Pʋcɔ nɛ Ɛsɔ hɔ ɛyaa nɩŋgbaaŋ lɛ, ɛzɩ ɛpakɩ-wɛ tam sakɩyɛ paa ɛzɩmtaa?

ÑƖNƖYƲ nɔɔyʋ wɛɛ nɛ ɛcɔŋnɩ menziini taa se ɛna ɛzɩma ɛsɔdaa wɛtʋ wɛɛ yɔ. Ɛcɔnaa lɛ, ɛna se helim sɔsɔm nabʋyʋ caɣ mabʋ lone naɖɩyɛ taa, ɖenɖe ɛyaa ɖɔ siŋŋ yɔ. Ɛtɩsɔɔlɩ se kaɖɛ naɖɩyɛ ɛtalɩ ɛyaa mba; pʋyɔɔ lɛ, ɛlakɩ mbʋ payɩ ɛpɩzɩɣ yɔ se ɛpaɣ-wɛ pʋcɔ nɛ helim mbʋ pɩpaɣzɩ mabʋ.

Mbʋ ɖɔɖɔ Yehowa wɛɛ nɛ ɛpakɩ tɛtʋ kpeekpe yɔɔ ɛyaa nɛ eheyiɣ-wɛ “helim” nabʋyʋ tɔm. Pɩ-tɔm wɛ kaɖɛ siŋŋ; nɛ pɩcɛzɩ ɛsɔdaa wɛtʋ ndʋ payɩ papɩzɩɣ nɛ pana menziiniwaa taa nɛ peheyi ɛyaa tɩ-tɔm yɔ. Ɛzɩma ɛwɛɛ nɛ ɛpakɩ-wɛ? Nɛ ɛbɛ yɔɔ ɖa-taa pɩzɩɣ nɛ pɩtɛ se ɛwɛɛ nɛ ɛhaɣ ɛyaa alɩwaatʋ sakɩyɛ se pala lɛɣzɩtʋ? Pɩsa nɛ ɖicosi tɔm ndʋ tɩ-yɔɔ lɛ, iyele nɛ ɖɩcalɩ naʋ ɛzɩma Yehowa kaapaɣ ɛyaa caanaʋ taa yɔ pɩ-taa nabʋyʋ.

ALƖWAATƲ NDƖ NDƖ NDƲ TƖ-TAA ƐSƆ KAAPAƔ ƐYAA YƆ

Bibl alɩwaatʋ taa, Yehowa kaapaɣ ɛyaa nɛ eheyi-wɛ “helim” ndɩ ndɩ tɔm, yaa nɩŋgbaŋʋʋ hɔm mbʋ ɛɖʋwa se ɛkɔŋnɩ mba pamaɣnɩ ɛ-paɣtʋ yɔɔ faɖaɖa yɔ pɩ-tɔm. (Adu. 10:25; Yer. 30:23) Paa hɔɔlʋʋ ŋgʋ kɩ-taa lɛ, ɛpakaɣ kaañamtʋ tɩnaa nɛ ɛhaɣ-wɛ alɩwaatʋ sakɩyɛ se pɛlɛɣzɩ, nɛ eheyiɣ-wɛ mbʋ pɩwɛɛ se pala nɛ pañamɩ-ɩ yɔ. (2 Aw. 17:12-15; Neh. 9:29, 30) Pɩsa nɛ ɛsɩnɩ ɛyaa nɛ pɔsɔɔlɩ se pala lɛɣzɩtʋ ndʋ pɩpɔzʋʋ yɔ lɛ, ɛtɩŋaɣnɩ ɛ-sɛyaa siɣsiɣ ñɩma mba pɛwɛ tɛtʋ yɔɔ yɔ, pɔ-yɔɔ nɛ ɛsɩɣnɩ ɛyaa se panɩɩ pɩ-taa se pɩpɔzaa se pala lɛɣzɩtʋ kpɛdɛyɛ.—Am. 3:7.

Mba pɔ-yɔɔ Ɛsɔ kaatɩŋnaa nɛ esusi nɩŋgbaŋʋʋ hɔm tɔm yɔ, pa-taa lɛlʋ lɛ Noowa. Ɛlabɩ abalɩtʋ nɛ ɛpaɣ ɛ-alɩwaatʋ taa ñɩma mba pacakaɣ wezuu kɩdɛkɛdʋʋ nɛ palakɩ ñam ñam lakasɩ yɔ pɩnzɩ sakɩyɛ, nɛ eheyi-wɛ tɛʋ sɔsɔʋ ŋgʋ kɩwɛnɩ ɛsɩndaa yɔ, kɩ-tɔm. (Kiɖe 6:9-13, 17) Eheyi-wɛ ɖɔɖɔ mbʋ pɩwɛɛ se pala nɛ pehiɣ ñʋʋ yabʋ tɛʋ sɔsɔʋ alɩwaatʋ taa yɔ. Noowa kaasusi tɔm siŋŋ nɛ pʋyɔɔ paya-ɩ pʋwayɩ se “siɣsiɣ wɛtʋ tɔm susuyu.”—2 Pɩy. 2:5.

Paa Noowa kaañaɣ pana siŋŋ yɔ, ɛ-alɩwaatʋ taa ñɩma taakpaɣ tɔm ndʋ Ɛsɔ tiyi-i se esusi yɔ nɛ palabɩnɩ tʋmɩyɛ. Pawɩlaa se pɛfɛyɩnɩ tisuu paa ññɩɩ. Piyeba nɛ pelesi pe-weziŋ alɩwaatʋ ndʋ Tɛʋ Sɔsɔʋ “kɔm nɛ kɩkpaɣ pa-tɩŋa yɔ.” (Mat. 24:39; Ebr. 11:7) Alɩwaatʋ ndʋ pa-ɖɩzʋʋ wɛɛ nɛ pɩñɔtʋʋ yɔ, pataapɩzɩɣ se pɔyɔɔdɩ kpa se Ɛsɔ taapaɣ-wɛ.

Alɩwaatʋ lɛɛtʋ taa lɛ, Yehowa paɣ ɛyaa nɛ pitileɖi pʋcɔ nɛ ɛ-nɩŋgbaŋʋʋ hɔm “helim” paɣzɩ mabʋ. Paa mbʋ yɔ, mba pɩwɛɛ se ɛhɔ pa-nɩŋgbaŋʋʋ ye patiwelisi yɔ, ɛha-wɛ alɩwaatʋ se pɛlɛɣzɩ. Alɩwaatʋ ndʋ ɛkɔŋnaɣ Kɩjɩkpɩŋ Hiu caanaʋ taa Ejipiti mba yɔɔ yɔ, ɛpakaɣ-wɛ nɛ pʋcɔ. Kɩɖaʋ nakʋyʋ yɔ. Yehowa tiyi Moyizi nɛ Aarɔɔnɩ se papaɣ Farawɔɔ nɛ ɛ-lɩmɖʋyaa nɛ peheyi-wɛ kɩjɩkpʋʋ lʋbɛ ñɩŋgʋ tɔm. Ŋgʋ lɛ ɖɔmbɛɛ wena awɛɛkɩɣ wondu sakɩyɛ yɔ. Ðɔmbɛɛ kaɣ paɣzʋʋ tɔlʋʋ tɛʋ kifemuu, pʋyɔɔ lɛ, ɛzɩ Ɛsɔ ha-wɛ alɩwaatʋ se pañɩnɩ ɖɩmɛlɩyɛ pʋcɔ nɛ ɖɔmbɛɛ paɣzɩ tɔlʋʋ na? Bibl yɔɔdaa se: “Farawɔɔ tɛ lɩmɖʋyaa taa weyi ɛñaŋ [Yehowa] tɔm yɔ, ɛtalɩ ɛ-lɩmɖʋyaa nɛ ɛ-kpɩna nɛ ɛsʋnɩ ɖɩsɩ; ɛlɛ weyi eniŋ [Yehowa] tɔm yɔ, etiyi ɛ-lɩmɖʋyaa nɛ ɛ-kpɩna hayɩm taa.” (Ejl. 9:18-21) Pɩwɩlɩɣ kpayɩ kpayɩ se Yehowa paɣ-wɛ ɛzɩ pɩpɔzʋʋ yɔ, nɛ piyeba nɛ mba petisaa nɛ pɔɖɔ tɔm ndʋ tɩ-yɔɔ lɛɛ lɛɛ yɔ, pehiɣ ñʋʋ yabʋ.

Mbʋ ɖɔɖɔ papaɣ Farawɔɔ nɛ ɛ-lɩmɖʋyaa pʋcɔ nɛ kɩjɩkpʋʋ hiu ñɩŋgʋ paɣzɩ. Paa mbʋ yɔ, palabɩ kɩmɛlɛndʋ nɛ pekizi paɣʋ mbʋ. (Ejl. 4:22, 23) Piyeba nɛ pa-kajalaɣ piya nzɩ sɩkɛ abalɩbiya yɔ sɩsɩ. Pɩɩlabɩ pʋtɔdɩyɛ siŋŋ! (Ejl. 11:4-10; 12:29) Ɛzɩ papɩzaɣ se pɛfɛɛ kaɖɛ nɖɩ yaa we? Ɛɛɛ! Moyizi paɣ Izrayɛɛlɩ piya lɛɛ lɛɛ nɛ eheyi-wɛ kɩjɩkpʋʋ hiu ñɩŋgʋ ŋgʋ kiɖiɣni kɔm yɔ kɩ-tɔm nɛ eheyi-wɛ ɖɔɖɔ mbʋ pɩwɛɛ se pala nɛ paya pɔ-hɔŋ ñʋʋ yɔ. (Ejl. 12:21-28) Ɛyaa ɛzɩma ɖɔm tɔm ndʋ Moyizi heyi-wɛ yɔ tɩ-yɔɔ? Akɔntanaa nabɛyɛ wɩlaa se, Izrayɛɛlɩ piya nɛ samaɣ sɔsɔɔ ŋga katɩkɛ Izrayɛɛlɩ piya yɔ nɛ Ejipiti ñɩma mba pɛfɛ Ɛsɔ nɩŋgbaŋʋʋ hɔm nɛ palɩɩ Ejipiti tɛtʋ taa yɔ, pɛkpɛndɩ ɛzɩ ɛyaa ɛzɩ miiliyɔɔwaa naadozo.—Ejl. 12:38.

Ɛzɩ kɩɖaŋ ɛnɩ ɩwɩlʋʋ yɔ, paa ɛzɩmtaa Yehowa pakɩ samaɣ nakɛyɛ lɛ, ɛhaɣ-kɛ alɩwaatʋ ndʋ pɩpɔzʋʋ yɔ se pɩsa nɛ kɛlɛɣzɩ. (Wp. 32:4) Ɛbɛ seɣtaɣ Ɛsɔ nɛ ɛlakɩ mbʋ? Apostoloo Pɩyɛɛrɩ lɩzɩ pɩ-taa se Yehowa tɩsɔɔlɩ se “paɖɩzɩ nɔɔyʋ, ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.” (2 Pɩy. 3:9) Ɛɛɛ, Ɛsɔ cɔnɩ samaɣ yɔɔ. Ɛɛsɔɔlaa se pekpiɖi pa-kɩwɛɛkɩm yɔɔ nɛ pɔɖɔ ɛ-lɔŋ tasʋʋ yɔɔ pʋcɔ nɛ ɛ-nɩŋgbaŋʋʋ hɔm talɩ.—Iza. 48:17, 18; Roma 2:4.

ƐZƖMA ƐYAA LAKƖ SƆNƆ ALƖWAATƲ NDƲ ƐSƆ PAKƖ-WƐ YƆ

Sɔnɔ ɖɔɖɔ, pɛwɛɛ nɛ papakɩ ɛyaa tɛtʋ kpeekpe yɔɔ se pala nabʋyʋ kpɛdɛyɛ, nɛ pɩwɛɛ se ɛyaa kpeekpe ɩña paɣʋ mbʋ. Yesu kaawɛ tɛtʋ yɔɔ lɛ, ɛpaɣ ɛyaa nɛ eheyi-wɛ se pakaɣ ɖɩzʋʋ ɛjaɖɛ ɖɩnɛ ɖɩ-yɔɔ ɖʋtʋ “kʋñɔŋ sɔsɔʋ” alɩwaatʋ taa. (Mat. 24:21) Ɛyɔɔdaɣ nɩŋgbaŋʋʋ hɔm mbʋ pɩwɛnɩ ɛsɩndaa yɔ pɩ-tɔm lɛ, ɛyɔɔdɩ natʋ natʋyʋ tɔm, ndʋ tɩ-taa ɛwɩlɩ kpayɩ kpayɩ mbʋ ɛ-wayɩ tɩŋɩyaa pɩzɩɣ nɛ pana, nɛ mbʋ pɩ-taa papɩzɩɣ nɛ patɩŋna alɩwaatʋ ndʋ nɩŋgbaŋʋʋ hɔm mbʋ pɩwɛɣ nɛ pɩñɔtʋʋ yɔ. Yesu kaañɩɣ niye wɛtʋ sɔsɔtʋ ndʋ tɩkaɣ labʋ ɛjaɖɛ kpeekpe yɔɔ, nɛ tɩwɛɛ nɛ tɩlakɩ ɖa-alɩwaatʋ taa yɔ tɩ-yɔɔ.—Mat. 24:3-12; Luka 21:10-13.

Ɛzɩ natʋ ndʋ tɩyɔɔdʋʋ yɔ, Yehowa wɛɛ nɛ eseɣtiɣ paa weyi lɛɛlɛɛyɔ se ɛlɩzɩ se ɛsɛɣ-ɩ nɛ ɛñamɩ-ɩ. Ɛsɔɔlaa se ɛyaa mba pañaŋ yɔ, panɩɩ wezuu leleŋ kpaɣnɩ lɛɛlɛɛyɔ nɛ pehiɣ cee wayɩ wazasɩ nzɩ sɩkaɣ wɛʋ ɛjaɖɛ kɩfaɖɛ nɖɩ ɖɩ-taa nɛ e-siɣsiɣ wɛtʋ yɔ. (2 Pɩy. 3:13) Yehowa sɔɔlaa se ɛsɩnɩ ɛyaa nɛ pɛwɛɛnɩ tisuu ɛ-tamasɩ yɔɔ. Ɛsɩɣnɩ-wɛ nɛ eheyiɣ-wɛ tɔm ndʋ tɩkaɣ yabʋ pa-ñʋʋ yɔ. Tɔm ndʋ lɛ “Kewiyaɣ tɔm kɩbandʋ” ndʋ Yesu kaayɔɔdaa se “pakaɣ-tʋ susuu tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe” yɔ. (Mat. 24:14) Ɛsɔ ñɔɔzɩ ɛ-sɛyaa toovenim ñɩma se palɩzɩ “aseɣɖe” yaa posusi Ɛsɔtɔm ndʋ, ajɛɛ ɛzɩ 240 taa mbʋ yɔ. Yehowa sɔɔlaa se ɛyaa sakɩyɛ iwelisi tɔm ndʋ ɛpakɩ-wɛ yɔ nɛ pɩsa nɛ e-siɣsiɣ nɩŋgbaŋʋʋ hɔm “helim” kaamakɩ lɛ, pehiɣ ñʋʋ yabʋ.—Sof. 1:14, 15; 2:2, 3.

Pɩtɩkɩlɩ cɛyʋʋ se ɖɩpɔzɩ ɖa-tɩ se, ɛzɩ Yehowa haɣ ɛyaa alɩwaatʋ ndʋ pɩpɔzʋʋ yɔ se pɩsa nɛ pewelisi tɔm ndʋ ɛpakɩ-wɛ yɔ? Pɩnaɣ kpayɩ kpayɩ se ɛlakɩ mbʋ paa ɛzɩmtaa. Ɛlɛ tɔm tʋnɛ pɩwɛɛ se ɖɩpɔzɩ ɖa-tɩ: Ɛzɩ ɛyaa kaɣ welisuu tɔm ndʋ Ɛsɔ pakɩ-wɛ yɔ pʋcɔ nɛ alɩwaatʋ ndʋ ɛɖʋwa yɔ tɩtɛ na? Tɛtɛ nɛ ɖa mba ɖɩkɛ Ɛsɔtɔm susuyaa yɔ ɖiwolo pɩ-yɔɔ nɛ ɖɩsɩnɩ ɛyaa sakɩyɛ nɛ pehiɣ ñʋʋ yabʋ alɩwaatʋ ndʋ ɛjaɖɛ ɖɩnɛ ɖɩ-yɔɔ ɖʋtʋ sɩɣ tɩnaɣ yɔ.