Janvier

Sɔɔndʋ ndʋ tɩkpaɣaɣ Yeftee pɛlɛ yɔ, tɩcɛba. Ɛ-taa labɩ leleŋ siŋŋ se ɛ-caa wabɩ you nɛ ɛpɩsɩnɩ alaafɩya. Peeɖe esewa nɛ ɛkatɩ-ɩ nɛ amɛya. Mbʋ ɛzɩ ɛ-caa ɖɔɖɔ kaakatɩ-ɩ nɛ amɛya lɛ, ɛcɩyɩ e-tokonaa nɛ ɛma kubuka se: “Hayɩ mɛn-pɛlɛ, ŋɖʋ-m tɔm taa!” Pʋwayɩ lɛ, ɛyɔɔdɩ tɔm natʋyʋ, nɛ tɩkaɣ lɛɣzʋʋ ɛ-pɛlɛ wezuu caɣʋ tam. Ɛɛtasɩɣ caɣʋ wezuu ɛzɩ ɛyaa lalaa yɔ. Ɛlɛ, ɛ-pɛlɛ tɩcɔɔ ɛ-taa kiii; ecosi ɛ-caa nɛ nɔɔ kɩbaŋa nɛ eseɣti-i se ɛɖɔ tɔm ndʋ eɖuuni Yehowa yɔ, tɩ-yɔɔ. Tɔm ndʋ ɛyɔɔdaa yɔ, tɩwɩlɩɣ se ɛwɛnɩ tisuu siŋŋ. Ɛɛwɛnɩ lidaʋ se mbʋ payɩ Yehowa pɔzʋʋ-ɩ se ɛla yɔ, mbʋ wɛnɩ ɖeu nɛ pɩkɩlɩ. (Th. 11:34-37) Peeɖe ɛ-caa taa labɩ leleŋ siŋŋ mbʋ pʋyɔɔ yɔ, ɛnawa se ɛzɩma ɛ-pɛlɛ tisi faaa se ɛsɩɣnɩ-ɩ nɛ ɛɖɔ e-ɖuutu yɔɔ yɔ, piyeki nɛ ɛ-tɔm kɛdɩnɩ Yehowa. Yeftee nɛ ɛ-pɛlɛ paanawa se mbʋ Yehowa pɔzʋʋ se pala yɔ, pɩtʋʋzaa; pʋyɔɔ pata-ɩ liu halɩ pɩkpɛndɩnɩ kaɖɛ alɩwaatʋ taa. Pataapɩtɩɣ se pʋcɔ nɛ pɔ-tɔm kɛdɩnɩ Yehowa lɛ, pɩɩpɔzaa se palaa kɩlaŋ. w16.04 1:1, 2

Ye ña-taabalʋ nɔɔyʋ yaa ñɔ-hɔʋ taa tʋ nɔɔyʋ ɛyɔɔdɩ tɔm kɩdɛkɛdɩtʋ natʋyʋ nɛ pɩwɛɛkɩ ña-laŋɩyɛ, yaa ye ŋhɩnɩ kʋdɔŋ sɔsɔʋ nakʋyʋ, yaa ñɛ-ɛyʋ kʋsɔɔlʋ nɔɔyʋ sɩba nɛ ŋnɩɣ siziŋ kɔyɔ, Yɔɔb kɩɖaʋ pɩzɩɣ kɩhɛzɩ ña-laŋɩyɛ. (Yɔɔb 1:18, 19; 2:7, 9; 19:1-3) Paa Yɔɔb ɛtaana ɖenɖe ɛ-kʋñɔmɩŋ lɩnaa kɔyɔ, pititibi-i yɔɔɔ. Ɛbɛ yɔɔ? Mbʋ pʋyɔɔ yɔ ‘ɛñaŋaɣ Ɛsɔ.’ (Yɔɔb 1:1) Yɔɔb kaaɖʋ ɛ-taa se paa pɩkɛ alɩwaatʋ kɩbandʋ yaa kaɖɛ alɩwaatʋ taa kɔyɔ, ɛlakɩ mbʋ pɩkɛdɩnɩ Yehowa yɔ. Yehowa sɩnɩ Yɔɔb nɛ ɛmaɣzɩ wondu sɔsɔtʋ ndʋ ɛlaba yɔ tɩ-yɔɔ. Piyeba nɛ Yɔɔb wɛɛnɩ lidaʋ siŋŋ se alɩwaatʋ talɩɣ lɛ, Yehowa kaɣ yebu nɛ ɛ-kʋñɔŋ sɩɩ tɩnaɣ. (Yɔɔb 42:1, 2) Nɛ mbʋ ɖeyi ɖeyi pɩlaba. Yehowa lɩzɩ Yɔɔb ɛ-kʋñɔŋ taa nɛ ‘ɛpɩsɩnɩ-ɩ ɛ-ñɩm, nɛ ɛsɔzɩ-ɩ pɩtɩŋa mbʋ mbʋ ɛɛwɛna yɔ tam nabʋlɛ taa.’ Pʋwayɩ lɛ, Yɔɔb caɣ wezuu nɛ pileɖi nɛ ɛnɩɩ leleŋ siŋŋ e-wezuu caɣʋ taa.​—Yɔɔb 42:10, 17. w16.04 2:11, 13

Ye ɖɩnaɣ kala poliŋ taa nɛ pʋcɔ atalɩɣ kɔyɔ, ɖɩwɩlɩɣ se ɖɩwɛ lɛɣtʋ. Nɛ ɖɩwɩlɩɣ se ɖɩwɛ kɛlɛʋ alɩwaatʋ ndʋ ɖiiyeki se kala ana atuzi-ɖʋ nɛ ɖɩla mbʋ pɩfɛyɩ ɖeu yɔ. Pɩwɛɛ se ɖɩwɛɛ lɛɣtʋ alɩwaatʋ ndʋ politiki tɔm sʋʋ ɖa-faawɩyɛ labʋ taa yɔ. Alɩwaatʋ ndʋ ɖisusuu Kewiyaɣ tɔm yɔ, pɩtɩpɔzɩ se ɖɩsa yaa ɖɩyɔɔdɩ tɔm kɩdɛkɛdɩtʋ natʋyʋ politiki ɛgbɛyɛ naɖɩyɛ yɔɔ yaa politiki ñʋʋdʋ nɔɔyʋ yɔɔ. Ye nabʋyʋ ɛlabɩna nɛ ɖɩyɔɔdʋʋ pɩ-tɔm kɔyɔ, ɖɩñaɣ pana nɛ ɖa nɛ ɖɩɣdʋ ɖɩka ɖa-lɩmaɣza mbʋ pɩlaba yɔ pɩ-yɔɔ na, ɛlɛ ɖɩtaaka ñʋʋ nɛ ɛzɩma politiki laɖaa ñɩnɩɣ se pɔcɔnɩ mbʋ pɩlaba yɔ pi-ɖeɖe yɔ. Pʋwayɩ lɛ, ɖɩtɩŋnɩ Bibl yɔɔ nɛ ɖɩwɩlɩ-ɩ ɛzɩma Ɛsɔ Kewiyaɣ kaɣ cɔnʋʋ kaɖɛ wɛtʋ ndʋ ti-ɖeɖe yɔ. Ye nɔɔyʋ ɛpɔzɩ-ɖʋ se suwe ɖɩmaɣzɩɣ mba paka kʋzʋʋ pilinzi yɔ pe-nesi ɖɔkʋʋ yɔɔ yaa hosi lɩzʋʋ yɔɔ kɔyɔ, ɖɩlʋ Ɛsɔ paɣtʋ kila yɔɔ nɛ ɖɩwɩlɩ-ɩ ɛzɩma ɖa-maɣmaɣ ɖɩɖɔŋ paɣtʋ kila ana a-yɔɔ ɖe-wezuu caɣʋ taa yɔ. Ðɩɩlakɩ faawɩyɛ tɔm ndʋ tɩ-yɔɔ lɛ, ɖɩñaɣ pana nɛ ɖɩwɩlɩ se ɖɩɩtɩnɩɣ politiki hɔɔlʋʋ nakʋyʋ yɔɔ. Ðɩɩlʋkɩ se paɖʋ paɣtʋ kɩfatʋ natʋyʋ yaa pɛlɛɣzɩ natʋyʋ, nɛ ɖɩɩñɩkɩɣ lalaa yɔɔ se petisi ɖa-lɩmaɣza yɔɔ. w16.04 4:8, 9

Pɩwɛɛ se ɖɩla kpɛlɩkɩyaa, ɖɩmɩyɩsɩ-wɛ lɩm nɛ ɖɩwɩlɩ-wɛ tɔm. Ɛlɛ ɛbɛ pɩwɛɛ se ɖɩcalɩ labʋ? Yesu yɔɔdaa se: “Iwolo.” Bibl yɔɔ lɔŋsɩnɖʋ nɔɔyʋ yɔɔdaa se tɔm piye “iwolo” wɩlɩɣ se pɩkɛ paa Krɩstʋ tʋ weyi lɛ paɣtʋ se ewolo ɛyaa cɔlɔ paa pɩwɛɛ se ɛɖɔ nʋmɔʋ yaa ɛtɛzɩ teŋgu yɔ. (Mat. 10:7; Luka 10:3) Yesu ñɩnaɣ yɔɔdʋʋ se paa ɛ-wayɩ tɩŋɩyʋ weyi lɛ, esusi laŋhɛzɩyɛ tɔm ɛ-taa e-ɖeke yaa ɛñɩnaɣ eheyi-wɛ se pa-tɩŋa pɛkpɛndɩ nɛ pala tʋmɩyɛ nɖɩ? Ɛyʋ kʋɖʋm ɛɛpɩzɩɣ nɛ ewolo “ajɛɛ kpeekpe” taa se esusi tɔm, pʋyɔɔ pʋpɔzʋʋ se ɛyaa sakɩyɛ ɩkpɛndɩ nɛ pala tʋmɩyɛ nɖɩ. Tɔm ndʋ Yesu ñɩnaɣ yɔɔdʋʋ alɩwaatʋ ndʋ eheyi ɛ-tɔmkpɛlɩkɩyaa se papɩsɩ “ɛyaa ketiyaa” yɔ. (Mat. 4:18-22) Ɛtaayɔɔdʋʋ kpakpasɩ kpayʋ kʋɖʋm, weyi ɛɖʋʋ kolaɣ nɛ ɛɖaŋ se kpakpasɩ ɩkɔɔ nɛ pɩkpa-sɩ yɔ ɛ-tɔm na. Ɛlɛ, ɛyɔɔdaɣ piyiŋ lɔʋ tʋmɩyɛ tɔm na, nɛ pɩɩkɛ tʋmɩyɛ ɖoŋ ñɩnɖɛ; nabʋyʋ taa pʋpɔzʋʋ se ɛyaa sakɩyɛ ɩkpɛndɩ nɛ pʋcɔ palabɩ-ɖɩ.​—Luka 5:1-11. w16.05 2:3, 4

Pɩsa nɛ ɖɩtɩlɩ Yehowa lɩmaɣza lɛ, pɩwɛɛ se ɖitaaleɣyini tɩ-yɔɔ kpɛlɩkʋʋ. Alɩwaatʋ ndʋ ɖɩkalɩɣ yaa ɖɩkpɛlɩkɩɣ Bibl yɔ, ɖɩpɩzɩɣ nɛ ɖɩpɔzɩ ɖa-tɩ tɔm tʋnɛ: ‘Ɛbɛ tɔm ndʋ tɩkpɛlɩkɩɣ-m Yehowa yɔɔ? Ɛbɛ tɩkpɛlɩkɩɣ-m ɖɔɖɔ ɛ-nʋmɔŋ siɣsiɣ ñɩŋ nɛ ɛ-lɩmaɣza yɔɔ?’ Pɩwɛɛ se ɖɩwɛɛnɩ lɩmaɣza wena keɣa maɖʋ Daviid kaawɛna yɔ. Ete hendu se: “[Yehowa] wɩlɩ-m ña-nʋmɔŋ; yele mantɩlɩ nʋmɔŋ weyi ŋtɩŋɩɣ yɔ; ña-tʋtʋyɛ ɛwɩlɩnɩ-m nʋmɔʋ, mbʋ yɔ ŋkɛ Ɛsɔ, ma-ñʋʋ yaɖʋ, ña mantaɣ liu avema tɩŋa.” (Keɣa 24:4, 5) Ŋŋmaɣzɩɣ Bibl taa tɔm natʋyʋ yɔɔ lɛ, ŋpɩzɩɣ nɛ ŋpɔzɩ ña-tɩ tɔm tʋnɛ: ‘Ɛzɩma manpɩzɩɣ nɛ mankpaɣ tɔm ndʋ nɛ malabɩnɩ tʋmɩyɛ mɔ-hɔʋ taa? Le manpɩzɩɣ nɛ mankpaɣ-tʋ nɛ malabɩnɩ tʋmɩyɛ? Ðɩɣa na? Tʋmɩyɛ taa? Sukuli taa? Tɔm susuu taa?’ Ye ɖɩna ɖenɖe ɖɩpɩzɩɣ nɛ ɖɩkpaɣ-tʋ nɛ ɖɩlabɩnɩ tʋmɩyɛ yɔ, pɩpɩzɩɣ nɛ pɩwɛɛ-ɖʋ kɛlɛʋ se ɖɩtɩlɩ ɛzɩma ɖɩkpaɣ-tʋ nɛ ɖɩlabɩnɩ tʋmɩyɛ yɔ. w16.05 3:9, 11

Yehowa ñɩnɩɣ se mba pɔcɔŋnɩ ɛgbɛyɛ yɔɔ yɔ pɛwɛɛnɩ wɛtʋ kɩbandʋ. (1 Tim. 3:2-7) Ɛsɔɔlaa se paha kɩɖaʋ kɩbaŋʋ, nɛ ɛkaɣ-wɛ pɔzʋʋ akɔnta ɛzɩma pɔcɔŋnɩ ɛgbɛyɛ yɔɔ yɔ, pɩ-yɔɔ. Ɛgbɛyɛ wɛ ñɩm ɛ-ɛsɩndaa mbʋ pʋyɔɔ yɔ, ɛyabɩ-ɖɩ nɛ “ɛ-pɩyalʋ maɣmaɣ calɩm.” (Tʋma 20:28) Yehowa sɔɔlaa se ɛgbɛyɛ taa ɛzʋtʋyaa ɩcɔnɩ ɖɔ-yɔɔ nɛ pakandɩyɩ ɖɔ-yɔɔ. (Iza. 32:1, 2) Ye mbʋ, wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ, tɩwɩlɩɣ se Yehowa maɣzɩɣ ɖɔ-yɔɔ siŋŋ. Toovenim taa lɛ, pɩwɛɛ se paa Krɩstʋ tʋ weyi lɛ, ɛkpɛlɩkɩ nɛ ɛtɩlɩ wɛtʋ kɩbandʋ ndʋ, mbʋ pʋyɔɔ yɔ Krɩstʋ mba tɩŋa Yehowa sɔɔlaa se pɛwɛɛnɩ-tʋ. Pɩwɛɛ se ɖa-tɩŋa ɖɩwɛɛ lɔŋ nɛ ɖɩkɛ mba panɩɣ tɔm taa yɔ. (Fil. 4:5; 1 Pɩy. 4:7) Alɩwaatʋ ndʋ ɛzʋtʋyaa ñakɩ pana se pɛkɛ “wondu nʋmɔʋ kɩbaŋʋ wɩlɩyaa” yɔ, pɩsɩɣnɩ-ɖʋ nɛ ɖɩmaɣzɩnɩ “pe-tisuu.”​—1 Pɩy. 5:3; Ebr. 13:7. w16.05 5:8-10

Wɛtʋ kɩdɛkɛdɩtʋ ndʋ pɩwɛɛ se ɖɩlɔ? Tɩ-taa natʋyʋ yɔ tɩ kpazʋʋ, kɩwɛɛkɩm labʋ sɔɔlʋʋ, nɛ tisuu kɩɩwɛʋ. Wɛtʋ kɩdɛkɛdɩtʋ ndʋ, tɩpɩzɩɣ tiyele nɛ ɖɩwɛɛnɩ kaañamtʋ nɛ ñʋʋ taa ɖoŋ. (Dan. 5:1, 20; Ebr. 3:13, 18, 19) Mbʋ kaatalɩnɩ Yuuda Wiyaʋ Uziya. (4 Aw. 26:3-5, 16-21) Kiɖe tɛɛ lɛ, Uziya labɩ “mbʋ pɩwɛ siɣsiɣ yɔ [Yehowa] ɛsɩndaa,” nɛ ewolo pɩ-yɔɔ nɛ “ɛñɩnɩ Ɛsɔ.” Ɛlɛ ɛkɔm nɛ ‘ɛkpa ɖoŋ lɛ, ɛkpazɩ ɛ-tɩ,’ ŋgʋ e-ɖoŋ lɩnɩ Ɛsɔ cɔlɔ na. Halɩ ɛsʋ templo taa nɛ ɛñɩnaɣ se ɛsɔ tɩlaaɖɩ miŋ altaaru yɔɔ, ŋgʋ Aarɔɔnɩ liɖe taa cɔjɔnaa tʋmɩyɛ pɩɩkɛnaa. Nɛ cɔjɔnaa heyi-i se mbʋ ɛlakɩ yɔ pɩfɛyɩ ɖeu lɛ, ɛkɔ pana siŋŋ. Ɛbɛ pɩtɛmnɩ-ɩ? Ɛpɩsɩ canaɣ pɩkɔɔ pɩtalɩ ɛ-sɩm wiye. (Adu. 16:18) Ye ɖɩtɩkpa ɖa-tɩ yɔ, ɖa ɖɔɖɔ ɖɩpɩzɩɣ nɛ ɖɩpaɣzɩ ɖa-tɩ kpazʋʋ ɖenɖe ɖɩtɩtalɩ yɔ, nɛ halɩ ɖikizi Bibl lɔŋ tasʋʋ.​—Roma 12:3; Adu. 29:1. w16.06 2:3, 4

Lɩmaɣza wena ŋwɛnɩ ño-koobiya mba pɔ-sɔnzɩ wɛ ndɩ kpem nɛ ñɛ-nzɩ yɔ pɔ-yɔɔ? Pʋtɔma yɔ, pa-kʋnʋŋ, po-wondu suu, pa-lakasɩ nɛ pɔ-tɔɔnasɩ wɛ ndɩ kpem nɛ ɛzɩma pɩwɛ ñɛ-tɛ yɔ. Ŋseɣ-wɛ nɛ ŋɖʋʋ taabalɩyɛ nɛ mba ña nɛ wɛ ɩlɩnɩ lone kʋɖʋmɖɩyɛ taa nɛ ɩkpɛndɩ sɔnzɩ yɔ pe-ɖeke na? Nɛ mba pɛkɛ ɛzʋtʋyaa ñɛ-ɛgbɛyɛ taa, ñe-egeetiye taa yaa ñɛ-ɛgbɛyɛ piliŋa taa yɔ, ye ŋkɩlɩ-wɛ yaa ye pɔ-sɔnzɩ yaa po-tomnaɣ tɔlɩm ɛwɛ ndɩ yɔ, lɩmaɣza wena ŋwɛɣnɩ pɔ-yɔɔ? Ŋkaɣ yebu nɛ wɛtʋ ndʋ, tɩwɛɛkɩ nɔɔ kʋɖʋmaɣ ŋga kɛwɛ Yehowa sɛyaa hɛkʋ taa yɔ? Ɛbɛ pɩzɩɣ pɩsɩnɩ-ɖʋ nɛ ɖɩlʋbɩnɩ tɩlasɩ nzɩ? Ñɩm kaawɛ Efɛɛzɩ tɛtʋ taa nɛ ɛyaa mba paawɛ peeɖe yɔ, paalɩnɩ hɔɔlɩŋ ndɩ ndɩ taa. Pɔɔlɩ kaatasɩ koobiya mba pɛwɛ peeɖe yɔ lɔŋ kɩbaŋ nɩɩyɩ. (Efɛz. 4:1-3) Kajalaɣ lɛ, Pɔɔlɩ ya wɛtʋ kɩbandʋ ɛzɩ tɩ luzuu, laŋɩyɛ kɩbanɖɛ, tɩ ɖɔkʋʋ nɛ sɔɔlɩm. Ðɩpɩzɩɣ nɛ ɖɩkpaɣ wɛtʋ kɩbandʋ ndʋ nɛ ɖɩmaɣzɩnɩ tilima wena ayeki se kuduyuu ɛsɩŋ camɩyɛ yɔ. w16.06 3:17, 18

Sataŋ ñɩnɩɣ se ɖɩkpaɣ ɖo-ɖoŋ tɩŋa nɛ ɖɩñɩnɩnɩ ñɩm nɛ ɖiyele Yehowa sɛʋ. (Mat. 6:24) Mba pakpakɩɣ po-ɖoŋ tɩŋa nɛ pañɩnɩɣnɩ ñɩm kadadayaɣ yɔ, pe-wezuu caɣʋ ɛɛwɛɣnɩ tɔbʋʋ nɩʋ, mbʋ pʋyɔɔ yɔ pamaɣzɩɣ pe-ɖeke pa-tɩ yɔɔ na. Pɩpɩzɩɣ nɛ pɩkɔnɩ-wɛ kaɖɛ fezuu taa nɛ pakatɩ kʋñɔmɩŋ lɛɛŋ sakɩyɛ. (1 Tim. 6:9, 10; Natʋ 3:17) Ɛyaa mba, pɔ-tɔm labɩ nɔɔ kʋɖʋmaɣ nɛ eduuye nɖɩ Yesu tuu ɖomaɣ ɖuyu yɔɔ yɔ. Yesu tɔm se pɛwɛ ɛzɩ ɖomaɣ ŋga kɔtɔlɩ kpaŋnɩsɔɔ taa yɔ, mbʋ pʋyɔɔ yɔ panɩɣ tɔm lɛ, “mbʋ mbʋ ɛyaa liu wɛɛ se pɛwɛɛna kpem yɔ pɩ-lɩmaɣza sʋʋ pa-taa nɛ pɩɖɩɣ-tʋ nʋmɔʋ nɛ paawɛɣnɩ kɛzɛɣa.” (Mark. 4:14, 18, 19, ABT) Ðɩñɔtɩnɩ ɛjaɖɛ tɛm kpam nɛ pʋyɔɔ lɛ, pɩtɩkɛ lɛɛlɛɛyɔ pɩwɛɛ se ɖɩcazɩ ñɩm nɛ ɖɩkpazɩ huwa. Ðɩtaamaɣzɩ se alɩwaatʋ ndʋ ɖihikiɣ ñʋʋ yabʋ kʋñɔŋ sɔsɔʋ alɩwaatʋ taa yɔ, ɖɩkaɣ kpɛndɩnʋʋ ɖa-ñɩm nɛ ɖɩsʋʋ ɛjaɖɛ kɩfaɖɛ taa.​—Adu. 11:4; Mat. 24:21, 22. w16.07 1:5, 6

Hayɩm tʋ nɔɔyʋ lɩ tanaŋ tɛɛ cu nɛ ewolo ɛtɛɣ ɛyaa se powolo pala tʋmɩyɛ ɛ-hayɩm taa. Ɛyaa mba ehiɣaa yɔ, ɛ nɛ wɛ panɩɩnɩ ɖama liidiye nɖɩ ɛhɛyɩɣ-wɛ yɔ ɖɩ-yɔɔ. Hayɩm tʋ ɛnʋ, ɛñɩnaɣ se ɛtasɩ tɛɣʋ ɛyaa nɛ pɩɖɔɔ. Pʋyɔɔ ɛɖaɣnɩ lɩʋ nɛ ɛna ɛyaa sakɩyɛ nɛ eheyi-wɛ se ɛhɛyɩɣ-wɛ camɩyɛ halɩ pɩkpɛndɩnɩ mba ɛtɛɣ-wɛ ɖanaɣ yɔɔ yɔ. Ðanaɣ ɖanaa lɛ, ekpeɣli ɛ-tʋmlaɖaa mba se ɛhɛyɩ-wɛ pe-liidiye. Ɛhɛyɩ pa-tɩŋa kɩmaŋ, paa nabɛyɛ ɩlabɩ tʋmɩyɛ ñɩɣtʋ sakɩyɛ nɛ lalaa ñala ñɩɣyʋʋ kʋɖʋmʋʋ ɖeke yɔ. Mba ɛcalɩ tɛɣʋ yɔ, pana mbʋ lɛ papaɣzɩ miduu pɔ-mɔɔŋ tɛɛ. Peeɖe hayɩm tʋ pɔzɩ-wɛ se: ‘Ma nɛ mɩ ɖɩtaanɩɩnɩ ɖama ɛzɩma pɩwɛɛ se mɛhɛyɩɣ-mɩ yɔ pɩ-yɔɔ? Mɛnfɛyɩnɩ waɖɛ se maha man-tʋmlaɖaa tɩŋa mbʋ mɔnsɔɔlaa yɔ? Pɩlabɩ ɛzɩma nɛ ɩlakɩ ɛsɩsɛmɩyɛ se pʋyɔɔ malakɩ ɛyaa kʋjɔʋ?’ (Mat. 20:1-15) Yesu eduuye ɖɩnɛ ɖɩtɔzʋʋ-ɖʋ Yehowa wɛtʋ kɩbandʋ natʋyʋ ndʋ Bibl yɔɔdʋʋ tɩ-tɔm ɖoŋ ɖoŋ yɔ: Ndʋ lɛ “kʋjɔʋ” yaa lootiye.​—2 Kɔr. 6:1. w16.07 3:1, 2

Lɛɛlɛɛyɔ kpem pɩwɛɛ se ɖisusi Kewiyaɣ laŋhɛzɩyɛ tɔm, mbʋ pʋyɔɔ yɔ ɛjaɖɛ tɛm ñɔtɩ kpam. (Mark. 13:10) Toovenim taa lɛ, laŋhɛzɩyɛ tɔm susuu wɩlɩɣ se Yehowa labɩ-ɖʋ lootiye. Pɩwɛɛ se ɖɩtɔzɩ tɔm ndʋ tɩ-yɔɔ alɩwaatʋ ndʋ ɖisusuu tɔm yɔ. Ða-kaɖʋwa lɛ se ɖɩɖʋ Yehowa hɩɖɛ. Ɛzɩma ɖɩpɩzɩɣ nɛ ɖɩtalɩ kaɖʋwa ŋga? Pɩwɛɛ se ɖɩsɩnɩ ɛyaa nɛ pana se wazasɩ nzɩ ɖɩkaɣ hiɣu ɛjaɖɛ kɩfaɖɛ taa yɔ, sɩwɩlɩɣ se lootiye sɔsɔɖɛ kpem Yehowa labɩ-ɖʋ. Alɩwaatʋ ndʋ ɖisusuu ɛyaa tɔm yɔ, ɖɩpɩzɩɣ ɖɩsɩnɩ-wɛ nɛ pana se Krɩstʋ kewiyitu tɛɛ lɛ, ɛyaa kaɣ hiɣu kɩhɛyʋʋ pʋ-ñʋʋ taa kɩlaʋ wazasɩ tɩŋa, nɛ pazɩ pazɩ lɛ patalɩ pilim. Bibl tɔŋ se: “Wondu kpeekpe kaɣ lɩʋ kɩdɛkɛdɩm yomiye taa nɛ tɩwɛɛ tɩ-tɩ yɔɔ ɛzɩ Ɛsɔ piya yɔ, nɛ tɩ nɛ sɩ pakaa ɖoŋ.” (Roma 8:21) Yehowa lootiye yeke yɔɔ pɩtɩŋɩɣna nɛ pɩla mbʋ. w16.07 4:17-19

Paa Bibl ɛtɩɖʋ paɣtʋ natʋyʋ kpayɩ ɛzɩma pɩwɛɛ se halʋ nɛ ɛ-walʋ pɛhɛndɩnɩ ɖama alɩwaatʋ ndʋ pacaɣ ɖama sʋnʋʋ yɔ, kɩyɔɔdʋʋ se pɩwɛɛ se pawɩlɩ ɖama sɔɔlɩm. (Won. 1:2; 2:6) Pɩwɛɛ se halʋ nɛ ɛ-walʋ pɛhɛndɩnɩ ɖama. Ye halʋ nɛ ɛ-walʋ pɔsɔɔlɩ Ɛsɔ nɛ pɔsɔɔlɩ po-koobu yɔ, paayeki kpa se ɛyʋ nɔɔyʋ yaa nabʋyʋ ɛkɔnɩ pe-nesi ɖɔkʋʋ kaɖɛ. Halaa nabɛyɛ nɛ pa-walaa pakatɩ kala pe-nesi ɖɔkʋʋ taa, yaa pɛcɛbɩ nesi mbʋ pʋyɔɔ yɔ pa-taa nabɛyɛ kaasɔɔlɩ kʋzʋʋ kɩlɛmɩŋ cɔnʋʋ. Ye mbʋ, pɩwɛɛ se ɖɩkaɖɩnɩ kʋzʋʋ kɩlɛmɩŋ cɔnʋʋ nɛ ɖɩtaawɛɛnɩ kʋzʋʋ lɩmaɣza nɔɔyʋ yɔɔ ye pɩtɩkɛ ɖɛ-tɛŋga yɔ. Halɩ pɩtɩpɔzɩ se ɖɩla nabʋyʋ nɛ pɩwɩlɩ se ɖɩcɩbɩyɩɣ weyi ɛtɩkɛ ɖɛ-tɛŋga yɔ ɛsa. Ye nɔɔyʋ ɛlakɩ mbʋ yɔ, pɩwɩlɩɣ se ɛtɩsɔɔlɩ ɛ-tɛŋga. Ye ɖɩtɔzʋʋ se Yehowa sɩm ɖa-lɩmaɣza nɛ ɖa-lakasɩ yɔ, pɩsɩɣnɩ-ɖʋ nɛ ɖɩla mbʋ pɩkɛdɩɣnɩ-ɩ yɔ nɛ ɖɩwɛɛ kele kele kʋzʋʋ nʋmɔʋ taa.​—Mat. 5:27, 28; Ebr. 4:13. w16.08 2:7-9

Ye Koloosi ñɩma mba, patɩlɩ Ɛsɔ sɔɔlɩm kpayɩ kpayɩ yɔ, pɩpɩzɩɣ pɩsɩnɩ-wɛ nɛ pɛwɛɛnɩ “wezuu ŋgʋ kɩmʋnɩ [Yehowa] yɔ nɛ kiɖeni-i pɩtɩŋa pɩ-taa yɔ.” Pɩsɩɣnɩ-wɛ ɖɔɖɔ se powolo pɩ-yɔɔ nɛ ‘pala tʋma kɩbana ndɩ ndɩ’ kɔzɩ kɔzɩ laŋhɛzɩyɛ tɔm susuu taa. (Kol. 1:10) Pɩsa nɛ ɖɩsɛɛ Yehowa camɩyɛ lɛ, pɩwɛɛ se ɖɩkpɛlɩkɩɣ Bibl ɖa-tɩ yɔɔ ɖoŋ ɖoŋ. Ye mbʋ, pɩcɛyaa se ɖɩsɩnɩ ɖe-Bibl kpɛlɩkɩyaa nɛ patɩlɩ toovenim tɔm ndʋ. Pʋcɔ nɛ ɖɩsɩnɩ lalaa nɛ patɩlɩ wazaɣ ŋga Bibl kpɛlɩkʋʋ wɛna yɔ lɛ, pɩwɛɛ se ɖa-maɣmaɣ ɖɩkpɛlɩkɩɣ Bibl ɖa-tɩ yɔɔ ɖoŋ ɖoŋ. Ye mbʋ, pɩwɛɛ se ɖɩpɔzɩ ɖa-tɩ tɔm tʋnɛ: ‘Ye mankatɩ nɔɔyʋ tɔm susuu taa nɛ ɛwɛnɩ lɩmaɣza wena atɩla nɔɔ kʋɖʋmaɣ nɛ Bibl wɩlɩtʋ yaa ɛpɔzɩ tɔm ndʋ tɩ-yɔɔ cosuu fɛyɩ kɛlɛʋ yɔ, manpɩzɩɣ nɛ mantɩŋnɩ Bibl yɔɔ nɛ moncosi-i? Alɩwaatʋ ndʋ mankalɩɣ ɛzɩma Yesu, Pɔɔlɩ nɛ ɛyaa lalaa pañaɣ pana tɔm susuu taa paa pɩɩwɛ kaɖɛ yɔ, mankpakɩɣ alɩwaatʋ nɛ mamaɣzɩɣ ɛzɩma pa-kɩɖaŋ pɩzɩɣ ɩsɩnɩ-m yɔ?’ Ða-tɩŋa payɩ, pɩpɔzʋʋ-ɖʋ sɩmtʋ nɛ lɔŋ tasʋʋ mbʋ pɩlɩnɩ Bibl taa yɔ. Nɛ ye ɖiheyiɣ lalaa ɛzɩma Bibl kpɛlɩkʋʋ wazɩ-ɖʋ yɔ, pɩpɩzɩɣ pɩsɩnɩ-wɛ nɛ paba ɖɔɖɔ pañaɣ pana nɛ pɛkpɛlɩkɩ Bibl nɛ pehiɣ wazasɩ nzɩ. w16.08 4:3, 4

Pɩcɛyaa siŋŋ se ɖɩlʋ nɛ ɛjaɖɛ yɔɔ wɩlɩtʋ nɛ lɔŋsɩnɖɛ pataawɛɛnɩ ɖoŋ ɖɔ-yɔɔ. Pɩtasɩ lɛ, pɩwɛɛ se ɖɩlʋbɩnɩ lakasɩ kɩdɛkɛdɩsɩ ɛzɩ kʋzʋʋ kɩdɛkɛdʋʋ, taba nɛ tabakʋʋyaɣ ñɔʋ, nɛ sʋlʋm kpaŋʋʋ mbʋ yɔ. Pɩwɛɛ ɖɔɖɔ se paa ɛzɩmtaa lɛ, ɖɩlʋbɩnɩ ɖo-tomnaɣ ɛjandʋ nɛ ɖitaayele nɛ pitibi-ɖʋ yɔɔɔ. (2 Kɔr. 10:3-6; Kol. 3:5-9) Ɛlɛ, ɛzɩ ɖɩpɩzɩɣ nɛ ɖɩwa ɖo-koyindinaa mba? Ɛɛɛ; ɛlɛ pʋcɔ nɛ ɖɩwabɩ-wɛ lɛ, pɩpɔzʋʋ se ɖɩlʋ. Pɔɔlɩ kpaɣ ɛ-tɩ nɛ ɛmaɣzɩnɩ lʋɖʋ nɔɔyʋ nɛ ɛtɔ se: “Malʋkɩ, ɛlɛ maalʋkɩ se pɔtɔma palʋkɩ, maalakɩ tanaʋ na.” (1 Kɔr. 9:26) Ɛzɩ ɛyʋ ñakʋʋ pana lʋbɩyɛ taa se pataahu-i yɔ, ɖa ɖɔɖɔ pɩwɛɛ se ɖɩñaɣ pana nɛ ɖɩlʋbɩnɩ ɖo-koyindinaa. Yehowa falɩsɩɣ-ɖʋ nɛ ɛsɩɣnɩ-ɖʋ se ɖɩpɩzɩ nɛ ɖɩlʋ. Ɛtɩŋɩɣnɩ Bibl yɔɔ nɛ ɛwɩlɩɣ-ɖʋ ɛzɩma ɖɩpɩzɩɣ nɛ ɖɩla mbʋ yɔ. Ɛtɩŋɩɣnɩ ɖɔɖɔ ɛgbɛyɛ takayɩsɩ, kediɣzisi, nɛ kigbeɣliŋ yɔɔ nɛ ɛsɩɣnɩ-ɖʋ. Ŋwɛɛ nɛ ŋkpakɩɣ tɔm ndʋ ŋkpɛlɩkɩɣ yɔ nɛ ŋlakɩnɩ tʋmɩyɛ na? w16.09 2:2, 3

Yesu ɛsɩndaa lɛ, lalaa sɩnʋʋ kaacɛyaa nɛ pɩkɩlɩ ɛ-maɣmaɣ e-liu sɔɔlɩm labʋ; ɛɛnawa se ye ɛsɩnɩ lalaa yɔ, pɩwɩlɩɣ se ɛwɛɛ nɛ ɛlakɩ ɛ-Caa sɔɔlɩm. Ye mbʋ, pɩtɩmʋna se ɖisuu wondu ndʋ ɖe-liu sɔɔlaa ɛlɛ tiiyeki se lalaa iwelisi tɔm ndʋ ɖisusuu-wɛ yɔ. (Roma 15:2) Pɩwɛɛ se lʋlɩyaa mba pɛkɛ Krɩstʋ mba yɔ, pasɩnɩ pɔ-hɔŋ taa ñɩma nɛ pɔɖɔ Bibl paɣtʋ kila yɔɔ. Pʋ-tɔbʋʋ lɛ se pa nɛ pe-piya pañaɣ pana nɛ posuu wondu nɛ pɔñɔɔzɩ pa-tɩ camɩyɛ nɛ piyele nɛ Yehowa taa la leleŋ. (Adu. 22:6; 27:11) Ye lʋlɩyaa Krɩstʋ ñɩma ɩhaɣ pe-piya kɩɖaʋ kɩbaŋʋ nɛ pawɩlɩɣ-sɩ lɔŋ nɛ sɔɔlɩm yɔ, pɩpɩzɩɣ pɩsɩnɩ-sɩ nɛ sɩña Ɛsɔ nɛ sɩsamɩ-ɩ. Pɩwɛɣ ɖeu se lʋlɩyaa ɩwɩlɩ pe-piya evelisi ɛzɩma sɩpɩzɩɣ nɛ sɩlɩzɩ wondu kɩbandʋ nɛ lone nɖɩ ɖɩ-taa sɩpɩzɩɣ nɛ sɩna-tʋ yɔ. Pɩtɩwɩlɩ se sɩpɩzɩɣ nɛ sɩlɩzɩ wondu ndʋ si-liu sɔɔlaa yɔ tɩ-tɩŋa yem. Ɛlɛ pɩwɛɛ se sɩlɩzɩ wondu ndʋ tɩwɩlɩɣ se sɩɖʋʋ Ɛsɔ hɩɖɛ yɔ. w16.09 3:13, 14

Yesu tɔm wɩlʋʋ tukaɣni ɛyaa laŋa mbʋ pʋyɔɔ yɔ ɛɛsɔɔlɩ Yehowa nɛ Masɩ, nɛ ɛtɛ ɛsɔɔlɩ ɛyaa. (Luka 24:32; Yoh. 7:46) Mbʋ ɖɔɖɔ ye lʋlɩyaa ɩsɔɔlɩ Yehowa, pɔsɔɔlɩ Bibl nɛ pe-piya yɔ, pɩkaɣ-wɛ sɩnʋʋ nɛ pɔ-tɔm wɩlʋʋ tukuni pe-piya laŋa. (Wp. 6:5-8; Luka 6:45) Ye mbʋ, lʋlɩyaa, pɩwɛɛ se ɩsɔɔlɩ Bibl nɛ ɛgbɛyɛ takayɩsɩ kpɛlɩkʋʋ ɖoŋ ɖoŋ. Ɩmaɣzɩ Yehowa wondu kɩlɩzɩtʋ yɔɔ nɛ ɩñɩnɩ ɛgbɛyɛ takayɩsɩ nzɩ sɩyɔɔdʋʋ wondu ndʋ tɩ-tɔm yɔ. (Mat. 6:26, 28) Ye ɩlakɩ mbʋ yɔ, pɩkaɣ-mɩ sɩnʋʋ nɛ ɩwɛɛnɩ sɩmtʋ sakɩyɛ, ɩwɛɛnɩ ɛsɩmɩyɛ Yehowa yɔɔ nɛ pɩkɩlɩ, nɛ pɩkaɣ-mɩ sɩnʋʋ nɛ ɩwɩlɩ mi-piya tɔm camɩyɛ. Tɔm ndʋ ɩkpɛlɩkɩɣ Yehowa yɔɔ yɔ, pɩwɛɛ se iheyi-tʋ mi-piya. Pɩtɩkɛ alɩwaatʋ ndʋ ɩñɔɔzʋʋ kediɣzisi yaa ɩlakɩ hɔʋ taa Bibl kpɛlɩkʋʋ yɔ tɩ-taa ɖeke pɩwɛɛ se ɩla mbʋ, ɛlɛ pɩwɛɛ se ɩlakɩ mbʋ paa ɛzɩmtaa. Pɩtasɩ lɛ, pɩtɩpɔzɩ se ɩkpa mi-piya nɛ ɖoŋ se mɩ nɛ sɩ ɩla faawɩyɛ, ɛlɛ pɩwɛɛ se pɩkɛnɩ taa leleŋ alɩwaatʋ. w16.09 5:6, 7

Ye pɩwɛ-ɖʋ kaɖɛ se ɖɩnɩɩ Ɛsɔtɔm taa camɩyɛ kʋnʋŋ kɩfalʋʋ nakʋyʋ taa yɔ, pɩpɩzɩɣ nɛ pɩkɔnɩ-ɖʋ kaɖɛ fezuu taa. Alɩwaatʋ ndʋ Nehemiya nɩwa se Yuuda ñɩma mba palɩnɩ Babilooni nɛ papɩsɩ Yeruzalɛm yɔ pe-piya nasɩyɩ ɩɩnɩɣ Ebree kʋnʋŋ yɔ, pɩha-ɩ lɩmaɣza siŋŋ. Piya nzɩ sɩtaapɩzɩɣ se sɩkɛ Ɛsɔ sɛyaa kɩbama, mbʋ pʋyɔɔ yɔ sɩtaanɩɣ Ɛsɔtɔm taa camɩyɛ. (Neh. 8:2, 8) Lʋlɩyaa mba pakʋyaa nɛ powolo agbaa wena a-taa paayɔɔdʋʋ pa-kʋnʋŋ yɔ, pa-taa nabɛyɛ kɔm nɛ pana se sɔɔlɩm mbʋ pe-piya kaawɛnɩ fezuu taa wondu yɔɔ yɔ, pɩwɛɛ nɛ pɩhɛɣ. Ɛbɛ yɔɔ? Alɩwaatʋ ndʋ ɖɩkalɩɣ tɔm kʋnʋŋ kɩfalʋʋ nakʋyʋ taa yɔ, piitukuuni ɖa-laŋɩyɛ ɛzɩ alɩwaatʋ ndʋ ɖɩkalɩɣ-tʋ ɖa-maɣmaɣ ɖa-kʋnʋŋ taa yɔ. Pɩtasɩ lɛ, ye ɖɩɩpɩzɩɣ se ɖɩyɔɔdɩnɩ ɛyaa kʋnʋŋ nakʋyʋ taa yaa ɖɩɩnɩɣ ndʋ pɔyɔɔdʋʋ yɔ, pɩpɩzɩɣ nɛ pɩnɩɩ-ɖʋ tomnaɣ yɔɔ nɛ pɩcamɩ-ɖʋ fezuu taa. Ye mbʋ, ye ɖe-liu ɛwɛɛ se ɖiwolo ɛgbɛyɛ nɖɩ ɖɩ-taa paayɔɔdʋʋ ɖa-kʋnʋŋ yɔ, pɩwɛɛ se ɖɩñaɣ pana nɛ ɖɩcɔnɩ ɖe-fezuu taa kɩcɛyɩm ɖeɖe.​—Mat. 4:4. w16.10 2:4-6

Tisuu kɛ Krɩstʋ ñɩma wɛtʋ kɩbandʋ siŋŋ. Pɩtɩkɛ ɛyaa tɩŋa wɛnɩnɩ tisuu. (2 Tes. 3:2) Ɛlɛ Yehowa haɣ paa ɛ-sɛyʋ weyi “tisuu.” (Roma 12:3; Gal. 5:22) Ye mbʋ, mba pɛwɛnɩ tisuu yɔ, pɩwɛɛ se pawɩlɩ Yehowa pɛ-ɛsɩmɩyɛ. Yesu Krɩstʋ yɔɔdaa se ɛ-yɔɔ ɛ-Caa tɩŋɩɣna nɛ ɛhɔŋ ɛyaa nɛ ewokini ɛ-cɔlɔ. (Yoh. 6:44, 65) Ye ɛyʋ ɛwɛnɩ tisuu Yesu yɔɔ yɔ, piyeki se pekpeɣ-i ɛ-kɩwɛɛkɩm. Nɛ pɩhaɣ-ɩ waɖɛ se taabalɩyɛ kɩbanɖɛ ɛwɛɛ ɛ nɛ Yehowa pɛ-hɛkʋ taa tam. (Roma 6:23) Ðɩtɩmʋna se Yehowa ɛlabɩ-ɖʋ kʋjɔʋ sɔsɔʋ ŋgʋ, mbʋ pʋyɔɔ yɔ ɖɩkɛ kɩwɛɛkɩm laɖaa nɛ ɖɩmʋnɩ sɩm. (Keɣa 102:10) Ɛlɛ, Yehowa na kɩbandʋ natʋyʋ ɖa-taa. Ɛlabɩ-ɖʋ lootiye nɛ ɛha-ɖʋ waɖɛ se ɖiwelisi laŋhɛzɩyɛ tɔm. Piyeba nɛ ɖɩpaɣzɩ wɛnʋʋ tisuu Yesu yɔɔ nɛ ɖɩwɛɛnɩ lidaʋ se ɖɩkaɣ caɣʋ wezuu maatɛŋ.​—1 Yoh. 4:9, 10. w16.10 4:1, 2

Pɔɔlɩ yɔɔdɩ tɔm kɩbandʋ sakɩyɛ e-koobiya yɔɔ takayɩsɩ nzɩ ɛmawa yɔ sɩ-taa. Ɛ nɛ pa-taa nabɛyɛ pɔɖɔm nʋmɔʋ pɩnzɩ sakɩyɛ, nɛ pɩtʋʋ fɛyɩ se ɛɛsɩm pɛ-ɛjandʋ, paa mbʋ yɔ ɛyɔɔdɩ tɔm kɩbandʋ pɔ-yɔɔ. Ɛyɔɔdɩ Timootee yɔɔ se ɛkɛ ‘ɛ-pɩyalʋ kʋsɔɔlʋ nɛ tɔm mʋyʋ Kɩbaɣlʋ taa,’ nɛ ɛcɔŋnɩ koobiya kɩcɛyɩm yɔɔ nɛ sɔɔlɩm. (1 Kɔr. 4:17; Fil. 2:19, 20) Ɛsam Tiiti Kɔrɛntɩ ɛgbɛyɛ taa nɛ ɛtɔ se: “Ɛkɛ man-taabalʋ nɛ man-sɩnɩyʋ mɩ-cɔlɔ.” (2 Kɔr. 8:23) Pɩtʋʋ fɛyɩ se alɩwaatʋ ndʋ Timootee nɛ Tiiti panawa se Pɔɔlɩ kaawɛnɩ lɩmaɣza kɩbana pɔ-yɔɔ yɔ, pɩɩkpazɩ-wɛ ɖoŋ siŋŋ. Pɔɔlɩ nɛ Barnaabaasɩ paɖʋ pe-wezuu kaɖɛ taa nɛ papɩsɩ lona wena a-taa paawɩlɩ-wɛ ñaŋ yɔ. Paanazɩ-wɛ Listrɩ tɛtʋ taa, ɛlɛ papɩsɩ peeɖe se pakpazɩ koobiya mba papɩsɩ Krɩstʋ mba pitileɖi yɔ ɖoŋ se pɔɖɔkɩ pe-tisuu kpam. (Tʋma 14:19-22) Samaɣ nakɛyɛ kʋyɩ Pɔɔlɩ yɔɔ Efɛɛzɩ tɛtʋ taa. Pʋwayɩ lɛ, ɛcaɣ peeɖe nɛ ɛkpazɩ koobiya ɖoŋ.​—Tʋma 20:1. w16.11 1:10, 11

Yehowa lɩzɩ Yesu se ɛkɛ ɛ-ɛgbɛyɛ “ñʋʋdʋ” nɛ Yesu lɩzɩ “yom siɣsiɣ tʋ nɛ lɔŋsɩnɖʋ” se eɖiyi Yehowa ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ. (Mat. 24:45-47, nwt; Efɛz. 5:23) Ɛzɩ kajalaɣ pɩnzɩ mɩnʋʋ taa nɔɔɖɛyaa ɛgbɛyɛ yɔ, yom siɣsiɣ tʋ nɛ lɔŋsɩnɖʋ tisiɣ Bibl yɔɔ, nɛ kɩwɛ ñɩm siŋŋ ɛ-ɛsɩndaa. (1 Tes. 2:13) Bibl heyiɣ-ɖʋ se ɖiwoki kediɣzisi ɖoŋ ɖoŋ. (Ebr. 10:24, 25) Kiseɣtiɣ-ɖʋ se ɖitisi wɩlɩtʋ kʋɖʋmtʋ yɔɔ. Kiheyiɣ-ɖʋ ɖɔɖɔ se ɖɩsɩɩ Ɛsɔ Kewiyaɣ kajalaɣ ɖeɖe ɖe-wezuu caɣʋ taa. (Mat. 6:33) Pɩtasɩ lɛ, kɩwɩlɩɣ-ɖʋ se pɩwɛɛ se ɖisusi tɔm kpaɣ ɖɩɣa nɛ ŋwolo ɖɩɣa, lona wena a-taa ɖɩnaɣ ɛyaa yɔ nɛ ɖɩla ɖɔɖɔ alɩwaatʋ fanʋʋ tɔm susuu tʋmɩyɛ. (Mat. 28:19, 20; Tʋma 5:42; 17:17; 20:20) Kɩtasɩɣ ɛgbɛyɛ taa ɛzʋtʋyaa lɔŋ se peyele nɛ kele kele wɛtʋ wɛɛ ɛgbɛyɛ taa. (1 Kɔr. 5:1-5, 13; 1 Tim. 5:19-21) Pɩtasɩ lɛ, Yehowa seɣtiɣ ɛ-sɛyaa tɩŋa payɩ se pɛwɛɛ kele kele tomnaɣ yɔɔ nɛ fezuu taa.​—2 Kɔr. 7:1. w16.11 3:7, 8

Pɩnzɩ sakɩyɛ pʋcɔ nɛ Caama you kajalaɣ ñɩŋgʋ paɣzɩ lɛ, Charles Russell nɛ ɛ-taabalaa peɖiɣzinaa se mba payaɣ pa-tɩ se Krɩstʋ mba yɔ, pataawɩlɩɣ Bibl taa toovenim tɔm. Peeɖe panɩ pɩ-taa se pɩtɩmʋna se pala nɔɔ kʋɖʋmaɣ nɛ cɛtɩm Ɛsɔ sɛtʋ agbaa. Halɩ pɩnaɣ 1879 taa, Feŋuu Tilimiye (Le Phare de la Tour de Sion) lɩzɩ pɩ-taa se coocinaa mba pamaɣzɩɣ se pɛkɛ Krɩstʋ asɛyʋ ɛlɛ paɖʋʋ pɔ-nɔɔ ɛjaɖɛ tɔm taa yɔ, toovenim taa lɛ, pɛwɛ Babilooni Sɔsɔʋ taa na, nɛ Bibl ya-kʋ se halʋ acɛyɛ tʋ. (Natʋ 17:1, 2) Ɛyaa mba paawɛ siɣsiɣ yɔ, paasɩm mbʋ pɩwɛɛ se pala yɔ. Paanawa se ye paɖʋʋ cɛtɩm Ɛsɔ sɛtʋ agbaa nesi yɔ, paapɩzɩɣ nɛ pehiɣ Ɛsɔ wazaɣ. Pʋyɔɔ Bibl Kpɛlɩkɩyaa sakɩyɛ ma takayɩsɩ nzɩ sɩwɩlɩɣ se palɩ coocinaa mba pa-taa paawɛɛ yɔ. w16.11 5:2, 3

Pɩtʋʋ fɛyɩ se Yesu sɩm yɔɔ tɔzʋʋ alɩwaatʋ taa, ŋkalɩ tɔm ndʋ tɩwɛ Roma 8:15-17 taa yɔ. Bibl hɔɔlʋʋ ŋgʋ, kɩsɩɣnɩ patam numwaa se pana mbʋ pɩwɩlɩɣ se Yehowa ta-wɛ num yɔ. Kɩlɩzɩ pɩ-taa se fezuu kiɖeɖeu wɩlɩɣnɩ-wɛ se papɩsɩ patam numwaa. Tɔm ndʋ tɩwɛ Roma ñʋʋ 8 taa yɔ, patam numwaa titukuuni kajalaɣ ɖeɖe. Pamʋ “fezuu” nɛ ‘paɖaŋ Ɛsɔ piya mʋyʋsʋʋ wiye. Puwiye lɛ, payakɩ po-tomnaɣ ñʋʋ.’ (Roma 8:23) Pɩwɩlɩɣ se pɛwɛnɩ lidaʋ se pakaɣ kpaʋ ɛsɔdaa nɛ papɩsɩ Ɛsɔ piya. Pɛwɛnɩ waɖɛ nɖɩ, mbʋ pʋyɔɔ yɔ paha pa-tɩ nɛ pamɩyɩsɩ-wɛ lɩm nɛ papɩsɩ Krɩstʋ mba, nɛ Ɛsɔ tɩŋnɩ Yesu kɩhɛyʋʋ pʋ-ñʋʋ taa kɩlaʋ yɔɔ nɛ ekpeɣ-wɛ pa-kɩwɛɛkɩm. Nɛ ɛkpaɣ-wɛ se pɛkɛ siɣsiɣ tɩnaa, nɛ pʋyɔɔ lɛ papɩzɩɣ nɛ pɛkɛ e-piya. (Roma 3:23-26; 4:25; 8:30) Ɛlɛ Roma ñʋʋ 8 taa tɔm tukuuni ɖɔɖɔ mba pɛwɛnɩ lidaʋ se pacakɩ wezuu maatɛŋ tɛtʋ yɔɔ yɔ, mbʋ pʋyɔɔ yɔ papɩsɩ siɣsiɣ tɩnaa Ɛsɔ ɛsɩndaa. Lɔŋ weyi patasɩ ɛyaa siɣsiɣ tɩnaa peeɖe yɔ, ɩpɩzɩɣ nɛ ɩwazɩ ɖɔɖɔ mba pɛwɛnɩ lidaʋ se pacakɩ wezuu maatɛŋ tɛtʋ yɔɔ yɔ. w16.12 2:1-3

Yesu yɔɔdʋʋ se “ɩtaanɩɣzɩ” yɔ, pʋ-tɔbʋʋ lɛ suwe? Pɩtʋʋ fɛyɩ se ɛtaañɩnɩɣ yɔɔdʋʋ se Ɛsɔ sɛyaa ɩɩkatɩɣ nɩɣzɛ pe-wezuu caɣʋ taa kpa. Ɛlɛ Yesu sɩnɩ ɛ-wayɩ tɩŋɩyaa nɛ pana se ye ɛyʋ ɛnɩɣzɩɣ mbʋ pɩ-tɔm tɩcɛyɩ yɔ pɩ-yɔɔ, yaa ɛnɩɣzɩɣ kadadayaɣ yɔ, piiyeki se ɛlʋbɩnɩ kaɖɛ wɛtʋ ndʋ tɩ-taa ɛwɛɛ yɔ. Paa evemiye nɖɩ lɛ, ɖɩ nɛ ɖɩ-kala. Ye mbʋ, pɩtɩpɔzɩ se Krɩstʋ mba ɩkpaɣ mbʋ pɩlaba nɛ pɩɖɛɛ yɔ pɩ-nɩɣzɛ, yaa cee wayɩ nɩɣzɛ nɛ pɔsɔzɩ sɔnɔ ñɩna yɔɔ. Ye Krɩstʋ tʋ nɔɔyʋ ɛmaɣzɩɣ kala wena apɩzɩɣ nɛ atalɩ-ɩ cee wayɩ yɔ a-yɔɔ yɔ, ɖoŋ ɖoŋ lɛ pɩhaɣ-ɩ nɩɣzɛ sakɩyɛ. Ɛlɛ, pɩtɩcɛyɩ se ŋkɩlɩɣ nɩɣzʋʋ mbʋ pɩtɩlabɩta yɔ pɩ-yɔɔ. Ɛbɛ yɔɔ? Mbʋ pʋyɔɔ yɔ, kala wena ɖɩmaɣzɩɣ se apɩzɩɣ nɛ atalɩ-ɖʋ yɔ, ɖoŋ ɖoŋ lɛ, pɩtɩkɛ mbʋ pɩtɛŋna. Pɩtasɩ lɛ, wɛtʋ natʋyʋ ɛɛpɩzɩɣ tɩtalɩ-ɖʋ nɛ tɩkɩlɩ Yehowa weyi ɛtɔŋ se ɖɩɖʋzɩ ɖa-nɩɣzɛ kpeekpe e-nesi tɛɛ yɔ ɖoŋ. Ŋpɩzɩɣ nɛ ŋtaa liu se Ɛsɔ pɩzɩɣ nɛ ɛwazɩ ɛ-sɛyaa siɣsiɣ tɩnaa nɛ ɛsɩnɩ-wɛ nɛ palʋbɩnɩ nɩɣzɛ wena paawɛnɩ ɖooo lɔŋ yɔ. Ɛpɩzɩɣ ɛsɩnɩ-wɛ ɖɔɖɔ nɛ palʋbɩnɩ nɩɣzɛ wena pakatɩɣ sɔnɔ nɛ wena pamaɣzɩɣ se apɩzɩɣ nɛ atalɩ-wɛ cee wayɩ yɔ. w16.12 3:13, 16

Kiɖe tɛɛ lɛ, Wiyaʋ Sɔɔlɩ kaawɛnɩ tɩ luzuu nɛ ñamtʋ. (1 Sam. 9:1, 2, 21; 10:20-24) Ɛlɛ ɛpɩsɩ wiyaʋ pitileɖi lɛ, ɛpaɣzɩ wɛnʋʋ tɩ kpazʋʋ. Kɩyakʋ nakʋyʋ, nayʋ Samɩyɛɛlɩ tɩtalɩ Gilgaalɩ alɩwaatʋ yɔɔ lɛ, Sɔɔlɩ kpedesi nɛ ɛla mbʋ pɩtaapɔzɩ se ɛla yɔ. Filisti mba kaañɔɔzɩ pa-tɩ se poyooni Izrayɛɛlɩ piya, pɩtasɩ lɛ ɛyaa sakɩyɛ kaasewa nɛ peyele Sɔɔlɩ. Pʋtɔma yɔ, ɛɛmaɣzaa se: ‘Pɩwɛɛ se mala nabʋyʋ lɛɛ lɛɛ.’ Peeɖe ɛla Ɛsɔ kɩlaʋ ŋgʋ ɛtaawɛɛnɩ waɖɛ se ɛlaa yɔ. Ɛ-lakasɩ nzɩ sɩtaakɛdɩnɩ Yehowa. (1 Sam. 13:5-9) Samɩyɛɛlɩ talɩ Gilgaalɩ lɛ, ɛkalɩ Sɔɔlɩ se pʋyɔɔ ɛlabɩ kɩlaʋ ŋgʋ. Pɩɩwɛɛ se Sɔɔlɩ etisi se ɛ-tɔm sɩba, ɛlɛ ɛñɩnɩ kawanaɣ se ɛwɩlɩ se ɛ-tɔm ɖewa nɛ halɩ ɛñaɣ pana se ɛkpaɣ mbʋ ɛlaba yɔ nɛ ɛsʋʋ samaɣ ñʋʋ taa. (1 Sam. 13:10-14) Kpaɣnɩ alɩwaatʋ ndʋ lɛ, Sɔɔlɩ paɣzɩ labʋ lakasɩ kɩdɛkɛdɩsɩ. Piyeba nɛ elesi e-kewiyitu nɛ kɔzɩ kɔzɩ lɛ, ɛ-tɔm tɩtasɩ kɛdɩnʋʋ Yehowa. (1 Sam. 15:22, 23) Paa ɛɛpaɣzɩ camɩyɛ kiɖe tɛɛ yɔ, ɛ-lakasɩ kɩdɛkɛdɩsɩ yeba nɛ ehiɣ sɩm.​—1 Sam. 31:1-6. w17.01 3:1, 2

Daviid kaawɛ siɣsiɣ e-wezuu caɣʋ taa. Paa mbʋ yɔ, alɩwaatʋ natʋyʋ ɛɛlabɩ kɩwɛɛkɩm sɔsɔm nabʋyʋ. Ɛ nɛ Batseeba palabɩ acɛyɛ. (2 Sam. 11:1-21) Daviid taapɩzɩɣ se ɛhɩzɩ mbʋ ɛlaba yɔ. Ɛtaapɩzɩɣ ɖɔɖɔ se ese mbʋ pɩlɩ ɛ-kɩwɛɛkɩm taa yɔ. Pɩɩwɛɛ se ɛlʋbɩnɩ kʋñɔmɩŋ weyi ɛ-kɩwɛɛkɩm kɔnaa yɔ, ɩ-taa nɩɩyɩ e-wezuu caɣʋ kpeekpe. (2 Sam. 12:10-12, 14) Ye mbʋ, pɩɩpɔzɩ-ɩ tisuu. Pɩɩwɛɛ se ɛtaa liu se ɛzɩma ekpiɖaa siŋŋ yɔ, Yehowa kaɣ-ɩ kpeɣu nɛ ɛsɩnɩ-ɩ nɛ ɛlʋbɩnɩ kʋñɔmɩŋ ɛnɩ. Ðɩtɩtalɩ pilim nɛ pʋyɔɔ lɛ, ɖa-tɩŋa ɖɩlakɩ kɩwɛɛkɩm. Ða-kɩwɛɛkɩm nabʋyʋ paɣlaa nɛ pɩkɩlɩ lɛɛbʋ. Nabʋyʋ taa, ɖɩɩpɩzɩɣ nɛ ɖɩhɩzɩ ɖa-kɩwɛɛkɩm, nɛ pɩpɔzʋʋ se ɖɩlʋbɩnɩ kʋñɔmɩŋ weyi pɩkɔŋna yɔ ɖe-wezuu caɣʋ kpeekpe. (Gal. 6:7) Ɛlɛ ɖɩwɛnɩ lidaʋ se ɛzɩ Ɛsɔ yɔɔdʋʋ yɔ, ye ɖikpiɖaa yɔ, ɛsɩɣnɩ-ɖʋ kʋñɔŋ alɩwaatʋ taa paa ɖɔ-cɔlɔ pɩlɩnaa nɛ kʋñɔŋ ŋgʋ kɩtalɩ-ɖʋ yɔ.​—Iza. 1:18, 19; Tʋma 3:19, 20a. w17.01 1:10-12

Tɩ luzuu pɩzɩɣ nɛ pɩsɩnɩ-ɖʋ nɛ ɖɩkpaɣ lɩmaɣza kɩbana paa ɖɩɩsɩŋ ɛzɩma pɩkaɣ-ɖʋ tɛmnʋʋ yɔ. Ðɩkpaɣ se ɖɩñɩnɩɣ se ɖɩla alɩwaatʋ tɩŋa Ɛsɔ sɛtʋ tʋmɩyɛ. Pʋtɔma yɔ, ɖɩpɔzʋʋ ɖa-tɩ se ye ɖɩtɔlɩ kʋdɔŋ yɔ, ɛzɩma ɖɩkaɣ labʋ? Nɛ ye ɖa-lʋlɩyaa ɩkpadɩyaa nɛ pɩpɔzɩ se ɖɩsɩnɩ-wɛ, ɛzɩma ɖɩkaɣ labʋ? Ye ɖa-maɣmaɣ ɖɩkɔm nɛ ɖɩkpadɩyɩ yɔ, ɛbɛ ɖɩkaɣ labʋ nɛ ɖɩcɔnɩ ɖa-tɩ yɔɔ? Paa ɖɩñɩnɩ ɛgbɛyɛ takayɩsɩ taa nɛ ɖɩtɩmɩ yɔ, ɖɩɩpɩzɩɣ nɛ ɖicosi tɔm pɔzʋʋ mbʋ pɩ-tɩŋa pɩ-yɔɔ. Ye ɖɩtaɣ Yehowa liu yɔ, pɩsɩɣnɩ-ɖʋ nɛ ɖitisi se ɖo-ɖoŋ wɛnɩ kamaɣ. Ðɩpɩzɩɣ nɛ ɖɩñɩnɩ ɛgbɛyɛ takayɩsɩ taa, ɖɩpɔzɩ lalaa lɔŋ tasʋʋ, nɛ ɖɩtɩmnɩ Yehowa. Pʋwayɩ lɛ, ɖiyele nɛ fezuu kiɖeɖeu ɖiyi-ɖʋ nɛ ɖɩkpaɣ lɩmaɣza kɩbana. (Ekl. 11:4-6) Piyeki nɛ ɖɩha Yehowa waɖɛ se ɛwazɩ-ɖʋ, yaa ɛpɩzɩɣ ɛsɩnɩ-ɖʋ nɛ ɖɩlɛɣzɩ ɖa-kaɖʋsɩ.​—Adu. 16:3, 9. w17.01 4:14

Pɩɩpɔzaa se Aɖam nɛ Ɛva palɩzɩ mbʋ pakaɣ labʋ yɔ. Pakaɣ ñam Yehowa yaa pakaɣ welisinuu ɖʋm? Palɩzaa se pamaɣnɩ Ɛsɔ paɣtʋ yɔɔ. (Kiɖe 3:6-13) Alɩwaatʋ ndʋ Aɖam nɛ Ɛva pamanɩ Yehowa paɣtʋ yɔɔ yɔ, patɩtasɩ talʋʋ pilim. Pɩtasɩ lɛ, pa-kaañamtʋ yeba nɛ poposini Yehowa, mbʋ pʋyɔɔ yɔ Yehowa “ɛsa wɛ kele kele” nɛ ‘ɛɛpɩzɩɣ ɛcɔnɩ kɩdɛkɛdɩm’ nɛ esu tamɩyɛ. (Hab. 1:13) Ye Yehowa kaahuuzi ɛsa pa-kɩwɛɛkɩm mbʋ pɩ-yɔɔ yɔ, piiyeba nɛ lidaʋ ŋgʋ e-wondu kɩlɩzɩtʋ wɛna yɔ, kɩsʋʋ kaɖɛ taa. Kɔzɩ kɔzɩ lɛ, pɩpɩzaɣ se piyele nɛ Ɛsɔ tiyiyaa nɛ ɛyaa pataatasɩ-ɩ taʋ liu. Ɛlɛ Yehowa ñɔʋnɩ ɛ-maɣmaɣ ɛ-paɣtʋ kpam nɛ ɛɛmaɣ tɩ-yɔɔ kaaʋ. (Keɣa 118:142) Paa Aɖam nɛ Ɛva paawɛnɩ tɩ-yɔɔ wɛʋ lɩzʋʋ waɖɛ yɔ, pɩtɩwɩlɩ se pɩwɛɛ se pamaanɩ Yehowa paɣtʋ yɔɔ. Ɛzɩma pakaɖɩnɩ Yehowa yɔ, piyeba nɛ pasɩ nɛ papɩsɩ tɛtʋ ndʋ paakpaɣ nɛ pamanɩ-wɛ yɔ.​—Kiɖe 3:19. w17.02 1:8, 10, 11

Kpaɣnɩ alɩwaatʋ ndʋ Yesu paɣzɩ tɔm susuu yɔ, eyeba nɛ Ɛsɔtɔm ɖiyi-i. Halɩ kɛdɛzaɣ tɔm ndʋ ɛyɔɔdaa yɔ tɩ-taa, ɛya natʋ tɔm ndʋ paayɔɔdɩ Mesiya yɔɔ yɔ. (Mat. 27:46; Luka 23:46) Ɛɛwɛ ndɩ kpem nɛ ɛ-alɩwaatʋ taa Ɛsɔtɔm wɩlɩyaa, mbʋ pʋyɔɔ yɔ ye Ɛsɔtɔm ɛkaɖɩɣnɩ pɔ-sɔnzɩ yɔ, peyeki-tʋ nɛ hɔɔlʋʋ. Yesu labɩnɩ tʋmɩyɛ natʋ tɔm ndʋ nayʋ Izaayii kaama pɔ-yɔɔ yɔ nɛ eheyi-wɛ se: “Samaɣ kanɛ yɔ kasaŋɩ-m nɔɔ taa yem, piyele nɛ ka-laŋɩyɛ fɛyɩ mɔn-cɔlɔ kaaʋ. Peliziɣ-m kilizaɣ ŋga yɔ, kɛfɛyɩ wazaɣ nɛ pawɩlɩɣ ɛjaɖɛ yɔɔ ɛyaa tɔm yem.” (Mat. 15:7-9) Yesu yeba nɛ Ɛsɔtɔm ɖiyi ɛ-lakasɩ nɛ ɛ-tɔm wɩlʋʋ. Alɩwaatʋ ndʋ Ɛsɔ sɛtʋ ñʋndɩnaa kaɖaɣnɩ-ɩ yɔ, ɛtɩtaa ɛ-maɣmaɣ ɛ-lɔŋsɩnɖɛ yaa ɛ-lɛɣtʋ liu. Ɛlɛ ɛkpakaɣ Ɛsɔtɔm nɛ ɛlakɩnɩ tʋmɩyɛ.​—Mat. 22:33-40. w17.02 3:18, 19

Mbʋ ɖa Yehowa Aseɣɖe Tɩnaa ɖɩlakɩ. Ðɩhaɣ ñamtʋ ndʋ tɩmʋnaa yɔ, komina tʋmlaɖaa yaa ɖɩɖʋʋ-wɛ hɩɖɛ ɛzɩ pɩmʋnaʋ yɔ. Ðɩɩkaɖɩɣnɩ-wɛ alɩwaatʋ ndʋ palakɩ pa-tʋma yɔ. Ɛlɛ ɛzɩ Masɩ yɔɔdʋʋ yɔ, ɖɩsɩm ɖenɖe pɩwɛɛ se ɖɩɖʋ ñʋndɩnaa mba hɩɖɛ nɛ pɩsɩɩna yɔ. Ðɩɩmaɣnɩ Ɛsɔ paɣtʋ yɔɔ yaa ɖɩɩɖʋʋ ɖɔ-nɔsɩ politiki tɔm taa se ɖɩɖʋnɩ nɔɔyʋ hɩɖɛ. (1 Pɩy. 2:13-16) Caanaʋ taa Yehowa sɛyaa kɛnɩ-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. Alɩwaatʋ ndʋ Roma komina lone taa caɣyʋ kaaɖʋ paɣtʋ se paa weyi ewolo ɛ-tɛ nɛ pama ɛ-hɩɖɛ takayaɣ taa lɛ, Yosɛɛfʋ nɛ Maarɩɩ paañam paɣtʋ ndʋ. Paa Maarɩɩ kaawɩzɩ lʋlʋʋ yɔ, pɔɖɔm nʋmɔʋ nɛ powolo Bɛtɩlɛhɛm. (Luka 2:1-5) Pʋwayɩ alɩwaatʋ ndʋ paakpa Pɔɔlɩ ɖulum se ɛmanɩ paɣtʋ yɔɔ yɔ, ɛlʋbɩ ɛ-tɩ yɔɔ nɛ ñamtʋ wiyaʋ Eroodi Agriipa nɛ Fɛsɩtuusi weyi ɛɛkɛ Roma komina lona taa caɣyʋ Yudee yɔ pɛ-ɛsɩndaa nɛ ɛɖʋ-wɛ hɩɖɛ ɛzɩ pɩpɔzʋʋ yɔ.​—Tʋma 25:1-12; 26:1-3. w17.03 1:9, 10

Izrayɛɛlɩ piya kpaɣ Kanaŋ mba lakɩsɩ lɛ, sɩ-tɔm tɩtasɩ kɛdɩnʋʋ Yehowa nɛ eyele sɩ-yɔɔ kandɩyʋʋ. (Th. 2:1-3, 11-15; Keɣa 105:40-43) Pɩtʋʋ fɛyɩ se hɔŋ weyi ɩñaŋaɣ Yehowa alɩwaatʋ ndʋ tɩ-taa yɔ, pɩtaawɛɛ-ɩ kɛlɛʋ se ɩɖɔkɩ e-siɣsiɣ wɛtʋ. Ɛlɛ Bibl wɩlɩɣ se ɛyaa siɣsiɣ tɩnaa nabɛyɛ kaawɛ alɩwaatʋ ndʋ tɩ-taa nɛ palakɩ Yehowa sɔɔlɩm. Pa-taa nabɛyɛ yɔ Yeftee, Ɛlkaana, Hana nɛ Samɩyɛɛlɩ. (1 Sam. 1:20-28; 2:26) Ðɩwɛ ɛjaɖɛ nɖɩ ɖɩ-taa ɛyaa maɣzɩm nɛ pa-lakasɩ nɩɣzɩnɩ wɛtʋ ndʋ Kanaŋ mba kaawɛna yɔ. Pasaŋ kʋzʋʋ kɩdɛkɛdʋʋ nɛ puuyaɣ lakasɩ nɛ pañɩnɩɣ ñɩm kadadayaɣ. Ɛzɩ Yehowa kaapaɣʋ Izrayɛɛlɩ piya yɔ, mbʋ ɖɔɖɔ ɛpakɩ-ɖʋ sɔnɔ se ɖɩkpa ɖa-tɩ nɛ lakasɩ kɩdɛkɛdɩsɩ nzɩ, sɩtaawɛɛnɩ ɖoŋ ɖɔ-yɔɔ. Ðɩkaɣ yebu nɛ mbʋ pɩɩtalɩ Izrayɛɛlɩ piya yɔ, pɩkpɛlɩkɩ-ɖʋ lɔŋ na? (1 Kɔr. 10:6-10) Pɩwɛɛ se ɖɩñaɣ pana nɛ ɖɩlɔ ɛjaɖɛ ɖɩnɛ ɖɩ-lɩmaɣza kɩdɛkɛda tɩŋa. (Roma 12:2) Ðɩkaɣ ñaɣʋ pana siŋŋ se ɖɩla mbʋ? w16.04 1:4-6

Pʋcɔ nɛ ɖɩkpaɣ lɩmaɣza wena a-tɔm cɛyɩ siŋŋ yɔ lɛ, pɩkɛnɩ kɩjɛyʋʋ se ɖɩlabɩnɩ Bibl lɔŋ tasʋʋ tʋmɩyɛ nɛ ɖɩtɩmnɩ Yehowa se ɛwɩlɩ-ɖʋ nʋmɔʋ. Pɩtasɩ lɛ, ye lɩmaɣza wena ɖɩkpaɣ yɔ alabɩ nɔɔ kʋyʋmaɣ nɛ ɛ-sɔɔlɩm yɔ, ɛkaɣ-ɖʋ sɩnʋʋ nɛ piɖeni-ɖʋ. Pɩcɛyaa se ɖɩpɔzʋʋ ɖa-tɩ se: ‘Mbʋ mancaɣ labʋ yɔ, pɩwɩlɩɣ se toovenim lɛ mɔnsɔɔlɩ Yehowa? Pɩkaɣ kɔnʋʋ laŋhɛzɩyɛ nɛ taa leleŋ mɔ-hɔʋ taa? Nɛ pɩkaɣ wɩlʋʋ se mɛwɛnɩ suuɖu nɛ sɔɔlɩm na?’ Yehowa ɛɛkpaɣ-ɖʋ nɛ ɖoŋ se ɖɩsɔɔlɩ-ɩ nɛ ɖɩsɛɛ-ɩ. Ɛñaŋ tɩ-yɔɔ wɛʋ lɩzʋʋ waɖɛ nɖɩ ɛha-ɖʋ yɔ nɛ eyeki-ɖʋ se ɖa-maɣmaɣ ‘ɖɩlɩzɩ’ se ɖɩsɛɣ-ɩ yaa ɖɩɩsɛɣ-ɩ. (Yoz. 24:15; Ekl. 5:4) Ɛlɛ ɛsɔɔlaa se ɖɩɖɔ lɩmaɣza wena eɖiyi-ɖʋ nɛ ɖɩkpaɣ yɔ, a-yɔɔ. Ye ɖɩtaɣ Yehowa lɔŋ tasʋʋ liu nɛ ɖɩlakɩnɩ tʋmɩyɛ Bibl paɣtʋ kila wena ɛhaɣ-ɖʋ nɛ sɔɔlɩm yɔ, ɖɩpɩzɩɣ nɛ ɖɩkpaɣ lɩmaɣza kɩbana nɛ nabʋyʋ ɛɛkaɣ-ɖʋ ñamsʋʋ ɖa-nʋmɔʋ taa.​—Yak. 1:5-8; 4:8. w17.03 2:17, 18