Mars

Pɩtɩkɛ ɖalɩzɩɣna se ɛyaa ɩpaɖɩ-ɖʋ. Alɩwaatʋ ndʋ ɛyaa paɖɩɣ-ɖʋ ɖe-tisuu yɔɔ yɔ, pɩɩkɛdɩɣnɩ-ɖʋ. Ye mbʋ, ɛbɛ yɔɔ ɖa-taa pɩzɩɣ nɛ pɩla leleŋ alɩwaatʋ ndʋ ɛyaa paɖɩɣ-ɖʋ yɔ? Iyele nɛ ɖɩna lɩmaɣza naadozo wena a-yɔɔ ɖa-taa pɩzɩɣ nɛ pɩla leleŋ yɔ. Kajalaɣ lɛ, alɩwaatʋ ndʋ ɖɩɖɔkʋʋ ɖa-tɩ yɔ ɖɔ-tɔm kɛdɩɣnɩ Ɛsɔ. (1 Pɩy. 4:13, 14) Nabʋlɛ lɛ, ɖe-tisuu mʋʋ ñɩm nɛ pɩkpaɣ ɖoŋ nɛ pɩkɩlɩ. (1 Pɩy. 1:7) Nɛ nabudozo lɛ, ɖɩkaɣ hiɣu tamtam wezuu; nɛ pɩkɛ kɩhɛyʋʋ ŋgʋ kɩmʋ ñɩm siŋŋ yɔ. (Roma 2:6, 7) Pefezi Yesu nɛ pitileɖi lɛ, apostoloowaa hiɣ taa leleŋ weyi ɩ-tɔm ɛɛyɔɔdaa yɔ. Pamabɩ-wɛ nɛ paɖʋ-wɛ paɣtʋ se pataatasɩ tɔm susuu nɛ pɩtɛ lɛ, pa-taa kaalabɩ leleŋ. Ɛbɛ yɔɔ? “Mbʋ pʋyɔɔ yɔ pakpaɣ-wɛ se pamʋnaa se paɖʋ-wɛ fɛyɛ Yesu hɩɖɛ yɔɔ.” (Tʋma 5:40-42) Sɔɔlɩm mbʋ paawɛnɩ pa-ñʋʋdʋ yɔɔ yɔ, pɩɩwɛ ɖoŋ siŋŋ nɛ pɩkpaɖɩ sɔɔndʋ ndʋ peseɣaɣ po-koyindinaa yɔ. Nɛ pawɩlaa se pɛwɛnɩ sɔɔlɩm, pʋyɔɔ “powokaɣ pɩ-yɔɔ” nɛ posusuu tɔm kɩbandʋ. Sɔnɔ, ɖo-koobiya sakɩyɛ woki pɩ-yɔɔ nɛ pɔɖɔkʋʋ pe-siɣsiɣ wɛtʋ Yehowa sɛtʋ taa, paa pakatɩɣ tɩlasɩ yɔ. Panawa se Yehowa ɛɛkaɣ sɔʋ pa-tʋmɩyɛ nɛ sɔɔlɩm mbʋ pawɩlɩ ɛ-hɩɖɛ yɔɔ yɔ pɩ-yɔɔ. w21.03 25 § 18-19

Paalʋlʋʋ patam numwaa nɛ ɛsɔdaa kpaʋ lidaʋ. Ɛsɔ haɣnɩ-wɛ lidaʋ ŋgʋ. Pamaɣzɩɣ pe-lidaʋ ŋgʋ kɩ-yɔɔ, patɩmɩɣ kɩ-yɔɔ, nɛ paɖaŋɩɣ kpam se pamʋ pa-kɩhɛyʋʋ ɛsɔdaa. Halɩ, patɩtɩlɩ ɛzɩma po-tomnaɣ kaɣ wɛʋ ɛsɔdaa yɔ. (Fil. 3:20, 21; 1 Yoh. 3:2) Paa mbʋ yɔ, paɖaŋ kpam se alɩwaatʋ ɛtalɩ lɔŋ nɛ pɛwɛɛ Kewiyaɣ taa ɛsɔdaa. Heŋ lɛɛŋ taa ñɩma ɖaŋ kpam se pacaɣ tɛtʋ yɔɔ tam. Mbʋ ɛyaa tɩŋa sɔɔlaa. Paɖaŋ kpam se alɩwaatʋ ndʋ papɩzɩɣ nɛ paɖʋ nesi nɛ pɛlɛɣzɩ tɛtʋ kpeekpe nɛ tɩpɩsɩ paradisuu yɔ, tɩtalɩ lɔŋ. Pɩɩlakɩ-wɛ lɛɛ lɛɛ. Paɖaŋaa se alɩwaatʋ ɛtalɩ lɔŋ nɛ papɩzɩ nɛ pama pa-ɖɩsɩ, pahayɩ pa-kaɖasɩ nɛ pafalɩsɩ pe-piya pilim wɛtʋ taa. (Iza. 65:21-23) Paɖaŋ kpam se alɩwaatʋ ɛtalɩ lɔŋ nɛ pɛyɛlɩ nɛ powolo tɛtʋ yɔɔ lona sakɩyɛ taa, pʋŋ yɔɔ, laŋ tɛɛ, teŋgunaa nɔsɩ nɛ pɛkpɛlɩkɩ wondu ndʋ payɩ Yehowa lɩzaa yɔ tɩ-yɔɔ tɔm. Ɛlɛ, mbʋ pɩlakɩ-wɛ leleŋ nɛ pɩkɩlɩ yɔ lɛ se panawa se pa nɛ Yehowa pa-taabalɩyɛ kaɣ wobu pɩ-yɔɔ nɛ ɖɩcɛyɩsɩɣ cɛyɩsʋʋ yɔɔ. w21.01 18-19 § 17-18

Alɩwaatʋ ndʋ Babilɔɔnɩ mba tɛm tɛtʋ yɔkʋʋ yɔ, ɛyaa pɩzaɣ se pɔyɔɔdɩ se: “Tɩkɛ lakʋ . . . mbʋ pʋyɔɔ yɔ pɩtɩkazɩ ɛyʋ nɛ kpɩnɛ, nɛ paɖʋ-tʋ Kalɩdee mba nesi tɛɛ.” (Yer. 32:43.) Yowɛɛlɩ yɔɔdɩ ɛ-natʋ tɔm nɛ pɩla pɩnzɩ 200 mbʋ yɔ pʋwayɩ lɛ, Yehowa tɩŋnɩ Yereemii yɔɔ nɛ ɛyɔɔdɩ tɔm lɛɛtʋ ɖɔɖɔ you ŋgʋ kɩ-yɔɔ. Ɛyɔɔdaa se mba pakaɣ sʋʋ tɛtʋ ndʋ tɩ-taa yɔ, pakaɣ ñɩnʋʋ Izrayɛɛlɩ piya nzɩ sɩlabɩ mbʋ pɩtɩtʋʋzɩ yɔ, nɛ pakaɣ sɩ-tɩŋa kpaʋ. Yehowa yɔɔdaa se: “Mankaɣ tiyuu piyiŋ lɔyaa nɛ pɔlɔ-wɛ piyiŋ; nɛ pʋwayɩ lɛ, mankaɣ-wɛ tiyinuu agbama sakɩyɛ nɛ powolo lakʋ, paa pʋʋ ŋgʋ lɛ kɩ-yɔɔ nɛ paa piyaɣ ŋga lɛ kɔ-yɔɔ, nɛ piwolo pɩtalɩ kaaŋ hɛɛnzɩ taa. . . . Mancalɩɣ-wɛ hɛyʋʋ tam nabʋlɛ taa pa-azuluma nɛ pa-kɩwɛɛkɩm yɔɔ.” Teŋgunaa nɛ laŋ taapɩzɩɣ se pɩya Izrayɛɛlɩ piya nzɩ sitikpiɖi yɔ sɩ-ñʋŋ Babilɔɔnɩ mba nesi tɛɛ.—Yer. 16:16, 18. w20.04 5 § 12-13

Lɔɔtɩ wezuu caɣʋ alɩwaatʋ kaɖɛ ñɩndʋ natʋyʋ taa, ɛɛwɛ ninika Yehowa paɣtʋ ñam hɔɔlʋʋ taa. Ðɩpɩzɩɣ nɛ ɖɩmaɣzɩ se Lɔɔtɩ taakeŋni mbʋ Yehowa heyi-i se ɛla yɔ, yaa se ɛwɛ kaañamtʋ. Paa mbʋ yɔ, Yehowa tiyebi-i sɩnʋʋ. “[Yehowa] na ɛ-pʋtɔdɩyɛ naʋ mbʋ yɔ, pʋyɔɔ” lɛ, tiyiyaa ɖɔkɩ pe-nesi taa nɛ palɩzɩ-wɛ tɛtʋ taa. (Kiɖe 19:15, 16) Pɩtɩla lɩmaɣza sakɩyɛ yɔɔ Yehowa na Lɔɔtɩ pʋtɔdɩyɛ. Pɩtɩla Lɔɔtɩ taatisiɣ se ɛlɩɩ ɛ-ɖɩɣa taa lɔŋ mbʋ pʋyɔɔ yɔ, sɔɔndʋ kpaɣaɣ-ɩ nɛ ɛyaa mba pɛwɛ tɛtʋ nɛ wayɩ yɔ. Kala lɛɛna kaawɛɛ ɖɔɖɔ. Pʋtɔma Lɔɔtɩ nɩ ɛzɩma awiya nabɛyɛ naalɛ kaatɔlɩ aŋwɔ lɔkɔnaa mba paawɛ fɛɛʋ ŋgʋ kɩñɔtɩnɩ peeɖe yɔ pa-taa yɔ pɩ-tɔm. (Kiɖe 14:8-12) Ɛzɩ walʋ nɛ caja yɔ, pɩtɩla Lɔɔtɩ kaawɛɛ nɛ ɛnɩzɩɣ ɛ-hɔʋ yɔɔ. Pɩtasɩ lɛ, Lɔɔtɩ kaakɛ ñɩm tʋ, pʋyɔɔ lɛ pɩtɩla ɛɛwɛnɩ ɖɩɣa kɩbaŋa nakɛyɛ Sodom. (Kiɖe 13:5, 6) Toovenim taa lɛ, pɩtɩŋa payɩ mbʋ yɔ, pɩ-taa nabʋyʋ taapɩzɩɣ se pɩkɛnɩ Lɔɔtɩ kawanaɣ se ekizi ñam Yehowa kpɛdɛyɛ. Paa mbʋ yɔ, Yehowa taaka ɛ-lɩmaɣza Lɔɔtɩ ɛjandʋ yɔɔ, ɛlɛ ɛɛkpaɣ-ɩ se ɛkɛ “ɛyʋ siɣsiɣ tʋ.”—2 Pɩy. 2:7, 8. w20.04 18 § 13-14

Piya evelisi, pɩpɩzɩɣ nɛ pɩkpaɣ alɩwaatʋ pʋcɔ nɛ ɛyaa mba paasɩmɩ-mɩ alɩwaatʋ ndʋ ɩɩkɛ piya yɔ, peɖiɣzina se ɩpɩsɩ ɛyaa sɔsaa. Ɛlɛ ña-taa pɩzɩɣ nɛ pɩtɛ se Yehowa ɛɛcɔŋnɩ ɛyʋ weyi ŋkɛnɩ ɛsa yɔɔ yem yɔ. Ɛsɩm weyi ŋkɛnaa yɔ nɛ mbʋ ŋpɩzɩɣ nɛ ŋla yɔ. (1 Sam. 16:7) Cɛyɩsɩ ña nɛ Ɛsɔ mɩ-taabalɩyɛ. Daviid kpakaɣ alɩwaatʋ nɛ ɛcɔŋnɩ wondu ndʋ Yehowa lɩzaa yɔ. Piyeba nɛ ɛ nɛ Yehowa pa-taabalɩyɛ cɛyɩsɩ. Daviid kpakaɣ alɩwaatʋ nɛ ɛmaɣzɩɣ mbʋ wondu kɩlɩzɩtʋ ndʋ tɩkpɛlɩkaɣ-ɩ Lɩzɩyʋ yɔɔ yɔ pɩ-yɔɔ. (Keɣa 8:4, 5; 138:14; Roma 1:20) Mbʋ ŋpɩzɩɣ nɛ ŋtasɩ labʋ yɔ mbʋ yɔ: Pɔzɩ Yehowa se ɛha-ŋ ɖoŋ weyi pɩpɔzʋʋ-ŋ yɔ. Ño-sukuli taa taabalaa nabɛyɛ woŋuu-ŋ mbʋ pʋyɔɔ ŋkɛ Yehowa Aseɣɖe Tʋ na? Ye pɩkɛ mbʋ yɔ, tɩmnɩ Yehowa se ɛsɩnɩ-ŋ nɛ ŋlʋbɩnɩ kaɖɛ nɖɩ. Ðɔ lɔŋ tasʋʋ kɩbam mbʋ pɩwɛ Ɛsɔtɔm, ɖɛ-ɛgbɛyɛ takayɩsɩ, nɛ videowaa taa yɔ pɩ-yɔɔ. Alɩwaatʋ ndʋ payɩ ŋnaɣ se Yehowa sɩnɩ-ŋ nɛ ŋlʋbɩnɩ kaɖɛ naɖɩyɛ yɔ, tisuu mbʋ ŋwɛna se ɛkaɣ-ŋ sɩnʋʋ kala lɛɛna taa yɔ, pɩkaɣ paɣlʋʋ. Pɩtasɩ lɛ alɩwaatʋ ndʋ lalaa naɣ se ŋtaɣ liu Yehowa lɛ, pakaɣ-ŋ taʋ liu. w21.03 4 § 7

Taabalaa kɩbama sɔɔlaa se peheyi ɖama pa-lɩmaɣza nɛ ɛzɩma pɩlakɩ-wɛ yɔ. Ɛzɩ mbʋ pɩwɛ ɖa nɛ Yehowa ɖa-taabalɩyɛ hɔɔlʋʋ taa? Ɛɛɛ! Yehowa tɩŋɩɣnɩ ɛ-Tɔm yɔɔ nɛ ɛyɔɔdʋʋnɩ-ɖʋ, nɛ tɩ-taa eheyiɣ-ɖʋ ɛ-lɩmaɣza nɛ ɛzɩma pɩlakɩ-ɩ yɔ. Ðɩyɔɔdʋʋnɩ-ɩ adɩma taa nɛ ɖɩpɩzɩɣ nɛ ɖiheyi-i mbʋ pɩwɛ ɖooo ɖa-laŋɩyɛ taa yɔ nɛ ɛzɩma ɖeyi ɖeyi pɩlakɩ-ɖʋ yɔ. Yehowa kɛ taabalʋ sɔɔlɩm tʋ nɛ pʋyɔɔ lɛ, pɩtasɩnɩ se ewelisiɣ ɖa-adɩma lɛ, ecosuu ɖɔɖɔ a-yɔɔ. Nabʋyʋ taa ecosuu a-yɔɔ lɛɛ lɛɛ. Ɛlɛ nabʋyʋ taa ɖɔɖɔ lɛ, pɩpɩzɩɣ nɛ pɩpɔzɩ se ɖiwolo pɩ-yɔɔ nɛ ɖɩtɩmɩɣ tɔm kʋɖʋmtʋ yɔɔ. Paa mbʋ yɔ, ɖa-taa pɩzɩɣ nɛ pɩtɛ se ɛkaɣ tɩŋnʋʋ nʋmɔʋ ŋgʋ kɩkpaɖɩ ɖeu yɔ kɩ-yɔɔ nɛ ecosi ɖa-adɩma yɔɔ alɩwaatʋ kɩbandʋ yɔɔ. Toovenim taa lɛ, ɛzɩma Ɛsɔ cosuu ɖa-adɩma yɔɔ yɔ, pɩpɩzɩɣ pɩwɛɛ ndɩ nɛ mbʋ ɖɩɖaŋaa yɔ. Kɩɖaʋ nakʋyʋ yɔ, mbʋ ɛzɩ eeyeba nɛ kaɖɛ naɖɩyɛ sɩɩ tɩnaɣ lɛ, ɛpɩzɩɣ nɛ ɛha-ɖʋ lɔŋsɩnɖɛ nɛ ɖoŋ se ‘ɖɩɖɔkɩ ɖa-laŋɩyɛ ɖɩ-taa.’ (1 Kɔr. 10:13) Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ adɩma kʋjɔʋ kɩbaŋʋ ŋgʋ kɩ-yɔɔ? Nʋmɔʋ nakʋyʋ lɛ se ɖɩɖɔ lɔŋ weyi Ɛsɔ tasaa se ‘ɖɩtɩmɩɣ kaahɛzaɣ’ yɔ ɩ-yɔɔ.—1 Tes. 5:17. w20.05 27-28 § 7-8

Seyaa mba peseɣ nʋmɔʋ kɩɖaɣlʋʋ yɔ, pakaŋ pɛ-ɛsa nʋmɔʋ ŋgʋ kɩwɛ pɛ-ɛsɩndaa kpaagbaa yɔ kɩ-taa, se pɩsa nɛ pitaatuuli-wɛ. Ye pɔtɔlaa yɔ, pakʋyʋʋ nɛ powolo seya yɔɔ. Pɩtɩkɛ mbʋ pituuli-wɛ yɔ pɩ-yɔɔ pacalɩɣ kam pa-lɩmaɣza, ɛlɛ ɛzɩma pɛtɛ seya nɛ pamʋ kɩhɛyʋʋ yɔ pɩ-yɔɔ. Seya wena a-taa ɖɩwɛɛ yɔ, ɖɩpɩzɩɣ nɛ ɖɩtɔlɩ tam sakɩyɛ, piyiɣdi-ɖʋ yɔɔdaɣ nɛ lakasɩ taa. Yaa mba ɖa nɛ wɛ ɖiseɣ yɔ, papɩzɩɣ pala nabʋyʋ nɛ pɩcɛyɩ-ɖʋ. Ye pɩlabɩ mbʋ yɔ, pɩfɛyɩ se pɩɖɩɣzɩ-ɖʋ. Ða-tɩŋa ɖɩtɩtalɩ pilim, nɛ ɖa-tɩŋa ɖɩwɛɛ nɛ ɖiseɣ nʋmɔʋ sɔɖɩɩɩ ŋgʋ kiwokini wezuu taa yɔ kɩ-taa. Ye mbʋ, nabʋyʋ taa “ɖɩyɔkʋʋ” ɖama nɛ piyeki se ‘ɖa-taa ɛwɛɛnɩ’ ɖama. (Kol. 3:13) Ɛlɛ, pɩwɛɛ se ɖɩka ɖa-lɩmaɣza kɩhɛyʋʋ ŋgʋ kɩwɛnɩ ɛsɩndaa yɔ kɩ-yɔɔ na. Ye pituuli-ɖʋ yɔ, pɩwɛɛ se ɖɩlɩzɩ se ɖɩkʋyʋʋ nɛ ɖiwolo seya yɔɔ. Ye pɩwɩzɩ-ɖʋ nɛ ɖikizi se ɖɩɩkʋyʋʋ yɔ, ɖɩɩkaɣ talʋʋ tɩnaɣ yɔɔ nɛ ɖɩmʋ kɩhɛyʋʋ. Pɩtasɩ lɛ, ɖɩpɩzɩɣ nɛ ɖɩpɩsɩ pɩyɛ kutuuliye lalaa mba pɛwɛɛ nɛ pañakɩ pana se pese nʋmɔʋ sɔɖɩɩɩ taa yɔ. Nʋmɔʋ ŋgʋ kiwokini wezuu taa. w20.04 26 § 1; 28 § 8-9

Nayʋ Danɩyɛɛlɩ yɔɔdʋʋ ɛyaa kominawaa ndɩ ndɩ mba pɛwɛnɩ ɖoŋ Ɛsɔ samaɣ yɔɔ yɔ pɔ-tɔm. Ɛyɔɔdaa se pɛkɛ sɩʋ kpeliɣa sɔsɔɔ ŋga palabɩ-kɛ nɛ ñɩɣtʋ yɔ kɔ-hɔɔlɩŋ ndɩ ndɩ. Ɛyaa kominawaa mba, pɛ-kɛdɛzaɣ ñɩŋgʋ sɩŋnɩ sɩʋ kpeliɣa ŋga ka-naataŋ weyi palabɩ-ɩ nɛ ñɩɣtʋ nɛ cʋʋ yɔ. Naataŋ sɩŋnɩ Aŋglo-Amerika Kewiyaɣ. Natʋ ndʋ, tɩwɩlɩɣ se kakaɣ wɛʋ ka-tʋmɩyɛ labʋ yɔɔ alɩwaatʋ ndʋ Ɛsɔ Kewiyaɣ kɔŋ nɛ kaɖɩzɩ ɛyaa kominawaa yɔ. Apostoloo Yohanɛɛsɩ ɖɔɖɔ yɔɔdɩ ɛjaɖɛ yɔɔ kewiyisi ndɩ ndɩ tɔm. Kewiyisi nzɩ sɩwɛnɩ ɖoŋ Yehowa samaɣ yɔɔ. Yohanɛɛsɩ yɔɔdaa se kominawaa mba, pɛwɛ ɛzɩ tɛtɛgbɩnɛ nɖɩ ɖɩwɛnɩ ñʋŋ lʋbɛ yɔ. Tɛtɛgbɩnɛ nɖɩ ɖɩ-ñʋʋ lʋbɛ ñɩŋgʋ sɩŋnɩ Aŋglo-Amerika Kewiyaɣ. Tɔm ndʋ tɩcɛyaa, mbʋ pʋyɔɔ yɔ ñʋʋ nakʋyʋ tɩtasɩ lɩʋ ñʋʋ ŋgʋ kɩ-wayɩ. Tɛtɛgbɩnɛ nɖɩ, ɖɩ-ñʋʋ lʋbɛ ñɩŋgʋ kaɣ wɛʋ kewiyitu tɔɔʋ yɔɔ alɩwaatʋ ndʋ Krɩstʋ nɛ ɛ-sɔɔjanaa mba pɛwɛ ɛsɔdaa yɔ paɖɩzɩɣ-kʋ nɛ pɛkpɛndɩnɩ tɛtɛgbɩnɛ hɔɔlɩŋ lɛɛŋ yɔ.—Natʋ 13:1, 2; 17:13, 14. w20.05 14 § 11-12

Ðɩnawa se Ɛsɔ lɩzɩnɩ wezuu. Ɛlɛ, tɔm loyaɣ “Ɛsɔ kɛ sɔɔlɩm” sɩɣnɩ-ɖʋ se ɖɩtɔzɩ se Ɛsɔ cɔlɔ sɔɔlɩm lɩɣna. Yehowa sɔɔlɩ-ɖʋ. Ɛ-sɔɔlɩm kandɩyɩɣ ɖɔ-yɔɔ nɛ sɔɔndʋ ɛɛkpaɣ-ɖʋ nɛ nabʋyʋ, nɛ pɩhaɣ-ɖʋ taa leleŋ. Pɩtɩkɛ Krɩstʋ ñɩma lɩzɩɣna se pawɩlɩɣ sɔɔlɩm yaa paawɩlɩɣ. Pɩkɛnɩ paɣtʋ se pawɩlɩ-pʋ. (Mat. 22:37-40) Alɩwaatʋ ndʋ ɖɩtɩlɩɣ Yehowa camɩyɛ yɔ, pɩpɩzɩɣ nɛ pɩwɛɛ-ɖʋ kɛlɛʋ se ɖɩña paɣtʋ kajalaɣ ñɩndʋ. Pɩwɛɣ-ɖʋ kɛlɛʋ, mbʋ pʋyɔɔ yɔ Yehowa talɩ pilim. Ɛmaɣzɩɣ ɖɔ-yɔɔ nɛ ɛlakɩ-ɖʋ camɩyɛ lakasɩ. Ɛlɛ pɩpɩzɩɣ nɛ pɩwɛɛ-ɖʋ kaɖɛ se ɖɩña paɣtʋ naalɛ ñɩndʋ. Ɛbɛ yɔɔ? Mbʋ pʋyɔɔ yɔ ɖo-koobiya mba pɛkɛ ɖɔɖɔ ɖa-taabalaa yaa ɖɔ-cɔlɔ mba yɔ, patɩtalɩ pilim. Nabʋyʋ taa papɩzɩɣ nɛ pɔyɔɔdɩ natʋyʋ yaa pala nabʋyʋ nɛ pɩlabɩ-ɖʋ ɛzɩ patɩsɔɔlɩ-ɖʋ yaa paamaɣzɩɣ ɖɔ-yɔɔ yɔ. Yehowa kaanawa se pɩkaɣ-ɖʋ wɛʋ kaɖɛ se ɖɩña paɣtʋ ndʋ, pʋyɔɔ ɛtɩŋnɩ ɛyaa mba pama Bibl yɔ pa-taa nabɛyɛ yɔɔ se ɛwɩlɩ-ɖʋ mbʋ pʋyɔɔ pɩcɛyaa se ɖɩwɩlɩ ɖama sɔɔlɩm nɛ ɛzɩma ɖɩpɩzɩɣ nɛ ɖɩla mbʋ yɔ. Bibl mayaa mba pa-taa nɔɔyʋ lɛ apostoloo Yohanɛɛsɩ.—1 Yoh. 3:11, 12. w21.01 8 § 1-2

Paa ɖɩpaɣzʋʋ Yehowa sɛʋ yɔ, pitileɖi yaa pɩlabɩ pɩnzɩ sakɩyɛ yɔ, pɩwɛɛ se ɖɩpɔzɩ ɖa-tɩ se: ‘Mɛwɛɛ nɛ malʋkɩnɩ takɩm mbʋ Sataŋ kɔŋnɩ mɔ-yɔɔ se eyele nɛ ma-laŋɩyɛ tayɩ yɔ?’ Kɩɖaʋ nakʋyʋ yɔ, ye ŋna kɩlɛmʋʋ nakʋyʋ teelee yɔɔ yaa intɛrnɛɛtɩ yɔɔ, ŋgʋ kɩpɩzɩɣ kiyele nɛ ŋwɛɛnɩ kʋzʋʋ kɩdɛkɛdʋʋ lɩmaɣza yɔ, ɛzɩma ŋlakɩ? Pɩpɩzɩɣ nɛ pɩwɛɛ kɛlɛʋ se ŋmaɣzɩ se kɩlɛmʋʋ ŋgʋ yaa filim ŋgʋ kɩ-taa kɩlɛmɩŋ tɩkɛ kʋzʋʋ kɩlɛmɩŋ keekee. Ɛlɛ, ɛzɩ pɩpɩzɩɣ nɛ pɩkɛ mbʋ pɩ-yɔɔ Sataŋ tɩŋɩɣna se eyele nɛ ña-laŋɩyɛ tayɩ yɔ? (2 Kɔr. 2:11) Papɩzɩɣ nɛ pakpaɣ kɩlɛmʋʋ ŋgʋ nɛ pamaɣzɩnɩ laɖɩyɛ cikpeɖe nɖɩ nɔɔyʋ lakɩnɩ tʋmɩyɛ se ɛfaɣ ɖaʋ sɔsɔʋ nakʋyʋ yɔ. Ɛpaɣzɩɣ faɣʋ lɛ, laɖɩyɛ nɔɔ sʋʋnɩ ɖaʋ ŋgʋ kɩ-taa. Pʋwayɩ, ɛwɛɣ nɛ ɛñɩkɩɣ-ɖɩ se ɖɩsʋʋ nɛ pɩkpaɖɩ lɛ, ɖaʋ fakɩ. Ɛzɩ ɖɩpɩzɩɣ nɛ ɖɩkpaɣ kɩlɛmɩŋ weyi iseɣtiɣ kɔɖɛyɩ kɩdɛkɛdʋʋ yɔ nɛ ɖɩmaɣzɩnɩ laɖɩyɛ nɔɔ taa ɖenɖe pɩwɛ cʋlʋ cʋlʋ yɔ? Ye ɛyʋ ɛcɔŋnɩ kɩlɛmɩŋ ɛnɩ nɛ ɛmaɣzɩɣ se ɩfɛyɩnɩ ɖoŋ kɩdɛkɛdɩŋ nɩɩyɩ yɔ, pazɩ pazɩ lɛ ɩpɩzɩɣ ituzi-i nɛ ɛyʋsɩnɩ Yehowa. Ye mbʋ, taaha nʋmɔʋ nɛ nabʋyʋ mbʋ pɩtɩtʋʋzɩ yɔ pɩsʋʋ ña-laŋɩyɛ taa! Yele nɛ ña-laŋɩyɛ kɛ kʋyʋmɖɩyɛ nɛ ŋse Yehowa hɩɖɛ sɔɔndʋ! w20.06 11-12 § 14-15

Ðɩnaɣ mba papɩsɩ tɔm susuu yebiyaa yɔ nɛ pɩtɛ lɛ, pɩpɔzʋʋ se ɖiwolo pɩ-yɔɔ nɛ ɖɩsɩɣnɩ-wɛ nɛ ɖɩkpazɩɣ-wɛ ɖoŋ. Ɛzɩ pɩyalʋ kilebu weyi ɛ-tɔm Yesu yɔɔdɩ ɛ-kɩɖaʋ taa yɔ, pɩtɩla pɛwɛɛ nɛ panɩɣ siziŋ pa-maɣzɩm taa, nɛ pɩkaɣ kpaɣʋ alɩwaatʋ sakɩyɛ pʋcɔ nɛ pɔ-yɔɔ cɛ. (Luka 15:17-24) Mbʋ pɩtalɩ-wɛ Sataŋ ɛjaɖɛ taa yɔ pʋyɔɔ lɛ, pɩtʋʋ fɛyɩ se patɩtasɩ wɛʋ ɖoŋ fezuu taa ɛzɩ ɖooo lɛ yɔ. Pɩpɔzʋʋ se ɖɩsɩnɩ-wɛ nɛ pakpazɩ ɖoŋ tisuu mbʋ pɛwɛnɩ Yehowa yɔɔ yɔ. Heu kilebu kɩɖaʋ taa, Yesu yɔɔdɩ ɛzɩma ninɖiɣyu hɔɔlʋʋ heu ɛ-hazasɩ yɔɔ nɛ ɛpɩsɩɣnɩ-ɩ ewiɖe cɔlɔ yɔ pɩ-tɔm. Ninɖiɣyu tɛm kpaɣʋ alɩwaatʋ nɛ ɖoŋ nɛ ɛñɩnɩnɩ heu kilebu. Ɛlɛ, eɖiɣzinaa se pɩkaɣ pɔzʋʋ se ɛkpaɣ heu ɛnʋ nɛ ɛpɩsɩnɩ kalakʋ taa mbʋ pʋyɔɔ yɔ, ɛlɛ ɛɛkaɣ wɛnʋʋ ɖoŋ se ɛpɩsɩ ɛ-maɣmaɣ. (Luka 15:4, 5) Pɩpɩzɩɣ nɛ pɩpɔzɩ se ɖɩkpaɣ alɩwaatʋ sakɩyɛ nɛ ɖoŋ nɛ ɖɩsɩnɩ mba pɛhɛ fezuu taa yɔ nɛ pawa kaɖɛ nɖɩ ɖɩɖɩkɩ-wɛ nʋmɔʋ se pataaɖaɣnɩ paɣzʋʋ Yehowa sɛʋ yɔ. Ɛlɛ pɩtɩŋnɩ Yehowa fezuu, ɛ-Tɔm nɛ ɛgbɛyɛ takayɩsɩ yɔɔ lɛ, ɖɩpɩzɩɣ nɛ ɖɩsɩnɩ-wɛ nɛ paɖaɣnɩ kpaʋ ɖoŋ fezuu taa. Pʋyɔɔ lɛ, ye ɛzʋtʋyʋ nɔɔyʋ ɛpɔzɩ-ŋ se ŋkpɛlɩkɩnɩ pa-taa nɔɔyʋ Bibl yɔ, pɩpɔzʋʋ se ŋtisi waɖɛ nɖɩ nɛ taa leleŋ, ye ŋpɩzɩɣ yɔ. w20.06 28 § 14-15

Pɩcɛyaa se ɖɩwɩlɩ sɔɔlɩm nɛ pɩsa nɛ ɖɩwɩlɩ se ɖɛkɛnɩ Krɩstʋ ñɩma toovenim mba. Ɛlɛ, pɩcɛyaa ɖɔɖɔ se ɖɩwɛɛnɩ “sɩmtʋ toovenim ñɩndʋ nɛ lɛɣtʋ siŋŋ.” (Fil. 1:9) Ye ɖɩtɩla mbʋ yɔ, “paa wɩlɩtʋ ndʋ lɛ ti-helim cɔzʋʋ-ɖʋ nɛ pɩkɛzɩɣ-ɖʋ hɔɔlɩŋ tɩŋa taa,” pɩkpɛndɩnɩ tisuu yebiyaa ɖɔɖɔ. (Efɛz. 4:14) Alɩwaatʋ ndʋ kajalaɣ pɩnzɩ mɩnʋʋ taa Yesu tɔmkpɛlɩkɩyaa sakɩyɛ yebi-i tɩŋʋʋ yɔ, apostoloo Pɩyɛɛrɩ lɩzaa ɛwɩlɩ se ɛ-taa tɛma se Yesu wɛnɩ “tɔm ndʋ tɩhaɣ wezuu maatɛŋ yɔ.” (Yoh. 6:67, 68) Paa Pɩyɛɛrɩ ɛtaanɩɩ tɔm ndʋ Yesu yɔɔdaɣ yɔ tɩ-tɩŋa tɩ-taa yɔ, ɛɖɔkɩ e-siɣsiɣ wɛtʋ, mbʋ pʋyɔɔ yɔ, ɛɛsɩm Yesu yɔɔ toovenim tɔm camɩyɛ. Ña ɖɔɖɔ ŋpɩzɩɣ nɛ ŋkpazɩ ɖoŋ tisuu mbʋ ŋwɛnɩ Bibl wɩlɩtʋ yɔɔ yɔ. Ye ŋlakɩ mbʋ yɔ, ñe-tisuu kaɣ wɛʋ ɖoŋ tam paa ɛbɛ ɛtɩɩlakɩ yɔ, nɛ ŋkaɣ sɩnʋʋ lalaa nɛ pɛwɛɛnɩ tisuu sɔsɔm.—2 Yoh. 1, 2. w20.07 8 § 2; 13 § 18

Pɩsa nɛ ɖɩsɩnɩ ɖo-koobiya nɛ pɛwɛɛ toovenim taa tam lɛ, pɩwɛɛ se ɖɩwɩlɩ se ɖɩkɛ pʋtɔdɩyɛ nayaa. (1 Yoh. 3:10, 11, 16, 17) Pɩtɩkɛ alɩwaatʋ ndʋ pɩtɩŋa pɩɖɔŋ camɩyɛ yɔ pɩwɛɛ se ɖɩwɩlɩ se ɖɩsɔɔlɩ ɖama, ɛlɛ pɩwɛɛ se ɖɩla mbʋ ɖɔɖɔ alɩwaatʋ ndʋ kala kɔŋ yɔ. Kɩɖaŋ nɩɩyɩ yɔ: Ŋsɩm nɔɔyʋ se elesi ɛ-ɛyʋ kʋsɔɔlʋ nɔɔyʋ nɛ pɩpɔzʋʋ se pɛhɛzɩ ɛ-laŋɩyɛ, yaa pala nabʋyʋ ɖeyi ɖeyi nɛ pasɩnɩ-ɩ? Yaa ŋnɩwa se asɛyʋʋ nakʋyʋ laba nɛ koobiya nabɛyɛ lesi pa-ñɩm nɛ pɩpɔzʋʋ se pasɩnɩ-wɛ nɛ paɖaɣnɩ maʋ pe-Kewiyaɣ Kpaamɩŋ yaa pa-ɖɩsɩ na? Pɩtɩkɛ tɔm ndʋ ɖɩyɔɔdʋʋ yɔ, tɩ-yɔɔ ɖeke ɖɩtɩŋɩɣna nɛ ɖɩwɩlɩɣ se ɖɩsɔɔlɩ ɖo-koobiya nɛ ɖɩnaɣ pa-pʋtɔdɩyɛ siŋŋ, ɛlɛ kɔzɩ kɔzɩ lɛ ɖɩtɩŋɩɣnɩ ɖa-lakasɩ yɔɔ nɛ ɖɩlakɩ mbʋ ɖɔɖɔ. Alɩwaatʋ ndʋ ɖɩwɩlɩɣ ɖama sɔɔlɩm yɔ, ɖɩmaɣzɩɣnɩ ɖa-Caa kʋsɔɔlʋ weyi ɛwɛ ɛsɔdaa yɔ. (1 Yoh. 4:7, 8) Nʋmɔʋ sɔsɔʋ ŋgʋ kɩ-yɔɔ ɖɩtɩŋɩɣna nɛ ɖɩwɩlɩɣ se ɖɩwɛnɩ sɔɔlɩm yɔ, ŋgʋ lɛ se ɖikpeɣ ɖama. Kɩɖaʋ nakʋyʋ yɔ: Ye nɔɔyʋ ɛɖʋ-ɖʋ ɖɩwɩzɩyɛ yɔ, pɩwɛɛ se ɖikpeɣ-i nɛ ɖɩsɔɔ mbʋ ɛlabɩ-ɖʋ yɔ pɩ-yɔɔ, mbʋ wɩlɩɣna se ɖɩwɛnɩ sɔɔlɩm.—Kol. 3:13. w20.07 24 § 14-15

Ɛzɩ ɖɩkaɣ kpɛlɩkɩnʋʋ ɛyaa mba pefezi-wɛ yɔ Bibl kʋɖʋm kʋɖʋm ɛzɩ ɖɩlakʋʋ sɔnɔ yɔ? Ɛzɩ ɛyaa mba, pakaɣ wɛʋ agbaa taa se pafalɩsɩ-wɛ nɛ papɩzɩ nɛ pawɩlɩ tɔm ɛyaa lalaa mba pakaɣ fezuu pʋwayɩ yɔ? Pɩwɛɛ se ɖɩɖaŋ nɛ ɖɩna. Tɔm ndʋ ɖɩsɩma yɔ lɛ se Krɩstʋ Pɩnzɩ Kudoku Kewiyitu Tɔɔʋ kaatɛŋ lɛ, ‘patɩlɩɣ [Yehowa] tɛtʋ kpeekpe taa camɩyɛ.’ (Iza. 11:9) Ðɩkaɣ labʋ tʋma sakɩyɛ pɩnzɩ kudoku alɩwaatʋ ndʋ tɩ-taa nɛ taa leleŋ! Krɩstʋ Pɩnzɩ Kudoku Kewiyitu Tɔɔʋ alɩwaatʋ taa, pɩkaɣ pɔzʋʋ se Yehowa piya nzɩ sɩwɛ tɛtʋ yɔɔ yɔ, sɩ-tɩŋa sɩla lɛɣzɩtʋ nɛ sɩ-tɔm kɛdɩnɩ-ɩ. Pʋyɔɔ lɛ, pa-tɩŋa pakaɣ sɩnʋʋ mba pefezi-wɛ yɔ nɛ sɔɔlɩm se paba ɩla lɛɣzɩtʋ nɛ pɩsa nɛ pawa lɩmaɣza kɩdɛkɛda nɛ kɔɖɛyɩ kɩdɛkɛdʋʋ; nɛ pacaɣ wezuu ɛzɩ Yehowa paɣtʋ pɔzʋʋ yɔ. (1 Pɩy. 3:8) Pɩtʋʋ fɛyɩ se mba pakaɣ-wɛ fezuu yɔ, pakaɣ naʋ se Yehowa samaɣ wɛnɩ tɩ luzuu nɛ keɖiɣni ñaɣʋ pana nɛ kalakɩ lɛɣzɩtʋ se kɔ-tɔm ɛkɛdɩnɩ Yehowa. Nɛ mba pefezaa yɔ pakaɣ sɔɔlʋʋ se pɛkpɛndɩ kɔ-yɔɔ nɛ pɛsɛɛ Yehowa.—Fil. 2:12. w20.08 16 § 6-7

Ye ɖɩɖɔŋ lɔŋ weyi fezuu kiɖeɖeu sɩnɩ apostoloo Pɔɔlɩ nɛ ɛtasɩ yɔ ɩ-yɔɔ nɛ ɖiwiliɣ ɖa-maɣmaɣ ɖa-lakasɩ taa yɔ, ɖɩpɩzɩɣ nɛ ɖɩpaɣzɩ naʋ se ɖɩwɛ niye hɔɔlɩŋ weyi ɩ-taa lalaa fɛyɩ niye yɔ. Kɩɖaʋ nakʋyʋ yɔ, pɩtɩla ɛzʋtʋyʋ nɔɔyʋ ɩɩyɔɔdʋʋ samaɣ taa tɔm camɩyɛ siŋŋ, ɛlɛ ɛpɩzɩɣ nɛ ɛkɛ tɔmkpɛlɩkɩyaa laɖʋ kɩbanʋ siŋŋ. Yaa pɩtɩla ɛtɩkɛ ɖʋtʋ laɖʋ kɩbanʋ ɛzɩ ɛ-ɛgbɛyɛ taa ɛzʋtʋyaa nabɛyɛ yɔ, ɛlɛ ɛkɛ ɛzʋtʋyʋ weyi ɛwɛnɩ camɩyɛ lakasɩ nɛ sɔɔlɩm yɔ, nɛ sɔɔndʋ ɛɛkpaɣ koobiya paa ññɩɩ se pɔñɔtɩnɩ-ɩ nɛ pɔpɔzɩ-ɩ lɔŋ tasʋʋ. Yaa pɩtɩla pasɩmɩ-ɩ camɩyɛ se ɛkɛ agɔma mʋyʋ. (Ebr. 13:2, 16) Alɩwaatʋ ndʋ ɖɩnaɣ kpayɩ kpayɩ se ɖa-maɣmaɣ ɖɩwɛ niye hɔɔlɩŋ nɩɩyɩ taa yɔ, ɖa-taa kaɣ labʋ leleŋ nɛ mbʋ ɖɩpɩzɩɣ ɖɩla nɛ ɖɩɖʋ ɖɛ-ɛgbɛyɛ nesi yɔ. Nɛ ɖɩɩkaɣ sʋsʋʋ ɖo-koobiya mba pɛwɛ niye hɔɔlɩŋ weyi ɩ-taa ɖɩfɛyɩ niye yɔ. Paa lone nɖɩ ɖɩtɩɩwɛnɩ ɛgbɛyɛ taa yɔ, pɩpɔzʋʋ se ɖa-tɩŋa ɖɩsɔɔlɩ se ɖɩɖɛɛnɩ ɛsɩndaa ɖa-tʋmɩyɛ taa nɛ ɖɩwɛɛ niye nɛ pɩkpaɖɩ. w20.08 24 § 16-18

Joseph Rutherford kaayɔɔdɩ samaɣ taa tɔm yɔɔdʋʋ mbʋ pʋ-ñʋʋ kɛnɩ “Samaɣ sɔsɔɔ” yɔ pɩnaɣ 1935 kigbeɣluu ŋgʋ palabɩ Wasɩŋtɔŋ, Etaazuunii ɛjaɖɛ taa yɔ. Koobu Rutherford tɔm yɔɔdʋʋ taa, ɛyɔɔdɩ ɛyaa mba pakaɣ kɛnʋʋ “samaɣ sɔsɔɔ” ŋga kɔ-tɔm pɔyɔɔdɩ Natʋ 7:9 taa yɔ pɔ-tɔm. Pʋcɔ nɛ pɩtalɩɣ mbʋ lɛ, Bibl kpɛlɩkɩyaa maɣzaɣ se samaɣ sɔsɔɔ kɛnɩ ɛyaa mba pakaɣ kpaʋ ɛsɔdaa, ɛlɛ pe-tisuu tɩtalɩ patam numwaa ñɩmbʋ yɔ. Koobu Rutherford tɩŋnɩ Masɩ yɔɔ nɛ ɛlɩzɩ pɩ-taa se patɩlɩzɩ samaɣ sɔsɔɔ taa mba se pacaɣ wezuu ɛsɔdaa, ɛlɛ pɛkɛnɩ Krɩstʋ heŋ lɛɛŋ weyi ɩkaɣ hiɣu ñʋʋ yabʋ “kʋñɔŋ sɔsɔʋ” taa nɛ ɩcaɣ wezuu tam tam tɛtʋ yɔɔ yɔ. (Natʋ 7:14) Yesu yɔɔdaa se: “Mɛwɛnɩ heŋ lɛɛŋ, weyi ɩfɛyɩ kalakʋ kʋnɛ kɩ-taa yɔ; ɛnɩ ɖɔɖɔ pɩwɛɛ se mɔnkɔnɩ-ɩ kɩ-taa, nɛ ɩkaɣ welisuu mɔ-nɔɔ, nɛ ɩkaɣ pɩsʋʋ ewiɖe kʋɖʋmɖɩyɛ, nɛ ɩwɛɛnɩ ninɖiɣyu kʋɖʋm.” (Yoh. 10:16) “Heŋ lɛɛŋ” ɛnɩ, ɩkɛnɩ Yehowa Aseɣɖe Tɩnaa siɣsiɣ tɩnaa mba pɛwɛnɩ lidaʋ se pakaɣ caɣʋ tamtam wezuu Paradisuu taa tɛtʋ yɔɔ yɔ.—Mat. 25:31-33, 46. w21.01 14 § 1-2

Ye ɖɩsɔɔlaa se ɖɩɖɔkɩ ɖa-tɩ nɛ ɖɩtɛzɩ ɖɔ-tɔm susuu tʋmɩyɛ yɔ, pɩpɔzʋʋ se ɖɩfalɩsɩ ɖa-tɩ. (Mat. 28:19, 20) Sakɩyɛ taa lɛ, ɖɩsɔɔlaa se ɖɩtɩŋnɩ nʋmɔʋ ŋgʋ kɩkɩlɩ kɛlɛʋ yɔ kɩ-yɔɔ nɛ ɖɩla nabʋyʋ. Paa mbʋ yɔ, nabʋyʋ taa mbʋ pɩ-tɔm kɩlɩ cɛyʋʋ nɛ pɩpɔzʋʋ se ɖɩlabɩ-pʋ yɔ, pɩlabʋ fɛyɩ kɛlɛʋ. Ye mbʋ, pɩpɔzʋʋ se ɖɩkpɛlɩkɩ tɩ ɖɔkʋʋ. Pʋyɔɔ lɛ, pɩpɔzʋʋ se pasɩnɩ-ɖʋ nɛ ɖɩfalɩsɩ ɖa-tɩ nɛ ɖɩla mbʋ pɩ-labʋ pɩzɩɣ nɛ pɩwɛɛ-ɖʋ kaɖɛ yɔ. Yehowa tɩŋɩɣnɩ e-fezuu kiɖeɖeu yɔɔ nɛ ɛsɩɣnɩ-ɖʋ. (Gal. 5:22, 23) Apostoloo Pɔɔlɩ kaafalɩsɩ ɛ-tɩ. Ɛlɛ, ɛyɔɔdaa se pɩɩpɔzaa se ‘ɛma’ e-tomnaɣ nɛ pɩsa nɛ ɛla mbʋ pɩtʋʋzaa yɔ. (1 Kɔr. 9:25-27) Eseɣti lalaa se pafalɩsɩ pa-tɩ nɛ pala nɛ pɩtɩŋa “pɩɖɔ camɩyɛ nɛ pɩtʋʋzɩ cɔlɩɩɩ.” (1 Kɔr. 14:40) Pɩpɔzʋʋ se ɖɩñaɣ pana siŋŋ nɛ ɖiwolo pɩ-yɔɔ nɛ ɖɩsɛɣ Yehowa, pɩwɛɛ se ɖisusuu tɔm ɖoŋ ɖoŋ nɛ ɖɩwɩlɩɣ tɔm kɩbandʋ.—Tʋma 2:46. w20.09 6-7 § 15-17

Sɔnɔ, ɖɩpɩzɩɣ nɛ ɖisusi tɔm faaa ajɛɛ sakɩyɛ taa. Ŋwɛ ajɛɛ ana a-taa naɖɩyɛ taa? Ye ɛɛɛ yɔ, pɔzɩ ña-tɩ se: ‘Ɛzɩma mɛwɛɛ nɛ malakɩnɩ tʋmɩyɛ laŋhɛzɩyɛ alɩwaatʋ ndʋ?’ Kɛdɛzaɣ kɩyakɩŋ wɛ ŋgee Yehowa samaɣ ɛsɩndaa mbʋ pʋyɔɔ yɔ, kɛ-ɛsɩyɛ sɛnɩ tɔm susuu nɛ tɔm wɩlʋʋ tʋmɩyɛ. Patɩlabɩtɩ tʋmɩyɛ sɔsɔyɛ nɖɩ ɛjaɖɛ yɔɔ wiɖiyi nɛ pana. Tʋma sakɩyɛ wɛɛ se ɖɩpɩzɩɣ nɛ ɖɩla tɔm susuu tʋmɩyɛ nɖɩ ɖɩ-taa. Ɛzɩma ŋpɩzɩɣ nɛ ŋlabɩnɩ tʋmɩyɛ laŋhɛzɩyɛ alɩwaatʋ natʋyʋ camɩyɛ? (2 Tim. 4:2) Maɣzɩ nɛ ŋna se ña-maɣmaɣ yaa ñɔ-hɔʋ taa tʋ nɔɔyʋ pɩzɩɣ nɛ ɛla lɛɣzɩtʋ nɛ pɩsa nɛ esusi tɔm nɛ pɩkpaɖɩ, halɩ pɩtɩla ɛkɛ nʋmɔʋ lɩzɩyʋ na? Pɩtɩpɔzɩ se ɖɩñaɣ pana se ɖɩkɛ ñɩm tɩnaa lɛɛlɛɛyɔ mbʋ pʋyɔɔ yɔ, ɖɩɩkaɣ kpɛndɩnʋʋ mbʋ ɖɩwɛna yɔ nɛ ɖɩtɛzɩ kʋñɔŋ sɔsɔʋ. (Adu. 11:4; Mat. 6:31-33; 1 Yoh. 2:15-17) Tɔm susuyaa sakɩyɛ kpɛlɩkɩ kʋnʋŋ kɩfalʋʋ nakʋyʋ se pɩsa nɛ pasɩnɩ lalaa nɛ pɛkpɛlɩkɩ Yehowa yɔɔ tɔm. Ɛsɔ ɛgbɛyɛ wɛɛ nɛ ɖɩɖʋʋ nesi ɛyaa mba. Ðɩlɩzɩɣ Bibl kpɛlɩkʋʋ wondu kʋnʋmɩŋ weyi ɩ-taa yɔ, ɩcɛzɩ 1000! w20.09 16 § 9-11

Sɔɔja kɩbanʋ wɛɣ siɣsiɣ. Ɛkaɣ lʋbʋ siŋŋ se ɛkandɩyɩ ɛyʋ weyi ɛsɔɔlɩ-ɩ yɔ ɛ-yɔɔ, yaa ɛkandɩyɩ mbʋ pɩmʋ ñɩm ɛ-ɛsɩndaa yɔ pɩ-yɔɔ. Pɔɔlɩ kaaseɣti Timootee se ɛñaɣ pana nɛ ɛñɔɔnɩ Ɛsɔ, pʋ-tɔbʋʋ se ɛwɛɛ siɣsiɣ Ɛsɔ ɛsɩndaa. (1 Tim. 4:7) Ye ɖɩñakɩ pana nɛ ɖɩsɔɔlʋʋ Ɛsɔ nɛ ɖɩñɔʋnɩ-ɩ nɛ pɩkɩlɩɣ yɔ, pɩkaɣ-ɖʋ seɣtuu se ɖɩñɔɔnɩ toovenim nɛ pɩkɩlɩ. (1 Tim. 4:8-10; 6:6) Pɩsa nɛ sɔɔja kɩbanʋ nɔɔyʋ mʋna se ɛla you paa ɛzɩmtaa lɛ, pɩwɛɛ se ɛfalɩsɩɣ ɛ-tɩ ɖɔɖɔ. Timootee pɩzaa nɛ ɛlʋbɩnɩ Sataŋ mbʋ pʋyɔɔ yɔ, ɛɖɔm Pɔɔlɩ lɔŋ tasʋʋ yɔɔ. Pɔɔlɩ tasɩ-ɩ lɔŋ se ese evebitu kɔɖɛyɩ, ɛwɛɛnɩ wɛtʋ kɩbandʋ nɛ ɛkpakɩɣ alɩwaatʋ nɛ ɛ nɛ e-koobiya pacakɩ. (2 Tim. 2:22) Pʋcɔ nɛ Timootee pɩzɩ nɛ ɛla mbʋ lɛ, pɩɩpɔzaa se ɛfalɩsɩɣ ɛ-tɩ. Pɩpɔzʋʋ se ɖɩfalɩsɩɣ ɖa-tɩ nɛ pɩsa nɛ ɖɩlʋbɩnɩ ɖo-tomnaɣ kɔɖɛyɩ nɛ ɖɩwabɩ-kʋ. (Roma 7:21-25) Pɩtasɩ lɛ, pɩpɔzʋʋ se ɖɩfalɩsɩɣ ɖa-tɩ nɛ pɩsa nɛ ɖiwolo pɩ-yɔɔ nɛ ɖɩhɔzʋʋ ɛyʋtʋ kɩbɩndʋ nɛ ɖisuu ɛyʋtʋ kɩfatʋ. (Efɛz. 4:22, 24) Nɛ alɩwaatʋ ndʋ pɩnɩɣ-ɖʋ evemiye ɖɩdɛnɖɛ yɔ, pɩpɩzɩɣ nɛ pɩpɔzɩ se ɖɩñaɣ pana siŋŋ nɛ ɖiwolo kediɣzaɣ.—Ebr. 10:24, 25. w20.09 28 § 9-11

Alɩwaatʋ ndʋ ɖɩsɩɣnɩ kpɛlɩkɩyʋ nɔɔyʋ se ɛɖɛɛnɩ ɛsɩndaa nɛ ɛha ɛ-tɩ nɛ pamɩyɩsɩ-ɩ lɩm yɔ, pɩpɔzʋʋ se ɖɩwɛɛ suuɖu. Ɛlɛ, pɩpɔzʋʋ ɖɔɖɔ se ɖɩtazɩ nɛ ɖɩna se ɛsɔɔlaa se ɛsɛɛ Yehowa yaa we. Ŋnaɣ yʋsasɩ nasɩyɩ nɛ sɩwɩlɩɣ se kpɛlɩkɩyʋ wɛɛ nɛ ɛñakɩ pana se ɛɖɔ Yesu paɣtʋ yɔɔ? Yaa Bibl taa tɔm kɩbandʋ ɛsɔɔlaa se ɛkpɛlɩkɩ yem? Ðoŋ ɖoŋ lɛ, maɣzɩ nɛ ŋna se kpɛlɩkɩyʋ wɛɛ nɛ ɛɖɛɣnɩ ɛsɩndaa yaa we. Ɛyɔɔdʋʋ lɩmaɣza wena ɛwɛnɩ Yehowa yɔɔ yɔ a-tɔm na? Ɛtɩmɩɣnɩ Yehowa? (Keɣa 114:1, 2) Ɛsɔɔlɩ Bibl kalʋʋ na? (Keɣa 118:97) Ɛkɔŋ kediɣzisi ɖoŋ ɖoŋ? (Keɣa 21:23) Ɛlabɩ lɛɣzɩtʋ ndʋ pɩpɔzʋʋ yɔ e-wezuu caɣʋ taa? Ɛpaɣzɩ heyuu ɛ-hɔʋ taa ñɩma nɛ ɛ-taabalaa tɔm ndʋ ɛkpɛlɩkɩɣ yɔ? (Keɣa 9A:2) Kɔzɩ kɔzɩ lɛ, ɛsɔɔlaa se ɛpɩsɩ Yehowa Aseɣɖe Tʋ na? (Keɣa 39:9) Ye kpɛlɩkɩyʋ ɛɛɖɛɣnɩ ɛsɩndaa hɔɔlɩŋ ɛnɩ ɩ-taa nakʋyʋ taa yɔ, pɔzɩ-ɩ nɛ lɛɣtʋ nɛ ŋtɩlɩ mbʋ pʋyɔɔ yɔ; nɛ pʋwayɩ lɛ, ña nɛ ɩ ɩyɔɔdɩ pɩ-tɔm. Yɔɔdɩnɩ-ɩ nɛ nɔɔ kɩbaŋa, ɛlɛ heyi-i toovenim. w20.10 18 § 14-15

Yesu Caa weyi ɛwɛ ɛsɔdaa yɔ, ɛkpakɩɣ lɩmaɣza kɩbana paa ɛzɩmtaa. Nɛ ɛ-lʋlɩyaa mba paawɛ tɛtʋ yɔɔ yɔ, paakpaɣ lɩmaɣza kɩbana ɖɔɖɔ. Ɛlɛ, Yesu kɔm nɛ ɛpaɣlɩ lɛ, pɩɩwɛɛ se ɛ-maɣmaɣ ɛkpaɣ ɛ-lɩmaɣza. (Gal. 6:5) Ɛɛwɛnɩ tɩ-yɔɔ wɛʋ lɩzʋʋ waɖɛ ɛzɩ ɖa-tɩŋa payɩ yɔ. Ɛpɩzaɣ se ɛlɩzɩ se ɛlakɩ ɛ-maɣmaɣ ɛ-sɔɔlɩm nɛ eyele Ɛsɔ ñɩmbʋ. Ɛlɛ, ɛlɩzaa se eyeki nɛ taabalɩyɛ kɩbanɖɛ wɛɛ ɛ nɛ Yehowa pɛ-hɛkʋ taa. Yesu kpɛlɩkaa nɛ ɛtɩlɩ mbʋ Yehowa sɔɔlaa se ɛla yɔ lɛ, ɛlɩzɩ se ɛlakɩ Yehowa sɔɔlɩm. (Yoh. 6:38) Ɛɛnawa se ɛyaa sakɩyɛ kaɣ-ɩ paɖʋʋ, nɛ pɩtʋʋ fɛyɩ se lɩmaɣza ana aaha-ɩ nɩɣzɛ. Ɛlɛ, ɛlɩzaa se ɛñaŋ Yehowa. Pamɩyɩsɩ Yesu lɩm pɩnaɣ 29 taa lɛ, mbʋ pɩ-tɔm kaakɩlɩ cɛyʋʋ ɛ-ɛsɩndaa yɔ lɛ se ɛla mbʋ Yehowa sɔɔlaa yɔ. (Ebr. 10:5-7) Halɩ alɩwaatʋ ndʋ Yesu sɩkaɣ nazɩm sizika yɔɔ yɔ, ewobi pɩ-yɔɔ nɛ ɛtɛ ɛ-taa se ɛlakɩ ɛ-Caa sɔɔlɩm.—Yoh. 19:30. w20.10 29 § 12; 30 § 15

Ŋsɩm koobiya nabɛyɛ ñɛ-ɛgbɛyɛ taa se pɛwɛɛ nɛ panɩɣ siziŋ mbʋ pʋyɔɔ yɔ, pahɩnɩ kʋdɔŋ yaa pɛwɛɛ nɛ pakatɩɣ kala lɛɛna na? Yaa pɩtɩla pelesi pɛ-ɛyʋ kʋsɔɔlʋ nɔɔyʋ. Ye ɖɩnawa se nɔɔyʋ wɛ kɩcɛyɩm taa yɔ, ɖɩpɩzɩɣ nɛ ɖɩpɔzɩ Yehowa se ɛsɩnɩ-ɖʋ nɛ ɖiheyi-i tɔm kɩbandʋ natʋyʋ yaa ɖɩlabɩ-ɩ camɩyɛ lakasɩ nasɩyɩ. Ðɔ-tɔm pee nɛ ɖa-lakasɩ pɩzɩɣ nɛ pɩkpazɩ ɖoŋ ɖo-koobu ɛnʋ. (1 Pɩy. 4:10) Ðɩnawa se ɖɩpɩzɩɣ nɛ ɖɩwɛɛ abalɩtʋ mbʋ pʋyɔɔ yɔ Yehowa wɛ ɖɔ-cɔlɔ. Ɛtɩŋɩɣnɩ Yesu nɛ Ɛsɔ tiyiyaa pɔ-yɔɔ nɛ ɛsɩɣnɩ-ɖʋ. Pɩtasɩ lɛ, Yehowa pɩzɩɣ nɛ ɛtɩŋnɩ ɛyaa mba pɛwɛ lona sɔsɔna taa yɔ pɔ-yɔɔ nɛ ɛsɩnɩ-ɖʋ, ye pɩlakɩ nɔɔ kʋɖʋmaɣ nɛ ɛ-tamaɣ yɔ. Nɛ ɛzɩ pɩwɛʋ ɖa-taa sakɩyɛ hɔɔlʋʋ taa yɔ, Yehowa tɩŋɩɣnɩ e-fezuu kiɖeɖeu yɔɔ nɛ eseɣtiɣ ɖo-koobiya se pasɩnɩ-ɖʋ. Pʋyɔɔ lɛ, ɛzɩ apostoloo Pɔɔlɩ yɔ, ɖɩwɛnɩ toovenim se ɖɩyɔɔdɩnɩ lidaʋ se: “Yehowa kɛnɩ man-sɩnɩyʋ; sɔɔndʋ ɛɛkaɣ-m kpaʋ. Ɛbɛ ɛyʋ pɩzɩɣ nɛ ɛlabɩ-m?”—Ebr. 13:6. w20.11 17 § 19-20

Apostoloowaa kaana kaɣlaa se Yehowa wɛ pɔ-cɔlɔ. Ɛɛha-wɛ ɖoŋ se pala maamaaci lakasɩ. (Tʋma 5:12-16; 6:8) Sɔnɔ, Yehowa ɛɛhaɣ-ɖʋ ɖoŋ se ɖɩla maamaaci lakasɩ. Paa mbʋ yɔ, Yehowa tɩŋɩɣnɩ ɛ-Tɔm yɔɔ nɛ eheyiɣ-ɖʋ nɛ sɔɔlɩm se alɩwaatʋ ndʋ panazɩɣ-ɖʋ ɖe-siɣsiɣ wɛtʋ yɔɔ yɔ, ɖɔ-tɔm kɛdɩɣnɩ-ɩ nɛ e-fezuu wɛ ɖɔ-cɔlɔ. (1 Pɩyɛɛrɩ 3:14; 4:14) Pʋyɔɔ lɛ, pɩtɩpɔzɩ se ɖɩnɩɣzɩ mbʋ ɖɩkaɣ labʋ nɛ ɛsɩndaa alɩwaatʋ ndʋ panazɩɣ-ɖʋ yɔ pɩ-yɔɔ. Ɛlɛ pɩwɛɛ se ɖɩñaɣ pana nɛ ɖɩkpazɩ ɖoŋ tisuu mbʋ ɖɩwɛna se Yehowa kaɣ-ɖʋ sɩnʋʋ nɛ ɛya ɖa-ñʋʋ yɔ. Pɩwɛɛ se ɖɩtaa liu Yesu tɔm tʋnɛ: “Mankaɣ-mɩ haʋ tɔm nɛ lɔŋsɩnɖɛ nɖɩ mi-koyindinaa tɩŋa ɩɩkaɣ pɩzʋʋ nɛ pakaɖɩna yaa pawa yɔ.” Yesu labɩ-ɖʋ tamaɣ se: “Ye ɩɖɔkɩ mɩ-laŋa yɔ, ɩkaɣ yabʋ mi-weziŋ ñʋʋ.” (Luka 21:12-19) Nɛ ɖɩtaasɔɔ kaaʋ se Yehowa ɖɔkʋʋ ɛ-sɛyaa mba pɔɖɔkɩ pe-siɣsiɣ wɛtʋ ɛ-ɛsɩndaa nɛ pɩtalɩ pa-sɩm wiye yɔ pɔ-yɔɔ tɔm tɩŋa ɛ-maɣzɩm taa, nɛ pʋyɔɔ lɛ ɛkaɣ-wɛ fezuu. w21.01 4 § 12

Pɩtɩkɛ apostoloo Pɔɔlɩ calɩnɩ yɔɔdʋʋ sɩɖaa fezuu lidaʋ tɔm. Yɔɔb ɖɔɖɔ kaayɔɔdɩ kɩ-tɔm. Ɛ-taa kaatɛma se Ɛsɔ kaɣ tɔzʋʋ ɛ-yɔɔ nɛ efezi-i nɛ ɛɖaɣnɩ caɣʋ wezuu. (Yɔɔb 14:7-10, 12-15) “Sɩɖaa femtu” kɛ Krɩstʋ ñɩma wɩlɩtʋ kpeekpe “tigiɖe” hɔɔlʋʋ nakʋyʋ yaa “kajalaɣ wɩlɩtʋ” taa natʋyʋ. (Ebr. 6:1, 2) Tɔm ndʋ Pɔɔlɩ yɔɔdɩ sɩɖaa femtu yɔɔ yɔ, pama-tʋ 1 Kɔrɛntɩ mba ñʋʋ 15 taa. Tɔm ndʋ ɛɛmawa yɔ, pɩtʋʋ fɛyɩ se tɩɩkpazɩ kajalaɣ pɩnzɩ mɩnʋʋ taa Krɩstʋ ñɩma ɖoŋ. Ða ɖɔɖɔ, ɖɩpaɣzʋʋ tisuu sɩɖaa femtu yɔɔ yɔ, paa pileɖaa yaa pitileɖi yɔ, tɔm ndʋ tɩpɩzɩɣ nɛ tɩkpazɩ-ɖʋ ɖoŋ, nɛ tɩkpazɩ ɖoŋ ɖɔɖɔ tisuu mbʋ ɖɩwɛnɩ sɩɖaa femtu yɔɔ yɔ. Yesu femtu yeki se ɖa-taa ɛtɛ se ɖɛ-ɛyaa kʋsɔɔlaa mba pasɩba yɔ, pakaɣ-wɛ fezuu. “Tɔm kɩbandʋ” ndʋ Pɔɔlɩ susi Kɔrɛntɩ mba yɔ, tɩ-taa natʋyʋ lɛ. (1 Kɔr. 15:1, 2) Ɛyɔɔdaa se ye Krɩstʋ tʋ nɔɔyʋ eetisiɣ se pefezi Krɩstʋ yɔ, e-tisuu ɛɛwazɩɣ pʋyʋ.—1 Kɔr. 15:17. w20.12 2 § 2-4

Ɛbɛ sɩnɩ-ɩ nɛ ɛɖaɣnɩ hiɣu taa leleŋ? Pɩyɛɛrɩ tɔzaa se Yesu kaatɩmaa se ɛnʋ tisuu ɛtaahɛɛ, nɛ eseɣti-i se ɛpɩsɩ nɛ ɛkpazɩ e-koobiya ɖoŋ. Yehowa cosi adɩma wena Yesu labɩnɩ ɛ-laŋɩyɛ pilim mbʋ yɔ a-yɔɔ. Pʋwayɩ, Yesu wɩlɩ ɛ-tɩ Pɩyɛɛrɩ, nɛ pɩtʋʋ fɛyɩ se ɛlabɩ mbʋ se ɛkpazɩ-ɩ ɖoŋ. (Luka 22:32; 24:33, 34; 1 Kɔr. 15:5) Pitibi apostoloowaa yɔɔɔ mbʋ pʋyɔɔ yɔ pakpaɣ ɖoo kpeekpe nɛ pɔlɔ piyiŋ nɛ patɩkpa kpakpasɩ lɛ, Yesu wɩlɩ-wɛ ɛ-tɩ. Alɩwaatʋ ndʋ tɩ-taa, Yesu ɖaɣnɩ haʋ Pɩyɛɛrɩ waɖɛ se ɛlɛ ɛwɩlɩ se ɛsɔɔlɩ-ɩ. Yesu kpeɣ ɛ-taabalʋ kʋsɔɔlʋ ɛnʋ nɛ ɛsɔzɩ-ɩ tʋmɩyɛ. (Yoh. 21:15-17) Wɛtʋ ndʋ Yesu wɩlɩ Pɩyɛɛrɩ yɔ, tɩwɩlɩɣ se ɛnaɣ ɛyaa pʋtɔdɩyɛ siŋŋ ɛzɩ ɛ-Caa yɔ. Pʋyɔɔ lɛ, alɩwaatʋ ndʋ picoɖuu-ɖʋ yɔ, pɩfɛyɩ se ɖɩmaɣzɩ se Yehowa ɛɛkaɣ-ɖʋ kpeɣu kpa. Pɩwɛɛ se ɖɩtɔzɩ se lɩmaɣza ana Sataŋ ñɩnɩɣ se ɖɩwɛɛna. Ɛlɛ pɩwɛɛ se ɖɩtɔzɩ ɖɔɖɔ se Yehowa sɔɔlɩ-ɖʋ siŋŋ, ɛnawa se ɖo-ɖoŋ wɛnɩ kamaɣ nɛ ɛsɔɔlaa se ekpeɣ-ɖʋ. Nɛ pɩwɛɛ se ɖɩmaɣzɩnɩ-ɩ alɩwaatʋ ndʋ lalaa lakɩ nabʋyʋ nɛ pɩɖʋ-ɖʋ ɖɩwɩzɩyɛ yɔ.—Keɣa 102:13, 14. w20.12 20-21 § 17-19

Ɛyaa mba patɩpɩzɩ nɛ pacaɣ ɖiɣ ɖiɣ nɛ pataa Yehowa liu yɔ, ɖɩpɩzɩɣ nɛ ɖɩkpɛlɩkɩ lɔŋ pa-kɩɖaŋ taa. Ye ɖɩtazɩɣ kɩɖaŋ kɩdɛkɛdɩŋ ɛnɩ ɩ-taa yɔ, pɩkaɣ-ɖʋ sɩnʋʋ nɛ ɖɩtaala ɛzɩ paalabʋ yɔ. Alɩwaatʋ ndʋ Aazaa pɩsɩ Yuuda wiyaʋ yɔ, ɛpɔzɩ Yehowa se ɛsɩnɩ-ɩ alɩwaatʋ ndʋ ɛkatɩ kala yɔ. Ɛlɛ pʋwayɩ, ɛtɩpɔzɩ Ɛsɔ se ɛsɩnɩ-ɩ; ɛlɛ ɛñaɣ pana se ɛ-maɣmaɣ ɛcɔnɩ kala wena ɛkataɣ yɔ a-ɖeɖe. (4 Aw. 16:1-3, 12) Kajalaɣ taa lɛ, pɩpɩzaɣ se pɩwɛɛ ɛzɩ lɩmaɣzɩyɛ nɖɩ Aazaa kpaɣaa nɛ ɛpɔzɩ Siirii mba se pasɩnɩ-ɩ nɛ eyooni Izrayɛɛlɩ mba yɔ, ɖɩkɛ lɩmaɣzɩyɛ kɩbanɖɛ yɔ. Ɛlɛ paa eehiɣ laŋhɛzɩyɛ kiɖe tɛɛ yɔ, laŋhɛzɩyɛ nɖɩ ɖitileɖi. Yehowa tɩŋnɩ nayʋ nɔɔyʋ yɔɔ nɛ eheyi-i se: “Ŋta Siirii wiyaʋ liu nɛ ŋtɩtaa [Yehowa] ñɛ-Ɛsɔ liu yɔ, pʋyɔɔ lɛ Siirii wiyaʋ tɛ sɔɔjanaa lɩ ñe-nesi tɛɛ.” (4 Aw. 16:7) Pɩwɛɛ se ɖɩkpa ɖa-tɩ nɛ ɖɩtaakɩlɩ ɖa-tɩ taʋ liu nɛ ɖɩmaɣzɩ se ɖa-maɣmaɣ ɖɩpɩzɩɣ nɛ ɖɩcɔnɩ kala wena ɖɩkatɩɣ yɔ a-ɖeɖe, nɛ ɖiyele pɔzʋʋ Yehowa se ɛtɩŋnɩ ɛ-Tɔm yɔɔ nɛ ɛwɩlɩ-ɖʋ nʋmɔʋ. Halɩ, alɩwaatʋ ndʋ ɖɩkatɩɣ wɛtʋ natʋyʋ nɛ pɩpɔzʋʋ se ɖɩkpaɣ lɩmaɣzɩyɛ lɛɛ lɛɛ yɔ, pɩwɛɛ se ɖɩcaɣ ɖiɣ ɖiɣ nɛ ɖɩtaa Yehowa liu, nɛ ɛkaɣ-ɖʋ sɩnʋʋ nɛ ɖɩkpaɣ lɩmaɣzɩyɛ kɩbanɖɛ. w21.01 6 § 13-15

Alɩwaatʋ tʋnɛ tɩ-taa, ñɔɔsɩ wɩɣ Yehowa sɛyaa nabɛyɛ mbʋ pʋyɔɔ yɔ pɛfɛyɩnɩ liidiye se paya tɔɔnaɣ ŋga pɩpɔzʋʋ-wɛ yɔ, yaa you yebina nɛ tɔɔnaɣ fɛyɩ. Lalaa lɛ, paɖɩɣ-wɛ salaka pe-tisuu yɔɔ. Ɛlɛ, samaɣ sɔsɔɔ taa ñɩma mba, pa-taa wɛ leleŋ mbʋ pʋyɔɔ yɔ, panawa se payakɩ pa-ñʋʋ alɩwaatʋ ndʋ paɖɩzɩɣ ɛjaɖɛ kɩdɛkɛdɩyɛ ɖɩnɛ nɛ pɩtɛ lɛ, pakaɣ wɛnʋʋ tomnaɣ yɔɔ nɛ fezuu taa tɔɔnaɣ sakɩyɛ paa ɛzɩmtaa. Alɩwaatʋ ndʋ Yehowa kaaɖɩzɩɣ Sataŋ ɛjaɖɛ kɩdɛkɛdɩyɛ ɖɩnɛ yɔ, ɛkaɣ kandɩyʋʋ samaɣ sɔsɔɔ yɔɔ se ɛ-pana wena pakpaɣaa nɛ pamaɣzɩnɩ “soŋaɣ sɔsɔɔ” yɔ, ataalabɩ-kɛ nabʋyʋ. Kʋñɔŋ sɔsɔʋ tɛŋ lɛ, Yesu kaɣ ɖiyuu mba pehiɣ ñʋʋ yabʋ tɛtʋ yɔɔ yɔ nɛ ewoni “wezuu [maatɛŋ] lɩm hila cɔlɔ.” (Natʋ 7:17) Maɣzɩ nɛ ŋna: Samaɣ sɔsɔɔ wɛnɩ lidaʋ ŋgʋ kɩ-wayɩ fɛyɩ yɔ. Ɛyaa miiliyaarɩwaa mba pacaɣ wezuu nɛ pana yɔ pa-taa lɛ, pɩtɩla samaɣ sɔsɔɔ taa ñɩma ɩɩkaɣnɩ sɩbʋ kaaʋ. (Yoh. 11:26) Heŋ lɛɛŋ wɛnɩ lidaʋ kɩbaŋʋ siŋŋ nɛ kɩ-yɔɔ lɛ, pɛwɛnɩ ɛsɩmɩyɛ siŋŋ Yehowa nɛ Yesu pɔ-yɔɔ! w21.01 16-17 § 11-12

Ðoo kɛdɛzaɣ ñɩna wena Yesu caɣ wezuu tɛtʋ yɔɔ yɔ a-taa, ɛɛwɛɛ nɛ ɛmaɣzɩɣ kala wena payɩ ɛ-tɔmkpɛlɩkɩyaa kaɣ katʋʋ yɔ a-yɔɔ. Ɛɛsɔɔlɩ ɛ-tɔmkpɛlɩkɩyaa nɛ pʋyɔɔ lɛ, ɛpɔzɩ ɛ-Caa se “kañatʋ tʋ yɔɔ lɛ, [ɛcɔnɩ] pɔ-yɔɔ.” (Yoh. 17:14, 15) Yesu kaanawa se ɛpɩsɩɣ ɛsɔdaa nɛ pɩtɛ lɛ, Sataŋ Eleeu kaɣ wobu pɩ-yɔɔ nɛ eyouni mba payɩ pɔsɔɔlʋʋ se pɛsɛɛ Yehowa yɔ. Pɩwɩlɩɣ kpayɩ kpayɩ se pɩpɔzʋʋ se pohuuzi Yehowa samaɣ yɔɔ. Lɛɛlɛɛyɔ pɩpɔzʋʋ se Yehowa ehuuzi ɖɔ-yɔɔ nɛ pɩkpaɖɩ alɩwaatʋ ndʋ tɩɖɛwa yɔ tɩ-taa. Potuzi Sataŋ nɛ ɛsɔdaa nɛ pɛpɛɖɩ tɛtʋ yɔɔ, “nɛ ɛkɔ pana siŋŋ.” (Natʋ 12:12) Eyeba nɛ ɛyaa nabɛyɛ maɣzɩɣ se alɩwaatʋ ndʋ panazɩɣ-ɖʋ yɔ lɛ, pɛwɛɛ nɛ palakɩ “tʋmɩyɛ kiɖeɖeye naɖɩyɛ” Ɛsɔ. (Yoh. 16:2) Ɛyaa lalaa mba paatisiɣ Ɛsɔ yɔɔ yɔ, panazɩɣ-ɖʋ mbʋ pʋyɔɔ yɔ, ɖɩwɛ ndɩ nɛ mba pɛwɛ ɛjaɖɛ yɔɔ yɔ. Paa ɛbɛ yɔɔ ɛyaa ɩnazɩɣ-ɖʋ yɔ, sɔɔndʋ ɛɛkpaɣ-ɖʋ. Ɛbɛ yɔɔ? Pocosi tɔm ndʋ tɩ-yɔɔ sɔnɔ evemiye mayaɣ taa. w21.03 26 § 1, 3

Sɔɔlɩm seɣtiɣni Yehowa nɛ ɛlakɩ pɩtɩŋa payɩ. Ɛcɔŋnɩ ɖa-kɩcɛyɩm ɖeɖe nɛ sɔɔlɩm. Sɔɔlɩm seɣti Yehowa nɛ ɛla ɖʋtʋ nɛ Yesu kɔɔ nɛ ɛlaa kɩhɛyʋʋ pʋ-ñʋʋ taa kɩlaʋ ɖɔ-yɔɔ. Nɛ Yesu sɔɔlɩ-ɖʋ siŋŋ, pʋyɔɔ ɛla e-wezuu ɖɔ-yɔɔ. (Yoh. 3:16; 15:13) Nabʋyʋ ɛɛpɩzɩɣ nɛ pɩɖɩɣ Yehowa nɛ Yesu nʋmɔʋ se pataasɔɔlɩ mba pɔɖɔkʋʋ pe-siɣsiɣ wɛtʋ pɛ-ɛsɩndaa yɔ. (Yoh. 13:1; Roma 8:35) Mbʋ ɖɔɖɔ, mbʋ payɩ hɔʋ ñʋʋdʋ nɔɔyʋ lakɩ yɔ, sɔɔlɩm pɩwɛɛ se piseɣti-i nɛ ɛlabɩ-pʋ. Ɛbɛ yɔɔ pɩcɛyɩ siŋŋ mbʋ? Apostoloo Yohanɛɛsɩ cosaa se: “Weyi ɛɛsɔɔlʋʋ [e-koobu yaa ɛ-hɔʋ ŋgʋ ɛnaɣ-kʋ] yɔ, ɛɛpɩzɩɣ nɛ ɛsɔɔlɩ Ɛsɔ weyi ɛɛnaɣ-ɩ yɔ.” (1 Yoh. 4:11, 20) Abalʋ weyi ɛsɔɔlɩ ɛ-hɔʋ nɛ ɛsɔɔlɩ se ɛmaɣzɩnɩ Yehowa nɛ Yesu yɔ, ɛkaɣ sɩnʋʋ ɛ-hɔʋ nɛ taabalɩyɛ kɩbanɖɛ wɛɛ kɩ nɛ Yehowa pɛ-hɛkʋ taa. Ɛkaɣ-kʋ sɩnʋʋ nɛ kɩwɛɛ pɛɛyɛ taa, nɛ ɛkaɣ cɔnʋʋ ɛ-hɔʋ taa mba tomnaɣ yɔɔ kɩcɛyɩm ɖeɖe. (1 Tim. 5:8) Ɛkaɣ falɩsʋʋ e-piya nɛ ɛsɩɣzɩɣ-sɩ lɔŋ. Ɛkaɣ wobu pɩ-yɔɔ ɖɔɖɔ nɛ ɛñakɩ pana se ɛkpaɣ lɩmaɣza wena aɖʋʋ Yehowa hɩɖɛ nɛ awazɩɣ ɛ-hɔʋ yɔ. w21.02 5 § 12-13

Ða-Caa sɔɔlɩm tʋ weyi ɛwɛ ɛsɔdaa yɔ, ɛnawa se mbʋ pɩlabɩ ɖe-wezuu caɣʋ taa nɛ pɩɖɛɛ yɔ, pɩpɩzɩɣ piyele se ɖɩtaawɛɛnɩ lɩmaɣza kɩbana ɖa-maɣmaɣ ɖa-tɩ yɔɔ. Ðɔɖɔ lɛ, ɛnaɣ wɛtʋ kɩbandʋ ndʋ ɖɩwɛna yɔ, paa ɖɩmaɣzɩɣ se ɖɩfɛyɩnɩ wɛtʋ kɩbandʋ natʋyʋ yɔ. (1 Yoh. 3:19, 20) Nɔɔyʋ pɩzɩɣ nɛ ɛñaɣ pana siŋŋ se eyele kɩdɛkɛdɩm nabʋyʋ labʋ. Ɛlɛ, ɛpɩzɩɣ nɛ ɛɖaɣnɩ kɩdɛkɛdɩm kʋɖʋmʋm mbʋ labʋ nɛ pitibi-i yɔɔɔ. Pɩkɛ toovenim se alɩwaatʋ ndʋ ɖɩlakɩ kɩdɛkɛdɩm yɔ, pɩcɛyɩɣ-ɖʋ nɛ pɩmʋnɩ mbʋ. (2 Kɔr. 7:10) Paa mbʋ yɔ, pɩtɩmʋna se pɩkɩlɩ-ɖʋ cɛyʋʋ nɛ ɖɩmaɣzɩ se: ‘Mɛnfɛyɩ wazaɣ. Yehowa ɛɛpɩzɩɣ nɛ ekpeɣ-m kpa.’ Lɩmaɣza kɩdɛkɛda ana atɩkɛ toovenim, nɛ apɩzɩɣ ala nɛ ɖiyele Yehowa sɛʋ. Ɛlɛ, ɖiwolo nɛ ɖa nɛ Yehowa “ɖɩhʋʋ tɔm,” pʋ-tɔbʋʋ se ɖɩtɩmnɩ-ɩ nɛ ɖɩpɔzɩ-ɩ se ɛkpaɣ nɛ ekpeɣ-ɖʋ. (Iza. 1:18) Alɩwaatʋ ndʋ Yehowa naɣ se ŋkpiɖi toovenim nɛ ŋñakɩ pana se ŋlɛɣzɩ yɔ, ɛkaɣ-ŋ kpeɣu. Pɩtasɩ lɛ, ñɔtɩnɩ ɛzʋtʋyaa. Pakaɣ-ŋ sɩnʋʋ nɛ suuɖu nɛ ŋɖaɣnɩ kpaʋ ɖoŋ fezuu taa.—Yak. 5:14, 15. w20.12 23 § 5-6

Yesu ɖʋwaɣ halaa hɩɖɛ nɛ ɛñaŋ-wɛ. Ɛtɩmaɣzɩnɩ Farɩsɩ mba, paba maɣzaɣ se abalaa tɔm cɛyaa nɛ pɩkpaɖɩ halaa. Pataayɔɔdʋʋnɩ halaa samaɣ taa; nɛ wiɖiyi pa nɛ wɛ patɩla kɛdaɣ Masɩ yɔɔ kpa. Ɛlɛ Yesu nɛ halaa nɛ abalaa palakaɣ kɛdaɣ toovenim tɔm ndʋ tɩcɛyaa yɔ tɩ-yɔɔ. (Luka 10:38, 39, 42) Eyeba ɖɔɖɔ nɛ halaa sɩɩ-ɩ tɔm susuu taa. (Luka 8:1-3) Nɛ Yesu ha halaa waɖɛ se peheyi apostoloowaa se pefezi-i nɛ sɩɖaa taa. (Yoh. 20:16-18) Apostoloo Pɔɔlɩ tɔzɩ Timootee se ɛɖʋ halaa hɩɖɛ. Pɔɔlɩ kaaɖiɣzinaa se Timootee ɖoo nɛ e-neze paacalɩnɩ-ɩ wɩlʋʋ “takayɩsɩ kiɖeɖesi.” (2 Tim. 1:5; 3:14, 15) Pɔɔlɩ maɣaɣ Roma mba takayaɣ lɛ, ɛya koobiya halɩñɩma nɛ pa-hɩla nɛ ɛsɛɛ-wɛ. Pɩtasɩna se Pɔɔlɩ yɔɔdɩ tʋmɩyɛ nɖɩ koobiya halɩñɩma mba palakaɣ yɔ ɖɩ-tɔm lɛ, ɛwɩlɩ-wɛ ɖɔɖɔ ɛ-ɛsɩmɩyɛ ɖɩ-yɔɔ.—Roma 16:1-4, 6, 12; Fil. 4:3. w21.02 15 § 5-6