11, 29; 1 Yoh. 4:8) Ye ɖɩlʋkɩ Yehowa hɩɖɛ yɔɔ ɖɔ-tɔm susuu taa yɔ, ɖɩnɛ ɛlɛ ɖɩwɛɛ nɛ ɖiyeki se ɛ-hɩɖɛ yɔɔ ɛñalɩ. Pɩtasɩ lɛ, ɖa-taa wɛɣ leleŋ mbʋ pʋyɔɔ yɔ ɖɩwɛɛ nɛ ɖɩlakɩ mbʋ pɩpɔzʋʋ se Yehowa Aseɣɖe Tʋ ɛla yɔ. Ɛbɛ yɔɔ ɖɩyɔɔdʋʋ mbʋ?

13. Ɛbɛ yɔɔ pɩkɛnɩ-ɖʋ hɩɖɛ ɖʋʋ se payaa-ɖʋ se Yehowa Aseɣɖe Tɩnaa? (Izaayii 43:​10-12)

¹³ Yehowa lɩzɩ-ɖʋ se ɖɩkɛ ‘ɛ-aseɣɖe tɩnaa.’ (Kalɩ Izaayii 43:​10-12.) Pɩlakɩ pɩnzɩ nasɩyɩ yɔ Nɔɔɖɛyaa ɛgbɛyɛ ma takayaɣ nakɛyɛ nɛ ɖɩyɔɔdɩ ka-taa se: «Pɩkɛnɩ ɖa-taa paa anɩ hɩɖɛ ɖʋʋ siŋŋ se payaa-ɩ se Yehowa Aseɣɖe Tʋ.»c Ɛbɛ yɔɔ? Ðɩkpaɣ se pakʋyɩ ñɔ-yɔɔ se ŋlabɩ lakasɩ kɩdɛkɛdɩsɩ nasɩyɩ. Pɩpɔzʋʋ se ŋñɩnɩ nɔɔyʋ nɛ eheyi ɛyaa se tɔm ndʋ pɔyɔɔdʋʋ ñɔ-yɔɔ yɔ tɩkɛ cɛtɩm nɛ eheyi-wɛ ɖɔɖɔ ŋkɛ ɛyʋ kɩbanʋ nɛ ŋŋpɩzɩɣ nɛ ŋla lakasɩ nzɩ kpa. Anɩ ŋkaɣ lɩzʋʋ? Pɩtʋʋ fɛyɩ se ŋkaɣ lɩzʋʋ ɛyʋ weyi ŋsɩmɩ-ɩ camɩyɛ, ŋtaɣ-ɩ liu nɛ ɛwɛnɩ hɩɖɛ kɩbanɖɛ yɔ se pɩsa nɛ ɛyaa tisi ɛ-tɔm yɔɔ. Ye Yehowa ɛlɩzɩ-ɖʋ se ɖɩkɛ ɛ-Aseɣɖe Tɩnaa yɔ, pɩwɩlɩɣ se ɛsɩm-ɖʋ camɩyɛ nɛ ɛtaɣ-ɖʋ liu se ɖɩkaɣ heyuu ɛyaa se e-ɖeke ɛkɛnɩ Ɛsɔ toovenim tʋ. Pɩkɛnɩ-ɖʋ hɩɖɛ ɖʋʋ kpem se ɖɩkɛ ɛ-Aseɣɖe Tɩnaa, pʋyɔɔ ɖɩtɩŋɩɣnɩ nʋmɔŋ ndɩ ndɩ yɔɔ se ɖiyele nɛ patɩlɩ ɛ-hɩɖɛ nɛ ɖɩwɩlɩ ɖɔɖɔ se tɔm ndʋ payɩ pɔyɔɔdɩ ɛ-yɔɔ yɔ, tɩkɛ cɛtɩm. Ye ɖɩlakɩ mbʋ yɔ, pɩwɩlɩɣ se ɖɩmʋnaa se payaa-ɖʋ se Yehowa Aseɣɖe Tɩnaa.—Keɣ. 83:18; Roma 10:​13-15.

ÐƖKAƔ WOBU PƖ-YƆƆ NƐ ÐISUSUU TƆM PIWOLO PƖSƖƖNƖ TƖNAƔ YƆƆ

14. Ɛbɛ ɖaŋ-ɖʋ cee wayɩ?

¹⁴ Ða-taa wɛ leleŋ siŋŋ nɛ mbʋ pɩɖaŋ-ɖʋ cee wayɩ yɔ. Ðɩwɛnɩ lidaʋ se Yehowa ɖoŋ taa lɛ, ɛyaa sakɩyɛ kaɣ kpɛndʋʋ ɖɔ-yɔɔ nɛ ɖɩsɛɛ-ɩ pʋcɔ nɛ kʋñɔŋ sɔsɔʋ paɣzɩ. Pɩtasɩ lɛ, ɖa-taa wɛ leleŋ se halɩ ɛyaa wezuu caɣʋ taa alɩwaatʋ ndʋ tɩkɩlɩ kaɖɛ yɔ, pʋ-tɔbʋʋ se kʋñɔŋ sɔsɔʋ alɩwaatʋ taa, pɩtɩla ɛyaa sakɩyɛ kaɣ lɩʋ Sataŋ ɛjaɖɛ taa nɛ pɛkpɛndɩ ɖɔ-yɔɔ nɛ ɖɩsa Yehowa.—Tʋma 13:48.

15-16. (a) Ɛbɛ ɖɩkaɣ wobu pɩ-yɔɔ nɛ ɖɩlakɩ? (b) Ðɩwɛɣ nɛ ɖɩlakɩ mbʋ nɛ pɩkɔɔ nɛ pɩsɩɩnɩ ɖooye?

¹⁵ Ɛlɛ pʋcɔ nɛ pɩtalɩ mbʋ lɛ, ɖɩwɛnɩ tʋmɩyɛ se ɖɩlakɩ. Ðɩwɛnɩ waɖɛ se ɖisusi tɔm ndʋ paakaɣ-tʋ tasʋʋ susuu wiɖiyi kpa yɔ tɛtʋ kpeekpe yɔɔ, pʋ-tɔbʋʋ se Kewiyaɣ tɔm kɩbandʋ. Alɩwaatʋ kʋɖʋmtʋ ndʋ tɩ-taa lɛ, pɩwɛɛ se ɖiwolo pɩ-yɔɔ nɛ ɖɩpaɣ ɛyaa se pɩkazɩ pazɩ lɛ, nabʋyʋ kaɣ labʋ. Pɩcɛyaa se ɛyaa ɩtɩlɩ se ɛjaɖɛ kɩdɛkɛdɩyɛ ɖɩnɛ ɖɩ-tɛm wɛɛ nɛ pɩñɔtʋʋ lɛɛ lɛɛ. Ðɩnɛ ɛlɛ, alɩwaatʋ ndʋ tɔm hʋʋ alɩwaatʋ talɩɣ yɔ, pakaɣ tɩlʋʋ se tɔm ndʋ ɖisusaa yɔ tɩlɩnɩ Ɛsɔ Yehowa cɔlɔ.—Ezek. 38:23.

¹⁶ Ye mbʋ, ɛbɛ ɖɩtɛm ɖa-taa se ɖɩlakɩ? Sɔɔlɩm mbʋ ɖɩwɛnɩ tɔm kɩbandʋ yɔɔ yɔ, sɔɔlɩm mbʋ ɖɩwɛnɩ ɛyaa yɔɔ yɔ nɛ kɔzɩ kɔzɩ lɛ, sɔɔlɩm mbʋ ɖɩwɛnɩ Yehowa nɛ ɛ-hɩɖɛ yɔɔ yɔ piseɣtiɣ-ɖʋ se ɖiwolo pɩ-yɔɔ nɛ ɖisusuu tɔm kpɛdɛyɛ nɛ kpekpeka pɩkɔɔ nɛ pɩsɩɩnɩ alɩwaatʋ ndʋ Yehowa yɔɔdʋʋ se: «Pɩmaɣ mbʋ» yɔ.