Nɔɔɖɛyaa ɛgbɛyɛ ma-ɖʋ takayaɣ

Koobiya kʋsɔɔlaa:

Sɔɔlɩm mbʋ ɖɩwɛnɩ Ɛsɔ nɛ ɛyaa lalaa yɔɔ yɔ, piseɣtiɣ-ɖʋ se ‘ɖiwolo nɛ ɖɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa nɛ ɖɩmɩyɩsɩ-wɛ lɩm.’ (Mat. 28:​19, 20; Mark. 12:​28-31) Sɔɔlɩm sɔsɔm mbʋ ɖɩwɛnɩ ɛyaa yɔɔ yɔ, pɩpɩzɩɣ nɛ pɩwɛɛnɩ ɖoŋ siŋŋ mba ‘pɛwɛnɩ laŋa kɩbana se pehiɣ wezuu maatɛŋ’ yɔ pɔ-yɔɔ.—Tʋma 13:48.

Ðooo lɛ, ɖɩkaŋaɣ ɖa-lɩmaɣza tɔm ndʋ pɩwɛɛ se ɖɩyɔɔdɩ nɛ ɖa nɛ ɛyaa ɖɩpaɣzɩ kɛdaɣ labʋ yɔ nɛ takayɩsɩ tayʋʋ yɔɔ na. Lɛɛlɛɛyɔ lɛ, pɩwɛɛ se ɖɩñaɣ pana nɛ ɖɩwɛɛ niye kɛdɛsɩ labʋ taa nɛ pɩkɩlɩ. Tɔm ndʋ ɖɩyɔɔdʋʋ yɔ, pɩwɛɛ se titukuni ɛyaa kɩcɛyɩm nɛ ɖɩwɩlɩ se ɖɩsɔɔlɩ-wɛ. Pɩwɩlɩɣ se ɖɩɩñɔʋnɩ tɔm natʋyʋ cɩŋ cɩŋ, ɛlɛ ɖɩñakɩ pana se ɖɩtɩlɩ paa weyi lɛ ɛ-kɩcɛyɩm nɛ tɔm ndʋ tɩpɩzɩɣ nɛ tɩkɛdɩnɩ-ɩ yɔ. Ɛzɩma takayaɣ kanɛ kakaɣ-ɖʋ sɩnʋʋ nɛ ɖɩtalɩ kaɖʋwa ŋga?

Tɔm kɩkpɛlɩkɩtʋ 12 wɛnɩ takayaɣ kanɛ ka-taa, nɛ kɔyɔɔdʋʋ wɛtʋ kɩbandʋ ndʋ pɩwɛɛ se ɖɩñaɣ pana nɛ ɖɩwɛɛna nɛ ɖɩwɩlɩ se ɖɩsɔɔlɩ ɛyaa lalaa nɛ ɖɩla tɔmkpɛlɩkɩyaa yɔ. Bibl kɛdɛsɩ taa palɩzɩnɩ paa tɔm kɩkpɛlɩkɩtʋ ndʋ. Paa kɛdaɣ ŋga lɛ, kɔyɔɔdʋʋ wɛtʋ kɩbandʋ ndʋ Yesu yaa kajalaɣ pɩnzɩ mɩnʋʋ taa Krɩstʋ tʋ nɔɔyʋ wɩlɩ tɔm susuu taa yɔ. Takayaɣ kanɛ, kɔyɔɔdʋʋ kɛdɛsɩ nzɩ sɩ-tɔm nɛ palabɩ-kɛ se kasɩnɩ-ɖʋ nɛ ɖɩtɩlɩ ɛzɩma ɖɩkpaɣna nɛ ɖɩwɩlɩ ɛyaa se ɖɩsɔɔlɩ-wɛ yɔ; ɛlɛ patɩlabɩ-kɛ se kasɩnɩ-ɖʋ nɛ ɖɩɖɔkɩ kɛdɛsɩ nzɩ sɩ-taa tɔm ɖa-ñʋŋ taa nɛ pʋwayɩ lɛ ɖɩyɔɔdɩ tɔm ndʋ ɖeyi ɖeyi. Paa pɩpɔzʋʋ-ɖʋ wɛtʋ kɩbandʋ ndʋ ɖɔ-tɔm susuu hɔɔlɩŋ tɩŋa taa yɔ, ɖɩkaɣ naʋ ɛzɩma tɩ-taa natʋyʋ tɔm cɛyaa nɛ pɩkɩlɩ alɩwaatʋ ndʋ ɖɩcalɩɣ ɛyʋ katʋʋ yɔ, ɖɩlakɩ pɩsɩ ŋna-ɩ yɔ yaa ɖɩkpɛlɩkɩɣnɩ nɔɔyʋ Bibl yɔ.

Ŋŋtazɩɣ paa tɔm kɩkpɛlɩkɩtʋ ndʋ tɩ-taa lɛ, maɣzɩ camɩyɛ nɛ ŋna ɛzɩma ŋpɩzɩɣ ŋla nɛ ŋwɩlɩ wɛtʋ ndʋ tɩ-tɔm pɔyɔɔdɩ tɔm kɩkpɛlɩkɩtʋ ndʋ tɩ-taa yɔ alɩwaatʋ ndʋ ŋŋyɔɔdʋʋnɩ ño-kooka taa mba yɔ. Ñaɣ pana nɛ sɔɔlɩm mbʋ ŋwɛnɩ Yehowa nɛ ɛyaa lalaa yɔɔ yɔ pɩpaɣlɩ. Sɔɔlɩm mbʋ, pɩkaɣ-ŋ seɣtuu nɛ ŋtalɩ kaɖʋwa ŋga ŋwɛna se ŋla kpɛlɩkɩyaa yɔ, nɛ lɛɣtʋ natʋyʋ ɛɛpɩzɩɣ nɛ tɩsɩnɩ-ŋ ɛzɩ sɔɔlɩm mbʋ yɔ.

Waɖɛ sɔsɔɖɛ nɖɩ ɖɩwɛna se ɖa nɛ mɩ ɖɩkpɛndɩ nɛ ɖɩla tʋmɩyɛ nɔɔ kʋɖʋmaɣ taa yɔ ɖɩkɛdɩnɩ-ɖʋ kpem. (Sof. 3:9) Tɛtɛ nɛ Yehowa wazɩ-mɩ siŋŋ mbʋ pʋyɔɔ yɔ iwoki pɩ-yɔɔ nɛ ɩsɔɔlʋʋ ɛyaa nɛ ɩlakɩ tɔmkpɛlɩkɩyaa!