Mai

Yeftee kaanawa se pɩpɔzʋʋ se Ɛsɔ ɛsɩnɩ-ɩ pʋcɔ nɛ ɛpɩzɩ ɛlɩzɩ Izrayɛɛlɩ piya Amooni mba nesi tɛɛ. Eeɖuuni Yehowa se ye ɛsɩnɩ-ɩ nɛ ɛwa you kɔyɔ, ɛpɩsɩɣ lɛ, ɛyʋ kajalaɣ tʋ weyi ɛlɩɣnɩ ɛ-ɖɩɣa taa nɛ ɛkatɩ-ɩ yɔ, ɛkpakɩɣ-ɩ nɛ ɛlaa Yehowa “kɩlaʋ” [yaa miŋ kɩñaɣzʋʋ kɩlaʋ.] (Th. 11:30, 31) Yeftee yɔɔdʋʋ se ɛkpakɩɣ-ɩ nɛ ɛlaa kɩlaʋ yɔ, pʋ-tɔbʋʋ lɛ suwe? Yehowa tɩsɔɔlɩ kpa se pakpaɣ ɛyʋ nɛ palaa kɩlaʋ. Ye mbʋ, Yeftee taañɩnɩɣ yɔɔdʋʋ se ɛkpakɩɣ ɛyʋ nɛ ɛlaa ɛzɩ palaɣʋ kpɩnɛ yɔ. (Wp. 18:9, 10) Moyizi Paɣtʋ taa lɛ, alɩwaatʋ ndʋ palakɩ miŋ kɩñaɣzʋʋ kɩlaʋ yɔ, pañaɣzɩɣ kpɩnɛ tɩŋa Yehowa. Ye mbʋ, Yeftee ñɩnaɣ yɔɔdʋʋ se ɛyʋ kajalaɣ tʋ weyi ɛlɩɣ nɛ ɛkatɩ-ɩ yɔ, ɛkpakɩɣ-ɩ nɛ ɛha Ɛsɔ nɛ ɛla ɛ-tʋmɩyɛ kediɣzaɣ kizinziku tɛɛ e-wezuu kpeekpe. Yehowa tisaa nɛ ɛsɩnɩ Yeftee nɛ ɛwa Amooni mba nɛ eluzi-wɛ Izrayɛɛlɩ piya tɛɛ. (Th. 11:32) Yeftee lɩnɩ you nɛ ɛpɩsɩɣ lɛ, ɛ-pɛlɛ kʋɖʋm weyi ɛɛwɛna yɔ, ɛnʋ lɩna nɛ ɛkatɩ-ɩ. Lɛɛlɛɛyɔ pɩtalɩ kaɖɛ ɖeɖe lɛ. Ɛkaɣ ɖɔm e-ɖuutu yɔɔ? w16.04 1:11-13

Alɩwaatʋ ndʋ ɖɩkpɛlɩkaɣ Ɩɖɔkɩ Mɩ-tɩ Kpam Ɛsɔ Sɔɔlɩm Taa takayaɣ ɛgbɛyɛ taa yɔ, pɩtʋʋ fɛyɩ se Yehowa wɛtʋ kɩbandʋ nɛ ɛzɩma koobiya cosaɣ tɔm yɔɔ yɔ, piyeba nɛ ɖɩsɔɔlɩ ɖa-Caa weyi ɛwɛ ɛsɔdaa yɔ nɛ pɩkɩlɩ. Pɩtʋʋ fɛyɩ ɖɔɖɔ se samaɣ taa tɔm yɔɔdʋʋ, la ŋwɩlɩwaa nɛ Bibl kalʋʋ sɩnɩ-ɖʋ nɛ ɖɩtɩlɩ Bibl taa tɔm nɛ pɩkɩlɩ. Kediɣzisi sɩɣnɩ-ɖʋ se ɖɩkpaɣ Bibl paɣtʋ kila nɛ ɖɩlabɩnɩ tʋmɩyɛ ɖe-wezuu caɣʋ hɔɔlɩŋ tɩŋa taa. (1 Tes. 4:9, 10) Feŋuu Tilimiye kpɛlɩkʋʋ sɩɣnɩ Ɛsɔ samaɣ se kɔcɔnɩ ke-fezuu taa kɩcɛyɩm ɖeɖe. Pʋtɔma yɔ, Feŋuu Tilimiye kpɛlɩkʋʋ nabʋyʋ tɛmɩ-ŋ sɩnʋʋ nɛ ŋɖʋ ña-tɩ kaɖʋsɩ kɩfasɩ, ŋkpeɣ koobu nɔɔyʋ, yaa ŋñɔɔzɩ ɛzɩma ŋlakɩ adɩma yɔ. Kpɩtaʋ hɛkʋ taa kediɣzaɣ sɩɣnɩ-ɖʋ tɔm susuu nʋmɔʋ taa. Kasɩɣnɩ-ɖʋ se ɖɩwɛɛ niye laŋhɛzɩyɛ tɔm susuu taa nɛ ɖɩkpɛlɩkɩnɩ ɛyaa Bibl camɩyɛ.​—Mat. 28:19, 20. w16.04 3:4, 5

Wiɖiyi ŋtɛm maɣzʋʋ ɛyaa mba Bibl yɔɔdɩ pɔ-tɔm se piyozi-wɛ yɔ pɔ-yɔɔ nɛ ŋna? Yele nɛ ɖɩna pa-taa nabɛyɛ tɔm Kiɖe Tɛɛ Tɔm takayaɣ taa. Kayɩnɩ kʋ Aabɛɛlɩ. (Kiɖe 4:3-8) Laamɛɛkɩ kʋ abalɩbɩɣa nakɛyɛ mbʋ pʋyɔɔ yɔ kaɖʋ-ɩ heŋ. (Kiɖe 4:23) Abraham ninɖiɣyaa nɛ Looti ninɖiɣyaa poyowa. (Kiɖe 13:5-7) Hagaarɩ nim Saara, nɛ pʋyɔɔ lɛ Saara taa wɩɩnɩ Abraham. (Kiɖe 16:3-6) Ismayɛɛlɩ kʋyɩ ɛyaa kpeekpe yɔɔ nɛ mbʋ ɖɔɖɔ ɛyaa kpeekpe kʋyɩ Ismayɛɛlɩ yɔɔ. (Kiɖe 16:12) Ɛbɛ yɔɔ Bibl yɔɔdʋʋ yoŋ weyi ɩɩlabɩ ɛyaa mba pɛ-hɛkʋ taa yɔ ɩ-tɔm? Mbʋ pʋyɔɔ yɔ, kajalaɣ lɛ, pɩsɩɣnɩ ɖa ɛyaa mantɩtalɩ pilimwaa se ɖɩna mbʋ pʋyɔɔ pɩcɛyaa se ɖiyele nɛ laŋhɛzɩyɛ wɛɛ ɖɛ-hɛkʋ taa yɔ. Nabʋlɛ lɛ, pɩsɩɣnɩ-ɖʋ se ɖɩna ɛzɩma ɖɩla nɛ laŋhɛzɩyɛ wɛɛ ɖɛ-hɛkʋ taa yɔ. Alɩwaatʋ ndʋ ɖɩkalɩɣ ɛyaa mba pɔ-tɔm Bibl taa yɔ, pɩwazɩɣ-ɖʋ siŋŋ mbʋ pʋyɔɔ yɔ, pɩsɩɣnɩ-ɖʋ se ɖɩmaɣzɩnɩ mba paha kɩɖaʋ kɩbaŋʋ yɔ nɛ ɖɩtaatɔlɩ mba paha kɩɖaʋ kɩdɛkɛdʋʋ yɔ pa-kpaca taa. Ye ɖɩlakɩ mbʋ yɔ, pɩkaɣ-ɖʋ sɩnʋʋ nɛ ɖɩna ɛzɩma ɖɩla nɛ laŋhɛzɩyɛ wɛɛ ɖa nɛ lalaa ɖɛ-hɛkʋ taa yɔ. w16.05 1:1, 2

Nʋmɔŋ weyi yɔɔ Yesu nɛ ɛ-wayɩ tɩŋɩyaa paatɩŋnaa nɛ posusi laŋhɛzɩyɛ tɔm? Powokaɣ lona wena a-taa papɩzɩɣ nɛ pana ɛyaa yɔ ɛzɩ habɛɛ yɔɔ yaa kɩyakɩŋ taa mbʋ yɔ. Powokaɣ ɖɔɖɔ kpaɣ ɖɩɣa nɛ ŋwolo ɖɩɣa se pañɩnɩ mba laŋhɛzɩyɛ tɔm kɛdɩnɩ-wɛ yɔ. (Mat. 10:11; Luka 8:1; Tʋma 5:42; 20:20) Kpaɣ ɖɩɣa nɛ ŋwolo ɖɩɣa tɔm susuu haɣaɣ-wɛ waɖɛ se posusi ɛyaa tɩŋa tɔm. Ɛzɩma Yehowa Aseɣɖe Tɩnaa ñeɖiɣni labʋ tʋmɩyɛ nɖɩ? Pe-ɖeke posusuuna se Yesu pɩsɩ Wiyaʋ nɛ ɛpaɣzɩ kewiyitu tɔɔʋ pɩnaɣ 1914 taa. Pɔɖɔŋ Yesu paɣtʋ yɔɔ nɛ pasɩɣ tɔm susuu tʋmɩyɛ kajalaɣ ɖeɖe pe-wezuu caɣʋ taa. Takayaɣ nakɛyɛ (Pillars of Faith—American Congregations and Their Partners) yʋsaa se: Yehowa Aseɣɖe Tɩnaa . ɩɩsɔʋ kpa se pa-kaɖʋwa kajalaɣ ñɩŋga lɛ se posusi ɛjaɖɛ ɖɩnɛ ɖɩ-tɛm tɔm nɛ pawɩlɩ ɛyaa mbʋ pala nɛ pehiɣ ñʋʋ yabʋ yɔ. Yehowa Aseɣɖe Tɩnaa ɖiɣni tɔm ndʋ susuu, nɛ pɛwɛɛ patɩŋɩɣnɩ nʋmɔŋ weyi ɩ-yɔɔ Yesu nɛ ɛ-wayɩ tɩŋɩyaa paatɩŋnaa yɔ ɩ-yɔɔ. w16.05 2:10, 12

Ye ɖɩkpakɩɣ lɩmaɣza wena alakɩ nɔɔ kʋyʋmaɣ nɛ Yehowa ñɩna yɔ, piyeki nɛ ɖɩñɔtɩnɩ-ɩ nɛ pɩkɩlɩ. (Yak. 4:8) Ðɔ-tɔm kɛdɩɣnɩ-ɩ nɛ ɛwazɩ-ɖʋ. Piyeki ɖɔɖɔ nɛ ɖe-tisuu kpa ɖoŋ. Ye mbʋ, ɖiyele nɛ Bibl paɣtʋ nɛ kɩ-paɣtʋ kila ɖiyi-ɖʋ, mbʋ pʋyɔɔ yɔ piyeki se ɖɩtɩlɩ Ɛsɔ lɩmaɣza hɔɔlɩŋ ndɩ ndɩ taa. Toovenim taa lɛ, ɖɩɩpɩzɩɣ nɛ ɖɩkpɛlɩkɩ Yehowa yɔɔ tɔm nɛ pɩtɛ. (Yɔɔb 26:14) Ɛlɛ, ye ɖɩñaɣ pana nɛ ɖɩkpɛlɩkɩ nɛ ɖɩtɩlɩ Yehowa yɔ, ɖɩpɩzɩɣ nɛ ɖɩwɛɛnɩ lɔŋsɩnɖɛ, sɩmtʋ nɛ lɛɣtʋ ndʋ tɩsɩɣnɩ-ɖʋ se ɖɩkpaɣ lɩmaɣza kɩbana yɔ. (Adu. 2:1-5) Ɛyaa ɖʋtʋ nɛ pa-lɩmaɣza kɔŋ nɛ pɩɖɛɣ, ɛlɛ keɣa maɖʋ tɔzɩ-ɖʋ toovenim tɔm tʋnɛ: “Mbʋ [Yehowa] ɖʋʋ yɔ, pɩwɛɣ tam; nɛ ɛ-laŋɩyɛ taa lɩmaɣza wɛɣ waasɩ nɛ waasɩ.” (Keɣa 32:11) Pɩnaɣ kpayɩ kpayɩ se ye ɖa-lɩmaɣza nɛ ɖa-lakasɩ ɩlakɩ nɔɔ kʋyʋmaɣ nɛ Yehowa ñɩna yɔ, pɩsɩɣnɩ-ɖʋ nɛ ɖɩkpaɣ lɩmaɣza kɩbana. w16.05 3:17

Ye ɖɩsɩm se Yehowa wɛnɩ ɖoŋ se ɛtakɩ ɛyaa laŋa nɛ ɛhɔm-wɛ nɛ ɛkɔnɩ ɛ-cɔlɔ yɔ, pɩsɩɣnɩ-ɖʋ nɛ ɖɩtahʋʋnɩ ɖo-koobiya nɛ mba ɖɩkatɩɣ ɖo-kookasɩ taa yɔ tɔm. (Yoh. 6:44) Ye ɖitisaa se Yehowa ɛkɛ ɖa-Mayʋ yɔ, pɩwɛɣnɩ ɖoŋ ɛzɩma ɖɩnaɣ ɖo-koobiya yɔ pɩ-yɔɔ. (Iza. 64:7) Ɛzɩ Ɛsɔ yɔ, ŋnaɣ ño-koobiya ɛzɩ ɛyaa mba Yehowa wɛɛ nɛ ɛñɔɔzʋʋ-wɛ pazɩ pazɩ yɔ? Ɛpɩzɩɣ nɛ ɛna ɛyʋ laŋɩyɛ taa nɛ ɛsɩm mbʋ ɛyʋ weyi ɛñɔɔzʋʋ-ɩ yɔ, ɛpɩzɩɣ nɛ ɛpɩsɩ yɔ. Pʋyɔɔ lɛ, Yehowa wɛnɩ lɩmaɣza kɩbana ɛyaa yɔɔ nɛ ɛɛkaŋ ɛ-lɩmaɣza pɛ-ɛjandʋ yɔɔ. (Keɣa 129:3) Ye ɖɩwɛnɩ lɩmaɣza kɩbana ɖo-koobiya yɔɔ kɔyɔ, ɖɩwɩlɩɣ se ɖɩmaɣzɩɣnɩ-ɩ. Ye ɖɩsɩɣnɩ ɖo-koobiya alɩwaatʋ ndʋ pañakɩ pana se powobini ɛsɩndaa fezuu taa kɔyɔ, ɖɩwɩlɩɣ se ɖa nɛ ɖa-Mayʋ ɖɩkpɛndɩɣ nɛ ɖɩlakɩ tʋmɩyɛ. (1 Tes. 5:14, 15) Pɩwɛɛ se ɛgbɛyɛ taa ɛzʋtʋyaa mba pɛkɛ “ɛyaa kʋjɔŋ” yɔ, paha kɩɖaʋ kɩbaŋʋ hɔɔlʋʋ ŋgʋ kɩ-taa.​—Efɛz. 4:8, 11-13. w16.06 1:4-6

Alɩwaatʋ ndʋ ɖisusuu ɛyaa lalaa laŋhɛzɩyɛ tɔm yɔ, pɩsɩɣnɩ-ɖʋ se ɖɩwɛɛnɩ tɩ luzuu nɛ fezuu lakasɩ ndɩ ndɩ. (Gal. 5:22, 23) Ye ɖɩmaɣzɩɣnɩ Krɩstʋ wɛtʋ yɔ, piyeki nɛ ɛyaa sɔɔlɩ tɔm ndʋ ɖisusuu yɔ nɛ pɛwɛɛnɩ lɩmaɣza kɩbana ɖɔ-yɔɔ. Kɩɖaʋ nakʋyʋ yɔ. Ositralii ɛjaɖɛ taa, halʋ nɔɔyʋ kaañasɩ tɔm koobiya nabɛyɛ naalɛ, mba powobi ɛ-tɛ se posusi-i tɔm yɔ; ɛlɛ paba kpaɣ alɩwaatʋ nɛ pewelisini-i camɩyɛ. Pʋwayɩ lɛ, halʋ ɛnʋ ekpiɖi ɛ-lakasɩ yɔɔ nɛ ɛma ɛgbɛyɛ piliŋa takayaɣ nɛ etendi se pakpaɣ mbʋ ɛlaba yɔ nɛ pekpeɣ-i. Ɛyɔɔdaa se: “Malabɩ kɩmɛlɛndʋ se mɔnɖɔɔnɩ Ɛsɔtɔm susuyaa naalɛ.” Tɔm tʋnɛ, tɩwɩlɩɣ se ye ɖɩwɛnɩ hɛɛɛ wɛtʋ tɔm susuu taa kɔyɔ, pɩwazɩɣ siŋŋ. Pɩwɩlɩɣ kpayɩ kpayɩ se ɖɔ-tɔm susuu sɩɣnɩ ɛyaa lalaa, nɛ pɩtɛ pɩsɩnɩ ɖa-maɣmaɣ se ɖɩwɛɛnɩ wɛtʋ kɩbandʋ nɛ pɩkɩlɩ. w16.06 2:12, 13

Ða-tɩŋa ɖɩkɛ ɛyaa mantɩtalɩ pilimwaa. (Roma 5:12, 19) Pʋyɔɔ lɛ, nabʋyʋ taa nabɛyɛ pɩzɩɣ nɛ pɔyɔɔdɩ tɔm natʋyʋ yaa pala nabʋyʋ ɛgbɛyɛ taa nɛ pɩɖʋ-ɖʋ ɖɩwɩzɩyɛ. Pɩpɩzɩɣ nɛ pɩtakɩ sɔɔlɩm mbʋ ɖɩwɛnɩ Yehowa nɛ ɛ-samaɣ pɔ-yɔɔ yɔ. Ye pɩlabɩ mbʋ, ɛbɛ pɩwɛɛ se ɖɩla? Cɔjɔ Sɔsɔ Elii kaawɛnɩ pɩyalaa naalɛ nɛ pataaɖɔŋ Yehowa paɣtʋ yɔɔ. Bibl tɔŋ se: “Piyele nɛ Elii pɩyalaa ñɛkɛ Beliyaalɩ pɩyalaa mba paasɩŋ [Yehowa yɔ.]” (1 Sam. 2:12) Elii kaaɖʋ nesi siŋŋ nɛ toovenim Ɛsɔ sɛtʋ ɖɛɛnɩ ɛsɩndaa. Paa mbʋ yɔ, ɛ-pɩyalaa kaalabɩ kɩwɛɛkɩm sɔsɔm. Elii kaana mbʋ, nɛ pɩɩwɛɛ se ɛhɔ pa-nɩŋgbaaŋ, ɛlɛ ɛla kaakendu. Piyeba nɛ Ɛsɔ hɔ ɛ nɛ ɛ-ɖɩɣa pa-nɩŋgbaaŋ. (1 Sam. 3:10-14) Pɩkɔm pɛɖɛɛnɩ ɛsɩndaa lɛ, Yehowa tɩtasɩ haʋ Elii liɖe taa mba waɖɛ se pɛkɛ cɔjɔnaa sɔsaa. Ye ŋŋwɛ Elii alɩwaatʋ taa nɛ ŋna ɛzɩma ɛ-pɩyalaa labɩ kɩwɛɛkɩm sɔsɔm ɛlɛ ɛtɩhɔ pa-nɩŋgbaaŋ yɔ, ɛzɩma ŋŋlaba? Ŋŋyeba nɛ pɩcamɩ ñe-tisuu nɛ ŋyele Yehowa sɛʋ na? w16.06 4:5, 6

Ɛbɛ yɔɔ Yesu yɔɔdɩ tɔm ndʋ tɩwɛ sɔnɔ evemiye mayaɣ taa yɔ? Pʋcɔ nɛ ɛyɔɔdɩ tɔm ndʋ lɛ, ɛɛlɩzɩ pɩ-taa kalɩtʋ 32 taa se: “Mɩ-Caa sɩm mbʋ se ɩwɛnɩ pɩtɩŋa mbʋ yɔ kɛdɛɖaɣ,” pʋ-tɔbʋʋ lɛ se mbʋ pɩcɛyɩɣ-ɖʋ ɖe-wezuu caɣʋ taa yɔ. Yehowa sɩm mbʋ pɩkɛ ɖa-kɩcɛyɩm yɔ pʋcɔ nɛ ɖa-maɣmaɣ ɖɩnaɣ se pɩwɛ-ɖʋ kɛdɛɖaɣ. (Fil. 4:19) Ɛsɩm ɖo-wondu ndʋ tɩkaɣ cadʋʋ nɛ ɛsɩndaa yɔ. Ɛsɩm tɔɔnaɣ nɛ ɖɩɣa ŋga pɩpɔzʋʋ se ɖa nɛ ɖɔ-hɔʋ ɖɩwɛɛna yɔ. Yehowa kaɣ-ɖʋ sɩnʋʋ nɛ ɖɩwɛɛnɩ mbʋ ɖeyi ɖeyi pɩpɔzʋʋ-ɖʋ yɔ Toovenim, ɖɩpɩzɩɣ nɛ ɖɩtaa liu se ye ɖɩlakɩ mbʋ Ɛsɔ pɔzʋʋ-ɖʋ se ɖɩla yɔ, pʋ-tɔbʋʋ se ye ɖɩsɩɣ fezuu taa wondu kajalaɣ ɖeɖe ɖe-wezuu caɣʋ taa yɔ, Yehowa eekiziɣ-ɖʋ haʋ mbʋ pɩwɛ ɖeu yɔ. Ye ɖɩtaɣ Ɛsɔ liu yɔ, piyeki nɛ ɖe-liu sɩbɩnɩ “kʋtɔɔm nɛ kususum” mbʋ ɖɩwɛna yɔ.​—1 Tim. 6:6-8. w16.07 1:17, 18

Ceyuu mbʋ piyeba nɛ laŋhɛzɩyɛ wɛɛ ɖa nɛ Yehowa ɖɛ-hɛkʋ taa. Pɔɔlɩ yɔɔdaa se pɩkɛnɩ Ɛsɔ lootiye. Pʋyɔɔ eheyi e-koobiya patam numwaa lalaa se: “Tisuu yɔɔ lɛ, Ɛsɔ pɩsɩ-ɖʋ kiɖeɖema; mbʋ lɛ leleŋ wɛ ɖa nɛ Ɛsɔ ɖɛ-hɛkʋ taa, ɖa-Kɩbaɣlʋ Yesu Krɩstʋ yɔɔ, weyi ɖe-tisuu ɛ-yɔɔ laba se ɖihiɣ kʋjɔʋ ŋgʋ ɖɩwɛ kɩ-taa yɔ.” (Roma 5:1, 2) Pɩkɛnɩ wazaɣ sɔsɔɔ kpem. Palʋlɩ-ɖʋ lɛ, ɖa-taa nɔɔyʋ taawɛɛ siɣsiɣ. Ɛlɛ nayʋ Danɩyɛɛlɩ yɔɔdaa se kɛdɛzaɣ kɩyakɩŋ taa, “mba pawɩlɩ-wɛ nɛ pasɩma yɔ,” pʋ-tɔbʋʋ se patam numwaa mba pɛwɛnɩ lɔŋsɩnɖɛ yɔ, pakaɣ wɩlʋʋ ɛyaa “sakɩyɛ siɣsiɣ nʋmɔʋ.” (Dan. 12:3) Ɛzɩma tɩyɛ palabɩ mbʋ? Patɩŋnɩ pɔ-tɔm susuu nɛ pɔ-tɔm wɩlʋʋ yɔɔ nɛ pasɩnɩ “heŋ lɛɛŋ” miiliyɔɔwaa sakɩyɛ se pɛwɛɛ siɣsiɣ Ɛsɔ ɛsɩndaa. (Yoh. 10:16, ABT) Ɛlɛ Ɛsɔ lootiye yebina se pehiɣ waɖɛ nɖɩ.​—Roma 3:23, 24. w16.07 3:10, 11

Ɛsɔ taaɖʋ se tiyiyaa ɩpɩsɩ ɛyaa nɛ pakpaɣ halaa; piyeba nɛ payaa piya nzɩ palʋlaa yɔ se ɖogowaa. Sɩɩwɛ kañatʋ pɩdɩɩfɛyɩ. Pɩtasɩ lɛ, “ɛyʋ kañatʋ paɣlɩ tataa nɛ ɛ-laŋɩyɛ maɣzɩɣ lɩmaɣza kɩdɛkɛda yeke, evemiye kpeekpe taa.” (Kiɖe 6:1-5) Yehowa yeba nɛ tɛʋ sɔsɔʋ nakʋyʋ nɩɩ Noowa alɩwaatʋ taa nɛ kiɖezi kañatʋ tɩnaa tɛtʋ yɔɔ. Alɩwaatʋ ndʋ tɩ-taa, ɛyaa ɛsa kaasɛnɩ pa-tʋma ɛzɩ nesi ɖɔkʋʋ mbʋ yɔ. Piyeba nɛ patɩkpaɣ tɔm ndʋ “siɣsiɣ tɔm susuyu” Noowa yɔɔdɩ Tɛʋ Sɔsɔʋ yɔɔ yɔ nɛ palabɩnɩ tʋmɩyɛ. (2 Pɩy. 2:5) Yesu kpaɣ mbʋ pɩɩlabɩ Noowa alɩwaatʋ taa yɔ nɛ ɛmaɣzɩnɩ mbʋ pɩlakɩ ɖa-alɩwaatʋ taa yɔ. (Mat. 24:37-39) Sɔnɔ, ɛyaa sakɩyɛ tɩsɔɔlɩ welisuu Kewiyaɣ laŋhɛzɩyɛ tɔm ndʋ Yehowa Aseɣɖe Tɩnaa wɛɛ nɛ posusuu ɛjaɖɛ kpeekpe yɔɔ se pʋcɔ nɛ ɛjaɖɛ tɛm talɩ yɔ. Ye mbʋ, mbʋ pɩlabɩ Noowa alɩwaatʋ taa yɔ, pɩkpɛlɩkɩɣ-ɖʋ se ɖɩkpa ɖa-tɩ nɛ ɖitaayele nɛ nesi ɖɔkʋʋ nɛ piya wɛnʋʋ pala nɛ ɖɩsɔɔ se Yehowa kɩyakʋ ñɔtɩ kpam. w16.08 1:8, 9

Ðɩwɛ kɛdɛzaɣ kɩyakɩŋ taa nɛ pʋyɔɔ lɛ, ɖɩkatɩɣ alɩwaatʋ kaɖɛ ñɩndʋ. (2 Tim. 3:1-5) Ɛlɛ ye taabalɩyɛ kɩbanɖɛ ɛwɛ ɖa nɛ Yehowa ɖɛ-hɛkʋ taa yɔ, pɩsɩɣnɩ-ɖʋ nɛ ɖɩlʋbɩnɩ ɛjaɖɛ ɖɩnɛ ɖɩ-yɔɔ lakasɩ kɩdɛkɛdɩsɩ. Pɔɔlɩ taañɩnɩɣ heyuu mba pɔɖɔkɩ nesi yɔ se pala kaakendu tʋma wena pɩpɔzʋʋ se pala hɔʋ taa yɔ a-yɔɔ. Ɛlɛ ɛzɩma alɩwaatʋ kazaa nɛ tɩtɩɖɔɔ yɔ pʋyɔɔ lɛ, pɩwɛɛ se pasɩɩ fezuu taa tʋma kajalaɣ ɖeɖe. (Mat. 6:33) Paa ɖɩwɛ alɩwaatʋ kaɖɛ ñɩndʋ taa nɛ hɔŋ sakɩyɛ wɛɛ nɛ ɩyɔkʋʋ yɔ, ɖɩpɩzɩɣ ɖiyele nɛ koboyaɣ wɛɛ ɖe-nesi ɖɔkʋʋ taa. Toovenim taa lɛ, ye Krɩstʋ ñɩma mba pɔɖɔkɩ nesi yɔ, pɔñɔnɩ Yehowa nɛ ɛ-samaɣ, pakpaɣ Bibl lɔŋ tasʋʋ nɛ palabɩnɩ tʋmɩyɛ nɛ petisi se fezuu kiɖeɖeu eɖiyi-wɛ yɔ, papɩzɩɣ nɛ pakandɩyɩ pe-nesi ɖɔkʋʋ yɔɔ.​—Mark. 10:9. w16.08 2:17, 18

Pɩpɔzʋʋ ninɖiɣyaa sakɩyɛ ɛgbɛyɛ taa, nɛ pɩcɛyaa ɖɔɖɔ se pafalɩsɩ koobiya mba pakaɣ labʋ tʋmɩyɛ nɖɩ cee wayɩ yɔ. Pɔɔlɩ heyi Timootee se: “Ndʋ ŋnɩ mɔn-cɔlɔ aseɣɖe tɩnaa sakɩyɛ ɛsɩndaa yɔ, wɩlɩ-tʋ ɛyaa siɣsiɣ tɩnaa, mba paapɩzɩ nɛ pawɩlɩ-tʋ lalaa yɔ.” (2 Tim. 2:1, 2) Timootee nɛ Pɔɔlɩ weyi ɛɛkɛ apostoloo nɛ ɛgbɛyɛ taa ɛzʋtʋyʋ yɔ, palabɩ tʋmɩyɛ alɩwaatʋ sakɩyɛ nɛ pɩsɩnɩ Timootee nɛ ɛkpɛlɩkɩ lɔŋ sakɩyɛ ɛ-cɔlɔ. Pʋwayɩ lɛ, Timootee maɣzɩnɩ Pɔɔlɩ ɛ-tɔm susuu nɛ ɛ-Ɛsɔ sɛtʋ hɔɔlɩŋ lɛɛŋ taa. (2 Tim. 3:10-12) Pɔɔlɩ kaakpaɣ alɩwaatʋ sakɩyɛ nɛ ɛ nɛ Timootee pala tʋmɩyɛ mbʋ pʋyɔɔ yɔ, ɛñɩnaɣ se ɛfalɩsɩ-ɩ camɩyɛ. (Tʋma 16:1-5) Ɛzʋtʋyaa pɩzɩɣ nɛ pamaɣzɩnɩ Pɔɔlɩ. Ye pɩsaŋ kɔyɔ, alɩwaatʋ ndʋ pekilimiɣ koobiya yɔɔ yɔ, papɩzɩɣ nɛ pɛkpɛndɩnɩ ɛgbɛyɛ taa tʋmlaɖaa mba pɛwɛ niye yɔ. Ye palakɩ mbʋ yɔ, pɩsɩɣnɩ ɛgbɛyɛ taa tʋmlaɖaa mba nɛ pɛkpɛlɩkɩ ɛzɩma pawɩlɩ tɔm, pɛwɛɛ suuɖu, pɔsɔɔlɩ lalaa, nɛ ɛzɩma pataa Yehowa liu alɩwaatʋ ndʋ pɔcɔŋnɩ “Ɛsɔ wondu” yɔɔ yɔ. w16.08 4:16, 17

Ye pɔtɔm se pɩyɔbɩ nɔɔyʋ nesi yɔ, nabʋyʋ taa lɛ, pɩwɩlɩɣ se pitibi-i yɔɔɔ yaa ɛwɛ laŋwɛɛkɩyɛ taa yaa elesi lidaʋ. (4 Aw. 15:7; Ebr. 12:12) Nɛ ye nɔɔyʋ ɛwɛ wɛtʋ ndʋ tɩ-taa yɔ, ɖoŋ ɖoŋ lɛ ɛmaɣzɩɣ se ɛtɛzɩɣ lɔʋ nɛ ese. Pɩlabɩ pʋtɔdɩyɛ se Sataŋ ɛjaɖɛ ɖɩnɛ ɖɩ-taa, wɛtʋ ndɩ ndɩ haɣ-ɖʋ nɩɣzɛ nɛ tiyeki nɛ pitiki-ɖʋ yɔɔɔ. Nɩɣzɛ wɛ ɛzɩ paɖɩʋ kpɩnɛ naɖɩyɛ nimiye se ɖɩtaapɩzɩ nɛ ɖiwolo ɖoli yɔ. (Adu. 12:25) Ɛbɛ pɩzɩɣ nɛ pɩha-ŋ nɩɣzɛ? Pʋtɔma yɔ, ñɛ-ɛyʋ kʋsɔɔlʋ nɔɔyʋ sɩba nɛ ŋwɛɛ nɛ ŋwiɣ-i, yaa ŋwɛɛ nɛ ŋlʋkɩnɩ kʋdɔŋ sɔsɔʋ nakʋyʋ. Pɩtɩla yɔ, ŋlakɩ liidiye kʋñɔŋ nɛ pʋyɔɔ lɛ pɩlakɩ-ŋ kaɖɛ se ŋcɔnɩ ñɔ-hɔʋ yɔɔ; yaa pɩtɩla ɖɔɖɔ yɔ ŋwɛɛ nɛ ŋkatɩɣ nazɩm nabʋyʋ. Alɩwaatʋ wɛɣ nɛ tɩɖɛɣ lɛ wɛtʋ ndʋ, tɩpɩzɩɣ tiyele nɛ pitibi-ŋ yɔɔɔ. Tɩpɩzɩɣ tiyele ɖɔɖɔ nɛ ŋlesi taa leleŋ weyi ŋŋwɛna yɔ. Ɛlɛ ŋpɩzɩɣ nɛ ŋwɛɛnɩ lidaʋ se Ɛsɔ kaɣ-ŋ sɩnʋʋ.​—Iza. 41:10, 13. w16.09 1:2, 4

Ɛyaa sakɩyɛ lʋkɩ se pawa pɛ-ɛjandʋ natʋyʋ. Lalaa ñakɩ pana se pɛwɛɛnɩ lɩmaɣza kɩbana tɔm susuu tʋmɩyɛ yɔɔ. Lalaa ɖɔɖɔ lɛ, palʋkɩnɩ kʋdɔŋ nakʋyʋ yaa ɛzɩma pɛwɛ pe-ɖeke yɔ. Nɛ nabɛyɛ lɛ, pʋtɔma yɔ, pɛwɛɛ nɛ pañakɩ pana se pakpaɣ nɛ pekpeɣ mba paɖʋ-wɛ ɖɩwɩzɩyɛ yaa palabɩ-wɛ kɩdɛkɛdɩm nabʋyʋ yɔ. Paa pɩtɩɩkɛ pɩnzɩ ɛzɩma ɖɩwɛɛ nɛ ɖɩsɛɣ Yehowa yɔ, pɩwɛɛ se ɖa-tɩŋa payɩ ɖiwolo pɩ-yɔɔ nɛ ɖɩlʋbɩnɩ mbʋ pɩpɩzɩɣ piyele nɛ pɩwɛɛ-ɖʋ kaɖɛ se ɖiwolo pɩ-yɔɔ nɛ ɖɩsɛɛ Ɛsɔ weyi ɛwazɩɣ mba pɛwɛ siɣsiɣ yɔ. Ye ŋɖiɣzinaa se ŋwɛnɩ lɩmaɣza kɩdɛkɛda naayɛ yɔ, tɩmnɩ Ɛsɔ nɛ ŋpɔzɩ-ɩ e-fezuu kiɖeɖeu. Adɩma nɛ fezuu kiɖeɖeu papɩzɩɣ pasɩnɩ-ŋ nɛ ŋhiɣ ɖoŋ nɛ ŋla mbʋ pɩwɛ ɖeu yɔ nɛ piyele nɛ Yehowa wazɩ-ŋ. Ñaɣ pana nɛ ŋcaɣ wezuu ŋgʋ kɩlakɩ nɔɔ kʋɖʋmaɣ nɛ ña-adɩma yɔ. Kalɩɣ Bibl paa ɖooye, nɛ ŋla ɖʋtʋ nɛ ŋlakɩ tɩ-yɔɔ kpɛlɩkʋʋ nɛ hɔʋ taa kpɛlɩkʋʋ ɖoŋ ɖoŋ.​—Keɣa 118:32. w16.09 2:10, 11

Pʋtɔma yɔ, wiɖiyi nabɛyɛ heyi-ŋ se petisiɣ évolution wɩlɩtʋ yɔɔ, mbʋ pʋyɔɔ yɔ papɩzɩɣ nɛ patɩŋnɩ lɛɣtʋ ñɩnʋʋ yɔɔ nɛ pawɩlɩ se tɩkɛ toovenim. Nɛ paatisiɣ Ɛsɔ yɔɔ, mbʋ pʋyɔɔ yɔ paanaɣ-ɩ. Ɛyaa sakɩyɛ wɛnɩ lɩmaɣza ana. Ɛlɛ pɩtɩmʋna se ɖɩsɔɔ tɔm tʋnɛ tɩ-yɔɔ: Paa ɛyʋ ɛtɩnɩɣ évolution wɩlɩtʋ yɔɔ yaa ɛmaɣzɩɣ se Ɛsɔ wɛɛ yɔ, etisiɣ mbʋ ɛɛnaɣ-pʋ yɔ pɩ-yɔɔ. Ɛzɩma tɩyɛ? Ða-taa nɔɔyʋ tɩna Ɛsɔ wiɖiyi nɛ ɛna nɛ ɛtɩna ɖɔɖɔ ɛzɩma ɛlɩzaɣ wondu yɔ. (Yoh. 1:18) Mbʋ ɖɔɖɔ, ɖa yaa mba petisiɣ évolution wɩlɩtʋ yɔɔ yɔ, pa-taa nɔɔyʋ tɩnatɩ wiɖiyi kpɩnɛ naɖɩyɛ lɛɣzaa nɛ ɖɩpɩsɩ lɛɛɖɛ. Wiɖiyi nɔɔyʋ tɩna ɖʋm lɛɣzaa nɛ ɛpɩsɩ heu. (Yɔɔb 38:1, 4) Ye mbʋ, pɩmʋnaa se ɖa-taa paa anɩ lɛ, ɛlabɩnɩ ɛ-maɣzɩm tʋmɩyɛ camɩyɛ nɛ ɛñɩnɩ nɛ ɛna se mbʋ pɩ-yɔɔ etisiɣ yɔ, pɩkɛ toovenim yaa pɩtɩkɛ. Apostoloo Pɔɔlɩ yɔɔdaɣ mbʋ pɩwɛ kedeŋa yɔɔ yɔ pɩ-tɔm lɛ, ɛmawa se: “Mbʋ [Ɛsɔ] wɛna nɛ paanaɣ-pʋ yɔ, ɖooo ɛjaɖɛ ɖɩlɩzɩyɛ wiye eyeba se ɛyʋ lɔŋ ɩna-pʋ e-wondu kɩlɩzɩtʋ taa, ɛ-tamtam ɖoŋ nɛ ɛ-Ɛsɔtʋ; mbʋ yebina nɛ pɛfɛyɩnɩ kawanaɣ.”​—Roma 1:20. w16.09 4:4

Yehowa labɩ ɖʋtʋ kɩbandʋ natʋyʋ se pɩsɩnɩ agɔma mba paawɛ Izrayɛɛlɩ yɔ. Ðʋtʋ ndʋ tɩ-taa natʋyʋ lɛ se ɛha-wɛ waɖɛ se pacazɩɣ tɔɔnaɣ hayɩm taa. (Lev. 23:22) Yehowa tɩɖʋ Izrayɛɛlɩ piya paɣtʋ yem se sɩña agɔma, ɛlɛ ɛñɩnaɣ se sɩɖʋ sɩ-tɩ agɔma lone taa nɛ sɩnɩɩ pɔ-tɔm taa. (Ejl. 23:9) Izrayɛɛlɩ piya ‘kaaɖɩŋaa nɛ sɩna kʋñɔŋ’ ŋgʋ agɔma tɔkɩ yɔ. Halɩ pʋcɔ nɛ Izrayɛɛlɩ piya pɩsɩɣ yomaa lɛ, Ejipiti mba niŋaɣ-sɩ, mbʋ pʋyɔɔ yɔ Ejipiti mba ɖʋwaɣ tʋkaɣ ɛyaa hɛkʋ taa. (Kiɖe 43:32; Ejl. 1:11-14) Izrayɛɛlɩ piya kaatɔɔ kʋñɔŋ alɩwaatʋ ndʋ sɩɩkɛ agɔma yɔ, paa mbʋ yɔ Yehowa sɔɔlaa se sɩkpaɣ agɔma ɛzɩ ‘sɩ-tɛtʋ taa piya’ yɔ. (Lev. 19:33, 34) Ðɩɩpɩtɩɣ se Yehowa maɣzɩɣ agɔma mba pɛwɛ ɖa-agbaa taa yɔ pɔ-yɔɔ siŋŋ. (Wp. 10:17-19; Mal. 3:5, 6) Agɔma mba, pakatɩɣ kala sakɩyɛ, nɛ a-taa naayɛ lɛ se ɛyaa niŋ-wɛ yaa paanɩɣ kʋnʋŋ ŋgʋ pɔyɔɔdʋʋ pɛ-tɛ yɔ. Ye ɖɩmaɣzɩɣ kala ana a-yɔɔ yɔ, pɩkaɣ-ɖʋ seɣtuu nɛ ɖɩtɩŋnɩ nʋmɔŋ ndɩ ndɩ yɔɔ nɛ ɖɩlabɩ-wɛ camɩyɛ nɛ ɖɩwɩlɩ-wɛ sɔɔlɩm.​—1 Pɩy. 3:8. w16.10 1:3-5

Yakubu ɖɔɖɔ yɔɔdɩ mbʋ tisuu kɛnaa yɔ ɛ-takayaɣ taa. Ɛlɩzɩ pɩ-taa se ye ɖɩtɩlɩ Ɛsɔ tamaɣ ɖeke yɔ, pɩtɩwɩlɩ se ɖɩwɛnɩ tisuu. Ɛlɛ pɩpɔzʋʋ se ɖɩtɩŋnɩ ɖa-lakasɩ yɔɔ nɛ ɖɩwɩlɩ se ɖɩwɛnɩ tisuu. Ɛmawa se: “Ña yɔ, ŋwɛnɩ tisuu, ɛlɛ camɩyɛ lakasɩ fɛyɩ; ma yɔ, camɩyɛ lakasɩ mawɩlɩɣnɩ-ŋ men-tisuu.” (Yak. 2:18) Yakubu wobi pɩ-yɔɔ nɛ ɛwɩlɩ se lakasɩ taa panaɣna se ɛyʋ wɛnɩ tisuu. Ɛyɔɔdaa se aleewaa tisiɣ se Ɛsɔ wɛɛ, ɛlɛ pɛfɛyɩnɩ tisuu siŋŋ, mbʋ pʋyɔɔ yɔ mbʋ palakɩ yɔ, pɩkaɖɩɣnɩ Yehowa tamaɣ. (Yak. 2:19, 20) Ɛlɛ Yakubu yɔɔdɩ ɖɔɖɔ caanaʋ taa ɛyʋ siɣsiɣ tʋ nɔɔyʋ tɔm se ɛɛwɛnɩ tisuu siŋŋ. Ɛpɔzaa se: “Ða-caa Abraham tɩpɩsɩ siɣsiɣ tʋ tʋma kɩbana yɔɔ, kɩyakʋ ŋgʋ ɛla ɛ-pɩyalʋ Izaakɩ kɩlaʋ yɔ? Ña-maɣmaɣ ŋnaɣ: tisuu sɩɣaɣnɩ-ɩ tʋma kɩbana labʋ nɛ tʋma ana a-yɔɔ yɔɔ e-tisuu kpaɣaɣ ɖoŋ.” (Yak. 2:21-23) Pʋwayɩ, ɛñɩnaɣ se ɛwɩlɩ se lakasɩ taa panaɣna se ɛyʋ wɛnɩ tisuu siŋŋ lɛ, ɛtasɩ yɔɔdʋʋ sɔnɔ evemiye mayaɣ taa tɔm. w16.10 4:8

Lɛɣtʋ ñɩnɩyaa sɩnɩ-ɖʋ nɛ ɖɩtɩlɩ tɔm sakɩyɛ tɛtʋ nɛ mbʋ pɩwɛ kedeŋa yɔɔ yɔ pɩ-yɔɔ, nɛ tɩwazɩɣ-ɖʋ hɔɔlɩŋ sakɩyɛ taa. Ɛlɛ tɔm sakɩyɛ ndʋ ɖɩpɔzʋʋ ɖa-tɩ yɔ, patɩpɩzɩ pasɩnɩ-ɖʋ nɛ ɖɩnɩɩ tɩ-taa. Mba pɛkpɛlɩkɩɣ tɩɩnzɩ yɔɔ tɔm yɔ, paapɩzɩɣ nɛ peheyi-ɖʋ ɛzɩma ɖeyi ɖeyi palɩzɩ kedeŋa nɛ mbʋ pʋyɔɔ ɖɩwɛ tɛtʋ yɔɔ yɔ. Pɩtasɩ lɛ, ɛyaa tɩŋa ɩɩpɩzɩɣ nɛ panɩɩ mbʋ pʋyɔɔ ɛyʋ liu wɛɛ se ɛcaɣ wezuu tam yɔ pɩ-taa. Ɛbɛ yɔɔ lɛɣtʋ ñɩnɩyaa nɛ lɔŋsɩnɖaa lalaa ɩɩpɩzɩɣ se pasɩnɩ ɛyaa nɛ panɩɩ tɔm ndʋ pɔpɔzʋʋ pa-tɩ yɔ tɩ-taa? Mbʋ pʋyɔɔ yɔ pa-taa sakɩyɛ ñɩnɩɣ se ɛyaa ɩmaɣzɩ se Ɛsɔ fɛyɩ, nɛ peseɣtiɣ-wɛ se petisi évolution wɩlɩtʋ yɔɔ. Ɛlɛ Yehowa ñatɩŋɩɣnɩ Bibl yɔɔ nɛ ɛsɩɣnɩ ɛyaa se panɩɩ tɔm kɩcɛyɩtʋ ndʋ pɔpɔzʋʋ pa-tɩ yɔ tɩ-taa. Yehowa ɖʋ paɣtʋ nɛ tiɖiyiɣ e-wondu kɩlɩzɩtʋ tɩŋa, nɛ ɖa ɖɔɖɔ ɖɩɖɔŋ paɣtʋ ndʋ tɩ-yɔɔ. Laatriki miŋ tʋmlaɖaa, mba poluki menziiniwaa yɔ, mba pasaɣ ɛsɔdaa lɔɔɖa yɔ nɛ ɖɔkɔtɔnaa pɔɖɔŋ paɣtʋ ndʋ tɩ-yɔɔ pa-tʋma taa. w16.11 2:4, 5

Lɩmaɣza wena a-yɔɔ pɩwɛɛ se ɖɩwɩlɩ Yehowa ɖɛ-ɛsɩmɩyɛ yɔ, aɖɔwa. Ɛnʋ hanɩ-ɖʋ wezuu. Bibl yɔɔdaa se: “Ɛ-taa ɖihikiɣ wezuu nɛ ciɣduu nɛ wɛtʋ.” Ɛlabɩ-ɖʋ ɖɔɖɔ kʋjɔʋ sɔsɔʋ lɛɛkʋ, ŋgʋ lɛ Bibl. Ɛzɩ Tesalooniiki mba kaanɩʋ Ɛsɔ tɔm nɛ petisi tɩ-yɔɔ yɔ, ɖa ɖɔɖɔ ɖitisiɣ Bibl taa tɔm yɔɔ, mbʋ pʋyɔɔ yɔ ɖɩnawa se tɩlɩnɩ Ɛsɔ cɔlɔ. (1 Tes. 2:13) Bibl sɩnɩ-ɖʋ se ɖɩñɔtɩnɩ Yehowa nɛ ɛñɔtɩnɩ-ɖʋ. (Yak. 4:8) Yehowa ha-ɖʋ waɖɛ sɔsɔɖɛ se ɖɩwɛɛ ɛ-ɛgbɛyɛ taa. Ða-taa wɛ leleŋ siŋŋ nɛ wazasɩ nzɩ. Keɣa maɖʋ te hendu nɛ ɛtɔ se: “Ɩsɛɛ [Yehowa], mbʋ yɔ ɛwɛ ɖeu, ɛ-sɔɔlɩm ɛɛtɛŋ!” (Keɣa 135:1) Keɣa 135 taa, pɔyɔɔdɩ tam nɛɛlɛ nɛ kagbanzɩ se “ɛ-sɔɔlɩm ɛɛtɛŋ.” Ye ɖɩwɛ siɣsiɣ Yehowa nɛ ɛ-ɛgbɛyɛ pɛ-ɛsɩndaa kɔyɔ, ɖɩkaɣ caɣʋ wezuu maatɛŋ nɛ ɖɩna se keɣa maɖʋ tɔm ndʋ, tɩkɛ toovenim. w16.11 3:18, 19

Palabɩnɩ mayaɣ ŋga tʋmɩyɛ tam sakɩyɛ Tɔm Ndʋ Bibl Wɩlɩɣ Toovenim Taa? takayaɣ taa. Alɩwaatʋ ndʋ ŋkpɛlɩkɩɣnɩ ñe-piya yaa ɛyaa lalaa yɔ, pɩtʋʋ fɛyɩ se ŋkalɩɣ-wɛ Roma 5:12 nɛ ŋwɩlɩɣ-wɛ mbʋ pʋyɔɔ Ɛsɔ lɩzɩ tɛtʋ yɔ, mbʋ kɩhɛyʋʋ pʋ-ñʋʋ taa kɩlaʋ kɛnaa yɔ nɛ wɛtʋ ndʋ tɩ-taa sɩɖaa wɛɛ yɔ. Tɔm ndʋ, tɩwɛ takayaɣ ŋga ka-ñʋŋ 3, 5, nɛ 6 taa. Ɛlɛ Bibl mayaɣ ŋga, kapɩzɩɣ kasɩnɩ-ŋ ɖɔɖɔ nɛ ŋcɛyɩsɩ ña nɛ Yehowa mɩ-taabalɩyɛ nɛ ŋtɛ ña-taa se e-ɖeke ŋsɛɣ. Kasɩɣnɩ-ŋ ɖɔɖɔ nɛ ŋwɛɛnɩ lidaʋ wazasɩ nzɩ Yehowa kɔŋnɩ-ɖʋ cee wayɩ yɔ sɩ-yɔɔ. Pɩwɛɛ se ɖɩtɩlɩ se ɖa-tɩŋa payɩ ɖɩkɛ kɩwɛɛkɩm laɖaa. Pɩyʋsʋʋnɩ-ɖʋ paa evemiye nɖɩ. Ɛlɛ Yehowa nawa se mʋzʋʋ yem ɖɩkɛnaa nɛ pʋyɔɔ lɛ, ekpeɣu-ɖʋ ɖa-kɩwɛɛkɩm faaa. (Keɣa 102:13, 14) Adɩma wena Yesu kpɛlɩkɩ ɛ-wayɩ tɩŋɩyaa yɔ a-taa, eheyi-wɛ se patɩmnɩ Ɛsɔ se: “Kpeɣ-ɖʋ ɖa-kɩwɛɛkɩm.” (Luka 11:2-4) Pʋyɔɔ lɛ, pɩtɩpɔzɩ se ɖɩwɛɛ nɛ ɖɩmaɣzɩɣ kɩwɛɛkɩm mbʋ Yehowa kpaɣ nɛ ekpeɣ-ɖʋ yɔ pɩ-yɔɔ. Ɛlɛ ye ɖɩmaɣzɩɣ ɛzɩma Yehowa kpeɣu-ɖʋ ɖa-kɩwɛɛkɩm yɔ pɩ-yɔɔ kɔyɔ, pɩpɩzɩɣ nɛ pɩwazɩ-ɖʋ. w16.12 1:1-3

Pɩɩcɛyaa se Room Krɩstʋ mba iwili pa-tɩ nɛ pana se toovenim taa lɛ, ɛbɛ yɔɔ pakɩlɩɣ kam pa-lɩmaɣza pe-wezuu caɣʋ taa. Ɛzɩ pe-wezuu caɣʋ wɩlɩɣ se pakam pa-lɩmaɣza tomnaɣ yɔɔ wondu yɔɔ? Pɩcɛyaa se ɖa ɖɔɖɔ ɖiwili ɖa-taa nɛ ɖɩna mbʋ pɩ-yɔɔ ɖɩkɩlɩɣ kam ɖa-lɩmaɣza yɔ. Ɛbɛ yɔɔ ɖɩkɩlɩɣ maɣzʋʋ, nɛ ɛbɛ tɔm ɖɩkɩlɩɣ yɔɔdʋʋ? Paa evemiye nɖɩ lɛ, ɛbɛ ɖɩsɔɔlɩ labʋ? Alɩwaatʋ ndʋ nabɛyɛ wiliɣ pa-taa yɔ, pʋtɔma yɔ panaɣ se pɔsɔɔlɩ sʋlʋm ndɩ ndɩ ñɔʋ, pa-ɖɩɣa canʋʋ, wondu kususutu kɩfatʋ ñɩnʋʋ, liidiye ñɩnʋʋ, nʋmɔʋ wobu, yaa wondu lɛɛtʋ yɔɔ maɣzʋʋ kadadayaɣ. Pɩtɩwɛɛkɩ se ɛyʋ ɛmaɣzɩ wondu ndʋ tɩ-yɔɔ, mbʋ pʋyɔɔ yɔ sakɩyɛ taa lɛ, pɩpɔzʋʋ ɛyʋ wondu e-wezuu caɣʋ taa. Ðɩtɔzʋʋ se Yesu kaalaba nɛ lɩm pɩsɩ sʋlʋm. Nɛ apostoloo Pɔɔlɩ ñaaheyi Timootee se ɛñɔɔ “sʋlʋm pazɩ.” (1 Tim. 5:23; Yoh. 2:3-11) Ɛlɛ Yesu nɛ Pɔɔlɩ pɔyɔɔdaɣ yaa pasaŋaɣ sʋlʋm ɖoŋ ɖoŋ? Pɩ-tɔm kaakɩlɩnɩ cɛyʋʋ pe-wezuu caɣʋ taa? Aayɩ. Piyele nɛ ɖa yɔ? Ɛbɛ yɔɔ ɖɩkɩlɩɣ maɣzʋʋ ɖe-wezuu caɣʋ taa? w16.12 2:5, 10, 11

Nɔɔ kʋɖʋmaɣ wɛ Yehowa lidaʋ tɔm tʋnɛ nɛ ndʋ Yesu yɔɔdaa se ɖɩcalɩnɩ ñɩnʋʋ Ɛsɔ Kewiyaɣ nɛ Ɛsɔ siɣsiɣ wɛtʋ yɔ, pɛ-hɛkʋ taa. (Mat. 6:33) Kɩyakʋ nakʋyʋ apostoloo Pɩyɛɛrɩ pɔzɩ Yesu se: “Cɔna nɛ ŋna ɖiyebi pɩtɩŋa payɩ nɛ ɖɩtɩŋ ña-wayɩ: Pɩkaɣ-ɖʋ sɛʋ we?” (Mat. 19:27) Yesu tɩkalɩ Pɩyɛɛrɩ se pʋyɔɔ ɛpɔzɩ tɔm ndʋ, ɛlɛ eheyi ɛ-wayɩ tɩŋɩyaa se Ɛsɔ kaɣ-wɛ wazʋʋ pa-pana ñaɣʋ yɔɔ. Apostoloowaa nɛ ɛyaa siɣsiɣ tɩnaa lalaa pakaɣ kpaʋ ɛsɔdaa nɛ pa nɛ Yesu pɔtɔɔ kewiyitu. Ɛlɛ pehikiɣ wazasɩ lɛɛsɩ pʋcɔ nɛ alɩwaatʋ ndʋ tɩtalɩ. Yesu yɔɔdaa se: “Paa weyi eyebi e-koobiya, yaa ɛ-caa nɛ e-ɖoo, yaa ɛ-halʋ, yaa ɛ-pɩyalʋ, yaa ɛ-hayɩm, ma-hɩɖɛ yɔɔ kɔyɔ, pɩkaɣ-ɩ sɛʋ tam mɩnʋʋ nɛ ɛkaɣ hiɣu tamtam koboyaɣ.” (Mat. 19:29) Ɛ-wayɩ tɩŋɩyaa kaɣ hiɣu wazasɩ sakɩyɛ nɛ pɩkɩlɩ pana wena pañaɣ yɔ. Pakaɣ hiɣu fezuu taa caanaa, ɖoonaa, ɖalaa, kɔɔnaa nɛ piya nɛ pɩkɩlɩ kɩlaŋ weyi pala Ɛsɔ Kewiyaɣ yɔɔ yɔ. w16.12 4:4, 5

Krɩstʋ ñɩma toovenim mba wɛnɩ lidaʋ kɩbaŋʋ siŋŋ. Paa ɖɩtɩɩkɛ patam numwaa yaa “heŋ lɛɛŋ” yɔ, ɖa-tɩŋa ɖɩɖaŋaa se ɖɩna ɛzɩma tamaɣ ŋga Yehowa labɩ kiɖe tɛɛ yɔ, kakaɣ labʋ yɔ nɛ ɛzɩma ɛkaɣ ñalʋʋ ɛ-hɩɖɛ yɔɔ yɔ. (Yoh. 10:16, ABT; Mat. 6:9, 10) Pɩkɛ wazasɩ kɩbanzɩ nzɩ ɖɩɖaŋ kpam yɔ. Ðɩɖaŋ ɖɔɖɔ lidaʋ tɔm ndʋ Yehowa yɔɔdaa se ɛkaɣ labʋ “ɛsɔdaa kɩfalʋʋ nɛ tɛtʋ kɩfatʋ” nɛ ɖɩcaɣ wezuu maatɛŋ yɔ. (2 Pɩy. 3:13) Ɛlɛ pʋcɔ nɛ pɩtalɩ mbʋ lɛ, ɖɩɖaŋaa se ɖɩna ɛzɩma Ɛsɔ samaɣ kaɣ wobu nɛ ɛsɩndaa fezuu taa yɔ. Sɔnɔ, ɛyaa sakɩyɛ ɖʋʋ pe-lidaʋ wondu sakɩyɛ yɔɔ, ɛlɛ pɔpɔzʋʋ pa-tɩ se ɛzɩ wiɖiyi pe-lidaʋ ŋgʋ kɩkaɣ labʋ na. Ɛyaa miiliyɔɔwaa mba pɔtɔʋ liidiye caca yɔ, pɔsɔɔlaa se pawa, ɛlɛ patɩna se pɩkaɣ labʋ mbʋ yaa pɩɩlakɩ. Ɛlɛ tisuu siŋŋ kɛnɩ “lidaʋ” ŋgʋ ɖɩwɛnɩ mbʋ pɩwɛnɩ ɛsɩndaa yɔ, pɩ-yɔɔ yɔ nɛ ɖɩɩpɩtɩɣ se pɩkaɣ labʋ. w16.10 3:1, 2

Yehowa labɩ-ɖʋ lootiye nɛ ɛha ɖa-taa paa weyi kʋjɔŋ, lɛɣtʋ nɛ eyele se ɖɩwɛɛ niye hɔɔlʋʋ nakʋyʋ taa. Ye ɖɩwɛnɩ tɩ luzuu yɔ, ɖɩkaɣ labɩnʋʋ kʋjɔŋ ɛnɩ tʋmɩyɛ nɛ ɖɩsamnɩ-ɩ nɛ ɖɩtɛ ɖɩsɩnɩ ɛyaa lalaa. (Roma 12:4-8) Yehowa ɖʋ-ɖʋ hɩɖɛ nɛ ɛtaa-ɖʋ liu, pʋyɔɔ ɛha-ɖʋ wala ɛgbɛyɛ taa. Lone nɖɩ ɖɩwɛnɩ Yehowa sɛtʋ taa yɔ, nabʋyʋ taa ɖɩpɩzɩɣ nɛ ɖɩlɛɣzɩ. Iyele nɛ ɖɩna Yesu kɩɖaʋ. Kiɖe tɛɛ lɛ, ɛ nɛ Yehowa pe-ɖeke paawɛna. (Adu. 8:22) Pʋwayɩ lɛ, ɛsɩnɩ Yehowa nɛ palɩzɩ Ɛsɔ tiyiyaa, kedeŋa nɛ ɛyaa. (Kol. 1:16) Paa mbʋ yɔ, pʋwayɩ paɖʋ Yesu tʋmɩyɛ kɩfaɖɛ tɛtʋ yɔɔ. Kajalaɣ lɛ, palʋlɩ-ɩ pɩɣa cɩɩɩ nɛ pʋwayɩ lɛ, ɛkɔɔ nɛ ɛpɩsɩ ɛyʋ sɔsɔ. (Fil. 2:7) Ɛkpaɣ e-wezuu nɛ ɛlaa ɛyaa yɔɔ nɛ pɩtɛ lɛ, ɛpɩsɩ fezuu nɛ ɛkpa ɛsɔdaa nɛ ɛpɩsɩ Ɛsɔ Kewiyaɣ Wiyaʋ pɩnaɣ 1914 taa. (Ebr. 2:9) Ɛlɛ ɛtɔkɩ kewiyitu pɩnzɩ kudoku nɛ pɩtɛ lɛ, ɛkaɣ pɩsɩnʋʋ Kewiyaɣ nɛ ɛɖʋzɩ ɛ-Caa nesi tɛɛ se pɩsa nɛ ɛlɛ ‘kɛ pɩtɩŋa ɛyaa kpeekpe taa.’​—1 Kɔr. 15:28. w17.01 3:11, 12

Alɩwaatʋ ndʋ halʋ nɔɔyʋ ñɩnaɣ lɩmaɣzɩyɛ naɖɩyɛ kpaɣʋ yɔ, eheyi ɛ-taabalʋ nɔɔyʋ se: “Taayele se mamaɣzɩ ma-ñʋʋ taa, pɩkɩlɩɣ ɖeu se ŋheyi-m mbʋ pɩwɛɛ se mala yɔ.” Halʋ ɛnʋ, ɛtaasɔɔlɩ se ɛlabɩnɩ tʋmɩyɛ tɩ-yɔɔ wɛʋ lɩzʋʋ waɖɛ nɖɩ Yehowa ha-ɩ yɔ, ɛlɛ ɛñɩnaɣ se lalaa iheyini-i mbʋ pɩwɛɛ se ɛla yɔ. Piyele nɛ ña yɔ? Ña-maɣmaɣ ŋsɔɔlɩ lɩmaɣza kpaɣʋ na, yaa ŋñɩnɩɣ se lalaa ɩkpaɣnɩ lɩmaɣza ño-lone taa? Suwe ŋmaɣzɩɣ ña-tɩ yɔɔ wɛʋ lɩzʋʋ waɖɛ yɔɔ? Ɛyaa wɛnɩ lɩmaɣza ndɩ ndɩ tɩ-yɔɔ wɛʋ lɩzʋʋ waɖɛ yɔɔ. Nabɛyɛ yɔɔdʋʋ se ɛyʋ fɛyɩnɩ tɩ-yɔɔ wɛʋ lɩzʋʋ waɖɛ. Pamaɣzɩɣ se Ɛsɔ tɛm ɖʋʋ mbʋ mbʋ ɛyaa lakɩ pe-wezuu caɣʋ taa yɔ. Lalaa ñɔtɔŋ se ye ɛyʋ ɛwɛ ɛ-tɩ yɔɔ kiya yɔ, pʋbʋ lɛ papɩzɩɣ nɛ pɔtɔ se ɛwɛnɩ tɩ-yɔɔ wɛʋ lɩzʋʋ waɖɛ. Ɛlɛ pʋcɔ nɛ ɖɩnɩɩ tɔm ndʋ tɩ-taa camɩyɛ lɛ, pɩwɛɛ se ɖɩtazɩ Bibl taa. Ɛbɛ yɔɔ? Mbʋ pʋyɔɔ yɔ, Bibl wɩlɩɣ se alɩwaatʋ ndʋ Yehowa labɩ-ɖʋ yɔ, ɛha-ɖʋ tɩ-yɔɔ wɛʋ lɩzʋʋ waɖɛ, pʋ-tɔbʋʋ lɛ se ɛha-ɖʋ waɖɛ se ɖa-maɣmaɣ ɖɩkpaɣ lɩmaɣza. w17.01 2:1, 2

Pɩtɩla yɔ, Daviid maɣzaa se Salomɔɔ ɛɛpɩzɩɣ nɛ ɛcɔnɩ tʋmɩyɛ sɔsɔɖɛ nɖɩ ɖɩ-yɔɔ; mbʋ pʋyɔɔ yɔ pɩɩwɛɛ se templo ŋgʋ, kɩpaɣlɩ siŋŋ nɛ kɩwɛɛ kajʋka. Ŋgʋ, alɩwaatʋ ndʋ tɩ-taa lɛ, Salomɔɔ kaakɛ “pɩɣa ɛjam yem” nɛ ɛtaawɛɛnɩ lɛɣtʋ sakɩyɛ. Paa mbʋ yɔ, Daviid kaanawa se Yehowa pɩzɩɣ nɛ ɛsɩnɩ Salomɔɔ nɛ ɛla tʋmɩyɛ nɖɩ ɛɖʋ-ɩ yɔ. Pʋyɔɔ ɛñaɣ pana nɛ ɛñɔɔzɩ wondu sakɩyɛ se pɩsɩnɩ Salomɔɔ. Mbʋ ɖɔɖɔ, alɩwaatʋ ndʋ pɩpɔzʋʋ se koobiya akpadɩyaa ɩcɛlɩ pa-tʋma koobiya mba pɛwɛnɩ po-ɖoŋ yɔ lɛ, pɩtɩpɔzɩ se pitibi-wɛ yɔɔɔ. Ɛlɛ ye pafalɩsɩ evebiya yɔ, piyeki nɛ tʋmɩyɛ ɖɛɛnɩ ɛsɩndaa camɩyɛ. Alɩwaatʋ ndʋ koobiya akpadɩyaa naɣ se koobiya evebiya mba pafalɩsɩɣ-wɛ yɔ, palakɩ tʋma wena pa-maɣmaɣ palakaɣ yɔ lɛ, pɩwɛɛ se pɩha-wɛ taa leleŋ siŋŋ. w17.01 5:8, 9

Yesu kɛnɩ Ɛsɔ Kewiyaɣ wiyaʋ, nɛ ɛkaɣ yɔkʋʋ Sataŋ ñʋʋ nɛ ɛhɩzɩ kɩwɛɛkɩm mbʋ Sataŋ kaañamtʋ kɔnaa yɔ. Alɩwaatʋ ndʋ Yesu kaawɛ tɛtʋ yɔɔ yɔ, ɛsɩnɩ ɛ-tɔmkpɛlɩkɩyaa nɛ pana mbʋ pʋyɔɔ pɩcɛyaa se Ɛsɔ Kewiyaɣ ɛkɔɔ yɔ. Pamɩyɩsɩ-ɩ lɩm kpaagbaa nɛ pɩtɛ lɛ, ɛpaɣzɩ “Ɛsɔ Kewiyaɣ laŋhɛzɩyɛ tɔm” susuu paa le. (Luka 4:43) Pʋcɔ nɛ ɛkpaɣ ɛsɔdaa lɛ, ɛɖʋ ɛ-tɔmkpɛlɩkɩyaa paɣtʋ se pɛkɛ ɛ-aseɣɖe tɩnaa nɛ “puwolo pɩtalɩ tɛtʋ kamaɣ yɔɔ.” (Tʋma 1:6-8) Kewiyaɣ tɔm susuu haɣ ɛyaa tɩŋa waɖɛ se pɛkpɛlɩkɩ tɔm kɩhɛyʋʋ pʋ-ñʋʋ taa kɩlaʋ yɔɔ nɛ papɩsɩ Ɛsɔ Kewiyaɣ lɩmɖʋyaa. Sɔnɔ, ye ɖɩsɩɣnɩ patam numwaa laŋhɛzɩyɛ tɔm susuu ɛjaɖɛ kpeekpe yɔɔ yɔ, ɖɩnɛ ɛlɛ ɖɩwɩlɩɣ se ɖɩɖʋʋ Kewiyaɣ nesi.​—Mat. 24:14; 25:40. w17.02 2:7, 8

Paa koobiya mba paawɛ Nɔɔɖɛyaa Ɛgbɛyɛ taa yɔ, mba kpakaɣnɩ lɩmaɣza kajalaɣ pɩnzɩ mɩnʋʋ taa Krɩstʋ ɛgbɛyɛ taa yɔ, paaɖiɣzinaa se Yesu kɛnɩnɩ pa-ñʋʋdʋ. Pʋyɔɔ apostoloo Pɔɔlɩ mawa se: “Ðɩsɔɔlʋʋ ɖama nɛ ɖɩpaɣlɩɣ pɩ-tɩŋa pɩ-taa nɛ ɖɩñɔtʋʋnɩ weyi ɛkɛ ñʋʋdʋ yɔ, ɛnʋ lɛ, Krɩstʋ.” (Efɛz. 4:15, ABT) Apostoloowaa tɩkpazɩ pa-tɩ nɛ pañɩnɩ pa-tɩ hɩɖɛ sɔsɔyɛ naɖɩyɛ ɛlɛ “Ɛsɔ ɖoŋ taa lɛ” payaɣaɣ Yesu tɔmkpɛlɩkɩyaa tɩŋa se “Krɩstʋ ñɩma.” (Tʋma 11:26, nwt) Pɩkɛ toovenim se Pɔɔlɩ tɔzɩ koobiya se pɩcɛyaa se ‘pɔɖɔkɩ lakasɩ (yaa sɔnzɩ) nzɩ ewoni-wɛ yɔ’ pʋ-tɔbʋʋ se wɩlɩtʋ ndʋ apostoloowaa nɛ ɛzʋtʋyaa patɩŋnɩ Masɩ yɔɔ nɛ pawɩlɩ-wɛ yɔ. Paa mbʋ yɔ, ɛtasɩ-wɛ heyuu se: “Pɩtɛ lɛ, mɔnsɔɔlaa se ɩtɩlɩ se: Paa ɛyʋ weyi lɛ [pɩkpɛndɩna mba pɛwɛ nɔɔɖɛyaa ɛgbɛyɛ taa yɔ], ɛ-ñʋʋdʋ lɛ Krɩstʋ; . . . nɛ Krɩstʋ ñʋʋdʋ lɛ Ɛsɔ.” (1 Kɔr. 11:2, 3) Pɩwɩlɩɣ kpayɩ kpayɩ se Yehowa kɛnɩnɩ Ñʋʋdʋ Sɔsɔ. Nɛ ɛha Yesu ɖoŋ se ɛkɛ ɛgbɛyɛ ñʋʋdʋ nɛ ɛtɩŋɩɣnɩ ɛ-yɔɔ nɛ eɖiyiɣ-ɖɩ. w17.02 4:7

Ye ɖɩɖʋʋ lalaa hɩɖɛ ɛzɩ pɩmʋnaʋ yɔ, piyeki nɛ ɖɩɩkɩlɩɣ ɖa-maɣmaɣ ɖa-tɩ yɔɔ maɣzʋʋ. Pɩsɩɣnɩ-ɖʋ se ɖɩtaakpazɩ ɖa-tɩ alɩwaatʋ ndʋ nɔɔyʋ haɣ-ɖʋ ñamtʋ natʋyʋ yaa nɔɔyʋ ɖʋʋ-ɖʋ hɩɖɛ yɔ. Piyeki ɖɔɖɔ se ɖɛ-wɛtʋ ɛla nɔɔ kʋyʋmaɣ nɛ Yehowa ɛgbɛyɛ, mbʋ pʋyɔɔ yɔ paa nɔɔyʋ ɛkɛ ɖo-koobu yaa ɛtɩkɛ ɖo-koobu yɔ, ɖɩɩcɛlɩɣ-ɩ ñamtʋ ndʋ tɩtɩmʋna yɔ, nɛ ɖɩɩɖʋʋ nɔɔyʋ hɩɖɛ nɛ ɖɩɖɛlɩsɩ niye. Pɩtasɩ lɛ, ye ɛyʋ weyi ɖɩɖʋʋ-ɩ hɩɖɛ yɔ, ɛlabɩ nabʋyʋ nɛ pɩtɩtʋʋzɩ yɔ, pɩɩcamɩɣ ɖe-tisuu. Kɛzɛɣa sɔsɔɔ ŋga ɖihikiɣ alɩwaatʋ ndʋ ɖɩɖʋʋ hɩɖɛ mba pamʋnaa yɔ lɛ se ɖɔ-tɔm kɛdɩɣnɩ Ɛsɔ. Ðɩlakɩ ɛzɩ Ɛsɔ sɔɔlʋʋ yɔ se pɩsa nɛ ɖɩɖɔkɩ ɖe-siɣsiɣ wɛtʋ ɛ-ɛsɩndaa. Piyeki ɖɔɖɔ se Ɛsɔ ɛpɩzɩ nɛ ecosi mba payɩ pañɩnɩɣ se pakaɖɩnɩ-ɩ yɔ. (Adu. 27:11) Sataŋ ɛjaɖɛ yɔɔ mba fɛyɩnɩ lɩmaɣza kɩbana hɩɖɛ ɖʋʋ yɔɔ. Ɛlɛ ɖa lɛ, ɖa-taa wɛ leleŋ se Yehowa wɩlɩ-ɖʋ ɛzɩma ɖɩɖʋ lalaa hɩɖɛ nɛ ɖɔ-tɔm kɛdɩnɩ-ɩ yɔ. w17.03 1:13, 20, 21

Yozafaatɩ seɣti samaɣ se kañɩnɩ Yehowa ɛzɩ ɛ-caa Aazaa kaalabʋ yɔ. Ɛlabɩ ɖʋtʋ se patɩŋnɩ ‘Yehowa paɣtʋ takayaɣ’ yɔɔ nɛ pawɩlɩ Yuuda tɛtʋ taa ñɩma lɔŋ. (4 Aw. 17:7-10) Halɩ ɛtɩsɩɩnɩ Yuuda mba ɖeke ɛlɛ ɛkʋyaa nɛ ɛkpa ɖooo Efrayim pʋŋ yɔɔ, Izrayɛɛlɩ kewiyaɣ ŋga kɛwɛnɩ hayo kiŋ yɔ ke-egeetiye taa nɛ ekilimi ɛyaa samaɣ yɔɔ nɛ ‘ɛɖaɣnɩ-kɛ pɩsɩnʋʋ Yehowa cɔlɔ.’ (4 Aw. 19:4) Ða-tɩŋa payɩ ɖɩpɩzɩɣ nɛ ɖɩɖʋ nesi tɔm susuu tʋmɩyɛ sɔsɔɖɛ nɖɩ Yehowa sɔɔlaa se ɖɩla sɔnɔ yɔ. Ðʋ ña-tɩ kaɖʋwa se ŋñakɩ pana nɛ ŋsusi ɛyaa lalaa Ɛsɔtɔm paa fenaɣ ŋga nɛ ŋtukuni pa-laŋa nɛ pɛsɛɛ Ɛsɔ. Ye ŋñakɩ pana yɔ, Ɛsɔ kaɣ-ŋ wazʋʋ nɛ ña nɛ nɔɔyʋ ɩpaɣzɩ Bibl kpɛlɩkʋʋ. Tɩmnɩ Yehowa se ɛsɩnɩ-ŋ nɛ ña nɛ nɔɔyʋ ɩpaɣzɩ kpɛlɩkʋʋ. La ño-ɖoŋ ɖeɖe; halɩ ŋpɩzɩɣ nɛ ŋkpaɣ alɩwaatʋ ndʋ ŋpɩzaɣ se ŋlabɩnɩ aleɣya naayɛ, yaa ŋmʋnɩ helim yɔ nɛ ŋsusini tɔm. Pɩtasɩ lɛ, ɛzɩ Yozafaatɩ kakʋyʋʋ nɛ ɛkpa Efrayim se ɛsɩnɩ samaɣ nɛ kapɩsɩ toovenim Ɛsɔ sɛtʋ taa yɔ, ɖa ɖɔɖɔ ɖɩpɩzɩɣ nɛ ɖɩñaɣ pana nɛ ɖɩsɩnɩ mba peyebi tɔm susuu yɔ. w17.03 3:10, 11