Ɛbɛ pɩzɩɣ pɩsɩnɩ-ɖʋ nɛ ɖihiɣ taa leleŋ tɔm susuu taa nɛ pɩkɩlɩ?

1. Suwe nabɛyɛ maɣzɩɣ tɔm susuu tʋmɩyɛ yɔɔ? (Cɔnɩ ɖɔɖɔ kɩlɛmʋʋ.)

ÐA YEHOWA sɛyaa lɛ, ɖisusuu ɛyaa lalaa tɔm mbʋ pʋyɔɔ yɔ ɖɩsɔɔlɩ ɖa-Caa weyi ɛwɛ ɛsɔdaa yɔ nɛ ɖɩsɔɔlaa se ɖɩsɩnɩ-wɛ nɛ pɛkpɛlɩkɩ nɛ patɩlɩ-ɩ. Tɔm susuyaa sakɩyɛ hikiɣ taa leleŋ tɔm susuu taa. Ɛlɛ lalaa lɛ, pɩwɛ-wɛ kaɖɛ se pehiɣ taa leleŋ tɔm susuu taa. Ɛbɛ yɔɔ? Pɩtɩla, nabɛyɛ wɛ fɛyɛ siŋŋ nɛ pamaɣzɩɣ se patɩkɛ wɩlɩyaa kɩbama. Lalaa lɛ pɩɩkɛdɩɣnɩ-wɛ se powolo ɛyaa tɛ, ŋgʋ patɩyaa-wɛ. Lalaa ɖɔɖɔ lɛ, sɔɔndʋ kpaɣ-wɛ se pʋtɔma yɔ ɛyaa ɩɩkaɣ-wɛ welisinuu. Nabɛyɛ lɛ, pawɩlɩ-wɛ se pa nɛ ɛyaa lalaa pataahɔ tɔm. Paa koobiya mba, pɔsɔɔlɩ Yehowa siŋŋ yɔ, pɩwɛ-wɛ kaɖɛ se posusi tɔm kɩbandʋ ɛyaa mba paasɩŋ-wɛ yɔ. Paa mbʋ yɔ, peɖiɣzinaa se tɔm susuu tʋmɩyɛ tɔm cɛyɩ siŋŋ nɛ pañakɩ pana nɛ posusuu tɔm ɖoŋ ɖoŋ. Yehowa taa wɛnɩ-wɛ nɛ leleŋ pɩdɩɩfɛyɩ.

2. Ye pɩlakɩ-ŋ kaɖɛ se ŋhiɣ taa leleŋ tɔm susuu taa yɔ, ɛbɛ yɔɔ pɩtɩpɔzɩ se pitibi-ŋ yɔɔɔ?

² Nabʋyʋ taa, lɩmaɣza ana ayeki nɛ ña ɖɔɖɔ pɩlakɩ-ŋ kaɖɛ se ŋhiɣ taa leleŋ tɔm susuu taa? Ye ɛɛɛ yɔ, pitaatibi-ŋ yɔɔɔ. Ɛzɩma ŋŋtaɣ ña-tɩ liu yɔ pɩpɩzɩɣ nɛ pɩwɩlɩ se ŋwɛnɩ tɩ luzuu nɛ ŋtɩsɔɔlɩ se ŋhɔ lalaa lɩmaɣza nɛ ŋkɔnɩ ñɔ-yɔɔ. Pɩwɩlɩɣ ɖɔɖɔ se ŋtɩsɔɔlɩ se ña nɛ ɛyaa ɩhɔ tɔm. Pɩtasɩ lɛ, nɔɔyʋ tɩsɔɔlɩ se pataawelisini-i, kɔzɩ kɔzɩ alɩwaatʋ ndʋ ɛñɩnɩɣ se ɛla lalaa kɩbandʋ yɔ. Ña-Caa weyi ɛwɛ ɛsɔdaa yɔ, ɛsɩm kala wena ŋkatɩɣ yɔ camɩyɛ nɛ ɛsɔɔlaa se ɛsɩnɩ-ŋ. (Iza. 41:13) Tɔm ñʋʋ kʋnɛ kɩ-taa, ɖɩkaɣ naʋ lɔŋ tasʋʋ 5 mbʋ pɩsɩɣnɩ-ɖʋ nɛ ɖɩlʋbɩnɩ lɩmaɣza ana yɔ nɛ mbʋ pɩwɛɛ se ɖɩla nɛ ɖihiɣ taa leleŋ tɔm susuu taa yɔ.

YELE NƐ ƐSƆTƆM KPAZƖ-Ŋ ÐOŊ

3. Ɛbɛ kaasɩnɩ nayʋ Yereemii nɛ esusi ɛyaa lalaa tɔm?

³ Halɩ ɖooo caanaʋ taa, Ɛsɔtɔm kaakpazɩ Ɛsɔ sɛyaa ɖoŋ alɩwaatʋ ndʋ paaɖʋ-wɛ tʋmɩyɛ kaɖɛ ñɩnɖɛ naɖɩyɛ se pala yɔ. Ðɩna nayʋ Yereemii kɩɖaʋ. Alɩwaatʋ ndʋ Yehowa kaaɖʋ-ɩ tʋmɩyɛ se esusi tɔm yɔ, pɩɩha-ɩ nɩɣzɛ. Ɛyɔɔdaa se: «Maasɩŋ yɔɔdʋʋ, mbʋ pʋyɔɔ yɔ mɛnkɛ abalɩbɩɣa yem.» (Yer. 1:6) Ɛbɛ sɩnɩ-ɩ nɛ ɛwɛɛ abalɩtʋ nɛ esusi tɔm? Tɔm ndʋ Ɛsɔ yɔɔdaa yɔ, ndʋ kpazɩnɩ-ɩ ɖoŋ. Yereemii yɔɔdaa se: «Ɛ-tɔm pɩsɩ ɛzɩ miŋ weyi iɖiɣni mʋʋ nɛ paɖɩɣ ɩ-yɔɔ mɔ-mɔɔ taa yɔ, nɛ pɩɩnɩ-m nɛ tɔm ndʋ tɩ-sɩʋ man-taa.» (Yer. 20:​8, 9) Ɛyaa mba Yereemii susaɣ tɔm yɔ, paa pɔ-tɔm kaawɛ kaɖɛ yɔ, tɔm ndʋ paaheyi-i se esusi yɔ tɩha-ɩ ɖoŋ nɛ ɛpɩzɩ nɛ esusi-tʋ.

4. Ðɩkalɩɣ Ɛsɔtɔm nɛ ɖɩmaɣzɩɣ tɩ-yɔɔ lɛ, ɛbɛ lakɩ? (Koloosi mba 1:​9, 10)

⁴ Tɔm ndʋ tɩwɛ Bibl taa yɔ, tɩsɩɣnɩ Krɩstʋ mba se pehiɣ ɖoŋ. Apostoloo Pɔɔlɩ maɣaɣ takayaɣ Koloosi ɛgbɛyɛ lɛ, eheyi e-koobiya se ye pɛwɛnɩ toovenim sɩmtʋ yɔ, pɩkaɣ-wɛ seɣtuu nɛ «[pɔɖɔ] ɖɔnɛ nɖɩ ɖɩmʋnɩ Yehowa yɔ» nɛ powolo pɩ-yɔɔ nɛ «[palʋlʋʋ] pee paa tʋmɩyɛ kɩbanɖɛ nɖɩ lɛ ɖɩ-labʋ taa.» (Kalɩ Koloosi mba 1:​9, 10.) Tʋmɩyɛ kɩbanɖɛ nɖɩ, ɖɩ-hɔɔlʋʋ nakʋyʋ lɛ tɔm kɩbandʋ susuu. Ye mbʋ, ɖɩkalɩɣ Ɛsɔtɔm nɛ ɖɩmaɣzɩɣ tɩ-yɔɔ lɛ, tisuu mbʋ ɖɩwɛnɩ Yehowa yɔɔ yɔ pɩkpaɣ ɖoŋ nɛ ɖɩnaɣ mbʋ pʋyɔɔ pɩcɛyaa se ɖisusi Kewiyaɣ tɔm yɔ kpayɩ kpayɩ.

5. Ŋŋkalɩɣ Bibl nɛ ŋkpɛlɩkɩɣ-kʋ lɛ, ɛbɛ pɩwɛɛ se ŋla nɛ pɩwazɩ-ŋ camɩyɛ?

⁵ Pɩsa nɛ Ɛsɔtɔm wazɩ-ŋ camɩyɛ lɛ, pɩfɛyɩ se ŋkpedesi alɩwaatʋ ndʋ ŋkalɩɣ-tʋ, yaa alɩwaatʋ ndʋ ŋkpɛlɩkɩɣ-tʋ nɛ ŋmaɣzɩɣ tɩ-yɔɔ yɔ. Kpaɣ ña-alɩwaatʋ. Ye ŋkalɩ Bibl mayaɣ nakɛyɛ nɛ ŋtɩnɩɩ ka-taa yɔ, taamaa kɔ-yɔɔ nɛ ŋɖɛɛ. Ɛlɛ labɩnɩ tʋmɩyɛ Index des publications des Témoins de Jéhovah nɛ Guide de recherche pour les Témoins de Jéhovah nɛ ŋna ɛzɩma palɩzɩ mayaɣ ŋga ka-taa yɔ. Ŋŋkpɛlɩkɩɣ Bibl lɛ, ye ŋkpakɩɣ ña-alɩwaatʋ yɔ, ña-taa kaɣ tɛm nɛ pɩkɩlɩ se tɔm ndʋ kɩyɔɔdʋʋ yɔ tɩkɛ toovenim. (1 Tes. 5:21) Ña-taa tɛŋnɩ tɔm ndʋ nɛ pɩkɩlɩ lɛ, pɩkaɣ-ŋ seɣtuu siŋŋ se ŋheyi lalaa tɔm ndʋ ŋkpɛlɩkaa yɔ.

ÑƆƆZƖ ÑA-TƖ CAMƖYƐ PƲCƆ NƐ ŊWOLO TƆM SUSUU

6. Ɛbɛ yɔɔ pɩwɛɛ se ɖɩñɔɔzɩ ɖa-tɩ camɩyɛ pʋcɔ nɛ ɖiwolo tɔm susuu?

⁶ Ye ŋñɔɔzɩ ña-tɩ camɩyɛ pʋcɔ nɛ ŋwolo tɔm susuu yɔ, sɔɔndʋ ɛɛkɩlɩɣ-ŋ kpaʋ alɩwaatʋ ndʋ ŋyɔɔdʋʋnɩ ɛyaa yɔ. Pʋcɔ nɛ Yesu tiyi ɛ-tɔmkpɛlɩkɩyaa se powolo nɛ posusi tɔm lɛ, ɛsɩnɩ-wɛ nɛ pɔñɔɔzɩ pa-tɩ. (Luka 10:​1-11) Pɔɖɔm tɔm ndʋ Yesu wɩlɩ-wɛ yɔ tɩ-yɔɔ lɛ, papɩzaa nɛ pala tʋma kɩbana sakɩyɛ, piyeba nɛ pehiɣ taa leleŋ siŋŋ.—Luka 10:17.

7. Ɛzɩma ɖɩpɩzɩɣ nɛ ɖɩñɔɔzɩ ɖa-tɩ pʋcɔ nɛ ɖiwolo tɔm susuu? (Cɔnɩ ɖɔɖɔ kɩlɛmʋʋ.)

⁷ Ɛzɩma ɖɩpɩzɩɣ nɛ ɖɩñɔɔzɩ ɖa-tɩ pʋcɔ nɛ ɖiwolo tɔm susuu? Pɩcɛyaa se ɖɩmaɣzɩ tɔm ndʋ ɖɩkaɣ yɔɔdʋʋ yɔ tɩ-yɔɔ nɛ pʋwayɩ lɛ, ɖɩyɔɔdɩ-tʋ camɩyɛ nɛ ɖa-maɣmaɣ ɖɔ-tɔm pee. Ðɩpɩzɩɣ ɖɔɖɔ nɛ ɖɩmaɣzɩ mbʋ ɖɔ-tɔm susuu kooka taa mba lakɩ yaa ndʋ pɔyɔɔdʋʋ ɖoŋ ɖoŋ yɔ pɩ-taa 2 yaa 3 yɔɔ nɛ ɖɩmaɣzɩ nɛ ɖɩna ɛzɩma ɖɩpɩzɩɣ nɛ ɖicosi-wɛ yɔ. Pʋwayɩ, alɩwaatʋ ndʋ ɖɩyɔɔdʋʋnɩ ɛyaa yɔ ɖɩñaɣ pana nɛ sɔɔndʋ ɛtaakpa-ɖʋ, ɖɩmʋʋyɩnɩ-wɛ nɛ ɖɩyɔɔdɩnɩ-wɛ nɛ sɔɔlɩm.

8. Ɛzɩma tɩyɛ Krɩstʋ mba wɛ ɛzɩ cʋʋ ñanzɩ nzɩ Pɔɔlɩ yɔɔdɩ sɩ-tɔm ɛ-kɩɖaʋ taa yɔ?

⁸ Apostoloo Pɔɔlɩ labɩnɩ kɩɖaʋ nakʋyʋ tʋmɩyɛ nɛ ɛyɔɔdɩ tɔm susuu tʋmɩyɛ nɖɩ ɖɩlakɩ yɔ ɖɩ-tɔm. Ɛyɔɔdaa se: «Ðɩwɛnɩ ñɩm pʋnɛ cʋʋ ñanzɩ taa.» (2 Kɔr. 4:7) Ɛbɛ ñɩm mbʋ pɩkɛnaa? Pɩkɛ Kewiyaɣ tɔm susuu tʋmɩyɛ nɖɩ ɖɩyakɩ ɛyaa ñʋŋ yɔ. (2 Kɔr. 4:1) Ɛbɛ cʋʋ ñanzɩ kɛnaa? Sɩsɩŋnɩ Ɛsɔ sɛyaa mba posusuu ɛyaa lalaa tɔm kɩbandʋ yɔ. Pɔɔlɩ alɩwaatʋ taa, tadɩyɛ laɖaa ɖʋwaɣ wondu ndʋ tɩmʋ ñɩm yɔ peeɣsi taa; wondu ndʋ tɩ-taa natʋyʋ lɛ tɔɔnasɩ, sʋlʋm nɛ liidiye. Mbʋ ɖɔɖɔ Yehowa ɖʋ-ɖʋ tʋmɩyɛ se ɖisusi tɔm kɩbandʋ ndʋ yɔ, tɩmʋ ñɩm. Yehowa kaɣ-ɖʋ sɩnʋʋ nɛ ɖɩpɩzɩ nɛ ɖihiɣ ɖoŋ weyi pɩpɔzʋʋ-ɖʋ yɔ nɛ ɖiwolo pɩ-yɔɔ nɛ ɖisusuu tɔm ndʋ.

TƖMNƖ YEHOWA SE ƐHA-Ŋ ABALƖTƲ

9. Ɛbɛ pɩzɩɣ pɩsɩnɩ-ɖʋ nɛ ɖɩwa ɛyʋ sɔɔndʋ seu yaa ɖitaase sɔɔndʋ se ɛyaa ɩɩkaɣ-ɖʋ welisinuu? (Cɔnɩ ɖɔɖɔ kɩlɛmʋʋ.)

⁹ Nabʋyʋ taa, sɔɔndʋ pɩzɩɣ nɛ pɩkpa-ɖʋ nɛ ɛyaa, yaa ɖiseɣ sɔɔndʋ se ɛyaa ɩɩkaɣ-ɖʋ welisinuu. Ɛbɛ pɩzɩɣ pɩsɩnɩ-ɖʋ nɛ ɖɩwa kaɖɛ nɖɩ? Maɣzɩ adɩma wena apostoloowaa laba alɩwaatʋ ndʋ paɖʋ-wɛ paɣtʋ se pataasusi tɔm yɔ a-yɔɔ nɛ ŋna. Patiyele nɛ sɔɔndʋ kpa-wɛ nɛ peyele tɔm susuu, ɛlɛ pɔpɔzɩ Yehowa se ɛsɩnɩ-wɛ nɛ ‘powolo pɩ-yɔɔ nɛ posusuu ɛ-tɔm nɛ abalɩtʋ tɩŋa.’ Yehowa cosi pa-adɩma yɔɔ kpaagbaa. (Tʋma 4:​18, 29, 31) Ða ɖɔɖɔ ye nabʋyʋ taa ɖiseɣ ɛyaa sɔɔndʋ yɔ, pɩpɔzʋʋ se ɖɩtɩmnɩ Yehowa se ɛsɩnɩ-ɖʋ. Pɔzɩ Yehowa se ɛsɩnɩ-ŋ nɛ sɔɔlɩm mbʋ ŋwɛnɩ ɛyaa yɔɔ yɔ pɩkpa ɖoŋ nɛ pɩsa nɛ alɩwaatʋ ndʋ ŋsusuu-wɛ tɔm kɩbandʋ yɔ, sɔɔndʋ ɛtaakpa-ŋ.

10. Ɛzɩma Yehowa sɩɣnɩ-ɖʋ se ɖɩlɩzɩ aseɣɖe ɛ-yɔɔ? (Izaayii 43:​10-12)

¹⁰ Yehowa lɩzɩ-ɖʋ se ɖɩkɛ ɛ-Aseɣɖe Tɩnaa, nɛ ɛlabɩ-ɖʋ tamaɣ se ɛkaɣ-ɖʋ sɩnʋʋ nɛ ɖɩwɛɛ abalɩtʋ. (Kalɩ Izaayii 43:​10-12.) Iyele nɛ ɖɩna nʋmɔŋ 4 weyi ɩ-yɔɔ ɛtɩŋɩɣna nɛ ɛsɩɣnɩ-ɖʋ yɔ. Kajalaɣ lɛ, alɩwaatʋ ndʋ payɩ ɖisusuu tɔm kɩbandʋ yɔ Yesu wɛ ɖɔ-cɔlɔ. (Mat. 28:​18-20) Nabʋlɛ lɛ, Yehowa ɖʋ e-tiyiyaa tʋmɩyɛ se pasɩnɩ-ɖʋ. (Natʋ 14:6) Nabudozo lɛ, Yehowa ha-ɖʋ e-fezuu kiɖeɖeu se kɩsɩnɩ-ɖʋ nɛ ɖɩtɔzʋʋ tɔm ndʋ ɖɩɩkpɛlɩkaa yɔ tɩ-yɔɔ. (Yoh. 14:​25, 26) Nabʋnaza lɛ, Yehowa ha-ɖʋ koobiya se ɖa nɛ wɛ ɖisusi tɔm. Yehowa nɛ ɖo-koobiya kʋsɔɔlaa pɛwɛɛ nɛ pasɩɣnɩ-ɖʋ; pʋyɔɔ lɛ, ɖɩwɛnɩ mbʋ payɩ pɩpɔzʋʋ-ɖʋ yɔ se ɖɩwɛɛ abalɩtʋ nɛ ɖiwolo pɩ-yɔɔ nɛ ɖisusuu tɔm.

LA LƐƔZƖTƲ NƐ PƖMƲNƖ ƐYAA WƐTƲ NƐ ŊWƐƐNƖ LƖMAƔZA KƖBANA

11. Ɛbɛ pɩzɩɣ nɛ pɩsɩnɩ-ŋ nɛ ŋna ɛyaa sakɩyɛ alɩwaatʋ ndʋ ŋlɩɣ tɔm susuu yɔ? (Cɔnɩ ɖɔɖɔ kɩlɛmʋʋ.)

¹¹ Alɩwaatʋ ndʋ ŋwoki tɔm susuu nɛ ŋŋnaɣ ɛyaa sakɩyɛ ɖɩsɩ yɔ, pitiki-ŋ yɔɔɔ yaa we? Pɩwɛɣ ɖeu se ŋpɔzɩ ña-tɩ se: «Le mon-kooka taa mba wɛ alɩwaatʋ tʋnɛ tɩ-yɔɔ?» (Tʋma 16:13) «Ɛzɩ pɛwɛ tʋmɩyɛ taa yaa pɛɖɛ kɩyakʋ?» Ye pɩkɛ mbʋ yɔ, pɩtɩla ŋpɩzɩɣ nɛ ŋna ɛyaa sakɩyɛ ye ŋsusuu tɔm habɩyɛ yɔɔ yɔ. Payaɣ koobu abalɩñɩnʋ nɔɔyʋ se Joshua; ɛyɔɔdaa se: «Mehikiɣ waɖɛ nɛ monsusuu tɔm alɩwaatʋ ndʋ mɔnɖɔŋ faɣlɛɛ nɔsɩ nɛ ɖenɖe ɛyaa sakɩyɛ wɛɛ yɔ.» Ɛ nɛ ɛ-halʋ Bridget panaɣ ɖɔɖɔ ɛyaa sakɩyɛ ɖɩsɩ alɩwaatʋ ndʋ powoki pɛ-tɛ ɖanasɩ yɔɔ nɛ Kujukasɩ wɩsɩ wɛlʋʋ alɩwaatʋ taa yɔ.—Efɛz. 5:​15, 16.

12. Ɛbɛ pɩzɩɣ pɩsɩnɩ-ɖʋ nɛ ɖɩtɩlɩ mbʋ pɩ-yɔɔ ɛyaa tisiɣ yɔ yaa mbʋ pɩkɛ pa-kɩcɛyɩm yɔ?

¹² Ye toovenim tɔm ɛɛkɛdɩɣnɩ mba ŋkatɩɣ tɔm susuu taa yɔ, ñaɣ pana nɛ ŋñɩnɩ nɛ ŋna se ɛbɛ yɔɔ petisiɣ yaa ɛbɛ kɛnɩ pa-kɩcɛyɩm. Joshua nɛ Bridget palakɩnɩ tʋmɩyɛ tɔm pɔzʋʋ mbʋ pɩwɛ traktɩ kajalaɣ hayʋʋ yɔɔ yɔ alɩwaatʋ ndʋ papaɣzɩɣ kɛdaɣ yɔ. Kɩɖaʋ nakʋyʋ yɔ: Alɩwaatʋ ndʋ palakɩnɩ tʋmɩyɛ traktɩ ŋgʋ payaɣ se Takayaɣ ŋga Bibl kɛnaa? yɔ lɛ, pɔyɔɔdʋʋ se: «Ɛyaa nabɛyɛ maɣzɩɣ se Bibl lɩnɩ Ɛsɔ cɔlɔ, ɛlɛ lalaa iitisiɣ tɔm ndʋ tɩ-yɔɔ. Suwe ñamaɣzɩɣ?» Ðoŋ ɖoŋ lɛ, piyeki nɛ pa nɛ ɛyaa papaɣzɩɣ kɛdaɣ.

13. Paa ɛyaa iiwelisiɣni-ɖʋ tɔm susuu taa yɔ, ɛbɛ yɔɔ pɩtɩwɩlɩ se ɖɩtɩtalɩ ɖa-kaɖʋwa? (Aduwa 27:11)

¹³ Paa ɛyaa iiwelisiɣni-ɖʋ tɔm susuu taa yɔ, pɩtɩwɩlɩ se ɖɩtɩtalɩ ɖa-kaɖʋwa. Ɛbɛ yɔɔ? Mbʋ pʋyɔɔ yɔ ɖɩlabɩ mbʋ Yehowa nɛ ɛ-Pɩyalʋ pɔpɔzʋʋ-ɖʋ se ɖɩla yɔ: ɖɩlɩzɩ aseɣɖe. (Tʋma 10:42) Halɩ paa ɖɩtɩkatɩ nɔɔyʋ nɛ ɖisusi-i tɔm yaa paa ɛyaa ikizaa se paawelisiɣni-ɖʋ yɔ, ɖɩpɩzɩɣ nɛ ɖihiɣ taa leleŋ, mbʋ pʋyɔɔ yɔ ɖɩnawa se ɖa-Caa weyi ɛwɛ ɛsɔdaa yɔ, ɛ-taa wɛnɩ-ɖʋ nɛ leleŋ.—Kalɩ Aduwa 27:11.

14. Ɛbɛ yɔɔ ɖa-taa pɩzɩɣ nɛ pɩla leleŋ alɩwaatʋ ndʋ tɔm susuyu nɔɔyʋ lɩɣ laŋɩyɛ kɩbanɖɛ tʋ nɔɔyʋ yɔɔ ɖo-kooka taa yɔ?

¹⁴ Ða-taa pɩzɩɣ nɛ pɩla leleŋ ɖɔɖɔ alɩwaatʋ ndʋ tɔm susuyu nɔɔyʋ lɩɣ laŋɩyɛ kɩbanɖɛ tʋ nɔɔyʋ yɔɔ ɖo-kooka taa yɔ. Feŋuu Tilimiye kpaɣ ɖa-tʋmɩyɛ nɛ ɖɩmaɣzɩnɩ ɛzɩma pañɩnɩɣ pɩɣa ŋga keleba yɔ. Ɛyaa sakɩyɛ ɖʋʋ nesi nɛ pañɩnɩ pɩɣa ŋga paa le. Alɩwaatʋ ndʋ panaɣ pɩɣa ŋga yɔ, pɩtɩkɛ weyi ɛna-kɛ yɔ e-ɖeke ɛ-taa lakɩnɩ leleŋ, ɛlɛ paa weyi ɛ-taa lakɩ leleŋ. Mbʋ ɖɔɖɔ paa ɛgbɛyɛ taa tʋ weyi lɛ, ɛɖʋʋ nesi nɛ palakɩ Yesu tɔmkpɛlɩkɩyaa kɩfama. Pɩpɔzʋʋ se ɛgbɛyɛ taa mba tɩŋa ɩɖʋ nesi nɛ posusi kooka taa mba kpeekpe tɔm, nɛ alɩwaatʋ ndʋ nɔɔyʋ paɣzɩɣ kediɣzisi kɔm yɔ, ɛyaa tɩŋa taa lakɩ leleŋ.

KA ÑA-LƖMAƔZA SƆƆLƖM MBƲ ŊWƐNƖ YEHOWA NƐ ƐYAA LALAA YƆƆ YƆ PƖ-YƆƆ

15. Ye ɖɩɖɔŋ Maatiyee 22:​37-39 taa tɔm yɔɔ yɔ, ɛzɩma pɩsɩɣnɩ-ɖʋ se ɖɩwɛɛ kpekpeka tɔm susuu taa nɛ pɩkɩlɩ? (Cɔnɩ ɖɔɖɔ kɩlɛmʋʋ.)

¹⁵ Ye ɖɩkaŋ ɖa-lɩmaɣza sɔɔlɩm mbʋ ɖɩwɛnɩ Yehowa nɛ ɛyaa lalaa yɔɔ yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩwɛɛ kpekpeka tɔm susuu taa nɛ pɩkɩlɩ. (Kalɩ Maatiyee 22:​37-39.) Maɣzɩ nɛ ŋna leleŋ weyi Yehowa nɩɣ alɩwaatʋ ndʋ ɛnaɣ-ɖʋ ɖɩwɛɛ nɛ ɖɩlakɩ tɔm susuu tʋmɩyɛ yɔ, maɣzɩ ɖɔɖɔ nɛ ŋna leleŋ weyi ɛyaa nɩɣ alɩwaatʋ ndʋ papaɣzɩɣ Bibl kpɛlɩkʋʋ yɔ! Tɔzɩ ɖɔɖɔ se mba pewelisiɣ tɔm ndʋ ɖisusuu-wɛ yɔ nɛ palɩzɩɣ se pɛsɛɣ Yehowa yɔ, pakaɣ caɣʋ wezuu maatɛŋ.—Yoh. 6:40; 1 Tim. 4:16.

16. Ɛbɛ pɩzɩɣ pɩsɩnɩ-ɖʋ nɛ ɖihiɣ taa leleŋ ɖɔ-tɔm susuu taa alɩwaatʋ ndʋ ɖɩwɛɣ ɖa-ɖɩɣa nɛ ɖɩɩpɩzɩɣ se ɖɩlɩɩ yɔ? Ha kɩɖaŋ nɩɩyɩ.

¹⁶ Lɩmaɣza naayɛ yɔɔ lɛ, ŋwɛ ña-ɖɩɣa nɛ pɩɩsaŋ se ŋlɩɩnɩ awayɩ? Ye mbʋ yɔ, ka ña-lɩmaɣza mbʋ ŋpɩzɩɣ nɛ ŋla nɛ ŋwɩlɩ Yehowa nɛ ɛyaa lalaa ñɔ-sɔɔlɩm yɔ pɩ-yɔɔ. COVID-19 kʋdɔŋ alɩwaatʋ taa, Samuel nɛ Dania pataapɩzɩɣ se palɩɩnɩ awayɩ. Kaɖɛ alɩwaatʋ ndʋ tɩ-taa, patɩŋaɣnɩ kaŋgalaafu yɔɔ nɛ posusuu tɔm ɖoŋ ɖoŋ, pamaɣaɣ ɛyaa takayɩsɩ, nɛ patɩŋaɣnɩ zoom yɔɔ nɛ pɛkpɛlɩkɩɣnɩ ɛyaa Bibl. Nɛ alɩwaatʋ ndʋ Samuel wokaɣ ɖɔkɔtɔ nɛ palakɩ-ɩ kansɛɛrɩ kʋdɔŋ kɔyɛ yɔ, ɛlɩzaɣ aseɣɖe ɛyaa mba ɛkataɣ peeɖe yɔ. Ɛyɔɔdaa se: «Alɩwaatʋ ndʋ ɖɩkatɩɣ kala yɔ, ɖɩpɩzɩɣ nɛ ɖɩpaɣzɩ nɩɣzʋʋ, pɩpɩzɩɣ nɛ pɩnɩɩ-ɖʋ nɛ pɩpɩzɩɣ pɩtakɩ ɖe-tisuu. Pɩcɛyaa se ɖihiɣ taa leleŋ ɖɛ-Ɛsɔ sɛtʋ taa.» Alɩwaatʋ ndʋ, Dania kaatɔlaa, nɛ fenasɩ 3 pilim ɛtaapɩzɩɣ nɛ ɛkʋyʋʋnɩ ɛ-kaɖʋ yɔɔ. Pʋwayɩ lɛ, ɛcaɣ kaakalasɩ cɛɛcɛ taa fenasɩ 6. Ɛyɔɔdaa se: «Mañaɣ pana nɛ mala mbʋ payɩ mɛ-wɛtʋ haɣaɣ-m nʋmɔʋ se mala yɔ. Manpɩzaa nɛ monsusi tɔm ɖɔkɔtɔ weyi ɛkɔŋaɣ nɛ ɛnaɣ-m yɔ, nɛ mɔyɔɔdaɣnɩ ɖɔɖɔ mba pɔkɔŋaɣnɩ-ɖʋ wondu ɖɩɣa yɔ. Ma nɛ ɖɔkɔtɔ nakʋyʋ lone taa caɣyʋ nɔɔyʋ ɖɩlabɩ kɛdaɣ kɩbaŋa nakɛyɛ ɖɔɖɔ kaŋgalaafu yɔɔ.» Samuel nɛ Dania pɛ-wɛtʋ taahaɣ-wɛ nʋmɔʋ se pala ɛzɩ pɔsɔɔlʋʋ yɔ Yehowa sɛtʋ taa, ɛlɛ palabɩ mbʋ papɩzɩɣ yɔ nɛ piyeba nɛ pehiɣ taa leleŋ.

17. Ɛbɛ ŋpɩzɩɣ ŋla nɛ lɔŋ weyi patasɩ tɔm ñʋʋ kʋnɛ kɩ-taa yɔ ɩwazɩ-ŋ camɩyɛ?

¹⁷ Ñaɣ pana nɛ ŋɖɔ lɔŋ tasʋʋ 5 mbʋ pɩ-tɔm pɔyɔɔdɩ tɔm ñʋʋ kʋnɛ kɩ-taa yɔ pɩ-tɩŋa pɩ-yɔɔ. Paa lɔŋ tasʋʋ mbʋ lɛ, pɩwɛ ɛzɩ wondu ndʋ palakɩnɩ tɔɔnaɣ nakɛyɛ yɔ tɩ-taa natʋyʋ yɔ. Alɩwaatʋ ndʋ pɛkpɛndɩɣ wondu ndʋ tɩ-tɩŋa nɛ pesidi yɔ, tɔɔnaɣ ŋga kɛwɛɣ leleŋ. Ye ɖɩɖɔŋ lɔŋ tasʋʋ mbʋ pɩ-tɩŋa pɩ-yɔɔ yɔ, ɖɩkaɣ pɩzʋʋ nɛ ɖɩlʋbɩnɩ lɩmaɣza kɩdɛkɛda, nɛ piyeki nɛ ɖihiɣ taa leleŋ tɔm susuu tʋmɩyɛ taa.