Juin
Kujuka, 1er juin
Pɩwɛɛ se ɖɩtɔɔ kʋñɔmɩŋ sakɩyɛ pʋcɔ nɛ ɖɩsʋʋ Ɛsɔ Kewiyaɣ taa.—Tʋma 14:22.
Panazaɣ kajalaɣ pɩnzɩ mɩnʋʋ taa Krɩstʋ mba ɖoŋ ɖoŋ, nɛ nabʋyʋ taa panazaɣ-wɛ alɩwaatʋ ndʋ patɩɖʋna yɔ tɩ-taa. Mbʋ pɩɩtalɩ Barnaabaasɩ nɛ apostoloo Pɔɔlɩ alɩwaatʋ ndʋ posusaɣ tɔm Lisɩtrɩ egeetiye taa yɔ. Kiɖe tɛɛ lɛ, ɛyaa mʋ-wɛ camɩyɛ nɛ pewelisini-wɛ. Ɛlɛ pʋwayɩ, koyindinaa ‘peɣzi ɛyaa samaɣ,’ nɛ ɛyaa mba pa-taa nabɛyɛ yaɣ Pɔɔlɩ pɛɛ nɛ pamaɣzaɣ se ɛsɩba. (Tʋma 14:19) Paa mbʋ yɔ, Barnaabaasɩ nɛ Pɔɔlɩ paawobi pɩ-yɔɔ nɛ posusi tɔm ɖoŋlɛɛɖɛ. Ɛbɛ lɩ pɩ-taa? «Pehiɣ tɔmkpɛlɩkɩyaa sakɩyɛ,» nɛ pɔ-tɔm pee nɛ pa-kɩɖaʋ kpazɩ ɖoŋ po-koobiya Krɩstʋ mba. (Tʋma 14:21, 22) Ɛyaa sakɩyɛ hiɣ wazasɩ mbʋ pʋyɔɔ yɔ, Barnaabaasɩ nɛ Pɔɔlɩ patiyele tɔm susuu paa pakatɩ nazɩm mbʋ pataaɖʋna yɔ. Ye ɖitiyele tʋmɩyɛ nɖɩ Yehowa ɖʋ-ɖʋ yɔ ɖɩ-labʋ yɔ, ɖɩkaɣ hiɣu wazasɩ. w23.04 16-17 § 13
Hodo, 2 juin
Hayɩ Yehowa, welisi ma-adɩma; nɛ ŋkemsi tenduu mbʋ mentendiɣ-ŋ se ŋsɩnɩ-m yɔ. Mayaɣ-ŋ man-kʋñɔŋ kɩyakʋ wiye, mbʋ pʋyɔɔ yɔ ŋkaɣ-m cosuu.—Keɣ. 86:6, 7.
Wiyaʋ Daviid wezuu caɣʋ kpeekpe taa, ɛɛwɛnɩ koyindinaa sakɩyɛ, nɛ ɖoŋ ɖoŋ lɛ, ɛtɩmaɣnɩ Yehowa se ɛsɩnɩ-ɩ. Daviid taa kaatɛma se Yehowa welisi ɛ-adɩma nɛ ecosi a-yɔɔ. Ña ɖɔɖɔ ña-taa pɩzɩɣ nɛ pɩtɛ mbʋ. Bibl yeki se ɖa-taa ɛtɛ se Yehowa pɩzɩɣ nɛ ɛha-ɖʋ lɔŋsɩnɖɛ nɛ ɖoŋ weyi pɩpɔzʋʋ-ɖʋ yɔ nɛ ɖɩɖɔkɩ ɖa-laŋɩyɛ. Ɛpɩzɩɣ nɛ ɛtɩŋnɩ ɖo-koobiya Krɩstʋ mba yaa halɩ mba patɩpaɣzɩtɩ-ɩ sɛʋ lɛɛlɛɛyɔ yɔ pɔ-yɔɔ nɛ ɛsɩnɩ-ɖʋ hɔɔlʋʋ nakʋyʋ taa. Pɩtɩla, pɩtɩkɛ paa ɛzɩmtaa Yehowa cosuu ɖa-adɩma yɔɔ ɛzɩ ɖɩɩmaɣzʋʋ yɔ, paa mbʋ yɔ ɖɩnawa se ɛkaɣ cosuu a-yɔɔ. Ɛkaɣ-ɖʋ haʋ mbʋ pɩpɔzʋʋ-ɖʋ yɔ alɩwaatʋ ndʋ ɖeyi ɖeyi pɩpɔzʋʋ-ɖʋ pʋ yɔ tɩ-yɔɔ. Pʋyɔɔ lɛ, wolo pɩ-yɔɔ nɛ ŋtɩmɩɣnɩ tisuu, nɛ ña-ta ɛtɛ se Yehowa kaɣ cɔnʋʋ ñɔ-yɔɔ lɛɛlɛɛyɔ, nɛ ɛjaɖɛ kɩfaɖɛ taa lɛ ɛkaɣ haɣzʋʋ «mbʋ pifeziɣ yɔ, pi-liu ɖeɖe.»—Keɣ. 145:16. w23.05 8 § 4; 13 § 17-18
Piya, 3 juin
Ɛbɛ manpɩzɩɣ nɛ mankpaɣ nɛ mɛhɛyɩnɩ Yehowa kɩbandʋ ndʋ payɩ ɛlabɩ-m yɔ tɩ-yɔɔ?—Keɣ. 116:12.
Pɩwɛ ɖeu se ɖɩmaɣzɩɣ wazasɩ nzɩ ɖihikiɣ alɩwaatʋ ndʋ ɖɩtalɩɣ ɖa-kaɖʋwa yɔ sɩ-yɔɔ. Wazasɩ nzɩ yɔɔ ŋpɩzɩɣ nɛ ŋmaɣzɩ? Ye ña-kaɖʋwa etukuuni Bibl kalʋʋ yaa adɩma labʋ yɔ, maɣzɩ ɛzɩma pɩkaɣ cɛyɩsʋʋ ña nɛ Yehowa mɩ-taabalɩyɛ yɔ pɩ-yɔɔ. (Keɣ. 145:18, 19) Ye ŋɖʋ ña-tɩ kaɖʋwa se ŋñakɩ pana nɛ ŋwɛɛnɩ Krɩstʋ mba wɛtʋ kɩbandʋ natʋyʋ yɔ, maɣzɩ ɛzɩma tɩkaɣ yebu nɛ taabalɩyɛ kɩbanɖɛ wɛɛ ña nɛ lalaa mɩ-hɛkʋ taa nɛ pɩkɩlɩ yɔ pɩ-yɔɔ. (Kol. 3:14) Pɩwɛɣ ɖeu se ŋma lɩmaɣza wena payɩ a-yɔɔ ŋsɔɔlaa se ŋtalɩ ña-kaɖʋwa yɔ. Kalɩɣ lɩmaɣza ana ɖoŋ ɖoŋ. Kpakɩɣ alɩwaatʋ ɖɔɖɔ nɛ ña nɛ mba peseɣtiɣ-ŋ se ŋtalɩ ña-kaɖʋwa yɔ ɩcakɩ. (Adu. 13:20) Ɛlɛ toovenim taa lɛ, ɖa-tɩŋa payɩ, kɩyakɩŋ nɩɩyɩ wɛɛ lɛ piiseɣtiɣ-ɖʋ se ɖɩsɔɔlɩ se ɖɩtalɩ ɖa-kaɖʋwa. Ɛzɩ pɩwɩlɩɣ se ɖɩɩpɩzɩɣ nɛ ɖɩla nabʋyʋ nɛ ɖɩtalɩ ɖa-kaɖʋwa na? Aayɩ. Ðɩpɩzɩɣ nɛ ɖiwolo pɩ-yɔɔ nɛ ɖɩñakɩ pana se ɖɩtalɩ ɖa-kaɖʋwa halɩ pɩkpɛndɩnɩ alɩwaatʋ ndʋ piiseɣtiɣ-ɖʋ se ɖɩla mbʋ yɔ. Toovenim taa lɛ, pɩ-labʋ ɛɛkaɣ wɛʋ kɛlɛʋ, ɛlɛ ña-taa kaɣ labʋ leleŋ alɩwaatʋ ndʋ ŋtalɩɣ ña-kaɖʋwa yɔ. w23.05 27-28 § 5-8
Cɩla, 4 juin
Mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm.—Gal. 6:7.
Ðɩnawa se ɖɩsɩɣlɩɣ mbʋ pɩlɩɣ lɩmaɣza wena ɖɩkpakɩɣ yɔ a-taa yɔ pɩ-sʋʋtʋ yɔ, piseɣtiɣ-ɖʋ nɛ ɖikuli ɖa-kɩwɛɛkɩm yɔɔ, ɖɩñɔɔzɩ mbʋ ɖɩwɛɛkaa yɔ, nɛ ɖiyele mbʋ ɖɩlaba nɛ pɩfɛyɩ ɖeu yɔ pɩ-labʋ. Ye ɖɩlakɩ mbʋ yɔ pɩpɩzɩɣ nɛ pɩsɩnɩ-ɖʋ nɛ ɖiwolo pɩ-yɔɔ nɛ ɖiseɣ wezuu seya. Ye ŋŋkpaɣ lɩmaɣzɩyɛ kɩdɛkɛdɩyɛ naɖɩyɛ yɔ, ɛbɛ ŋpɩzɩɣ nɛ ŋla? Taalesi ña-alɩwaatʋ nɛ ño-ɖoŋ nɛ ŋñakɩ pana se ŋwɩlɩ se ŋwɛnɩ toovenim yaa se ŋsʋʋ lalaa kɩwɛɛkɩm mbʋ ŋlaba yɔ. Ɛlɛ tisi se picoɖi-ŋ nɛ ŋla ño-ɖoŋ ɖeɖe lɛɛlɛɛyɔ. Ye ŋlabɩ kɩwɛɛkɩm nabʋyʋ nɛ ñɛ-ɛhʋyɛ wɛɛ nɛ ɖɩcɛyɩɣ-ŋ yɔ, luzi ña-tɩ nɛ ŋtɩmnɩ Yehowa nɛ ŋtisi se picoɖi-ŋ nɛ ŋpɔzɩ-ɩ se ɛkpaɣ nɛ ekpeɣ-ŋ. (Keɣ. 25:11; 51:3, 4) Pɔzɩ mba ŋyʋsɩnaa yɔ se pakpaɣ nɛ pekpeɣ-ŋ, nɛ ye pɩcɛyaa yɔ, pɔzɩ ɛgbɛyɛ taa ɛzʋtʋyaa nɛ pasɩnɩ-ŋ. (Yak. 5:14, 15) Kpɛlɩkɩ lɔŋ hɔɔlɩŋ weyi ɩ-taa picoɖi-ŋ yɔ, nɛ ŋñaɣ pana se pɩtaatasɩ-ŋ coɖuu ɩ-taa. Ye ŋlabɩ mbʋ yɔ, ña-taa pɩzɩɣ nɛ pɩtɛ se Yehowa naɣ ña-pʋtɔdɩyɛ nɛ ɛsɩnɩ-ŋ hɔɔlɩŋ weyi ɩ-taa pɩpɔzʋʋ se pasɩnɩ-ŋ yɔ.—Keɣ. 103:8-13. w23.08 28-29 §8-9
Saɖakawaɣ, 5 juin
Yehowaasɩ wolo pɩ-yɔɔ nɛ ɛlakɩ mbʋ pɩtʋʋzɩ Yehowa ɛsɩndaa yɔ, kɩyakɩŋ weyi ɩ-taa payɩ cɔjɔ Yehoyiyada kaawɛɛ nɛ ɛtasɩɣ-ɩ lɔŋ yɔ.—2 Awi. 12:2.
Yehoyiyada kaasɩnɩ Wiyaʋ Yehowaasɩ nɛ ɛkɛ ɛyʋ kɩbanʋ. Piyeba nɛ alɩwaatʋ ndʋ Wiyaʋ Yehowaasɩ kaakɛ evebu yɔ ɛsɔɔlɩ se ɛ-tɔm ɛkɛdɩnɩ Yehowa. Ɛlɛ Yehoyiyada sɩba lɛ, Yehowaasɩ paɣzɩ welisinuu awumbiya mba paañaŋ Yehowa yɔ. (2 Kro. 24:4, 17, 18) Paa pɩɩcɛyɩ Yehowa siŋŋ yɔ, ɛɛwɛɛ nɛ «etiyiɣ nayaa pɛ-hɛkʋ taa se papɩsɩnɩ-wɛ ɛ-cɔlɔ . . . , ɛlɛ pekizi welisuu.» Halɩ pataawelisini Yehoyiyada pɩyalʋ Zakarii; ɛlɛ kaakɛ Yehowa tɛ nayʋ nɛ cɔjɔ, nɛ ɛɛkɛ ɖɔɖɔ Yehowaasɩ koou. Paa mbʋ yɔ ɛkʋ Zakarii. (2 Kro. 22:11; 24:19-22) Yehowaasɩ taawolo pɩ-yɔɔ nɛ eseɣ Yehowa sɔɔndʋ ɛzɩ pɩpɔzʋʋ yɔ. Yehowa yɔɔdaa se: «Mba peniŋi-m yɔ, mankaɣ-wɛ ɖʋʋ fɛyɛ.» (1 Sam. 2:30) Pʋwayɩ Siirii sɔɔjanaa pazɩ yem wabɩ Yehowaasɩ sɔɔjanaa «mba pɔɖɔ sakɩyɛ yɔ» nɛ «paɖʋ-ɩ heŋ siŋŋ.» Yehowaasɩ maɣmaɣ lɩmɖʋyaa kʋ-ɩ mbʋ pʋyɔɔ yɔ ɛkʋ Zakarii.—2 Kro. 24:24, 25. w23.06 18-19 § 16-17
Kemeɣa, 6 juin
Ðooo lɛ, ɩɩkɛ cɩkpɛndʋʋ; ɛlɛ lɛɛlɛɛyɔ lɛ, ɩkɛ ñalɩmɩyɛ.—Efɛz. 5:8.
Apostoloo Pɔɔlɩ kaacaɣ Efɛɛzɩ tɛtʋ taa pazɩ nɛ esusi tɔm kɩbandʋ nɛ ɛwɩlɩ-tʋ. (Tʋma 19:1, 8-10; 20:20, 21) Ɛɛsɔɔlɩ e-koobiya siŋŋ nɛ ɛɛsɔɔlaa se ɛsɩnɩ-wɛ nɛ pɛwɛɛ siɣsiɣ Yehowa ɛsɩndaa. Pʋcɔ nɛ Efɛɛzɩ Krɩstʋ ñɩma mba Pɔɔlɩ ma takayaɣ yɔ patɩlɩɣ toovenim lɛ, paawɛnɩ cɛtɩm Ɛsɔ sɛtʋ lɩmaɣza nɛ petisaɣ maajiki lakasɩ yɔɔ. Efɛɛzɩ mba sakɩyɛ cakaɣ wezuu kɩdɛkɛdʋʋ kpem nɛ palakaɣ lakasɩ nzɩ sɩwɛ fɛyɛ yɔ. Ɛzaɣtʋ tɔm kaatɔyɩ aleɣya ɖɩlaɖɛ nɛ halɩ pɩkpɛndɩnɩ Ɛsɔ sɛtʋ kazandʋ taa. (Efɛz. 5:3) Fɛyɛ ‘taatasɩɣ ɛyaa sakɩyɛ kpaʋ,’ pʋ-tɔbʋʋ se pataatasɩɣ nɩʋ siziŋ pa-lakasɩ kɩdɛkɛdɩsɩ yɔɔ. (Efɛz. 4:17-19) Pʋcɔ nɛ Efɛɛzɩ mba kpɛlɩkɩɣ mbʋ pɩkɛ kɩbam nɛ mbʋ pɩkɛ kɩdɛkɛdɩm Yehowa ɛsɩndaa yɔ lɛ, pɛ-ɛhʋyɛ taacɛyɩɣ-wɛ alɩwaatʋ ndʋ palakɩ kɩdɛkɛdɩm yɔ. Pʋyɔɔ Pɔɔlɩ yɔɔdaa se «pɛwɛ cɩkpɛndʋʋ taa pa-maɣzɩm taa nɛ poposini wezuu ŋgʋ kɩlɩnɩ Ɛsɔ cɔlɔ yɔ.» Ɛlɛ Efɛɛzɩ mba nabɛyɛ taacaɣ cɩkpɛndʋʋ taa mbʋ tam. w24.03 20 § 2, 4; 21 § 5-6
Mazaɣ, 7 juin
Mba pataɣ Yehowa liu yɔ, pakaɣ ɖaɣnʋʋ kpaʋ ɖoŋ. . . . Pɩɩnɩɣ-wɛ.—Iza. 40:31.
Waɖɛ nɖɩ paha Gideyɔɔ se ɛkɛ tɔm hʋyʋ yɔ ɖɩpɔzaɣ se ɛla tʋmɩyɛ siŋŋ. Alɩwaatʋ ndʋ Gideyɔɔ yowaɣni Madiyaŋ mba nɛ peseɣ yɔ, ɛɖʋ pa-wayɩ kpaɣnɩ Yizreyɛɛlɩ fɛɛʋ taa nɛ pɩkɔɔ pɩtalɩ Yɔɔrdaŋ Pɔɔ taa. (Tɔh. 7:22) Ɛzɩ Gideyɔɔ talɩ Yɔɔrdaŋ Pɔɔ taa lɛ, ɛpɩsɩ? Aayɩ! Paa pɩɩnɩ ɛ nɛ ɛ-ɛyaa 300 yɔ, pɛtɛzɩ pɔɔ ŋga nɛ powolo pɩ-yɔɔ nɛ paɖʋ pa-wayɩ. Pɩtɛmna se pehiɣ Madiyaŋ mba nɛ pawabɩ-wɛ. (Tɔh. 8:4-12) Gideyɔɔ kaata Yehowa liu se ɛkaɣ-ɩ kpazʋʋ ɖoŋ, nɛ Yehowa kpazɩ-ɩ ɖoŋ. (Tɔh. 6:14, 34) Alɩwaatʋ natʋyʋ Gideyɔɔ nɛ ɛ-ɛyaa paaɖʋ Madiyaŋ awiya 2 wayɩ, ŋgʋ paba kaacaɣ aɖaaɖaanaa yɔɔ. (Tɔh. 8:12, 21) Ɛlɛ, Ɛsɔ sɩnɩ Izrayɛɛlɩ mba nɛ pakpa-wɛ nɛ pawa you. Ɛzʋtʋyaa ɖɔɖɔ pɩzɩɣ nɛ pataa Yehowa liu, ɛnʋ weyi «pɩɩnɩɣ-ɩ kaaʋ nɛ pɩɩɖɛɣ-ɩ kaaʋ» yɔ. Ɛkaɣ-wɛ haʋ ɖoŋ alɩwaatʋ ndʋ pɩpɔzʋʋ-wɛ ɖoŋ ɛnɩ yɔ.—Iza. 40:28,29. w23.06 6 § 14, 16
Kujuka, 8 juin
[Yehowa] ɛɛkaɣ-mɩ yebu nɛ ɛɛkaɣ-mɩ siɣye haʋ.—Wp. 31:6.
Paa kala wena ɖɩkatɩɣ yɔ, ɖa ɖɔɖɔ ɖɩpɩzɩɣ nɛ ɖɩwɛɛnɩ laŋɩyɛ nɖɩ ɖɩkam camɩyɛ yɔ. Ye mbʋ taa Yehowa liu. Iyele nɛ ɖɩna ɛzɩma pɩɖɔmnɩ Baaraakɩ camɩyɛ mbʋ pʋyɔɔ yɔ ɛta liu nʋmɔʋ ŋgʋ Yehowa wɩlɩ-ɩ yɔ. Alɩwaatʋ ndʋ tɩ-taa, kpayʋʋ yaa kɩgbɛzɛŋ taawɛɛ Izrayɛɛlɩ ɛjaɖɛ kpeekpe taa, ɛlɛ Yehowa heyi Baaraakɩ se ewolo nɛ eyooni Kanaŋ mba sɔɔjanaa ñʋʋdʋ Sisera nɛ ɛ-sɔɔjanaa; paba kaawɛnɩ you wondu sakɩyɛ. (Tɔh. 5:8) Nayʋ halɩñɩnʋ Debora heyi Baaraakɩ se etii kɛdɛɛŋa taa nɛ ɛkatɩ Sisera nɛ e-you kɛɛkɛɛnaa 900. Baaraakɩ kaanawa se you kɛɛkɛɛnaa seɣ lɛɛ lɛɛ kɛdɛɛŋa taa nɛ pɩɩkaɣ wɛʋ Izrayɛɛlɩ mba kɛlɛʋ se poyooni-wɛ. Paa mbʋ yɔ, etisaa nɛ ɛña. Sɔɔjanaa lɩnɩ Taabɔɔrɩ Pʋʋ yɔɔ nɛ petii lɛ, Yehowa yele nɛ tɛʋ sɔsɔʋ nakʋyʋ nɩɩ. Ahɔya li Sisera you kɛɛkɛɛnaa, nɛ Yehowa yele nɛ Baaraakɩ wa. (Tɔh. 4:1-7, 10, 13-16) Mbʋ ɖɔɖɔ ye ɖɩtaɣ Yehowa liu nɛ ɖɩtaɣ liu ɖɔɖɔ nʋmɔʋ ŋgʋ ɛtɩŋɩɣnɩ ɛ-ɛgbɛyɛ yɔɔ nɛ ɛwɩlɩɣ-ɖʋ yɔ, ɛkaɣ-ɖʋ sɩnʋʋ nɛ ɖɩwa. w23.07 19 § 17-18
Hodo, 9 juin
Weyi ɛɖɔkʋʋ ɛ-laŋɩyɛ nɛ pɩkɔɔ pɩtɛ yɔ, ɛnʋ kaɣnɩ hiɣu ñʋʋ yabʋ.—Mat. 24:13.
Pɩsa nɛ ɖihiɣ ñʋʋ yabʋ lɛ, pɩcɛyaa se ɖɩwɛɛ suuɖu. Ɛzɩ caanaʋ taa Ɛsɔ sɛyaa siɣsiɣ tɩnaa yɔ, pɩpɔzʋʋ se ɖɩɖʋ suuɖu nɛ ɖɩɖaŋ se Ɛsɔ eyele nɛ ɛ-tamasɩ la. (Ebr. 6:11, 12) Bibl kpaɣ ɖɛ-wɛtʋ nɛ kɩmaɣzɩnɩ haɖʋ wɛtʋ. (Yak. 5:7, 8) Haɖʋ ɖuu ɖomaɣ nɛ ɛmɩzɩɣ-kɛ lɩm, ɛlɛ ɛɛsɩŋ alɩwaatʋ ndʋ ɖeyi ɖeyi kakaɣ paɣlʋʋ yɔ. Ye mbʋ, haɖʋ ɖʋʋ suuɖu nɛ ɛɖaŋɩɣnɩ lidaʋ se ɛkaɣ kʋm tɔɔnaɣ. Ða ɖɔɖɔ, ɖiwoki pɩ-yɔɔ nɛ ɖɛ-ɛsa sɛɛnɩ fezuu taa tʋma labʋ, paa ɖɩɩsɩŋ «kɩyakʋ ŋgʋ [ɖa-Kɩbaɣlʋ] kaɣ kɔm yɔ.» (Mat. 24:42) Ðɩɖʋʋ suuɖu nɛ ɖɩɖaŋnɩ lidaʋ se Yehowa kaɣ yebu nɛ ɛ-tamasɩ tɩŋa la alɩwaatʋ ndʋ ɛɖʋwa yɔ tɩ-yɔɔ. Ye ɖiyebi suuɖu ɖʋʋ yɔ, pɩpɩzɩɣ nɛ pɩnɩɩ-ɖʋ nɛ ɖaŋʋʋ nɛ ɖɩpaɣzɩ posinuu Yehowa pazɩ pazɩ. Pɩpɩzɩɣ ɖɔɖɔ piyele nɛ ɖɩpaɣzɩ kam ɖa-lɩmaɣza wondu ndʋ ɖɩmaɣzɩɣ se tiyeki nɛ ɖihiɣ taa leleŋ lɛɛlɛɛyɔ lɛɛlɛɛyɔ yɔ tɩ-yɔɔ. Ɛlɛ ye ɖɩwɛ suuɖu yɔ, ɖɩkaɣ pɩzʋʋ nɛ ɖɩɖɔkɩ ɖa-laŋɩyɛ nɛ pɩkɔɔ pɩtalɩ tɩnaɣ yɔɔ nɛ ɖihiɣ ñʋʋ yabʋ.—Mik. 7:7. w23.08 22 § 7
Piya, 10 juin
Nimbe [kɛ] ñɩɣyʋʋ ŋgʋ kisidini cʋʋ yɔ.—Dan. 2:42.
Ye ɖɩkpaɣ natʋ tɔm ndʋ tɩwɛ Danɩyɛɛlɩ 2:41-43 nɛ ɖɩmaɣzɩnɩ natʋ tɔm lɛɛtʋ ndʋ tɩwɛ Danɩyɛɛlɩ takayaɣ nɛ Natʋ takayaɣ taa yɔ, ɖɩnɩɣ pɩ-taa se naataŋ ɛnɩ ɩsɩŋnɩ Aŋglo-Amerika Kewiyaɣ. Sɔnɔ kewiyaɣ ŋga kakpaɖɩnɩ ɖoŋ ɛjaɖɛ kpeekpe yɔɔ. Danɩyɛɛlɩ yɔɔdaɣ kewiyaɣ ɖoŋ ñɩŋga ŋga kɔ-tɔm lɛ, ɛtɔm se: «Kewiyaɣ kaɣ wɛʋ ɖoŋ hɔɔlʋʋ nakʋyʋ taa nɛ kɛwɛɛnɩ ɛjandʋ hɔɔlʋʋ lɛɛkʋ taa.» Ɛbɛ yɔɔ kɛwɛɣnɩ ɛjandʋ hɔɔlʋʋ lɛɛkʋ taa? Mbʋ pʋyɔɔ yɔ, ɛyaa ɖɩkɩ kewiyaɣ ŋga nʋmɔʋ nɛ kaalakɩnɩ tʋmɩyɛ ko-ɖoŋ ɛzɩ pɩpɔzʋʋ yɔ; ɛyaa mba, pasɩŋnɩ cʋʋ ŋgʋ kɩhʋwa yɔ. Ðɩkpɛlɩkɩɣ toovenim tɔm kɩcɛyɩtʋ natʋyʋ tɔm ndʋ Danɩyɛɛlɩ yɔɔdɩ sɩʋ kpeliɣa ŋga kɔ-yɔɔ yɔ tɩ-taa. Ðɩpɩzɩɣ nɛ ɖɩkpɛlɩkɩ lɔŋ sakɩyɛ tɔm ndʋ ɛyɔɔdɩ sɩʋ kpelaɣ ŋga ka-naataŋ yɔɔ yɔ tɩ-taa. Kajalaɣ lɛ, Aŋglo-Amerika Kewiyaɣ wɩlaa se kɛwɛ ɖoŋ hɔɔlɩŋ nɩɩyɩ taa. Kɩɖaʋ nakʋyʋ yɔ: Etaazuunii nɛ Krandɩ-Pretaañɩ, pɛwɛ ajɛɛ wena awabɩ Caama you kajalaɣ ñɩŋgʋ nɛ naalɛ ñɩŋgʋ taa yɔ a-taa. Paa mbʋ yɔ, kewiyaɣ ɖoŋ ñɩŋga ŋga kɛwɛnɩ ɛjandʋ nɛ kakaɣ wobu pɩ-yɔɔ nɛ kɛwɛɛnɩ ɛjandʋ; mbʋ pʋyɔɔ yɔ ɛyaa mba pɔ-yɔɔ kɔtɔkɩ kewiyitu yɔ, poyouni ɖama nɛ pakaɖɩɣnɩ ɖɔɖɔ komina. Nabʋlɛ lɛ, pʋcɔ nɛ Ɛsɔ Kewiyaɣ ɖɩzɩ ɛyaa kominawaa tɩŋa lɛ, Aŋglo-Amerika Kewiyaɣ kaɣnɩ kɛʋ kewiyaɣ kɛdɛzaɣ ñɩŋga ŋga kɔtɔkɩ kewiyitu yɔ. w23.08 10-11 § 12-13
Cɩla, 11 juin
Man-kʋñɔŋ taa, maya Yehowa, maawɛɛ nɛ mamakɩ kubusi nɛ mɛ-Ɛsɔ cɔlɔ kiŋ se ɛsɩnɩ-m. Ɛnɩ mɔ-nɔɔ nɛ e-templo taa.—Keɣ. 18:6.
Nabʋyʋ taa, kala nɛ kʋñɔmɩŋ weyi Daviid kataɣ yɔ, iyekaɣ nɛ ɛnɩɣzɩɣ. (Keɣ. 18:4, 5) Paa mbʋ yɔ, ɛzɩma Yehowa wɩlɩ-ɩ sɔɔlɩm nɛ ɛcɔŋnɩ ɛ-yɔɔ yɔ, pɩɩkpazɩ-ɩ ɖoŋ. Yehowa ɖiyi-i nɛ ewoni-i «kpɩna ñɩtʋ ɖɩdɔɔyɛ taa ɖenɖe ñɩtʋ tɔyaa yɔ» nɛ «ɖɩhɛzɩyɛ taa ɖenɖe lɩm tɔyaa yɔ.» Piyeba nɛ Daviid kpa ɖoŋ nɛ ewolo pɩ-yɔɔ nɛ ɛsɛɛ Yehowa nɛ taa leleŋ. (Keɣ. 18:28-32) Mbʋ ɖɔɖɔ sɔnɔ, paa ɖɩkatɩɣ kala nɛ kʋñɔmɩŋ ɖe-wezuu caɣʋ taa yɔ, «Yehowa sɔɔlɩm siɣsiɣ ñɩmbʋ yɔɔ lɛ ɖɩtɩɖɩ.» (Kʋñ. 3:22; Kol. 1:11) Ðoŋ ɖoŋ lɛ, Daviid wezuu kaawɛ kaɖɛ taa, nɛ ɛɛwɛnɩ koyindinaa sɔsaa sakɩyɛ. Paa mbʋ yɔ, sɔɔndʋ taakpaɣ-ɩ, mbʋ pʋyɔɔ yɔ Yehowa kaasɔɔlɩ-ɩ nɛ ɛkandɩyaɣ ɛ-yɔɔ. Daviid kaaɖiɣzinaa se Yehowa kaawɛ ɛ-cɔlɔ paa wɛtʋ ndʋ lɛ tɩ-taa nɛ pɩɩhɛzɩ ɛ-laŋɩyɛ. Piyeba nɛ etee hendu se: «[Yehowa holi-m] mɔn-sɔɔndʋ kpeekpe taa.» (Keɣ. 34:4) Paa nabʋyʋ taa sɔɔndʋ kaakpaɣaɣ Daviid siŋŋ yɔ, ɛpɩzaa nɛ ɛwa ɛ-sɔɔndʋ ndʋ mbʋ pʋyɔɔ yɔ ɛnawa se Yehowa sɔɔlɩ-ɩ. w24.01 30 § 15-17
Saɖakawaɣ, 12 juin
Ye kɩwɛɛkɩm laɖaa ɩñɩnɩɣ se pepeɣzi-ŋ yɔ, taatisi.—Adu. 1:10.
Kpɛlɩkɩ lɔŋ lɩmaɣza kɩdɛkɛda wena Yehowaasɩ kpaɣaa yɔ a-taa. Cɔjɔ kɩlɩm Yehoyiyada sɩm wayɩ lɛ, Yehowaasɩ paɣzɩ taabalɩyɛ kɩdɛkɛdɩyɛ ɖʋʋ. (2 Kro. 24:17, 18) Ɛɛlɩzaa se ewelisiɣni Yuuda awumbiya mba pataasɔɔlɩ Yehowa yɔ. Pɩtɩla, ŋtisiɣ se pɩɩwɛɛ se Yehowaasɩ eposi ɛ-tɩ nɛ wɛ, mbʋ pʋyɔɔ yɔ palakaɣ mbʋ pɩfɛyɩ ɖeu yɔ. Ɛlɛ eewelisi lɔŋ kɩdɛkɛdɩŋ weyi patasɩ-ɩ yɔ. Halɩ Yehowaasɩ yeba nɛ pakʋ ɛ-hɔʋ taa tʋ Zakarii mbʋ pʋyɔɔ yɔ ɛlɛ kaatasɩ-ɩ lɔŋ. (2 Kro. 24:20, 21; Mat. 23:35) Pɩɩkɛ kaɖɛ tɔm kpem; ɛlɛ pɩɩkɛ ɖɔɖɔ kɩmɛlɛndʋ tɔm. Yehowaasɩ kaapaɣzɩ camɩyɛ kiɖe tɛɛ, ɛlɛ pɩlabɩ pʋtɔdɩyɛ se ɛkɔma nɛ ɛpɩsɩ tisuu yebiyu nɛ ɛyaa kʋyʋ. Pɩtɛmnaa se ɛ-maɣmaɣ ɛ-lɩmɖʋyaa kʋ-ɩ. (2 Kro. 24:22-25) Ye eewobi pɩ-yɔɔ nɛ ewelisiɣni Yehowa nɛ mba paasɔɔlɩ-ɩ yɔ, e-wezuu caɣʋ kaawɛ ndɩ kpem. w23.09 9 § 6
Kemeɣa, 13 juin
Yele sɔɔndʋ seu.—Luka 5:10.
Yesu nawa ɖɔɖɔ se apostoloo Pɩyɛɛrɩ pɩzɩɣ nɛ ɛɖɔkɩ e-siɣsiɣ wɛtʋ. Pʋyɔɔ Yesu heyi Pɩyɛɛrɩ nɛ nɔɔ kɩbaŋa se: «Yele sɔɔndʋ seu.» Ɛzɩma Yesu ta liu Pɩyɛɛrɩ yɔ, pɩɩlɛɣzɩ Pɩyɛɛrɩ wezuu caɣʋ. Pʋwayɩ Pɩyɛɛrɩ nɛ e-neu Andree peyebi kpakpasɩ kpaʋ tʋmɩyɛ nɛ papaɣzɩ Yesu wayɩ tɩŋʋʋ alɩwaatʋ tɩŋa, nɛ lɩmaɣzɩyɛ nɖɩ pakpaɣ mbʋ yɔ ɖɩkɔnɩ-wɛ wazasɩ sakɩyɛ. (Mark. 1:16-18) Pɩyɛɛrɩ tɩŋ Yesu wayɩ lɛ, ehiɣ wazasɩ sakɩyɛ. Ɛna Yesu wa kʋdɔndɩnaa, ɛɖɔɔnɩ aleewaa nɛ halɩ efezi sɩɖaa. (Mat. 8:14-17; Mark. 5:37, 41, 42) Pɩyɛɛrɩ na ɖɔɖɔ Yesu natʋ natʋyʋ taa e-Kewiyaɣ samtʋ taa, nɛ ɛtɩsɔɔ natʋ ndʋ tɩ-yɔɔ kpa. (Mark. 9:1-8; 2 Pɩy. 1:16-18) Toovenim taa lɛ, Pɩyɛɛrɩ na Yesu tʋma sakɩyɛ nɛ ye ɛtaatɩŋ Yesu wayɩ yɔ ɛtaana-yɛ. Pɩtʋʋ fɛyɩ se ɛ-taa kaalabɩ leleŋ siŋŋ se ɛpɩzaa nɛ ɛwa ɛ-lɩmaɣza kɩdɛkɛda nɛ ehiɣ wazasɩ nzɩ. w23.09 21 § 4-5
Mazaɣ, 14 juin
Yesu heyi-i se: «Meheyiɣ-ŋ se, pɩtaasɩɩnɩ tam 7, ɛlɛ pɩsɩɩnɩ tam 77».—Mat. 18:22.
Apostoloo Pɩyɛɛrɩ takayaɣ kajalaɣ ñɩŋga taa, ɛyɔɔdaa se pɩtɩkɛ kɩwɛɛkɩm pazɩ yem sɔɔlɩm siŋŋ sɩɣnɩ-ɖʋ se ɖikpeɣ. Ɛlɛ pɩsɩɣnɩ-ɖʋ se ɖikpeɣ «kɩwɛɛkɩm sakɩyɛ.» (1 Pɩy. 4:8) Pʋtɔma yɔ, Pɩyɛɛrɩ kaatɔzɩ tɔm ndʋ Yesu kaawɩlɩ-ɩ kpaɣʋ nɛ kpeɣu yɔɔ pɩlakɩ pɩnzɩ sakɩyɛ yɔ tɩ-yɔɔ. Alɩwaatʋ ndʋ tɩ-taa, pʋtɔma Pɩyɛɛrɩ maɣzaɣ se ɛɛkɛ ɛyʋ kɩbanʋ kpem, mbʋ pʋyɔɔ yɔ ɛyɔɔdaa se ekpeɣu e-koobu «pɩsɩɩnɩ tam 7.» Ɛlɛ Yesu heyi-i se pɩwɛɛ se ekpeɣ nɛ «pɩsɩɩnɩ tam 77,» pʋ-tɔbʋʋ lɛ se pɩwɛɛ se ekpeɣu paa ɛzɩmtaa. Nɛ tɔm ndʋ tɩwazɩɣ ɖa ɖɔɖɔ. (Mat. 18:21) Ye pɩwɛ-ŋ kaɖɛ se ŋɖɔ lɔŋ tasʋʋ mbʋ pɩ-yɔɔ yɔ, pitaatibi-ŋ yɔɔɔ. Nabʋyʋ taa, pɩwɛ Yehowa sɛyaa tɩŋa kaɖɛ se pakpaɣ nɛ pekpeɣ, mbʋ pʋyɔɔ yɔ patɩtalɩ pilim. Mbʋ pɩ-tɔm kɩlɩ cɛyʋʋ lɛɛlɛɛyɔ yɔ lɛ se ŋla mbʋ payɩ ŋpɩzɩɣ yɔ nɛ ŋkpeɣ ño-koobu nɛ ña nɛ ɩ ɩla laŋhɛzɩyɛ. w23.09 29 § 12
Kujuka, 15 juin
Maya Yehowa, nɛ ecosi-m.—Yoonaa 2:2.
Alɩwaatʋ ndʋ Yoonaa kaawɛ kpakpayaɣ lotu taa yɔ, ɛɛwɛnɩ tisuu se Yehowa kaɣ welisuu ɛ-adɩma. Yehowa kaɣ-ɩ sɩnʋʋ. Yehowa yabɩ Yoonaa ñʋʋ nɛ pʋwayɩ lɛ, Yoonaa tɛ ɛ-taa se ɛlakɩ tʋmɩyɛ nɖɩ Yehowa kaaɖʋ-ɩ yɔ. (Yon. 2:10–3:4) Alɩwaatʋ ndʋ ŋkatɩɣ tɩlasɩ yɔ, ŋnɩɣzɩɣ siŋŋ nɛ halɩ pɩwɛ-ŋ kaɖɛ se ŋtɩmnɩ Yehowa? Yaa pɩnɩɣ-ŋ siŋŋ nɛ pɩwɛɣ-ŋ kaɖɛ se ŋkpɛlɩkɩɣ? Tɩlɩ se Yehowa nɩɣ ñɔ-tɔm taa kpayɩ kpayɩ. Pʋyɔɔ lɛ, paa adɩma naayɛ kɛlɛʋ yem ŋlaba yɔ, ña-taa pɩzɩɣ nɛ pɩtɛ se ɛkaɣ-ŋ haʋ mbʋ ɖeyi ɖeyi pɩpɔzʋʋ-ŋ yɔ. (Efɛz. 3:20) Ye ŋnɩɣ wɩzasɩ ño-tomnaɣ taa yaa ña-maɣzɩm taa nɛ pɩlakɩ-ŋ kaɖɛ se ŋkalɩ tɔm yaa ŋkpɛlɩkɩ yɔ, ŋpɩzɩɣ ŋwelisi Bibl yaa ɛgbɛyɛ takayɩsɩ nzɩ pakpaɣ tataɣ yɔɔ yɔ. Ŋpɩzɩɣ ɖɔɖɔ nɛ ŋwelisi ɛgbɛyɛ hendu natʋyʋ yaa ŋcɔnɩ video nakʋyʋ jw.org yɔɔ. Yehowa sɔɔlaa se ɛkpazɩ-ŋ ɖoŋ nɛ ɛkaɣ mbʋ labʋ ye ŋtɩmɩɣnɩ-ɩ nɛ ŋñɩnɩɣ nɛ ŋnaɣ ɛzɩma ɛtɩŋɩɣnɩ Bibl nɛ ɛgbɛyɛ takayɩsɩ yɔɔ nɛ ecosuu ña-adɩma yɔɔ yɔ. w23.10 13 § 6; 14 § 9
Hodo, 16 juin
Fezuu kiɖeɖeu wɩlɩ kpayɩ kpayɩ se pataalɩzɩtɩ nʋmɔʋ ŋgʋ kiwokini lone kiɖeɖeye taa yɔ nɛ pawɩlɩ alɩwaatʋ ndʋ kajalaɣ kizinziku kaawɛɛ yɔ.—Ebr. 9:8.
Lona wena aawɛ Ɛsɔ sɛtʋ kɩɖanɖʋʋ tɛɛ yɔ nɛ lona wena aawɛ templonaa mba paama Yeruzalɛm pʋwayɩ yɔ pa-taa yɔ alɩ ɖama. Ðamɩŋ 2 kaawɛ Ɛsɔ sɛtʋ kɩɖanɖʋʋ tɛɛ nɛ templonaa mba pa-taa: Lone Kiɖeɖeye nɛ Lone Kiɖeɖeye nɖɩ ɖɩkpaɖaa yɔ; nɛ pɩsaʋ kikenduu nakʋyʋ kaatayɩnɩ ɖamɩŋ ɛnɩ ɩ-hɛkʋ taa. (Ebr. 9:2-5; Ejl. 26:31-33) Sika kanɖʋnaa ɖɩzɩyɛ, altaaru ŋgʋ kɩ-yɔɔ pɔsɔkɩ ŋgee tɩlaaɖɩ yɔ, nɛ taabɩlɩ ŋgʋ kɩ-yɔɔ pasɩɣ Ɛsɔ ɛsɩndaa kpɔnɔnaa yɔ, mba kaawɛnɩ Lone Kiɖeɖeye taa. «Cɔjɔnaa mba pata-wɛ num» yɔ, pe-ɖeke pɩɩha nʋmɔʋ se pasʋʋ Lone Kiɖeɖeye taa nɛ pala pɔ-cɔjɔtʋ tʋma. (Kɩg. 3:3, 7, 10) Lone Kiɖeɖeye nɖɩ ɖɩkpaɖaa yɔ ɖɩ-taa lɛ, ɛgbɛyɛ ɖʋʋ aɖakaɣ ŋga palabɩnɩ sika yɔ ŋga kaawɛnɩ peeɖe, nɛ kasɩŋnɩ Yehowa wɛʋ. (Ejl. 25:21, 22) Cɔjɔ kɩlɩm ɖeke pɩɩha nʋmɔʋ se ɛtɛzɩ pɩsaʋ kikenduu nɛ ɛsʋʋ Lone Kiɖeɖeye nɖɩ ɖɩkpaɖaa yɔ ɖɩ-taa tam kʋɖʋm pɩnaɣ taa, Kɩwɛɛkɩm yɔɔ Huuzuu Kɩyakʋ wiye. (Lev. 16:2, 17) Ɛkpɛndaɣnɩ kpɩna calɩm nɛ ɛsʋʋ peeɖe nɛ ɛla kɩwɛɛkɩm yɔɔ huuzuu sɔnzɩ ɛ-maɣmaɣ ɛ-kɩwɛɛkɩm yɔɔ nɛ samaɣ kpeekpe kɩwɛɛkɩm yɔɔ. Pʋwayɩ lɛ, Yehowa wɩlɩ kpayɩ kpayɩ mbʋ Ɛsɔ sɛtʋ kɩɖanɖʋʋ tɛɛ lona ana asɩŋnaa yɔ.—Ebr. 9:6, 7. w23.10 27 § 12
Piya, 17 juin
Ɩsɔɔlɩ ɖama.—Yoh. 15:17.
Ðɩnaɣ paɣtʋ ndʋ tɩtɔŋ se ‘ɖɩsɔɔlɩ ɖama’ yɔ tam sakɩyɛ Ɛsɔtɔm taa. (Yoh. 15:12; Roma 13:8; 1 Tes. 4:9; 1 Pɩy. 1:22; 1 Yoh. 4:11) Ɛlɛ sɔɔlɩm kɛ wɛtʋ kɩbandʋ ndʋ tɩlɩɣnɩ ɖooo ɖa-laŋɩyɛ taa yɔ, nɛ nɔɔyʋ ɛɛpɩzɩɣ nɛ ɛna ɖa-laŋɩyɛ taa. Ye mbʋ, ɛzɩma lalaa pɩzɩɣ nɛ pana se ɖɩsɔɔlɩ-wɛ? Ðɩpɩzɩɣ nɛ ɖɩtɩŋnɩ ɖɔ-yɔɔdaɣ nɛ ɖa-lakasɩ yɔɔ nɛ ɖiyele nɛ pana se ɖɩsɔɔlɩ-wɛ. Ðɩpɩzɩɣ nɛ ɖɩtɩŋnɩ nʋmɔŋ sakɩyɛ yɔɔ nɛ ɖɩwɩlɩ ɖo-koobiya se ɖɩsɔɔlɩ-wɛ. Kɩɖaŋ nɩɩyɩ yɔ: ‘Ðiheyi ɖama toovenim.’ (Zak. 8:16) ‘Ðiyele nɛ laŋhɛzɩyɛ wɛɛ ɖɛ-hɛkʋ taa.’ (Mark. 9:50) ‘Ðama hɩɖɛ ɖʋʋ nʋmɔʋ taa lɛ, ɖɩkɛ mba pɛɖɛɣ nɔɔ yɔ.’ (Roma 12:10) ‘Ðɩmʋ ɖama camɩyɛ.’ (Roma 15:7) ‘Ðiwolo pɩ-yɔɔ nɛ ɖikpeɣ ɖama.’ (Kol. 3:13) ‘Ðiwolo pɩ-yɔɔ nɛ ɖɩsɩɣlɩɣ ɖama sʋʋtʋ.’ (Gal. 6:2) ‘Ðiwolo pɩ-yɔɔ nɛ ɖɩhɛzɩɣ ɖama laŋa.’ (1 Tes. 4:18) ‘Ðiwolo pɩ-yɔɔ nɛ ɖɩkpazɩ ɖama ɖoŋ.’ (1 Tes. 5:11) ‘Ðɩtɩmɩ ɖama yɔɔ.’—Yak. 5:16. w23.11 9 § 7-8
Cɩla, 18 juin
Ɩmɛyɩ amɛya lidaʋ taa.—Roma 12:12.
Paa evemiye nɖɩ, ɖɩkpakɩɣ lɩmaɣza wena apɔzʋʋ se ɖɩwɛɛnɩ tisuu sɔsɔm yɔ. Kɩɖaŋ nɩɩyɩ yɔ: Ðɩkpakɩɣ lɩmaɣza wena yɔ atukuuni taabalɩyɛ ɖʋʋ, helim mʋʋ, sukuli labʋ, nesi ɖɔkʋʋ, piya lʋlʋʋ, nɛ tomnaɣ yɔɔ tʋmɩyɛ labʋ. Pɩwɛɣ ɖeu se ɖɩpɔzɩ ɖa-tɩ se: ‘Lɩmaɣza wena mankpakɩɣ yɔ awɩlɩɣ se man-taa tɛma se ɛjaɖɛ ɖɩnɛ ɖɩɩkaɣ wɛʋ tam nɛ pɩkazɩ pazɩ lɛ ɛjaɖɛ kɩfaɖɛ kaɣ lɛɣzʋʋ ɖi-lone taa? Yaa ɛyaa mba pacakɩ wezuu ɛzɩ sɩm kɛ pɩtɩŋa payɩ pɩ-tɩnaɣ yɔ pɛwɛnɩ ɖoŋ lɩmaɣza wena mankpakɩɣ yɔ a-yɔɔ?’ (Mat. 6:19, 20; Luka 12:16-21) Ye ɖɩcɛyɩsɩɣ tisuu mbʋ ɖɩwɛna se ɛjaɖɛ kɩfaɖɛ ñɔtɩ kpam yɔ, pɩkaɣ yebu nɛ ɖɩkpaɣ lɩmaɣza kɩbana. Ðɩkatɩɣ ɖɔɖɔ takɩm mbʋ pɩ-taa pɩpɔzʋʋ-ɖʋ tisuu sɔsɔm yɔ. Pɩtɩla panazɩɣ-ɖʋ, ɖɩhɩnɩ kʋdɔŋ sɔsɔʋ nakʋyʋ yaa ɖɩkatɩɣ takɩm lɛɛbʋ mbʋ pɩpɩzɩɣ piyele nɛ pitibi-ɖʋ yɔɔɔ yɔ. Kajalaɣ taa lɛ, pɩtɩla ɖɩñakɩ pana nɛ ɖɩɖɔkɩ ɖa-tɩ takɩm mbʋ pɩ-taa. Ɛlɛ takɩm mbʋ, ɖoŋ ɖoŋ lɛ pɩkpakɩɣ alɩwaatʋ; pʋyɔɔ lɛ pɩpɔzʋʋ-ɖʋ tisuu sɔsɔm se pɩsa nɛ ɖɩɖɔkɩ ɖa-laŋɩyɛ nɛ ɖiwolo pɩ-yɔɔ nɛ ɖɩsɛɣ Yehowa nɛ taa leleŋ.—1 Pɩy. 1:6, 7. w23.04 27 § 4-5
Saɖakawaɣ, 19 juin
Ɩtɩmɩɣ kaahɛzaɣ.—1 Tes. 5:17.
Yehowa sɔɔlaa se ɖɩla mbʋ pɩlakɩ nɔɔ kʋɖʋmaɣ nɛ ɖa-adɩma yɔ. Kɩɖaʋ nakʋyʋ yɔ: Koobu abalɩñɩnʋ nɔɔyʋ pɩzɩɣ nɛ ɛtɩmnɩ Yehowa se ɛsɩnɩ-ɩ nɛ ɛ-tʋmɩyɛ ñʋʋdʋ ha-ɩ nʋmɔʋ nɛ ɛpɩzɩ ewolo kigbeɣluu sɔsɔʋ nakʋyʋ. Ɛzɩma Yehowa pɩzɩɣ nɛ ecosi adɩma ana a-yɔɔ? Ɛpɩzɩɣ nɛ ɛha koobu ɛnʋ abalɩtʋ ndʋ pɩpɔzʋʋ-ɩ yɔ se ewolo nɛ ɛpɔzɩ nʋmɔʋ ɛ-tʋmɩyɛ ñʋʋdʋ. Ɛlɛ pɩkaɣ pɔzʋʋ se koobu ɛnʋ ewolo ɛ-tʋmɩyɛ ñʋʋdʋ cɔlɔ nɛ ɛpɔzɩ nʋmɔʋ. Pɩtɩla pɩpɔzʋʋ se ewolo tam sakɩyɛ. Halɩ ɛpɩzɩɣ nɛ eheyi-i se ɛlakɩ tʋmɩyɛ kɩyakɩŋ nɩɩyɩ pi-lone taa yaa eheyi-i se ɛlɩzɩ e-liidiye taa kɩyakɩŋ weyi ɛsʋlʋmɩ nʋmɔʋ yɔ i-liidiye. Yehowa sɔɔlaa se ɖɩtɩmɩɣ ɖa-kɩcɛyɩm yɔɔ kaahɛzaɣ. Tɔm ndʋ Yesu yɔɔdaa yɔ tɩwɩlɩɣ se adɩma wena ɖɩlakɩ yɔ a-taa naayɛ wɛɛ lɛ, Ɛsɔ eecosuu a-yɔɔ kpaagbaa. (Luka 11:9) Ye mbʋ, taalɔ lidaʋ. Tɩmɩ siŋŋ, lakɩ mbʋ kaahɛzaɣ. (Luka 18:1-7) Alɩwaatʋ ndʋ ɖɩwɛɣ nɛ ɖɩtɩmɩɣ tɔm natʋyʋ yɔɔ tam yɔ, ɖɩwɩlɩɣ Yehowa se mbʋ ɖɩwɛɛ nɛ ɖɩpɔzʋʋ yɔ pɩ-tɔm cɛyɩ ɖɛ-ɛsɩndaa siŋŋ. Ðɩwɩlɩɣ ɖɔɖɔ se ɖɩwɛnɩ tisuu se ɛpɩzɩɣ nɛ ɛsɩnɩ-ɖʋ. w23.11 22 § 10-11
Kemeɣa, 20 juin
Lidaʋ eeyeki se fɛyɛ ɛkpa-ɖʋ.—Roma 5:5.
Yehowa labɩ Abraham tamaɣ se ɛkaɣ tɩŋnʋʋ ɛ-lʋlʋʋ taa tʋ nɔɔyʋ yɔɔ nɛ ɛwazɩ tɛtʋ yɔɔ ajɛɛ kpeekpe. (Kiɖe 15:5; 22:18) Abraham kaawɛnɩ tisuu siŋŋ Ɛsɔ yɔɔ, pʋyɔɔ ɛ-taa kaatɛma se tamaɣ ŋga Ɛsɔ laba yɔ kakaɣ labʋ. Paa mbʋ yɔ, alɩwaatʋ ndʋ Abraham kaawɛnɩ pɩnzɩ 100 nɛ ɛ-halʋ ñɛwɛɛnɩ pɩnzɩ 90 yɔ, pataalʋlɩtɩ pɩɣa. (Kiɖe 21:1-7) Ɛlɛ Bibl yɔɔdaa se: «[Abraham ta] liu nɛ ɛwɛɛnɩ tisuu se ɛkaɣ kɛʋ ajɛɛ sakɩyɛ caa ɛzɩ paayɔɔdʋʋ yɔ.» (Roma 4:18) Ña lɛ, ŋnawa se mbʋ Abraham kaaɖaŋaa yɔ pɩlaba. Ɛlʋlɩ pɩɣa ŋga ɛɛɖaŋ alɩwaatʋ sakɩyɛ yɔ, ŋga lɛ Izaakɩ. Ɛbɛ yɔɔ Abraham taa kaatɛma se Yehowa tamaɣ kaɣ labʋ? Abraham kaasɩm Yehowa camɩyɛ, pʋyɔɔ «ɛ-taa [kaatɛm] siŋŋ se tamaɣ ŋga Ɛsɔ labɩ-ɩ yɔ» kakaɣ labʋ. (Roma 4:21) Abraham tisuu yɔɔ lɛ, ɛ-tɔm kaakɛdɩnɩ Yehowa nɛ ɛkpaɣ-ɩ se ɛkɛ ɛyʋ siɣsiɣ tʋ.—Yak. 2:23. w23.12 8 § 1-2
Mazaɣ, 21 juin
Ɛyʋ weyi ɛwɛ siɣsiɣ pʋyʋ cikpelu taa yɔ, ɛwɛ ɖɔɖɔ siɣsiɣ pʋyʋ sɔsɔ taa, nɛ ɛyʋ weyi ɛfɛyɩ siɣsiɣ pʋyʋ cikpelu taa yɔ, ɛfɛyɩ ɖɔɖɔ siɣsiɣ pʋyʋ sɔsɔ taa.—Luka 16:10.
Evebu weyi papɩzɩɣ nɛ pataa-ɩ liu yɔ, ɛlakɩ tʋma wena paɖʋʋ-ɩ yɔ a-tɩŋa camɩyɛ. Yele nɛ ɖɩna kɩɖaʋ kɩbaŋʋ ŋgʋ Yesu hawa yɔ. Ɛtaawɛɛ feendu nɛ ɛtaalakɩ kaakendu tʋma wena paɖʋ-ɩ yɔ a-yɔɔ kpa. Ɛlɛ ɛlabɩ tʋma wena payɩ Yehowa ɖʋ-ɩ yɔ halɩ pɩkpɛndɩnɩ alɩwaatʋ ndʋ pɩɩwɛ-ɩ kaɖɛ se ɛlabɩ-yɛ yɔ. Ɛɛsɔɔlɩ ɛyaa, kɔzɩ kɔzɩ ɛ-tɔmkpɛlɩkɩyaa, nɛ etisi faaa nɛ ɛcɛlɩ e-wezuu pɔ-yɔɔ. (Yoh. 13:1) Ɛzɩ Yesu yɔ, ñaɣ pana nɛ ŋla tʋma wena payɩ paɖʋʋ-ŋ yɔ. Ye ŋŋsɩŋ ɛzɩma pɩwɛɛ se ŋla tʋmɩyɛ naɖɩyɛ yɔ, wɛɛnɩ tɩ luzuu nɛ ŋpɔzɩ koobiya mba papɩ fezuu taa yɔ se pasɩnɩ-ŋ. Taaɖʋ ña-tɩ kamaɣ tʋma wena paɖʋʋ-ŋ yɔ a-taa, ŋgʋ ŋpɩzɩɣ ŋla nɛ pɩcɛzɩ mbʋ. (Roma 12:11) Ɛlɛ la ña-tʋma camɩyɛ nɛ ŋtɛm-yɛ ɛzɩ ‘Yehowa ŋlakɩ-yɛ yɔ, nɛ pɩtaawɛɛ ɛzɩ ɛyaa ŋlakɩ-yɛ yɔ.’ (Kol. 3:23) Toovenim taa lɛ, ŋtɩtalɩ pilim, pʋyɔɔ lɛ tɩlɩ ño-ɖoŋ kamaɣ nɛ ye picoɖi-ŋ hɔɔlʋʋ nakʋyʋ taa yɔ ŋtisi se picoɖi-ŋ.—Adu. 11:2. w23.12 26 § 8
Kujuka, 22 juin
Pawazɩ ɛyʋ weyi ɛtaɣ Yehowa liu.—Yer. 17:7.
Ða-taa kaalabɩ leleŋ alɩwaatʋ ndʋ pamɩyɩsɩ-ɖʋ lɩm nɛ ɖɩsʋʋ Yehowa hɔʋ taa yɔ. Pɩkɛnɩ-ɖʋ hɩɖɛ ɖʋʋ se taabalɩyɛ kɩbanɖɛ wɛ ɖa nɛ Yehowa ɖɛ-hɛkʋ taa. Nɛ ɖitisiɣ keɣa maɖʋ tɔm tʋnɛ tɩ-yɔɔ: «Koboyaɣ tʋ lɛ ɛyʋ weyi [ña Yehowa] ŋlɩzɩɣ-ɩ nɛ ŋkɔnɩ-ɩ se ɛwɛɛ ña-kadaɣ taa yɔ.» (Keɣ. 65:4) Yehowa ɛɛhaɣ paa anɩ waɖɛ se ɛsʋʋ ɛ-kadaɣ taa. Ɛñɔtʋʋnɩ mba pawɩlɩɣ se pɔsɔɔlaa se taabalɩyɛ kɩbanɖɛ ɛwɛɛ ɛ nɛ wɛ pɛ-hɛkʋ taa yɔ. (Yak. 4:8) Alɩwaatʋ ndʋ ŋha ña-tɩ Yehowa nɛ pamɩyɩsɩ-ŋ lɩm yɔ, ña-taa pɩzɩɣ nɛ pɩtɛ se ña-lɩm mɩyɩsʋʋ wayɩ, Yehowa kaɣ pɩyʋʋ ñɔ-yɔɔ «wazaɣ pɩkɔɔ pɩsɩɩnɩ alɩwaatʋ ndʋ nabʋyʋ [ɛɛtasɩɣ-ŋ] tɛɖʋʋ yɔ. (Mal. 3:10; Yer. 17:7, 8) Lɩm mɩyɩsʋʋ kɛnɩ ñɛ-Ɛsɔ sɛtʋ ɖɩbazɩyɛ. Ŋkaɣ sɔɔlʋʋ se ŋla mbʋ payɩ ŋpɩzɩɣ yɔ nɛ ŋcaɣ wezuu nɛ pɩla nɔɔ kʋɖʋmaɣ nɛ ɖuutu ndʋ ŋɖuwaa yɔ, pɩkpɛndɩnɩ alɩwaatʋ ndʋ pɩtakɩɣ ñe-tisuu yɔ. (Ekl. 5:4, 5) Ŋpɩsɩ Yesu tɔmkpɛlɩkɩyʋ, pʋyɔɔ lɛ ŋkaɣ labʋ mbʋ payɩ ŋpɩzɩɣ yɔ nɛ ŋmaɣzɩnɩ Yesu nɛ ŋɖɔ ɛ-paɣtʋ yɔɔ.—Mat. 28:19, 20; 1 Pɩy. 2:21. w24.03 8 § 1-3
Hodo, 23 juin
Abalʋ kaɣ yebu ɛ-caa nɛ e-ɖoo nɛ ɛñɔɔnɩ ɛ-halʋ.—Kiɖe 2:24.
Ye ña nɛ ñɛ-tɛŋga ɩkpakɩɣ alɩwaatʋ nɛ ɩcakɩ ɖama cɔlɔ yɔ, ɛbɛ pɩpɔzʋʋ se ɩla? Maɣzɩ miŋ kɩɖaʋ yɔɔ nɛ ŋna. Pacalɩɣ ɖʋʋ miŋ lɛ, ɛɛpɩsɩɣ miŋ sɔsɔŋ kpaagbaa. Pɩpɔzʋʋ se pɛwɛɛ nɛ paɖʋʋ ɖasɩ sɔsɔsɩ miŋ ɛnɩ ɛ-taa. Pɩɩwɛɣ ɖeu se mɩ ɖɔɖɔ ɩpaɣzɩ kpaɣʋ alɩwaatʋ pazɩ paa evemiye nɖɩ nɛ ɩcakɩ ɖama cɔlɔ? Ɩlɩzɩ se ɩlakɩ mbʋ mɩ-naalɛ ɩsɔɔlaa yɔ. (Yak. 3:18) Ye ɩpaɣzɩ labʋ mbʋ pazɩ pazɩ yɔ, sɔɔlɩm mbʋ ɩwɛnɩ ɖama yɔɔ yɔ, pɩpɩzɩɣ nɛ pɩɖaɣnɩ paɣlʋʋ. Ñamtʋ tɔm cɛyɩ siŋŋ nesi ɖɔkʋʋ taa. Ñamtʋ wɛ ɛzɩ helim kɩbam (oxygène) mbʋ pɩsɩɣnɩ miŋ se ɛmʋ camɩyɛ yɔ. Ye helim mbʋ pɩfɛyɩ yɔ miŋ ɖeŋ lɛɛ lɛɛ; mbʋ ɖɔɖɔ ye halʋ nɛ ɛ-walʋ paañaŋ ɖama yɔ, sɔɔlɩm mbʋ pɛwɛnɩ ɖama yɔɔ yɔ, pɩpɩzɩɣ nɛ pɩhɛɛ lɛɛ lɛɛ. Ɛlɛ ye halʋ nɛ ɛ-walʋ pañakɩ pana nɛ pañaŋ ɖama yɔ, paɖʋʋ nesi se sɔɔlɩm mbʋ pɛwɛnɩ ɖama yɔɔ yɔ pɩwɛɛ tam. Paa mbʋ yɔ, tɩlɩ se pɩtɩkɛ ña pɩwɛɛ se ŋmaɣzɩ se ŋñaŋ ñɛ-tɛŋga; ɛlɛ ñɛ-tɛŋga pɩwɛɛ se keɖiɣzina se ŋñaŋ-kɛ. w23.05 22 § 9; 24 § 14-15
Piya, 24 juin
Alɩwaatʋ ndʋ nɩɣzɛ kaakɩlɩ-m yɔ, Ŋŋhɛzɩ ma-laŋɩyɛ yɔɔɔ yɔɔɔ nɛ ŋyele nɛ mɔ-yɔɔ hɛɛ.—Keɣ. 94:19.
Bibl taa, Yehowa sɛyaa siɣsiɣ tɩnaa nabɛyɛ yɔɔdɩ ɛzɩma po-koyindinaa yaa kala lɛɛna kaayeba nɛ pɛwɛɛ laŋwɛɛkɩyɛ taa nɛ sɔɔndʋ kpaɣ-wɛ yɔ. (Keɣ. 18:4; 55:1, 5) Ða ɖɔɖɔ, papɩzɩɣ nɛ pakaɖɩnɩ-ɖʋ sukuli taa, tʋmɩyɛ taa nɛ ɖɔ-hɔʋ taa; yaa komina pɩzɩɣ nɛ kɩkaɖɩnɩ-ɖʋ. Halɩ kʋdɔŋ nakʋyʋ pɩzɩɣ nɛ kɩkpa-ɖʋ nɛ sɔɔndʋ kpaɣ-ɖʋ se pɩtaakɛdɩ nɛ ɖɩsɩ. Ye ɖɩkatɩɣ wɛtʋ natʋyʋ mbʋ yɔ, pɩpɩzɩɣ nɛ pɩlabɩ-ɖʋ ɛzɩ ɖɩfɛyɩnɩ ɖoŋ nɩɩyɩ ɛzɩ pɩlakʋʋ pɩɣa cikpelaɣ nakɛyɛ yɔ. Ɛzɩma tɩyɛ Yehowa sɩɣnɩ-ɖʋ wɛtʋ ndʋ tɩ-taa? Ɛkpazɩɣ-ɖʋ ɖoŋ nɛ ɛhɛzɩɣ ɖa-laŋa. Ye mbʋ, kpakɩɣ alɩwaatʋ ɖoŋ ɖoŋ nɛ ŋtɩmɩɣnɩ Yehowa nɛ ŋkalɩɣ ɛ-Tɔm. (Keɣ. 77:1, 12-14) Ðɩnɛ ɛlɛ, alɩwaatʋ ndʋ ŋwɛɣ laŋwɛɛkɩyɛ taa yɔ, ŋkaɣ pɩsɩnʋʋ Yehowa yɔɔ kpaagbaa nɛ ŋpɔzɩ-ɩ se ɛsɩnɩ-ŋ. Heyi-i mbʋ pɩkpaɣ-ŋ sɔɔndʋ nɛ mbʋ pɩhaɣ-ŋ nɩɣzɛ yɔ. Yele nɛ ɛtɩŋnɩ Masɩ yɔɔ nɛ ɛyɔɔdɩnɩ-ŋ nɛ ɛhɛzɩ ña-laŋɩyɛ.—Keɣ. 119:28. w24.01 24-25 § 14-16
Cɩla, 25 juin
Ɛsɔ kɛnɩ weyi ɛhaɣ-mɩ ɖoŋ . . . se ɩsɔɔlɩ nɛ ɩtɛ ɩwɛɛnɩ ɖoŋ nɛ ɩla mbʋ payɩ ɛsɔɔlaa yɔ.—Filp. 2:13.
Pɩsa nɛ ŋtalɩ ñe-fezuu taa kaɖʋsɩ lɛ, pɩcɛyaa se ŋsɔɔlɩ siŋŋ se ŋtalɩ-sɩ. Alɩwaatʋ ndʋ ŋsɔɔlʋʋ siŋŋ se ŋtalɩ ña-kaɖʋwa yɔ, ŋkaɣ ñaɣʋ pana se ŋtalɩ-kɛ. Ye ɖɩsɔɔlɩ siŋŋ se ɖɩtalɩ ɖa-kaɖʋsɩ yɔ, pɩtʋʋ fɛyɩ se ɖɩkaɣ-sɩ talʋʋ lɔŋ nɛ pɩkɩlɩ. Ye mbʋ, ɛbɛ ŋpɩzɩɣ ŋla nɛ ŋsɔɔlɩ siŋŋ se ŋtalɩ ña-kaɖʋsɩ? Yehowa pɩzɩɣ nɛ ɛtɩŋnɩ e-fezuu kiɖeɖeu yɔɔ nɛ eyele nɛ ŋsɔɔlɩ se ŋtalɩ ña-kaɖʋwa. Nabʋyʋ taa lɛ ɖɩɖʋʋ ɖa-tɩ kaɖʋwa nakɛyɛ mbʋ pʋyɔɔ yɔ ɖɩnawa se pɩpɔzʋʋ se ɖɩla mbʋ, nɛ pɩkɛ mbʋ pɩwɛ ɖeu yɔ. Ɛlɛ pɩtɩla yɔ ɖɩfɛyɩnɩ sɔɔlɩm mbʋ piseɣtiɣ-ɖʋ se ɖɩtalɩ-kɛ yɔ. Maɣzɩɣ mbʋ Yehowa labɩ-ŋ yɔ pɩ-yɔɔ. (Keɣ. 143:5) Apostoloo Pɔɔlɩ maɣzaɣ lootiye nɖɩ Yehowa labɩ-ɩ yɔ ɖɩ-yɔɔ, nɛ piseɣti-i se ɛla Yehowa tʋma nɛ pɩkɩlɩ. (1 Kɔr. 15:9, 10; 1 Tim. 1:12-14) Mbʋ ɖɔɖɔ, ye ŋwobi pɩ-yɔɔ nɛ ŋmaɣzɩɣ mbʋ Yehowa labɩ-ŋ yɔ pɩ-yɔɔ yɔ, ŋkaɣ sɔɔlʋʋ siŋŋ se ŋtalɩ ña-kaɖʋwa.—Keɣ. 116:12. w23.05 27 § 3-5
Saɖakawaɣ, 26 juin
Ɩsa Yehowa hɩɖɛ.—Keɣ. 113:1.
Alɩwaatʋ ndʋ ɖɩsaŋ ɖa-Caa weyi ɛwɛ ɛsɔdaa yɔ ɛ-hɩɖɛ yɔ, ɛ-taa lakɩ leleŋ. (Keɣ. 119:108) Ɛlɛ ɛzɩ pɩwɩlɩɣ se Ɛsɔ ɖoŋ tɩŋa tʋ wɛ ɛzɩ ɛyaa mantɩtalɩ pilimwaa mba pɔsɔɔlaa se pasam-wɛ nɛ pɩkpazɩ-wɛ ɖoŋ yɔ? Aayɩ. Alɩwaatʋ ndʋ ɖɩsaŋ ɖa-Caa weyi ɛwɛ ɛsɔdaa yɔ, ɖɩwɩlɩɣ se tɔm ndʋ Sataŋ yɔɔdɩ ɖa-taa paa weyi ɛ-yɔɔ yɔ, tɩkɛ cɛtɩm. Sataŋ yɔɔdaa se ɛyʋ nɔɔyʋ ɛɛpɩzɩɣ nɛ ɛɖɔkɩ e-siɣsiɣ wɛtʋ nɛ ɛlʋ Ɛsɔ hɩɖɛ yɔɔ, nɛ ɖa-taa nɔɔyʋ ɛɛpɩzɩɣ nɛ ɛɖɔkɩ ɛ-cɩŋgɩlɩm wɛtʋ takɩm taa. Ɛyɔɔdaa se ye ɖɩnawa se ɖiyebi Ɛsɔ sɛʋ yɔ pɩwazɩɣ-ɖʋ nɛ pɩkɩlɩ yɔ, ɖa-tɩŋa payɩ ɖiyeki Ɛsɔ sɛʋ. (Yɔb 1:9-11; 2:4) Ɛlɛ Yɔɔb wɩlaa se Sataŋ kɛ cɛtɩyʋ, mbʋ pʋyɔɔ yɔ ɛɖɔkɩ e-siɣsiɣ wɛtʋ Ɛsɔ ɛsɩndaa alɩwaatʋ ndʋ ɛkatɩ kala yɔ. Ña yɔ? Ða-taa paa weyi wɛnɩ waɖɛ se ɛlʋ Yehowa hɩɖɛ yɔɔ nɛ eyele nɛ ɛ-taa la leleŋ ye ɛɖɔkɩ e-siɣsiɣ wɛtʋ ɛ-sɛtʋ taa yɔ. (Adu. 27:11) Pɩkɛnɩ-ɖʋ hɩɖɛ ɖʋʋ siŋŋ se ɖɩla mbʋ. w24.02 8-9 § 3-5
Kemeɣa, 27 juin
Ɩwɛɛnɩ tisuu ɛ-nayaa yɔɔ, nɛ pɩkaɣ-mɩ ɖenuu.—2 Kro. 20:20.
Moyizi nɛ Yozuwee alɩwaatʋ ɖɛwa lɛ, Yehowa lɩzɩ tɔm hʋyaa se peɖiyi ɛ-samaɣ. Pʋwayɩ, awiya alɩwaatʋ taa, Yehowa lɩzɩ nayaa se peɖiyi ɛ-samaɣ. Awiya wena aawɛ siɣsiɣ yɔ, aɖɔm nayaa lɔŋ tasʋʋ yɔɔ. Kɩɖaŋ nɩɩyɩ yɔ: Wiyaʋ Daviid luzi ɛ-tɩ nɛ ɛmʋ nayʋ Naataanɩ lɔŋ sɩɣzʋʋ. (2 Sam. 12:7, 13; 1 Kro. 17:3, 4) Wiyaʋ Yozafaatɩ ta nayʋ Yahaziyɛɛlɩ liu nɛ ɛɖɔ ɛ-lɔŋ tasʋʋ yɔɔ nɛ eseɣti Yuuda samaɣ se ‘kɛwɛɛnɩ tisuu Ɛsɔ tɛ nayaa yɔɔ.’ (2 Kro. 20:14, 15, 20) Alɩwaatʋ ndʋ Wiyaʋ Ezekiyaasɩ kaawɛ nɩɣzɛ taa yɔ, ɛpɔzɩ nayʋ Izaayii se ɛsɩnɩ-ɩ. (Iza. 37:1-6) Alɩwaatʋ ndʋ payɩ awiya ɖɔm Yehowa lɔŋ tasʋʋ yɔɔ yɔ, Yehowa wazɩ-yɛ nɛ ɛkandɩyɩ ɛ-samaɣ yɔɔ. (2 Kro. 20:29, 30; 32:22) Pɩnaɣaɣ kpayɩ kpayɩ se Yehowa kaawɛɛ nɛ ɛtɩŋɩɣnɩ ɛ-nayaa yɔɔ nɛ eɖiyiɣ ɛ-samaɣ. w24.02 21 § 8
Mazaɣ, 28 juin
Ɩtaala ɛzɩ palakʋʋ yɔ.—Efɛz. 5:7.
Sataŋ sɔɔlaa se ɖɩɖʋ taabalɩyɛ nɛ ɛyaa mba peyeki nɛ pɩlabɩ-ɖʋ kaɖɛ se ɖɩñɔɔnɩ Yehowa paɣtʋ kila yɔ. Pɩwɛɛ se ɖɩtɔzɩ se pɩtɩkɛ mba ɖɩnaɣ ɖɛ-ɛsɩndaa yɔ, pe-ɖeke ɖɩɖʋʋnɩ taabalɩyɛ, ɛlɛ ɖɩpɩzɩɣ nɛ ɖɩɖʋ taabalɩyɛ ɖɔɖɔ nɛ mba ɖa nɛ wɛ ɖɩyɔɔdʋʋnɩ ɖama réseaux sociaux waa yɔɔ yɔ. Pɩwɛɛ se ɖɩlʋbɩnɩ ɛjaɖɛ ɖɩnɛ ɖɩ-lɩmaɣza wena atɔŋ se wezuu kɩdɛkɛdʋʋ caɣʋ tɩwɛɛkɩ pʋyʋ yɔ. Ðɩnawa se pɩtɩkɛ toovenim. (Efɛz. 4:19, 20) Pɩwɛɣ ɖeu se ɖɩpɔzɩ ɖa-tɩ se: «Menkiziɣ ɖʋʋ taabalɩyɛ nɛ man-tʋmɩyɛ taa taabalaa, mon-sukuli taa taabalaa nɛ ɛyaa lalaa ye pɩtɩcɛyɩ se manɖʋ-wɛ nɛ taabalɩyɛ yɔ? Malakɩ abalɩtʋ nɛ mɔñɔʋnɩ Yehowa paɣtʋ kila halɩ paa piyeki se ɛyaa nabɛyɛ ɩmaɣzɩ se mɔn-tɔm kɩlɩ kaɖɛ yɔ?» Ɛzɩ 2 Timootee 2:20-22 yɔɔdʋʋ yɔ, pɩpɩzɩɣ nɛ pɩpɔzɩ ɖɔɖɔ se ɖɩkpa ɖa-tɩ alɩwaatʋ ndʋ ɖɩlɩzɩɣ taabalaa ɛgbɛyɛ taa yɔ. Ðɩtɔzɩ se pɩtɩla nabɛyɛ ɩɩsɩɣnɩ-ɖʋ se ɖɩɖɔkɩ ɖe-siɣsiɣ wɛtʋ ɖɛ-Ɛsɔ sɛtʋ taa. w24.03 22-23 § 11-12
Kujuka, 29 juin
Yehowa wɛnɩ sɔɔlɩm sɔsɔm.—Yak. 5:11.
Wiɖiyi ŋtɛm ñaɣʋ pana se ŋmaɣzɩ nɛ ŋna ɛzɩma Yehowa wɛɛ yɔ? Ðɩɩpɩzɩɣ nɛ ɖɩna Yehowa, paa mbʋ yɔ Bibl yɔɔdʋʋ tɔm ndɩ ndɩ ɛ-wɛtʋ yɔɔ. Bibl yaɣ Yehowa se ‘wɩsɩ nɛ kpayʋʋ’ nɛ «miŋ weyi ɛɖɩzɩɣ wondu caɣ caɣ yɔ.» (Keɣ. 84:11; Ebr. 12:29) Ezekɩyɛɛlɩ kɛdɩ Yehowa tɔm, natʋ natʋyʋ taa nɛ ɛtɔ se ɛwɛ ɛzɩ saafiirɩ pɩyɛ yɔ, ɛzɩ ñɩɣyʋʋ ŋgʋ kɩñɩlɩsɩɣ yɔ nɛ ɛzɩ tɩŋgaɣyʋʋ ŋgʋ kɩñɩlɩsɩɣ yɔ. (Ezek. 1:26-28) Ðɩɩpɩzɩɣ nɛ ɖɩna Yehowa; pʋyɔɔ lɛ, pɩpɩzɩɣ nɛ pɩlabɩ-ɖʋ kaɖɛ se ɖitisi se ɛsɔɔlɩ-ɖʋ. Nabɛyɛ tɔzʋʋ mbʋ pɩlabɩ pe-wezuu caɣʋ taa nɛ pɩɖɛɛ yɔ pɩ-yɔɔ lɛ, pamaɣzɩɣ se Yehowa ɛɛpɩzɩɣ nɛ ɛsɔɔlɩ-wɛ kpa. Ye ɖɩwɛnɩ lɩmaɣza ana yɔ, Yehowa nɩɣ ɖɔ-tɔm taa nɛ ɛnaɣ ɖoŋ weyi lɩmaɣza ana awɛnɩ ɖɔ-yɔɔ yɔ. Pɩsa nɛ ɛsɩnɩ-ɖʋ lɛ, ɛlɩzɩ wɛtʋ kɩbandʋ ndʋ ɛwɛna yɔ nɛ ɛwɩlɩ-ɖʋ Bibl taa. Tɔm piye kɩbanɖɛ nɖɩ papɩzɩɣ nɛ palabɩnɩ tʋmɩyɛ nɛ pɔyɔɔdɩ ɛzɩma Yehowa wɛɛ yɔ, nɖɩ lɛ sɔɔlɩm. Bibl yɔɔdʋʋ se «Ɛsɔ kɛ sɔɔlɩm.» (1 Yoh. 4:8) Mbʋ payɩ ɛlakɩ yɔ, sɔɔlɩm tuyuuni-i nɛ ɛlakɩ-pʋ. Ɛsɔ sɔɔlɩm paɣlɩ siŋŋ, pʋyɔɔ ɛsɔɔlʋʋ, halɩ pɩkpɛndɩnɩ mba patɩsɔɔlɩ-ɩ yɔ.—Mat. 5:44, 45. w24.01 26 § 1-3
Hodo, 30 juin
Ɛyɔɔdaɣnɩ-wɛ nɛ mɩndʋ tilimiye taa.—Keɣ. 99:7.
Yehowa kaalɩzɩ Moyizi se eɖiyi Izrayɛɛlɩ mba nɛ ɛlɩzɩ-wɛ Ejipiti ɛjaɖɛ taa nɛ pɩsa nɛ pɩna kpayɩ kpayɩ se ɛnʋ wɛna nɛ eɖiyiɣ-wɛ lɛ, eeyeba nɛ mɩndʋ tilimiye naɖɩyɛ wɩlɩɣ-wɛ nʋmɔʋ wɩsɩ taa; nɛ ɖoo taa lɛ, miŋ tilimiye wɩlɩɣ-wɛ nʋmɔʋ. (Ejl. 13:21) Moyizi tɩŋ tilimiye nɖɩ, nɛ ɖɩwɩlɩ ɛ nɛ Izrayɛɛlɩ mba nʋmɔʋ nɛ pɔkɔɔ patalɩ Teŋgu Kɩsɛɛmʋʋ nɔɔ. Sɔɔndʋ kaakpa samaɣ siŋŋ alɩwaatʋ ndʋ Ejipiti mba kaapaɣzɩ pa-wayɩ ɖʋʋ yɔ, mbʋ pʋyɔɔ yɔ pamaɣzaɣ se Ejipiti mba kaɣ-wɛ kʋʋ. Yehowa maɣmaɣ tɩŋnɩnɩ Moyizi yɔɔ nɛ eɖiyi ɛ-samaɣ nɛ ewoni-kɛ peeɖe. (Ejl. 14:2) Peeɖe Ɛsɔ tɩŋnɩ nʋmɔʋ ŋgʋ kɩwɛ piti kpem yɔ kɩ-yɔɔ nɛ ɛya pa-ñʋʋ. (Ejl. 14:26-28) Pʋwayɩ, Moyizi wobi pɩ-yɔɔ nɛ ɛtɩŋnɩ mɩndʋ tilimiye yɔɔ nɛ eɖiyi Ɛsɔ samaɣ kañɩmbusuu taa pɩnzɩ 40. (Ejl. 33:7, 9, 10) Yehowa yɔɔdaɣnɩ Moyizi nɛ tilimiye nɖɩ ɖɩ-taa, nɛ Moyizi ñeheyiɣ samaɣ tɔm ndʋ Yehowa heyi-i yɔ. Izrayɛɛlɩ mba kaana kpayɩ kpayɩ se Yehowa kaawɛna nɛ ɛtɩŋɩɣnɩ Moyizi yɔɔ nɛ eɖiyiɣ-wɛ. w24.02 21 § 4-5