Mai

Hodo, 1^er mai

Ɛyaa tɩŋa . . . taa lakaɣ-ɩ nɛ leleŋ kʋjɔʋ tɔm kɩbandʋ ndʋ tɩlɩɣaɣnɩ ɛ-nɔɔ taa yɔ tɩ-yɔɔ. —Luka 4:22.

Ye ɖɩñaŋ ɛyaa lalaa nɛ ɖɩmaɣzɩɣ pa-kɩcɛyɩm yɔɔ yɔ, pɩkaɣ-ɖʋ sɩnʋʋ nɛ ɖɩyɔɔdɩnɩ-wɛ nɛ nɔɔ kɩbaŋa. Mbʋ Yesu kaalaba. Kɩyakʋ nakʋyʋ ɛna ɛyaa samaɣ nakɛyɛ kañakaɣ pana siŋŋ se kewelisini-i, nɛ ɛ-taa la leleŋ siŋŋ nɛ ɛkpaɣ alɩwaatʋ sakɩyɛ nɛ ɛwɩlɩnɩ-kɛ tɔm. (Mark. 6:34) Halɩ alɩwaatʋ ndʋ ɛyaa tʋwaɣ-ɩ yɔ, ɛtɩtʋʋ-wɛ. (1 Pɩy. 2:23) Ða nɛ ɖɔ-hɔʋ taa mba nɛ ɖa-taabalaa ɖɩmalɩnɩ ɖama camɩyɛ, nɛ pʋyɔɔ lɛ pɩpɩzɩɣ nɛ pɩlabɩ-ɖʋ kaɖɛ se ɖɩyɔɔdɩnɩ-wɛ nɛ nɔɔ kɩbaŋa. Ðɩpɩzɩɣ nɛ ɖɩmaɣzɩ se pɩtɩcɛyɩ se ɖɩkpa ɖa-tɩ nɛ ɛzɩma ɖɩyɔɔdʋʋnɩ-wɛ yɔ. Ɛlɛ wiɖiyi Yesu tɩñasɩ ɛ-tɔmkpɛlɩkɩyaa tɔm. Alɩwaatʋ ndʋ pa-taa nabɛyɛ yowaɣ sɔsɔtʋ yɔɔ yɔ, ɛtasɩ-wɛ lɔŋ nɛ nɔɔ kɩbaŋa. Ɛkpaɣ pɩɣa cikpelaɣ nakɛyɛ nɛ ɛhanɩ-wɛ kɩɖaʋ se pɩsɩnɩ-wɛ nɛ pɔñɔɔzɩ pa-lɩmaɣza. (Mark. 9:33-37) Ɛgbɛyɛ taa ɛzʋtʋyaa pɩzɩɣ nɛ pamaɣzɩnɩ Yesu nɛ patasɩ lalaa lɔŋ nɛ nɔɔ kɩbaŋa.—Gal. 6:1. w15 1/12 3:15, 16

Piya, 2 mai

Ɩwɛɛ koobiye sɔɔlɩm taa. —Ebr. 13:1.

Ɛbɛ yɔɔ pɩcɛyaa kpem se ɖɩwɩlɩ ɖama koobiye sɔɔlɩm? Tobi lɛ, Yehowa heyiɣni-ɖʋ se ɖɩla mbʋ. Ye ɖikizaa se ɖɩɩsɔɔlʋʋ ɖo-koobiya yɔ, ɖɩɩpɩzɩɣ nɛ ɖɩtɔ se ɖɩsɔɔlɩ Yehowa toovenim taa. (1 Yoh. 4:7, 20, 21) Lɩmaɣzɩyɛ lɛɛɖɛ nɖɩ ɖɩ-yɔɔ pɩwɛɛ se ɖɩwɛɛnɩ koobiye sɔɔlɩm yɔ lɛ se pɩpɔzʋʋ se ɖɩsɩnɩ ɖama, kɔzɩ kɔzɩ kaɖɛ alɩwaatʋ taa. Alɩwaatʋ ndʋ Pɔɔlɩ kaama takayaɣ Ebree Krɩstʋ mba yɔ, ɛɛnawa se piileɖiɣ lɛ pakaɣ seu nɛ peyele pa-ɖɩsɩ nɛ po-wondu lɛɛtʋ. Yesu kaayɔɔdɩ ɛzɩma alɩwaatʋ ndʋ tɩkaɣ wɛʋ kaɖɛ kpem yɔ. (Mark. 13:14-18; Luka 21:21-23) Ye mbʋ, pʋcɔ nɛ alɩwaatʋ ndʋ tɩtalɩ lɛ, pɩɩwɛɛ se Ebree Krɩstʋ ñɩma mba, pakpazɩ sɔɔlɩm mbʋ pɩwɛ pɛ-hɛkʋ taa yɔ ɖoŋ. (Roma 12:9) Kʋñɔŋ sɔsɔʋ ñɔtɩ kpam. (Mark. 13:19; Natʋ 7:1-3) Ɛlɛ ɖiiwoki kediɣzisi ɖoŋ ɖoŋ se ɖɩkatɩ ɖo-koobiya yem na. Pɔɔlɩ kaatɔzɩ Ebree Krɩstʋ mba se pɩcɛyaa se pakpazɩ ɖama sɔɔlɩm ɖoŋ, nɛ pala ɖama kɩbandʋ.—Ebr. 10:24, 25. w16.01 1:6-8

Cɩla, 3 mai

Fezuu kiɖeɖeu su pa-tɩŋa pa-taa.—Tʋma 2:3, 4.

Pɩɩkɛ Pantekooti wiye pɩnaɣ 33 taa. Lakasɩ nzɩ, situkuni Yesu tɔmkpɛlɩkɩyaa 120 mba paakpeɣlaa nɛ patɩmɩɣ ɛsɔdaa kuduyuu nakʋyʋ tɛɛ Yerusalɛm yɔ. (Tʋma 1:13-15) Mbʋ pɩɩlabɩ-wɛ puwiye yɔ, piyeki se nayʋ Yowɛɛlɩ tɛ natʋ tɔm ɛla. (Yow. 2:28-32; Tʋma 2:16-21) Ɛsɔ fezuu kiɖeɖeu tibi Krɩstʋ ñɩma mba paawɛɛ nɛ patɩmɩɣ ɛsɔdaa kuduyuu nakʋyʋ tɛɛ Yerusalɛm yɔ, pɔ-yɔɔ nɛ papɩsɩ patam numwaa. (Tʋma 1:8) Pʋwayɩ lɛ, ɛyaa samaɣ nakɛyɛ ñɔtɩnɩ patam numwaa mba, nɛ paba ñapaɣzɩ-kɛ heyuu Ɛsɔ tʋma sɔsɔna wena panawa nɛ panɩɩ yɔ a-tɔm. Peeɖe apostoloo Pɩyɛɛrɩ lɩzɩ ɛyaa samaɣ lakasɩ sɔsɔsɩ nzɩ sɩ-tɔbʋʋ nɛ mbʋ pʋyɔɔ sɩ-tɔm cɛyaa yɔ. Nɛ pʋwayɩ lɛ, eheyi samaɣ ŋga se: “Ɩpɩsɩ mɩ-laŋa nɛ mɩ-taa paa weyi lɛ, ɛla nɛ pɔsɔ-ɩ lɩm Yesu hɩɖɛ taa nɛ pekpeɣ-i ɛ-kɩwɛɛkɩm. Ðɩnɛ ɛlɛ ɩmʋʋ fezuu kiɖeɖeu kʋjɔʋ.” Kɩyakʋ ŋgʋ ki-wiye, pamɩyɩsɩ ɛyaa ɛzɩ 3000 mbʋ yɔ lɩm nɛ fezuu kiɖeɖeu tii pɔ-yɔɔ ɖɔɖɔ.—Tʋma 2:37, 38, 41. w16.01 3:1-3

Saɖakawaɣ, 4 mai

Weyi ɛtɔkɩ tɔɔnaɣ ŋga, yaa ɛñɔʋ caɖaɣ ŋga nɛ azuluma yɔ, ehikiɣ ɛkpɛkɩ Kɩbaɣlʋ tomnaɣ nɛ ɛ-calɩm pɔ-yɔɔ. —1 Kɔr. 11:27.

Ɛzɩma tɩyɛ patam num nɔɔyʋ pɩzɩɣ nɛ ɛtɔɔ kpɔnʋ nɛ ɛñɔɔ vɛɛ nɛ “azuluma” Yesu sɩm yɔɔ tɔzʋʋ sɔnzɩ wiye? Ye taabalɩyɛ kɩbanɖɛ ɛfɛyɩ ɛ nɛ Yehowa pɛ-hɛkʋ taa nɛ ɛtɩɖɔkɩ e-siɣsiɣ wɛtʋ ɛlɛ ɛtɔɔ kpɔnʋ nɛ ɛñɔɔ vɛɛ kɔyɔ, pɩkɛ kaañamtʋ. (Ebr. 6:4-6; 10:26-29) Tɔm ndʋ, tɩtɔzʋʋ patam numwaa se ye pañɩnɩɣ se pamʋ ‘kɩhɛyʋʋ ŋgʋ Ɛsɔ yaɣ-wɛ nɛ hayo kiŋ Krɩstʋ taa se ɛhɛyɩ-wɛ yɔ,’ pɩwɛɛ se pɔɖɔkɩ pe-siɣsiɣ wɛtʋ kpam. (Fil. 3:13-16) Pɔɔlɩ heyi patam numwaa se: “Mbʋ lɛ mentendiɣ-mɩ, ma salaka tʋ Kɩbaɣlʋ taa, se ɩɖɔ ɖɔnɛ nɖɩ ɖɩmʋnɩ mɩ-yatʋ yɔ.” Ɛzɩma papɩzɩɣ nɛ pala mbʋ? Pɔɔlɩ lɩzɩ pɩ-taa se: “Mɩ-tɩ luzuu pilim, laŋɩyɛ kɩbanɖɛ, mɩ-tɩ ɖɔkʋʋ taa, ɩkatɩ ɖama nɛ sɔɔlɩm, ɩcɛyɩ mɩ-tɩ nɛ ɩkpɛndɩ fezuu nɔɔ kʋyʋmaɣ nɛ pɩtɩŋnɩ laŋhɛzɩyɛ taŋgbaka nimaɣ yɔɔ.” (Efɛz. 4:1-3) Fezuu kiɖeɖeu sɩɣnɩ Ɛsɔ sɛyaa se pɛwɛɛnɩ tɩ luzuu nɛ pataakpazɩ pa-tɩ.—Kol. 3:12. w16.01 4:5, 6

Kemeɣa, 5 mai

Ɛsɔ takɩ Abraham se ɛna. —Kiɖe 22:1.

Maɣzɩ se ŋɖiɣni naʋ Abraham, ɛwɛnɩ pɩnzɩ 125, eɖiɣni ɖɔm hɛɛɛ hɛɛɛ nɛ ɛkpaɣ pʋʋ nakʋyʋ. Ɛ-pɩyalʋ Izaakɩ weyi ɛɛwɛnɩ pɩnzɩ 25 yɔ, ɛwɛɛ nɛ ɛtɩŋɩɣ ɛ-wayɩ. Izaakɩ hɔɔlɩ ɖasɩ, nɛ Abraham ñɔɖɔkɩ sɩɣa nɛ mbʋ eepuzini miŋ yɔ. Pʋtɔma yɔ, wiɖiyi Abraham taaɖɔ nʋmɔʋ kaɖɛ ñɩŋgʋ nakʋyʋ mbʋ nɛ ɛna. Ɛlɛ pɩtɩkɛ ɛkpadɩyaa yɔɔ nʋmɔʋ ŋgʋ kɩ-ɖɔm kaawɛ-ɩ kaɖɛ, mbʋ pʋyɔɔ yɔ alɩwaatʋ ndʋ tɩ-taa ɛɛwɛnɩ e-ɖoŋ. Nʋmɔʋ ŋgʋ kɩ-ɖɔm kaawɛ-ɩ kaɖɛ mbʋ pʋyɔɔ yɔ, Yehowa kaapɔzɩ-ɩ se ɛkpaɣ ɛ-pɩyalʋ nɛ ɛlaa. (Kiɖe 22:1-8) Pɩtʋʋ fɛyɩ se mbʋ Yehowa pɔzɩ Abraham se ɛla yɔ, pɩɩtakɩ e-tisuu siŋŋ. Ɛlɛ Abraham taañaŋ Ɛsɔ se pɔtɔm se pañamɩ-ɩ. Ɛñaŋaɣ Yehowa mbʋ pʋyɔɔ yɔ ɛɛwɛnɩ tisuu siŋŋ. Ɛɛnawa se Yehowa ɛɛkaɣ-ɩ pɔzʋʋ kpa se ɛla mbʋ pɩpɩzɩɣ nɛ pɩkɔnɩ-ɩ kaɖɛ tam yɔ. Abraham kaanawa ɖɔɖɔ se ye ɛñam Yehowa kɔyɔ, Yehowa kaɣ ɛ nɛ ɛ-pɩyalʋ kʋsɔɔlʋ wazʋʋ. Ɛbɛ kaasɩnɩ Abraham nɛ ɛpɩzɩ ɛwɛɛnɩ tisuu sɔsɔm mbʋ? Sɩmtʋ nɛ mbʋ ɛna e-wezuu caɣʋ taa yɔ. w16.02 1:3, 4

Mazaɣ, 6 mai

[Yehowa] lɩmɖʋyʋ yɔ ma, pɩlabɩ-m ɛzɩ ɛyɔɔdʋʋ yɔ.—Luka 1:38.

Yehowa heyi Maarɩɩ se ɛkaɣ haɣʋ hoɣa nɛ ɛlʋlɩ Ɛsɔ Pɩyalʋ. Ðoŋ ɖoŋ lɛ, ɖɩyɔɔdʋʋ se hɩɖɛ sɔsɔɖɛ kpem Ɛsɔ ɖʋ Maarɩɩ. Ɛlɛ pʋtɔma yɔ, sɔɔndʋ kaakpa Maarɩɩ. Tiyiyu Gabrɩyɛɛlɩ heyi-i se ɛkaɣ haɣʋ hoɣa ɛlɛ ɛ nɛ abalʋ paasʋʋnɩ ɖama. Ɛlɛ Gabrɩyɛɛlɩ tiheyi ɛ-hɔʋ taa mba nɛ ɛ-cɔlɔ mba ɛzɩma pɩkaɣ ɖɔm nɛ ɛhaɣ hoɣa ŋga yɔ. Alɩwaatʋ ndʋ panaɣ-ɩ nɛ hoɣa yɔ, suwe pakaɣ maɣzʋʋ? Suwe ɛkaɣ heyuu ɛ-ɖaŋ Yosɛɛfʋ nɛ ɛlɛ tisi se pɩtɩkɛ hayitu ɛlaba? Pɩtasɩ lɛ, pɩɩkɛnɩ-ɩ tʋmɩyɛ sɔsɔɖɛ kpem se ɛcɔnɩ Ɛsɔ Pɩyalʋ yɔɔ nɛ ɛpaɣlɩ. Toovenim taa lɛ, ɖɩtɩtɩlɩ ndʋ Maarɩɩ maɣzaɣ yɔ tɩ-tɩŋa, ɛlɛ ɖɩnawa se ɛyɔɔdɩ tɔm ndʋ tɩwɛ sɔnɔ mayaɣ taa yɔ.—Luka 1:26-37. w16.02 2:13, 14

Kujuka, 7 mai

Arikiiti tʋ Usaayii katɩ-ɩ, ɛ-yɔɔ toko cɩyaa nɛ ɛ-ñʋʋ taa tɔlɩma ɖo.—2 Sam. 15:32.

Usaayii kaakɛ Wiyaʋ Daviid taabalʋ kɩbanʋ nɔɔyʋ. Alɩwaatʋ ndʋ samaɣ ñɩnaɣ se kakpa Absalɔm wiyaʋ yɔ, pɩɩwɛɛ se Usaayii ɛwɛɛ abalɩtʋ pʋcɔ nɛ ɛñɔɔnɩ Daviid nɛ Ɛsɔ. Ɛɛnawa se Absalɔm nɛ ɛ-sɔɔjanaa paasʋ Yerusalɛm tɛtʋ taa nɛ Daviid ñalɩɩ nɛ ese. (2 Sam. 15:13; 16:15) Ɛlɛ ɛbɛ Usaayii ñalaba? Ɛzɩ ɛha Daviid siɣye nɛ ɛtɩnɩ Absalɔm yɔɔ? Aayɩ. Paa Daviid kaakpadɩyaa nɛ ɛyaa sakɩyɛ ñɩnɩɣ se pakʋ-ɩ yɔ, Usaayii ñɔnɩ-ɩ kpam mbʋ pʋyɔɔ yɔ ɛɛnawa se Yehowa lɩzɩnɩ-ɩ se ɛkɛ wiyaʋ. Mbʋ yebina nɛ Usaayii wolo ɛkatɩ Daviid Somiŋ Pʋʋ yɔɔ. (2 Sam. 15:30, 32) Daviid heyi Usaayii se ɛpɩsɩ Yerusalɛm nɛ ɛla ɛzɩ ɛkɛ Absalɔm taabalʋ yɔ, nɛ Absalɔm welisi ɛ-lɔŋ tasʋʋ nɛ eyele Ahitofɛɛlɩ ñɩmbʋ. Usaayii kaawɛ abalɩtʋ, pʋyɔɔ etisaa nɛ ɛɖʋ e-wezuu kaɖɛ taa se pɩsa nɛ ɛña Daviid nɛ ɛñɔɔnɩ Yehowa. Daviid tɩmnɩ Yehowa se ɛsɩnɩ Usaayii, nɛ Yehowa cosi ɛ-adɩma yɔɔ. Absalɔm welisi Usaayii lɔŋ tasʋʋ nɛ eyele Ahitofɛɛlɩ ñɩmbʋ.—2 Sam. 15:31; 17:14. w16.02 4:15, 16

Hodo, 8 mai

Wazasɩ kpeekpe sɩnɛ yɔ sɩkaɣ tibu ñɔ-yɔɔ, nɛ sɩsʋ-ŋ, ye ŋwelisiɣ [Yehowa] ñɛ-Ɛsɔ nɔɔ kɔyɔ. —Wp. 28:2.

Paɣtʋ ndʋ Yehowa kaatɩŋnɩ Moyizi yɔɔ nɛ ɛcɛlɩ Izrayɛɛlɩ piya yɔ, tɩwazɩɣ-ɖʋ sɔnɔ. Ɛzɩma tɩyɛ? Ðɩpɩzɩɣ ɖɩsɩŋ nɛ ɖɩcɔna yaa ɖɩmaɣzɩ paɣtʋ kila wena awɛ paɣtʋ ndʋ tɩ-taa yɔ a-yɔɔ. Paa ɖɩtɩtasɩ wɛʋ Moyizi Paɣtʋ tɛɛ kɔyɔ, tɩ-hɔɔlɩŋ sakɩyɛ pɩzɩɣ nɛ iɖiyi-ɖʋ ɖe-wezuu caɣʋ taa nɛ ɖɛ-Ɛsɔ sɛtʋ taa. Yehowa yeba nɛ pama Paɣtʋ ndʋ Bibl taa se tɩkpɛlɩkɩ-ɖʋ lɔŋ, tiɖiyi-ɖʋ, nɛ ɖɩwɛɛnɩ ɛsɩmɩyɛ se Yesu wɩlɩ-ɖʋ paɣtʋ kila wena akɩlɩ ɖeu Moyizi Paɣtʋ yɔ. Welisi tɔm ndʋ Yesu yɔɔdaa yɔ. Ɛtɔm se: “Ɩnɩwa pɔtɔm se: Taacaa lɛlʋ halʋ. Ma yɔ, meheyiɣ-mɩ se weyi ɛcɔnɩ halʋ nɔɔyʋ nɛ e-liu tɛɛ kɔtɩnɩ-ɩ kɔyɔ, ɛtɛmɩ-ɩ sʋnʋʋ ɛ-laŋɩyɛ taa.” Ye mbʋ, pɩtɩkɛ acɛyɛ labʋ ɖeke pɩwɛɛ se ɖikizi ɛlɛ pɩwɛɛ ɖɔɖɔ se ɖɩlɔ kʋzʋʋ kɩdɛkɛdʋʋ lɩmaɣza tɩŋa.—Mat. 5:27, 28. w16.03 4:6, 8

Piya, 9 mai

Sɩɩ-ɖʋ wiyaʋ nɛ ɛhʋʋ ɖɔ-tɔm. —1 Sam. 8:5.

Samɩyɛɛlɩ taasɔɔlɩ se ɛla mbʋ Izrayɛɛlɩ piya pɔzɩ-ɩ yɔ, pʋyɔɔ Yehowa heyi-i tam nabudozo se ewelisini-sɩ nɛ ɛsɩɩ-sɩ wiyaʋ. (1 Sam. 8:7, 9, 22) Paa mbʋ yɔ, Samɩyɛɛlɩ tɩla sʋsɩ yaa pɩtɩwɩzɩ-ɩ nɛ ɛyʋ weyi pakaɣ lɩzʋʋ se ɛlɛɣzɩ e-lone taa nɛ eɖiyi Izrayɛɛlɩ piya yɔ. Alɩwaatʋ ndʋ Yehowa heyi-i se ɛtaa Sɔɔlɩ num yɔ, ɛtɩpɩtɩ ɛ-taa paa ññɩɩ. Etisi faaa nɛ ɛɖɔ Yehowa paɣtʋ yɔɔ mbʋ pʋyɔɔ yɔ ɛɛsɔɔlɩ-ɩ. Ɛtɩla ɛzɩ pakpa-ɩ nɛ ɖoŋ kɩkpaʋ yɔ. Sɔnɔ ɛgbɛyɛ taa ɛzʋtʋyaa sakɩyɛ mba papɩ pa-tʋmɩyɛ labʋ taa yɔ, pamaɣzɩɣnɩ Samɩyɛɛlɩ nɛ pafalɩsɩɣ lalaa nɛ sɔɔlɩm. (1 Pɩy. 5:2) Ɛzʋtʋyaa kɩbama mba, petisiɣ faaa se pafalɩsɩ koobiya lalaa, nɛ sɔɔndʋ ɛɛkpaɣ-wɛ se pa nɛ wɛ patayɩ wala wena pɛwɛnɩ ɛgbɛyɛ taa yɔ. Ɛlɛ ‘pe-liu wɛɛ se pa nɛ wɛ pala tʋmɩyɛ’ nɛ pasɩnɩ-wɛ nɛ pɔcɔnɩ ɛgbɛyɛ taa kɩcɛyɩm yɔɔ. (2 Kɔr. 1:24, ABT; Ebr. 13:16) Nɛ alɩwaatʋ ndʋ ɛzʋtʋyaa mba, panaɣ se koobiya mba peɖiɣni falɩsʋʋ yɔ pakpakɩɣ lɛɣtʋ ndʋ pɛkpɛlɩkaa yɔ nɛ pasɩɣnɩ Yehowa samaɣ lɛ, pa-taa lakɩ leleŋ kpem.—Tʋma 20:35. w15 1/4 1:16, 17

Cɩla, 10 mai

Mɔnkɔŋ ña-nɩŋgbaŋʋʋ hɔm, tɔm tɩŋ tɛɛ, nɛ mankaɣ-ŋ fɛʋ ɛzɩ hɩlɩm nɛ nɔɔ tʋ yɔ. —Yer. 30:11.

Wiyaʋ Azariya wobi pɩ-yɔɔ nɛ ɛlakɩ “mbʋ pɩkɛdɩnɩ” Yehowa yɔ. (2 Aw. 15:1-5) Paa mbʋ yɔ, Yehowa hɔm Azariya nɩŋgbaaŋ nɛ ɛla nɛ canatʋ kpa-ɩ. Ɛbɛ yɔɔ? Kɛdaɣ kanɛ ka-taa lɛ, Bibl tiheyi-ɖʋ mbʋ pʋyɔɔ Yehowa labɩ mbʋ yɔ. Ye mbʋ, suwe ŋmaɣzɩɣ mbʋ Yehowa laba yɔ pɩ-yɔɔ? Tɔm ndʋ, tɩcɛyɩɣ-ŋ nɛ ŋmaɣzɩɣ se Yehowa lakasɩ fɛyɩ siɣsiɣ mbʋ pʋyɔɔ yɔ, ɛhɔm Azariya nɩŋgbaaŋ ɖulum na? Ye ŋsɩm Yehowa camɩyɛ yɔ, ŋkaɣ tɩlʋʋ se ɛ-nɩŋgbaaŋ hɔmtʋ wɛ siɣsiɣ tam. Payaɣ Wiyaʋ Azariya Bibl taa ɖɔɖɔ se Wiyaʋ Uziya. (2 Aw. 15:7, 32) Kɛdaɣ ŋga kɛwɛ 4 Awiya 26:3-5, 16-21 taa yɔ, kɔyɔɔdaa se ɛɛlabɩ “mbʋ pɩwɛ siɣsiɣ yɔ” Yehowa ɛzɩdaa. Ɛlɛ kɛdaɣ ŋga, katasɩ yɔɔdʋʋ se pʋwayɩ lɛ “ɛkpazɩ ɛ-tɩ nɛ pʋɖʋzɩ-ɩ.” Wiyaʋ Azariya kʋyaa se ɛlakɩ tʋmɩyɛ nɖɩ pɩɩmʋnaa se cɔjɔnaa yeke ɩlabɩna yɔ. Cɔjɔnaa 81 heyi-i se mbʋ ɛcaɣ labʋ yɔ pɩkɛ kɩwɛɛkɩm, nɛ pañaɣ pana se pakpa-ɩ. Ɛzɩma ɛlaba? Ɛkɔ-wɛ nɛ pana siŋŋ mbʋ pʋyɔɔ yɔ ɛpɩsɩ tɩ kpazɩyʋ sɔsɔ. Tɔm ndʋ tɩwɛ kɛdaɣ kanɛ ka-taa yɔ, tɩsɩɣnɩ-ɖʋ se ɖɩna mbʋ pʋyɔɔ Yehowa hɔm Wiyaʋ Azariya nɩŋgbaaŋ nɛ ɛpɩsɩ canaɣ yɔ. w15 1/4 3:8, 9

Saɖakawaɣ, 11 mai

Pɔlɔ Ðʋmanʋʋ sɔsɔʋ ŋgʋ, ɖooo lɔŋ taa ɖʋm, eleeu, yaa Sataŋ, ɛzɩ payaʋ-ɩ yɔ, ɛjaɖɛ kpeekpe peɣziyu.—Natʋ 12:9.

Ɛzɩ pɔyɔɔdʋʋ nɛ pɩɖɛɛ yɔ, paya Sataŋ se “Eleeu” yaa Yiliyu, pʋ-tɔbʋʋ lɛ se “Kɔlɔmɔtʋ tʋ.” Pɩtɔzʋʋ-ɖʋ ɛzɩma Sataŋ kaawɛɛkɩ Yehowa hɩɖɛ alɩwaatʋ ndʋ ɛtɔm se Ɛsɔ kɛ cɛtɩyʋ yɔ. Paya-ɩ ɖɔɖɔ se “ɖooo lɔndaa ɖʋm” nɛ pɩtɔzʋʋ-ɖʋ ɛzɩma ɛɛtɩŋnɩ ɖʋm yɔɔ Edɛɛnɩ kaɖaɣ taa nɛ epeɣzi Ɛva yɔ. Patasɩ Sataŋ yaʋ se “ɖʋmanʋʋ sɔsɔʋ,” mbʋ pʋyɔɔ yɔ ɛñɩnɩɣ kpem se ɛwɛɛkɩ Yehowa tamaɣ nɛ eɖezi ɛ-samaɣ. Pɩtʋʋ fɛyɩ se Sataŋ ñɩnɩɣ kpem se ɛwɛɛkɩ ɖa-cɩŋgɩlɩm wɛtʋ. Pʋyɔɔ Bibl tasɩɣ-ɖʋ lɔŋ se: “Ɩɖaŋ mɩ-tɩ yɔɔ. Mi-koyindu Eleeu pabɩ mɩ-cɔlɔ nɛ ɛmʋdʋʋ ɛzɩ mʋʋzʋʋ yɔ, nɛ ɛñɩnɩɣ se ehiɣ nɔɔyʋ nɛ ɛtɔɔ.” (1 Pɩy. 5:8) Pɩtʋʋ fɛyɩ se alɩwaatʋ ndʋ Ɛsɔ sɛyʋ nɔɔyʋ lakɩ kɩwɛɛkɩm sɔsɔm nabʋyʋ yɔ, Sataŋ taa lakɩ leleŋ pɩdɩɩfɛyɩ. Toovenim taa lɛ, Sataŋ tɩŋɩɣnɩ lakasɩ nzɩ sɩ-yɔɔ nɛ ɛtʋʋ Yehowa.—Ad. 27:11. w15 1/5 1:3, 4, 10

Kemeɣa, 12 mai

Kʋñɔmɩŋ kpeekpe liɖe lɛ liidiye lazaɣ.—1 Tim. 6:10.

Ðɩnawa se Yehowa sɔɔlaa se nabʋyʋ ɛtaatɛɖɩ-ɖʋ ɖe-wezuu caɣʋ taa, mbʋ pʋyɔɔ yɔ alɩwaatʋ ndʋ ɛlɩzɩ Aɖam nɛ Ɛva yɔ ɛɛsɩ-wɛ paradisuu kɩbaŋʋ nakʋyʋ taa na. (Kiɖe 2:9) Ɛlɛ Sataŋ pɩzɩɣ nɛ ɛtɩŋnɩ “ñɩm cɛzɩm” yɔɔ nɛ epeɣzi-ɖʋ. (Mat. 13:22) Ɛyaa sakɩyɛ maɣzɩɣ se ye pɛwɛnɩ liidiye yɔ pehikiɣ koboyaɣ, yaa ye pɛwɛnɩ ɛjaɖɛ yɔɔ wondu sakɩyɛ yɔ, pɩwɩlɩɣ se pehiɣ pa-tɩ. Ye ɖɩmaɣzɩɣ mbʋ yɔ, pɩpɩzɩɣ piyele nɛ ɖilesi ñɩm sɔsɔm mbʋ ɖɩwɛna yɔ, pʋ-tɔbʋʋ lɛ se ɖa nɛ Yehowa ɖa-taabalɩyɛ. Yesu heyi ɛ-wayɩ tɩŋɩyaa se: “Nɔɔyʋ ɛɛpɩzɩɣ ɛwɛɛnɩ caanaa naalɛ mbʋ pʋyɔɔ yɔ, yaa ɛsɔɔlʋʋ lɛlʋ nɛ ɛpaɖɩ lɛlʋ, yaa ɛmalɩɣnɩ lɛlʋ nɛ ese lɛlʋ. Ɩɩpɩzɩɣ ɩla Ɛsɔ nɛ liidiye pa-tʋmɩyɛ.” (Mat. 6:24) Ye ɖɩlakɩ liidiye tʋmɩyɛ ɖeke na yɔ, pɩwɩlɩɣ se ɖiyebi Yehowa sɛʋ. Nɛ mbʋ ɖeyi ɖeyi Sataŋ sɔɔlaa se ɖɩla. Ðitaayele kpa nɛ liidiye yaa mbʋ liidiye pɩzɩɣ nɛ pɩya yɔ, pɩwɛɛkɩ ɖa nɛ Yehowa ɖa-taabalɩyɛ. Ye ɖɩñɩnɩɣ se ɖɩlʋbɩnɩ Sataŋ nɛ ɖɩwabɩ-ɩ yɔ, pɩwɛɛ se ɖɩwɛɛnɩ lɩmaɣza kɩbana ñɩm yɔɔ.—1 Tim. 6:6-10. w15 1/5 2:12

Mazaɣ, 13 mai

Piliŋa nakɛyɛ nɩɣ siziŋ, pilinzi kpeekpe sɩŋnɩ-kɛ siziŋ nɩʋ. —1 Kɔr. 12:26.

Pɩfɛyɩ kɛlɛʋ paa ɛzɩmtaa se ɖɩnɩɩ siziŋ weyi ɛyaa lalaa nɩɣ yɔ, kɔzɩ kɔzɩ ye mbʋ pɩ-taa pɛwɛɛ yɔ pɩtɩtalɩ-ɖʋ wiɖiyi yɔ. Ðo-koobiya sakɩyɛ nɩɣ siziŋ mbʋ pʋyɔɔ yɔ pɩwɩɣ-wɛ yaa palabɩ kɛgbɛdɩsaɣ nakɛyɛ nɛ pɩkʋ-wɛ yaa pakpadɩyaa. Nabɛyɛ ñanɩɣ siziŋ mbʋ pʋyɔɔ yɔ pɛwɛnɩ lɩmaɣza taa kʋdɔŋ, yaa paalabɩ-wɛ kɩdɛkɛdɩm nabʋyʋ nɛ pɔtɔzʋʋ pɩ-yɔɔ. Lalaa ñanɩɣ siziŋ mbʋ pʋyɔɔ yɔ pe-ɖeke pɔcɔŋnɩnɩ pe-piya yɔɔ, yaa pɔ-hɔʋ taa mba nabɛyɛ ɩɩsɛɣ Yehowa. Ða-taa paa weyi lɛ ɛkatɩɣ kala, ɛlɛ sakɩyɛ taa lɛ, kala wena lalaa katɩɣ yɔ awɛ ndɩ nɛ ɖa-ñɩna. Ɛlɛ ɖɩsɔɔlaa se ɖɩwɩlɩ lalaa se ɖɩsɔɔlɩ-wɛ nɛ ɖɩñɩnɩɣ se ɖɩsɩnɩ-wɛ. Ye mbʋ, ɛbɛ ɖɩpɩzɩɣ nɛ ɖɩla? Paa weyi lɛ, ɛ nɛ ɛ-kɩcɛyɩm. Pʋyɔɔ lɛ, ye ɖiwelisiɣni paa weyi lɛ camɩyɛ nɛ ɖɩñakɩ pana se ɖɩnɩɩ siziŋ weyi ɛnɩɣ kɔyɔ, pɩkaɣ-ɖʋ sɩnʋʋ nɛ ɖɩtɩlɩ ɛzɩma ɖɩsɩnɩ-ɩ camɩyɛ nɛ pɩkɩlɩ yɔ. Ðɩpɩzɩɣ nɛ ɖɩtɔzɩ-ɩ se Yehowa sɩm ɛ-tɩlasɩ nɛ siziŋ weyi ɛnɩɣ yɔ, yaa ɖɩpɩzɩɣ ɖɩla nabʋyʋ nɛ ɖɩsɩnɩ-ɩ. Ye ɖɩlakɩ mbʋ yɔ, ɖɩwɛɛ nɛ ɖɩmaɣzɩɣnɩ Yehowa sɔɔlɩm.—Roma 12:15; 1 Pɩy. 3:8. w15 1/5 4:6, 7

Kujuka, 14 mai

Krɩstʋ kɛnɩ Ɛsɔ ɖoŋ.—1 Kɔr. 1:24.

Ɛsɔ Ðoŋ Tɩŋa Tʋ Yehowa hanɩ Yesu ɖoŋ. Pʋyɔɔ lɛ, ɖɩɩpɩtɩɣ se Yehowa wɛnɩ ɖoŋ wondu kɩlɩzɩtʋ yɔɔ. Ðɩna kɩɖaŋ nɩɩyɩ. Pʋcɔ nɛ Tɛʋ Sɔsɔʋ nɩɣ Noa alɩwaatʋ taa lɛ, Yehowa yɔɔdaa se: “Pɩkazɩ kɩyakɩŋ lʋbɛ nɛ meyele tɛʋ nɛ kɩnɩɩ kɩyakɩŋ nɩɩnaza nɛ ɖoo nɩɩnaza.” (Kiɖe 7:4) Pɔyɔɔdɩ Egipiti Lɩʋ 14:21 taa ɖɔɖɔ se: “[Yehowa] pɩsɩnɩ lɩm kiŋgiɖe nɛ helim ɖoŋ ñɩmbʋ mbʋ pɩlɩɣaɣnɩ wɩsɩ ɖɩlɩyɛ taa yɔ.” Nɛ ɖɩkalɩɣ Yoonaasɩ 1:4 taa se: “[Yehowa] tiyi helim sɔsɔm pɔɔ yɔɔ nɛ pɩla kancʋʋlaɣ sɔsɔɔ pɔɔ yɔɔ nɛ mɛlɛ yɔkaɣ.” Pɩlakɩ-ɖʋ leleŋ se Yehowa wɛnɩ ɖoŋ wondu kɩlɩzɩtʋ yɔɔ. Pɩwɩlɩɣ se ɛjaɖɛ kɩfaɖɛ taa lɛ, ɛɛkaɣ yebu se asɛyʋʋ nakʋyʋ ɛtalɩ-ɖʋ. Pɩkɛnɩ-ɖʋ taa leleŋ kpem se ɖɩmaɣzɩɣ alɩwaatʋ ndʋ asɛyɩŋ ɩɩtasɩɣ nɔɔyʋ camʋʋ yaa kʋʋ yɔ tɩ-yɔɔ, mbʋ pʋyɔɔ yɔ ‘Ɛsɔ ɖɩjaɣyɛ kaɣ wɛʋ ɛyaa hɛkʋ taa.’ (Natʋ 21:3, 4) Ðɩpɩzɩɣ nɛ ɖɩtaa liu se alɩwaatʋ ndʋ Yesu tɔkɩ kewiyitu pɩnzɩ kudoku yɔ, Yehowa kaɣ-ɩ haʋ ɖoŋ nɛ ɛñazɩ wondu kɩlɩzɩtʋ se tɩtaakɔnɩ asɛyʋʋ nakʋyʋ ɛyaa yɔɔ. w15 1/6 1:15, 16

Hodo, 15 mai

Posi ña-tɩ nɛ halʋ acɛyɛ tʋ nɛ taañɔtɩ ña-tɩ nɛ ɛ-ɖɩɣa nɔnɔsɩ.—Ad. 5:8.

Ye ɖɩtɩkpaɣ lɔŋ tasʋʋ mbʋ nɛ ɖɩlabɩnɩ tʋmɩyɛ yɔ, pɩkɔŋnɩ-ɖʋ kaɖɛ. Pɛkɛdɩ aduwa ñʋʋ 7 taa se evebu nɔɔyʋ lɩ hadɛ lɛdʋʋ se ɛmʋ helim halʋ acɛyɛ tʋ nɔɔyʋ ɖɩɣa cɔlɔ. Nɛ ɛ nɛ halʋ ɛnʋ pala acɛyɛ. Ye ɛɛna lɔŋ se ɛkaɣ tɔlʋʋ kaɖɛ nɖɩ ɖɩ-taa yɔ, eeposi ɛ-tɩ nɛ halʋ ɛnʋ. (Ad. 7:6-27) Ɛzɩ evebu ɛnʋ yɔ, ɖɩpɩzɩɣ nɛ ɖɩkpaɣ lɩmaɣza kɩdɛkɛda mbʋ pʋyɔɔ yɔ ɖɩɩsɩŋ kaɖɛ nɖɩ ɖɩwɛnɩ ɛzɩdaa yɔ. Nabʋyʋ taa lɛ, teeleewaa nabɛyɛ wɩlɩɣ kʋzʋʋ filimwaa ɖoo taa. Pʋyɔɔ lɛ, ye ɖɩwɛɛ nɛ ɖɩñɩnɩɣ ɖe-teelee yɔɔ se ɖɩna mbʋ teeleewaa lalaa wɩlɩɣ kɔyɔ, ɖɩpɩzɩɣ nɛ ɖɩlɩɩ kʋzʋʋ kɩlɛmɩŋ yɔɔ. Ye ɖɩɩsɩŋ mbʋ intɛrnɛɛtɩ lone naɖɩyɛ wɩlɩɣ yɔ, pɩɩwɛɣ ɖeu se ɖiwolo ɖɩ-yɔɔ. Pɩɩwɛɣ ɖeu ɖɔɖɔ se ɖiwolo intɛrnɛɛtɩ lona wena a-yɔɔ paɖʋ kʋzʋʋ kɩlɛmɩŋ yɔ. Ye ɖɩlabɩ mbʋ yɔ, mbʋ ɖɛ-ɛza naɣ yɔ pɩpɩzɩɣ piyele nɛ kʋzʋʋ kɩdɛkɛdʋʋ labɩ-ɖʋ liu, nɛ pɩpɩzɩɣ pituzi-ɖʋ nɛ ɖɩmaanɩ Yehowa paɣtʋ yɔɔ. w15 1/6 3:8, 9

Piya, 16 mai

Kpeɣ-ɖʋ ɖa-kɩma.—Mat. 6:12

Yesu kaayɔɔdaa se: “Kpeɣ-ɖʋ ɖa-kɩma.” Ɛlɛ kɩyakʋ lɛɛkʋ lɛ, ɛtɔ se: “Kpeɣ-ɖʋ ɖa-kɩwɛɛkɩm.” (Mat. 6:12; Luka 11:4) Ɛyɔɔdɩ mbʋ, mbʋ pʋyɔɔ yɔ ɖa-kɩwɛɛkɩm wɛ ɛzɩ kɩma yɔ. Pɩlakɩ ɛzɩ pɩnzɩ 60 mbʋ yɔ, Feŋuu Tilimiye lɩzɩ pɩ-taa se alɩwaatʋ ndʋ ɖɩlakɩ kɩwɛɛkɩm yɔ, pɩwɛ ɛzɩ ɖɩtɔɔ Yehowa kɩmɩyɛ yɔ. Yehowa pɔzʋʋ-ɖʋ se ɖɩsɔɔlɩ-ɩ nɛ ɖɩñamɩ-ɩ. Ye mbʋ, alɩwaatʋ ndʋ ɖɩlakɩ kɩwɛɛkɩm nabʋyʋ yɔ, pɩwɛ ɛzɩ ɖɩtɩpɩzɩ nɛ ɖɩcɛlɩ-ɩ mbʋ ɛpɔzɩ-ɖʋ yɔ nɛ pɩwɛɛ ɛzɩ ɖɩtɔɔ-ɩ kɩmɩyɛ sɔɔlɩm nɛ ñamtʋ nʋmɔʋ taa yɔ. Ye Yehowa ɛsɔɔlaa yɔ, ɛpɩzɩɣ nɛ ɛcɛ taabalɩyɛ nɖɩ ɖɩwɛ ɖa nɛ ɩ ɖɛ-hɛkʋ taa yɔ. Feŋuu Tilimiye nɖɩ ɖɩtasɩ yɔɔdʋʋ se: “Ða-kɩwɛɛkɩm wɩlɩɣ se ɖɩtɩsɔɔlɩ Ɛsɔ.” (1 Yoh. 5:3) Ðɩwɛnɩ ɛsɩmɩyɛ siŋŋ se Yehowa tɩŋnɩ Yesu kɩhɛyʋʋ pʋ-ñʋʋ taa kɩlaʋ yɔɔ se ekpeɣ-ɖʋ ɖa-kɩwɛɛkɩm. Pɩpɔzʋʋ se Yehowa ekpeɣ-ɖʋ ɖa-kɩwɛɛkɩm paa ɖooye. Yesu sɩbʋ ɖɔ-yɔɔ yɔ pɩlakɩ ɛzɩ pɩnzɩ 2000 mbʋ yɔ, ɛlɛ ɛ-kɩlaʋ ŋgʋ, kɩwazɩɣ-ɖʋ halɩ nɛ sɔnɔ. Pɩwɛɛ se paa ɛzɩmtaa lɛ, ɖɩsɛɛ Yehowa haɖɛ sɔsɔɖɛ nɖɩ ɖɩ-yɔɔ. Ɛyʋ nɔɔyʋ taapɩzɩɣ se ɛhɛyɩ kɩhɛyʋʋ pʋ-ñʋʋ taa kɩlaʋ se piholi ɛyaa kɩwɛɛkɩm nɛ sɩm pe-nesi tɛɛ.—Keɣa 48:8-10; 1 Pɩy. 1:18, 19. w15 1/6 5:9, 10

Cɩla, 17 mai

Mankaɣ sam lone nɖɩ mansɩ-ŋ ɖɩ-taa yɔ.—Iza. 60:13.

Ða-taa wɛ leleŋ kpem alɩwaatʋ ndʋ ɖɩhaɣ ɛyaa takayɩsɩ nzɩ sɩwɛ kajʋka nɛ sɩsɩɣnɩ-wɛ se pɔcɔnɩ pa-kɩcɛyɩm ɖeɖe yɔ. Maɣzɩ ɖɔɖɔ ɛzɩma ɖɩtɩŋɩɣnɩ lɛɣtʋ nʋmɔŋ kɩfaŋ yɔɔ nɛ ɖisusuu laŋhɛzɩyɛ tɔm yɔ pɩ-yɔɔ nɛ ŋna. Ðɛ-tɛ intɛrnɛɛtɩ lone jw.org sɩnɩ ɛyaa sakɩyɛ se papɩzɩ nɛ pɔcɔnɩ pa-kɩcɛyɩm ɖeɖe. Lɛɣzɩtʋ ndʋ tɩ-tɩŋa tɩwɩlɩɣ se Yehowa sɔɔlɩ ɛyaa siŋŋ nɛ ɛmaɣzɩɣ pɔ-yɔɔ. Ða-taa wɛ leleŋ nɛ lɛɣzɩtʋ ndʋ palabɩ ɖe-kediɣzisi yɔɔ se pɩsa nɛ ɖihiɣ alɩwaatʋ nɛ ɖɩla hɔʋ taa Bibl kpɛlɩkʋʋ yaa tɩ-yɔɔ kpɛlɩkʋʋ yɔ. Ða-taa wɛ leleŋ ɖɔɖɔ nɛ lɛɣzɩtʋ ndʋ palabɩ ɖe-kigbeɣliŋ yɔɔ yɔ. Piyeba nɛ paa pɩnaɣ ŋga lɛ, kigbeɣliŋ wɛɣ ɖeu kpem nɛ pɩkɩlɩ. Pɩtasɩ lɛ, ɖa-taa wɛ leleŋ nɛ sukulinaa mba ɛgbɛyɛ lɩzaa nɛ pafalɩsɩɣ-ɖʋ pa-taa yɔ. Lɛɣzɩtʋ ndʋ, tɩ-tɩŋa tɩwɩlɩɣ kaɣlaa se Yehowa wɛɛ nɛ eɖiyiɣ ɛ-ɛgbɛyɛ nɛ ɛlakɩ paa ɛzɩmtaa se fezuu taa paradisuu ɛwɛɛ kajʋka nɛ pɩkɩlɩ. w15 1/7 1:16, 17

Saɖakawaɣ, 18 mai

Sɔɔlɩ . . . ño-koobu ɛzɩ ŋsɔɔlʋʋ ña-maɣmaɣ yɔ.—Luka 10:27.

Ye pɩwɛ-ŋ kaɖɛ se ŋtaaɖʋ ñɔ-nɔɔ ɛjaɖɛ tɔm taa kɔyɔ, pɔzɩ ña-tɩ se: ‘Ye pɩɩkɛ Yesu, ɛbɛ ɛɛlaba?’ Alɩwaatʋ ndʋ Yesu kaawɛ tɛtʋ yɔɔ yɔ, yoŋ nɛ ɖama kɩɩnɩnʋʋ kaawɛ Yudee mba, Galilee mba nɛ Samaarɩɩ mba pɛ-hɛkʋ taa. Maɣzɩ kɩɖaŋ ɛnɛ ɩ-yɔɔ nɛ ŋna. Yuda mba nɛ Samaarɩɩ mba pataayɔɔdʋʋnɩ ɖama. (Yoh. 4:9) Farɩsɩ mba nɛ Saduki mba pataanɩɣnɩ ɖama wondu sakɩyɛ yɔɔ. (Tʋma 23:6-9) Yuda ñɩma mba paasɩm Moyizi Paɣtʋ camɩyɛ yɔ, pamaɣzaɣ se pakɩlɩ mba pataatɩlɩ-tʋ yɔ. (Yoh. 7:49) Yuda mba taasɔɔlɩ lambuu mʋyaa nɛ Roma mba. (Mat. 9:11) Ɛlɛ Yesu tɩɖʋ ɛ-nɔɔ yoŋ ɛnɩ ɩ-taa. Paa ɛlʋkaɣ toovenim Ɛsɔ sɛtʋ yɔɔ nɛ paa eeɖiɣzinaa se Izrayɛɛlɩ ɛjaɖɛ kaakɛ Ɛsɔ samaɣ yɔ, ɛtɩwɩlɩ ɛ-tɔmkpɛlɩkɩyaa wiɖiyi kpa se pɛwɛ weewee nɛ pakɩlɩ ɛyaa lalaa. (Yoh. 4:22) Ɛlɛ ɛwɩlɩ-wɛ se pɔsɔɔlɩ ɛyaa tɩŋa. w15 7/15 3:5

Kemeɣa, 19 mai

Kɩbaɣlʋ tɩnɩɣ mɔ-yɔɔ, sɔɔndʋ ɛɛtasɩɣ-m kpaʋ; ɛyʋ kaalabɩ-m we? Kɩbaɣlʋ kandɩyɩɣ mɔ-yɔɔ. —Keɣa 117:6, 7.

Ɛsɔ lɩzɩ ɛyaa lɛ, ɛɖʋ pa-taa se pɔsɔɔlɩ lalaa nɛ lalaa sɔɔlɩ-wɛ ɖɔɖɔ. Ɛlɛ ye kʋñɔŋ nakʋyʋ ɛtalɩ-ɖʋ, yaa kʋdɔŋ nakʋyʋ ɛkpa-ɖʋ, yaa ɖɩlakɩ liidiye kʋñɔŋ, yaa ɖɔ-tɔm susuu ɛɛlʋlʋʋ pee yɔ, pɩpɩzɩɣ nɛ pitibi-ɖʋ yɔɔɔ. Ye ɖɩpaɣzɩ maɣzʋʋ se Yehowa tɩtasɩ-ɖʋ sɔɔlʋʋ yɔ, pɩwɛɣ ɖeu se ɖɩtɔzɩ se ɖɩwɛ ñɩm siŋŋ ɛ-ɛzɩdaa, nɛ ɛwɛ ɖɔ-cɔlɔ se ‘ɛɖɔkɩ ɖa-nɩwaŋ’ nesi nɛ ɛsɩɣnɩ-ɖʋ. Ye ɖɩɖɔkɩ ɖe-siɣsiɣ wɛtʋ yɔ, ɛɛkaɣ ɖɔ-yɔɔ sɔʋ kpa. (Iza. 41:13; 49:15) Brigitte ɖeke cɔnɩnɩ e-piya naalɛ yɔɔ alɩwaatʋ ndʋ ɛ-walʋ sɩba yɔ. Ɛyɔɔdaa se: “Pɩwɛ kaɖɛ siŋŋ se lʋlɩyaa ɩcɔnɩ pe-piya yɔɔ Sataŋ ɛjaɖɛ ɖɩnɛ ɖɩ-taa, kɔzɩ kɔzɩ ye pɩlaba se lʋlɩyʋ kʋɖʋm ɖeke cɔŋnɩnɩ piya yɔɔ yɔ. Ɛlɛ manawa se Yehowa sɔɔlɩ-m, mbʋ pʋyɔɔ yɔ ɛsɩnɩ-m alɩwaatʋ ndʋ maawɛ wɩzasɩ taa yɔ, nɛ wiɖiyi etiyele se mankatɩ kaɖɛ naɖɩyɛ nɛ pɩcɛzɩ mon-ɖoŋ yɔɔ.”—1 Kɔr. 10:13. w15 1/8 1:1-3

Mazaɣ, 20 mai

Ðaŋ.—Hab. 2:3.

Nayʋ Habakuuki Yehowa kaaɖʋ tʋmɩyɛ se esusi Yerusalɛm yɔkʋʋ tɔm. Pʋcɔ nɛ Yehowa ɖʋʋ-ɩ tʋmɩyɛ nɖɩ lɛ, nayaa lalaa kaatɛm susuu tɔm ndʋ pɩnzɩ sakɩyɛ. Habakuuki naɣaɣ ɛzɩma kañatʋ nɛ mulum lakasɩ kaawɛɛ nɛ sɩkpaɣ ɖoŋ yɔ. Pʋyɔɔ ɛpɔzɩ Yehowa se: “[Yehowa], mamakɩ kubusi nɛ ŋŋwelisiɣ?” Yehowa hɛzɩ ɛ-laŋɩyɛ se lidaʋ tɔm ndʋ ɛyɔɔdaa yɔ, “tɩɩcakɩ wayɩ.” (Hab. 1:1-4; 2:3) Ðɩkpaɣ se pɩɩnɩ Habakuuki nɛ ɖaŋʋʋ nɛ ɛmaɣzɩ ɛ-taa se: ‘Pɛwɛʋ nɛ pɔyɔɔdʋʋ Yerusalɛm yɔkʋʋ tɔm yɔ, pɩlakɩ pɩnzɩ sakɩyɛ yɔ. Nɛ ye pɩlaba se pɩtasɩɣ leɖuu siŋŋ pʋcɔ nɛ pɔyɔkɩ-tʋ? Ye pɩtɩkɛ lɛɛlɛɛyɔ pɔyɔkʋʋ Yerusalɛm tɛtʋ yɔ, pɩtɩcɛyɩ se mɛwɛɛ nɛ monsusuu tɔm kpɛdɛyɛ mbʋ. Ɛyaa lalaa pɩzɩɣ nɛ pala tʋmɩyɛ nɖɩ.’ Ye Habakuuki kaawɛnɩ lɩmaɣza ana, ɛbɛ pɩzaɣ se pɩtalɩ-ɩ? Ɛpɩzaɣ se elesi ɛ nɛ Yehowa pa-taabalɩyɛ, nɛ ɛpɩzaɣ ɖɔɖɔ se elesi e-wezuu alɩwaatʋ ndʋ Babilooni mba kɔm nɛ pɔyɔkɩ Yerusalɛm yɔ. w15 1/8 2:12, 13

Kujuka, 21 mai

Ɛgbaɣdɩyɛ kɩdɛkɛdɩyɛ lesiɣ lakasɩ kɩbanzɩ tʋ.—1 Kɔr. 15:33.

Ye ɖɩtɩsɔɔlɩ se ɖɩwɛɛkɩ taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, pɩtɩmʋna se ɖɩɖʋ taabalɩyɛ nɛ mba palakɩ lakasɩ kɩdɛkɛdɩsɩ yɔ. Ɛyaa mba pa-taa kɛlɛ koobiya mba pamaɣnɩ Yehowa paɣtʋ yɔɔ faɖaɖa yɔ. Ye koobiya mba, palabɩ kɩwɛɛkɩm sɔsɔm nabʋyʋ nɛ pekizi se paakpiɖiɣ yɔ, pɩwɛɛ se ɖɩcɛ ɖa nɛ wɛ ɖa-taabalɩyɛ. (Roma 16:17, 18) Ðoŋ ɖoŋ lɛ, ɛyaa sɔɔlaa se pɔ-tɔm ɛkɛdɩnɩ pa-taabalaa. Pʋyɔɔ lɛ, ye ɖɩɖʋ taabalɩyɛ nɛ mba paañaŋ Yehowa yɔ, pɩpɩzɩɣ piyele nɛ ɖɩla mbʋ palakɩ yɔ. Ye ɖɩɖʋ taabalɩyɛ nɛ mba pɔsɔɔlɩ kʋzʋʋ kɩdɛkɛdʋʋ yɔ, pɩpɩzɩɣ piyele nɛ ɖa ɖɔɖɔ ɖɩsɔɔlɩ lakasɩ nzɩ. Mbʋ talɩnɩ ɖo-koobiya nabɛyɛ, nɛ pa-taa mba petikpiɖi yɔ palɩzɩ-wɛ ɛgbɛyɛ taa. (1 Kɔr. 5:11-13) Ye patɩlɛɣzɩ pe-wezuu caɣʋ yɔ, wɛtʋ ndʋ tɩ-taa pɛwɛɣ yɔ, tɩlakɩ nɔɔ kʋyʋmaɣ nɛ tɔm ndʋ Pɩyɛɛrɩ yɔɔdaa yɔ.—2 Pɩy. 2:20-22. w15 1/8 4:4-6

Hodo, 22 mai

Ɩkɛɣ mɛ-ɛgbaɣdɩnaa, ye ɩlakɩ paɣtʋ ndʋ manɖʋ-mɩ yɔ tɩ-yɔɔ kɔyɔ.—Yoh. 15:14.

Pɩtɩkɛ paa anɩ yem Yesu lɩzaɣ se ɛkɛ ɛ-taabalʋ kɩbanʋ. Mba patɩŋaɣ Yesu wayɩ nɛ pɛsɛɣ Yehowa nɛ pa-laŋɩyɛ pilim yɔ, pa-taa ɛlɩzaɣ mba pɛkɛ ɛ-taabalaa kɩbama yɔ. Mba pɛsɛɣ Yehowa nɛ pa-laŋɩyɛ pilim yɔ, pɛ-hɛkʋ taa ña ɖɔɖɔ ŋlɩzɩɣ ña-taabalaa kɩbama na? Ɛbɛ yɔɔ pɩcɛyaa se ŋla mbʋ? Sɔɔlɩm mbʋ pɩwɛ koobiya hɛkʋ taa yɔ, pɩpɩzɩɣ pɩsɩnɩ-ŋ nɛ ŋpɩɩ fezuu taa. Pʋtɔma yɔ, ŋkɛ evebu yaa pɛlɛ nɛ ŋɖiɣni maɣzʋʋ mbʋ ŋkaɣ labʋ ñe-wezuu caɣʋ taa yɔ pɩ-yɔɔ. Ye mbʋ yɔ, pɩkɛɣnɩ lɔŋsɩnɖɛ se ŋɖʋ taabalɩyɛ nɛ koobiya mba peleɖi Yehowa sɛtʋ taa nɛ peyeki se nɔɔ kʋɖʋmaɣ ɛwɛɛ ɛgbɛyɛ taa yɔ. Pɩtɩla, pakatɩ tɩlasɩ sakɩyɛ pe-wezuu caɣʋ taa yaa Yehowa sɛtʋ taa. Nɛ papɩzɩɣ pasɩnɩ-ŋ nɛ ŋlɩzɩ wezuu caɣʋ ŋgʋ kɩkɩlɩ ɖeu yɔ. Ye mba ɩkɛnɩ ña-taabalaa kɩbama yɔ, papɩzɩɣ pasɩnɩ-ŋ nɛ ŋkpaɣ lɩmaɣza kɩbana nɛ ŋpɩɩ fezuu taa.—Ebr. 5:14. w15 1/9 1:14, 15

Piya, 23 mai

Ɩkaɖɩnɩ [Eleeu] nɛ tisuu ɖoŋ.—1 Pɩy. 5:9.

Yesu tɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛsɩnɩ ɛ-tɔmkpɛlɩkɩyaa nɛ pakpazɩ pe-tisuu ɖoŋ. (Mark. 11:20-24) Pɩwɛɛ se ɖɩmaɣzɩnɩ Yesu, mbʋ pʋyɔɔ yɔ alɩwaatʋ ndʋ ɖɩsɩɣnɩ lalaa se pakpazɩ pe-tisuu ɖoŋ yɔ, ɖe-tisuu ɖɔɖɔ kpaɣ ɖoŋ. (Ad. 11:25) Ɛzɩma ŋpɩzɩɣ nɛ ŋsɩnɩ ɛyaa ño-kooka taa? Alɩwaatʋ ndʋ ŋkpɛlɩkɩɣnɩ ɛyaa Bibl yɔ, sɩnɩ-wɛ nɛ pana mbʋ pɩwɩlɩɣ se toovenim taa lɛ Ɛsɔ wɛɛ yɔ nɛ mbʋ pɩwɩlɩɣ se ɛmaɣzɩɣ ɖɔ-yɔɔ siŋŋ yɔ. Sɩnɩ-wɛ nɛ pana se Bibl kɛnɩ takayaɣ ŋga kalɩnɩ Ɛsɔ cɔlɔ yɔ. Ɛzɩma ŋpɩzɩɣ ŋsɩnɩ ño-koobiya nɛ pe-tisuu wɛɛ ɖoŋ tam? Ye ŋnawa se koobu nɔɔyʋ wɛɛ nɛ emidiɣ ɛ-mɔɔŋ tɛɛ nɛ koobiya mba pɛɖɛ nɔɔ ɛgbɛyɛ taa yɔ, taakʋ ɛ-tɔm lɛɛ lɛɛ. Kpaɣnɩ lɛɣtʋ nɛ ŋsɩnɩ-ɩ nɛ e-tisuu ɖaɣnɩ cɛyɩsʋʋ. (Yuudi 22, 23) Ye ŋwɛ sukuli taa nɛ mɩ-wɩlɩyʋ yɔɔdʋʋ évolution wɩlɩtʋ tɔm yɔ, wɛɛ abalɩtʋ nɛ ŋwɩlɩ se Ɛsɔ lɩzɩnɩ wondu tɩŋa. Halɩ pɩtɩla, ɛzɩma ña-wɩlɩyʋ nɛ ña-taabalaa lalaa pakaɣ-ŋ welisinuu yɔ, pɩlakɩ-ŋ piti. Yehowa sɩɣnɩ ɖa-tɩŋa nɛ ɖɩɖɔkɩ ɖa-tɩ kpam tisuu taa. (1 Pɩy. 5:10) Pʋcɔ nɛ ɖɩwɛɛnɩ tisuu siŋŋ lɛ, pɩpɔzʋʋ se ɖɩñaɣ pana. Ye ɖɩlabɩ mbʋ yɔ, Yehowa kaɣ-ɖʋ wazʋʋ. w15 1/9 3:20, 21

Cɩla, 24 mai

Tɛtʋ kɛdɩɣ Ɛsɔ samtʋ, ɛsɔdaa ɛwaɣ ñɛkɛdɩɣ mbʋ e-nesi laba yɔ.—Keɣa 18:2.

Sɔnɔ, Yehowa wɩlɩɣ-ɖʋ tɔm sakɩyɛ ɛ-wɛtʋ kɩbandʋ yɔɔ, ɛ-tamaɣ yɔɔ, e-wondu kɩlɩzɩtʋ yɔɔ nɛ Bibl yɔɔ. Ɛjaɖɛ seɣtiɣ ɛyaa se pala sukuli nɛ pɩɖɛɛ poliŋ, ɛlɛ ɖoŋ ɖoŋ lɛ ɛyaa mba palakɩ sukuli sakɩyɛ yɔ paatasɩɣ Ɛsɔ sɔɔlʋʋ. Pɩtɩkɛ sɩmtʋ ɖeke Yehowa ñɩnɩɣ se ɖɩwɛɛna, ɛlɛ ɛsɩɣnɩ-ɖʋ ɖɔɖɔ se ɖɩwɛɛnɩ lɔŋsɩnɖɛ. Ɛsɔɔlaa se ɖɩkpaɣ mbʋ ɖɩkpɛlɩkɩɣ yɔ nɛ ɖɩlabɩnɩ tʋmɩyɛ nɛ pɩwazɩ ɖa-maɣmaɣ nɛ pɩtɛ pɩsɩnɩ lalaa. (Ad. 4:5-7) Ɛsɔ sɔɔlaa se ɖɩsɩnɩ ɛyaa lalaa nɛ “patɩlɩ tʋtʋyɛ tɔm” nɛ pehiɣ ñʋʋ yabʋ. (1 Tim. 2:4) Ye ɖɩñakɩ pana se ɖɩsɩnɩ ɛyaa sakɩyɛ nɛ patɩlɩ Ɛsɔ Kewiyaɣ tɔm nɛ tamaɣ ŋga ɛlabɩ ɛyaa yɔɔ kɔyɔ, ɖɩwɩlɩɣ se ɖɩsɔɔlɩ Yehowa nɛ ɖɩtɛ ɖɩsɔɔlɩ ɛyaa lalaa.—Keɣa 65:16, 17. w15 1/9 5:10, 11

Saɖakawaɣ, 25 mai

Tɔm ndʋ pama-tʋ lɔndaa yɔ, pama ti-kpeekpe se pawɩlɩ-ɖʋ. —Roma 15:4.

Ŋŋmaɣzɩɣ Eliya kɩɖaʋ yɔɔ lɛ, cɔnɩ wɛtʋ kagbanzɩ ndʋ tɩ-taa ɛwɩlaa se ɛwɛnɩ tisuu siŋŋ Yehowa yɔɔ yɔ. (1) Alɩwaatʋ ndʋ Eliya heyi Wiyaʋ Ahaabɩ se Yehowa kaɣ yebu nɛ wɩlɩŋ kpa ɛjaɖɛ taa yɔ, ɛyɔɔdɩnɩ tisuu se: “Nɛ [Yehowa] Izrayɛɛlɩ tɛ Ɛsɔ weyi mana ɛ-ɛzɩdaa yɔ. Pɩnzɩ sɩnɛ yɔ ɖoluu ɛɛkaɣ kpaʋ nɛ tɛʋ ɛɛkaɣ nɩʋ.” (1 Aw. 17:1) (2) Eliya kaawɛnɩ tisuu se Yehowa kaɣ cɔnʋʋ ɛ nɛ ɛyaa lalaa pa-kɩcɛyɩm ɖeɖe wɩlɩŋ alɩwaatʋ ndʋ tɩ-taa. (1 Aw. 17:4, 5, 13, 14) (3) Eliya kaawɛnɩ tisuu ɖɔɖɔ se Yehowa pɩzɩɣ nɛ efezi lelu nɔɔyʋ pɩyalʋ. (1 Aw. 17:21) (4) Ɛtaapɩtɩɣ kaaʋ se Yehowa kaɣ tiyinuu miŋ nɛ ɩñaɣ ɛ-kɩlaʋ Karmɛɛlɩ Pʋʋ yɔɔ. (1 Aw. 18:24, 37) (5) Halɩ paa tɛʋ etaapiyi yɔ, Eliya heyi Ahaabɩ se: “Kpa, tɔɔ nɛ ŋñɔɔ, mbʋ yɔ pɩkɛ tɛʋ sɔsɔʋ tiliɣ na.” (1 Aw. 18:41) Ye mbʋ, ɖɩpɩzɩɣ nɛ ɖɩpɔzɩ ɖa-tɩ se: “Ɛzɩ mɛwɛnɩ tisuu siŋŋ ɛzɩ Eliya yɔ?” w15 1/10 2:4, 5

Kemeɣa, 26 mai

Kpaɣ-kʋ nɛ ña-laŋɩyɛ pilim. —1 Tim. 4:15.

Yɔɔdaɣ kɛ kʋjɔʋ kɩbaŋʋ ŋgʋ kɩlɩnɩ Yehowa cɔlɔ yɔ. (Keɣa 138:14; Natʋ 4:11) Yehowa labɩ-ɖʋ ɖɔɖɔ kʋjɔʋ lɛɛkʋ ŋgʋ kiyeba nɛ ɖɩwɛɛ ndɩ nɛ kpɩna yɔ. ‘Ɛlɩzɩ-ɖʋ ɛ-lɛzʋʋ.’ Ðɩwɛnɩ tɩ-yɔɔ wɛʋ lɩzʋʋ waɖɛ, pʋ-tɔbʋʋ lɛ se ɖa-maɣmaɣ ɖɩpɩzɩɣ nɛ ɖɩlɩzɩ mbʋ ɖɩsɔɔlaa se ɖɩlakɩ yɔ. Ðɩpɩzɩɣ nɛ ɖɩlɩzɩ se ɖɩtɩŋɩɣnɩ ɖɔ-yɔɔdaɣ yɔɔ nɛ ɖɩsɛɛ Yehowa nɛ ɖɩɖʋ-ɩ hɩɖɛ. (Kiɖe 1:27) Yehowa ha-ɖʋ Bibl se kɩsɩnɩ-ɖʋ nɛ ɖɩna ɛzɩma ɖɩsɛɛ-ɩ nɛ ɖɩɖʋ-ɩ hɩɖɛ yɔ. Palɩzɩ Bibl tɩŋa yaa kɩ-hɔɔlɩŋ kʋnʋmɩŋ weyi ɩ-taa yɔ, ɩcɛzɩ 2800. Ye ɖɩmaɣzɩɣ tɔm ndʋ Bibl yɔɔdʋʋ yɔ tɩ-yɔɔ kɔyɔ, pɩsɩɣnɩ-ɖʋ nɛ ɖɩwɛɛnɩ Yehowa lɩmaɣza. (Keɣsi 39:6; 91:6; 138:17) Nɛ ye ɖɩwɛnɩ Yehowa lɩmaɣza yɔ, pɩsɩɣnɩ-ɖʋ se ɖɩwɛɛnɩ lɔŋsɩnɖɛ nɛ ɖihiɣ wezuu maatɛŋ. (2 Tim. 3:14-17) Ye pɔtɔm se ɖɩmaɣzɩ nabʋyʋ yɔɔ yɔ, pʋ-tɔbʋʋ lɛ se ɖɩka ɖa-lɩmaɣza pʋdʋ ɛnʋ ɛ-yɔɔ nɛ ɖɩñɩnɩ nɛ ɖɩna mbʋ pɩkpɛlɩkɩɣ-ɖʋ yɔ. (Keɣa 76:13; Ad. 24:1, 2) Mbʋ ɖɩkpɛlɩkɩɣ Yehowa nɛ Yesu pɔ-yɔɔ yɔ, ye ɖɩkpakɩɣ alɩwaatʋ nɛ ɖɩmaɣzɩɣ pɩ-yɔɔ yɔ, pɩwazɩɣ-ɖʋ siŋŋ.—Yoh. 17:3. w15 1/10 4:2-4

Mazaɣ, 27 mai

Weyi ɛɛsɩŋ ɛ-ɖɩɣa maɣmaɣ ɖɔkʋʋ yɔ, ɛlakɩ ɛzɩma nɛ ɛɖɔkɩ Ɛsɔ cejewiye?—1 Tim. 3:5.

Yesu heyi ɛ-tɔmkpɛlɩkɩyaa se pɛwɛɛnɩ tɩ luzuu nɛ pataakɛ piɖeni men-ɖeke tɩnaa, nɛ ɛ-maɣmaɣ ɛha kɩɖaʋ hɔɔlʋʋ ŋgʋ kɩ-taa. (Luka 22:27) Ɛ-tɛ apostoloowaa na ɛzɩma ɛlakaɣ kɩlaŋ sakɩyɛ se pɩsa nɛ ɛsɛɛ Yehowa nɛ ɛsɩnɩ lalaa lɛ, pañaɣ pana se pamaɣzɩnɩ-ɩ. Ña ɖɔɖɔ ŋpɩzɩɣ nɛ ŋtɩŋnɩ ña-kɩɖaʋ yɔɔ nɛ ŋkpɛlɩkɩ ñe-piya lɔŋ. Debbie wɛnɩ piya naalɛ. Ɛyɔɔdaa se: “Ma-walʋ kɛ ɛgbɛyɛ taa ɛzʋtʋyʋ, ɛlɛ wiɖiyi mantɩla sʋsɩ se pʋyɔɔ ɛkpakɩɣ alɩwaatʋ nɛ ɛsɩɣnɩ lalaa. Maanawa se ye kɩcɛyɩm nabʋyʋ ɛwɛ ɖɔ-hɔʋ taa kɔyɔ, ma-walʋ cɔŋnɩ pi-ɖeɖe.” Ɛzɩma Debbie nɛ ɛ-walʋ Pranas pa-kɩɖaʋ wazɩ pe-piya na? Pranas yɔɔdaa se paa ɛzɩmtaa lɛ, pe-piya haɣ sɩ-tɩ faaa kigbeɣliŋ taa nɛ sɩlakɩ tʋmɩyɛ. Piyeba nɛ sihiɣ taa leleŋ, sɩwɛɛnɩ taabalaa kɩbama, nɛ sɩsɔɔlɩ koobiya cɔlɔ caɣʋ. Lɛɛlɛɛyɔ, pɔ-hɔʋ tɩŋa wɛ alɩwaatʋ tɩŋa Ɛsɔ sɛtʋ tʋmɩyɛ taa. Ye ŋwɛnɩ tɩ luzuu nɛ ŋmaɣzɩɣ lalaa yɔɔ kɔyɔ, pɩkaɣ-ŋ sɩnʋʋ nɛ ŋwɩlɩ ñe-piya ɛzɩma sɩha sɩ-tɩ faaa nɛ sɩsɩnɩ lalaa yɔ. w15 1/11 1:9

Kujuka, 28 mai

Mbʋ [Ɛsɔ] wɛna nɛ paanaɣ-pʋ yɔ, ɖooo ɛjaɖɛ ɖɩlɩzɩyɛ wiye eyeba se ɛyʋ lɔŋ ɩna-pʋ e-wondu kɩlɩzɩtʋ taa, ɛ-tamtam ɖoŋ nɛ ɛ-Ɛsɔtʋ; mbʋ yebina nɛ pɛfɛyɩnɩ kawanaɣ.—Roma 1:20.

Yehowa wɩlɩ-ɖʋ ɛ-sɔɔlɩm sɔsɔm hɔɔlɩŋ sakɩyɛ taa. Maɣzɩ kedeŋa paɣlɩka nɛ ɛzɩma kɛwɛ kajʋka yɔ pɩ-yɔɔ nɛ ŋna. Yehowa labɩ tɩɩnzɩ tindima ndɩ ndɩ nɛ paa tindimiye nɖɩ ɖɩ-taa lɛ, tɩɩnzɩ miiliyaarɩwaa sakɩyɛ wɛna. Ɛlabɩ wɩsɩ nɛ sɩwɛɛ tɩɩnzɩ tindimiye nɖɩ payaɣ se la Voie lactée yɔ, ɖɩ-taa. Ye wɩsɩ ɛtaawɛɛ kɔyɔ, wezuu taawɛɛ tɛtʋ yɔɔ. Wondu ndʋ tɩ-tɩŋa payɩ tɩwɩlɩɣ se Yehowa kɛnɩ ɖa-Lɩzɩyʋ. Tɩwɩlɩɣ ɖɔɖɔ se ɛwɛnɩ ɖoŋ, lɔŋsɩnɖɛ, nɛ sɔɔlɩm. Yehowa labɩ tɛtʋ se ɛyaa nɛ kpɩna papɩzɩ nɛ pacaɣ tɩ-yɔɔ. Mbʋ payɩ pɩwɛ tɛtʋ yɔɔ yɔ, Yehowa labɩ-pʋ se pɩwazɩ ɛyaa nɛ kpɩna. Ɛɛlabɩ Edɛɛnɩ kaɖaɣ nɛ kɛwɛɛ kajʋka nɛ ɛsɩɩ Aɖam nɛ Ɛva ka-taa. Paatalɩ pilim nɛ papɩzaɣ se pacaɣ wezuu tam. (Natʋ 4:11) Pɩtasɩ lɛ, “paa tomnaɣ ŋga lɛ, ɛhaɣ-kɛ tɔɔnaɣ, ɛ-sɔɔlɩm ɛɛtɛŋ.”—Keɣa 135:25. w15 1/11 3:7, 8

Hodo, 29 mai

Mɛwɛ mɩ-cɔlɔ.—Mat. 28:20.

Ðe-Wiyaʋ ha-ɖʋ tʋmɩyɛ wondu ndɩ ndɩ se ɖɩtɩŋnɩ tɩ-yɔɔ nɛ ɖɩsɩnɩ ɛyaa nɛ pewelisi tɔm ndʋ ɖisusuu yɔ. Wondu ndʋ tɩ-taa natʋyʋ wazɩ-ɖʋ alɩwaatʋ pazɩ, ɛlɛ lɛɛtʋ ñeɖiɣni-ɖʋ sɩnʋʋ halɩ nɛ sɔnɔ. Ɛlɛ wondu ndʋ tɩ-tɩŋa tɩsɩnɩ-ɖʋ nɛ ɖɩwɛɛ niye tɔm susuu taa nɛ pɩkɩlɩ. Pɩnaɣ 1933 taa, tɔm susuyaa paɣzɩ labɩnʋʋ tʋmɩyɛ aseɣɖe lɩzʋʋ takayaɣ. Takayaɣ ŋga, kasɩnɩ ɛyaa sakɩyɛ nɛ papaɣzɩ tɔm susuu. Pɩɩkɛ takayaɣ hɔɔlaɣ cikpelaɣ ŋga kɔ-yɔɔ pama Bibl taa tɔm natʋyʋ pazɩ yɔ. Aseɣɖe lɩzʋʋ takayaɣ kaasɩnɩ tɔm susuyaa hɔɔlɩŋ ndɩ ndɩ taa. Tɔm susuyaa nabɛyɛ kaawɛ fɛyɛ, nɛ paa paasɔɔlaa siŋŋ se posusi tɔm yɔ, pataatɩlɩ ndʋ pɔyɔɔdɩ yɔ. Tɔm susuyaa lalaa ñaawɛ abalɩtʋ siŋŋ. Pɩtaawɛɛ-wɛ kaɖɛ se peheyi ɖɩɣdʋ mbʋ payɩ pasɩma yɔ; ɛlɛ pataayɔɔdʋʋ tɔm nɛ ñamtʋ paa ɛzɩmtaa. Aseɣɖe lɩzʋʋ akayaɣ kaasɩnɩ tɔm susuyaa tɩŋa se tɔm ndʋ posusaɣ yɔ, tɩwɛɛ kɛlɛʋ nɛ tɩ-taa tʋ kpayɩ kpayɩ. w15 1/11 5:3-6

Piya, 30 mai

Pasa [Yehowa] hɩɖɛ! —Keɣa 148:13.

Bibl masɩ sakɩyɛ wɩlɩɣ se pɩcɛyaa se ɖɩtɩlɩ Ɛsɔ hɩɖɛ nɛ ɖɩsam-ɖɩ. (Egl. 3:15; Keɣa 82:18; Iza. 42:8; 43:10; Yoh. 17:6, 26; Tʋma 15:14) Pɩtasɩ lɛ, Yehowa yeba nɛ Bibl mayaa ma ɛ-hɩɖɛ tam kudokiŋ sakɩyɛ Bibl takayɩsɩ kɩbɩnzɩ taa. (Ezek. 38:23) Ye mbʋ, alɩwaatʋ ndʋ Bibl ɖɛzɩyaa kiziɣ se paamaɣ Yehowa hɩɖɛ Bibl taa yɔ, pɩwɩlɩɣ se paañaŋɩ-ɩ. Sɔnɔ, mbʋ pɩwɩlɩɣ se pɩpɔzʋʋ se pama Ɛsɔ hɩɖɛ Bibl taa yɔ, pɩɖɔwa. Traduction du monde nouveau kɩfalʋʋ ŋgʋ palɩzɩ pɩnaɣ 2013 taa Aŋglɛɛ taa yɔ, pama kɩ-taa Ɛsɔ hɩɖɛ tam 7216. Pɩwɩlɩɣ se Ɛsɔ hɩɖɛ wɛ kɩ-taa lona loɖo taa nɛ pɩkɩlɩ kɩbɩnʋʋ taa. Teŋgu Kɩsɩbʋʋ taa takayɩsɩ kikpiyisi taa tɔm kɩfatʋ natʋyʋ yebina nɛ pɔsɔzɩ Ɛsɔ hɩɖɛ masɩ kagbanzɩ taa. Masɩ nzɩ yɔ: 1 Samɩyɛɛlɩ 2:25; 6:3; 10:26; 23:14, 16. Bibl takayɩsɩ kɩbɩnzɩ taa tɔm lɛɛtʋ yebina nɛ pɔsɔzɩ Ɛsɔ hɩɖɛ ɖɔɖɔ Tɔm Hʋyaa 19:18 taa. w15 1/12 2:5, 6

Cɩla, 31 mai

Ɩwɛɛ koobiye sɔɔlɩm taa.—Ebr. 13:1.

Lɛɛlɛɛyɔ pɩwɛɛ se ɖɩkpazɩ koobiye sɔɔlɩm ɖoŋ, mbʋ pʋyɔɔ yɔ pɩkaɣ-ɖʋ sɩnʋʋ nɛ ɖɩɖɔkɩ ɖa-tɩ kʋñɔmɩŋ weyi ɖɩpɩzɩɣ nɛ ɖɩkatɩ cee wayɩ yɔ, ɩ-taa. Pʋcɔ nɛ kʋñɔŋ sɔsɔʋ paɣzɩ lɛ, sɔnɔ maɣmaɣ ɖɩpɩzɩɣ nɛ ɖɩwɩlɩ ɖama koobiye sɔɔlɩm hɔɔlɩŋ ndɩ ndɩ taa. Tɛtʋ ñamsʋʋ, lɩm wadʋʋ, helim sɔsɔm nɛ asɛyɩŋ lɛɛŋ kɔŋnɩ kʋñɔmɩŋ ɖo-koobiya sakɩyɛ yɔɔ. Koobiya nabɛyɛ ñɛwɛ nazɩm taa. (Mat. 24:6-9) Pɩtasɩ lɛ, liidiye tɔm caɣ kaɖɛ ɛjaɖɛ kɩdɛkɛdɩyɛ ɖɩnɛ ɖɩ-taa. (Natʋ 6:5, 6) Ɛlɛ, tɩlasɩ nzɩ ɖo-koobiya katɩɣ yɔ, sɩhaɣ-ɖʋ waɖɛ se ɖɩwɩlɩ-wɛ koobiye sɔɔlɩm nɛ pɩkpaɖɩ. Paa sɔɔlɩm ɛfɛyɩ ɛjaɖɛ yɔɔ kɔyɔ, pɩwɛɛ se ɖiwolo pɩ-yɔɔ nɛ ɖɩwɩlɩɣ ɖama koobiye sɔɔlɩm.—Mat. 24:12. w16.01 1:8, 9