Août

Ðoŋ ɖoŋ lɛ, kediɣzisi tɔzʋʋ-ɖʋ mbʋ Yehowa nɛ Yesu palabɩ-ɖʋ yɔ pɩ-yɔɔ. Ye ɖɩñakɩ pana se ɖɩmaɣzɩnɩ Yesu ɖe-wezuu caɣʋ taa paa evemiye nɖɩ yɔ, piyeki nɛ ɖɩwɩlɩɣ ɖɛ-ɛsɩmɩyɛ. (2 Kɔr. 5:​14, 15) Pɩtasɩ lɛ, ɖa-laŋɩyɛ seɣtiɣ-ɖʋ se ɖɩɖɛyɩ Yehowa mbʋ pʋyɔɔ yɔ ɛha-ɖʋ kɩhɛyʋʋ pʋ-ñʋʋ taa. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩɖɛyɩ Yehowa yɔ, ɩ-taa nakʋyʋ lɛ se ɖicosi tɔm ndʋ tɩlɩnɩ ɖa-laŋɩyɛ taa yɔ ɖe-kediɣzisi taa. Ðɩpɩzɩɣ nɛ ɖɩwɩlɩ Yehowa nɛ ɛ-Pɩyalʋ se ɖɩsɔɔlɩ-wɛ siŋŋ alɩwaatʋ ndʋ ­ɖitisiɣ faaa se ɖɩlaa kɩlaŋ pɔ-yɔɔ yɔ. Ðoŋ ɖoŋ lɛ, ɖɩpɩzɩɣ nɛ ɖɩlaa kɩlaŋ ndɩ ndɩ se pɩha-ɖʋ nʋmɔʋ nɛ ɖiwolo ­kediɣzisi. Agbaa sakɩyɛ lakɩ ­kediɣzaɣ nakɛyɛ tʋmɩyɛ kɩyakʋ nakʋyʋ ɖanaɣ, nɛ ­pɩtɩla pɩnɩɣ-ɖʋ kɩyakʋ ŋgʋ siŋŋ. Nɛ palakɩ kediɣzaɣ lɛɛka Mazaɣ yaa ­Kujuka ­alɩwaatʋ ndʋ ɛyaa lalaa wɛɛ nɛ pɛhɛzɩɣ yɔ. Paa pɩnɩ-ɖʋ nɛ ɖɩñakɩ pana nɛ ɖiwoki kediɣzisi yɔ, ɛzɩ Yehowa naɣ ɖa-pana ñaɣʋ mbʋ? Ɛɛɛ, ɛnaɣ! ­Yehowa naɣ pana wena ɖɩñakɩ se ɖɩwɩlɩ-ɩ ­ɖɔ-sɔɔlɩm yɔ lɛ, ɖɔ-tɔm kɛdɩɣnɩ-ɩ siŋŋ.​—Mark. 12:41-​44. w19.01 29 § 12-​13

Yesu maɣmaɣ katɩ kala wena ɛyaa mba pɛ-hɛkʋ taa ɛɛwɛɛ yɔ pakataɣ yɔ a-taa naayɛ. Kɩɖaʋ nakʋyʋ yɔ: Paa pɩɩla ɛzɩma yɔ Yesu lʋlɩyaa kaakɛ kʋñɔndɩnaa. (Mat. 13:55; Mark. 6:3) Ɛzɩma Yesu sɩnɩ ɛ-caa kɩɖɔkʋ Yosɛɛfʋ tʋmɩyɛ labʋ yɔ, ɛkpɛlɩkɩ ɛzɩma pɩpɔzʋʋ se ɛyʋ ɛla tʋmɩyɛ ɖoŋ ñɩnɖɛ yɔ. Pɩtasɩ lɛ, pɩtɩla Yosɛɛfʋ sɩba pʋcɔ nɛ Yesu ­paɣzɩ Ɛ-tɔm susuu tʋmɩyɛ. Ye mbʋ, pɩtʋʋ fɛyɩ se Yesu nɩ siziŋ weyi ɛyʋ kʋsɔɔlʋʋ nɔɔyʋ sɩm kɔŋna yɔ. Nɛ Yesu tɩlɩ ɖɔɖɔ ɛzɩma pɩwɛ kaɖɛ, ye hɔʋ ­nakʋyʋ taa ñɩma ɩtɩkaa tisuu yɔ. (Yoh. 7:5) Wɛtʋ ndɩ ndɩ ndʋ nɛ lɛɛtʋ ɖɔɖɔ sɩnɩ Yesu nɛ ɛtɩlɩ kala wena ɛyaa ­katɩɣ nɛ siziŋ weyi panɩɣ yɔ. Pɩna ­kaɣlaa se Yesu nɩɣ ɛyaa siziŋ, kɔzɩ kɔzɩ alɩwaatʋ ndʋ ɛlabɩ piti lakasɩ yɔ. Yesu tɩla piti lakasɩ nzɩ mbʋ pʋyɔɔ pɩɩwɛɛ se ɛlabɩ-sɩ. Mba paawɛ kʋñɔŋ taa yɔ, ­pɔ-tɔm ‘labɩ-ɩ pʋtɔdɩyɛ.’ (Mat. 20:29-​34; Mark. 1:​40-​42) Yesu nɩ ɛyaa mba pe-siziŋ nɛ ɛsɔɔlɩ se ɛsɩnɩ-wɛ.​—Mark. 7:​32-​35; Luka 7:​12-​15.w19.03 16 § 10-​11

Maɣzɩ nɩɣzɛ wena a-taa Yesu kaawɛ kɛdɛzaɣ ɖoo wena a-taa ɛcaɣ wezuu tɛtʋ yɔɔ yɔ a-yɔɔ nɛ ŋna. Ɛkaɣ pɩzʋʋ nɛ ɛɖɔkɩ e-siɣsiɣ wɛtʋ nɛ pɩkɔɔ pɩtalɩ ɛ-sɩm alɩwaatʋ na? Ye ɛtɩpɩzɩ nɛ ɛɖɔkɩ e-siɣsiɣ wɛtʋ yɔ, nɔɔyʋ ɛɛwɛɣnɩ lidaʋ se ehikiɣ wezuu. (Roma 5:​18, 19) Kɔzɩ kɔzɩ lɛ, ɛ-lakasɩ pɩzaɣ se sɩwɩlɩ se Ɛsɔ kɛ cɛtɩyʋ yaa ɛwɛnɩ toovenim. (Yɔɔb 2:4) Pʋwayɩ, ɛ nɛ ɛ-apostoloowaa pɔtɔkaɣ tɔɔnaɣ kɛdɛzaɣ ɖeɖe lɛ, “nɔɔhɔnɖɛ sɔsɔɖɛ naɖɩyɛ” kɔɔ ɛ-taabalaa kɩbama mba pɛ-hɛkʋ taa. Pɔhɔŋaɣnɩ ɖama tɔm se pana se “pa-taa lɛ akɩlaa.” Pɩɩlabɩ piti kpem se Yesu tɩkɔ pana. Ɛlɛ ɛcɔnɩ tɔm ndʋ ti-ɖeɖe nɛ hɛɛɛ wɛtʋ. Yesu heyi-wɛ toovenim kpayɩ nɛ nɔɔ kɩbaŋa nɛ ɛwɩlɩ-wɛ wɛtʋ ndʋ pɩwɛɛ se pɛwɛɛna yɔ. Nɛ pʋwayɩ lɛ, ɛsa ɛ-taabalaa mba mbʋ pʋyɔɔ yɔ pɔñɔnɩ-ɩ kpam. (Luka 22:24-​28; Yoh. 13:​1-5, 12-​15) Ðɩpɩzɩɣ nɛ ɖɩmaɣzɩnɩ Yesu nɛ ɖɩwɛɛnɩ hɛɛɛ wɛtʋ paa ɖɩwɛ nɩɣzɛ taa yɔ ye ɖɩtɔzʋʋ se ɖa-tɩŋa ɖɩyɔɔdʋʋ tɔm nɛ ɖɩlakɩ nabʋyʋ nɛ pɩwɩzɩɣ lalaa yɔ (Adu. 12:18; Yak. 3:​2, 5) Pɩtasɩ lɛ, ñaɣ pana nɛ ŋsa lalaa pɛ-wɛtʋ kɩbandʋ yɔɔ.​—Efɛz. 4:​29. w19.02 11-​12 § 16-​17

Paɣtʋ ndʋ tiyeki nɛ pɩwɛɛ kaɖɛ se papɩzɩ nɛ pɛcɛtɩnɩ ɛyʋ taa se ɛlabɩ kɩwɛɛkɩm sɔsɔm nabʋyʋ yɔ, tɩɩwɛ Moyizi Paɣtʋ taa. Pʋdʋ ɛnʋ ɛwɛnɩ waɖɛ se ɛñɩnɩ nɛ ɛtɩlɩ mba pɛcɛtɩɣnɩ ɛ-taa tɔm yɔ. (Wp. 19:16-​19; 25:1) Nɛ pʋcɔ nɛ pakʋ ɛ-tɔm lɛ, pɩwɛɛ se aseɣɖe tɩnaa naalɛ ɩlɩzɩ aseɣɖe nɛ pɩwɩlɩ kpayɩ kpayɩ se ɛlabɩ kɩwɛɛkɩm. (Wp. 17:6; 19:15) Nɛ ye aseɣɖe tʋ kʋɖʋm ɛnanɩ Izrayɛɛlɩ pɩɣa ŋga kalabɩ kɩwɛɛkɩm yɔ? Kaapɩzɩɣ nɛ kamaɣzɩ se kalabɩ mbʋ yɔ, paakaɣ ka-nɩŋgbaaŋ hɔm pɩ-yɔɔ. Yehowa na mbʋ kalaba yɔ. Yehowa haɣ-ɖʋ kɩɖaʋ ŋgʋ kɩtalɩ pilim yɔ. Ɛɛlakɩ mulum ­lakasɩ kaaʋ. Ɛwazɩɣ mba pɔɖɔŋ ɛ-paɣtʋ yɔɔ yɔ, nɛ ɛhɔŋ mba palakɩnɩ tʋmɩyɛ wala wena paha-wɛ yɔ nɛ kañatʋ yɔ, pa-nɩŋgbaaŋ. (2 Sam. 22:21-​23; Ezek. 9:​9, 10) Nabɛyɛ pɩzɩɣ nɛ pala kɩwɛɛkɩm nɛ pamaɣzɩ se nɔɔyʋ ɛɛkaɣ pa-nɩŋgbaaŋ hɔm, ɛlɛ alɩwaatʋ ndʋ Yehowa ɖʋwa yɔ, tɩtalɩɣ lɛ, ɛkaɣ yebu nɛ pahʋʋnɩ-wɛ tɔm. (Adu. 28:13) Ɛlɛ ye petikpiɖi yɔ, pakaɣ ɖiɣzinuu se “pɩkɛ sɔɔndʋ tɔm se ɛyʋ ɛtɔlɩ Ɛsɔ ɛsadʋ nesi tɛɛ.”​—Ebr. 10:30, 31. w19.02 23-​24 § 20-​21

Toovenim taa lɛ, Moyizi yeba nɛ Yehowa wɩlɩ-ɩ nʋmɔʋ nɛ eɖiyi-i. Pʋyɔɔ lɛ, “pɩɩwɛ-ɩ ɛzɩ ɛnaɣaɣ mbʋ paanaɣ-pʋ yɔ, nɛ ɛɖɔkɩ ɛ-tɩ kpam.” (Ebr. 11:​24-​27) Izrayɛɛlɩ piya lɩ Ejipiti tɛtʋ taa nɛ pɩla ɛzɩ fenasɩ naalɛ mbʋ yɔ lɛ, pakatɩ kaɖɛ naɖɩyɛ, halɩ pʋcɔ nɛ ­patalɩɣ ­Sinayii Pʋʋ yɔɔ. ­Samaɣ tɛɖaɣ lɩm nɛ pʋyɔɔ lɛ, ka-taa paɣzɩ wɩʋ. Peeɖe samaɣ ­paɣzɩ miduu kɔ-mɔɔŋ tɛɛ nɛ kɔyɔɔdɩ tɔm kɩdɛkɛdɩtʋ Moyizi yɔɔ. Nɛ ɛzɩma pɩɩwɛɛ nɛ pɩlakɩ kaɖɛ siŋŋ yɔ pʋyɔɔ lɛ, Moyizi tɩmnɩ Yehowa nɛ ɛtɔ se: “Mala ɛzɩma samaɣ kanɛ yɔ, kɔkɔŋ kayaɣ-m pɛɛ?” (Ejl. 17:4) Yehowa cosi Moyizi nɛ eheyi-i mbʋ pɩwɛɛ se ɛla yɔ kpayɩ ­kpayɩ. Eheyi-i se ɛkpaɣ ɖaʋ ŋgʋ ɛɖɔkaa yɔ nɛ ɛma Orɛɛbʋ Pʋʋ yɔɔ kaaʋ nakʋyʋ yɔɔ nɛ ɛlabɩ mbʋ yɔ, lɩm kaɣ lɩnʋʋ kɩ-taa. Masɩ yɔɔdʋʋ se: “Moyizi la mbʋ Izrayɛɛlɩ sɔsaa ɛsɩndaa.” Nɛ Izrayɛɛlɩ piya ñɔɔ lɩm nɛ sɩñɩɣzɩ nɛ pɩla se tɔm tɛma.​—Ejl. 17:​5, 6. w18.07 13 § 4-5

Nʋmɔŋ weyi ɩ-yɔɔ Yehowa tɩŋɩɣna nɛ ɛkpazɩɣ-ɖʋ ɖoŋ yɔ, ɩ-taa nakʋyʋ lɛ Krɩstʋ ɛgbɛyɛ. Ɛzɩ Yehowa yɔ, ɖa-taa paa anɩ pɩzɩɣ nɛ ɛwɩlɩ e-koobiya sɔɔlɩm nɛ ɛkpazɩ-wɛ ɖoŋ fezuu taa nɛ tomnaɣ yɔɔ. (1 Yoh. 4:​19-​21) Apostoloo Pɔɔlɩ seɣti Krɩstʋ ñɩma se: “Ɩsɔzɩ ɖama ɖoŋ, ɩsɩnɩ ɖama wɩlʋʋ nʋmɔʋ kɩbaŋʋ ɛzɩ ɩtɛm pazʋʋ labʋ yɔ.” (1 Tes. 5:​11) ­Pɩwɩlɩɣ se ɖa-tɩŋa payɩ ɖɩpɩzɩɣ nɛ ɖɩmaɣzɩnɩ Yehowa nɛ Yesu nɛ ­ɖɩkpazɩ ɖo-koobiya ɖoŋ, nɛ pɩtɩkɛ ɛzʋtʋyaa ɖeke tʋmɩyɛ pɩkɛnaa. (Roma 15:​1, 2) Nɩɣzɛ yɔɔ lɛ, ɛgbɛyɛ taa ñɩma nabɛyɛ wɛnɩ lɩmaɣza taa kʋdɔmɩŋ, nɛ nabʋyʋ taa pɩpɔzʋʋ se fɛɖaa ɩsɩnɩ-wɛ. (Luka 5:​31) Ɛgbɛyɛ taa ɛzʋtʋyaa nɛ koobiya lalaa panawa se toovenim lɛ, pɛfɛyɩnɩ ­falɩsʋʋ mbʋ pɩpɔzʋʋ yɔ se papɩzɩ nɛ pasɩnɩ mba pɛwɛnɩ lɩmaɣza taa ­kʋdɔmɩŋ ɛzɩ fɛɖaa yɔ. Paa mbʋ yɔ papɩzɩɣ nɛ powolo pɩ-yɔɔ nɛ ‘pɔɖɔkɩ ajamaa’ pɩtɩŋnɩ ɛzɩma paɖʋʋ-wɛ nesi nɛ paɖʋʋ suuɖu nɛ pakpazɩɣ-wɛ ɖoŋ nɛ nɔɔ kɩbaŋa yɔ.​—1 Tes. 5:​14. w18.09 14 § 10-​11

Pɩsa nɛ ɖɩtaa Yehowa liu nɛ pɩkpaɖɩ lɛ, pɩwɛɛ se ɖɩñaɣ pana nɛ ɖɩtɩlɩ-ɩ camɩyɛ. Nɛ nʋmɔʋ kʋɖʋmʋʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩtɩlɩ Ɛsɔ camɩyɛ yɔ, ŋgʋ lɛ se ɖɩka ñʋʋ nɛ Bibl kalʋʋ nɛ ɖɩmaɣzɩɣ ndʋ ɖɩkalɩɣ yɔ tɩ-yɔɔ. Bibl taa kɛdɛsɩ sakɩyɛ wɩlɩɣ-ɖʋ ɛzɩma Yehowa kandɩyɩ ɛ-samaɣ yɔɔ caanaʋ taa yɔ. Kɛdɛsɩ nzɩ sɩsɩɣnɩ-ɖʋ se ɖa-taa ɛtɛ se sɔnɔ Yehowa kaɣ ɖɔ-yɔɔ kandɩyʋʋ. Yʋsɩ tɔm pee kɩbana wena Izaayii labɩnɩ tʋmɩyɛ nɛ ɛwɩlɩnɩ ɛzɩma Yehowa kandɩyɩɣ ɖɔ-yɔɔ yɔ. Ɛkpaɣ Yehowa ɛzɩ ninɖiɣyu yɔ nɛ ɛkpaɣ Yehowa sɛyaa ɛzɩ heɣsi yɔ. Ɛyɔɔdɩ Yehowa tɔm se: “Ekpeɣliɣ heɣsi ɛ-nɔkɔyʋʋ taa nɛ ɛkpakɩɣ-sɩ nɛ ɛnʋkɩ.” (Iza. 40:11) Ðɩnaɣ se Yehowa nesi nzɩ sɩwɛ ɖoŋ yɔ sɩɖɔkɩ-ɖʋ lɛ, sɔɔndʋ ɛɛkpaɣ-ɖʋ. Pɩsa nɛ ŋɖɔkɩ ña-tɩ nɛ kala wena ŋkatɩɣ yɔ ataayele nɛ sɔɔndʋ kpa-ŋ lɛ, maɣzɩɣ sɔnɔ evemiye mayaɣ taa tɔm yɔɔ. Tɩkaɣ-ŋ kpazʋʋ ɖoŋ kala wena ŋkaɣ katʋʋ nɛ ɛsɩndaa yɔ a-taa. w19.01 7 § 17-​18

Ŋwɛnɩ fezuu taa kaɖʋsɩ nɛ ŋwɛɛ nɛ ŋñakɩ pana se ŋtalɩ-sɩ? Pɩtɩla ŋwɛɛ nɛ ŋñakɩ pana se ŋkalɩ Bibl hɔɔlɩŋ nɩɩyɩ paa evemiye nɖɩ yaa ŋwɛɛ nɛ ŋfalɩsɩɣ ña-tɩ se ŋɖɛɛnɩ ɛsɩndaa tɔm yɔɔdʋʋ nɛ tɔm wɩlʋʋ nʋmɔʋ taa. Paa kaɖʋwa ŋga ŋwɛna yɔ, alɩwaatʋ ndʋ lalaa naɣ se ŋwɛɛ nɛ ŋɖɛɣnɩ ɛsɩndaa nɛ pasaŋɩ-ŋ lɛ, ɛzɩma pɩlakɩ-ŋ? Pɩtʋʋ fɛyɩ se ña-taa lakɩ leleŋ siŋŋ se mbʋ ŋwɛɛ nɛ ŋlakɩ yɔ, pɩwɛ ɖeu pɩdɩɩfɛyɩ. Pɩhaɣ-ŋ taa leleŋ mbʋ pʋyɔɔ yɔ, ŋwɛɛ nɛ ŋmaɣzɩɣnɩ Yesu nɛ ŋsɩɣ Ɛsɔ sɔɔlɩm labʋ kajalaɣ lone taa. (Adu. 27:11) Ye ŋkaŋ ñʋʋ nɛ fezuu taa tʋma yɔ, pɩkaɣ-ŋ haʋ taa leleŋ siŋŋ nɛ ŋwɛɛnɩ ɖɔɖɔ kaɖʋwa kɩbaŋa ñe-wezuu caɣʋ taa. Apostoloo Pɔɔlɩ mawa se: “Ɩɖɔkɩ mɩ-tɩ kpam nɛ iwobini ɛsɩndaa tam Kɩbaɣlʋ tʋmɩyɛ taa, ɩsɩm mbʋ se mɩ-tʋmɩyɛ tɩkɛ falaa pʋyʋ Kɩbaɣlʋ cɔlɔ.” (1 Kɔr. 15:58) Ye ɖɩwɛnɩ tomnaɣ yɔɔ kaɖʋsɩ sɔsɔsɩ, paa sɩɩwɛ ɖeu ɛzɩma, nɛ ɖɩñaɣ pana nɛ ɖɩtalɩ-sɩ yɔ, toovenim taa lɛ pɩkɔŋnɩ-ɖʋ mbʋ yɔ, pɩkɛ falaa mbʋ fezuu taa ñɩnzɩ kɔŋnɩ-ɖʋ yɔ pɩ-ɛsɩndaa.​—Luka 9:​25. w18.12 22 § 12-​13

Alɩwaatʋ ndʋ tɩ-taa tɛtʋ yɔɔ ɛyaa kpeekpe kaɣ caɣʋ wezuu nɛ pɩla nɔɔ kʋɖʋmaɣ nɛ Ɛsɔ nʋmɔŋ yɔ, tɩ-tɔm Daviid yɔɔdaɣ. (2 Pɩy. 3:​13) Natʋ tɔm ndʋ tɩwɛ Izaayii 65:22 taa yɔ tɩyɔɔdʋʋ se: “Tɩŋ kɩyakɩŋ ɖɔʋ ɖɔʋ mbʋ yɔ, mbʋ ɖɔɖɔ mɛ-ɛyaa samaɣ kɩyakɩŋ kaɣ ɖɔʋ.” Tɔm tʋnɛ tɩwɩlɩɣ se ɛyaa kaɣ caɣʋ wezuu pɩnzɩ kudokiŋ sakɩyɛ. Ɛzɩ Natʋ 21:​1-4 yɔɔdʋʋ yɔ, Ɛsɔ kaɣ wazʋʋ ɛyaa kpeekpe. Nɛ mba pakaɣ-ɩ sɛʋ ɛjaɖɛ kɩfaɖɛ taa yɔ pakaɣ hiɣu wazasɩ sakɩyɛ; alɩwaatʋ ndʋ tɩ-taa lɛ “sɩm ɛɛtasɩɣ wɛʋ.” Aɖam nɛ Ɛva pelesi paradisuu ŋgʋ kɩɩwɛ Edɛɛnɩ yɔ, paa mbʋ yɔ kɩkaɣ tasʋʋ wɛʋ. Ɛzɩ Ɛsɔ yɔɔdʋʋ yɔ, pɩkazɩ pazɩ ɛkaɣ wazʋʋ ɛjaɖɛ kpeekpe yɔɔ ɛyaa. Pɩtɩŋnɩ fezuu kiɖeɖeu yɔɔ lɛ, Daviid yɔɔdaa se ɖɛfɛɛ tɩnaa nɛ siɣsiɣ tɩnaa kaɣ tɩɣyʋʋ tɛtʋ nɛ pacaɣ tɩ-yɔɔ tam. (Keɣa 36:11) Pɩwɛɛ se natʋ tɔm ndʋ tɩwɛ Izaayii takayaɣ taa yɔ, tiyele nɛ ɖe-liu tɛɛ kɔtɩnɩ wezuu kɩbaŋʋ ŋgʋ kɩwɛnɩ ɛsɩndaa yɔ. (Iza. 11:​6-9; 35:​5-​10; 65:21-​23) Ɛzɩmtaa pɩkaɣ labʋ mbʋ? Pɩkaɣ labʋ mbʋ alɩwaatʋ ndʋ lidaʋ tɔm ndʋ Yesu heyi Yuuda kɩwɛɛkɩm laɖʋ ɛnʋ yɔ, tɩlakɩ yɔ. (Luka 23:43) Ŋpɩzɩɣ nɛ ŋcaɣ paradisuu ŋgʋ kɩ-taa. w18.12 7 § 22-​23

Ɛyʋ pɩzɩɣ nɛ ɛla nabʋyʋ nɛ ɛtaanɩɩ ɛjaɖɛ maɣzɩm taŋ paa ññɩɩ yaa we? Aayɩ, mbʋ pʋyɔɔ yɔ, ɛjaɖɛ nɖɩ ɖɩ-taa ɖɩwɛɛ. Pʋyɔɔ lɛ, ɖɩɩpɩzɩɣ nɛ ɖɩla nabʋyʋ se ɖɩtaanɩɩ ɖɩ-maɣzɩm tɔm natʋyʋ kaaʋ. (1 Kɔr. 5:​9, 10) Tɔm susuu tʋmɩyɛ maɣmaɣ yeki nɛ ɖɩkatɩɣ cɛtɩm wɩlɩtʋ sakɩyɛ. Ɛlɛ, paa ɖɩɩpɩzɩɣ se ɖɩfɛɛ lɩmaɣza kɩdɛkɛda tɔm nɩʋ yɔ, pɩpɔzʋʋ se ɖikizi tɩ-yɔɔ maɣzʋʋ yaa tɩ-yɔɔ tisuu. Ɛzɩ Yesu yɔ, alɩwaatʋ ndʋ ɖɩnɩɣ lɩmaɣza wena aɖʋʋ nesi Sataŋ wɩlɩtʋ yɔ, pɩwɛɛ se ɖikizi-yɛ kpaagbaa. Pɩtasɩ lɛ, ɖɩpɩzɩɣ nɛ ɖɩkandɩyɩ ɖa-tɩ yɔɔ pɩtɩŋnɩ ɛzɩma ɖɩkpaɣ ɖa-tɩ nɛ mbʋ pɩɩwazɩɣ pʋyʋ nɛ piyeki se ɖɩnɩɩ ɛjaɖɛ yɔɔ lɩmaɣza yɔ pɩ-labʋ. Mbʋ ɖɩpɩzɩɣ nɛ ɖɩla yɔ, pɩ-taa nabʋyʋ lɛ se ɖɩtɩlɩ labʋ alɩwaatʋ ndʋ ɖɩɩlɩzɩɣ mba ɖɩcaɣ se pɛkɛ ɖa-taabalaa yɔ. Bibl heyiɣ-ɖʋ se ye ɖɩɖʋʋ taabalɩyɛ nɛ ɛyaa mba paasɛɣ Yehowa yɔ, pa-maɣzɩm kaɣ wɛnʋʋ ɖoŋ ɖɔ-yɔɔ. (Adu. 13:20; 1 Kɔr. 15:12, 32, 33) Mbʋ ɖɔɖɔ pɩsa nɛ ɖɩtaaɖʋ ɖa-maɣzɩm taa lɩmaɣza wena ‘akaɖɩɣnɩ Ɛsɔ sɩmtʋ’ yɔ lɛ, pɩwɛɛ se ɖikizi aleɣya wena asandɩɣ évolution wɩlɩtʋ, puuyaɣ lakasɩ, nɛ kʋzʋʋ kɩdɛkɛdʋʋ yɔ a-labʋ.​—2 Kɔr. 10:5. w18.11 21 § 16-​17

Ɛbɛ pɩzɩɣ nɛ pɩsɩnɩ-ŋ nɛ ŋwolo pɩ-yɔɔ nɛ ŋɖɔŋ toovenim nʋmɔʋ taa? Pɩ-taa nabʋyʋ yɔ se ŋlakɩ ño-ɖoŋ ɖeɖe Bibl taa toovenim tɔm wɩlʋʋ nʋmɔʋ taa. Ye ŋlakɩ mbʋ yɔ, pɩsɩɣnɩ-ŋ nɛ ŋɖɔkɩ ñe-fezuu taa you sɩɣa ŋga kɛkɛnɩ “Ɛsɔtɔm” yɔ, nɛ pɩcɛyɩsɩ camɩyɛ. (Efɛz. 6:​17) Ða-taa paa anɩ pɩzɩɣ nɛ ɛla e-ɖoŋ ɖeɖe tɔm wɩlʋʋ nʋmɔʋ taa nɛ ɛkɛnɩ “tʋtʋyɛ tɔm kpou kpayʋ kɩbanʋ.” (2 Tim. 2:​15) Ðɩɩlakɩnɩ ­tʋmɩyɛ Bibl se ɖɩsɩnɩ lalaa nɛ paya toovenim tɔm nɛ pɔlɔ cɛtɩm wɩlɩtʋ lɛ, ɖɩwɛɛ nɛ ­ɖiyeki se Ɛsɔtɔm ɛcaɣ ɖa-maɣzɩm nɛ ɖa-laŋa taa camɩyɛ. Piyeki nɛ ɖa-taa tɛ se ɖiwoki pɩ-yɔɔ nɛ ɖɩɖɔŋ toovenim nʋmɔʋ taa. Toovenim kɛnɩ kʋjɔʋ sɔsɔʋ ŋgʋ Yehowa labɩ-ɖʋ yɔ. Pɩtɩŋnɩ kʋjɔʋ ŋgʋ kɩ-yɔɔ lɛ, ɖihiɣ ñɩm sɔsɔm; mbʋ lɛ taabalɩyɛ kɩbanɖɛ nɖɩ ɖɩwɛ ɖa nɛ ɖa-Caa weyi ɛwɛ ɛsɔdaa yɔ, ɖɛ-hɛkʋ taa yɔ. Tɔm ndʋ ɛwɩlɩ-ɖʋ nɛ pɩtalɩnɩ sɔnɔ yɔ, tɩkɛnɩ ɖɩbazɩyɛ yem! Ɛsɔ ­labɩ-ɖʋ tamaɣ se ɛhaɣ-ɖʋ tamtam wezuu nɛ pɩsa nɛ ɖɩɖaɣnɩ kpɛlɩkʋʋ tɔm sakɩyɛ nɛ ɖisuyi toovenim tɔm ndʋ ɖɩtɛm yabʋ yɔ, tɩ-yɔɔ. Pʋyɔɔ lɛ, yele nɛ toovenim tɔm wɛɛ ñɛ-ɛsɩndaa ɛzɩ kijiɣa ŋga kamʋ ñɩm siŋŋ yɔ. Wolo ­pɩ-yɔɔ nɛ ‘ŋyakɩ toovenim nɛ taapɛdɩ-pʋ’ kpa.​—Adu. 23:23. w18.11 8 § 2; 12 § 15-​17

Pɩtʋʋ fɛyɩ se tɔm ndʋ Noowa susaɣ pʋcɔ nɛ Tɛʋ Sɔsɔʋ kɔŋ yɔ, tɩ-hɔɔlʋʋ nakʋyʋ lɛ se ɛpaɣ ɛyaa se pakaɣ ɛjaɖɛ nɖɩ ɖɩzʋʋ. Yʋsɩ tɔm ndʋ Yesu yɔɔdaa yɔ. Ɛyɔɔdaa se: “Pʋbʋ taa lɛ, pʋcɔ nɛ lɩm sɔsɔm wadɩ ɛjaɖɛ yɔɔ lɛ, pɔtɔkaɣ, pɔñɔʋ, pakpakɩɣ halaa, pɩkɔɔ pɩtalɩ kɩyakʋ ŋgʋ Noowa sʋ mɛlɛ taa yɔ. Ɛyaa tike natʋyʋ, pɩkɔɔ pɩtalɩ lɩm sɔsɔm wadɩ pɔ-yɔɔ. Ɛyʋ Pɩyalʋ kɔmtʋ kaɣ labʋ mbʋ na.” (Mat. 24:38, 39) Paa ɛyaa itaakeŋni Noowa yɔ ewobi pɩ-yɔɔ nɛ ɛɖɔkɩ e-siɣsiɣ wɛtʋ nɛ esusi nɩŋgbaaŋ hɔm tɔm ndʋ Ɛsɔ ɖʋ-ɩ se esusi yɔ. Sɔnɔ, ɖisusuu Kewiyaɣ tɔm se ɖɩha ɛyaa waɖɛ nɛ pɛkpɛlɩkɩ nɛ patɩlɩ mbʋ Ɛsɔ ɖʋwa se ɛkaɣ labʋ cee wayɩ yɔ. Ɛzɩ Yehowa yɔ, paa ɛzɩmtaa lɛ, ɖɩtaɣ liu se ɛyaa kaɣ welisuu nɛ pɛlɛɣzɩ pɛ-wɛtʋ nɛ ‘pɛwɛɛ wezuu.’ (Ezek. 18:23) Alɩwaatʋ kʋɖʋmtʋ ndʋ tɩ-taa lɛ, ɖiisusuu tɔm kpaɣ ɖɩɣa nɛ ŋwolo ɖɩɣa nɛ samaɣ taa lɛ, ɖɩwɛɛ nɛ ɖɩpakɩ ɛyaa sakɩyɛ se Ɛsɔ Kewiyaɣ ɖiɣni kɔm nɛ kakaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ.​—Ezek. 3:​18, 19; Dan. 2:​44; Natʋ 14:​6, 7. w18.05 19 § 8-9

Ye ñɛ-ɛjaɖɛ taa komina ekizaa se ɖɩtaala Kewiyaɣ tʋma nɛ paya-ŋ nɛ pɔpɔzʋʋ-ŋ tɔm pɩlɩɩnɩ koobiya yɔɔ, ɛzɩma pɩwɛɛ se ŋla? Pɩwɛ ɖeu se ŋheyi-wɛ ndʋ payɩ ŋsɩma yɔ? Alɩwaatʋ ndʋ Roma komina lone taa caɣyʋ kaapɔzɩ tɔm Yesu yɔ, ɛbɛ ɛlɛ laba? Ɛzɩ Masɩ yɔɔdʋʋ se “wiye wɛɛ se posu, nɛ wiye wɛɛ se pɔyɔɔdɩ” yɔ, nabʋyʋ taa Yesu kaasum tamɩyɛ! (Ekl. 3:​1, 7; Mat. 27:11-​14) Ye mbʋ, wɛtʋ tʋnɛ tɩ-taa lɛ, pɩwɛ ɖeu se ɖɩtaayɔɔdɩ natʋyʋ, nɛ ye ɖɩlabɩ mbʋ yɔ, pɩsɩɣnɩ-ɖʋ nɛ ɖɩtaakɔnɩ kaɖɛ naɖɩyɛ ɖo-koobiya yɔɔ. (Adu. 10:19; 11:12) Ye ña-taabalʋ kʋsɔɔlʋ nɔɔyʋ yaa ñɔ-hɔʋ taa tʋ nɔɔyʋ ɛlabɩ kɩwɛɛkɩm sɔsɔm nabʋyʋ nɛ ŋtɩlɩ pɩ-yɔɔ tɔm natʋyʋ, ɛbɛ pɩwɛɛ se ŋla? Pɩwɛɛ se ŋyɔɔdɩ toovenim. (Adu. 21:28) Pɩwɛɛ se ŋheyi ɛzʋtʋyaa mbʋ payɩ ŋsɩm tɔm ndʋ tɩ-yɔɔ yɔ. Pɩpɔzaa se ɛzʋtʋyaa ɩtɩlɩ mbʋ pɩlaba ɖeyi ɖeyi yɔ, nɛ pɩsɩnɩ-wɛ nɛ patɩlɩ ɖɔɖɔ nʋmɔʋ ŋgʋ kɩ-yɔɔ ɖeyi ɖeyi pɩwɛɛ se patɩŋna nɛ pasɩnɩ weyi ɛlabɩ kɩwɛɛkɩm yɔ nɛ ɛ nɛ Yehowa pa-taabalɩyɛ ñɔɔzɩ.​—Yak. 5:​14, 15. w18.10 10 § 17-​18

Ɛzɩma ɖɩpɩzɩɣ nɛ ɖɩkpazɩ lalaa ɖoŋ? Mbʋ ɖɩpɩzɩɣ nɛ ɖɩla yɔ pɩ-taa nabʋyʋ yɔ se ɖɩkɛ welisiyu kɩbanʋ. (Yak. 1:​19) Ye ŋwelisiɣni ɛyʋ camɩyɛ yɔ, pɩwɩlɩɣ se ŋsɔɔlɩ ɛ-tɔm. Ŋpɩzɩɣ nɛ ŋpɔzɩ tɔm nɛ lɛɣtʋ weyi ɛwɛ wɩzasɩ nasɩyɩ taa yɔ se pɩsa nɛ ŋtɩlɩ ɛ-wɛtʋ camɩyɛ. Ye ŋlabɩ mbʋ yɔ, pɩsɩɣnɩ-ŋ nɛ ŋpɩzɩ ŋkpazɩ ño-koobu ɛnʋ ɖoŋ nɛ sɔɔlɩm. Yele nɛ ñɛ-ɛsɩndaa wɛtʋ wɩlɩ kpayɩ kpayɩ se ŋmaɣzɩɣ ɛ-yɔɔ nɛ sɔɔlɩm. Ye koobu weyi ŋsɩɣnɩ-ɩ yɔ, ɛcaɣ se eheyi-ŋ ɛ-taa tɔm tɩŋa hɔɔlʋʋ nakʋyʋ taa yɔ, ɖʋ suuɖu nɛ taacɛ ɛ-nɔɔ yɔɔ. Ye ŋɖʋ suuɖu nɛ ŋwelisini-i yɔ pɩsɩɣnɩ-ŋ nɛ ŋtɩlɩ lɩmaɣza wena ɛwɛna yɔ camɩyɛ. Pɩkaɣ yebu nɛ ­ño-koobu weyi ɛwɛ wɩzasɩ taa yɔ ɛta-ŋ liu nɛ ewelisini-ŋ camɩyɛ alɩwaatʋ ndʋ ŋñakɩ pana se ŋkpazɩ-ɩ ɖoŋ yɔ. Alɩwaatʋ ndʋ ŋlakɩ mbʋ yɔ, pɩwɩlɩɣ se ŋmaɣzɩɣ ɛ-yɔɔ siŋŋ nɛ pɩkaɣ ɛ-laŋɩyɛ hɛzʋʋ. w18.09 14 § 10; 15 § 13

Ɛyaa mba payɩ payakɩ toovenim yɔ, pɩwɛɛ se pɛhɛyɩ pa-alɩwaatʋ. Pɩpɔzɩ alɩwaatʋ pʋcɔ nɛ ɛyʋ pɩzɩ nɛ ewelisi Kewiyaɣ tɔm, ɛkalɩ Bibl nɛ Bibl kpɛlɩkʋʋ takayɩsɩ, ɛkpɛlɩkɩ ɛ-tɩ yɔɔ, ɛñɔɔzɩ ɛgbɛyɛ taa kediɣzisi nɛ ewobi-sɩ. Pɩwɛɛ se ɖɩya yaa ɖɩkpaɣ alɩwaatʋ ndʋ ɖɩlakɩnɩ tʋma wena a-tɔm tɩkɩlɩ cɛyʋʋ yɔ nɛ ɖɩyabɩnɩ toovenim. (Efɛz. 5:​15, 16) Alɩwaatʋ ɛzɩma pɩpɔzʋʋ se ɛyʋ ɛkpaɣ nɛ ɛtɩlɩnɩ Bibl taa kajalaɣ wɩlɩtʋ? Pɩlɩɣnɩ wɛtʋ ndʋ tɩ-taa ɖɩwɛɛ yɔ. Mbʋ ɖɩpɩzɩɣ nɛ ɖɩkpɛlɩkɩ Yehowa lɔŋsɩnɖɛ, ɛ-nʋmɔŋ nɛ ɛ-tʋma pɔ-yɔɔ yɔ, pɩfɛyɩ tɩnaɣ. (Roma 11:33) Kajalaɣ Feŋuu Tilimiye kpaɣ toovenim tɔm nɛ ɖɩmaɣzɩnɩ “hɛɖʋʋ cikpeluu” nakʋyʋ. Ðɩyɔɔdaa se: “Ñe-liu ɛtaasɩbɩnɩ hɛɖʋʋ kʋɖʋmʋʋ yaa toovenim tɔm kʋɖʋmtʋ ɖeke. Ye hɛɖʋʋ kʋɖʋmʋʋ ­kaamaɣaa yɔ, hɛtʋ sakɩyɛ taawɛɛ. Kpaɣ hɛtʋ sakɩyɛ, nɛ ŋtasɩ ñɩnʋʋ hɛtʋ sakɩyɛ nɛ ŋsɔzɩ.” Paa ɛyʋ ɛcakɩ wezuu tam tam yɔ, ɛɛpɩzɩɣ nɛ ɛtɛ Yehowa yɔɔ tɔm kpɛlɩkʋʋ. Sɔnɔ mbʋ pɩ-tɔm cɛyaa yɔ lɛ se ɖɩlabɩnɩ ɖa-alɩwaatʋ tʋmɩyɛ nɛ lɛɣtʋ nɛ ɖɩpɩzɩ ɖɩya toovenim tɔm sakɩyɛ. w18.11 4 § 7

Masɩ heyiɣ walaa se: “mɩ nɛ mɩ-halaa ɩwɛɛ nɛ pɩla nɔɔ kʋɖʋmaɣ nɛ sɩmtʋ.” Papɩzɩɣ nɛ patasɩ tɔm ndʋ tɩ-taa lɩzʋʋ se: “Iwolo pɩ-yɔɔ nɛ ɩmaɣzɩ mɩ-halaa yɔɔ; iwolo pɩ-yɔɔ nɛ ɩnɩɩ mɩ-halaa tɔm taa.” (1 Pɩy. 3:7) Lɛlʋ tɔm tɔbʋʋ nɩʋ wɩlɩɣna se ŋmaɣzɩɣ ɛ-yɔɔ. Abalʋ weyi ɛwɩlɩɣ se ɛnɩɣ ɛ-halʋ tɔm tɔbʋʋ yɔ ɛ-ɛsɩndaa lɛ, ɛ-halʋ kɛ sɩnɩyʋ nɛ paa pɛwɛnɩ wɛtʋ ndɩ ndɩ hɔɔlɩŋ sakɩyɛ taa yɔ, pɩtɩwɩlɩ se ɛmʋ ñɩm nɛ pɩkpaɖɩ ɛ-halʋ. (Kiɖe 2:​18) Ye ɛwɛnɩ wɛtʋ ndʋ yɔ, pɩsɩɣnɩ-ɩ nɛ ɛlakɩnɩ tʋmɩyɛ ɛ-halʋ lɩmaɣza nɛ ɛɖʋ-ɩ ɖɔɖɔ hɩɖɛ. Abalʋ weyi ɛmaɣzɩɣ ɛ-halʋ yɔɔ camɩyɛ yɔ, pɩwɛɛ se ɛtɩlɩ labʋ alɩwaatʋ ndʋ ɛɛsɩɣnɩ halaa lalaa yaa ɛ nɛ wɛ palakɩ tʋmɩyɛ naɖɩyɛ yɔ. Pɩtɩpɔzɩ se ɛcɩbɩyɩɣ-wɛ ɛsa yaa pɔ-tɔm ɩcɛyɩ ɛ-ɛsɩndaa nɛ pɩkpaɖɩ ɛ-halʋ. Mbʋ ɖɔɖɔ pɩwɛɛ se ɛkpa ɛ-tɩ nɛ wɛtʋ ndʋ, alɩwaatʋ ndʋ ɛlakɩnɩ tʋmɩyɛ pɔrtaabɩlɩ, Intɛrnɛɛtɩ yaa Réseaux sociaux waa yɔ. (Yɔɔb 31:1) Pɩwɛɛ se ɛkɛ weyi eheyiɣ toovenim ɛ-halʋ paa ɛzɩmtaa yɔ, mbʋ pʋyɔɔ yɔ pɩtasɩna se ɛsɔɔlɩ-ɩ lɛ, ɛsɔɔlɩ Ɛsɔ nɛ ɛpaɖɩɣ ɖɔɖɔ kɩdɛkɛdɩm.​—Keɣa 18:15; 96:10. w18.09 29 § 3-4

Ɛbɛ yɔɔ pɩwɛ kaɖɛ se ɖɩɖɔ tɔm ndʋ ɖɩkpɛlɩkɩɣ Bibl taa yɔ tɩ-yɔɔ? Lɩmaɣza wena a-yɔɔ pɩwɛ-ɖʋ kaɖɛ yɔ a-taa naɖɩyɛ lɛ se pɩpɔzʋʋ-ɖʋ tɩ luzuu pʋcɔ nɛ ɖɩpɩzɩ nɛ ɖɩla mbʋ pɩwɛ ɖeu yɔ. Nɛ pɩwɛ kaɖɛ se ɖɩwɛɛnɩ tɩ luzuu. “Wayɩ wayɩ wɛɛ” anɛ a-taa ɛyaa mba pɔcɔ-ɖʋ nɛ pata yɔ, ‘panɩɣnɩ pa-tɩ yeke, pɛwɛ liidiye laɣzaɣ sɔsɔɔ, pɛkɛ abɛlɛɛ tɩnaa, pakpazɩɣ pa-tɩ’ nɛ ‘paapɛŋ pa-tɩ pʋyʋ.’ (2 Tim. 3:​1-3) Alɩwaatʋ ndʋ pɔyɔɔdʋʋ piɖeni men-ɖeke wɛtʋ tɔm yɔ, Ɛsɔ sɛyʋ nɔɔyʋ pɩzɩɣ nɛ ɛpaɖɩ-tʋ. Ɛlɛ ɛtɩtɩlɩ labʋ yɔ, e-liu tɛɛ pɩzɩɣ nɛ pɩpaɣzɩ kɔtɩnʋʋ mbʋ wɛtʋ ndʋ tɩkɔŋna yɔ. (Keɣsi 36:1; 72:3) Halɩ nɔɔyʋ pɩzɩɣ nɛ ɛpɔzɩ se: ‘Ye mansɩɣ lalaa kɛzɛɣa kajalaɣ lone taa, pɩwazɩɣ-m we? Ye mancakɩ wezuu ɛzɩ “tɔyaɣ” yɔ, piyeki nɛ lalaa ɩɩtasɩɣ-m ñam na? Ye ɖiyeba nɛ ɛjaɖɛ yɔɔ piɖeni men-ɖeke wɛtʋ ndʋ tɩwɛɛnɩ ɖoŋ ɖɔ-yɔɔ yɔ, pɩpɩzɩɣ nɛ pɩwɛɛkɩ taabalɩyɛ kɩbanɖɛ nɖɩ ɖɩwɛ ɖa nɛ ɖo-koobiya ɖɛ-hɛkʋ taa yɔ nɛ ɖilesi ɖɔɖɔ Krɩstʋ wɛtʋ kɩbandʋ ndʋ ɖɩwɛna yɔ. Ɛlɛ ye ɖɩkpɛlɩkɩɣ nɛ ɖɩmaɣzɩɣnɩ kɩɖaŋ kɩbaŋ weyi ɩwɛ Bibl taa yɔ, ɖɩkaɣ hiɣu wazasɩ sakɩyɛ. w18.09 3 § 1

Yehowa ɖeke kaawɛna pʋcɔ nɛ ɛpaɣzɩ ­won­du lɩzʋʋ, ɛlɛ ɛtaamaɣzɩɣ e-ɖeke ɛ-yɔɔ. Ɛha wezuu e-­won­du kɩlɩzɩtʋ ndʋ tɩsɩm lɔŋ yɔ, pʋ-tɔbʋʋ se Ɛsɔ tiyiyaa nɛ ɛyaa. “Ɛsɔ koboyaɣ tʋ” Yehowa sɔɔlaa se ɛha e-­won­du kɩlɩzɩtʋ mbʋ pɩwɛ ɖeu yɔ. (1 Tim. 1:​11; Yak. 1:​17) Nɛ ɛsɔɔlaa se ɖɩwɛɛ taa leleŋ taa, pʋyɔɔ ɛwɩlɩɣ-ɖʋ se ɖɩkɛ kʋjɔŋ laɖaa. (Roma 1:​20). Ɛsɔ lɩzɩ ɛyʋ ɛ-lɛzʋʋ. (Kiɖe 1:​27) Pɩwɩlɩɣ se Ɛsɔ lɩzɩ-ɖʋ se ɖɩpɩzɩ nɛ ɖɩmaɣzɩnɩ-ɩ nɛ ɖɩwɛɛnɩ ɛ-wɛtʋ. Pɩsa nɛ ɖihiɣ taa leleŋ nɛ koboyaɣ lɛ, pɩcɛyaa se ɖɩmaɣzɩnɩ Yehowa kɩɖaʋ pɩtɩŋnɩ ɛzɩma ɖɩmaɣzɩɣ lalaa yɔɔ nɛ ɖɩsɔɔlʋʋ faaa nɛ ɖɩlakɩ-wɛ kʋjɔŋ yɔ pɩ-yɔɔ. (Fil. 2:​3, 4; Yak. 1:5) Ɛbɛ yɔɔ? Tobi lɛ, mbʋ Yehowa lɩzɩ-ɖʋ. Paa ɖɩtɩtalɩ pilim yɔ, ɖɩpɩzɩɣ nɛ ɖɩmaɣzɩnɩ Yehowa, kʋjɔŋ labʋ hɔɔlʋʋ taa. Yehowa sɔɔlaa se ɖɩmaɣzɩnɩ-ɩ, nɛ pʋyɔɔ lɛ, ɛ-taa lakɩ leleŋ alɩwaatʋ ndʋ ɛnaɣ se ɖɩkɛ kʋjɔŋ laɖaa yɔ.​—Efɛz. 5:1. w18.08 18-​19 § 1-2, 4

Pɩtasɩna se Krɩstʋ wayɩ tɩŋɩyaa nɩɣ Yesu nɔɔ taa tɔm nɛ pawɩlɩɣ se pewelisiɣni-i lɛ, pɔɖɔŋ ɖɔɖɔ tɩ-yɔɔ. Paakaŋ pa-lɩmaɣza “wezuu caɣʋ taa nɩɣzɛ” yɔɔ. (Luka 21:34) Ɛlɛ pakaŋ ñʋʋ nɛ paɣtʋ ndʋ Yesu ɖʋ-wɛ yɔ tɩ-yɔɔ ɖɔm, halɩ pɩkpɛndɩnɩ wɛtʋ kaɖɛ ñɩndʋ taa. Ðo-koobiya ɖɔkʋʋ pe-siɣsiɣ wɛtʋ kpam Yehowa ɛsɩndaa, paa kaɖɛ nɖɩ pakatɩɣ yɔ. Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖiwelisiɣni Yesu yɔ lɛ se ɖɩɖʋʋ nesi mba ɛlɩzaa se pɛɖɛɛ-ɖʋ nɔɔ yɔ. (Ebr. 13:​7, 17) Pɩnzɩ nzɩ sɩɖɛwa yɔ sɩ-taa, ɛgbɛyɛ labɩ lɛɣzɩtʋ sakɩyɛ. Tɩ-taa natʋyʋ lɛ se ɖɩlabɩnɩ tʋmɩyɛ tɔm susuu ­won­du kɩfatʋ nɛ tɔm susuu nʋmɔŋ kɩfaŋ, kpɩtaʋ hɛkʋ taa kediɣzaɣ ɖʋtʋ kɩfatʋ, Kpaamɩŋ maʋ, ɩ-ñɔɔzʋʋ nɛ ɩ-yɔɔ cɔnʋʋ ɖʋtʋ kɩfatʋ. Ða-taa wɛ leleŋ kpem nɛ ɛzɩma peɖiyiɣ-ɖʋ nɛ sɔɔlɩm nɛ pamaɣzɩɣ ɖɔ-yɔɔ camɩyɛ yɔ! Pɩtʋʋ fɛyɩ se Yehowa kaɣ wazʋʋ pana wena ɖɩñakɩ se ɖɩɖɔ lɔŋ weyi ɛ-ɛgbɛyɛ tasɩɣ-ɖʋ alɩwaatʋ kɩbandʋ yɔɔ yɔ a-yɔɔ. w19.03 10-​11 § 11-​12

Kɛdaɣ ŋga ka-taa toovenim tɔm wɛ pazɩ yem yɔ, kapɩzɩɣ nɛ kelesi ɛyʋ kiya. Yele nɛ ɖɩna mbʋ pɩtalɩ Izrayɛɛlɩ piya alɩwaatʋ ndʋ paawɛ Yɔɔrdaŋ Pɔɔ wayɩ nɛ wɩsɩ ɖɩɖʋyɛ taa kiŋ yɔ. (Yoz. 22:​9-​34) Panɩwa se po-koobiya Izrayɛɛlɩ piya nzɩ sɩwɛ wɩsɩ ɖɩlɩyɛ taa yɔ pama altaaru sɔsɔʋ nakʋyʋ. Toovenim, pɩlabɩ mbʋ. Mba paawɛ wɩsɩ ɖɩɖʋyɛ taa kiŋ yɔ, patɩnɩɩ tɔm taa camɩyɛ, pʋyɔɔ pamaɣzaa se mba pɛwɛ wɩsɩ ɖɩlɩyɛ taa yɔ pakaɖɩɣnɩ Yehowa. (Yoz. 22:​9-​12) Pɩlabɩ ɖeu se pʋcɔ nɛ pakʋyɩ se powoki nɛ poyooni-wɛ lɛ, petiyi abalaa nabɛyɛ mba pataɣaɣ-wɛ liu yɔ se powolo nɛ pana se lɩmaɣza wena paawɛna yɔ, akɛ toovenim na. Powoba lɛ, tɔm ndʋ panɩwa? Izrayɛɛlɩ piya nzɩ sɩwɛ wɩsɩ ɖɩlɩyɛ taa yɔ, sɩtɩma altaaru se sɩlaa kɩlaŋ kɩ-yɔɔ. Ɛlɛ sɩma-kʋ se alɩwaatʋ kaaɖɛɣ lɛ, ɛyaa kpeekpe ɩtɩlɩ se nzɩ ɖɔɖɔ sɩɩwɛ siɣsiɣ Yehowa ɛsɩndaa. Pɩlabɩ ɖeu kpem se Izrayɛɛlɩ piya nzɩ sɩɩwɛ wɩsɩ ɖɩɖʋyɛ taa yɔ, sɩtɩkʋyɩ kpaagbaa se siyooni si-koobiya, ɛlɛ sɩkpaɣ alɩwaatʋ nɛ sɩtazɩ se sɩna se tɔm ndʋ sɩnɩwa yɔ, tɩkɛ toovenim na! w18.08 5 § 9-​10

Ɛzɩ Pɔɔlɩ yɔɔdʋʋ yɔ, halɩ Ɛsɔ sɛyaa siɣsiɣ ñɩma pɩzɩɣ nɛ papaɣzɩ mbʋ pɩtɩtʋʋzɩ yɔ pɩ-labʋ. Mba pɔtɔlʋʋ kpaca ŋgʋ kɩ-taa yɔ, papɩzɩɣ nɛ pamaɣzɩ se pɩɩwɛɛkɩɣ pa nɛ Yehowa pa-taabalɩyɛ. Ɛlɛ, nɔɔyʋ ɛsɔɔlɩ yem se ɛkɛ Yehowa taabalʋ yaa ɛmaɣzɩɣ se ɛwɛ siɣsiɣ ɛ-ɛsɩndaa yɔ, pɩtɩwɩlɩ se toovenim taa lɛ, taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa. (1 Kɔr. 10:​1-5) Ɛzɩ Izrayɛɛlɩ Piya ɛsa kaañɩŋʋʋ se Moyizi kpa Sinayii pʋʋ ñʋʋ taa nɛ ɛtɩpɩsɩ lɔŋ yɔ, mbʋ ɖɔɖɔ sɔnɔ Krɩstʋ ñɩma ɛsa pɩzɩɣ nɛ pɩñɩŋ se Yehowa tɔm hʋʋ kɩyakʋ yaa ɛjaɖɛ kɩfaɖɛ ɛɛkɔŋ lɔŋ. Pɩpɩzɩɣ nɛ pɩlakɩ-wɛ ɛzɩ lidaʋ tɔm ndʋ, pɩtɩkɛ lɛɛlɛɛyɔ tɩkaɣ labʋ yaa papaɣzɩ pɩtʋʋ se tɩɩkaɣ labʋ. Ye ɖɩtɩcɔnɩ wɛtʋ ndʋ ti-ɖeɖe lɔŋ yɔ, lɩmaɣza ana apɩzɩɣ ayele nɛ ɖɩɖɛzɩ tomnaɣ sɔɔlɩm labʋ nɔɔ nɛ ɖɩsɩɩ Yehowa sɔɔlɩm labʋ wayɩ. Pazɩ pazɩ lɛ, ɖɩpɩzɩɣ nɛ ɖiposi ɖa-tɩ nɛ Yehowa nɛ ɖɩkɔɔ ɖɩpaɣzɩ labʋ mbʋ ɖɩtaamaɣzɩ kaaʋ se ɖɩpɩzɩɣ nɛ ɖɩla alɩwaatʋ ndʋ ɖɩɩwɛ ɖoŋ fezuu taa yɔ. w18.07 21 § 17-​18

Ðɩpɩzɩɣ nɛ ɖihiɣ wazasɩ sakɩyɛ alɩwaatʋ ndʋ Yehowa tɩlɩɣ-ɖʋ yɔ. Ɛlɛ, ɛbɛ pɩwɛɛ se ɖɩla nɛ piyele nɛ Yehowa tɩlɩ-ɖʋ? Pɩwɛɛ se ɖɩsɔɔlɩ-ɩ nɛ ɖɩcɛlɩ-ɩ ɖe-wezuu kpeekpe. (1 Kɔr. 8:3) Paa mbʋ yɔ, pɩcɛyaa ɖɔɖɔ se ɖitaayele nɛ nabʋyʋ wɛɛkɩ ɖa nɛ ɖa-Caa weyi ɛwɛ ɛsɔdaa yɔ, ɖa-taabalɩyɛ. Ɛzɩ Galaatii ñɩma mba Pɔɔlɩ kaama takayaɣ yɔ, pɩwɛɛ se ɖa ɖɔɖɔ ɖɩtaakɛ ɛjaɖɛ yɔɔ “­won­du ndʋ tɩfɛyɩ ɖoŋ nɛ tɩtɩkɛ pʋyʋ yɔ” ti-yomaa, nɛ ɖɩtaañɩnɩ ɖɔɖɔ ɖɩ-ɛsɩmɩyɛ. (Gal. 4:9) Kajalaɣ pɩnzɩ mɩnʋʋ taa Krɩstʋ ñɩma mba Pɔɔlɩ ma-wɛ tɔm ndʋ yɔ, paaɖɛnɩ ɛsɩndaa fezuu taa nɛ halɩ Ɛsɔ sɩm-wɛ. Paa mbʋ yɔ, Pɔɔlɩ yɔɔdaa se koobiya mba, ‘paɖaɣnɩ pɩsʋʋ’ ­won­du ndʋ tɩtɩlɩɩ pʋyʋ yɔ, tɩ-wayɩ. Pɔɔlɩ yɔɔdɩ tɔm ndʋ yɔ, tɩwɩlɩɣ se ɛwɛɛ nɛ eheyiɣ-wɛ se: “Ɩtɛm yebu kɩmɛlɛndʋ nɛ falaa ­won­du ɖooo poliŋ taa; ɛbɛ yɔɔ ɩɖaɣnɩɣ pɩsʋʋ tɩ-wayɩ?” w18.07 8 § 5-6

Toovenim lɛ, pɩtɩcɛyɩ se ɖɩsʋʋ kʋñɔmɩŋ weyi Ɛsɔ paɣtʋ yɔɔ maʋ kɔŋna yɔ ɩ-taa pʋcɔ nɛ ɖɩkpɛlɩkɩ lɔŋ. Ðɩpɩzɩɣ ɖɩkpɛlɩkɩ lɔŋ mba pamanɩ Ɛsɔ paɣtʋ yɔɔ nɛ pama pɔ-tɔm Bibl taa yɔ, pɔ-cɔlɔ. Pɩtʋʋ fɛyɩ se ­ɖɩkpɛlɩkɩɣ lɔŋ sakɩyɛ tɔm ndʋ Ɛsɔ wɩlɩɣ-ɖʋ yɔ tɩ-taa alɩwaatʋ ndʋ ɖɩkalɩɣ nɛ ɖɩmaɣzɩɣ ɛyaa wezuu caɣʋ kɛdɛsɩ nzɩ sɩwɛ Bibl taa yɔ, sɩ-tɔm yɔ. Ðɩkpaɣ kɩɖaʋ kʋnɛ: Maɣzɩ wɩzasɩ nzɩ Wiyaʋ Daviid nɩwa alɩwaatʋ ndʋ ɛmanɩ Ɛsɔ paɣtʋ yɔɔ yɔ, sɩ-yɔɔ nɛ ŋna. (2 Sam. 12:​7-​14) Ðɩɩkalɩɣ nɛ ɖɩmaɣzɩɣ kɛdaɣ ŋga kɔ-yɔɔ lɛ, ɖɩpɩzɩɣ nɛ ɖɩpɔzɩ ɖa-tɩ se: ‘Wiyaʋ Daviid manɩ Ɛsɔ paɣtʋ yɔɔ nɛ ɛsʋʋnɩ Batseeba nɛ wɩzasɩ nzɩ pɩkɔnɩ-ɩ yɔ, ɛzɩma ɛpɩzaɣ se ɛfɛɛ-sɩ? Ye mankatɩ takɩm nabʋyʋ mbʋ, mankaɣ pɩzʋʋ nɛ malɩɩ pɩ-taa? Mankaɣ pɩzʋʋ nɛ mense ɛzɩ Yosɛɛfʋ yɔ yaa mankaɣ man-tɩ yebu ɛzɩ Daviid yɔ?’ (Kiɖe 39:11-​15) Ye ɖɩmaɣzɩɣ kʋñɔmɩŋ weyi kɩdɛkɛdɩm kɔŋna yɔ ɩ-yɔɔ yɔ, pɩkaɣ-ɖʋ sɩnʋʋ nɛ ‘ɖɩpaɖɩ kɩdɛkɛdɩm.’​—Am. 5:​15. w18.06 17 § 5, 7

Ðoŋ ɖoŋ lɛ, mulum lakasɩ yekina nɛ ɛyaa paɣzɩ sɔɔlʋʋ politiki labʋ. Yesu alɩwaatʋ taa lɛ, lambuu hɛyʋʋ kɔŋnaɣ nɔɔhɔnɖɛ ɛyaa hɛkʋ taa siŋŋ. Ɛyaa mba paawɛ Roma kewiyaɣ tɛɛ, pɩkpɛndɩnɩ mba pewelisaɣni Yesu yɔ, pɔpɔzaɣ-wɛ se pɛhɛyɩ lambuu ­won­du sakɩyɛ yɔɔ; ɛzɩ tadɩyɛ ­won­du, tɛtʋ yaa ɖɩsɩ yɔɔ mbʋ yɔ. Nɛ ɛzɩma lambuu mʋyaa ñaawɛnɩ ɖɔɖɔ mulum lakasɩ yɔ, pɩɩpɩsɩ samaɣ tɩŋa sʋʋtʋ sɔsɔtʋ. Pɩtɩŋnɩ mulum lakasɩ yɔɔ lɛ, papɩsɩ ñɩm tɩnaa nɛ ɛyaa ñaŋ-wɛ siŋŋ. Zaasee weyi ɛɛkɛ lambuu mʋyaa ñʋʋdʋ Yeriikoo tɛtʋ taa yɔ, ­ɛtɩŋnɩ liidiye nɖɩ emuli samaɣ nɛ ɛmʋ yɔ ɖɩ-yɔɔ nɛ ɛpɩsɩ ñɩm tʋ. (Luka 19:​2, 8) Nɛ mbʋ ɖɔɖɔ ɛyaa sakɩyɛ lakaɣ alɩwaatʋ ndʋ. Yesu koyindinaa ñɩnaɣ se pepeɣzi-i nɛ ɛɖʋ ɛ-nɔɔ lambuu hɛyʋʋ tɔm taa. Lambuu ŋgʋ kɩɩkɛ liidiye dinaarɩ kʋɖʋmʋʋ ŋgʋ pɩɩwɛɛ se paa Roma kewiyaɣ tɛɛ tʋ weyi lɛ ɛhɛyɩ yɔ. (Mat. 22:16-​18) Lambuu hɛyʋʋ mbʋ pɩtaakɛdɩnɩ kɔzɩ kɔzɩ Yuuda ñɩma. Mbʋ pʋyɔɔ yɔ pɩwɩlaɣ se pɛwɛ Roma kewiyaɣ tɛɛ. w18.06 5-6 § 8-​10

Sataŋ wayɩ tɩŋʋʋ kɔŋnɩ asɛyʋʋ. (Yɔɔb 21:​7-​17; Gal. 6:​7, 8) Ye ɖɩsɩm ɛzɩma Sataŋ lakɩnɩ e-ɖoŋ tʋmɩyɛ yɔ, ɛzɩma pɩwazɩɣ-ɖʋ? Pɩsɩɣnɩ-ɖʋ se ɖɩwɛɛnɩ lɩmaɣza wena amʋnɩ camɩyɛ yɔ ɛjaɖɛ ñʋndɩnaa yɔɔ nɛ piseɣtiɣ-ɖʋ ɖɔɖɔ se ɖiwolo ɖɔ-tɔm susuu tʋmɩyɛ yɔɔ. Ðɩnɩɣ pɩ-taa se Yehowa sɔɔlaa se ɖɩña komina lone taa caɣyaa. (1 Pɩy. 2:​17) Ɛsɔɔlaa ɖɔɖɔ se ɖɩña kominawaa paɣtʋ ndʋ tɩɩkaɖɩɣnɩ ɛ-ñɩndʋ yɔ. (Roma 13:​1-4) Ɛlɛ pɩwɛɛ se ­ɖɩtaaɖʋ ɖɔ-nɔɔ politiki tɔm taa nɛ ɖɩtaamaɣzɩ kaaʋ se politiki ɛgbɛyɛ naɖɩyɛ yaa politiki ɛgbɛyɛ ñʋʋdʋ nɔɔyʋ wɛ ɖeu nɛ pɩkpaɖɩ lɛlʋ. (Yoh. 17:15, 16; 18:36) Ðɩnawa se Sataŋ wɛɛ nɛ ɛñakɩ pana se episi Yehowa hɩɖɛ, pʋyɔɔ lɛ piseɣtiɣ-ɖʋ se ɖɩwɩlɩ lalaa toovenim tɔm pɩlɩɩnɩ ɖɛ-Ɛsɔ yɔɔ. Pɩkɛnɩ-ɖʋ taa leleŋ siŋŋ se payaɣ-ɖʋ nɛ ɛ-hɩɖɛ nɛ ɖɩlakɩnɩ-ɖɩ tʋmɩyɛ, nɛ ɖɩnawa se ye ɖɩsɔɔlɩ Yehowa yɔ, ɖihikiɣ wazasɩ nɛ pɩkɩlɩ kɛzɛsɩ nzɩ ñɩm kɔŋna yɔ.​—Iza. 43:10; 1 Tim. 6:​6-​10. w18.05 24 § 8-9

Ye tɔm ɛkɔma, ɖama yaʋ pɩzɩɣna nɛ pɩñɔɔzɩ-tʋ yaa we? Bibl tɩha nɔɔyʋ nʋmɔʋ se ɛ nɛ ɛ-tɛŋga paya ɖama tɔm natʋyʋ yɔɔ. Pɔɔlɩ mawa se: “Ye halʋ nɔɔyʋ ɛwɛnɩ walʋ weyi ­eetisiɣ Kɩbaɣlʋ yɔɔ nɛ walʋ ɛnʋ ɛsɔɔlɩ se ɛ nɛ ɩ pɛwɛɛ yɔ, etaayele ɛ-walʋ.” (1 Kɔr. 7:​12, 13) Tɔm ndʋ titukuuni-ɖʋ sɔnɔ ɖɔɖɔ. Hɔɔlɩŋ nɩɩyɩ taa lɛ, walʋ weyi “eetisiɣ Kɩbaɣlʋ yɔɔ” yɔ, ɛ-lakasɩ pɩzɩɣ nɛ pɩwɩlɩ se ­ɛtɩtasɩ sɔɔlʋʋ se ɛ nɛ ɛ-halʋ pɛwɛɛ ɖama cɔlɔ. Ɛpɩzɩɣ nɛ ɛnazɩɣ ɛ-halʋ siŋŋ nɛ halɩ ɛlɛ wezuu sʋʋ kaɖɛ taa. Ɛpɩzɩɣ nɛ ekizi se ɛɛtasɩɣ ɛ-kɩcɛyɩm nɛ hɔʋ ñɩmbʋ ɖeɖe cɔnʋʋ yaa ɛkaɖɩɣnɩ ɛ-Ɛsɔ sɛtʋ. Krɩstʋ ñɩma nabɛyɛ kpaɣ lɩmaɣza se ɛzɩma pɛ-tɛŋga tɩsɔɔlɩ se pa nɛ kɛ patasɩ wɛʋ ɖama cɔlɔ yɔ pʋyɔɔ lɛ, payaɣ ɖama. Ɛlɛ Krɩstʋ ñɩma lalaa lɛ, pɔɖɔkɩ pa-tɩ kala taa nɛ palakɩ po-ɖoŋ ɖeɖe se piyele nɛ tɔm ñɔɔzɩ. w18.12 13 § 14, 16; 14 § 17

Ðomaɣ ɖuyu kɩɖaʋ ŋgʋ kɩwɛ Luka 8:​5-8, 11-​15 taa yɔ, ɖomaɣ sɩŋnɩ “Ɛsɔtɔm,” yaa Kewiyaɣ tɔm. Tɛtʋ sɩŋnɩ ɛyʋ laŋɩyɛ. Ðomaɣ piye nɖɩ ɖɩtɔlɩ tɛtʋ kɩbandʋ yɔɔ yɔ, ɖɩñɔwa lɛ, ɖɩpaɣlɩ nɛ “ɖɩlʋlɩ pee mɩnʋʋ.” Ɛzɩ Yesu kɩɖaʋ taa tɛtʋ kɩbandʋ yebu nɛ ɖomaɣ piye ñɔ camɩyɛ yɔ, mbʋ ɖɔɖɔ ɖitisaa nɛ Kewiyaɣ tɔm la tʋmɩyɛ ɖa-laŋɩyɛ yɔɔ nɛ ɖɩñɔɔnɩ-tʋ kpam. Mbʋ pɩlɩ pɩ-taa yɔ lɛ se Kewiyaɣ ɖomaɣ piye ñɔ ɖa-taa nɛ ɖɩpaɣlɩ nɛ ɖɩka lila ɛzɩ mɩɖɛ yɔ nɛ alɩwaatʋ kɔɔ nɛ tɩtalɩ se nɖɩ ɖɔɖɔ ɖɩpaɣzɩ pee lʋlʋʋ. Mɩɖɛ ɛɛlʋlʋʋ mɩla tɩŋ lɛɛŋ, ɛlɛ mɩla pee lɛɛna ɖɩlʋlʋʋ, pɩwɩlɩɣ se ɖa ɖɔɖɔ ɖɩɩlʋlʋʋ tɔm mʋyaa kɩfama ɛlɛ ɖɩlʋlʋʋ Kewiyaɣ pee kɩfana. Ɛzɩma tɩyɛ ɖɩlʋlʋʋ Kewiyaɣ pee kɩfana? Paa nʋmɔʋ ŋgʋ yɔɔ ɖɩtɩŋɩɣna nɛ ɖisusuu Kewiyaɣ tɔm yɔ, pɩwɩlɩɣ se ɖiɖiɣni mɩzʋʋ Kewiyaɣ ɖomaɣ ŋga paaɖuu ɖa-laŋɩyɛ taa yɔ. (Luka 6:​45; 8:1) Ye mbʋ kɩɖaʋ kʋnɛ kɩkpɛlɩkɩɣ-ɖʋ se alɩwaatʋ ndʋ ɖɩwɛɛ nɛ ɖiwoki pɩ-yɔɔ nɛ ɖisusuu Kewiyaɣ tɔm yɔ, pɩwɩlɩɣ se ɖɩwɛɛ nɛ ɖɩlakɩ “camɩyɛ lakasɩ nɛ abalɩtʋ” yaa ɖɩwɛɛ nɛ ɖɩlʋlʋʋ pee nɛ abalɩtʋ. w18.05 14 § 10-11

Pɩtasɩnɩ se Pɔɔlɩ kaasɔɔlɩ faaa se ɛkpazɩ e-koobiya ɖoŋ lɛ, ɛɛsɔɔlɩ ɖɔɖɔ siŋŋ se ‘ɛcɛlɩ mbʋ ɛwɛna yɔ nɛ halɩ pɩkpɛndɩnɩ e-keem’ pɔ-yɔɔ. (2 Kɔr. 12:15) Mbʋ ɖɔɖɔ pɩtasɩnɩ pɔ-tɔm pee kɩbana lɛ, ɛzʋtʋyaa lakɩ ɖɔɖɔ mbʋ payɩ papɩzɩɣ yɔ se pakpazɩ po-koobiya ɖoŋ nɛ pawɩlɩ-wɛ se pɔsɔɔlɩ-wɛ pɩdɩɩfɛyɩ. (1 Kɔr. 14:⁠3) Nabʋyʋ taa pɩpɔzʋʋ se patasɩ nɔɔyʋ lɔŋ nɛ pɩkpazɩ-ɩ ɖoŋ, ɛlɛ hɔɔlʋʋ kʋnɛ kɩ-taa ɖɔɖɔ lɛ, pɩpɔzʋʋ se ɛzʋtʋyaa ɩmaɣzɩnɩ Bibl taa kɩɖaŋ weyi ɩyɔɔdʋʋ ɛzɩma papɩzɩɣ nɛ pala mbʋ yɔ. Yesu sɩba nɛ pefezi-i wayɩ lɛ, ɛha kɩɖaʋ kɩbaŋʋ ŋgʋ kɩkpaɖaa yɔ. Pɩɩpɔzaa se ɛtasɩ lɔŋ Aazii Cikpeluu taa agbaa naayɛ ɛlɛ yʋsɩ ɛzɩma ɛkpaɣnaa yɔ. Pʋcɔ nɛ ɛtasɩ agbaa wena aawɛ Efɛɛzɩ, Pɛɛrɩgam, nɛ Tiyaatiiri lɔŋ lɛ, ɛsam-yɛ. (Natʋ 2:​1-5, 12, 13, 18, 19) Pɩwɛɣ ɖeu se ɛzʋtʋyaa ɩmaɣzɩnɩ Yesu alɩwaatʋ ndʋ paatasɩɣ nɔɔyʋ lɔŋ yɔ. w18.04 22 § 8-9

Lʋlɩyaa, pɩtʋʋ fɛyɩ se ɩlakɩ mbʋ payɩ ɩpɩzɩɣ yɔ se ɩkandɩyɩ mi-piya yɔɔ se kʋdɔŋ nakʋyʋ ɛtaakpa-sɩ. Ɩcɔŋnɩ mɩ-ɖɩsɩ yɔɔ se sɩwɛɛ cɩɖɩ cɩɖɩ nɛ ɩlɔʋ mbʋ payɩ pɩwɛ sɩ-taa nɛ pɩpɩzɩɣ se pɩkɔnɩ-mɩ yaa mi-piya kʋdɔŋ yɔ. Mbʋ ɖɔɖɔ pɩwɛɛ se ɩkandɩyɩ mi-piya yɔɔ nɛ sɩkpa sɩ-tɩ nɛ filimwaa, teelee yɔɔ ɖʋtʋ, aleɣya ­won­du nɛ intɛrnɛɛtɩ lona wena apɩzɩɣ nɛ ayele nɛ sɩwɛɛnɩ Sataŋ maɣzɩm yɔ. Yehowa ha-mɩ waɖɛ se ɩcɔnɩ mi-piya tɛ fezuu taa alaafɩya yɔɔ camɩyɛ. (Adu. 1:8) Pʋyɔɔ lɛ, sɔɔndʋ ɛtaakpa-mɩ se ­ɩtɩŋnɩ Bibl paɣtʋ kila yɔɔ nɛ ɩɖʋ mɩ-hɔʋ taa ñɩma paɣtʋ. Ɩsɩnɩ mi-piya nɛ sɩtɩlɩ mbʋ sɩpɩzɩɣ nɛ sɩcɔna nɛ mbʋ pɩfɛyɩ ɖeu se sɩcɔna yɔ, nɛ ɩsɩnɩ-sɩ ɖɔɖɔ nɛ sɩnɩɩ mbʋ pʋyɔɔ ɩɖʋ paɣtʋ ndʋ yɔ pɩ-taa. (Mat. 5:​37) Piya wɛɣ nɛ ­sɩpaɣlɩɣ lɛ, ɩsɩnɩ-sɩ nɛ sɩ-maɣmaɣ sɩtɩŋnɩ Bibl paɣtʋ kila yɔɔ nɛ sɩtɩlɩ mbʋ pɩwɛ ɖeu nɛ mbʋ pɩfɛyɩ ɖeu yɔ. (Ebr. 5:​14) Ɩtaasɔɔ se mi-piya kaɣ kpɛlɩkʋʋ lɔŋ sakɩyɛ tɔm ndʋ iheyiɣ-sɩ yɔ tɩ-taa, ɛlɛ mɩ-lakasɩ kaɣnɩ-sɩ sɩnʋʋ nɛ pɩkpaɖɩ.​—Wp. 6:​6, 7; Roma 2:​21.w19.01 16 § 8

Ye ŋkɛ pɩɣa evelaɣ yɔ, pɩɩwɛɣ ɖeu se ŋɖʋ ña-tɩ kaɖʋwa se ŋñɔtʋʋnɩ akpadɩyaa nɛ pɩkɩlɩ? Ŋpɩzɩɣ ŋpɔzɩ-wɛ nɛ ñamtʋ se pɛkɛdɩ-ŋ pɩnzɩ nzɩ pɛtɛm labʋ Yehowa ɛgbɛyɛ taa yɔ sɩ-tɔm. Pɩkaɣ-ŋ kpazʋʋ ɖoŋ nɛ piseɣti mɩ-tɩŋa nɛ iyele nɛ toovenim mintʋsʋʋ ñandɩ. Nɛ ɖa-taa paa anɩ pɩzɩɣ nɛ ɛmʋ ɛyaa kɩfama mba pɔkɔŋ ɖe-kediɣzisi yɔ nɛ sɔɔlɩm. Ye paha-ŋ waɖɛ se ŋcɔŋnɩ tɔm susuu kediɣzisi yɔɔ yɔ, ŋpɩzɩɣ nɛ ŋla nabʋyʋ nɛ ŋsɩnɩ akpadɩyaa nɛ posusi tɔm. Pɛwɛnɩ kookasɩ nzɩ sɩmʋnɩ pɛ-wɛtʋ camɩyɛ yɔ? Ŋpɩzɩɣ ŋlɩzɩ pɩɣa evelaɣ ­nakɛyɛ nɛ ka nɛ akpadɩyʋ powolo tɔm susuu; piyeki nɛ kaɖʋ-ɩ nesi tomnaɣ yɔɔ. Ŋpɩzɩɣ ŋsɩnɩ ɖɔɖɔ mba pɛfɛyɩnɩ tomnaɣ taa alaafɩya camɩyɛ yaa pɛ-wɛtʋ ɛɛhaɣ-wɛ nʋmɔʋ se pala tʋma sakɩyɛ yɔ. Ɛɛɛ, ñɛ-wɛtʋ ­kɩbandʋ nɛ ña-sɩnʋʋ pɩzɩɣ nɛ pɩkpazɩ ɖoŋ piya evelisi nɛ akpadɩyaa, ɛyaa kɩfama nɛ mba peleɖi toovenim taa yɔ se posusi tɔm kɩbandʋ nɛ ­kpekpeka.​—Lev. 19:32. w18.06 23-​24 § 10-​12

Pɩfɛyɩ se ɖiyele nɛ wazasɩ nzɩ sɩm nɛ kɩdɛkɛdɩm yomiye taa lɩʋ kɔŋna yɔ, ɖɩkɔɔ nɛ ɖilesi-sɩ. Pɩtɩŋnɩ kɩhɛyʋʋ pʋ-ñʋʋ taa yɔɔ lɛ, ɖɩpɩzɩɣ nɛ ɖɩsɛɛ Ɛsɔ nɛ ɛhʋyɛ kɩbanɖɛ nɛ ɖihiɣ taa leleŋ. (Keɣa 39:⁠9) Pɩtasɩna se pɩcɛyaa se ɖɩwɩlɩ Ɛsɔ ɖɛ-ɛsɩmɩyɛ lɛ, pɩwɛɛ se ɖɩkpa ɖa-tɩ nɛ ɖɩtaalabɩnɩ ɖa-tɩ yɔɔ wɛʋ tʋmɩyɛ ɛzɩma pɩtɩpɔzɩ yɔ. Apostoloo Pɩyɛɛrɩ heyi-ɖʋ se tɩ-yɔɔ wɛʋ waɖɛ nɖɩ ɖɩwɛna yɔ, ɖɩkpa ɖa-tɩ nɛ ɖɩtaapɩsɩ-ɖʋ kawanaɣ nɛ ɖɩlakɩ ɖo-tomnaɣ sɔɔlɩm. Tɔm tʋnɛ tɩtɔzʋʋ-ɖʋ mbʋ pɩtalɩ Izrayɛɛlɩ piya kañɩmbusuu taa yɔ pɩ-yɔɔ. Nɛ kaɖɛ nɖɩ ɖitukuuni-ɖʋ ɖɔɖɔ, halɩ pɩtɩla lɛɛlɛɛyɔ pɩwɛɛ se ɖɩkpa ɖa-tɩ nɛ pɩkpaɖɩ. Wondu suu, tɩ ñɔɔzʋʋ, tɔɔnaɣ tɔʋ, sʋlʋm ñɔʋ, helim mʋʋ nɛ hɔɔlɩŋ lɛɛŋ taa lɛ, Sataŋ nɛ ɛ-ɛjaɖɛ pɔhɔŋ-ɖʋ se ɖɩkpaɣ lɩmaɣza wena aalakɩ nɔɔ kʋɖʋmaɣ nɛ Yehowa sɔɔlɩm yɔ. Ðoŋ ɖoŋ lɛ, nabɛyɛ tɩŋɩɣnɩ ajitu yɔɔ nɛ pepeɣziɣ ɛyaa se paya ­won­du ndʋ yɔ, toovenim taa lɛ, tɩ-tɔm tɩcɛyɩ siŋŋ. Ye ɖɩtɩtɩlɩ labʋ yɔ, ɖɩtɔlʋʋ pa-kpacanaa panɛ pa-taa nɛ ɖɩlabɩnɩ ɖa-tɩ yɔɔ wɛʋ tʋmɩyɛ ɛzɩma pɩtɩpɔzɩ yɔ. w18.04 10 § 7-8