Sɩnʋʋ ɖʋtʋ ndʋ Kewiyaɣ laba yɔ​—Ɛsɔ sɛtʋ kuduyuŋ maʋ nɛ asɛyʋʋ alɩwaatʋ taa ɛyaa sɩnʋʋ

ŊWƐƐ nɛ ŋɖɔŋ Kewiyaɣ Kpaaŋ taa, ɛlɛ pɩlakɩ-ŋ ɛzɩ pɩtɩkɛ ŋgʋ yɔ. Ŋnaɣ kuduyuu ŋgʋ paa ɛzɩmtaa lɛ, ña-taa wɛ leleŋ yem. Pɩtɩla pɩtɛm labʋ pɩnzɩ sakɩyɛ, ɛlɛ ŋwɛɛ nɛ ŋtɔzʋʋ nɛ taa leleŋ ɛzɩma ŋsɩnaa nɛ pama-kʋ yɔ. Ɛlɛ lɛɛlɛɛyɔ lɛ, ña-taa wɛ leleŋ nɛ pɩkɩlɩ mbʋ pʋyɔɔ pakpaɣ-kʋ se kɩpɩsɩ sɩnʋʋ lone alɩwaatʋ pazɩ. Helim sɔsɔm nabʋyʋ maba nɛ lɩm wadɩ nɛ pɩwɛɛkɩ wondu sakɩyɛ mi-kooka taa. Peeɖe ɛgbɛyɛ piliŋa taa kɔɔmiite kpaɣ lɩmaɣza se pasɩnɩ mba asɛyʋʋ talɩ-wɛ yɔ nɛ paha-wɛ tɔɔnasɩ, tokonaa, lɩm kɩbam nɛ wondu kɩcɛyɩtʋ lɛɛtʋ. Mbʋ pahawa se pɩsɩnɩ koobiya yɔ, pɔñɔɔzɩ-pʋ nɛ pasɩɩ camɩyɛ. Koobiya pɩlaa se pamʋ mbʋ pɩwazɩɣ-wɛ yɔ. Pa-taa sakɩyɛ wɛɛ nɛ pahɩzɩɣ taa leleŋ ɛzɩtɛɣlɩm pɛ-ɛzɩdaa.

Yesu kaayɔɔdaa se sɔɔlɩm mbʋ pɩwɛɣ ɛ-wayɩ tɩŋɩyaa hɛkʋ taa yɔ, mbʋ kaɣnɩ yebu nɛ lalaa tɩlɩ-wɛ. (Yohanɛɛsɩ 13:34, 35) Hɔɔlʋʋ kʋnɛ kɩ-taa ɖɩkaɣ naʋ ɛzɩma koobiya wɩlɩɣ ɖama sɔɔlɩm alɩwaatʋ ndʋ Yehowa Aseɣɖe Tɩnaa maɣ Ɛsɔ sɛtʋ kuduyuŋ yaa alɩwaatʋ ndʋ pasɩɣnɩ mba asɛyʋʋ nakʋyʋ talɩ-wɛ yɔ. Sɔɔlɩm mbʋ, pɩwɩlɩɣ kaɣlaa se Yesu Kewiyaɣ ɖiɣni ka-tʋmɩyɛ labʋ.