Novembre

Cɩla, 1^er novembre

Pʋwayɩ lɛ Abraham tisi fezuu, ɛsɩbɩ akpadɩyɩtʋ kɩbandʋ taa, ɛpɩwa nɛ ɛ-kɩyakɩŋ ɖɔwa. —Kiɖe 25:8.

Bibl tɔm se Abraham sɩbɩ “akpadɩyɩtʋ kɩbandʋ taa, ɛpɩwa nɛ ɛ-kɩyakɩŋ ɖɔwa” yɔ, pɩtɩwɩlɩ se ɛɛñɩɣzɩ wezuu. Aayɩ. Ɛlɛ Abraham kaawɛnɩ lidaʋ se ɛtasɩɣ caɣʋ wezuu cee wayɩ. Bibl yɔɔdaa se Abraham ɖaŋaɣ “tɛtʋ ndʋ tɩwɛnɩ tigiɖe siŋŋ yɔ, ndʋ Ɛsɔ maɣmaɣ kɛ tɩ-mayʋ nɛ tɩ-lɔɖʋ yɔ.” (Ebr. 11:10) Maɣzɩ nɛ ŋna ɛzɩma Abraham taa kaɣ labʋ leleŋ alɩwaatʋ ndʋ ɛkaɣ caɣʋ paradisuu taa tɛtʋ yɔɔ nɛ ɛcɛyɩsɩɣ ɛ nɛ Ɛsɔ pa-taabalɩyɛ tam yɔ. Ɛ-taa kaɣ labʋ leleŋ kpem se ɛna se e-tisuu sɩnɩ Ɛsɔ sɛyaa pɩnzɩ sakɩyɛ. Paradisuu taa, ɛkaɣ naʋ se kɩlaʋ ŋgʋ Yehowa kaapɔzɩ-ɩ se ɛlaa Moriya Pʋʋ yɔɔ yɔ, kɩsɩŋnɩ pʋyʋ sɔsɔ nɔɔyʋ. (Ebr. 11:19) Pɩtasɩ lɛ, ɛkaɣ naʋ se siziŋ weyi ɛnɩ alɩwaatʋ ndʋ ɛñɩnaɣ laʋ ɛ-pɩyalʋ Izaakɩ yɔ, ɛsɩnɩ ɛyaa miiliyɔɔwaa sakɩyɛ nɛ patɩlɩ siziŋ weyi Yehowa nɩ alɩwaatʋ ndʋ ɛcɛlɩ ɛ-Pɩyalʋ Yesu Krɩstʋ se ɛlaa ɛ-tɩ ɛyaa yɔɔ yɔ.—Yoh. 3:16. w16.02 1:15, 16

Saɖakawaɣ, 2 novembre

Halʋ tɩgbayʋ pɩyalʋ, ɛzɩ mantɩna se ŋsɔɔlɩ Yesee pɩyalʋ se pɩkɛnɩ-ŋ fɛyɛ nɛ ño-ɖoo tɛ ndaakpeɖe fɛyɛ?—1 Sam. 20:30.

Ðɩpɩzɩɣ ɖɔɖɔ nɛ ɖɩñɔɔnɩ Yehowa paa koobu weyi ɛwɛnɩ waɖɛ ɛgbɛyɛ taa yɔ, ɛlakɩ-ɖʋ mbʋ pɩfɛyɩ ɖeu yɔ. Ɛsɔ kaalɩzɩnɩ Sɔɔlɩ se ɛkɛ wiyaʋ, paa mbʋ yɔ Sɔɔlɩ labɩ ɛ-maɣmaɣ ɛ-pɩyalʋ mbʋ pɩfɛyɩ ɖeu yɔ. Ɛtaatɩlɩ mbʋ pʋyɔɔ Yonataanɩ sɔɔlɩ Daviid yɔ. Pʋyɔɔ alɩwaatʋ ndʋ Yonataanɩ ñɩnaɣ se ɛsɩnɩ Daviid yɔ, Sɔɔlɩ taa wɩnɩ-ɩ siŋŋ nɛ ɛɖʋ-ɩ fɛyɛ ɛyaa sakɩyɛ ɛzɩdaa. Ɛlɛ Yonataanɩ wobi pɩ-yɔɔ nɛ ɛñaŋ ɛ-caa. Alɩwaatʋ kʋɖʋmtʋ ndʋ tɩ-taa lɛ, Yonataanɩ kaañɔnɩ Yehowa; ɛɛñɔnɩ ɖɔɖɔ Daviid weyi Ɛsɔ lɩzaa se ɛpɩsɩ wiyaʋ Sɔɔlɩ wayɩ yɔ. (1 Sam. 20:31-41) Sɔnɔ, koobiya mba pɛɖɛɣ-ɖʋ nɔɔ ɖa-agbaa taa yɔ, pañakɩ pana se pala ɖa-tɩŋa mbʋ pɩwɛ ɖeu yɔ. Ɛlɛ patɩtalɩ pilim, nɛ pʋyɔɔ lɛ pɩpɩzɩɣ nɛ pɩla se paanɩɣ mbʋ pʋyɔɔ ɖɩlabɩ nabʋyʋ yɔ pɩ-taa. (1 Sam. 1:13-17) Ye mbʋ, ye wiɖiyi patɩnɩɩ mbʋ pʋyɔɔ ɖɩlabɩ nabʋyʋ yɔ pɩ-taa camɩyɛ yɔ, pɩwɛɛ se ɖiwolo pɩ-yɔɔ nɛ ɖɩñɔɔnɩ Yehowa. w16.02 3:14, 15

Kemeɣa, 3 novembre

Ye weyi ɛsɔɔlɩ ma-wayɩ tɩŋʋʋ lɛ, ekizi ɛ-tɩ, ɛkpaɣ [ɛ-nazɩm sizika].—Mat. 16:24.

Pɩwɛ ɛzɩ piya evelisi nasɩyɩ ɩɩsɩŋ tʋkaɣ ŋga kɛwɛ tɩ haʋ nɛ lɩm mɩyɩsʋʋ pɛ-hɛkʋ taa yɔ. Piya evelisi nasɩyɩ pɩzɩɣ nɛ sɩyɔɔdɩ se sɩtɛm sɩ-tɩ kpaɣʋ nɛ sɩha Yehowa, ɛlɛ sɩtɩtalɩta se pamɩyɩsɩ-sɩ lɩm. Ɛlɛ toovenim taa lɛ, pɩpɩzɩɣ nɛ pɩla mbʋ? Tɩ haʋ kɛnɩ adɩma wena a-taa ŋheyiɣ Yehowa se ŋkpaɣ ña-tɩ nɛ ŋha-ɩ se ŋsɛɛ-ɩ tam yɔ. Ye mbʋ, alɩwaatʋ ndʋ pamɩyɩsɩɣ-ŋ lɩm yɔ, ŋwɩlɩɣ lalaa se ŋtɛm kpaɣʋ ña-tɩ nɛ ŋha Yehowa. Pʋyɔɔ lɛ, pʋcɔ nɛ pamɩyɩsɩ-ŋ lɩm lɛ, pɩwɛɛ se ŋnɩɩ tɩ haʋ tɔbʋʋ camɩyɛ. Alɩwaatʋ ndʋ ŋkpakɩɣ ña-tɩ nɛ ŋha Yehowa yɔ, pɩwɩlɩɣ se ŋheyi Yehowa se lɛɛlɛɛyɔ lɛ ŋpɩsɩ ɛ-pʋyʋ. Ŋɖuwaa se ŋkaɣ sɩʋ ɛ-sɔɔlɩm labʋ kajalaɣ ɖeɖe ñe-wezuu caɣʋ taa. Ye ŋɖuuni Ɛsɔ mbʋ yɔ, pɩtɩkɛ aleɣya tɔm.—Mat. 5:33. w16.03 1:14, 15

Mazaɣ, 4 novembre

Ɛlɛ ɖɩwɛɣ toovenim nɛ sɔɔlɩm pa-taa na.—Efɛz. 4:15.

Pɔɔlɩ kpaɣ tomnaɣ kɩɖaʋ nɛ ɛwɩlɩ se paa Krɩstʋ tʋ weyi lɛ, ɛpɩzɩɣ ɛsɩna nɛ ɛgbɛyɛ wɛɛ nɔɔ kʋyʋmaɣ taa nɛ ɖɩtɩŋ ɖɩ-ñʋʋdʋ Yesu wayɩ. Ɛyɔɔdaa se tomnaɣ pilinzi tɩŋa kpɛndɩɣ camɩyɛ pɩtɩŋnɩ toma yɔɔ nɛ sɩlakɩ tʋmɩyɛ. Ye pɩhɔzɩ ɖo-toma naayɛ taa yɔ, ɖo-tomnaɣ tɩŋa nɩɣnɩ siziŋ. Mbʋ ɖɔɖɔ ye koobiya nabɛyɛ ɩwɛ ɛgbɛyɛ taa nɛ paanɩɣnɩ ɛzʋtʋyaa kɔyɔ, ɛgbɛyɛ tɩŋa nɩɣnɩ siziŋ. Ɛzɩma ɖɩpɩzɩɣ nɛ ɖɩlʋbɩnɩ wɛtʋ ndʋ? Yesu lɩzɩnɩ ɛzʋtʋyaa se pɔcɔnɩ ɛgbɛyɛ yɔɔ nɛ ɛsɔɔlaa se ɖɩñam-wɛ nɛ ɖɩla mbʋ pɔpɔzʋʋ-ɖʋ yɔ. (Ebr. 13:7, 17) Ɛlɛ pɩfɛyɩ kɛlɛʋ paa ɛzɩmtaa. Paa mbʋ yɔ, ɖɩpɩzɩɣ nɛ ɖɩpɔzɩ Yehowa se ɛsɩnɩ-ɖʋ. Fezuu kiɖeɖeu pɩzɩɣ kɩsɩnɩ-ɖʋ nɛ ɖɩña ɖʋtʋ ndʋ payɩ ɛzʋtʋyaa lakɩ se pɩwazɩ-ɖʋ yɔ. Ye ɖiluzi ɖa-tɩ nɛ ɖɩnɩɣnɩ ɛgbɛyɛ taa ɛzʋtʋyaa camɩyɛ yɔ, pɩpɩzɩɣ pɩsɩnɩ ɖɛ-ɛgbɛyɛ. Piyeki nɛ nɔɔ kʋyʋmaɣ wɛɛ ɖɛ-ɛgbɛyɛ taa nɛ ɖɩsɔɔlɩ ɖama nɛ pɩkɩlɩ. w16.03 3:8, 9

Kujuka, 5 novembre

Tɩkɛ wezuu tɔm, Ɛsɔtɔm ndʋ, tɩlakɩ tʋmɩyɛ pɩŋŋ. —Ebr. 4:12.

Alɩwaatʋ ndʋ koobiya nabɛyɛ kaakɛ piya evelisi yɔ, pa-lʋlɩyaa tiseɣti-wɛ se paɖʋ pa-tɩ fezuu taa kaɖʋsɩ. Mbʋ yebina nɛ patɩsɩɩ Ɛsɔ sɛtʋ kajalaɣ lone taa si-wezuu caɣʋ taa. (Mat. 10:24) Ye mbʋ, ye ɛzʋtʋyʋ nɔɔyʋ ɛfalɩsɩɣ koobu nɔɔyʋ yɔ, pɩwɛɛ se ɛñaɣ pana nɛ ɛ nɛ koobu ɛnʋ paɖʋ taabalɩyɛ. Pɩwɛɛ se ɛsɩnɩ-ɩ nɛ ɛna se ɛwɛnɩ wazaɣ ɛgbɛyɛ taa. Pʋwayɩ lɛ, ɛtɩŋnɩ Bibl masɩ nasɩyɩ yɔɔ nɛ ɛcɔlɩ ɛ-lɩmaɣza, nɛ ɛsɩnɩ-ɩ nɛ ɛmaɣzɩ ɛzɩma ɛpɩzɩɣ nɛ ɛkpaɣ ɛ-tɩ nɛ ɛha Yehowa yɔ, pɩ-yɔɔ. (Ekl. 5:4; Iz. 6:8; Mat. 6:24, 33; Luka 9:57-62; 1 Kɔr. 15:58; 2 Kɔr. 5:15; 13:5) Ɛzʋtʋyʋ pɩzɩɣ ɛtɩŋnɩ tɔm pɔzʋʋ pʋnɛ pɩ-yɔɔ nɛ etukuni ɛ-laŋɩyɛ: ‘Alɩwaatʋ ndʋ ŋkpakaɣ ña-tɩ se ŋha Yehowa yɔ, ŋheyi-i se ɛbɛ ŋkaɣ-ɩ labʋ? Alɩwaatʋ ndʋ pamɩyɩsɩ-ŋ lɩm yɔ, ŋmaɣzɩɣ se ɛzɩma pɩlabɩ Yehowa?’ (Ad. 27:11) ‘Nɛ Sataŋ yɔ, ŋmaɣzɩɣ se ɛzɩma pɩlabɩ-ɩ?’ (1 Pɩy. 5:8) Ye ɛlabɩnɩ Bibl masɩ nzɩ tʋmɩyɛ camɩyɛ yɔ, sɩpɩzɩɣ nɛ situkuni koobu ɛnʋ ɛ-laŋɩyɛ siŋŋ. w15 1/4 2:9, 11

Hodo, 6 novembre

Ɩɖʋzɩ mɩ-ɛhʋyɛ kpeekpe e-nesi tɛɛ, mbʋ pʋyɔɔ yɔ ɛcɔŋnɩ mɩ-yɔɔ.—1 Pɩy. 5:7.

Ɛbɛ yɔɔ Yehowa eecosuu ɖa-adɩma yɔɔ kpaagbaa paa ɛzɩmtaa? Bibl tɔŋ se Yehowa wɛ ɛzɩ caja yɔ. (Keɣa 102:13) Caja ɛɛhaɣ ɛ-pɩɣa mbʋ payɩ kɔpɔzʋʋ-ɩ yɔ kpaagbaa. Caja nawa se nabʋyʋ pɩzɩɣ nɛ pɩla pɩɣa liu lɛɛlɛɛyɔ, nɛ pʋwayɩ lɛ kaatasɩɣ-pʋ sɔɔlʋʋ. Pɩtasɩ lɛ, caja sɩm mbʋ piɖeɣni ɛ-pɩɣa nɛ pɩkɩlɩ yɔ, nɛ ɛsɩm ɖɔɖɔ ɖoŋ weyi mbʋ pɩɣa pɔzʋʋ yɔ, pɩpɩzɩɣ nɛ pɩwɛɛnɩ lalaa yɔɔ yɔ. Ɛsɩm mbʋ pɩkɛ ɛ-pɩɣa kɩcɛyɩm yɔ nɛ alɩwaatʋ ndʋ pɩwɛɛ se ɛha-kɛ pʋ yɔ. Ye caja ɛhaɣ ɛ-pɩɣa mbʋ payɩ kɔpɔzʋʋ-ɩ yɔ kpaagbaa kɔyɔ, caja ɛnʋ ɛpɩsɩɣ pɩɣa ŋga ko-yom. Yehowa kɛnɩ ɖa-Caa kʋsɔɔlʋ weyi ɛwɛ ɛsɔdaa yɔ. Ɛkɛ ɖa-Lɩzɩyʋ weyi ɛwɛ lɔŋ yɔ, nɛ ɛsɩm mbʋ pɩkɛ ɖa-kɩcɛyɩm yɔ nɛ alɩwaatʋ ndʋ tɩ-yɔɔ pɩmʋnaa se ɛha-ɖʋ mbʋ ɖɩpɔzʋʋ-ɩ yɔ. Pʋyɔɔ lɛ, pɩwɛɣ ɖeu se ɖɩɖaŋ nɛ ɖɩna ɛzɩma Yehowa kaɣ ɖa-adɩma yɔɔ cosuu yɔ.—Iza. 29:16; 45:9. w15 1/4 4:6, 7

Piya, 7 novembre

Ɩlʋbɩnɩ Eleeu nɛ ese ɛɖɛɛ mɩ-yɔɔ ɖooo poliŋ. —Yak. 4:7.

Ðɩwɛ ɛjaɖɛ ɖɩnɛ ɖɩ-kɛdɛzaɣ kɩyakɩŋ taa, nɛ Sataŋ ñɩnɩɣ se ɖɩhɛndɩnɩ ɖa-tɩ, pʋ-tɔbʋʋ lɛ se ɖɩka ɖa-ñʋʋ nɛ ɛjaɖɛ yɔɔ ñɩm ñɩnʋʋ. Ɛñɩnɩɣ se ɖɩtaacaɣnɩ ɖɛ-ɛza nɛ ɖɩsɔɔ se Yehowa kɩyakʋ sɔsɔʋ ñɔtaa. Ðitaayele kpa nɛ lɩmaɣza ana añɔ ɖa-laŋɩyɛ taa. Ɛlɛ ‘ɖɩɖaŋ ɖa-tɩ yɔɔ.’ (Mat. 16:22, 23; 24:42) Ðitaayele kpa nɛ Sataŋ cɛtɩ-ɖʋ se ɛjaɖɛ tɛm tɩñɔtɩ yaa ɛjaɖɛ ɛɛkaɣ tɛm wiɖiyi. Sataŋ ñɩnɩɣ se ɖɩmaɣzɩ se Ɛsɔ tɩsɔɔlɩ-ɖʋ, nɛ ɛɛkaɣ-ɖʋ kpeɣu ɖa-kɩwɛɛkɩm kpa. Pɩkɛ cɛtɩm tɔm ndʋ Sataŋ ñɩnɩɣ se ɖitisi tɩ-yɔɔ yɔ. Toovenim taa lɛ, anɩ Yehowa tɩsɔɔlɩ? Ɛnʋ lɛ Sataŋ. A-kɩwɛɛkɩm Yehowa ɛɛkaɣ kpeɣu kpa? Sataŋ kʋɖʋm ɛnʋ. Ɛlɛ Bibl heyiɣ-ɖʋ se: “Ɛsɔ tɩkɛ nɔɔkuye tʋ se ɛsɔɔ mbʋ ɩlaba nɛ ɩsɔɔlɩ ɛ-hɩɖɛ yɔ.” (Ebr. 6:10) Yehowa taa wɛ leleŋ nɛ pana wena ɖɩñakɩ se ɖɩla ɛ-sɔɔlɩm yɔ, nɛ tʋmɩyɛ nɖɩ ɖɩlakɩ-ɩ yɔ, ɖɩtɩkɛ falaa pʋyʋ ɛ-ɛzɩdaa. (1 Kɔr. 15:58) Ye mbʋ, ɖitaayele kpa nɛ Sataŋ cɛtɩm tɔm peɣzi-ɖʋ. w15 1/5 1:16-19

Cɩla, 8 novembre

Pana-pʋ nɛ pɛsɛɛ-pʋ yem ɖooo poliŋ taa.—Ebr. 11:13.

Abraham kaanawa se lidaʋ tɔm ndʋ payɩ Yehowa kaayɔɔdɩ caanaʋ taa yɔ ɛlabɩ tɩ-tɩŋa tɩ-yɔɔ, nɛ pʋyɔɔ lɛ ɛtaapɩtɩɣ se lidaʋ tɔm ndʋ Yehowa yɔɔdɩ cee wayɩ yɔɔ yɔ, ɛkaɣ tɩ-tɩŋa tɩ-yɔɔ labʋ. Abraham kaawɛnɩ tisuu Yehowa lidaʋ tɔm yɔɔ, nɛ mbʋ sɩnɩnɩ-ɩ nɛ ɛtɛ ɛ-taa se ɛlakɩ Yehowa sɔɔlɩm. Tisuu yɔɔ ɛkʋyɩ Uuri tɛtʋ taa, nɛ ɛtalɩ Kanaŋ ɛjaɖɛ taa lɛ, ɛtɩcaɣ tɛtʋ natʋyʋ taa tam. Ɛɛnawa se tɛtʋ ndʋ tɩ-taa natʋyʋ ɛɛkaɣ wɛʋ tam, mbʋ pʋyɔɔ yɔ tɩ-ñʋndɩnaa taasɛɣ Yehowa. (Yoz. 24:2) Abraham, Aabɛɛlɩ, Enɔɔkɩ, nɛ Ɛsɔ sɛyaa lalaa paawɛnɩ tisuu se pakaɣ sɩɖaa fezuu. Nɛ pʋyɔɔ lɛ, paaɖaŋ alɩwaatʋ ndʋ Yehowa nɛ e-komina pakaɣ ɖiyuu tɛtʋ tam yɔ. Komina ŋgʋ payaɣ se: “Tɛtʋ ndʋ tɩwɛnɩ tigiɖe siŋŋ yɔ, ndʋ Ɛsɔ maɣmaɣ kɛ tɩ-mayʋ nɛ tɩ-lɔɖʋ yɔ.” (Ebr. 11:10) Ɛzɩma pamaɣzaɣ cee wayɩ wazasɩ nzɩ sɩ-yɔɔ yɔ, mbʋ kpazɩnɩ pe-tisuu ɖoŋ.—Ebr. 11:15, 16. w15 1/5 3:8, 9

Saɖakawaɣ, 9 novembre

Krɩstʋ kɛnɩ Ɛsɔ ɖoŋ.—1 Kɔr. 1:24.

Yehowa tɩŋnɩ Yesu yɔɔ nɛ ɛwɩlɩ e-ɖoŋ sɔsɔŋ hɔɔlɩŋ ndɩ ndɩ taa. Evaŋgilimwaa yɔɔdɩ maamaaci lakasɩ nzɩ Yesu laba yɔ sɩ-taa nasɩyɩ tɔm kpayɩ kpayɩ nɛ pɩkpazɩɣ ɖe-tisuu ɖoŋ. Pɩtʋʋ fɛyɩ se ɛɛlabɩ maamaaci lakasɩ lɛɛsɩ ɖɔɖɔ sakɩyɛ. (Mat. 9:35; Luka 9:11) Toovenim lɛ, Yehowa tɩŋnɩ Yesu yɔɔ nɛ ɛwɩlɩ e-ɖoŋ. Pʋyɔɔ apostoloo Pɔɔlɩ yɔɔdaa se: “Krɩstʋ kɛnɩ Ɛsɔ ɖoŋ.” Ɛlɛ ɛzɩma tɩyɛ Yesu maamaaci lakasɩ nzɩ, situkuuni ɖe-wezuu caɣʋ sɔnɔ? Apostoloo Pɩyɛɛrɩ tɔm se Yesu labɩ maamaaci yaa “hama” lakasɩ. (Tʋma 2:22) Maamaaci lakasɩ nzɩ Yesu labɩ alɩwaatʋ ndʋ ɛɛwɛ tɛtʋ yɔɔ yɔ, sɩwɩlɩɣ wazasɩ sɔsɔsɩ nzɩ ɛkaɣ kɔnʋʋ alɩwaatʋ ndʋ ɛkaɣ tɔɔʋ kewiyitu ɛyaa yɔɔ yɔ. Sɩwɩlɩɣ ɖɔɖɔ maamaaci lakasɩ nzɩ ɛkaɣ labʋ ɛjaɖɛ kɩfaɖɛ taa se pɩwazɩ ɛyaa kpeekpe yɔ. Pɩtasɩ lɛ maamaaci lakasɩ nzɩ, sɩsɩɣnɩ-ɖʋ se ɖɩtɩlɩ Yesu nɛ ɛ-Caa pɛ-wɛtʋ kɩbandʋ camɩyɛ. w15 1/6 1:1, 2

Kemeɣa, 10 novembre

Ɛmaɣzaɣ ɛ-taa se: “Ye montukuni cɛɛkɛ e-tokonaa kɔyɔ, mɔ-yɔɔ kaɣ cɛbʋ.”—Mark. 5:28.

Yesu nawa se ɛ-Caa Yehowa wa halʋ ɛnʋ lɛ, eheyi-i nɛ nɔɔ kɩbaŋa se: “Mɛn-pɛlɛ, ñe-tisuu yabɩnɩ ña-ñʋʋ; wolo nɛ laŋhɛzɩyɛ nɛ ña-kʋdɔŋ kpeekpe waa.” Yesu kaasɔɔlɩ ɛyaa kpem. Nɛ kɔzɩ kɔzɩ lɛ, ɛmaɣzaɣ kʋdɔndɩnaa yɔɔ. Ɛwɛ ndɩ kpem nɛ Sataŋ, mbʋ pʋyɔɔ yɔ Sataŋ ñɩnɩɣ se ɖɩmaɣzɩ se nɔɔyʋ tɩsɔɔlɩ-ɖʋ nɛ ɖɩfɛyɩnɩ wazaɣ nakɛyɛ. Maamaaci lakasɩ nzɩ Yesu laba yɔ, sɩwɩlɩɣ kaɣlaa se ɛnaɣ kʋñɔmɩŋ weyi ɩ-taa ɖɩwɛɛ yɔ nɛ ɛmaɣzɩɣ ɖɔ-yɔɔ siŋŋ. Ða-taa wɛ leleŋ se ɖɩwɛnɩ Wiyaʋ nɛ Cɔjɔ Sɔsɔ weyi ɛsɔɔlɩ-ɖʋ siŋŋ yɔ. (Ebr. 4:15) Pɩwɛ-ɖʋ kaɖɛ se ɖɩnɩɩ mba pahɩnɩ kʋdɔŋ sɔsɔʋ nakʋyʋ yɔ pɔ-tɔm taa, kɔzɩ kɔzɩ ye wiɖiyi ɖɩtɩhɩnɩ kʋdɔŋ ŋgʋ nɛ ɖɩna yɔ. Ðɩtɔzɩ se paa pɩtɩwɩɩ Yesu wiɖiyi yɔ, ɛpɩzaa nɛ ɛnɩɩ mba pɩwɩɣ-wɛ yɔ pe-siziŋ. Tɛtɛ pɩla mbʋ nɛ ɖɩmaɣzɩnɩ Yesu nɛ ɖɩnɩɩ lalaa siziŋ nɛ ɖɩsɩnɩ-wɛ.—1 Pɩy. 3:8. w15 1/6 2:11, 12

Mazaɣ, 11 novembre

Mɩ-yɔɔ yɔɔ patʋʋ Ɛsɔ hɩɖɛ ajɛɛ hɛkʋ taa.—Roma 2:24.

Pɩkɛnɩ-ɖʋ waɖɛ sɔsɔɖɛ se ɖɩsɩm Ɛsɔ hɩɖɛ nɛ ɖɩkɛ ɖɔɖɔ ‘samaɣ ŋga paya-kɛ nɛ ɛ-hɩɖɛ’ yɔ. (Tʋma 15:14; Iza. 43:10) Ðɩtɩmɩɣnɩ Yehowa se: “Ña-hɩɖɛ ɛsɛɛ.” (Mat. 6:9) Pʋ-tɔbʋʋ lɛ se Ɛsɔ hɩɖɛ ɛwɛɛ kele kele. Alɩwaatʋ ndʋ ɖɩlakɩ adɩma ana yɔ, pɩwɩlɩɣ se ɖɩwɛɛ nɛ ɖɩpɔzʋʋ Yehowa se ɛsɩnɩ-ɖʋ nɛ ɖɩtaala nabʋyʋ yaa ɖɩtaayɔɔdɩ tɔm natʋyʋ nɛ pipisi ɛ-hɩɖɛ. Ðɩtɩsɔɔlɩ se ɖɩwɛɛ ɛzɩ kajalaɣ pɩnzɩ mɩnʋʋ taa ɛyaa nabɛyɛ yɔ. Posusaɣ ɛyaa lalaa tɔm, ɛlɛ pa-maɣmaɣ pataaɖɔŋ tɩ-yɔɔ. Yehowa kaɣ yebu nɛ ɛ-hɩɖɛ sɛɛ alɩwaatʋ ndʋ eɖeziɣ mba payɩ pepisiɣ ɛ-hɩɖɛ nɛ paatisiɣ se ɛkɛ pe-Wiyaʋ yɔ. (Ezek. 38:22, 23.) Alɩwaatʋ ndʋ tɩ-taa lɛ, ɛyaa kaɣ talʋʋ pilim nɛ pa nɛ Ɛsɔ tiyiyaa tɩŋa pakaɣ kpɛndʋʋ nɛ pɛsɛɛ Yehowa. Nɛ ɖa-Caa weyi ɛwɛ ɛsɔdaa yɔ, ɛkaɣ kɛʋ “pɩtɩŋa payɩ pi-Wiyaʋ.”—1 Kɔr. 15:28, ABT. w15 1/6 4:7, 10

Kujuka, 12 novembre

Ɛsɔdaa kɛ men-Kewiyaɣ kpelaɣ, tɛtʋ kɛ ma-naataŋ ɖɩɖʋyɛ. —Iza. 66:1.

Ebree Masɩ taa, paya templo ŋgʋ kɩɩwɛ caanaʋ taa Izrayɛɛlɩ taa yɔ ɖɔɖɔ se Yehowa “naataŋ ɖɩɖʋyɛ.” (3 Aw. 28:2; Keɣa 131:7) Templo kaaɖe Yehowa ɛzɩdaa pɩdɩɩfɛyɩ mbʋ pʋyɔɔ yɔ, pɩɩkɛ toovenim Ɛsɔ sɛtʋ lone sɔsɔɖɛ. Lone nɖɩ ɖɩ-taa pasaŋaɣ Yehowa tɛtʋ yɔɔ. (Iza. 60:13) Sɔnɔ, ɛbɛ kɛ toovenim Ɛsɔ sɛtʋ lone sɔsɔyɛ tɛtʋ yɔɔ? Pɩtɩkɛ kuduyuu nakʋyʋ ɛzɩ Yerusalɛm templo yɔ. Ɛlɛ pɩkɛ fezuu taa templo ŋgʋ kɩɖʋʋ Yehowa hɩɖɛ nɛ pɩkɩlɩ paa kuduyuu ŋgʋ yɔ. Ɛbɛ fezuu taa templo kɛnaa? Pɩkɛ ɖʋtʋ ndʋ Ɛsɔ laba se pɩsa nɛ ɛyaa pɩsɩ ɛ-taabalaa nɛ pɛsɛɛ-ɩ yɔ. Yesu kɩlaʋ yɔɔ pɩtɩŋnaa nɛ ɖʋtʋ ndʋ tɩwɛɛ. Fezuu taa templo ŋgʋ, kɩpaɣzɩ pɩnaɣ 29 alɩwaatʋ ndʋ pamɩyɩsɩ Yesu lɩm nɛ pataa-ɩ num se ɛkɛ Cɔjɔ Sɔsɔ fezuu taa templo ŋgʋ kɩ-taa yɔ.—Ebr. 9:11, 12. w15 1/7 1:1-3

Hodo, 13 novembre

Pakaɣ naʋ ɛyʋ Pɩyalʋ kɔŋ ɛsɔdaa mɩndʋ yɔɔ, ɛ nɛ e-ɖoŋ sɔsɔŋ nɛ e-yuŋ.—Luka 21:27.

Pakaɣ hɛyʋʋ mba pɛwɛ siɣsiɣ yɔ nɛ pɔhɔ ɛyaa kɩdɛkɛdaa nɩŋgbaaŋ. (Mat. 24:46, 47, 50, 51; 25:19, 28-30) Yesu tɩŋnɩ kɩɖaʋ nakʋyʋ yɔɔ nɛ ɛlɩzɩ tɔm ndʋ ɛñɩnaɣ yɔɔdʋʋ yɔ tɩ-taa kpayɩ kpayɩ. Ɛyɔɔdaa se: “Wɩyɛ nɖɩ ɛyʋ Pɩyalʋ kaɣ kɔm ɛ nɛ e-ɖoŋ nɛ e-tiyiyaa yɔ, ɛkaɣ caɣʋ e-kewiyaɣ kpelaɣ yɔɔ. Ajɛɛ kpeekpe kaɣ kpeɣluu ɛ-cɔlɔ, nɛ ɛkaɣ palʋʋ ɛyaa nɖeke nɖeke, ɛzɩ ninɖiɣyu tʋkʋʋ heŋ nɛ [pʋŋ] yɔ. Ɛkaɣ kɛzʋʋ heŋ ɛ-nɩwaŋ yɔɔ nɛ [pʋŋ] ɛ-nɩmɩyɛ yɔɔ.” (Mat. 25:31-33) Ɛbɛ kaɣ talʋʋ heŋ nɛ pʋŋ? Pakaɣ-wɛ tɔm hʋnʋʋ. Pʋŋ yaa mba pɛkɛ ɛyaa kɩdɛkɛdaa yɔ, “powoki tamtam siziŋ nɩʋ taa.” Piyele nɛ heŋ yaa mba pɛwɛ siɣsiɣ yɔ, pahaɣ-wɛ wezuu maatɛŋ.—Mat. 25:46. w15 1/7 2:11, 12

Piya, 14 novembre

Toovenim, laŋhɛzɩyɛ nɛ laŋhʋlʋmɩyɛ pɩkɛnaa, ɛyaa wɛʋ ɖama cɔlɔ ɛzɩ koobiya yɔ!—Keɣa 132:1.

Ðoŋ ɖoŋ lɛ, ɖɩsɔɔlɩ lone nɖɩ ɖɩ-taa ɖɩcaɣ nɛ ɖɩpaɣlɩ yɔ, ɖɩ-tɔɔnasɩ, ɖɩ-kʋnʋŋ, ɖɩ-wɛtʋ nɛ ɖɩ-sɔnzɩ. Ɛlɛ ɖɩmaɣzɩɣ se mbʋ ɖɩsɔɔlaa yɔ, paa ɛzɩmtaa lɛ mbʋ kɩlɩnɩ ɖeu yaa we? Yehowa sɔɔlaa se mbʋ mbʋ ɛlɩzaa yɔ pɩlabɩ-ɖʋ leleŋ. (Keɣa 103:24; Natʋ 4:11) Ye mbʋ, pɩfɛyɩ ɖeu se nɔɔyʋ ɛmaɣzɩ se ɛzɩma palakɩ nabʋyʋ ɛ-tɛ yɔ, pɩwɛ ɖeu nɛ pɩkɩlɩ lalaa tɛ. Yehowa sɔɔlaa se ɛyaa tɩŋa ɩkpɛlɩkɩ nɛ patɩlɩ-ɩ, pɛsɛɛ-ɩ nɛ pehiɣ wezuu maatɛŋ. (Yoh. 3:16; 1 Tim. 2:3, 4) Paa ɖa nɛ ɛyaa lalaa ɖa-lɩmaɣza ɩtɩta yɔ, pɩwɛɣ ɖeu se ɖiwelisini-wɛ nɛ ye pɩtɩwɛɛkɩ nabʋyʋ yɔ, ɖitisi pa-lɩmaɣza yɔɔ. Ye ɖɩlakɩ mbʋ yɔ, ɖɩnɩɣ leleŋ ɖe-wezuu caɣʋ taa nɛ pɩkɩlɩ, nɛ nɔɔ kʋɖʋmaɣ wɛɣ ɖa nɛ ɖo-koobiya ɖɛ-hɛkʋ taa. Ðɩɩɖʋʋ ɖɔ-nɔsɩ ɛjaɖɛ yɔɔ yoŋ taa, mbʋ pʋyɔɔ yɔ ɖɩñɔnɩ Yehowa nɛ e-Kewiyaɣ kpam. Ðɩpaɖɩɣ tɩ kpazʋʋ nɛ ɖama lʋbɩnʋʋ lɩmaɣza wena awɛ Sataŋ ɛjaɖɛ ɖɩnɛ ɖɩ-taa yɔ. Ða-taa wɛ leleŋ kpem se Yehowa wɩlɩ-ɖʋ ɛzɩma ɖɩkɛ laŋhɛzɩyɛ tɩnaa nɛ ɖiluzi ɖa-tɩ yɔ. w15 1/7 3:17, 18

Cɩla, 15 novembre

[Ɛsɔ] cɔŋnɩ mɩ-yɔɔ.—1 Pɩy. 5:7.

Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ Yehowa se ɖɩsɔɔlɩ-ɩ yɔ, ɩɖɔwa. Ye ɖɩwɛ kpekpeka Kewiyaɣ tɔm susuu taa yɔ, ɖɩwɩlɩɣ se ɖɩsɔɔlɩ Ɛsɔ nɛ ɛyaa lalaa. (Mat. 24:14; 28:19, 20) Ðɩwɩlɩɣ ɖɔɖɔ se ɖɩsɔɔlɩ Ɛsɔ siŋŋ ye ɖɩɖɔkʋʋ ɖe-siɣsiɣ wɛtʋ alɩwaatʋ ndʋ pɩtakɩɣ ɖe-tisuu yɔ. (Keɣa 83:12; Yak. 1:2-5) Takɩm mbʋ pɩ-taa ɖɩwɛɛ yɔ, paa pɩwɛɛ nɛ pɩkpaɣ ɖoŋ yɔ, ɖɩpɩzɩɣ nɛ ɖɩtaa liu se Ɛsɔ sɩm mbʋ pɩ-taa ɖɩwɛɛ yɔ nɛ ɛkaɣ-ɖʋ sɩnʋʋ, mbʋ pʋyɔɔ yɔ ɖɩwɛ ñɩm ɛ-ɛzɩdaa. (Keɣa 55:9) Sɔɔlɩm mbʋ ɖɩwɛnɩ Yehowa yɔɔ yɔ, piseɣtiɣ-ɖʋ se ɖɩmaɣzɩ wondu kɩbandʋ ndʋ payɩ ɛlɩzaa yɔ, tɩ-yɔɔ. Ye ɖɩkɛ Bibl kpɛlɩkɩyaa kɩbama yɔ, ɖɩwɩlɩɣ se ɖɩsɔɔlɩ Ɛsɔ nɛ Bibl wɛ ñɩm ɖɛ-ɛzɩdaa. Ye ɖɩtɩmɩɣnɩ Yehowa ɖoŋ ɖoŋ yɔ, ɖɩwɩlɩɣ se ɖɩsɔɔlɩ-ɩ nɛ ɖɩñɩnɩɣ se ɖɩñɔtɩnɩ-ɩ. Nɛ ye ɖɩmaɣzɩɣ kɩhɛyʋʋ pʋ-ñʋʋ taa kɩlaʋ ŋgʋ kɩ-yɔɔ Yehowa tɩŋɩɣna se ekpeɣ-ɖʋ ɖa-kɩwɛɛkɩm yɔ kɩ-yɔɔ yɔ, piyeki nɛ sɔɔlɩm mbʋ ɖɩwɛnɩ ɛ-yɔɔ yɔ pɩpaɣlɩ nɛ pɩkɩlɩ. (1 Yoh. 2:1, 2) Nʋmɔŋ sakɩyɛ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩwɛnɩ ɛsɩmɩyɛ Yehowa sɔɔlɩm sɔsɔm yɔɔ yɔ, ɩ-taa nɩɩyɩ pazɩ tɔm ɖɩyɔɔdaa. w15 1/8 1:6, 17, 18

Saɖakawaɣ, 16 novembre

[Pɩkɩlɩ ɖeu se] ɛyʋ . . . ɛɖɔkɩ ɛ-tɩ.—Ekl. 7:8.

Ɛjaɖɛ kɩfaɖɛ taa, pɩkaɣ pɔzʋʋ nabʋyʋ taa se ɖɩwɛɛnɩ suuɖu. Pʋtɔma yɔ, ɖɩkaɣ nɩʋ se nabɛyɛ taa wɛ leleŋ kpem mbʋ pʋyɔɔ yɔ pefezi pɔ-hɔŋ taa ñɩma yaa pa-taabalaa. Ɛlɛ pʋtɔma yɔ, ɖa lɛ ɖɩɖaŋaa se pefezi ɖɛ-ɛyaa kʋsɔɔlaa. Ye mbʋ pɩlaba yɔ, ɖɩkaɣ wɛnʋʋ suuɖu nɛ ɖa nɛ mba pɛ-ɛyaa tɛm fem yɔ, ɖɩmɛyɩ? (Rom. 12:15) Ye ɖɩkpɛlɩkɩ suuɖu wɛnʋʋ sɔnɔ nɛ ɖɩɖaŋ se Yehowa ɛla ɛ-tɔm yɔɔ kɔyɔ, pɩkaɣ-ɖʋ sɩnʋʋ nɛ ɖɩwɛɛnɩ suuɖu ɛjaɖɛ kɩfaɖɛ taa. Ye ɖɩwɛnɩ suuɖu alɩwaatʋ ndʋ pɛlɛɣzɩɣ ɛzɩma ɖɩnɩɣ Bibl wɩlɩtʋ natʋyʋ taa yɔ, pɩsɩɣnɩ-ɖʋ ɖɔɖɔ nɛ ɖɩñɔɔzɩ ɖa-tɩ nɛ ɖɩɖaŋ ɛjaɖɛ kɩfaɖɛ. Ðɩkaɣ kpaɣʋ alɩwaatʋ nɛ ɖɩkpɛlɩkɩ wɩlɩtʋ kɩfatʋ ndʋ? Nɛ ye pɩlaba se ɖɩɩnɩɣ tɩ-taa camɩyɛ, ɖɩkaɣ wɛnʋʋ suuɖu nɛ ɖɩɖaŋ? Ye ɛɛɛ kɔyɔ, ɖɩnɛ ɛlɛ pɩkaɣ-ɖʋ wɛʋ kɛlɛʋ ɛjaɖɛ kɩfaɖɛ taa se ɖɩwɛɛnɩ suuɖu alɩwaatʋ ndʋ Yehowa wɩlɩɣ-ɖʋ tɔm kɩfatʋ natʋyʋ yɔ.—Ad. 4:18; Yoh. 16:12. w15 1/8 3:9, 10

Kemeɣa, 17 novembre

Ðɩpɩsɩ ɛyaa ɛzʋtʋyaa nɛ ɖɩwɛɛ ɛzɩ Krɩstʋ wɛʋ kpem yɔ. —Efɛz. 4:13, ABT.

Apostoloo Pɔɔlɩ ma Efɛɛzɩ koobiya takayaɣ nɛ eheyi-wɛ se pɩpɔzʋʋ se papɩɩ fezuu taa. Eseɣti-wɛ se pañaɣ pana nɛ ‘pa-tɩŋa payɩ pala nɔɔ kʋɖʋmaɣ pe-lidaʋ wɛnʋʋ taa nɛ patɩlɩ Ɛsɔ Pɩyalʋ siŋŋ nɛ papɩsɩ ɛyaa ɛzʋtʋyaa nɛ pɛwɛɛ ɛzɩ Krɩstʋ yɔ.’ (Efɛz. 4:13, ABT) Efɛɛzɩ ɛgbɛyɛ ñɔwa nɛ pɩla pɩnzɩ sakɩyɛ pʋcɔ nɛ Pɔɔlɩ ma-wɛ tɔm ndʋ. Efɛɛzɩ koobiya sakɩyɛ kaatɛm pɩʋ fezuu taa. Ɛlɛ pɩɩwɛɛ ɖɔɖɔ se Efɛɛzɩ koobiya nabɛyɛ ɩñaɣ pana nɛ papɩɩ fezuu taa. Mbʋ ɖɔɖɔ pɩwɛ Yehowa Aseɣɖe Tɩnaa hɛkʋ taa sɔnɔ. Pɩlakɩ pɩnzɩ sakɩyɛ yɔ, pa-taa sakɩyɛ wɛɛ nɛ pɛsɛɣ Yehowa nɛ piyeba nɛ papɩɩ fezuu taa siŋŋ. Ɛlɛ pɩtɩkɛ koobiya tɩŋa pɩnɩ fezuu taa. Paa pɩnaɣ ŋga lɛ, pamɩyɩsɩɣ ɛyaa kɩfama sakɩyɛ lɩm, nɛ pʋyɔɔ lɛ pɩpɔzʋʋ se pañaɣ pana nɛ papɩɩ fezuu taa. Nɛ ña yɔ?—Kol. 2:6, 7. w15 1/9 1:2, 3

Mazaɣ, 18 novembre

Tomnaɣ malɩsʋʋ ɛɛwazɩɣ pʋyʋ [caaa].—1 Tim. 4:8.

Ɛyaa sakɩyɛ yɔɔdʋʋ se ɛyʋ ɛhayɩsɩɣ e-tomnaɣ nɛ hola aleɣya ɖoŋ ɖoŋ kɔyɔ, piyeki nɛ ɛwɛɛnɩ tɔnʋʋ taa alaafɩya, tomnaɣ taa nɛ maɣzɩm taa kpeyitaɣ. Ɛlɛ ye ɖɩsɔɔlaa se ɖa nɛ ɛyaa lalaa ɖɩla hola aleɣya, paa anɩ yem pɩwɛɛ se ɖɩlɩzɩ nɛ ɖa nɛ ɩ ɖɩlabɩ-yɛ? Aduwa 13:20 heyiɣ-ɖʋ se: “Weyi ɛ nɛ lɔŋsɩnɖaa pɔɖɔŋ yɔ, ɛkaɣ kɛʋ lɔŋsɩnɖʋ, kɩmɛlɛmɩŋ ɛgbaɣdʋ kaɣ pɩsʋʋ kañatʋ tʋ.” Pɩwɩlɩɣ kaɣlaa se pɩwɛɛ se ɖiyele nɛ ɖɛ-ɛhʋyɛ nɖɩ ɖɩtɩŋnɩ Bibl yɔɔ nɛ ɖɩfalɩsɩ-ɖɩ yɔ, ɖiɖiyi-ɖʋ alɩwaatʋ ndʋ ɖɩlɩzɩɣ aleɣya naayɛ yɔ. Alɩwaatʋ ɛzɩma ŋkpakɩɣ nɛ ŋlakɩnɩ aleɣya? Kediɣzisi wobu, tɔm susuu, nɛ Bibl kpɛlɩkʋʋ ŋsɩɣ kajalaɣ lone taa ñe-wezuu caɣʋ taa yaa aleɣya? Ɛbɛ tɔm kɩlɩ cɛyʋʋ ñɛ-ɛzɩdaa? Yesu yɔɔdaa se: “Ɩcalɩnɩ ñɩnʋʋ Ɛsɔ Kewiyaɣ nɛ ɛ-tɔm kiɖeɖetu, nɛ pʋwayɩ lɛ, Ɛsɔ kaakpaɣ pɩtɩŋa mbʋ yɔ nɛ ɛsɛɛ-mɩ kɛzɛɣa.” (Mat. 6:33) Ŋŋlakɩ lɩmaɣza se ŋna ɛzɩma ŋlabɩnɩ ña-alɩwaatʋ tʋmɩyɛ lɛ, ñɛ-ɛhʋyɛ tɔzʋʋ-ŋ Yesu lɔŋ tasʋʋ mbʋ pɩ-yɔɔ? w15 1/9 2:13, 15

Kujuka, 19 novembre

Pɩlabɩ ɛzɩma nɛ pɩwɩzɩ-ŋ nɛ ñɛ-ɛzɩdaa ñɩŋ? Ye ña-taa ɛwɛ ɖeu, ŋŋkʋsʋʋ ña-ñʋʋ? . . . Pɩwɛnɩ-ŋ se ŋñazɩ [kɩwɛɛkɩm]. —Kiɖe 4:6, 7.

Alɩwaatʋ ndʋ Yehowa nawa se Kayɩnɩ caɣ labʋ mbʋ pɩfɛyɩ ɖeu yɔ lɛ, ɛñɩnɩ nʋmɔʋ se ɛsɩnɩ-ɩ. Ɛlɛ Kayɩnɩ tɩkpaɣ Yehowa lɔŋ tasʋʋ nɛ ɛlabɩnɩ tʋmɩyɛ, nɛ pɩkɔnɩ-ɩ kaɖɛ. (Kiɖe 4:11-13) Alɩwaatʋ natʋyʋ ɖɔɖɔ lɛ, Yehowa nawa se Baaruuki kaawɛnɩ lɩmaɣza kɩdɛkɛda naayɛ nɛ anɩɣ-ɩ nɛ ayeki nɛ pitiki-i yɔɔɔ. Peeɖe Yehowa heyi Baaruuki se ɛ-lɩmaɣza ana afɛyɩ ɖeu nɛ pɩpɔzʋʋ se ɛlɛɣzɩ-yɛ. Baaruuki welisini Yehowa nɛ ehiɣ ñʋʋ yabʋ. (Yer. 45:2-5) Yehowa sɔɔlɩ-ɖʋ, pʋyɔɔ eɖiyiɣ-ɖʋ nɛ ɛsɩɣzɩɣ-ɖʋ lɔŋ. Ye pɔtɔm se Yehowa sɩɣzɩɣ-ɖʋ lɔŋ yɔ, pɩtɩkɛ nɩŋgbaaŋ hɔm ɖeke, ɛlɛ ɛfalɩsɩɣ-ɖʋ ɖɔɖɔ. (Ebr. 12:6) Bibl yɔɔdʋʋ ɛyaa siɣsiɣ tɩnaa mba Yehowa falɩsɩ-wɛ nɛ piɖeni-wɛ yɔ, pɔ-tɔm. w15 1/9 4:12, 13

Hodo, 20 novembre

Ña-lɩmɖʋyaa [kɔm] Kɩbaɣlʋ ñɛ-Ɛsɔ hɩɖɛ taa; E-ɖoŋ hɩɖɛ sɛwa nɛ ɖɩnɩɩ mbʋ mbʋ ɛlabɩ Egipiti yɔ. —Yoz. 9:9.

Gabaɔŋ mba kaatisaa se Yehowa lʋkɩnɩ Izrayɛɛlɩ piya yɔɔ. Rahaabɩ ɖɔɖɔ kaana Yehowa nesi. Ɛtaakɛ Izrayɛɛlɩ tʋ, ɛlɛ ɛnɩ ɛzɩma Yehowa kaaholi ɛ-samaɣ Egipiti yɔ. Alɩwaatʋ ndʋ Izrayɛɛlɩ cɔŋɩyaa naalɛ wobi ɛ-tɛ yɔ, eheyi-wɛ se: “Mansɩm mbʋ se [Yehowa] kɔŋ-mɩ cɛlʋʋ tɛtʋ.” Rahaabɩ kaawɛnɩ tisuu se Yehowa pɩzɩɣ nɛ ɛya ɛ nɛ ɛ-hɔʋ pa-ñʋʋ. Paa ɛɛnawa se pɩpɩzɩɣ nɛ pɩkɔnɩ-ɩ kaɖɛ yɔ, ɛwɩlaa se ɛwɛnɩ tisuu Yehowa yɔɔ. (Yoz. 2:9-13; 4:23, 24) Kɩɖaʋ kʋnɛ nɛ Bibl taa kɩɖaŋ sakɩyɛ sɩɣnɩ-ɖʋ se ɖɩnɩɩ ɛzɩma ɛyʋ pɩzɩɣ nɛ ‘ɛna Ɛsɔ’ yaa ɛna Ɛsɔ nesi yɔ, pʋ-tɔbʋʋ. Alɩwaatʋ ndʋ ɖɩtɩlɩɣ Yehowa nɛ ɛ-wɛtʋ kɩbandʋ camɩyɛ yɔ, pɩsɩɣnɩ-ɖʋ nɛ ɖɩna e-nesi ɖe-wezuu caɣʋ taa. (Efɛz. 1:18) Piseɣtiɣ-ɖʋ se ɖɩmaɣzɩnɩ caanaʋ taa nɛ sɔnɔ ɛyaa siɣsiɣ tɩnaa mba pana ɛzɩma Yehowa sɩnɩ ɛ-samaɣ yɔ. w15 1/10 1:6, 7, 9

Piya, 21 novembre

Yesu kaasɔɔlɩ Maarta nɛ e-newaa Maarɩɩ nɛ Lazaarɩ.—Yoh. 11:5.

Bibl wɩlɩɣ se Maarta kaakɛ Yesu taabalʋ kɩbanʋ nɔɔyʋ nɛ Yesu kaasɔɔlɩ-ɩ. Ɛlɛ pɩtaakɛ Maarta ɖeke Yesu kaasɔɔlaa. Yesu kaasɔɔlɩ ɖɔɖɔ Maarta neu Maarɩɩ. Nɛ Yesu kaasɔɔlɩ e-ɖoo ɖɔɖɔ. (Yoh. 19:25-27) Ɛbɛ yɔɔ Yesu kaasɔɔlɩ Maarta? Yesu kaasɔɔlɩ Maarta mbʋ pʋyɔɔ yɔ, ɛɛwɛnɩ wɛtʋ kɩbandʋ nɛ ɛmʋʋ ɛyaa camɩyɛ; nɛ ɛɛwɛ kpekpeka ɖɔɖɔ tʋmɩyɛ labʋ taa. Ɛlɛ mbʋ pʋyɔɔ Yesu kaakɩlɩ Maarta sɔɔlʋʋ yɔ lɛ se ɛɛwɛnɩ tisuu siŋŋ. Etisaɣ tɔm ndʋ Yesu wɩlaɣ yɔ tɩ-tɩŋa tɩ-yɔɔ, nɛ ɛtaapɩtɩɣ se Yesu kɛnɩ Mesiya weyi paayɔɔdɩ ɛ-tɔm yɔ. (Yoh. 11:21-27) Paa mbʋ yɔ, Maarta taatalɩ pilim. Ɛɛwɛnɩ ɛjandʋ ɛzɩ ɖa-tɩŋa yɔ. Kɩyakʋ nakʋyʋ Yesu wobi pɛ-tɛ lɛ, Maarɩɩ la nabʋyʋ nɛ pɩwɩzɩ Maarta nɛ eheyi Yesu se ɛkalɩ-ɩ. Ɛtɔm se: “Kɩbaɣlʋ, me-neu yebi-m nɛ tʋmɩyɛ men-ɖeke, pɩɩlakɩ-ŋ pʋyʋ? Heyi-i se ɛsɩnɩ-m.”—Luka 10:38-42. w15 1/10 3:1, 2

Cɩla, 22 novembre

Ɩñɔtɩ mɩ-tɩ nɛ Ɛsɔ nɛ ɛñɔtɩ ɛ-tɩ nɛ mɩ.—Yak. 4:8.

Ye ɖɩmaɣzɩɣ Yehowa nɛ Yesu pɔ-yɔɔ yɔ, pɩsɩɣnɩ-ɖʋ nɛ ɖɩwɛɛ kpekpeka toovenim taa. Nɛ ye ɖɩwɛ kpekpeka yɔ, pɩkaɣ kpazʋʋ ɖo-koobiya nɛ mba ɖɩkatɩɣ-wɛ ɖɔ-tɔm susuu taa yɔ ɖoŋ. Nɛ ye ɖɩmaɣzɩɣ kɩhɛyʋʋ pʋ-ñʋʋ taa kɩlaʋ yɔɔ yɔ, pɩkaɣ-ɖʋ sɩnʋʋ nɛ ɖɩcɛyɩsɩ ɖa nɛ Yehowa ɖa-taabalɩyɛ tam. (Roma 3:24) Koobu Mark wɛ Afrika Hadɛ Kiŋ ɛjaɖɛ taa, nɛ paatɔ-ɩ salaka pɩnzɩ naadozo e-tisuu yɔɔ. Ɛkɛdaa se: “Fezuu taa wondu yɔɔ maɣzʋʋ wɛ ɛzɩ nʋmɔʋ ɖɔm mbʋ pɩhaɣ ɛyʋ taa leleŋ yɔ. Ye ɖɩmaɣzɩɣ fezuu taa wondu yɔɔ siŋŋ kɔyɔ, piyeki nɛ ɖɩtɩlɩ Yehowa wɛtʋ ndʋ ɖɩtaatɩlɩ yɔ. Ye nabʋyʋ taa pitibi-m yɔɔɔ yaa manpaɣzɩ nɩɣzʋʋ kɔyɔ, mankpakɩɣ Bibl nɛ mankalɩ mayaɣ nakɛyɛ nɛ mamaɣzɩ kɔ-yɔɔ. Malakɩ mbʋ lɛ, pɩhɛzɩɣ ma-laŋɩyɛ kpem.” w15 1/10 4:15

Saɖakawaɣ, 23 novembre

La nɛ mana ɛzɩma mɔnɖɔkɩ ña-paɣtʋ [yɔ], mancaɣ mɔnɖɔkɩ-tʋ nɛ ma-laŋɩyɛ pilim. —Keɣa 118:34.

Ñɩnɩ alɩwaatʋ kɩbandʋ nɛ ŋheyi ña-pɩyalʋ yaa ñɛ-pɛlɛ mbʋ pʋyɔɔ ŋɖʋ paɣtʋ natʋyʋ yaa ŋkpaɣ lɩmaɣzɩyɛ naɖɩyɛ yɔ. Ye ɛsɩm mbʋ pʋyɔɔ ŋɖʋ paɣtʋ ndʋ yaa ŋkpaɣ lɩmaɣzɩyɛ nɖɩ yɔ, pɩtʋʋ fɛyɩ se pɩkaɣ-ɩ sɩnʋʋ nɛ ɛñamɩ-ŋ. Barry kaacɔnɩ piya naanza yɔɔ nɛ sɩpaɣlɩ. Ɛyɔɔdaa se: “Ye ŋlɩzɩ piya evelisi tɔm taa kɔyɔ, pɩsɩɣnɩ-sɩ nɛ sɩta-ŋ liu. Sɩkaɣ naʋ se ŋtɩɖʋ paɣtʋ yaa ŋtɩkpaɣ lɩmaɣzɩyɛ yem mbʋ pʋyɔɔ ŋkɛ lʋlɩyʋ, ɛlɛ sɩkaɣ naʋ se lɩmaɣzɩyɛ kɩbanɖɛ naɖɩyɛ yɔɔ ŋlabɩ mbʋ.” Tɔzɩ ɖɔɖɔ se piya evelisi tɩtasɩ kɛʋ piya taŋnaa. Siɖiɣni pɩʋ nɛ sɩsɔɔlaa se sɩkpaɣ sɩ-maɣmaɣ ‘sɩ-lɩmaɣza.’ (Roma 12:1, nwt) Barry lɩzɩ pɩ-taa se: “Pɩpɔzʋʋ se piya evelisi ɩkpɛlɩkɩ ɛzɩma sɩmaɣzɩ sɩ-ñʋʋ taa pʋcɔ nɛ sɩkpaɣ lɩmaɣza kɩbana yɔ.” Ye mbʋ, wɛɛnɩ tɩ luzuu nɛ ŋlɩzɩ ña-pɩɣa evelaɣ mbʋ pʋyɔɔ ŋkpaɣ lɩmaɣzɩyɛ naɖɩyɛ yɔ pɩ-taa. Ye ŋlabɩ mbʋ yɔ, pɩsɩɣnɩ-kɛ nɛ katɩlɩ ɛzɩma kakpaɣ ka-maɣmaɣ ka-lɩmaɣza yɔ, nɛ kakaɣ naʋ se ŋɖʋʋ-kɛ hɩɖɛ nɛ ŋŋtasɩɣ-kɛ kpaɣʋ ɛzɩ pɩɣa taŋayʋ yɔ. w15 1/11 2:11

Kemeɣa, 24 novembre

[Ðɩla] camɩyɛ ɛyaa kpeekpe, pɩkɩlɩnɩ mba pɛkɛ koobiya tisuu taa yɔ.—Gal. 6:10.

Sɔnɔ, ɛyaa miiliyɔɔwaa sakɩyɛ sɛɣ Yehowa ɛjaɖɛ kpeekpe yɔɔ. Ɛyaa mba, pɛkɛ ɖo-koobiya. Lɩmaɣza wena pɩwɛɛ se ɖɩwɛɛnɩ pɔ-yɔɔ? (Roma 12:10.) Apostoloo Pɩyɛɛrɩ mawa se pɩwɛɛ se “tʋtʋyɛ tɔm ñamtʋ” eyele nɛ ‘ɖɩsɔɔlɩ ɖama nɛ ɖɩtɛ ɖa-taa ɛzɩ koobiya yɔ.’ Pɩyɛɛrɩ tasɩ heyuu e-koobiya Krɩstʋ mba se: “Kɔɔnɔɔ lɛ, ɩsɔɔlɩ ɖama pɩŋŋ.” (1 Pɩy. 1:22; 4:8) Yehowa ɛgbɛyɛ wɛ ndɩ kpem nɛ agbaa lɛɛna. Ɛbɛ yɔɔ? Mbʋ pʋyɔɔ yɔ ɖa mba ɖɩwɛ ɛgbɛyɛ nɖɩ ɖɩ-taa yɔ, ɖɩsɔɔlɩ ɖama siŋŋ. Kɔzɩ kɔzɩ lɛ, ɛzɩma ɖɩsɔɔlɩ Yehowa nɛ ɖɩñaŋ ɛ-paɣtʋ yɔ pʋyɔɔ lɛ, ɛtɩŋɩɣnɩ fezuu kiɖeɖeu yɔɔ nɛ ɛsɩɣnɩ-ɖʋ. Nɛ ɖoŋ nɩɩyɩ fɛyɩ kedeŋa kpeekpe yɔɔ se ɩkɩlɩ fezuu kiɖeɖeu. Fezuu kiɖeɖeu sɩɣnɩ-ɖʋ se ɖɩwɛɛ nɔɔ kʋɖʋmaɣ taa ɛjaɖɛ kpeekpe yɔɔ.—1 Yoh. 4:20, 21. w15 1/11 4:8, 9

Mazaɣ, 25 novembre

Ajɛɛ yɔɔdasɩ kpeekpe taa ɛyaa hiu kaɣ kpibu Yuda tʋ toko nɔɔ mbʋ yɔ se: “Ða nɛ mɩ ɖɩkaɣ wobu.” —Zek. 8:23.

Yehowa ɛɛpɔzʋʋ-ɖʋ se ɖɩtɩŋnɩ kʋnʋŋ nakʋyʋ yɔɔ pʋcɔ nɛ ɖɩtɩlɩ-ɩ yaa ɖɩtɩlɩ ɛ-kaɖʋsɩ. (Natʋ 7:9, 10) Ɛyaa yɔɔdʋʋ kʋnʋmɩŋ ndɩ ndɩ, ɛlɛ pɩɩlakɩ Yehowa kaɖɛ se ɛyɔɔdɩnɩ-wɛ. Ɛzɩma ɖɩlaba nɛ ɖɩna? Ebree tɔm pee wena Yesu labɩnɩ tʋmɩyɛ nɛ pama-yɛ Bibl taa yɔ, atɩɖɔɔ. (Mat. 27:46; Mark. 5:41; 7:34) Ɛlɛ Yehowa yeba nɛ pama tɔm ndʋ Yesu wɩlaa yɔ nɛ pɛɖɛzɩ-tʋ Grɛɛkɩ kʋnʋŋ taa, nɛ pʋwayɩ lɛ kʋnʋmɩŋ lɛɛŋ taa. Pɩtasɩ lɛ, ɛzɩma Yuda mba nɛ Krɩstʋ mba paatasɩ Ɛsɔtɔm maʋ tam sakɩyɛ takayɩsɩ yɔɔ nɛ pasɩɩ yɔ, piyeba nɛ tɩwɛɛ halɩ nɛ sɔnɔ. Pʋwayɩ lɛ, pɛɖɛzɩ takayɩsɩ nzɩ kʋnʋmɩŋ lɛɛŋ sakɩyɛ taa. Palʋlɩ Yesu nɛ pɩla ɛzɩ pɩnzɩ 400 mbʋ yɔ lɛ, John Chrysostom yɔɔdaa se pɛɖɛzɩ tɔm ndʋ Yesu wɩlaa yɔ Siirii, Egipiti, Ɛndɩ, Pɛrsɩ, Etiyoopii mba kʋnʋmɩŋ nɛ kʋnʋmɩŋ lɛɛŋ sakɩyɛ taa. w15 1/12 1:10, 11

Kujuka, 26 novembre

Tɔm ndʋ tɩkɔm ti-ɖeɖe yɔ, ndʋ tɩkpaɖɩnɩ ɖeu. —Ad. 15:23.

Ye ɖɩtɩyɔɔdɩ tɔm alɩwaatʋ kɩbandʋ yɔɔ kɔyɔ, pʋtɔma yɔ ɛyaa ɩɩnɩɣ tɩ-taa yaa paatisiɣ tɩ-yɔɔ. Mars 2011 taa, tɛtʋ ñamsaa nɛ teŋgu lɩm wadɩ nɛ pɩyɔkɩ tɛtʋ sakɩyɛ Japɔŋ wɩsɩ ɖɩlɩyɛ taa. Ɛyaa mba pasɩbɩ asɛyʋʋ ŋgʋ kɩ-taa yɔ, pɛcɛzɩ 15000. Paa Yehowa Aseɣɖe Tɩnaa sakɩyɛ kaalesi pɔ-hɔŋ taa mba nɛ pa-taabalaa asɛyʋʋ ŋgʋ kɩ-taa kɔyɔ, pañaɣ pana se patɩŋnɩ Bibl yɔɔ nɛ pasɩnɩ ɛyaa lalaa mba asɛyʋʋ ŋgʋ kiitukunaa yɔ. Ɛlɛ paanawa se ɛyaa mba, pa-taa sakɩyɛ kaakɛ Bouddha ñɩma nɛ pataatɩlɩ tɔm sakɩyɛ Bibl yɔɔ. Pʋyɔɔ lɛ, patiheyi-wɛ sɩɖaa fezuu tɔm kpaagbaa, ɛlɛ pɛhɛzɩ pa-laŋa nɛ peheyi-wɛ mbʋ pʋyɔɔ kʋñɔmɩŋ sɔsɔŋ ɛnɩ ɩtalɩɣ ɛyaa kɩbama yɔ. w15 1/12 3:7

Hodo, 27 novembre

Weyi [ɛɛsɩŋ lɔŋ yɔ,] etisiɣ tɔm kpeekpe yɔɔ, ɛlɛ ɛyʋ lɔndʋ cɔŋnɩ ɛ-ɖɔnɛ yɔɔ.—Ad. 14:15.

Pɩlabɩ pʋtɔdɩyɛ se liidiye laɣzaɣ yɔɔ lɛ, ɛyaa nabɛyɛ yaa tadɩyɛ agbaa naayɛ lakɩ nɔɔ taa se pasɩm nʋmɔŋ weyi ɩ-yɔɔ papɩzɩɣ patɩŋ nɛ pawaa ɖa-kʋdɔmɩŋ yɔ. Papɩzɩɣ nɛ pepeɣzi-ɖʋ se ɛyaa sakɩyɛ tɩŋnɩ nʋmɔŋ ɛnɩ ɩ-yɔɔ nɛ pɔ-yɔɔ cɛ. Nɛ ye ɖɩkɛ kʋdɔndʋ yɔ, pɩpɩzɩɣ nɛ piseɣti-ɖʋ se ɖɩtɩŋnɩ paa nʋmɔʋ ŋgʋ lɛ kɩ-yɔɔ nɛ ɖɔ-yɔɔ cɛ nɛ ɖɩcaɣ wezuu nɛ pɩɖaɣlɩ. Ɛlɛ pɩtɩpɔzɩ se ɖɩsɔɔ Bibl lɔŋ tasʋʋ pʋnɛ pɩ-yɔɔ: Ye ɖɩkɛ lɔŋsɩnɖʋ yɔ, ɖɩkaɣ kpaɣʋ alɩwaatʋ nɛ ɖɩmaɣzɩ pʋcɔ nɛ ɖitisi lɔŋ weyi patasɩɣ-ɖʋ yɔ ɩ-yɔɔ, kɔzɩ kɔzɩ ye weyi ɛtasɩɣ-ɖʋ lɔŋ ɛnɩ yɔ patɩfalɩsɩ-ɩ tɔnʋʋ taa alaafɩya nʋmɔʋ taa yɔ. Ðɩpɩzɩɣ nɛ ɖɩpɔzɩ ɖa-tɩ tɔm tʋnɛ: ‘Ɛtɔŋ se kɔyɛ ɖɩnɛ, ñɩyʋʋ kʋnɛ yaa tɔɔnaɣ kanɛ kasɩnɩ ɛyaa, ɛlɛ ɛbɛ wɩlɩɣ se toovenim taa lɛ pɩsɩnɩ-wɛ? Paa pɩkɛ toovenim se pɩsɩnɩ ɛyaa lalaa, ɛbɛ wɩlɩɣ se pɩkaɣ-m sɩnʋʋ ɖɔɖɔ? Ɛzɩ pɩɩwɛɣ ɖeu se mantasɩ tazʋʋ tɔm ndʋ eheyi-m yɔ tɩ-taa yaa mɔnpɔzɩ ɖɔɖɔ mba pafalɩsɩ-wɛ camɩyɛ se pɔcɔnɩ man-kʋdɔŋ ɖeɖe yɔ?’—Wp. 17:6. w15 1/12 4:14, 15

Piya, 28 novembre

Krɩstʋ sɔɔlɩm seɣtiɣ-ɖʋ. —2 Kɔr. 5:14, 15.

Pɔɔlɩ nawa se ye ɖɩkpaɣ alɩwaatʋ nɛ ɖɩmaɣzɩ sɔɔlɩm sɔsɔm mbʋ Yesu wɩlɩ-ɖʋ yɔ pɩ-yɔɔ kɔyɔ, pɩkaɣ-ɖʋ seɣtuu se ɖɩsɔɔlɩ-ɩ nɛ ɖɩɖʋ-ɩ hɩɖɛ. Toovenim taa lɛ, ye ɖɩnɩ mbʋ Yehowa labɩ-ɖʋ yɔ pɩ-taa camɩyɛ yɔ, ɛ-sɔɔlɩm kaɣ-ɖʋ seɣtuu nɛ ɖɩcaɣ wezuu ŋgʋ kɩwɩlɩɣ se ɖɩɖʋʋ Yesu hɩɖɛ yɔ. Ɛzɩma tɩyɛ? Ye ɖɩsɔɔlɩ Yehowa yɔ, pɩkaɣ-ɖʋ seɣtuu nɛ ɖɩmaɣzɩnɩ Yesu nɛ ɖɩɖɔ ɛ-nɩŋgbanzɩ taa. (1 Pɩy. 2:21; 1 Yoh. 2:6) Ye ɖɩñaŋ Ɛsɔ nɛ Yesu yɔ, pɩwɩlɩɣ se ɖɩsɔɔlɩ-wɛ. Yesu yɔɔdaa se: “Weyi ɛmʋ man-paɣtʋ nɛ ɛɖɔŋ tɩ-yɔɔ yɔ, ɛnʋ ɛsɔɔlɩnɩ-m; nɛ weyi ɛsɔɔlɩ-m yɔ, man-Caa kaɣ-ɩ sɔɔlʋʋ, ma ɖɔɖɔ mankaɣ-ɩ sɔɔlʋʋ nɛ mawɩlɩ-ɩ man-tɩ.” (Yoh. 14:21; 1 Yoh. 5:3) Ye mbʋ, pɔzɩ ña-tɩ se: ‘Hɔɔlɩŋ weyi taa mɛwɛɛ nɛ mamaɣzɩɣnɩ Yesu? Hɔɔlɩŋ weyi taa manpɩzɩɣ nɛ mantasɩ pana ñaɣʋ nɛ pɩkɩlɩ?’ Pɩcɛyaa se ɖɩpɔzɩ ɖa-tɩ tɔm ndʋ, mbʋ pʋyɔɔ yɔ ɛjaɖɛ ñɩnɩɣ se ɖɩcaɣ wezuu ɛzɩ ɖɩ-ɛyaa yɔ.—Roma 12:2. w16.01 2:7-9

Cɩla, 29 novembre

Ðɩwɛɣ ɛ-tɩyɛ, mbʋ pʋyɔɔ yɔ ɖɩkaɣ-ɩ naʋ ɛzɩ ɛ-maɣmaɣ ɛwɛʋ yɔ.—1 Yoh. 3:2.

Ŋmaɣzɩɣ se ŋwɛ kpekpeka siŋŋ tɔm susuu taa? Ŋsɔɔlɩ Bibl kpɛlɩkʋʋ nɛ ŋñɩnɩɣ se ŋnɩɩ Ɛsɔtɔm cukaŋ ñɩndʋ taa? (1 Kɔr. 2:10) Ŋmaɣzɩɣ se Yehowa sɩnɩ-ŋ nɛ ñɔ-tɔm susuu lʋlɩ pee kɩbana na? Ŋsɔɔlɩ Yehowa sɔɔlɩm labʋ nɛ pɩkɩlɩ pɩtɩŋa na? Ŋsɔɔlɩ ɛyaa lalaa siŋŋ nɛ ŋmaɣzɩɣ se pɩcɛyaa se ŋsɩnɩ-wɛ nɛ pɛsɛɛ Yehowa? Ŋpɩzaa nɛ ŋna mbʋ pɩwɩlɩɣ kaɣlaa se Yehowa sɩnɩ-ŋ ñe-wezuu caɣʋ hɔɔlɩŋ sakɩyɛ taa yɔ? Ye ŋcosi tɔm ndʋ tɩ-tɩŋa tɩ-yɔɔ se ɛɛɛ kɔyɔ, pɩwɩlɩɣ se Yehowa ya-ŋ se ŋkpa ɛsɔdaa? Aayɩ. Ɛbɛ yɔɔ? Mbʋ pʋyɔɔ yɔ paa Ɛsɔ sɛyʋ weyi lɛ, ɛpɩzɩɣ nɛ ɛwɛɛnɩ lɩmaɣza ana, paa ɛtɩkɛ patam num kɔyɔ. Yehowa pɩzɩɣ ɛtɩŋnɩ e-fezuu kiɖeɖeu yɔɔ nɛ ɛsɩnɩ paa ɛ-sɛyʋ weyi lɛ nɛ ɛwɛɛ niye hɔɔlɩŋ ɛnɩ ɩ-tɩŋa ɩ-taa paa lidaʋ ŋgʋ ɛwɛna yɔ. Toovenim taa lɛ, ye ŋpɔzʋʋ ña-tɩ kɩpɔzʋ se ɛzɩ ŋkɛ patam num yaa ŋtɩkɛ yɔ, pɩwɩlɩɣ se patɩya-ŋ se ŋkpa ɛsɔdaa. w16.01 3:14, 15

Saɖakawaɣ, 30 novembre

[Man-taa kaawɛ leleŋ] ɛ-ɛzɩdaa paa ɖooye.—Ad. 8:22, 30.

Alɩwaatʋ ndʋ Yesu nɛ ɛ-Caa palakaɣ tʋmɩyɛ yɔ Yesu kaahiɣ taa leleŋ, mbʋ pʋyɔɔ yɔ ɛɛlabɩ wondu sakɩyɛ nɛ ɛɛnawa se Yehowa sɔɔlɩ-ɩ. Piyele nɛ ɖa yɔ? Yesu yɔɔdaa se alɩwaatʋ ndʋ ɖɩhaɣ nɛ alɩwaatʋ ndʋ ɖɩmʋʋ nabʋyʋ yɔ, ɖihikiɣ taa leleŋ. (Tʋma 20:35) Alɩwaatʋ ndʋ ɖɩmʋ toovenim yɔ, pɩɩlabɩ-ɖʋ leleŋ. Ɛlɛ ɛbɛ yɔɔ ɖihikiɣ taa leleŋ alɩwaatʋ ndʋ ɖiheyiɣ lalaa toovenim tɔm ndʋ yɔ? Mbʋ pʋyɔɔ yɔ patɩlɩɣ Bibl taa tɔm nɛ taabalɩyɛ kɩbanɖɛ wɛɛ pa nɛ Ɛsɔ pɛ-hɛkʋ taa lɛ, ɖɩnaɣ se pehikiɣ taa leleŋ. Ðɩnaɣ ɛzɩma pɛlɛɣzɩɣ pa-maɣzɩm nɛ pe-wezuu caɣʋ lɛ, pɩhaɣ-ɖʋ taa leleŋ siŋŋ. Tɔm susuu kɛnɩ tʋmɩyɛ nɖɩ ɖɩ-tɔm kɩlɩ cɛyʋʋ nɛ ɖɩ-labʋ haɣ-ɖʋ taa leleŋ nɛ pɩkɩlɩ yɔ. Ðɩhaɣ mba papɩsɩɣ Ɛsɔ taabalaa yɔ waɖɛ se pehiɣ wezuu maatɛŋ.—2 Kɔr. 5:20. w16.01 5:6, 7