Septembre

Kemeɣa, 1^er septembre

Abraham kpaɣ lone nɖɩ Ɛsɔ wɩlɩ-ɩ yɔ ɖɩ-nʋmɔʋ.” —Kiɖe 22:3.

Pʋcɔ nɛ Abraham yele ɛ-lɩmɖʋyaa nɛ ɛɖɛɛ lɛ, eheyi-wɛ se: “Mɩ nɛ kpaŋaɣ ɩcaɣ cɩnɛ yɔ. Ma nɛ pɩɣa ɖiwoki lɔlɔ yɔ nɛ ɖiluŋ Ɛsɔ tɛɛ nɛ ɖɩpɩsɩ ɖɩkɔɔ mɩ-cɔlɔ.” (Kiɖe 22:5) Suwe Abraham ñɩnaɣ yɔɔdʋʋ? Ɛcɛtaɣ kɩcɛtʋ se ɛ nɛ Izaakɩ papɩsɩɣ nɛ pɔkɔɔ, ŋgʋ ɛɛnawa se ɛkaɣ-ɩ laʋ na? Aayɩ. Bibl yɔɔdʋʋ se Abraham kaanawa se ye Izaakɩ ɛsɩba yɔ, Yehowa pɩzɩɣ nɛ efezi-i. (Ebr. 11:19) Abraham kaatɔzaa se paa ɛ nɛ ɛ-halʋ Saara paakpadɩyaa kpem kɔyɔ, Yehowa sɩnɩ-wɛ nɛ palʋlɩ pɩɣa. (Ebr. 11:11, 12, 18) Piyeba nɛ eɖiɣzina se nabʋyʋ fɛyɩ Ɛsɔ kaɖɛ. Abraham taatɩlɩ mbʋ pɩkaɣ labʋ puwiye yɔ. Ɛlɛ ɛɛwɛnɩ tisuu se paa ɛla ɛ-pɩyalʋ yɔ, Yehowa kaeɣ-ɩ fezuu se pɩsa nɛ lidaʋ tɔm ndʋ payɩ ɛyɔɔdaa yɔ tɩla. Mbʋ yebina nɛ payaa Abraham se mba payɩ pɛwɛnɩ tisuu yɔ pa-caa.—Rom. 4:11. w16.02 1:3, 13

Mazaɣ, 2 septembre

[Yehowa] ɛɛkaɣ ɛ-samaɣ lɔʋ, ɛ-hɩɖɛ sɔsɔɖɛ yɔɔ.—1 Sam. 12:22.

Yehowa kaata Sɔɔlɩ num se ɛkɛ wiyaʋ, ɛlɛ pʋwayɩ lɛ ɛpɩsɩ kɩdɛkɛdʋ nɛ Yehowa lɔ-ɩ. (1 Sam. 15:17-23) Paa mbʋ yɔ, Yehowa ha-ɩ nʋmɔʋ se ɛtasɩ tɔɔʋ kewiyitu pɩnzɩ sakɩyɛ. Ye mbʋ, pɩɩwɛ Izrayɛɛlɩ samaɣ kaɖɛ se kɔñɔɔnɩ Yehowa alɩwaatʋ ndʋ wiyaʋ Sɔɔlɩ weyi Yehowa lɩzaa se ɛcaɣ ‘e-kewiyaɣ kpelaɣ yɔɔ’ yɔ, ɛɛwɛɛ nɛ ɛlakɩ lakasɩ kɩdɛkɛdɩsɩ yɔ. (3 Aw. 29:23) Sɔɔlɩ pɩyalʋ Yonataanɩ kaañɔnɩ Yehowa. (1 Sam. 13:13, 14) Ɛzɩ Yonataanɩ yɔ, ɖɩpɩzɩɣ ɖɩwɩlɩ se ɖɩñɔnɩ Yehowa alɩwaatʋ ndʋ ɖɩñakɩ pana nɛ ɖɩñaŋ ɖɛ-ɛjaɖɛ ñʋndɩnaa ye pɔpɔzʋʋ-ɖʋ se ɖɩla nabʋyʋ nɛ pɩɩkaɖɩɣnɩ Ɛsɔ paɣtʋ yɔ. Yehowa hanɩ “ñʋndɩnaa mba” nʋmɔʋ se peɖiyi-ɖʋ, nɛ ɛñɩnɩɣ se ɖɩñam-wɛ. Pʋyɔɔ lɛ, paa komina tʋmlaɖʋ nɔɔyʋ ɛfɛyɩ toovenim nɛ ɖɩmaɣzɩɣ se ɛtɩmʋnɩ ñamtʋ yɔ, pɩwɛɛ se ɖɩñamɩ-ɩ. (Roma 13:1, 2.) Toovenim taa lɛ, pɩwɛɛ se ɖɩña mba payɩ Yehowa lɩzaa se pɛkɛ ɖa-ñʋndɩnaa yɔ.—1 Kɔr. 11:3; Ebr. 13:17. w16.02 3:5, 6, 8

Kujuka, 3 septembre

“Ña-samaɣ kaɣ ka-tɩ haʋ faaa.”—Keɣa 110:3, nwt.

Bibl yɔɔdʋʋ se Yehowa sɛyaa tɩŋa ‘kaɣ pa-tɩ haʋ faaa’ nɛ pɛsɛɛ-ɩ, halɩ pɩkpɛndɩnɩ piya evelisi. Ye mbʋ, ye nɔɔyʋ ɛcaɣ se pamɩyɩsɩ-ɩ lɩm kɔyɔ, pɩwɛɛ se pɩkɛnɩ ɛ-maɣmaɣ ɛ-sɔɔlɩm. Pɩkaɣ pɔzʋʋ se ŋtazɩ ña-taa camɩyɛ nɛ ŋna se ña-maɣmaɣ ñɔsɔɔlɩna se pamɩyɩsɩ-ŋ lɩm, kɔzɩ kɔzɩ ye palʋlɩ-ŋ toovenim taa kɔyɔ. Pɩtʋʋ fɛyɩ se ŋwɛɛ nɛ ŋpaɣlɩɣ lɛ, ŋna pamɩyɩsɩ ɛyaa sakɩyɛ lɩm; nɛ halɩ pɩtɩla yɔ pa-taa nabɛyɛ kɛ ña-taabalaa nɛ ñe-newaa. Ɛlɛ pɩwɛɛ se ŋkpa ña-tɩ nɛ ŋtaakɔɔ nɛ ŋpaɣzɩ maɣzʋʋ se pɩwɛɛ se pamɩyɩsɩ-ŋ lɩm mbʋ pʋyɔɔ yɔ ña-pɩnzɩ ɖɔwa yaa pamɩyɩsɩ lalaa lɩm. Ɛbɛ pɩzɩɣ nɛ pɩsɩnɩ-ŋ nɛ ŋwɛɛnɩ lɩmaɣza wena Yehowa wɛnɩ lɩm mɩyɩsʋʋ yɔɔ yɔ? Kpaɣ alɩwaatʋ nɛ ŋmaɣzɩ nɛ ŋna mbʋ pʋyɔɔ lɩm mɩyɩsʋʋ tɔm cɛyaa kpem yɔ. w16.03 1:11, 12

Hodo, 4 septembre

Weyi ewelisiɣ yɔ, ɛtɔ se: “Kɔɔ!” Nɛ ɛyʋ weyi lɔkɔtʋ ɖɛ-ɩ yɔ, ɛñɔtɩ ɛ-tɩ, ɛyʋ weyi ɛkɛ lɩmaɣza tʋ yɔ, ehiɣ wezuu lɩm falaa.—Natʋ 22:17.

Ða mba ɖɩwɛ Krɩstʋ ɛgbɛyɛ taa yɔ, ɛzɩma ɖɩpɩzɩɣ nɛ ɖɩla yaʋ tʋmɩyɛ camɩyɛ? Pʋcɔ nɛ ɖɩpɩzɩ nɛ ɖɩla mbʋ lɛ, pʋpɔzʋʋ se ‘ɖa-tɩŋa ɖɩkpɛndɩ camɩyɛ’ nɛ ɖɩla nɔɔ kʋɖʋmaɣ ɛgbɛyɛ taa. (Efɛz. 4:16) Pʋcɔ nɛ ɖɩpɩzɩ ɖiheyi ɛyaa sakɩyɛ tɔm ndʋ lɛ, pʋpɔzʋʋ se ɖɩñɔɔzɩ ɖɔ-tɔm susuu tʋmɩyɛ camɩyɛ. Lɔŋ weyi patasɩɣ-ɖʋ ɖa-agbaa taa yɔ, ɩsɩɣnɩ-ɖʋ se ɖɩla tʋmɩyɛ nɖɩ nɔɔ kʋɖʋmaɣ taa ɛjaɖɛ kpeekpe yɔɔ. Ðɩlakɩ tɔm susuu kediɣzisi pʋcɔ nɛ ɖɩɖɛɣ ɖisusuu ɛyaa Kewiyaɣ laŋhɛzɩyɛ tɔm. Pɩtasɩ lɛ, ɖɩtayɩ ɛyaa takayɩsɩ miiliyɔɔwaa sakɩyɛ ɛjaɖɛ kpeekpe yɔɔ. Nabʋyʋ taa lɛ, ɛgbɛyɛ pɔzʋʋ-ɖʋ se ɖɩla ŋgee tɔm susuu. Alɩwaatʋ ndʋ ŋlakɩ tʋmɩyɛ nɖɩ yɔ, tɩlɩ se ŋlabɩ nɔɔ kʋɖʋmaɣ nɛ ño-koobiya miiliyɔɔwaa sakɩyɛ mba peɖiɣni tɔm kʋɖʋmtʋ ndʋ susuu ɛjaɖɛ kpeekpe yɔɔ yɔ. Tɩlɩ ɖɔɖɔ se ña nɛ Ɛsɔ tiyiyaa mba pasɩɣnɩ Ɛsɔ samaɣ tɔm susuu yɔ, iɖiɣni tʋmɩyɛ labʋ.—Natʋ 14:6. w16.03 3:4, 5

Piya, 5 septembre

Pokuli takayɩsɩ.—Natʋ 20:12.

Bibl heyiɣ-ɖʋ se ɛjaɖɛ kɩfaɖɛ taa lɛ, pakaɣ kuluu takayɩsɩ nasɩyɩ nɛ pawɩlɩ-ɖʋ paɣtʋ kɩfatʋ ndʋ tɩ-yɔɔ pɩwɛɛ se ɖɩɖɔ yɔ. Takayɩsɩ nzɩ, sɩkaɣ sɩnʋʋ ɛyaa tɩŋa pɩkpɛndɩnɩ mba pefezaa yɔ se pɛkpɛlɩkɩ nɛ patɩlɩ mbʋ Ɛsɔ sɔɔlaa se ɛyaa ɩla yɔ. Sɩkaɣ-ɖʋ sɩnʋʋ se ɖɩkpɛlɩkɩ nɛ ɖɩtɩlɩ Yehowa lɩmaɣza nɛ pɩkɩlɩ. Pɩtasɩ lɛ, ɖɩkaɣ nɩʋ Bibl taa nɛ pɩkɩlɩ. Piyeki nɛ paradisuu taa lɛ, ɛyaa tɩŋa sɔɔlɩ ɖama, pɛwɛɛnɩ ñamtʋ ɖama yɔɔ nɛ paɖʋ ɖama hɩɖɛ. (Iza. 26:9) Maɣzɩ kpem nɛ ŋna wondu sakɩyɛ ndʋ ɖɩkaɣ kpɛlɩkʋʋ nɛ ɛzɩma ɖɩkaɣ sɩnʋʋ ɛyaa lalaa nɛ patɩlɩ Yehowa alɩwaatʋ ndʋ Yesu tɔkɩ kewiyitu yɔ. Ye ɖiwobi pɩ-yɔɔ nɛ ɖɩɖɔ paɣtʋ ndʋ pama takayɩsɩ nzɩ sɩ-taa yɔ tɩ-yɔɔ nɛ ɖɩwɛɛ siɣsiɣ Yehowa ɛzɩdaa kɛdɛzaɣ takɩm taa kɔyɔ, Ɛsɔ kaɣ ɖa-hɩɖɛ maʋ “wezuu takayaɣ” taa. Ðɩpɩzɩɣ nɛ ɖihiɣ wezuu maatɛŋ. w16.03 4:19, 20

Cɩla, 6 septembre

Kɩbaɣlʋ, mɛ-Ɛsɔ, ñɛ mantaɣ liu, ñɛ mamalɩnɩ mbʋ ɖooo man-pɩjatʋ taa.—Keɣa 71:5.

Ɛgbɛyɛ taa ɛzʋtʋyaa mba papɩ pa-tʋmɩyɛ labʋ taa yɔ, pɔyɔɔdʋʋ se pɩcɛyaa se papaɣzɩ koobiya falɩsʋʋ alɩwaatʋ ndʋ pɛwɛ pe-evebitu taa yɔ. Pɩpɩzɩɣ nɛ pɩkɛ alɩwaatʋ ndʋ papaɣzɩ kɛʋ piya evelisi yɔ. Ŋpɩzɩɣ nɛ ŋɖʋ-wɛ ɛgbɛyɛ taa tʋma wena amʋnɩ pa-pɩnzɩ yɔ. Ye pafalɩsɩ koobiya lɔŋ kɔyɔ, pɩkaɣ-wɛ sɩnʋʋ nɛ paka pa-ñʋʋ fezuu taa kaɖʋsɩ yɔɔ alɩwaatʋ ndʋ papaɣlɩɣ nɛ ɛjaɖɛ yɔɔ wondu hɔŋ pa-lɩmaɣza yɔ. (Keɣa 70:17) Ye ɛzʋtʋyʋ nɔɔyʋ ɛñɩnɩɣ se eseɣti weyi eɖiɣni-i falɩsʋʋ kɔyɔ, etaaheyi-i mbʋ pɩwɛɛ se ɛla yɔ pi-yeke na, ɛlɛ eheyi-i ɖɔɖɔ mbʋ pʋyɔɔ pɩcɛyaa se ɛlabɩ-pʋ yɔ. Ye ɛzʋtʋyʋ ɛlakɩ mbʋ yɔ, pɩwɩlɩɣ se ɛmaɣzɩɣnɩ Wɩlɩyʋ Sɔsɔ Yesu. Pʋcɔ nɛ Yesu heyi ɛ-apostoloowaa se posusi tɔm nɛ pala kpɛlɩkɩyaa lɛ, eheyi-wɛ mbʋ pʋyɔɔ pɩcɛyaa se paña paɣtʋ ndʋ yɔ. Ɛcalɩ-wɛ heyuu se: “Paha-m ɖoŋ kpeekpe ɛsɔdaa nɛ tataa.” Nɛ pʋwayɩ lɛ, ɛsɔzɩ se: “Iwolo ɩpɩsɩ ajɛɛ kpeekpe tɔm mʋyaa.”—Mat. 28:18, 19. w15 1/4 2:5, 6

Saɖakawaɣ, 7 septembre

Kɩbaɣlʋ yɔ, ɛlɛ sɩnɩ-m. Ɛkpazɩ-m ɖoŋ. . . . Poholi-m, malɩ mʋʋzʋʋ nɔɔ taa.—2 Tim. 4:17.

Krɩstʋ ñɩma mba paawɛ Room tɛtʋ taa kajalaɣ pɩnzɩ mɩnʋʋ taa yɔ, paawɛ kaɖɛ taa. Roma mba kaacɛtɩnɩ pa-taa se mba sɔbɩnɩ Room tɛtʋ miŋ pɩnaɣ 64 taa. Pʋyɔɔ lɛ, panazaɣ-wɛ pɩfɛyɩ yɔɔdʋʋ. Alɩwaatʋ kaɖɛ ñɩndʋ ndʋ tɩ-taa pakpa apostoloo Pɔɔlɩ nɛ pɔtɔ-ɩ salaka Room tɛtʋ taa. Ɛzɩ e-koobiya kaɣ kɔm nɛ pasɩnɩ-ɩ? Pɩtɩtɩlɩ, Pɔɔlɩ maɣzaɣ tɔm ndʋ tɩ-yɔɔ, mbʋ pʋyɔɔ yɔ alɩwaatʋ ndʋ paatɔ-ɩ salaka kajalaɣ ɖeɖe yɔ, nɔɔyʋ tɩkɔɔ nɛ ɛsɩnɩ-ɩ. Pʋyɔɔ ɛma Timootee takayaɣ se: “Mancalɩ man-tɩ yɔɔ lʋbʋ lɛ, nɔɔyʋ tɩsɩnɩ-m. Pe-kpeekpe pese peyebi-m.” (2 Tim. 4:16) Paa mbʋ yɔ, Pɔɔlɩ yɔɔdaa se nɔɔyʋ kaasɩnɩ-ɩ. Ɛɛwɛnɩ lidaʋ se Yehowa kaɣ-ɩ haʋ ɖoŋ weyi pɩpɔzʋʋ-ɩ yɔ nɛ ɛkaɖɩnɩ kaɖɛ nɖɩ ɖɩ-taa ɛɛwɛɛ yɔ nɛ kala wena ɛpɩzɩɣ ɛkatɩnɩ ɛzɩdaa ɖɔɖɔ yɔ. Ɛɛwɛnɩ lidaʋ siŋŋ se Yehowa kaɣ-ɩ sɩnʋʋ, pʋyɔɔ ɛmawa se: “Kɩbaɣlʋ kaɣ-m lɩzʋʋ tamaɣ kɩdɛkɛdaɣ kpeekpe taa.” (2 Tim. 4:18) Pɔɔlɩ kaanawa se paa e-koobiya ɩtaapɩzɩɣ se pasɩnɩ-ɩ wɛtʋ natʋyʋ taa kɔyɔ, ɛpɩzɩɣ nɛ ɛtaa Yehowa nɛ Yesu liu paa ɛzɩmtaa. Ɛtaapɩtɩɣ tɔm ndʋ tɩ-yɔɔ. w15 1/4 4:1-3

Kemeɣa, 8 septembre

Ɛ-pʋlʋlaɣ kaɣ ña-ñʋʋ tɔyɩtʋʋ.—Kiɖe 3:15.

Alɩwaatʋ ndʋ palʋlɩ Yesu yɔ, Sataŋ nawa se pɩɣa ŋga kakaɣ paɣlʋʋ nɛ kapɩsɩ Mesiya. Ɛzɩ Sataŋ maɣzaɣ se ye pakʋ pɩɣa ŋga yɔ, pɩkɛ kañatʋ lakasɩ kadadayaɣ na? Aayɩ. Sataŋ paa fɛyɩnɩ mbʋ pɩkɛ kɩbam yaa kɩdɛkɛdɩm yɔ. Nɛ etilesi alɩwaatʋ, ɛlabɩ kpɛdɛyɛ se ɛkʋ Yesu alɩwaatʋ ndʋ palʋlɩ-ɩ yɔ. Ɛzɩma tɩyɛ? Alɩwaatʋ ndʋ abalaa mba pɛkpɛlɩkɩ tɩɩnzɩ wɛtʋ yɔ pɔkɔm nɛ peheyi Wiyaʋ Eroodi se pañɩnɩɣ se pana “Yuda mba wiyaʋ weyi palʋlɩ-ɩ” yɔ lɛ, ɛ-taa wɩɩ pɩŋŋ nɛ ɛɖʋ se ɛkʋʋ pɩɣa ŋga. (Mat. 2:1-3, 13) Pʋyɔɔ Eroodi ɖʋ paɣtʋ se pakʋ abalɩbiya nzɩ sɩwɛnɩ pɩnzɩ naalɛ nɛ pɩkpaɣ pitii yɔ, si-kpeekpe Bɛtɩlɛhɛm nɛ tɛtʋ ndʋ tɩwɛ tɩ-cɔlɔ yɔ tɩ-taa. (Mat. 2:13-18) Yesu hiɣ ñʋʋ yabʋ piya kʋʋ mbʋ pɩ-taa. Ɛlɛ tɔm ndʋ, ɛbɛ tɩkpɛlɩkɩɣ-ɖʋ ɖo-koyindu Sataŋ yɔɔ? Pɩkpɛlɩkɩɣ-ɖʋ se Sataŋ tɩkpaɣ ɛyʋ wezuu nɛ ɛyaa pʋyʋ. Halɩ ɛ-paa fɛyɩnɩ piya wezuu ɖɔɖɔ. Toovenim taa lɛ, Sataŋ wɛɛ nɛ “ɛmʋdʋʋ ɛzɩ mʋʋzʋʋ yɔ.” (1 Pɩy. 5:8) Ðɩtaasɔɔ kpa se ɛkɛ kañatʋ tʋ siŋŋ. w15 1/5 1:10, 12, 13

Mazaɣ, 9 septembre

Petihiɣ mbʋ paaheyi-wɛ pɩ-tɔm yɔ, ɛlɛ pana-pʋ nɛ pɛsɛɛ-pʋ yem ɖooo poliŋ taa.—Ebr.11:13.

Yehowa labɩ-ɖʋ kʋjɔʋ kɩbaŋʋ nakʋyʋ. Kʋjɔʋ ŋgʋ lɛ waɖɛ nɖɩ ɖɩwɛna se ɖɩmaɣzɩɣ mbʋ ɖɩɩnaɣ yɔ pɩ-yɔɔ yɔ. Waɖɛ nɖɩ, ɖɩsɩɣnɩ-ɖʋ se ɖɩcɔnɩ ɖooo poliŋ taa nɛ ɖɩna wondu kɩbandʋ ndʋ tɩɖaŋ-ɖʋ cee wayɩ yɔ. Ðɩsɩɣnɩ-ɖʋ ɖɔɖɔ se ɖɩkpaɣ lɩmaɣza kɩbana nɛ ɖɩtaatɔlɩ kpacanaa taa. Yehowa sɩm mbʋ pɩkaɣ labʋ cee wayɩ yɔ, nɛ eheyiɣ-ɖʋ mbʋ pɩɖaŋ-ɖʋ yɔ pɩ-taa nabʋyʋ tɔm. Paa ɖɩɩpɩzɩɣ se ɖɩna-pʋ nɛ ɖɛ-ɛza yɔ, ɖɩpɩzɩɣ nɛ ɖɩmaɣzɩ pɩ-yɔɔ nɛ ɖɩwɛɛnɩ tisuu se pɩkaɣ labʋ. (2 Kɔr. 4:18) Mbʋ pɩ-yɔɔ Samɩyɛɛlɩ ɖoo Hana ñamaɣzaɣ yɔ, pɩɩwɛ ndɩ. Ɛɛwɛɛ nɛ ɛmaɣzɩɣ kɩyakʋ ŋgʋ ɛkaɣ wonuu ɛ-pɩyalʋ Samɩyɛɛlɩ Ɛsɔ sɛtʋ kizinziku tɛɛ se ɛ nɛ cɔjɔnaa pala tʋmɩyɛ yɔ, kɩ-yɔɔ. Pɩtaakɛ ɖoziye yem. Pɩɩkɛ mbʋ ɛ-maɣmaɣ ɛɛɖʋwa se ɛlakɩ yɔ. Ye mbʋ, ɛzɩma Hana maɣzaɣ kɩyakʋ ŋgʋ kɩ-yɔɔ yɔ, pɩha-ɩ ɖoŋ nɛ ɛpɩzɩ ɛla tɔm ndʋ eeheyi Yehowa yɔ tɩ-yɔɔ. (1 Sam. 1:22) Alɩwaatʋ ndʋ ɖɩmaɣzɩɣ mbʋ Yehowa yɔɔdaa se ɛlakɩ yɔ pɩ-yɔɔ yɔ, pɩwɩlɩɣ se ɖɩwɛɛ nɛ ɖɩmaɣzɩɣ mbʋ pɩkaɣ labʋ wiɖiyi yɔ, pɩ-yɔɔ. (2 Pɩy. 1:19-21) Yehowa sɛyaa mba paacaɣ wezuu caanaʋ taa yɔ, pa-taa sakɩyɛ maɣzaɣ mbʋ Yehowa yɔɔdaa se ɛlakɩ-wɛ yɔ, pɩ-yɔɔ. w15 1/5 3:1-3

Kujuka, 10 septembre

Ñɩm tʋ ñɩm . . . [wɛ] ɛzɩ koloŋa sɔsɔɔ yɔ, ɛ-maɣzɩm taa.—Ad. 18:11.

Pɩwɛɛ se ɖɩwɛɛ nɛ ɖɩmaɣzɩɣ mbʋ ɖɩla nɛ ɖɔ-tɔm kɛdɩnɩ Yehowa yɔ pɩ-yɔɔ na, pɩtaakɛ ɛzɩma ɖɩpɩsɩ ñɩm tɩnaa yɔ pɩ-yɔɔ. Yesu yɔɔdaa se ye ɛyʋ ɛkpazɩɣ ɛ-tɩ ñɩm huwa nɛ ɛɛsɩɣ Yehowa kajalaɣ lone taa yɔ, ɛkɛ kɩmɛlɛŋ. Pʋdʋ ɛnʋ ɛtɩkɛ “ñɩm tʋ Ɛsɔ” ɛzɩdaa. (Luka 12:16-21) Ye ‘ɖɩcazɩɣ ɛsɔdaa ñɩm nɛ ɖɩkpazɩɣ huwa’ nɛ ɖɩlakɩ mbʋ pɩkɛdɩɣnɩ Yehowa kɔyɔ, ɛ-taa kaɣ labʋ leleŋ nɛ ɖa ɖɔɖɔ ɖa-taa lakɩ leleŋ. (Mat. 6:20; Ad. 27:11) Taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, ɖɩkɛ ñɩm mbʋ pɩkpaɖɩ pɩtɩŋa payɩ yɔ. Ye ɖɩñakɩ pana se ɖikpeɣli ɛjaɖɛ yɔɔ “ñɩm nɛ ɖɩkpazɩ huwa” yɔ, pɩkɔŋnɩ-ɖʋ nɩɣzɛ sakɩyɛ. (Mat. 6:19) Yesu yɔɔdaa se mba pamaɣzɩɣ liidiye yɔɔ paa ɛzɩmtaa yɔ, pɩkaɣ-wɛ labʋ kaɖɛ se pasɩɩ Ɛsɔ Kewiyaɣ kajalaɣ ɖeɖe pe-wezuu caɣʋ taa.—Mat. 13:18, 19, 22. w15 1/5 4:15, 16

Hodo, 11 septembre

Nɛ ɛyaa na kaayɔɔdasɩ yɔɔdaɣ, nɩŋgbaditiliŋ tɩnaa nɛ kaakalasɩ pɔɖɔŋaɣ nɛ yʋlʋmaa naɣ lɛ, pɩla-wɛ leleŋ pɩŋŋ.—Mat. 15:31.

Ðoŋ weyi Ɛsɔ ha Yesu yɔ, ɩsɩnɩ-ɩ nɛ ɛla maamaaci lakasɩ sɔsɔsɩ ndɩ ndɩ. Pɩtɩkɛ canatʋ kʋdɔŋ ɖeke Yesu kaawawa, ɛlɛ ɛɛwa kʋdɔmɩŋ ndɩ ndɩ ɖɔɖɔ. Pʋcɔ nɛ Yesu waa ɛyʋ nɔɔyʋ kʋdɔŋ lɛ, ɛtaapɔzʋʋ ɛyaa lalaa se paha-ɩ po-tomnaɣ hɔɔlʋʋ nakʋyʋ. Ɛyʋ ɛnʋ e-tomnaɣ hɔɔlʋʋ ŋgʋ pɩwɩɣ yɔ, kɩ-maɣmaɣ ɛwaɣ. Ɛwaɣaɣ ɛyaa kʋdɔmɩŋ kpaagbaa, nɛ halɩ nabʋyʋ taa lɛ ɛwaɣaɣ nabɛyɛ paa ɛfɛyɩ pɔ-cɔlɔ yɔ. (Yoh. 4:46-54) Ɛbɛ maamaaci lakasɩ nzɩ sɩwɩlɩɣ? Sɩwɩlɩɣ se Wiyaʋ Yesu Krɩstʋ wɛnɩ ɖoŋ nɛ sɔɔlɩm se ɛwaa kʋdɔmɩŋ tɩŋa tam. Ye ɖɩmaɣzɩɣ ɛzɩma Yesu kaawa ɛyaa kʋdɔmɩŋ yɔ pɩ-yɔɔ kɔyɔ, pɩkaɣ yebu nɛ ɖɩwɛɛnɩ lidaʋ se ɛjaɖɛ kɩfaɖɛ taa lɛ, ɛkaɣ naʋ “kʋñɔndʋ nɛ ɛjam” pa-pʋtɔdɩyɛ tam. (Keɣa 71:13) Alɩwaatʋ ndʋ tɩ-taa lɛ, Yesu kaɣ waʋ kʋdɔndɩnaa kpeekpe mbʋ pʋyɔɔ yɔ ɛsɔɔlɩ-wɛ siŋŋ. w15 1/6 2:6

Piya, 12 septembre

Ña-hɩɖɛ ɛsɛɛ.—Mat. 6:9.

Ɛyaa sakɩyɛ sɩm adɩma wena awɛ Maatiyee 6:9-13 taa yɔ, kpayɩ kpayɩ. Alɩwaatʋ ndʋ ɖisusuu tɔm yɔ, ɖɩlakɩnɩ adɩma ana tʋmɩyɛ nɛ ɖɩwɩlɩɣ ɛyaa se Ɛsɔ Kewiyaɣ kɛ ɛsɔdaa komina ŋgʋ kɩkaɣ labʋ nɛ tɛtʋ pɩsɩ paradisuu yɔ. Ðɩlakɩnɩ tʋmɩyɛ ɖɔɖɔ tɔm loyaɣ “ña-hɩɖɛ ɛsɛɛ” nɛ ɖɩwɩlɩɣ ɛyaa se Ɛsɔ wɛnɩ hɩɖɛ nɛ pɩwɛɛ se ɖiyele nɛ hɩɖɛ nɖɩ ɖɩsɛɛ yaa ɖɩwɛɛ kele kele. (Mat. 6:9) Yesu ñɩnaɣ se ɖɩɖɔkɩ adɩma ana ɖa-ñʋʋ taa nɛ paa ɛzɩmtaa lɛ, ɖɩlakɩ-yɛ ɛzɩ ɛyaa sakɩyɛ lakʋʋ yɔ? Aayɩ. Pʋcɔ nɛ Yesu wɩlɩɣ ɛ-tɔmkpɛlɩkɩyaa adɩma ana lɛ, ɛyɔɔdaa se: “Mɩ-adɩma taa lɛ, iyele yɔɔdʋʋ nɛ luuzuu.” (Mat. 6:7) Kɩyakʋ lɛɛkʋ Yesu tasɩ wɩlʋʋ adɩma ana ɛ-tɔmkpɛlɩkɩyaa, ɛlɛ pɩtɩkɛ tɔm pee wena awɛ Maatiyee 6:9-13 taa yɔ, ana ɖeyi ɖeyi ɛkpaɣ nɛ ɛlabɩnɩ tʋmɩyɛ. (Luka 11:1-4) Ye mbʋ, Yesu labɩ adɩma ana se pɩkɛnɩ-ɖʋ kɩɖaʋ na. Ɛsɩnɩ-ɖʋ se ɖɩtɩlɩ mbʋ pɩwɛɛ se ɖɩpɔzɩ ɖa-adɩma taa yɔ nɛ mbʋ pɩwɛɛ se ɖɩcalɩnɩ pɔzʋʋ yɔ. w15 1/6 4:1, 2

Cɩla, 13 septembre

Weyi ɛsaŋ ɛ-tɩ se ɛsɩŋaa kɔyɔ, ɛɖaŋ ɛ-tɩ nɛ ɛtaatɔlɩ. —1 Kɔr. 10:12.

Yehowa haɣ-ɖʋ e-fezuu kiɖeɖeu se kɩsɩnɩ-ɖʋ nɛ ɖɩkaɖɩnɩ takɩm. Yehowa tɩŋɩɣnɩ ɖɔɖɔ Bibl nɛ ɛgbɛyɛ pɔ-yɔɔ nɛ eheyiɣ-ɖʋ kpacanaa mba pɩwɛɛ se ɖise yɔ. Ɛtasɩɣ-ɖʋ lɔŋ se ɖɩtaakɩlɩ kpaɣʋ ɖa-alɩwaatʋ, ɖe-liidiye, nɛ ɖo-ɖoŋ nɛ ɖɩñɩnɩɣnɩ mbʋ pɩ-tɔm tɩcɛyɩ yɔ. Espen nɛ Janne paakɛ nʋmɔʋ lɩzɩyaa nɛ pɛwɛnɩ piya naalɛ. Espen yɔɔdaa se: “Ðɩtɩmɩɣnɩ Yehowa ɖoŋ ɖoŋ se ɛsɩnɩ-ɖʋ nɛ ɖɩtaatɔlɩ takɩm nabʋyʋ taa, mbʋ pʋyɔɔ yɔ lɛɛlɛɛyɔ ɖɩɩtasɩɣ pɩzʋʋ nɛ ɖɩlakɩ Ɛsɔ sɛtʋ tʋma ɛzɩ ɖooo lɛ yɔ. Ðɩpɔzʋʋ Yehowa se ɛsɩnɩ-ɖʋ nɛ ɖɩkandɩyɩ ɖe-tisuu yɔɔ nɛ ɖɩwɛɛ kpekpeka tɔm susuu taa.” Takɩm lɛɛbʋ mbʋ pɩpɔzʋʋ se ɖɩkaɖɩna yɔ, mbʋ lɛ kʋzʋʋ kɩlɛmɩŋ cɔnʋʋ. Nabɛyɛ cɔŋnɩ kʋzʋʋ kɩlɛmɩŋ mbʋ pʋyɔɔ yɔ paɖʋʋ pa-lɩmaɣza mbʋ pɩfɛyɩ ɖeu yɔ, pɩ-yɔɔ. Ɛlɛ koobiya sakɩyɛ kaɖɩnɩ takɩm mbʋ, nɛ ɖa ɖɔɖɔ ɖɩpɩzɩɣ nɛ ɖɩla mbʋ.—1 Kɔr. 10:13. w15 1/6 5:15, 16

Saɖakawaɣ, 14 septembre

Tataa awiya, nɛ ɛyaa sɔsaa, nɛ kapɩtaŋwaa sɔsaa, nɛ ñɩm tɩnaa nɛ ɛyaa, yomaa, mba pɛwɛ pa-tɩ yɔɔ yɔ, powolo pɛmɛlɩ pʋŋ hɛɛnzɩ taa.—Natʋ 6:15.

Peɖeziɣ cɛtɩm Ɛsɔ sɛtʋ agbaa nɛ pɩtɛ lɛ, ɛbɛ kaɣ labʋ? Alɩwaatʋ ndʋ tɩ-taa ɖɩkaɣ wɩlʋʋ mbʋ pɩwɛ ɖa-laŋɩyɛ taa ɖeyi ɖeyi yɔ. Ɛyaa sakɩyɛ kaɣ ñɩnʋʋ se ɛjaɖɛ yɔɔ agbaa wena awɛ ɛzɩ “pʋŋ nɛ ɛwaŋ” yɔ akandɩyɩ pɔ-yɔɔ. Ɛlɛ Yehowa ɛ-samaɣ kaɣ taʋ liu se ɛkandɩyɩ kɔ-yɔɔ. Pataapasɩ kʋñɔŋ kɩyakɩŋ yɔɔ kajalaɣ pɩnzɩ mɩnʋʋ taa se pɩha Yuda mba tɩŋa waɖɛ nɛ papɩsɩ Krɩstʋ ñɩma. Ɛlɛ mba paatɛm kɛʋ Krɩstʋ mba yɔ, mba pɩha waɖɛ se pese nɛ palɩɩ Yerusalɛm taa ɛzɩ Yesu kaayɔɔdʋʋ yɔ. Mbʋ ɖɔɖɔ pɩkaɣ labʋ cee wayɩ. Alɩwaatʋ ndʋ pakaɣ pasʋʋ kʋñɔŋ sɔsɔʋ kɩyakɩŋ yɔɔ yɔ, pɩtɩkɛ pʋbʋ taa ɛyaa sakɩyɛ kaɣ pɩsʋʋ Yehowa Aseɣɖe Tɩnaa tuda. Ɛlɛ pɩkaɣ haʋ waɖɛ Yehowa Aseɣɖe Tɩnaa tɩŋa se pawɩlɩ se pɔsɔɔlɩ Yehowa nɛ pasɩɣnɩ patam numwaa.—Mat. 25:34-40. w15 1/7 2:7

Kemeɣa, 15 septembre

Pɩkɛ kʋjɔʋ Ɛsɔ cɔlɔ, se ɛyʋ ɛɖɔkɩ ɛ-tɩ siziŋ nɩʋ taa ɖulum. —1 Pɩy. 2:19.

Ða-tɩŋa ɖɩnawa se Yehowa sɛyaa kɛ samaɣ ŋga kɛwɛnɩ nɔɔ kʋɖʋmaɣ yɔ, pʋyɔɔ lɛ pɩtɩmʋna se ɖɩmaɣzɩ se lone naɖɩyɛ yaa ɛjaɖɛ naɖɩyɛ kɩlɩ lɛɛɖɛ. Ɛlɛ pɩtɩtɩlɩ yɔ, ñɔ-hɔʋ taa ñɩma nɛ mba pɛ-hɛkʋ taa ŋcaɣ nɛ ŋpaɣlɩ yɔ, pa-lakasɩ yeba nɛ ŋsɔɔlɩ lone nɖɩ ɖɩ-taa ŋlɩnaa yɔ. Pʋyɔɔ lɛ, nabʋyʋ taa ŋpɩzɩɣ nɛ ŋwɛɛnɩ lɩmaɣza kɩdɛkɛda ɛyaa mba pa-ajɛɛ, pɔ-sɔnzɩ, pa-kʋnʋmɩŋ yaa po-tomnaɣ tɔlɩm wɛ ndɩ yɔ pɔ-yɔɔ. Ɛbɛ pɩzɩɣ pɩsɩnɩ-ŋ nɛ ŋlɛɣzɩ? Kpaɣ alɩwaatʋ nɛ ŋmaɣzɩ ɛzɩma Yehowa naɣ mba pakɩlɩ sɔɔlʋʋ pa-ajɛɛ yaa mba pamaɣzɩɣ se pakɩlɩ lalaa yɔ, pɩ-yɔɔ. Ñɩnɩ ɛgbɛyɛ takayɩsɩ taa nɛ ŋna ɛzɩma patazɩ tɔm ndʋ tɩ-taa yɔ. Nɛ pʋwayɩ lɛ, ŋtɩmnɩ Yehowa se ɛsɩnɩ-ŋ nɛ ŋwɛɛnɩ lɩmaɣza wena ɛwɛnɩ ɛyaa yɔɔ yɔ. (Roma 12:2) Ðɩsɔɔlaa se ɖɩsɛɛ Yehowa nɛ ɛhʋyɛ kɩbanɖɛ. Pʋyɔɔ lɛ, wiɖiyi ɖɩpɩzɩɣ nɛ ɖɩwɛɛ wɛtʋ natʋyʋ taa nɛ pɩpɔzɩ se ɖɩwɩlɩ se ɖɩwɛ ndɩ nɛ ɖa-tʋmɩyɛ taa taabalaa, ɖo-sukuli taa taabalaa, ɖɔ-cɔlɔ ñɩma yaa ɖɔ-hɔʋ taa mba. w15 1/7 3:14, 15

Mazaɣ, 16 septembre

Kpakpayaɣ lotu taa . . . Yoonaasɩ tɩmnɩ [Yehowa] Ɛsɔ. —Yon. 2:2.

Paa ɛyʋ nɔɔyʋ ɛɛnaɣ mbʋ pɩ-taa ɖɩwɛɛ yɔ, Yehowa ñanaɣ nɛ ewelisiɣni-ɖʋ alɩwaatʋ ndʋ ɖɩtɩmɩɣnɩ-ɩ yɔ. Ɛzɩma ecosuu ɖa-adɩma yɔɔ yɔ, pɩwɩlɩ se ɛsɔɔlɩ-ɖʋ pɩdɩɩfɛyɩ. Adɩma wena pama-yɛ Bibl taa yɔ, apɩzɩɣ nɛ akpɛlɩkɩ-ɖʋ lɔŋ sakɩyɛ. Ye mbʋ, nabʋyʋ taa ɖɩɩlakɩ hɔʋ taa Bibl kpɛlɩkʋʋ lɛ, pɩwɛɣ ɖeu se ɖɩtazɩɣ adɩma ana a-taa. Ye ɖɩkpaɣ alɩwaatʋ nɛ ɖɩmaɣzɩ ɛzɩma caanaʋ taa Yehowa sɛyaa tɩmnɩ-ɩ nɛ peheyi-i pa-lɩmaɣza yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩñɔɔzɩ ɖa-adɩma nɛ awɛɛ ɖeu nɛ pɩkɩlɩ. Ðɩpɩzɩɣ nɛ ɖɩmaɣzɩ adɩma wena Yoonaasɩ labɩ kpakpayaɣ lotu taa nɛ etendi Ɛsɔ yɔ, a-yɔɔ. (Yon 1:17-2:10) Ðɩpɩzɩɣ ɖɔɖɔ nɛ ɖɩtazɩ adɩma wena Salomɔɔ labɩnɩ laŋɩyɛ pilim alɩwaatʋ ndʋ patʋlaɣ templo nɔnɔsɩ yɔ, a-taa. (1 Aw. 8:22-53) Ðɩpɩzɩɣ ɖɔɖɔ nɛ ɖɩkpaɣ alɩwaatʋ nɛ ɖɩmaɣzɩ adɩma wena Yesu kpɛlɩkɩ ɛ-wayɩ tɩŋɩyaa yɔ, a-yɔɔ. (Mat. 6:9-13) Ɛlɛ mbʋ pɩ-tɔm kɩlɩ cɛyʋʋ yɔ lɛ se ‘ɖiheyiɣ Ɛsɔ mbʋ ɖɩtɛɖɩɣ yɔ’ ɖoŋ ɖoŋ. Ye ɖɩlakɩ mbʋ yɔ, ‘Ɛsɔ tɛ laŋhɛzɩyɛ nɖɩ ɖɩkpaɖɩ lɔŋ kpeekpe yɔ, ɖɩkaɣ ɖɔkʋʋ ɖa-laŋa nɛ ɖa-maɣzɩm.’—Fil. 4:6, 7. w15 1/8 1:11, 12

Kujuka, 17 septembre

Ɩña mɩ-ñʋndɩnaa. —Ebr. 13:17.

Ɛjaɖɛ kɩfaɖɛ taa, pɩkaɣ-ɖʋ labʋ leleŋ se ɖɩɖɔ ɖʋtʋ ndʋ Yehowa ɛgbɛyɛ kaɣ labʋ yɔ tɩ-yɔɔ nɛ ɖɩñɔɔzɩ tɛtʋ nɛ tɩpɩsɩ paradisuu nɛ ɖɩwɩlɩ Ɛsɔtɔm mba pefezaa yɔ. Yehowa kaɣ-ɖʋ ɖʋʋ tʋma sakɩyɛ. Ɛlɛ mba Yehowa kaɣ lɩzʋʋ se pɛɖɛɛ-ɖʋ nɔɔ yɔ, ye pɔpɔzɩ-ɖʋ se ɖɩla tʋmɩyɛ naɖɩyɛ nɛ ɖɩtɩkɛdɩnɩ-ɖʋ, ɛzɩma ɖɩkaɣ labʋ? Ðɩkaɣ-wɛ ñam na? Ðɩkaɣ tisuu faaa nɛ ɖɩla tʋmɩyɛ nɖɩ paɖʋ-ɖʋ yɔ nɛ taa leleŋ na? Pɩsa nɛ ɖɩñɔɔzɩ ɖa-tɩ nɛ ɖɩcaɣ wezuu maatɛŋ ɛjaɖɛ kɩfaɖɛ taa lɛ, pɩwɛɛ se ɖɩña ɖʋtʋ ndʋ Yehowa ɛgbɛyɛ lakɩ sɔnɔ yɔ. Pɩtɩkɛ ɛzɩma ɖɩñaŋ Yehowa ɛgbɛyɛ yɔ, pi-ɖeke pɩwɩlɩɣna se ɖɩwɛɛ nɛ ɖɩñɔɔzʋʋ ɖa-tɩ se ɖɩcaɣ ɛjaɖɛ kɩfaɖɛ taa. Pɩwɛɛ ɖɔɖɔ se ɖe-liu ɛsɩbɩnɩ mbʋ Yehowa haɣ-ɖʋ yɔ nɛ ɖɩkpɛlɩkɩ ɛzɩma ɖa nɛ lalaa ɖɩla tʋmɩyɛ nɔɔ kʋɖʋmaɣ taa yɔ. Alɩwaatʋ ndʋ paɖʋ-ɖʋ tʋmɩyɛ kɩfaɖɛ naɖɩyɛ yɔ, pɩwɛɛ se ɖitisi faaa nɛ ɖɩlabɩ-ɖɩ nɛ taa leleŋ. Ye sɔnɔ, ɖɩkpɛlɩkɩ ɛzɩma ɖa nɛ mba pɛɖɛ-ɖʋ nɔɔ yɔ ɖɩla tʋmɩyɛ nɔɔ kʋɖʋmaɣ taa yɔ, pɩtʋʋ fɛyɩ se mbʋ ɖɔɖɔ ɖɩkaɣ labʋ ɛjaɖɛ kɩfaɖɛ taa. w15 1/8 3:6, 7

Hodo, 18 septembre

[Ɛ]-halaa [sɩɩnaa layaa] wɛɛkɩ ɛ-laŋɩyɛ, nɛ ɛtɩŋ agbaaɣdaa agɔlɩma . . . nɛ Salomɔɔ la mbʋ pɩfɛyɩ ɖeu yɔ Kɩbaɣlʋ ɛzɩdaa. —1 Aw. 11:4, 6.

Taabalɩyɛ kɩdɛkɛdɩyɛ laba nɛ Salomɔɔ yele Yehowa sɛʋ. (1 Aw. 11:1-6) Ye taabalɩyɛ kɩdɛkɛdɩyɛ ɛɖʋzɩ Salomɔɔ yɔ, pɩpɩzɩɣ ɖɔɖɔ nɛ pɩɖʋzɩ ɖa-taa paa anɩ. Mbʋ yebina nɛ pɩtɩpɔzɩ kpa se ɖɩla lɩmaɣza se ɖa nɛ ɛyʋ weyi ɛɛsɛɣ Yehowa yɔ ɖɩɖɔkɩ nesi. Ɛlɛ ye nɔɔyʋ ɛpɩsɩ Yehowa sɛyʋ nɛ ɛ-tɛŋga tɩpɩsɩ Yehowa sɛyʋ yɔ, ɛbɛ ɛpɩzɩɣ nɛ ɛla? Bibl tɔŋ se: “Mɩ, halaa, ɩña mɩ-walaa, nɛ ye pa-taa nabɛyɛ ikiziɣ se paamʋʋ Tɔm kɔyɔ, pa-halaa pɩzɩ-wɛ nɛ pɔ-ɖɔnɛ kɩbanɖɛ.” (1 Pɩy. 3:1) Tɔm tʋnɛ, titukuuni ɖɔɖɔ koobiya mba pa-halaa tɩkɛ Yehowa sɛyaa yɔ. Lɔŋ weyi Bibl tasɩɣ-ŋ cɩnɛ yɔ, ɩ-taa tʋ kpayɩ kpayɩ: Kɛ walʋ yaa halʋ kɩbanʋ, nɛ ŋñaɣ pana nɛ ŋɖɔ paɣtʋ ndʋ Ɛsɔ ɖʋ nesi ɖɔkʋʋ yɔɔ yɔ, tɩ-yɔɔ. Ye ŋlabɩ mbʋ yɔ, ñɛ-tɛŋga naɣ ɛzɩma ŋpɩsɩ walʋ yaa halʋ kɩbanʋ yɔ lɛ, pɩtɩla ɛkaɣ sɔɔlʋʋ ɖɔɖɔ se ɛsɛɛ Yehowa. Mbʋ labɩnɩ hɔŋ sakɩyɛ taa. w15 1/8 4:15, 16

Piya, 19 septembre

Weyi ɛ-taa fɛyɩ nabʋlɛ yɔ, etisiɣ tɔm kpeekpe yɔɔ, ɛlɛ ɛyʋ lɔndʋ cɔŋnɩ ɛ-ɖɔnɛ yɔɔ. —Ad. 14:15.

Sɔnɔ, kʋdɔmɩŋ nɩɩyɩ wɛɛ lɛ paasɩŋ ɩ-kɔɔ. Pʋyɔɔ lɛ pɩwɛɛ se ɖɩkpa ɖa-tɩ, mbʋ pʋyɔɔ yɔ nabɛyɛ pɩzɩɣ pala nɔɔ taa se pasɩm kʋdɔŋ nakʋyʋ kɔyɛ, ŋgʋ pʋtɔma yɔ pɩtɩkɛ toovenim. Pɔɔlɩ mawa se: “Ɛyaa kpeekpe ɩtɩlɩ se ɩkɛ mba panɩɣ tɔm taa yɔ.” (Fil. 4:5, nwt) Ye ɖɩkɛ mba panɩɣ tɔm taa yɔ, pɩkaɣ-ɖʋ sɩnʋʋ nɛ ɖɩka ñʋʋ nɛ Yehowa sɛtʋ nɛ ɖɩtaakɩlɩ maɣzʋʋ ɖɔ-tɔnʋʋ taa alaafɩya yɔɔ. Ye ɖɔ-tɔnʋʋ taa alaafɩya tɔm ɛkɩlɩnɩ cɛyʋʋ ɖɛ-ɛzɩdaa kɔyɔ, pɩpɩzɩɣ piyele nɛ ɖɩpɩsɩ mba pañɩnɩɣ pe-ɖeke pɛ-kɛzɛɣa yɔ. (Fil. 2:4) Ðɩnawa se ɖɩɩpɩzɩɣ nɛ ɖɩwɛɛnɩ tɔnʋʋ taa alaafɩya kiya ɛjaɖɛ kɩdɛkɛdɩyɛ ɖɩnɛ ɖɩ-taa. Pʋyɔɔ lɛ, pɩwɛɛ se ɖɩsɩɩ Yehowa sɛtʋ kajalaɣ lone taa ɖe-wezuu caɣʋ taa. (Fil. 1:10) Tɔnʋʋ taa alaafɩya hɔɔlʋʋ taa lɛ, ɖa-taa paa weyi pɩwɛɛ se ɛkpaɣ lɩmaɣza nɛ mbʋ pɩlɩɣ pɩ-taa yɔ, ɛ-maɣmaɣ ɛsɩɣlɩ-pʋ. w15 1/9 2:8, 10

Cɩla, 20 septembre

Tiyini-m ña-mintʋsʋʋ nɛ ño-toovenim, nɛ pawɩlɩ-m nʋmɔʋ.—Keɣa 43:3.

Yehowa kɛ “tʋtʋyɛ Ɛsɔ.” (Keɣa 30:6) Ɛsɔɔlaa se ɛsɩnɩ-ɖʋ nɛ ɖɩtɩlɩ-ɩ camɩyɛ nɛ ɛwɩlɩ-ɖʋ ɛzɩma ɖɩsɛɛ-ɩ yɔ. Nɛ ɛwɩlɩɣ-ɖʋ wezuu caɣʋ ŋgʋ kɩkɩlɩ ɖeu yɔ. Ye mbʋ, toovenim tɔm ndʋ Yehowa wɩlɩ-ɖʋ nɛ tɩwɩlɩɣ se ɛsɔɔlɩ-ɖʋ siŋŋ? Kajalaɣ lɛ, Yehowa wɩlɩɣ-ɖʋ weyi ɛkɛnaa yɔ. Ɛsɔɔlaa se ɖɩtɩlɩ-ɩ. (Yak. 4:8) Pʋyɔɔ eheyi-ɖʋ ɛ-hɩɖɛ. Ɛ-hɩɖɛ tɔyɩ Bibl taa nɛ pɩkɩlɩ hɩla tɩŋa. Yehowa wɩlɩɣ-ɖʋ ɖɔɖɔ ɛ-wɛtʋ kɩbandʋ. Ye ɖɩcɔŋnɩ wondu ndʋ payɩ ɛlɩzaa yɔ, ɖɩnaɣ se ɛwɛ ɖoŋ nɛ ɛwɛɛnɩ lɔŋsɩnɖɛ. (Rom. 1:20) Nɛ ye ɖɩkalɩɣ Bibl yɔ, ɖɩnaɣ se ɛwɛ siɣsiɣ nɛ ɛsɔɔlɩ-ɖʋ siŋŋ. Ye ɖɩkpɛlɩkaa nɛ ɖɩtɩlɩ Yehowa wɛtʋ kɩbandʋ yɔ, pɩsɩɣnɩ-ɖʋ nɛ ɖɩñɔtɩnɩ-ɩ nɛ pɩkɩlɩ. w15 1/9 4:8, 9

Saɖakawaɣ, 21 septembre

Yehowa lɩmɖʋyaa kaɣ tɩlʋʋ e-nesi.—Iza. 66:14, nwt.

Ɛyaa sakɩyɛ maɣzɩɣ se Ɛsɔ paa fɛyɩnɩ mbʋ palakɩ yɔ. Pamaɣzɩɣ se toovenim taa lɛ, Ɛsɔ ɛɛmaɣzɩɣ mbʋ pɩtalɩɣ-wɛ yɔ pɩ-yɔɔ. Helim sɔsɔm nabʋyʋ kaamabɩ Filipiini ɛjaɖɛ taa novembre 2013 taa nɛ pɩkɔnɩ asɛyʋʋ sɔsɔʋ. Kaɖɩka sɔsɔɔ ŋga kɔcɔŋnɩ peeɖe tɛtʋ sɔsɔtʋ natʋyʋ yɔɔ yɔ, kɔyɔɔdɩ asɛyʋʋ ŋgʋ kɩ-wayɩ se: “Pɩtʋʋ fɛyɩ se Ɛsɔ taawɛɛ ɖɔ-cɔlɔ.” Ɛyaa lalaa ñamaɣzɩɣ se Ɛsɔ ɛɛnaɣ mbʋ palakɩ yɔ. (Iza. 26:10, 11; 3 Yoh. 11) Ɛyaa nabɛyɛ kaawɛnɩ lɩmaɣza ana apostoloo Pɔɔlɩ alɩwaatʋ taa. Pɔɔlɩ yɔɔdɩ ɛyaa mba pɔ-yɔɔ se: “Patɩmaɣzɩ se pɩwɛ ɖeu se pɔɖɔkɩ Ɛsɔ sɩmtʋ.” Paakɛ nɔɔkuye tɩnaa, kañatʋ tɩnaa, hiluu tɩnaa, nɛ kɩdɛkɛdɩm laɖaa. (Roma 1:28, 29) Nɛ ɖa yɔ, suwe ɖɩmaɣzɩɣ? Ðɩnawa se Yehowa naɣ mbʋ payɩ ɖɩlakɩ yɔ. Ɛlɛ ɖitisiɣ se Yehowa maɣzɩɣ ɖɔ-yɔɔ? Ðɩnaɣ e-nesi yaa ɛzɩma ɛsɩɣnɩ-ɖʋ yɔ ɖe-wezuu caɣʋ taa? w15 1/10 1:1-3

Kemeɣa, 22 septembre

Camɩyɛ lakasɩ mawɩlɩɣnɩ-ŋ men-tisuu.—Yak. 2:18.

Tɔm susuu kɛnɩ nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩwɛnɩ tisuu siŋŋ yɔ. Ɛbɛ yɔɔ? Mbʋ pʋyɔɔ yɔ alɩwaatʋ ndʋ ɖisusuu tɔm yɔ, ɖɩwɩlɩɣ se ɖitisiɣ se ɛjaɖɛ tɛm ñɔtɩ kpam nɛ alɩwaatʋ ndʋ “tɩɩcakɩ wayɩ.” (Hab. 2:3) Ye ɖɩcaɣ se ɖɩna se ɖɩwɛnɩ tisuu siŋŋ yɔ, ɖɩpɩzɩɣ nɛ ɖɩpɔzɩ ɖa-tɩ tɔm tʋnɛ: ‘Tɔm susuu cɛyɩ mɛ-ɛzɩdaa? Mɛwɛɛ nɛ malakɩ mbʋ payɩ manpɩzɩɣ yɔ se pɩsa nɛ meheyi lalaa Ɛsɔtɔm na? Mañakɩ pana se mawalɩsɩ mɔn-tɔm susuu tʋmɩyɛ na?’ (2 Kɔr. 13:5) Iyele nɛ ɖɩtɩŋnɩ laŋhɛzɩyɛ tɔm susuu yɔɔ nɛ ɖɩwɩlɩ se ɖɩwɛnɩ tisuu siŋŋ. (Roma 10:10) Ye ɖɩɖɔkʋʋ ɖa-tɩ tɩlasɩ nzɩ ɖɩkatɩɣ paa ɖooye yɔ sɩ-taa yɔ, ɖɩwɩlɩɣ ɖɔɖɔ se ɖɩwɛnɩ tisuu. Ye ɖɩwɛ kʋñɔndʋtʋ taa, yaa pɩwɩɣ-ɖʋ, yaa pitibi-ɖʋ yɔɔɔ, yaa ɖɩkatɩɣ kʋñɔmɩŋ lɛɛŋ yɔ, pɩwɛɛ se ɖɩwɛɛnɩ tisuu se Yehowa nɛ Yesu pakaɣ-ɖʋ sɩnʋʋ “alɩwaatʋ ndʋ pɩpɔzʋʋ yɔ.” (Ebr. 4:16, ABT) Ðɩwɩlɩɣ se ɖɩwɛnɩ tisuu Yehowa yɔɔ alɩwaatʋ ndʋ ɖɩpɔzʋʋ-ɩ se ɛsɩnɩ-ɖʋ yɔ. w15 1/10 2:12-14

Mazaɣ, 23 septembre

Fezuu kiɖeɖeu . . . [kaɣ-mɩ tɔzʋʋ] ndʋ meheyi-mɩ yɔ.—Yoh. 14:26.

Paa wiɖiyi paɖɩɣ-ŋ nʋmɔʋ se ŋtaawɛɛnɩ Bibl yɔ, nɔɔyʋ ɛɛpɩzɩɣ nɛ ɛɖɩɣ-ŋ nʋmɔʋ se ŋmaɣzɩ Bibl masɩ nzɩ ŋkɩlɩ sɔɔlʋʋ yɔ yaa Kewiyaɣ hendu ndʋ ŋɖɔkɩ ña-ñʋʋ taa yɔ tɩ-yɔɔ. (Tʋma 16:25) Fezuu kiɖeɖeu kaɣ-ŋ sɩnʋʋ nɛ ŋtɔzɩ tɔm ndʋ ŋkpɛlɩkaa yɔ tɩ-yɔɔ nɛ ŋɖɔkɩ ñe-siɣsiɣ wɛtʋ. Ye mbʋ ñɩnɩ alɩwaatʋ kpɩtaʋ taa nɛ ŋkalɩɣ Bibl nɛ ŋmaɣzɩɣ kɩ-yɔɔ nɛ pɩsɩnɩ-ŋ nɛ ŋñɔɔzɩ ña-tɩ. Alɩwaatʋ lɛɛtʋ lɛ, ŋpɩzɩɣ nɛ ŋkalɩ Maatiyee, Maarkɩ, Luka, nɛ Yohanɛɛsɩ tɛ Evaŋgilimwaa nɛ ŋmaɣzɩ tɔm ndʋ Yesu yɔɔdaa nɛ mbʋ ɛlaba yɔ pɩ-yɔɔ. (Roma 10:17; Ebr. 12:2; 1 Pɩy. 2:21) Ðɩwɛnɩ ɖɔɖɔ takayaɣ nakɛyɛ nɛ kɛkɛdɩɣ mbʋ pɩlabɩ Yesu wezuu caɣʋ taa kpaɣnɩ kiɖe tɛɛ pɩkɔɔ pɩtalɩ alɩwaatʋ ndʋ ɛkpa ɛsɔdaa yɔ. Takayaɣ ŋga kapɩzɩɣ nɛ kasɩnɩ-ŋ nɛ tɔm ndʋ ŋkalɩɣ Evaŋgilimwaa taa yɔ, tɩwazɩ-ŋ siŋŋ.—Yoh. 14:6. w15 1/10 4:11, 12

Kujuka, 24 septembre

Mayaɣ-mɩ se mɛ-ɛgbaɣdɩnaa, mbʋ pʋyɔɔ yɔ ndʋ mɛnkpɛlɩkɩ man-Caa cɔlɔ yɔ, mawɩlɩ-mɩ tʋ. —Yoh. 15:15.

Yesu taakɛ apostoloowaa Caa yem na. Ɛɛkɛ ɖɔɖɔ pa-taabalʋ. Bibl alɩwaatʋ taa, ɖoŋ ɖoŋ lɛ lɩmɖʋyaa yaa yomaa caa taaheyiɣ-wɛ ɛ-lɩmaɣza. Ɛlɛ Yesu taakpaɣ apostoloowaa ɛzɩ yomaa yɔ. Ɛɛsɔɔlɩ-wɛ nɛ ɛkpakɩɣ alɩwaatʋ nɛ ɛ nɛ wɛ pacakɩ. Ɛ-taa kaawɛ leleŋ se eheyi-wɛ ɛ-lɩmaɣza, nɛ alɩwaatʋ ndʋ paba ñeheyaɣ-i pa-lɩmaɣza yɔ, ewelisaɣni-wɛ camɩyɛ. (Mark. 6:30-32) Ɛzɩma Yesu nɛ apostoloowaa pɔyɔɔdaɣnɩ ɖama yɔ, piyeba nɛ papɩsɩ taabalaa kɩbama nɛ pɩñɔɔzɩ-wɛ se papɩzɩ nɛ pala tʋmɩyɛ nɖɩ ɖɩɖaŋ-wɛ nɛ ɛzɩdaa yɔ. Yesu kaanawa se ye ɛ-tɔmkpɛlɩkɩyaa ɩsɔɔlɩ Yehowa sɛtʋ nɛ pɛwɛɛ kpekpeka laŋhɛzɩyɛ tɔm susuu taa yɔ, pakaɣ hiɣu taa leleŋ siŋŋ. Pʋyɔɔ eseɣti-wɛ se pañaɣ pana nɛ pɛwɛɛ kpekpeka tɔm susuu taa, nɛ ɛha-wɛ lidaʋ se ɛkaɣ-wɛ sɩnʋʋ.—Mat. 28:19, 20. w15 1/11 2:3, 5

Hodo, 25 septembre

Sɔɔlɩ ño-koobu ɛzɩ ña-maɣmaɣ yɔ.—Mat. 22:39.

Sɔɔlɩm kɛnɩ Yehowa Ɛsɔ wɛtʋ kɩbandʋ sɔsɔtʋ. (1 Yoh. 4:16) Yesu Krɩstʋ weyi Ɛsɔ calɩ lɩzʋʋ yɔ, ɛcaɣ ɛ-Caa Yehowa cɔlɔ ɛsɔdaa pɩnzɩ miiliyaarɩwaa sakɩyɛ nɛ ɛna ɛzɩma Yehowa kɛ Ɛsɔ sɔɔlɩm tʋ siŋŋ yɔ. (Kol. 1:15) Yesu maɣzɩnɩ ɛ-Caa sɔɔlɩm alɩwaatʋ ndʋ ɛɛwɛ ɛsɔdaa yɔ nɛ alɩwaatʋ ndʋ ɛkɔm tɛtʋ yɔɔ yɔ. Ye mbʋ, ɖɩɩpɩtɩɣ se Yehowa nɛ Yesu pakaɣ ɖiyuu ɛyaa nɛ sɔɔlɩm paa ɛzɩmtaa. Kɩyakʋ nakʋyʋ nɔɔyʋ pɔzɩ Yesu se ɛna se paɣtʋ taa lɛ, ndʋ kɩlaa. Yesu cosi-i se: “Sɔɔlɩ [Yehowa] ñɛ-Ɛsɔ nɛ ña-laŋɩyɛ pilim, nɛ ñe-ciyam pilim nɛ ña-maɣzɩm pilim; ndʋ lɛ paɣtʋ kajalaɣ ndʋ nɛ paɣtʋ taa kɩlɩm. Paɣtʋ naalɛ ndʋ wɛ ɛzɩ tʋnɛ yɔ yɔ: Tʋtʋ yɔ se: ‘Sɔɔlɩ ño-koobu ɛzɩ ña-maɣmaɣ yɔ.’” (Mat. 22:37-39) Pɩcɛyaa se ɖɩsɔɔlɩ paa anɩ. Yesu yɔɔdaa se pɩwɛɛ se ɖɩsɔɔlɩ Yehowa nɛ ɖɩsɔɔlɩ ɖɔɖɔ ɖo-koobu. w15 1/11 4:1-3

Piya, 26 septembre

Tɔm ndʋ pama-tʋ lɔndaa yɔ, pama-tʋ ti-kpeekpe se pawɩlɩ-ɖʋ.—Roma 15:4.

Pɩtɩkɛ Ebree kʋnʋŋ yɔɔ yeke Yehowa tɩŋnaa nɛ ɛyɔɔdɩnɩ ɛyaa. Alɩwaatʋ ndʋ Izrayɛɛlɩ piya lɩ Babilooni yomiye taa yɔ, sɩ-taa nasɩyɩ yɔɔdaɣ kʋnʋŋ ŋgʋ payaɣ se Arameya yɔ. Pʋtɔma yɔ, pʋyɔɔ Danɩyɛɛlɩ, Ɛsdrasɩ nɛ Yeremii pama Bibl hɔɔlɩŋ nɩɩyɩ Arameya kʋnʋŋ taa. Pʋwayɩ Alɛkɩsandrɩ Sɔsɔ kɔm nɛ ɛtɔkɩ kewiyitu ajɛɛ sakɩyɛ yɔɔ lɛ, Grɛɛkɩ kʋnʋŋ kɛlɛʋ ñɩŋgʋ ŋgʋ payaɣ se Koinè yɔ, ŋgʋ pakɩlaɣ yɔɔdʋʋ ajɛɛ sakɩyɛ taa. Yuda mba sakɩyɛ paɣzɩ Grɛɛkɩ kʋnʋŋ yɔɔdʋʋ, nɛ pʋyɔɔ lɛ pɛɖɛzɩ Ebree Masɩ Grɛɛkɩ kʋnʋŋ taa. Grɛɛkɩ Masɩ nzɩ payaɣ se Septante. Ye mbʋ, Septante kɛnɩ Bibl ŋgʋ pacalɩ ɖɛzʋʋ yɔ nɛ kɩɩwɛnɩ wazaɣ siŋŋ. Lɔŋsɩnɖaa maɣzɩɣ se tɔm ɖɛzɩyaa 72 labɩnɩ tʋmɩyɛ nɛ palɩzɩ Septante. Pa-taa nabɛyɛ ɖɛzɩ Ebree masɩ taa tɔm piye piye, ɛlɛ lalaa ñatɩla mbʋ. Paa mbʋ yɔ, Yuda mba nɛ Krɩstʋ ñɩma mba pɔyɔɔdaɣ Grɛɛkɩ kʋnʋŋ yɔ, paatisaa se Septante kɛ Ɛsɔtɔm. w15 1/12 1:4-6

Cɩla, 27 septembre

Ɩcɔnɩ nɛ ɩna miŋ ññɩɩ ñakʋʋ laʋ pilim.—Yak. 3:5.

Yakubu lɩzɩ pɩ-taa se: “Nzʋlʋmɩyɛ kɛ ɖɔɖɔ miŋ.” (Yak. 3:6) Pɔyɔɔdʋʋ cɩnɛ se “nzʋlʋmɩyɛ” yɔ, pɩwɩlɩɣ se pɩkɛ waɖɛ nɖɩ ɖɩwɛna se ɖɩyɔɔdɩ tɔm yɔ. Nɛ ɛzɩ miŋ yɔ, tɔm ndʋ ɖɩyɔɔdʋʋ yɔ tɩpɩzɩɣ nɛ tɩkɔnɩ kaɖɛ sɔsɔyɛ. Tɔm ndʋ ɖɩyɔɔdʋʋ yɔ, tɩpɩzɩɣ nɛ tɩwɛɛnɩ ɖoŋ siŋŋ ɛyaa lalaa yɔɔ. Halɩ Bibl heyiɣ-ɖʋ se tɔm ndʋ ɖɩyɔɔdʋʋ yɔ tɩpɩzɩɣ nɛ tɩha lalaa wezuu yaa tɩkɔnɩ-wɛ sɩm. (Ad. 18:21) Ye mbʋ, pʋpɔzʋʋ se ɖiyele yɔɔdʋʋ mbʋ pʋyɔɔ yɔ ɖɩpɩzɩɣ nɛ ɖɩyɔɔdɩ tɔm kɩdɛkɛdɩtʋ natʋyʋ yaa we? Aayɩ. Ðɩɩpɩzɩɣ nɛ ɖɩtɔ se ɖiyeki miŋ labɩnʋʋ tʋmɩyɛ mbʋ pʋyɔɔ yɔ ɩpɩzɩɣ nɛ ɩñaɣ-ɖʋ. Ɛlɛ, pɩwɛɛ se ɖɩtɩlɩ ɛzɩma ɖɩlakɩnɩ-ɩ tʋmɩyɛ yɔ. Miŋ pɩzɩɣ ɩsɩnɩ-ɖʋ nɛ ɖɩtɩzɩ tɔɔnaɣ yaa ɩha-ɖʋ ñalɩmɩyɛ. Ðɩpɩzɩɣ ɖɔɖɔ nɛ ɖihoyi miŋ. Mbʋ ɖɔɖɔ, ye ɖɩcɔnɩ ɖɔ-yɔɔdaɣ yɔɔ camɩyɛ yɔ, kapɩzɩɣ kasɩnɩ-ɖʋ nɛ ɖɩsa Yehowa nɛ ɖɩkpazɩ lalaa ɖoŋ. (Keɣa 18:15) Yehowa ha-ɖʋ waɖɛ se ɖɩtɩŋnɩ ɖɔ-yɔɔdaɣ yaa tandamaa kʋnʋŋ yɔɔ nɛ ɖiheyi lalaa ndʋ ɖɩmaɣzɩɣ nɛ mbʋ pɩwɛ ɖa-laŋa taa yɔ. Ye mbʋ, pɩwɛɛ se ɖɩtɩŋnɩ waɖɛ kɩbanɖɛ nɖɩ ɖɩ-yɔɔ nɛ ɖɩkpazɩ lalaa ɖoŋ.—Yak. 3:9, 10. w15 1/12 3:1-3

Saɖakawaɣ, 28 septembre

Fɛɖʋ kʋsɔɔlʋ Luka sɛɣ-mɩ. —Kol. 4:14

Luka weyi ɛ nɛ Pɔɔlɩ paaɖɔm nʋmɔʋ yɔ, ɛɛkɛ ɖɔkɔtɔ. Pɩtʋʋ fɛyɩ se ɛɛsɩnɩ Pɔɔlɩ nɛ ɛ-taabalaa alɩwaatʋ ndʋ pɔtɔlaɣ kʋdɔŋ yɔ. (Gal. 4:13) Ɛzɩ Yesu kaayɔɔdʋʋ yɔ, “kʋdɔndɩnaa” pɩpɔzʋʋ ɖɔkɔtɔ. (Luka 5:31) Luka taakɛ lɔŋ tasɩyʋ yem tɔnʋʋ taa alaafɩya nʋmɔʋ taa. Ɛlɛ ɛɛkɛ ɖɔkɔtɔ. Bibl tɩyɔɔdɩ ɖenɖe nɛ alɩwaatʋ ndʋ Luka labɩ fɛɖaa sukuli nɛ ɛpɩsɩ ɖɔkɔtɔ yɔ. Ɛlɛ kɩyɔɔdaa se Pɔɔlɩ tiyini Koloosi tɛtʋ taa koobiya Luka sɛtʋ. Ye mbʋ, pʋtɔma yɔ paafalɩsɩ Luka fɛɖaa sukuli ŋgʋ kɩɩwɛ Laodisee tɛtʋ taa yɔ, kɩ-taa. Nɛ tɛtʋ ndʋ, tɩɩñɔtɩnɩ Koloosi tɛtʋ. Pɩtasɩ lɛ, alɩwaatʋ ndʋ Luka maɣaɣ ɛ-tɛ Evaŋgilim nɛ Tʋma Labʋ Takayaɣ yɔ, tɔm pee wena ɛlabɩnɩ tʋmɩyɛ yɔ awɩlɩɣ se ɛɛkɛ ɖɔkɔtɔ. Ɛzɩma ɛkɛdɩ maamaaci lakasɩ nzɩ Yesu laba nɛ ɛwaa kʋdɔndɩnaa yɔ sɩ-tɔm sakɩyɛ yɔ, pɩwɩlɩɣ ɖɔɖɔ se ɛɛkɛ ɖɔkɔtɔ. w15 1/12 4:11, 12

Kemeɣa, 29 septembre

“Pɛsɛɛ Ɛsɔ ɛ-kʋjɔʋ ŋgʋ kɩ-wayɩ fɛyɩ yɔ, kɩ-yɔɔ.—2 Kɔr. 9:15.

Yehowa labɩ-ɖʋ kʋjɔʋ sɔsɔʋ siŋŋ alɩwaatʋ ndʋ etiyi ɛ-Pɩyalʋ ɛgbamɩyɛ Yesu tɛtʋ yɔɔ yɔ. (Yoh. 3:16; 1 Yoh. 4:9, 10) Apostoloo Pɔɔlɩ ya kʋjɔʋ ŋgʋ se “kʋjɔʋ ŋgʋ kɩ-wayɩ fɛyɩ yɔ.” Pɔɔlɩ kaanawa se pɩtɩŋnɩ Yesu kɩlaʋ yɔɔ lɛ, lidaʋ tɔm ndʋ payɩ Ɛsɔ yɔɔdaa yɔ tɩkaɣ labʋ. (2 Kɔr. 1:20.) Pɩwɩlɩɣ se Ɛsɔ “kʋjɔʋ ŋgʋ kɩ-wayɩ fɛyɩ yɔ,” ŋgʋ lɛ Yesu kɩlaʋ, camɩyɛ lakasɩ nɛ sɔɔlɩm sɔsɔm mbʋ Yehowa wɩlɩɣ-ɖʋ yɔ. Ye ɖɩtɔm se ɖɩyɔɔdʋʋ Ɛsɔ kʋjɔʋ sɔsɔʋ ŋgʋ kɩ-tɔm tete yɔ, ɖɩɩkaɣ tɛm. Ɛzɩma kʋjɔʋ sɔsɔʋ ŋgʋ kitukuuni-ɖʋ? Kɩkaɣ-ŋ seɣtuu se ŋlɛɣzɩ ñe-wezuu caɣʋ na? Pɩtʋʋ fɛyɩ se pɩkaɣ-ŋ seɣtuu ɖɔɖɔ se ŋsɔɔlɩ lalaa nɛ ŋwɛɛ kʋjɔʋ nɛ pɩkɩlɩ, nɛ ye nɔɔyʋ ɛlabɩ-ŋ nabʋyʋ nɛ pɩfɛyɩ ɖeu kɔyɔ ŋkpeɣ-i faaa. Kpaɣnɩ puwiye lɛ, ŋkaɣ wɩlʋʋ ñe-wezuu caɣʋ kpeekpe taa se ŋwɛnɩ ɛsɩmɩyɛ kʋjɔʋ sɔsɔʋ ŋgʋ kɩ-yɔɔ. Tɔzɩ se kɩhɛyʋʋ pʋ-ñʋʋ taa kʋjɔʋ ŋgʋ Ɛsɔ labɩ-ɖʋ yɔ, kɩkpaɖɩ kʋjɔʋ ŋgʋ ɖɩyɔɔdɩ kɩ-tɔm lɛɛlɛɛyɔ yɔ.—1 Pɩy. 3:15. w16.01 2:1, 2, 4, 5

Mazaɣ, 30 septembre

Helim makɩnɩ ɖenɖe pɩsɔɔlaa yɔ nɛ ŋnɩɣ pɩ-taŋ, nɛ ŋŋsɩŋ se pɩlɩnɩ le nɛ piwoki le. Mbʋ yɔ ɛyʋ weyi palʋlɩ-ɩ fezuu taa yɔ, ɛ-tɔm wɛɛ. —Yoh. 3:8.

Krɩstʋ tʋ weyi pata-ɩ num yɔ, ɛpɩzɩɣ nɛ ɛpɔzɩ ɛ-tɩ se: ‘Ɛbɛ yɔɔ Yehowa lɩzɩ-m nɛ eyele akele?’ Halɩ ɛpɩzɩɣ nɛ ɛmaɣzɩ se ɛtɩmʋna se ɛwɛɛnɩ waɖɛ nɖɩ. Paa mbʋ yɔ, ɛɛpɩtɩɣ se Yehowa lɩzɩ-ɩ se ɛkɛ patam num. Nɛ ɛ-taa wɛ leleŋ kpem nɛ kʋjɔʋ ŋgʋ nɛ ɛwɛɛnɩ ɛsɩmɩyɛ siŋŋ kɩ-yɔɔ. Patam numwaa lɩmaɣza labɩ nɔɔ kʋɖʋmaɣ nɛ Pɩyɛɛrɩ ñɩna. Ɛmawa se: “Pasa Ɛsɔ, ɖa-Kɩbaɣlʋ Yesu Krɩstʋ Caa: Ɛ-pʋtɔdɩyɛ naʋ taa ɛɖaɣnɩ-ɖʋ lʋlʋʋ nɛ Yesu Krɩstʋ femtu sɩm yɔɔ, se ɖɩwɛɛnɩ wezuu lidaʋ, nɛ ɖɩpɩzɩ ɖihiɣ ñɩm mbʋ pɩɩɖazɩɣ, pɩfɛyɩ azuluma, pɩɩkpadɩyɩɣ nɛ pasɩ-mɩ pʋ ɛsɔdaa yɔ.” (1 Pɩy. 1:3, 4) Alɩwaatʋ ndʋ patam numwaa kalɩɣ tɔm ndʋ yɔ, paapɩtɩɣ se mba Yehowa wɛɛ nɛ ɛyɔɔdʋʋna. w16.01 3:11, 12