Kɔɔnɔɔ tɔm

Masɩ nzɩ siɖiyiɣ Krɩstʋ tʋ yɔ kɛ takayaɣ ŋga kakaɣ-ŋ sɩnʋʋ nɛ ŋna Bibl masɩ yaa Bibl kɛdɛsɩ nzɩ sɩpɩzɩɣ sɩsɩnɩ-ŋ nɛ ŋlʋbɩnɩ tɩlasɩ nzɩ ŋkatɩɣ ñe-wezuu caɣʋ taa yɔ. Kakaɣ-ŋ sɩnʋʋ ɖɔɖɔ nɛ ŋna Bibl masɩ kɩbanzɩ nzɩ ŋpɩzɩɣ ŋlabɩnɩ tʋmɩyɛ nɛ ŋkpazɩnɩ ɖoŋ lalaa nɛ ŋsɩnɩ-wɛ nɛ pakpaɣ lɩmaɣza wena aɖʋʋ Yehowa hɩɖɛ yɔ. Lɩzɩ tɔm ñʋʋ ŋgʋ kɩkɛdɩnɩ-ŋ yɔ. Paa tɔm ñʋʋ ŋgʋ kɩ-taa lɛ, ŋkaɣ naʋ tɔm pɔzʋʋ nɛ Bibl kɛdɛsɩ nzɩ potobiyaa nɛ sɩpɩzɩɣ nɛ sɩsɩnɩ-ŋ yɔ. (Cɔnɩ aɖakaɣ «Ɛzɩma ŋpɩzɩɣ nɛ ŋlabɩnɩ takayaɣ kanɛ tʋmɩyɛ?») Ŋkaɣ naʋ Bibl masɩ nzɩ sɩtasɩɣ-ŋ lɔŋ nɛ sɩhɛzɩɣ ña-laŋɩyɛ yɔ. Ŋkaɣ naʋ ɖɔɖɔ Bibl paɣtʋ kila wena ŋpɩzɩɣ nɛ ŋlabɩnɩ tʋmɩyɛ nɛ ŋsɩnɩnɩ lalaa nɛ ŋkpazɩ-wɛ ɖoŋ yɔ.

Paa tɔm ñʋʋ ŋgʋ ŋkpaɣ takayaɣ kanɛ ka-taa yɔ, pɩtɩkɛ masɩ nzɩ sɩ-tɩŋa situkuuni tɔm ñʋʋ ŋgʋ yɔ ŋnaɣ. Palabɩ-kɛ se kasɩnɩ-ŋ nɛ ŋna masɩ nzɩ sɩkɩlɩɣ tukunuu tɔm ñʋŋ nɩɩyɩ yɔ, ɛlɛ ye pʋwayɩ ŋsɔɔlaa se ŋtɩlɩ nɛ pɩkpaɖɩ yɔ, ŋpɩzɩɣ nɛ ŋlabɩnɩ tʋmɩyɛ tɔm ñɩnʋʋ wondu lɛɛtʋ. (Adu 2:​1-6) Ŋsɔɔlaa se ŋtazɩ nɛ pilimi yɔ, labɩnɩ tʋmɩyɛ Bibl—Ɛjaɖɛ kɩfaɖɛ tɔm ɖɛzʋʋ taa masɩ nzɩ sɩwɛ hɛkʋ taa canzɩ taa yɔ (références marginales), yaa kpɛlɩkʋʋ tɔm kɩsɔzɩtʋ ndʋ tɩwɛ Bible d’étude taa yɔ ye kɩwɛ kʋnʋŋ ŋgʋ ŋnɩɣ yɔ kɩ-taa yɔ. Ye ŋsɔɔlaa se ŋnɩɩ mayaɣ nakɛyɛ taa nɛ pɩkɩlɩ yaa ŋna ɛzɩma ŋlabɩnɩ-kɛ tʋmɩyɛ yɔ, ŋpɩzɩɣ nɛ ŋtɩŋnɩ tɔm ñɩnʋʋ wondu tʋnɛ tɩ-yɔɔ nɛ ŋñɩnɩ nɛ pɩkɩlɩ: Guide de recherche pour les Témoins de Jéhovah yaa Index des publications des Témoins de Jéhovah. Ŋŋñɩnɩɣ mayaɣ nakɛyɛ yɔɔ tɔm lɛ, kalɩ tɔm ñʋŋ weyi ɖɩlɩzaa pɩtɩkɩlɩ leɖuu yɔ, pɩsɩɣnɩ-ŋ nɛ ŋtɩlɩ ɛzɩma ɖɩnɩɣ mayaɣ ŋga ka-taa lɛɛlɛɛyɔ yɔ.

Tɛtɛ nɛ Masɩ nzɩ siɖiyiɣ Krɩstʋ tʋ yɔ takayaɣ sɩnɩ-ŋ nɛ ŋwɛɛnɩ lɔŋsɩnɖɛ, sɩmtʋ nɛ tɔm taa nɩʋ lɛɣtʋ ndʋ tɩwɛ Masɩ kiɖeɖesi taa yɔ. Takayaɣ kanɛ kakaɣ-ŋ sɩnʋʋ nɛ ña-taa tɛ se «Ɛsɔ tɔm wɛ wezuu nɛ tɩwɛnɩ ɖoŋ».—Ebr 4:12.