Novembre

Alɩwaatʋ ndʋ ɖɩsɛɣ Yehowa yɔ ɖɩwɛnɩ lidaʋ se wiɖiyi ɖɩkaɣ wɛnʋʋ mbʋ payɩ Aɖam nɛ Ɛva pelesaa yɔ, pɩkpɛndɩnɩ tamtam wezuu caɣʋ waɖɛ. Aɖam nɛ Ɛva palɩzaa se paasɛɣ Yehowa, mbʋ pʋyɔɔ yɔ sɔɔlɩm mbʋ paasɔɔlɩnɩ-ɩ yɔ, pataacɛyɩsɩ-pʋ. Paa mbʋ yɔ, Yehowa ha-wɛ waɖɛ se pacaɣ wezuu nɛ pileɖi nɛ papɩzɩ pɛwɛɛnɩ piya nɛ peɖiyi-sɩ ɛzɩ pa-maɣmaɣ pɔsɔɔlʋʋ yɔ. Mbʋ pɩlɩ lɩmaɣza wena Aɖam nɛ Ɛva pakpaɣaa se Ɛsɔ etaaɖiyi-wɛ yɔ pɩ-taa yɔ, pɩwɩlɩ kpayɩ kpayɩ se kɩmɛlɛndʋ palaba. Pa-pɩɣa kajalaɣ ñɩŋga kʋ ke-neu ɖulum, nɛ alɩwaatʋ wɛɛ nɛ tɩɖɛɣ lɛ, puuyaɣ nɛ piɖeni men-ɖeke lakasɩ kɔɔ nɛ pɩtɔyɩ ɛjaɖɛ yɔɔ. (Kiɖe 4:8; 6:​11-​13) Paa mbʋ yɔ, Yehowa tɩŋnɩ nʋmɔʋ nakʋyʋ yɔɔ se ɛya Aɖam nɛ Ɛva pe-piya nzɩ sɩsɔɔlaa se sɩsɛɛ-ɩ yɔ sɩ-ñʋʋ. (Yoh. 6:​38-​40, 57) Ŋwɛɣ nɛ ŋkpɛlɩkɩɣ nɛ ŋtɩlɩɣ suuɖu nɛ sɔɔlɩm mbʋ Yehowa wɛna yɔ lɛ, pɩtʋʋ fɛyɩ se pɩkaɣ-ŋ seɣtuu se ŋsɔɔlɩ-ɩ nɛ pɩkpaɖɩ. Pɩkaɣ-ŋ seɣtuu ɖɔɖɔ se ŋkpaɣ lɩmaɣzɩyɛ se ŋŋmaɣzɩɣnɩ Aɖam nɛ Ɛva, ɛlɛ ŋkpakɩɣ ña-tɩ nɛ ŋha Yehowa. w19.03 2 § 3; 4 § 9

Pɩsa nɛ ŋnɩɩ lalaa siziŋ lɛ, ñaɣ pana nɛ ŋtɩlɩ kala wena ñɔ-hɔʋ taa ñɩma nɛ ño-koobiya Krɩstʋ ñɩma wɛɛ nɛ pakatɩɣ yɔ. Wɩlɩ se ŋmaɣzɩɣ ɛgbɛyɛ taa piya evelisi nɛ kʋdɔndɩnaa, mba pasʋtʋyaa yɔ, nɛ mba pelesi pɛ-ɛyʋ kʋsɔɔlʋ nɔɔyʋ yɔ pɔ-yɔɔ. Pɔzɩ-wɛ nɛ ŋtɩlɩ ɛzɩma pɩɖɔŋ yɔ. Welisini-wɛ camɩyɛ alɩwaatʋ ndʋ paaheyiɣ-ŋ ɛzɩma pɩlakɩ-wɛ yɔ. Yele nɛ peɖiɣzina se toovenim taa lɛ, ŋnɩɣ wɛtʋ ndʋ tɩ-taa pɛwɛɛ yɔ tɩ-taa. La mbʋ ŋpɩzɩɣ yɔ nɛ ŋsɩnɩ-wɛ. Ye ɖɩlakɩ mbʋ yɔ, ɖiɖiɣni tɩŋnʋʋ ɖa-lakasɩ yɔɔ nɛ ɖɩwɩlɩɣ-wɛ se ɖɩsɔɔlɩ-wɛ siŋŋ. (1 Yoh. 3:​18) Alɩwaatʋ ndʋ ɖɩñakɩ pana se ɖɩsɩnɩ lalaa yɔ, pɩcɛyaa se ɖɩkɛ ɛyaa mba panɩɣ tɔm taa yɔ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ ɛyaa katɩɣ wɛtʋ kaɖɛ ñɩndʋ yɔ, pa-lakasɩ wɛ ndɩ ndɩ. Nabɛyɛ sɔɔlɩ yɔɔdʋʋ faaa ɛlɛ lalaa lɛ, pɩwɛ-wɛ kaɖɛ. Pʋyɔɔ lɛ, paa ɖɩsɔɔlaa se ɖɩsɩnɩ-wɛ yɔ, pɩtɩpɔzɩ kpa se ɖɩpɔzɩ-wɛ tɔm ndʋ tɩcɛyɩɣ-wɛ yɔ. (1 Tes. 4:​11) Halɩ paa nabɛyɛ ɩsɔɔlɩ yɔɔdʋʋ ɛzɩma pɩlakɩ-wɛ faaa yɔ, pɩtɩla pɩtɩkɛ paa ɛzɩmtaa ɖa nɛ wɛ ɖɩpɩzɩɣ nɛ ɖɩwɛɛnɩ lɩmaɣza kʋɖʋma. Paa mbʋ yɔ, pɩcɛyaa se ɖɩtɔzɩ se mbʋ pɩlakɩ-wɛ. Ðɩsɔɔlaa se ɖɩwɛɛ kpekpeka tɔm welisuu taa nɛ ɖɩwɛɛ hɛɛɛ tɔm yɔɔdʋʋ taa.​—Mat. 7:1; Yak. 1:​19. w19.03 19 § 18-​19

Sɔɔndʋ kpaɣ-ŋ nɛ aseɣɖe lɩzʋʋ toovenim tɔm yɔɔ samaɣ taa? Tɔzɩ Nehemiya yɔɔ. Ɛɛlabɩ tʋmɩyɛ wiyaʋ sɔsɔ nɔɔyʋ ɖɩɣa taa. Nehemiya taa taala leleŋ alɩwaatʋ ndʋ ɛnɩwa se Yeruzalɛm kolonzi tɔlaa yɔ. (Neh. 1:​1-4) Maɣzɩ nɛ ŋna ɛzɩma ɛ-laŋɩyɛ kaamawa alɩwaatʋ ndʋ wiyaʋ pɔzɩ-ɩ se eheyi-i mbʋ pʋyɔɔ ɛɛwɛ ɛsɩñɩŋɩyɛ taa yɔ! Nehemiya labɩ adɩma kpaagbaa nɛ pʋwayɩ lɛ, ­ecosi-i. Piyeba nɛ wiyaʋ la ­nabʋyʋ nɛ ɛsɩnɩ Ɛsɔ samaɣ. (Neh. 2:​1-8) Maɣzɩ Yoonaasɩ yɔɔ ɖɔɖɔ. Alɩwaatʋ ndʋ Yehowa tiyi-i se ewolo nɛ ɛyɔɔdɩnɩ Niniivi mba yɔ, sɔɔndʋ kpa-ɩ nɛ ɛkpaɣ nʋmɔʋ nɛ ɛɖɛɛ ɛjaɖɛ lɛɛɖɛ taa. (Yon. 1:​1-3) Ɛlɛ Yehowa sɩnɩ Yoonaasɩ nɛ ɛpɩzɩ nɛ ɛla tʋmɩyɛ nɖɩ paɖʋ-ɩ yɔ. Nɛ tɔm ndʋ ɛyɔɔdaa yɔ, tɩwazɩ Niniivi mba siŋŋ. (Yon. 3:​5-​10) Nehemiya kɩɖaʋ kpɛlɩkɩɣ-ɖʋ se pɩcɛyaa se ɖɩtɩmɩ pʋcɔ nɛ ɖicosi tɔm yɔɔ. Nɛ Yoonaasɩ kɩɖaʋ ñɛkpɛlɩkɩɣ-ɖʋ se Yehowa pɩzɩɣ nɛ ɛsɩnɩ-ɖʋ nɛ ɖɩsɛɛ-ɩ paa ɖɩlʋkɩnɩ sɔɔndʋ siŋŋ yɔ. w19.01 11 § 12

Ðɩkpakɩɣ lɩmaɣza se ɖɩɖɔŋ toovenim tɔm ndʋ ɖɩkpɛlɩkɩɣ Bibl taa yɔ tɩ-yɔɔ lɛ, lɛɣzɩtʋ pɩzɩɣ nɛ tɩkɔɔ ɖa nɛ ɖɔ-hɔʋ taa ñɩma yaa ɖa-taabalaa ɖɛ-hɛkʋ taa. Ɛbɛ yɔɔ? Yesu labɩ adɩma naayɛ ɛ-wayɩ tɩŋɩyaa yɔɔ nɛ ɛpɔzɩ ɛ-Caa se: “Ðɔkɩ-wɛ tʋtʋyɛ tɔm taa: Ñɔ-tɔm kɛnɩ tʋtʋyɛ.” (Yoh. 17:17) Tɔm pee wena pɛɖɛzaa se “ɖɔkɩ-wɛ” yɔ, a-tɔbʋʋ ɖɔɖɔ lɛ se “palɩ-wɛ nɛ ŋlɩzɩ hɔɔlʋʋ.” Alɩwaatʋ ndʋ ɖɩmʋʋ toovenim yɔ, Ɛsɔ palɩ-ɖʋ nɛ ɛlɩzɩ-ɖʋ nɛ ɖɩwɛɛ hɔɔlʋʋ nɛ ɛjaɖɛ mbʋ pʋyɔɔ yɔ, ɖɩɩtasɩɣ ɖʋʋ ɖɔ-nɔɔ ɖɩ-tɔm taa. Ɛyaa lalaa naɣ-ɖʋ se ɖɩwɛ ndɩ mbʋ pʋyɔɔ yɔ ɖe-wezuu caɣʋ lɛɣzaa. Ðɩcakɩ wezuu nɛ pɩlakɩ nɔɔ kʋyʋmaɣ nɛ Bibl taa toovenim tɔm. Paa ɖɩtɩsɔɔlɩ se ɖɩkɔnɩ tayʋʋ ɖa nɛ lalaa ɖɛ-hɛkʋ taa yɔ, ɖa-taabalaa yaa ɖɔ-hɔʋ taa ñɩma nabɛyɛ pɩzɩɣ nɛ papaɣzɩ-ɖʋ posinuu yaa pakaɖɩnɩ-ɖʋ ɖe-tisuu yɔɔ. Ye ɖɩkatɩ wɛtʋ ndʋ yɔ, pɩɩɖɩɣzɩɣ-ɖʋ. Yesu kaayɔɔdaa se: “Ɛyʋ ɖɩɣa taa mba kaɣnɩ kɛʋ e-koyindinaa.” (Mat. 10:36) Ɛyɔɔdaa ɖɔɖɔ se wazasɩ nzɩ ɖihikiɣ alɩwaatʋ ndʋ ɖɩyakɩ toovenim yɔ, sɩkpaɖɩ kɩlaŋ weyi ɖɩlawa nɛ ɖɩyabɩ-pʋ yɔ tam sakɩyɛ. w18.11 6 § 11

Apostoloo Pɔɔlɩ tɩŋnɩ tɔm ndʋ ɛyɔɔdɩ e-koobiya yɔɔ yɔ tɩ-yɔɔ nɛ ɛwɩlɩ-wɛ ɛ-ɛsɩmɩyɛ. Ɛsɔ hanɩ-ɩ koobiya mba, pʋyɔɔ ɛsɛɣaɣ-ɩ paa ɛzɩmtaa ɛ-adɩma taa. Ɛtɩŋnɩ ɖɔɖɔ tɔm ndʋ ɛma-wɛ yɔ tɩ-yɔɔ nɛ ɛwɩlɩ-wɛ ɛ-ɛsɩmɩyɛ. Roma 16:​1-​15 taa, Pɔɔlɩ ya e-koobiya Krɩstʋ ñɩma 27 hɩla. Pɔɔlɩ tɔzɩ-wɛ se Prisɩka nɛ Akiila “paɖʋ pa-maɣmaɣ pe-wezuu kaɖɛ taa” ɛ-yɔɔ, nɛ ɛyɔɔdɩ ɖɔɖɔ se Feebee lʋbɩ “ɛyaa sakɩyɛ” yɔɔ, pɩkpɛndɩnɩ Pɔɔlɩ ɛnʋ ɛ-maɣmaɣ. Ɛsam e-koobiya kʋsɔɔlaa nɛ tʋmlaɖaa mba. Pɔɔlɩ kaanawa se e-koobiya taatalɩ pilim, paa mbʋ yɔ ɛtɩka ɛ-lɩmaɣza pɛ-ɛjandʋ yɔɔ, ɛlɛ ɛñɩɣ niye pɛ-wɛtʋ kɩbandʋ yɔɔ na. Tɔm ndʋ Pɔɔlɩ ma koobiya mba yɔ, maɣzɩ nɛ ŋna ɛzɩma tɩkpazɩ-wɛ ɖoŋ siŋŋ, alɩwaatʋ ndʋ pakalɩ-tʋ nɛ nɔɔ kɩkʋyaɣ ɛgbɛyɛ taa yɔ! Pɩtɩla piyeba nɛ taabalɩyɛ nɖɩ ɖɩɩwɛ pa nɛ Pɔɔlɩ pɛ-hɛkʋ taa yɔ, ɖɩɖaɣnɩ paɣlʋʋ nɛ pɩkpaɖɩ. Ɛzɩma ñɛ-ɛgbɛyɛ taa ñɩma tɩŋɩɣnɩ pɔ-yɔɔdaɣ nɛ pa-lakasɩ yɔɔ nɛ palakɩ kɩbandʋ yɔ, ŋwɩlɩɣ-wɛ ñɛ-ɛsɩmɩyɛ pɩ-yɔɔ ɖoŋ ɖoŋ? w19.02 16 § 8-9

Pɩcɛyaa se ɖɩtalɩ pilim pʋcɔ nɛ ɖɩɖɔkɩ ɖa-cɩŋgɩlɩm wɛtʋ na? Pɩkɛ toovenim se pɩyʋsʋʋnɩ-ɖʋ tam sakɩyɛ nɛ pɩpɩzɩɣ nɛ pɩlabɩ-ɖʋ ɛzɩ ɖɩɩkaɣ pɩzʋʋ nɛ ɖɩla mbʋ pɩtʋʋzaa yɔ. Pɩtɩmʋna se sɔɔndʋ ɛkpa-ɖʋ yɔ, mbʋ pʋyɔɔ yɔ Yehowa ɛɛkaŋ ɛ-lɩmaɣza ɖɛ-ɛjandʋ yɔɔ. Ɛ-tɔm heyiɣ-ɖʋ se: “Ye ŋŋkeŋaɣ kɩwɛɛkɩm cɔlɔ, [Yehowa], aapɩzaa nɛ ɛtasɩ wɛʋ, [Yehowa]?” (Keɣa 129:3) Ɛnawa se ɖɩtɩtalɩ pilim, ɖɩkɛ kɩwɛɛkɩm laɖaa nɛ ekpeɣu-ɖʋ faaa. (Keɣa 85:5) Pɩtasɩ lɛ, Yehowa sɩm ɖo-ɖoŋ kamaɣ nɛ ɛɛpɔzʋʋ-ɖʋ se ɖɩla mbʋ pɩcɛzɩ ɖo-ɖoŋ ɖeɖe yɔ. (Keɣa 102:12-​14) Pʋcɔ nɛ Yehowa sɛyaa pɩzɩ nɛ pɔɖɔkɩ pa-cɩŋgɩlɩm wɛtʋ lɛ, pɩwɛɛ se pɛwɛɛnɩ sɔɔlɩm. Pɩpɔzaa se sɔɔlɩm mbʋ ­ɖɩwɛnɩ Ɛsɔ yɔɔ, nɛ ɛzɩma ɖɩñɔnɩ ɖa-Caa weyi ɛwɛ ɛsɔdaa yɔ, pɩwɛɛ pilim nɛ pɩtaawɛɛnɩ ɛjandʋ natʋyʋ. Ye ɖɔ-sɔɔlɩm ɛwɛ mbʋ, halɩ pɩkpɛndɩnɩ alɩwaatʋ ndʋ pɩtakɩɣ-ɖʋ yɔ, ɖɩnɛ ɛlɛ ɖɩwɩlɩɣ se ɖɩwɛ cɩŋgɩlɩm. (3 Aw. 28:9; Mat. 22:37) Ðɩnawa se Yehowa ɖʋ paɣtʋ ndʋ yɔ tɩwɛ siɣsiɣ; nɛ ɖɩkaŋ ɖa-lɩmaɣza mbʋ pɩkɛdɩɣnɩ ɖa-Caa weyi ɛwɛ ɛsɔdaa yɔ pɩ-yɔɔ. Sɔɔlɩm mbʋ ɖɩwɛnɩ ɛ-yɔɔ yɔ, mbʋ tuzuuni-ɖʋ se ɖɩmaɣzɩ ɛ-yɔɔ pʋcɔ nɛ ɖɩkpaɣ lɩmaɣza, nɛ piyeki nɛ ɖɩɖɔkɩ ɖa-cɩŋgɩlɩm wɛtʋ. w19.02 3 § 4-5

Paa ɛzɩmtaa, ɖɩnaɣ wazasɩ nzɩ mbʋ pɩtʋʋzaa yɔ pɩ-labʋ kɔŋna yɔ lɛ, ɖe-tisuu kpaɣ ɖoŋ. (Yak. 1:​2, 3) Ða-taa wɛ leleŋ mbʋ pʋyɔɔ yɔ, ɖɛ-wɛtʋ kɛdɩnɩ Yehowa nɛ ɛyaɣ-ɖʋ se e-piya nɛ pʋyɔɔ lɛ, ɖa-taa tɛma se ɖiwoki pʋyɔɔ nɛ ɖɩla mbʋ pɩkɛdɩɣnɩ-ɩ yɔ nɛ ­pɩkpaɖɩ. (Adu. 27:11) Paa kaɖɛ nɖɩ lɛ, ɖɩhaɣ-ɖʋ waɖɛ se ɖɩwɩlɩ se ɖa-laŋɩyɛ taa fɛyɩ nabʋlɛ ɖa-Caa kɩbanʋ weyi ɛmaɣzɩɣ ɖɔ-yɔɔ camɩyɛ yɔ ɛ-sɛtʋ taa. (Keɣa 118:113) Ðɩsɔɔlaa se ɖɩwɩlɩ Yehowa se ɖɩsɔɔlɩ-ɩ nɛ ɖa-laŋɩyɛ pilim, nɛ ɖɩtɛm ɖa-taa se ɖɩñaŋ ɛ-paɣtʋ nɛ ɖɩla ɛ-sɔɔlɩm. (1 Aw. 8:​61) Pɩkaɣ-ɖʋ coɖuu na? Ɛɛɛ, mbʋ pʋyɔɔ yɔ ɖɩtɩtalɩ pilim. Ye picoɖi-ɖʋ yɔ, pɩwɛɛ se ɖɩtɔzɩ Wiyaʋ Ezekiyaasɩ kɩɖaʋ yɔɔ. Picoɖi-i tam sakɩyɛ, ɛlɛ ekpiɖi ɛ-kɩwɛɛkɩm yɔɔ nɛ ewolo pɩ-yɔɔ nɛ ɛsɛɣ Yehowa nɛ ‘ɛ-laŋɩyɛ kɩbanɖɛ pilim.’ (Iza. 38:​3-6; 4 Aw. 29:​1, 2; 32:25, 26) Pʋyɔɔ lɛ, ɖɩkaɖɩnɩ Sataŋ maɣzɩm nɛ pitaapisi-ɖʋ. Ðɩtɩmɩ se pɩsa nɛ ɖɩwɛɛnɩ “laŋɩyɛ nɖɩ ɖikemsiɣ” yɔ nɛ ɖɩɖɔkɩ ɖe-siɣsiɣ wɛtʋ Yehowa ɛsɩndaa.​—1 Aw. 3:9; Keɣa 138:23, 24. w19.01 18-​19 § 17-​18

Ðɔ-tɔm cosuu kediɣzisi taa wazɩɣ ɖa-maɣmaɣ. (Iza. 48:17) Ɛzɩma tɩyɛ? Kajalaɣ lɛ, ye ɖɩɖʋ ɖa-taa se ɖicosuu tɔm yɔ, piseɣtiɣ-ɖʋ se ɖɩñɔɔzɩ kediɣzaɣ camɩyɛ. Ye ɖɩñɔɔzɩ ɖa-tɩ camɩyɛ yɔ, piyeki nɛ ɖɩnɩɩ Ɛsɔtɔm taa camɩyɛ nɛ pɩkpaɖɩ. Nɛ ɛzɩma ɖɩnɩɣ tɩ-taa camɩyɛ yɔ, mbʋ yekina nɛ ɖɩlabɩnɩ-tʋ tʋmɩyɛ nɛ pɩkpaɖɩ. Nabʋlɛ lɛ, kediɣzaɣ kɛdɩɣnɩ-ɖʋ siŋŋ mbʋ pʋyɔɔ yɔ, ɖicosi tɔm. Nabudozo lɛ, ɛzɩma ɖɩñaɣ pana nɛ ɖicosi tɔm yɔ, piyeki nɛ ɖɩtɔzʋʋ ɖoŋ ɖoŋ tɔm ndʋ ɖɩɩyɔɔdaa yɔ tɩ-yɔɔ pʋwayɩ. Pɩtasɩ lɛ ɖɔ-tɔm kɛdɩɣnɩ Yehowa alɩwaatʋ ndʋ ɖɩyɔɔdʋʋ ɖe-tisuu tɔm yɔ. Ða-taa pɩzɩɣ nɛ pɩtɛ se Yehowa welisiɣni-ɖʋ, nɛ ɛ-taa lakɩ leleŋ siŋŋ nɛ pana wena ɖɩñakɩ se ɖicosi tɔm kediɣzisi taa yɔ. (Mal. 3:​16) Alɩwaatʋ ndʋ ɖɩñakɩ pana se ɖɔ-tɔm ɛkɛdɩnɩ-ɩ yɔ, ɛwazɩɣ-ɖʋ nɛ ɛwɩlɩɣ-ɖʋ se ɛ-taa wɛnɩ-ɖʋ nɛ leleŋ. (Mal. 3:​10) Pɩnaɣ kpayɩ kpayɩ se pɩcɛyɩ siŋŋ se ɖicosi tɔm kediɣzisi taa. w19.01 8 § 3; 9-​10 § 7-9

Yehowa sɩɣnɩ ɛ-sɛyaa nɛ sɔɔlɩm. Ɛɛɖʋʋ-ɖʋ paɣtʋ sakɩyɛ, ɛlɛ ɛwɩlɩɣ-ɖʋ nɛ suuɖu ɛzɩma ɖɩɖɔ sɔɔlɩm paɣtʋ yɔɔ yɔ. Ɛsɔɔlaa se ɖɩɖɔ Bibl paɣtʋ kila yɔɔ nɛ ɖɩpaɖɩ mbʋ pɩkɛ kɩdɛkɛdɩm yɔ. Ðɩkpaɣ ɛzɩ Pʋʋ Yɔɔ Tɔm Yɔɔdʋʋ mbʋ yɔ yɔ, Yesu yɔɔdɩ kpayɩ mbʋ pituzuu ɛyʋ se ɛla kɩwɛɛkɩm yɔ pɩ-tɔm. (Mat. 5:27, 28) Ɛsɔ Kewiyaɣ Wiyaʋ Yesu Krɩstʋ kaɣ wobu pɩ-yɔɔ nɛ ɛwɩlɩɣ-ɖʋ siɣsiɣ wɛtʋ nɛ paɣtʋ yɔɔ ɖɔm ɛjaɖɛ kɩfaɖɛ taa nɛ ɖɛ-wɛtʋ kɔɔ nɛ tɩnɩɣzɩnɩ ɛ-ñɩndʋ camɩyɛ. (Ebr. 1:9) Pɩtasɩ lɛ, ɛkaɣ yebu nɛ ɖo-tomnaɣ nɛ ɖa-maɣzɩm patalɩ pilim. Maɣzɩ nɛ ŋna ɛzɩma pɩkaɣ wɛʋ ɖeu kpem alɩwaatʋ ndʋ kɩdɛkɛdɩm nɛ kʋñɔmɩŋ weyi kɩdɛkɛdɩm mbʋ pɩkɔnaa yɔ pɩkaɣ tɛm cɩɖɩ cɩɖɩ yɔ. Pʋbʋ taa lɛ, ŋkaɣ wɛnʋʋ “tɩ-yɔɔ wɛʋ sɔsɔm” mbʋ Yehowa kaayɔɔdaa se ɛhaɣ-ŋ yɔ. (Roma 8:​21) Toovenim taa lɛ, wiɖiyi ɖɩɩkaɣ wɛʋ ɖa-tɩ yɔɔ kiya. Ðɩkaɣ wɛʋ ɖa-tɩ yɔɔ siŋŋ alɩwaatʋ ndʋ ɖiyeki nɛ sɔɔlɩm mbʋ piɖiyiɣ ɖa-tɩ yɔɔ wɛʋ mbʋ yɔ, pɩnɩɣzɩnɩ Ɛsɔ ñɩmbʋ ­camɩyɛ yɔ.​—1 Yoh. 4:​7, 8. w18.12 23 § 19-​20

Moyizi paɣtʋ haɣaɣ Izrayɛɛlɩ abalʋ nʋmɔʋ se ekizi ɛ-halʋ ye “ɛna ɛ-yɔɔ kʋzɔɔtʋ natʋyʋ yɔ.” Paɣtʋ tɩyɔɔdɩ kpayɩ mbʋ “kʋzɔɔtʋ” ndʋ tɩpɩzɩɣ nɛ tɩkɛna yɔ. Pɩɩpɩzɩɣ nɛ pɩkɛnɩ paa tɔm cikpetu ndʋ, ɛlɛ pɩkɛɣnɩ mbʋ pɩ-tɔm wɛ kaɖɛ yaa pɩkɛ fɛyɛ tɔm yɔ. (Wp. 23:14) Ɛlɛ pɩlabɩ pʋtɔdɩyɛ se Yesu alɩwaatʋ taa lɛ, Yuuda ñɩma kizaɣ pa-halaa “paa tɔm ndʋ lɛ tɩ-yɔɔ.” (Mat. 19:3) Ðɩtɩsɔɔlɩ se ɖɩmaɣzɩnɩ-wɛ kpa. Nayʋ Malakiya yɔɔdɩ lɩmaɣza wena Ɛsɔ wɛnɩ nesi cɛbʋ yɔɔ yɔ a-tɔm. Alɩwaatʋ ndʋ tɩ-taa lɛ, abalaa kizaɣ ‘pe-evebitu taa asɛyaa’ nɛ nabʋyʋ taa pakpakɩɣ pɛlaa mba pɛkɛ sɩɩnaa layaa yɔ. Malakiya yɔɔdɩ lɩmaɣza wena Ɛsɔ wɛna yɔ a-tɔm. Ɛyɔɔdaa se abalʋ weyi ekiziɣ ɛ-halʋ mbʋ yɔ, “azuluma huuzuu e-toko yɔɔ.” Nɛ pʋ-tɔbʋʋ lɛ se Ɛsɔ paɖɩɣ nesi cɛbʋ. (Mal. 2:​14-​16) Lɩmaɣza ana alabɩ nɔɔ kʋyʋmaɣ nɛ tɔm ndʋ Bibl yɔɔdɩ kajalaɣ nesi ɖɔkʋʋ yɔɔ yɔ. Kɩyɔɔdaa se: “[Abalʋ] ɛñɔɔnɩ ɛ-halʋ nɛ papɩsɩ tomnaɣ kʋyʋmaɣ.” (Kiɖe 2:​24) Yesu ñɩɣ niye ɛ-Caa lɩmaɣza ana a-yɔɔ nɛ ɛyɔɔdɩ se: “Mbʋ Ɛsɔ kpɛndaa yɔ, nɔɔyʋ ɛtaayasɩ-pʋ.”​—Mat. 19:6. w18.12 11 § 7-8

Koobiya nabɛyɛ wɛtʋ pɩzɩɣ nɛ pɩha-wɛ nʋmɔʋ se paha pa-tɩ faaa nɛ pakʋyɩ pɛ-tɛ nɛ powolo poliŋ. Lɩmaɣza wena pɛwɛna yɔ, alabɩ nɔɔ kʋɖʋmaɣ nɛ nayʋ Izaayii ñɩna. Alɩwaatʋ ndʋ Yehowa pɔzaa se “Anɩ mankaɣ tiyuu? Akaɣ kɛʋ ɖe-tiyiyu?” lɛ, Izaayii cosaa se: “Ma yɔ, tiyi-m.” (Iza. 6:8) Ŋsɔɔlɩ faaa se ye ñɛ-wɛtʋ ɛhaɣ-ŋ nʋmɔʋ yɔ, ŋwolo nɛ ŋla teokrasɩ tʋma ɖenɖe kɩcɛyɩm wɛɛ yɔ? Yesu yɔɔdaɣ tɔm susuu nɛ kpɛlɩkɩyaa labʋ tʋmɩyɛ tɔm lɛ, ɛtɔm se: “Mbʋ lɛ ɩtɩmnɩ hayɩm tʋ se etiyi kʋnɖaa ɛ-hayɩm taa.” (Mat. 9:​38) Ŋpɩzɩɣ nɛ ŋha ña-tɩ faaa nɛ ŋpɩsɩ nʋmɔʋ lɩzɩyʋ ɖenɖe pɩpɔzʋʋ tɔm susuyaa yɔ? Yaa ŋpɩzɩɣ nɛ ŋsɩnɩ nɔɔyʋ nɛ ɛla mbʋ? Koobiya sakɩyɛ yɔɔdaa se nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩwɩlɩ se ɖɩsɔɔlɩ Yehowa nɛ ɖo-koobu yɔ, ŋgʋ lɛ se ɖɩha ɖa-tɩ faaa nɛ ɖɩpɩsɩ nʋmɔʋ lɩzɩyʋ ageeta wena a-taa kʋmtʋ ɖɔ sakɩyɛ ɛlɛ kʋnɖaa tɩɖɔɔ yɔ. Nʋmɔŋ lɛɛŋ wɛɛ se ŋpɩzɩɣ nɛ ŋtɩŋnɩ ɩ-yɔɔ nɛ ŋwalɩsɩ teokrasɩ tʋma wena ŋlakɩ yɔ? Ye ŋlabɩ mbʋ yɔ, ŋkaɣ hiɣu taa leleŋ siŋŋ. w18.08 27 § 14-​15

Evaŋgilimwaa sɩnɩ-ɖʋ nɛ ɖɩtɩlɩ lɩmaɣza wena Yehowa wɛnɩ tomnaɣ yɔɔ ­won­du yɔɔ yɔ. Abalʋ nɛ halʋ, mba pataawɛnɩ tomnaɣ yɔɔ ñɩm sakɩyɛ yɔ Yehowa lɩzaa se pɔcɔnɩ ɛ-Pɩyalʋ yɔɔ. (Lev. 12:8; Luka 2:​24) Maarɩɩ lʋlɩ Yesu lɛ, “ɛhɛzɩ-ɩ pulone taa, mbʋ pʋyɔɔ yɔ petihiɣ ɖɩjaɣyɛ maalika taa.” (Luka 2:7) Yehowa kaasɔɔlaa yɔ, ɛpɩzaɣ se ɛtɩŋnɩ nʋmɔŋ ndɩ ndɩ yɔɔ nɛ eyele nɛ palʋlɩ ɛ-Pɩyalʋ lone kɩbanɖɛ naɖɩyɛ taa. Ɛlɛ mbʋ ­pɩ-tɔm kɩlɩ cɛyʋʋ ɛ-ɛsɩndaa yɔ lɛ, fezuu taa lone nɖɩ ɖɩ-taa papɩzaɣ se pɔcɔnɩ Yesu yɔɔ nɛ pafalɩsɩ-ɩ camɩyɛ yɔ. Bibl taa kɛdaɣ kanɛ, kasɩɣnɩ-ɖʋ se ɖɩtɩlɩ lɩmaɣza wena Yehowa wɛnɩ tomnaɣ yɔɔ ­won­du yɔɔ yɔ. Lʋlɩyaa nabɛyɛ ñɩnɩɣ se pe-piya ɩwɛɛnɩ tomnaɣ yɔɔ ñɩm sakɩyɛ nɛ halɩ pa-paa fɛyɩnɩ si-fezuu taa kɩcɛyɩm. Paa mbʋ yɔ, ɖɩnɩ pɩ-taa kpayɩ kpayɩ se fezuu taa ­won­du tɔm kɩlɩnɩ cɛyʋʋ Yehowa ɛsɩndaa. Ña yɔ, ŋwɛnɩ Yehowa lɩmaɣza na? Ña-lakasɩ wɩlɩɣ se ɛbɛ ŋsɩɣ kajalaɣ lone taa? w18.11 24 § 7-8

Yehowa kɛ Ɛsɔ koboyaɣ tʋ nɛ pʋyɔɔ lɛ, ɛsɔɔlaa se ɖɩkɛ koboyaɣ tɩnaa nɛ eheyiɣ-ɖʋ lɩmaɣza sakɩyɛ wena a-yɔɔ pɩwɛɛ se ɖɩnɩɩ leleŋ yɔ. (Wp. 12:7; Ekl. 3:​12, 13) Ɛlɛ sɔnɔ ɛjaɖɛ ɖɩnɛ ɖɩ-taa, pɩpɩzɩɣ nɛ pɩwɛɛ kaɖɛ se ɛyʋ ɛwɛɛ koboyaɣ taa. Ɛbɛ yɔɔ? Tɔm kɩdɛkɛdɩtʋ ɛzɩ ɖɛ-ɛyʋ kʋsɔɔlʋ nɔɔyʋ sɩm yaa ɛzɩma palɩzɩ-ɩ ɛgbɛyɛ taa yɔ, nesi ɖɔkʋʋ cɛbʋ yaa tʋmɩyɛ lesuu mbʋ yɔ pɩzɩɣ nɛ piyele nɛ ɖɩɩwɛɣ koboyaɣ taa. Ye ɖama kɩɩnɩnʋʋ ɩwɛ ɖɔ-hɔŋ taa nɛ ɖɩyɔɔdʋʋnɩ ɖama nɛ pana yɔ, pɩpɩzɩɣ piyele nɛ ɖilesi taa leleŋ weyi ɖɩwɛna yɔ. Ye ɖa-tʋmɩyɛ yaa ɖo-sukuli taa taabalaa iwoŋuu-ɖʋ, ye panazɩɣ-ɖʋ yaa paɖʋ-ɖʋ salaka yɔ, pɩpɩzɩɣ ɖɔɖɔ nɛ piyele nɛ ɖilesi taa leleŋ weyi ɖɩwɛna yɔ. Mbʋ ɖɔɖɔ ye ɖɩhɩnɩ kʋdɔŋ ŋgʋ kɩɩcɛkɩ, yaa ɖɩhɩnɩ kʋdɔŋ sɔsɔʋ nakʋyʋ yaa ɖɩwɛ nɩɣzɛ taa yɔ, ɖɩpɩzɩɣ nɛ ɖilesi taa leleŋ weyi ɖɩwɛna yɔ. Paa mbʋ yɔ, Yesu Krɩstʋ weyi ɛkɛ “koboyaɣ tʋ kɩlɩm kʋɖʋm” yɔ, ɛɛsɔɔlɩ ɛyaa laŋa hɛzʋʋ se piyele nɛ pɛwɛɛ taa leleŋ taa. (1 Tim. 6:​15; Mat. 11:​28-​30) Yesu yɔɔdɩ Pʋʋ Yɔɔ Tɔm Yɔɔdʋʋ taa wɛtʋ ndɩ ndɩ ndʋ tɩpɩzɩɣ tɩsɩnɩ-ɖʋ nɛ ɖɩwɛɛ koboyaɣ taa, paa ɖɩkatɩɣ kala sɔsɔna Sataŋ ɛjaɖɛ ɖɩnɛ ɖɩ-taa yɔ, tɩ-taa natʋyʋ tɔm. w18.09 17-​18 § 1-3

Sɔnzɩ nɛ lakasɩ nzɩ sɩkaɖɩɣnɩ Bibl yɔ, si-yebu pɩzɩɣ nɛ pɩkɛnɩ liidiye nɖɩ ɖɩ-hɛyʋʋ kɩlɩ kaɖɛ se pɩsa nɛ ɛyʋ ya toovenim yɔ. (Adu. 23:23) Paa nabɛyɛ ɩmaɣzɩɣ se pɩwɛ kɛlɛʋ se ɛyʋ etisi nɛ ɛɖɔ Bibl paɣtʋ yɔɔ nɛ eyele lakasɩ nzɩ sɩtɩmʋna yɔ, pɩpɩzɩɣ nɛ pɩwɛɛ lalaa kaɖɛ se pala mbʋ, mbʋ pʋyɔɔ yɔ, pɔ-hɔʋ taa ñɩma, pa-tʋmɩyɛ taa ñɩma yaa pa-taabalaa ñɩkɩɣ pɔ-yɔɔ. Pɩpɩzɩɣ nɛ pɩha-wɛ lɩmaɣza siŋŋ kɔzɩ kɔzɩ ye palakɩ sɔnzɩ nzɩ se paɖʋ hɩɖɛ hɔʋ taa ñɩma mba pasɩba yɔ. Mba palabɩ abalɩtʋ hɔɔlʋʋ ŋgʋ kɩ-taa yɔ, pa-kɩɖaŋ pɩzɩɣ nɛ ɩsɩnɩ-ɖʋ nɛ ɖɩla lɛɣzɩtʋ ndʋ pɩpɔzʋʋ yɔ.Mba papɩsɩ Krɩstʋ ñɩma kɩfama Efɛɛzɩ yɔ, ɛbɛ palaba se pɩsa nɛ peyele maajiki lakasɩ nɛ paya toovenim? Bibl lɩzɩ pɩ-taa se: “[Pɔkɔnɩ] pa-fadɩŋ takayɩsɩ nɛ pañaɣzɩ-sɩ miŋ ɛyaa kpeekpe ɛsɩndaa. Takayɩsɩ nzɩ, patʋʋzɩ si-liidiye, [pɩkpɛndɩ liidiye pɔɔyɩsɩ 50 000].” (Tʋma 19:19, 20) Krɩstʋ ñɩma siɣsiɣ tɩnaa panɛ pala kɩlaŋ sɔsɔŋ nɛ pehiɣ wazasɩ siŋŋ. w18.11 7 § 15-​16

Izrayɛɛlɩ piya tɛzɩ Yɔɔrdaŋ pɔɔ nɛ pitileɖi lɛ, Yozuwee katɩ abalʋ nɔɔyʋ, ɛɖɔkɩ you sɩɣa. Ɛkɛnɩ “[Yehowa] sɔɔjanaa taa sɔsɔ” weyi ɛñɔɔzɩ ɛ-tɩ se ɛlʋ Ɛsɔ samaɣ yɔɔ yɔ. (Yoz. 5:​13-​15) Tiyiyu ɛnʋ eheyi Yozuwee kpayɩ kpayɩ nʋmɔŋ weyi ɩ-yɔɔ pɩwɛɛ se ɛtɩŋna nɛ ­eyooni Yeriikoo tɛtʋ yɔ. Kajalaɣ ɖeɖe lɛ, ­pɩɩwɛ ɛzɩ nʋmɔŋ ɛnɩ ɩ-taa nɩɩyɩ taamʋna ɖeyi ɖeyi yɔ. Yehowa ɖʋ ­paɣtʋ se pɛpɛlɩ abalaa tɩŋa. Pɛlʋʋ mbʋ piyekaɣ se pɛwɛɛ wɩzasɩ taa kɩyakɩŋ cabɩ. (Kiɖe 34:24, 25; Yoz. 5:​2) Pɩtɩla yɔ Izrayɛɛlɩ sɔɔjanaa mba pɛpɛlɩ-wɛ nɛ pɛwɛɛ wɩzasɩ taa mbʋ yɔ, pɔpɔzaɣ pa-tɩ se ɛzɩma palakɩ nɛ pohuuzi pɔ-hɔŋ yɔɔ ye koyindinaa etudi pɔ-yɔɔ? Ɛlɛ panɩɩ se: ­“Paɖɩɣaa nɛ pakpazɩ ɖoŋ Yeriikoo tɛtʋ Izrayɛɛlɩ piya yɔɔ.” (Yoz. 6:1) Pɩɩkpazɩ lidaʋ ŋgʋ paawɛnɩ Yehowa yɔɔ yɔ ɖoŋ siŋŋ! w18.10 23 § 5-7

Ɛzɩma ɖɩpɩzɩɣ nɛ ɖɩmaɣzɩnɩ Pɔɔlɩ tɩ luzuu? Kajalaɣ lɛ, pɩwɛɛ se ɖɩkpa ɖa-tɩ nɛ ɖɩtaañɩnɩ yaa ɖitaatisi samtʋ natʋyʋ, tʋmɩyɛ nɖɩ ɖɩlabɩ Yehowa ɖoŋ taa yɔ ɖɩ-yɔɔ. Pɩwɛɛ se ɖa-taa paa anɩ ɛpɔzɩ ɛ-tɩ tɔm tʋnɛ: ‘Ɛzɩma manaɣ ɛyaa mba monsusuu-wɛ tɔm yɔ? Mɛwɛnɩ lɩmaɣza kɩdɛkɛda naayɛ kʋnʋŋ nakʋyʋ yɔɔdɩyaa yɔɔ?’ Toovenim taa lɛ ɛjaɖɛ kpeekpe yɔɔ Yehowa Aseɣɖe Tɩnaa wɛɛ nɛ pañɩnɩɣ pa-ageeta taa laŋa kɩbana tɩnaa se posusi-wɛ tɔm. Nabʋyʋ taa, pɩpɔzʋʋ se pɛkpɛlɩkɩ ɛyaa mba lalaa maɣzɩɣ se patɩlɩɩ pʋyʋ yɔ, pa-kʋnʋŋ nɛ pɔ-sɔnzɩ nɛ pɩsa nɛ posusi-wɛ tɔm. Yehowa Aseɣɖe Tɩnaa ɩlɩ ɛyaa nabɛyɛ yɔɔ mbʋ yɔ, paamaɣzɩɣ kpa se pakɩlɩ-wɛ. Ɛlɛ pañakɩ pana se panɩɩ paa weyi lɛ ɛ-tɔm taa nɛ pɩsa nɛ pasɩnɩ-ɩ nɛ Kewiyaɣ tɔm kɩbandʋ tukuni ɛ-laŋɩyɛ. w18.09 5 § 9, 11

Roma ñɩma kpa Yudaasɩ nɛ ­pakʋ-ɩ. Yuuda ñɩma mba pataakaɖɩɣnɩ komina yɔ, paaɖaŋ kpam se politiki laɖʋ nɔɔyʋ kaɣ kɔm nɛ ɛkɛ Mesiya. Pʋyɔɔ pata liu se Mesiya ɛnʋ ɛkɔŋ lɛ, eyeki nɛ pɛ-ɛjaɖɛ wɛɛ ɖɩ-tɩ yɔɔ nɛ palɩɩ Roma ñɩma nesi tɛɛ. (Luka 2:​38; 3:​15) Sakɩyɛ maɣzaɣ se Mesiya kaɣ sɩʋ kewiyaɣ nakɛyɛ Izrayɛɛlɩ tɛtʋ taa. Nɛ ye pɩlabɩ mbʋ yɔ, Yuuda ñɩma miiliyɔɔwaa sakɩyɛ mba paamɩzɩ ajɛɛ lɛɛna taa yɔ, papɩzɩɣ nɛ papɩsɩ pɛ-ɛjaɖɛ taa. Tɔzɩ se Yohanɛɛsɩ lɩm mɩyɩsɩyʋ kaapɔzɩ Yesu kɩyakʋ nakʋyʋ se: “Ñɛkɛnɩ weyi ɛkaɣ kɔm yɔ, yaa ɖɩɖaŋ nɔɔyʋ?” (Mat. 11:​2, 3) Pɩtɩla ­Yohanɛɛsɩ ñɩnaɣ se ɛtɩlɩ se ɛzɩ nɔɔyʋ yɔɔ pɩkaɣ tɩŋnʋʋ se Yuuda ñɩma lidaʋ ɛla yaa we. Tɔm mʋyaa naalɛ mba pana Yesu, e-femtu wayɩ Emayuusi habɩyɛ yɔɔ yɔ, paanawa se Mesiya yɔɔ tɔm lɛɛtʋ tɩlabɩta. (Luka 24:21) Alɩwaatʋ pazɩ pʋwayɩ lɛ, Yesu apostoloowaa pɔzɩ-ɩ se: “Kɩbaɣlʋ, lɛɛlɛɛyɔ ŋcaɣ Izrayɛɛlɩ kewiyaɣ sɩʋ kɛ?”​—Tʋma 1:6. w18.06 4 § 3-4

Ɛbɛ yɔɔ pɩcɛyaa se ɖɩtazɩ tɔm taa camɩyɛ, kɔzɩ kɔzɩ alɩwaatʋ ndʋ ɖɩnɩɣ tɔm natʋyʋ pɩlɩɩnɩ Yehowa samaɣ yɔɔ yɔ? Ðɩtaasɔɔ kpa se Sataŋ kɛnɩ weyi ɛlakɩ sama Ɛsɔ sɛyaa siɣsiɣ ñɩma yɔ. (Natʋ 12:10) Yesu yɔɔdaa se ɖo-koyindinaa kaɣ ‘yɔɔdʋʋ ɖɔ-yɔɔ tɔm kɩdɛkɛdɩtʋ kpeekpe.’ (Mat. 5:​11) Ye ɖɩtɔzʋʋ Yesu tɔm ndʋ tɩ-yɔɔ yɔ, pɩɩkaɣ-ɖʋ tibu yɔɔɔ, alɩwaatʋ ndʋ ɖɩnɩɣ tɔm kɩdɛkɛdɩtʋ natʋyʋ Yehowa samaɣ yɔɔ yɔ. Ŋsɔɔlɩ ­tiyinuu ­message waa nɛ tɔm lɛɛtʋ ña-taabalaa nɛ ­ñɛ-ɛyɩsɩmaa na? Ye ɛɛɛ yɔ, pɩtʋʋ fɛyɩ se alɩwaatʋ ndʋ ŋnaɣ tɔm kɩfatʋ natʋyʋ yaa ŋnɩɣ kɛdaɣ kɩfalaɣ ­nakɛyɛ tɔm susuu ­won­du yɔɔ yɔ, pɩlakɩ-ŋ ɛzɩ ŋtɩŋnɩ nʋmɔʋ nakʋyʋ yɔɔ nɛ ŋkɛ ­kajalaɣ tʋ weyi etiyini-tʋ yɔ. Paa mbʋ yɔ, pʋcɔ nɛ ŋtiyini tɔm natʋyʋ yaa message nakʋyʋ lɛ, pɔzɩ ña-tɩ se: ‘Man-taa tɛma se mbʋ mancaɣ tiyinuu yɔ pɩkɛ toovenim na? Mantazɩ camɩyɛ nɛ mana mbʋ pɩwɩlɩɣ se pɩkɛ toovenim yɔ?’ Ye ña-taa ɛtɩtɛ se tɩkɛ toovenim, ɛlɛ ŋtiyini-tʋ yɔ, pɩtɩla ­cɛtɩm tɔm ŋwɛɛ nɛ ŋtiyiɣni ño-koobiya mbʋ yɔ. Ye ŋpɩtɩɣ tɔm natʋyʋ yɔɔ yɔ, hɩzɩ-tʋ kpaagbaa. w18.08 3-4 § 3, 6-7

Yesu sɔɔlaa se ɖihiɣ taa leleŋ pɩtɩŋnɩ ɛzɩma ɖɩlakɩ kʋjɔŋ yɔ pɩ-yɔɔ. Toovenim lɛ, pɩtɩkɛ ɛyaa tɩŋa wɩlɩɣnɩ pɛ-ɛsɩmɩyɛ kʋjɔŋ weyi ɖɩlakɩ-wɛ yɔ ɩ-yɔɔ. Paa mbʋ yɔ, mba pɛwɛnɩ ɛsɩmɩyɛ yɔ, pɩkaɣ-wɛ seɣtuu nɛ pala ɖɔɖɔ kʋjɔŋ lalaa. Pʋyɔɔ lɛ, wolo pɩ-yɔɔ nɛ ŋlakɩ kʋjɔŋ lalaa paa ɛyaa ɩfɛyɩnɩ ɛsɩmɩyɛ yɔ. Ŋŋpɩzɩɣ nɛ ŋtɩlɩ ɖoŋ kɩbaŋ weyi ña-kʋjɔŋ labʋ pɩzɩɣ nɛ pɩwɛɛnɩ ɛyaa yɔɔ yɔ. Mba pɛkɛ kʋjɔŋ laɖaa toovenim ñɩma yɔ, paaɖaŋɩɣ se pɛhɛyɩ-wɛ nabʋyʋ pɩ-yɔɔ. Tɔm ndʋ tɩ-yɔɔ Yesu ñɩkaɣ niye alɩwaatʋ ndʋ ɛyɔɔdaa se: “Ŋlakɩ kazandʋ lɛ, yaa kʋñɔndɩnaa, kaakalasɩ, naŋgbatitiliŋ tɩnaa, nɛ yʋlʋmaa; nɛ ŋnɩɩ leleŋ, se paapɩzɩɣ pɛhɛyɩ-ŋ pi-ɖeɖe.” (Luka 14:13, 14) Bibl yɔɔdʋʋ se: “Weyi ɛkɛ ɛsɩyɛ kɩbanɖɛ tʋ yɔ, pakaɣ ɛ-yɔɔ wazʋʋ.” Kɩyɔɔdʋʋ ɖɔɖɔ se: “Koboyaɣ tʋ lɛ weyi ɛmaɣzɩɣ kʋñɔndʋ nɛ ɛjam pɔ-yɔɔ yɔ.” (Adu. 22:9; Keɣa 40:1) Toovenim taa lɛ, ɖihikiɣ taa leleŋ siŋŋ alɩwaatʋ ndʋ ɖɩsɩɣnɩ lalaa yɔ. w18.08 21-​22 § 15-​16

Pɩwɛ kaɖɛ sɔnɔ se ɖɩkpaɣ alɩwaatʋ nɛ ɖɩtazɩ tɔm natʋyʋ taa nɛ ɖɩtɩlɩ tɩ-yɔɔ toovenim ɖeyi ɖeyi, mbʋ pʋyɔɔ yɔ, cɛtɩm tɔm tɔyɩ paa le. Pɩtasɩ lɛ, ɖa-maɣmaɣ ɖɩtɩtalɩ pilim. Ye mbʋ, ɛbɛ pɩzɩɣ pɩsɩnɩ-ɖʋ nɛ ɖɩtazɩ tɔm natʋyʋ taa camɩyɛ? Pɩwɛɛ se ɖɩtɩlɩ Bibl paɣtʋ kila nɛ ɖɩlabɩnɩ-yɛ tʋmɩyɛ. A-taa lɛɛɖɛ yɔ: Pɩkɛnɩ kɩmɛlɛndʋ nɛ fɛyɛ weyi ɛlɛyɩɣ cosuu nɛ pʋcɔ ewelisiɣ yɔ. (Adu. 18:13) Paɣtʋ kiɖe lɛɛɖɛ tɔzʋʋ-ɖʋ ɖɔɖɔ se ɖitaatisi tɔm natʋyʋ yɔɔ yem nɛ ɖɩtɩtazɩ tɩ-taa. (Adu. 14:15) Nɛ pɩtasɩ lɛ, paa ɖileɖi toovenim taa ɛzɩma yɔ, pɩtɩpɔzɩ kpa se ɖɩtaa ɖa-maɣmaɣ ɖɔ-lɔŋ liu. Ye ɖɩtɛm ɖa-taa se ɖiwoki pɩ-yɔɔ nɛ ɖɩtazɩɣ tɔm taa nɛ ɖɩtɩlɩ tɩ-yɔɔ toovenim ɖeyi ɖeyi nɛ piyele nɛ ɖɩkpaɣ lɩmaɣza nɛ lɛɣtʋ yɔ, Bibl paɣtʋ kila kaɣ-ɖʋ sɩnʋʋ. w18.08 7 § 19

Pɩtɩŋnɩ lɩm mɩyɩsʋʋ yɔɔ lɛ, ɖɩwɩlɩɣ samaɣ ɛsɩndaa kaɣlaa se ɖɩha ɖa-tɩ Yehowa nɛ ɖɩsɔɔlaa ɖɔɖɔ se ɖɩla ɛ-sɔɔlɩm ɖe-wezuu kpeekpe. Yesu labɩ mbʋ alɩwaatʋ ndʋ pamɩyɩsɩ-ɩ lɩm yɔ, pʋyɔɔ eheyi Yehowa se: “Se mala ñɔ-sɔɔlɩm; Kɩbaɣlʋ, mbʋ pɩkɛdɩnɩ-m siŋŋ lɛ lɛ.” (Keɣa 39:​8, 9) Pamɩyɩsɩ Yesu lɩm lɛ, ɛzɩma pɩlabɩ Yehowa? Bibl yɔɔdaa se: ­‘Pɛtɛm Yesu lɩm ­mɩyɩsʋʋ lɛ, ɛlɩɩ lɩm taa kpaagbaa nɛ ɛsɔdaa tʋlɩ nɛ ɛna Ɛsɔ fezuu tibi ehooye tɩyɛ nɛ kɩcaɣ ɛ-yɔɔ. Nɛ nɔɔ nakɛyɛ tɩlɩʋ nɛ ɛsɔdaa se: “Ɛnʋ yɔ ɛkɛnɩ man-Pɩyalʋ kʋsɔɔlʋ weyi man-taa wɛ-ɩ nɛ leleŋ pɩdɩɩfɛyɩ yɔ.”’ (Mat. 3:​16, 17) Paa Yesu ɛɛtɛm kɛʋ ɛ-Caa pʋyʋ yɔ, Yehowa taa kaalabɩ leleŋ alɩwaatʋ ndʋ ɛna ɛ-Pɩyalʋ ha ɛ-tɩ faaa se ɛlakɩ ɛ-sɔɔlɩm ɖeke yɔ. Mbʋ ɖɔɖɔ Yehowa sɔɔlaa se ɖɩha-ɩ ɖa-tɩ, nɛ ɛɖʋ-ɖʋ hɩɖɛ nɛ ɛwazɩ-ɖʋ.​—Keɣa 149:4. w18.07 23 § 4-5

Ɛzɩma Moyizi labɩnɩ tʋmɩyɛ tɔm piye “ɖɩɩpɩzɩɣ” yɔ, pɩtɩla ɛñɩnaɣ se ɛyɔɔdɩ ɛ nɛ Aarɔɔnɩ pɔ-tɔm. Tɔm ndʋ Moyizi yɔɔdaa yɔ, tɩwɩlɩɣ se ɛtɩha ñamtʋ Yehowa weyi ɛ-cɔlɔ ­maamaaci lakasɩ nzɩ sɩlɩnaa yɔ. Tɔm ndʋ tɩwɛ Keɣa 105:32, 33 taa yɔ, ­tɩñɩkɩɣ niye lɩmaɣzɩyɛ ɖɩnɛ ɖɩ-yɔɔ. Pama peeɖe se: “Panazɩ Ɛsɔ Meriba lɩm cɔlɔ, nɛ peyiɣdi Moyizi pa-maɣmaɣ pa-kɩdɛkɛdɩm yɔɔ; [paɖʋ-ɩ ɖɩwɩzɩyɛ] peeɖe pɩŋŋ nɛ ɛkɩlɩ yɔɔdʋʋ lɛɛ lɛɛ, ­ɛtɩmaɣzɩ.” (Kɩg. 27:14) Paa pɩtɩkɛ suwe yɔ, Moyizi lakasɩ wɩlaa se ɛtɩɖʋ Ɛsɔ hɩɖɛ ɛzɩ pɩmʋnaʋ yɔ. Yehowa heyi Moyizi nɛ Aarɔɔnɩ se: “Ɩ ɩña mɔ-nɔɔ.” (Kɩg. 20:24) Pɩɩkɛnɩ kɩwɛɛkɩm sɔsɔm! Ɛzɩma Izrayɛɛlɩ ­samaɣ ­kaakaɖɩnɩ Yehowa yɔ, pʋyɔɔ ­ɛtɩha samaɣ kpeekpe nʋmɔʋ se kasʋʋ ­Kanaŋ tɛtʋ taa. (Kɩg. 14:26-​30, 34) Ye mbʋ pʋmʋnaa se ­Yehowa ɛhɔ ­Moyizi nɩŋgbaaŋ ɛzɩ Izrayɛɛlɩ piya nzɩ yɔ, ɛzɩma ɛkaɖɩnɩ-ɩ yɔ ­pɩ-yɔɔ. Ɛzɩ samaɣ ŋga yɔ, ɛtɩha Moyizi nʋmɔʋ se ɛsʋʋ ­Kanaŋ tɛtʋ taa. w18.07 14-​15 § 9, 12-​13

Ŋpɩzɩɣ nɛ ŋkizi mbʋ ŋwɛnɩ waɖɛ se ŋla yɔ pɩ-labʋ se pɩtaakɔɔ nɛ pituuli ño-koobu weyi ɛ-ɛhʋyɛ wɛ ndɩ nɛ ña-ñɩnɖɛ yɔ? Pɩtʋʋ fɛyɩ se ŋkaɣ tisuu nɛ ŋla mbʋ. Pʋcɔ nɛ nabɛyɛ pɩsɩɣ ɖo-koobiya lɛ, paakɛ sʋlʋm kpaŋɩyaa ɛlɛ lɛɛlɛɛyɔ paɖʋ pa-taa se paatasɩɣ sʋlʋm ñɔʋ. Nɛ ɖa-taa nɔɔyʋ tɩsɔɔlɩ se ɛla nabʋyʋ nɛ pʋyɔɔ lɛ, koobu nɔɔyʋ la mbʋ pɩkɔŋnɩ-ɩ kaɖɛ fezuu taa yɔ. (1 Kɔr. 6:​9, 10) Pʋyɔɔ lɛ, ye ɖɩmʋ koobu nɔɔyʋ ɖɛ-tɛ nɛ ekizi se ɛɛñɔʋ sʋlʋm yɔ, pɩɩwɛɣ ɖeu se ɖɩñɩɣ ɛ-yɔɔ. Alɩwaatʋ ndʋ Timootee kaawɛnɩ ɛzɩ pɩnzɩ 20 mbʋ yɔ lɛ, etisaa nɛ pɛpɛlɩ-ɩ nɛ paa ɛnɩ wɩzasɩ yɔ, ɛlabɩ mbʋ se ɛtaakɔɔ nɛ ɛkɛ pɩyɛ kutuuliye Yuuda ñɩma mba ewoki-wɛ tɔm susuu yɔ. Ɛ-wɛtʋ ndʋ tɩnɩɣzɩnɩ apostoloo Pɔɔlɩ ñɩndʋ ɖɔɖɔ. (Tʋma 16:3; 1 Kɔr. 9:​19-​23) Ɛzɩ Timootee kaalabʋ yɔ, ŋtisiɣ se ŋlaa kɩlaŋ nɛ pɩwazɩ lalaa na? w18.06 18-​19 § 12-​13

Yehowa hɔŋ mba ɛsɔɔlaa se pɛkɛ ɛ-hɔʋ taa ñɩma yɔ, nɛ eyeki se laŋa kɩbana tɩnaa ɛkɔɔ toovenim Ɛsɔ sɛtʋ taa. (Yoh. 6:​44) Ye ŋkatɩ weyi ɛfɛyɩ toovenim taa yɔ kajalaɣ ɖeɖe yɔ, ɛbɛ ŋpɩzɩɣ nɛ ŋtɩlɩ ɛ-yɔɔ kpaagbaa? Pɩtɩla ɛ-hɩɖɛ, ɛ-ɛsɩndaa wɛtʋ; ɛlɛ ŋŋpɩzɩɣ nɛ ŋtɩlɩ ɛ-yɔɔ tɔm sakɩyɛ puwiye. Ɛlɛ ɖɩkatɩɣ weyi ɛsɩm Yehowa nɛ ɛsɔɔlɩ-ɩ yɔ kajalaɣ ɖeɖe lɛ, pɩtɩkɛ mbʋ pɩwɛɛ. Paa ɛ-ɛjaɖɛ, e-cejewiye nɛ ɛ-sɔnzɩ ɛwɛ ndɩ nɛ ɖa-ñɩnzɩ yɔ, ɖɩtɛm ɛ-yɔɔ tɔm ndʋ tɩlʋʋ yɔ tɩɖɔwa, nɛ ɛlɛ tɩlɩ ɖɔ-yɔɔ tɔm ndʋ yɔ, tɩɖɔwa ɖɔɖɔ! Alɩwaatʋ ndʋ ɖɩkatɩɣ ɖo-koobiya mbʋ yɔ, ɖɩtɩlɩɣ-wɛ kɛlɛʋ pɩtɩŋnɩ toovenim ‘kʋnʋŋ kele kele’ ŋgʋ pɔyɔɔdʋʋ yɔ, kɩ-yɔɔ. Pʋyɔɔ lɛ, paa weyi ɛtɛm sɩm lɩmaɣza wena lɛlʋ wɛnɩ Ɛsɔ yɔɔ, wezuu caɣʋ kɩbaŋʋ yɔɔ nɛ lidaʋ ŋgʋ ɛwɛna cee wayɩ yɔɔ yɔ. Pɩtasɩ lɛ, hɔɔlɩŋ ɩnɛ ɩ-yɔɔ tɔm tɩlʋʋ cɛyɩ siŋŋ mbʋ pʋyɔɔ yɔ, mbʋ yekina se ɛyʋ ɛpɩzɩ nɛ ɛtaa lɛlʋ liu. Piyeki ɖɔɖɔ se taabalɩyɛ kɩbanɖɛ ɛwɛɛ ɖɛ-hɛkʋ taa tam. w18.12 21 § 9-​10

Krɩstʋ sɩnɩ Nɔɔɖɛyaa ɛgbɛyɛ taa ñɩma nɛ peɖiɣzina kpayɩ kpayɩ se pɩtɩcɛyɩ se pɛpɛlɩ sɩɩnaa layaa mba papɩsɩ Krɩstʋ ñɩma yɔ. (Tʋma 15:​19, 20) Pɛsɛtɩ tɔm ndʋ nɛ pɩla pɩnzɩ ­sakɩyɛ lɛ, Yuuda Krɩstʋ ñɩma sakɩyɛ wobi pɩ-yɔɔ nɛ pɛpɛlɩɣ pe-piya. Ðɩpɩzɩɣ nɛ ɖɩpɔzɩ ɖa-tɩ se ye Yesu sɩm ­eyeba nɛ Moyizi paɣtʋ sɩɩ tɩnaɣ, ‘ɛbɛ yɔɔ ɛha nʋmɔʋ se tɔm ndʋ tileɖi mbʋ?’ (Kol. 2:​13, 14) Nabɛyɛ lɛ, pɩkpakɩɣ alɩwaatʋ sakɩyɛ pʋcɔ nɛ panɩɩ lɛɣzɩtʋ natʋyʋ taa camɩyɛ. Yuuda ñɩma mba pamʋ toovenim yɔ, pɩɩpɔzɩ-wɛ alɩwaatʋ sakɩyɛ pʋcɔ nɛ pɛlɛɣzɩ lɩmaɣza wena paawɛna yɔ. (Yoh. 16:12) Pɩɩwɛ ­nabɛyɛ kaɖɛ se petisi se pɛlʋʋ tɩtasɩ kɛʋ yʋsaɣ ŋga kawɩlɩɣ se taabalɩyɛ kɩbanɖɛ wɛ nɔɔyʋ nɛ Ɛsɔ pɛ-hɛkʋ taa yɔ. (Kiɖe 17:​9-12) Lalaa seɣaɣ sɔɔndʋ se peyebi pɛlʋʋ sɔnzɩ yɔ, Yuuda ñɩma kaɣ-wɛ nazʋʋ. (Gal. 6:​12) Alɩwaatʋ wɛɛ nɛ tɩɖɛɣ lɛ, Krɩstʋ tɩŋnɩ ­takayɩsɩ nzɩ Pɔɔlɩ mawa yɔ sɩ-yɔɔ se panɩɩ tɔm taa kpayɩ kpayɩ.​—Roma 2:​28, 29; Gal. 3:23-​25. w18.10 24-​25 § 10-​12

Ðoo yuwa lɛ, Kayifu tiyi sɔɔjanaa se powolo nɛ pakpa Yesu. Yesu kaasɩm pa-lɩmaɣza kɩdɛkɛda ana pʋyɔɔ alɩwaatʋ ndʋ ɛ nɛ apostoloowaa pɔtɔkaɣ tɔɔnaɣ kɛdɛzaɣ ɖeɖe lɛ, eheyi-wɛ se pɔɖɔkɩ you sɩsɩ pɔ-yɔɔ. Sɩsɩ naalɛ maɣaa mbʋ pʋyɔɔ yɔ, sɩ-yɔɔ ɛkaɣ tɩŋnʋʋ nɛ ɛwɩlɩ-wɛ tɔm kɩcɛyɩtʋ natʋyʋ. (Luka 22:36-​38) Ðoo kʋɖʋma ana a-taa Pɩyɛɛrɩ kpaɣ laɣɖɛ se elomni mba pɔkɔm Yesu kpaʋ yɔ pa-taa lɛlʋ. Pɩtʋʋ fɛyɩ se ɛzɩma pomulaɣ Yesu se pakpa-ɩ nɛ ɖoo yɔ, mbʋ wɩzɩnɩ-ɩ. (Yoh. 18:10) Ɛlɛ Yesu heyi-i se: “Pɩsɩnɩ ña-laɣɖɛ ɖi-huyuu taa.” (Mat. 26:52, 53) Yesu lɔŋ tasʋʋ pʋnɛ pɩlabɩ nɔɔ kʋɖʋmaɣ nɛ adɩma wena ɛɛlabɩ ɖoo ana a-taa se Ɛsɔ ɛsɩnɩ-wɛ nɛ pataaɖʋ pɔ-nɔɔ ɛjaɖɛ tɔm taa yɔ. (Yoh. 17:16) Ɛsɔ ɖeke pɩzɩɣna nɛ eyele nɛ mulum lakasɩ sɩɩ tɩnaɣ. Ða Yehowa sɛyaa lɛ, ɖɩwɛ laŋhɛzɩyɛ nɛ nɔɔ kʋɖʋmaɣ taa. Nɛ Yehowa naɣ se ɛ-samaɣ wɛ nɔɔ kʋɖʋmaɣ taa ɛjaɖɛ nɖɩ ɖɩtayaa yɔ ɖɩ-taa lɛ, pɩlakɩ-ɩ leleŋ siŋŋ.​—Sof. 3:​17. w18.06 7 § 13-​14, 16

Pɩtasɩna Sataŋ ajitu nʋmɔŋ lɛ, ɛtɩŋɩɣnɩ ɖɔɖɔ nʋmɔŋ lɛɛŋ yɔɔ se ɛñɩɣ ɖɔ-yɔɔ nɛ ɖɩtaaɖɔ siɣsiɣ Yehowa ɛsɩndaa. Ɛpɩzɩɣ nɛ ɛtɩŋnɩ kominawaa yɔɔ nɛ paba ɖɩɣ nʋmɔʋ ɖɔ-tɔm susuu tʋmɩyɛ. Ɛpɩzɩɣ nɛ eseɣti ɖa nɛ mba ɖɩlakɩ tʋmɩyɛ yaa sukuli yɔ se pohoŋ-ɖʋ alɩwaatʋ ndʋ ɖɩñakɩ pana se ɖɩɖɔ Bibl paɣtʋ kila yɔɔ yɔ. (1 Pɩy. 4:4) Ɛpɩzɩɣ ɖɔɖɔ nɛ ɛtɩŋnɩ ɖɔ-hɔʋ taa ñɩma mba pɔsɔɔlɩ ɖɔ-tɔm yɔɔ pɔ-yɔɔ nɛ pɔ-tɔm yɔɔdʋʋ yele nɛ kediɣzisi wobu lakɩ-ɖʋ feendu. (Mat. 10:36) Ye pɩtalɩ-ɖʋ mbʋ, ɛbɛ pɩwɛɛ se ɖɩla? Kajalaɣ lɛ, pɩtaaɖɩɣzɩ-ɖʋ ye pakaɖɩɣnɩ-ɖʋ kaɣlaa yɔ, mbʋ pʋyɔɔ yɔ ɖɩnawa se Sataŋ wɛna nɛ ɛlakɩnɩ-ɖʋ you. (Natʋ 2:​10) Nabʋlɛ lɛ, ɖɩtaasɔɔ mbʋ pʋyɔɔ Sataŋ kaɖɩɣnɩ-ɖʋ mbʋ yɔ pɩ-yɔɔ: Ɛyɔɔdaa se ɖɩsɛɣ Yehowa alɩwaatʋ ndʋ pɩ-labʋ wɛ-ɖʋ kɛlɛʋ yɔ. Ɛ-lɩmaɣzɩyɛ lɛ se ye ɛtɩŋnɩ nʋmɔʋ nakʋyʋ yɔɔ nɛ ɛnazɩ-ɖʋ yɔ ɖɩkaɣ kizuu Ɛsɔ. (Yɔɔb 1:​9-​11; 2:​4, 5) Kɛdɛzaɣ ɖeɖe lɛ, pɩwɛɛ se ɖɩtɩmnɩ Yehowa nɛ ɛha-ɖʋ ɖoŋ nɛ ɖɩkaɖɩnɩ-ɩ. Ðɩtaasɔɔ se Yehowa ɛɛkaɣ-ɖʋ lɔʋ kpa.​—Ebr. 13:5. w18.05 26 § 14

Paa pɩlaba se Kewiyaɣ tɔm ndʋ ɖisusuu yɔ tiitukuuni ɛyaa laŋa yɔ, pɩtɩpɔzɩ se ɖini ɖomaɣ tʋmɩyɛ nɖɩ ɖɩwɛɛ nɛ ɖɩlakɩ yɔ. Ɛyaa sakɩyɛ iiwelisiɣni-ɖʋ ɛlɛ pɔcɔŋnɩ-ɖʋ ɖa-tʋmɩyɛ labʋ taa. Panaɣ ɛzɩma ɖisuu ­won­du camɩyɛ, ɖɩñaŋ ɛyaa nɛ ɖɩmʋʋyʋʋ ɖɔɖɔ camɩyɛ yɔ. Alɩwaatʋ kaaɖɛɣ lɛ, ɖɛ-wɛtʋ pɩzɩɣ nɛ piyele nɛ mba paawɛnɩ lɩmaɣza kɩdɛkɛdaa ɖɔ-yɔɔ yɔ, pɛlɛɣzɩ pa-lɩmaɣza. Sergio nɛ Olinda mba pɛkɛ nʋmɔʋ lɩzɩyaa yɔ, pɛkɛdaa se: “Ɛzɩma pɩwɩɣaɣ-ɖʋ yɔ pʋyɔɔ lɛ, kɩyakɩŋ cabɩ ɖɩtɩtasɩ wobu lone nɖɩ ɖɩ-taa ɖisusaɣ tɔm yɔ. Ðɩkɔm nɛ ɖiwolo evemiye nɖɩ yɔ, nʋmɔʋ ɖɔnaa pɔzɩ-ɖʋ se ‘pɩlabɩ ɛzɩma nɛ iyele kɔm? Pileɖaa kpem!’ ” Pɩtʋʋ fɛyɩ se ye ɖɩñakɩ pana se ‘ɖe-nee ɩtaahɛzɩnɩ’ Kewiyaɣ ɖomaɣ tʋmɩyɛ labʋ yɔ, pɩwɩlɩɣ se ɖɩwɛɛ nɛ ɖɩɖʋʋ nesi siŋŋ ‘ɛjaɖɛ kpeekpe yɔɔ tɔm susuu tʋmɩyɛ.’ (Mat. 24:14) Kɔzɩ kɔzɩ lɛ, pɩhaɣ-ɖʋ taa leleŋ siŋŋ alɩwaatʋ ndʋ ɖɩnaɣ se ɖɔ-tɔm kɛdɩnɩ Yehowa yɔ mbʋ pʋyɔɔ yɔ ɛsɔɔlɩ mba “palakɩ camɩyɛ lakasɩ” yaa mba palʋlʋʋ pee nɛ “abalɩtʋ” yɔ pɔ-tɔm!​—Luka 8:​15. w18.05 16 § 16-​18

Kpaɣnɩ alɩwaatʋ ndʋ ɛyʋ labɩ kɩwɛɛkɩm nɛ elesi pilim wɛtʋ yɔ, Yehowa paɣzɩ wɩlʋʋ se ɛkɛ Ɛsɔ weyi ɛkpazɩɣ ɖoŋ yɔ. Pakaɖɩnɩ-ɩ Edɛɛnɩ kaɖaɣ taa nɛ pitileɖi lɛ, ɛyɔɔdɩ tɔm ndʋ tɩkaɣ kpazʋʋ ɖoŋ Aɖam sayɩnaa yɔ. Natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, tɩha ɛyaa lidaʋ se pakaɣ ɖɩzʋʋ Eleeu Sataŋ weyi ɛkɛ “ɖooo lɔŋ taa ɖʋm” yɔ, nɛ mbʋ payɩ ɛwɛɛkaa yɔ. (Natʋ 12:9; 1 Yoh. 3:8) Yehowa sɛyʋ Noowa kaacaɣ wezuu kɩdɛkɛdɩm ɛjaɖɛ nɖɩ ɖɩ-taa ɛ nɛ ɛ-hɔʋ taa ñɩma pe-ɖeke pɛsɛɣaɣnɩ Yehowa yɔ. Ñam ñam lakasɩ nɛ kʋzʋʋ kɩdɛkɛdʋʋ wezuu ŋgʋ ɛyaa cakaɣ yɔ, pɩpɩzaɣ se piyele nɛ pitii Noowa yɔɔɔ. (Kiɖe 6:​4, 5, 9, 11; Yud. 6) Ɛlɛ Yehowa heyi-i tɔm natʋyʋ nɛ tɩkpazɩ-ɩ ɖoŋ nɛ tiseɣti-i ɖɔɖɔ se ewolo pɩ-yɔɔ nɛ ɛ nɛ ‘Ɛsɔ pɔɖɔŋ.’ (Kiɖe 6:⁠9) Yehowa heyi Noowa se ɛcaɣ ɖɩzʋʋ ɛjaɖɛ kɩdɛkɛdɩyɛ nɖɩ nɛ ɛkɛdɩ-ɩ ɖɔɖɔ mbʋ pɩwɛɛ se ɛla nɛ pɩya ɛ nɛ ɛ-hɔʋ taa ñɩma ñʋʋ yɔ. (Kiɖe 6:​13-​18) Tɔm ndʋ Yehowa yɔɔdaa yɔ, tɩkpazɩ Noowa ɖoŋ pɩdɩɩfɛyɩ. w18.04 15 § 1-2

Pɩɩwɛɣ ɖeu se ɖɩmaɣzɩ se ɖɩɩpɩzɩɣ nɛ ɖɩkpazɩ lalaa ɖoŋ mbʋ pʋyɔɔ yɔ faawɩyɛ labʋ wɛ-ɖʋ kaɖɛ. Pɩtɩcɛyɩ se ɖɩla pʋyʋ sɔsɔm pʋcɔ nɛ ɖɩpɩzɩ ɖɩkpazɩ lalaa ɖoŋ. Pɩtɩla ɛzɩma ɖɩmʋʋyʋʋ alɩwaatʋ ndʋ ɖɩsɛɣ nɔɔyʋ yɔ, pi-ɖeke pɩpɩzɩɣ nɛ pɩkpazɩ-ɩ ɖoŋ. Ye ŋmʋʋyɩnɩ nɔɔyʋ ɛlɛ ɛtɩmʋʋyɩnɩ-ŋ yɔ, pɩpɩzɩɣ nɛ pɩla se ɛwɛ kaɖɛ naɖɩyɛ taa, nɛ ye ŋkemsiɣni-i camɩyɛ yɔ, pɩpɩzɩɣ nɛ pɩhɛzɩ ɛ-laŋɩyɛ. (Yak. 1:19) Ða-tɩŋa ­ɖɩpɩzɩɣ nɛ ɖɩkpazɩ ɖoŋ ɖo-koobiya halaa nɛ abalaa mba pɩpɔzʋʋ-wɛ laŋɩyɛ hɛzʋʋ yɔ. Wiyaʋ Salomɔɔ mawa se: “Ɛyʋ taa lakɩ leleŋ nɛ ndʋ ɛ-nɔɔ cosaa yɔ, nɛ tɔm ndʋ tɩkɔm ti-ɖeɖe yɔ, ndʋ tɩkpaɖɩnɩ ɖeu. Ciyam taa nɛ leleŋ nɛ ɛsa mintʋsʋʋ, tɔm kɩbandʋ ɖʋʋ mɔɔ taa num.” (Adu. 15:​23, 30) Tɔm ndʋ Pɔɔlɩ ma Koloosi ɛgbɛyɛ yɔ, tɩwɩlɩɣ se halɩ alɩwaatʋ ndʋ ɖɩkpɛndɩɣ nɛ ɖiteɣ Kewiyaɣ hendu yɔ, pɩpɩzɩɣ pɩkpazɩ-ɖʋ ɖoŋ. (Tʋma 16:25; Kol. 3:16) Yehowa kɩyakʋ wɛɣ nɛ ‘kɩñɔtʋʋ’ lɛ, pɩkaɣ pɔzʋʋ se ɖɩkpazɩɣ ɖama ɖoŋ nɛ pɩkpaɖɩ.​—Ebr. 10:25. w18.04 23-24 § 16, 18-19