Akɛ Ɛsɔ Kewiyaɣ Wiyaʋ?

• Ɛsɔ lɩzɩnɩ-ɩ. “Maɖʋnɩ mi-wiyaʋ . . . mɛncɛlɩ-ŋ ajɛɛ nɛ moluzi poliŋ taa ajɛɛ ñɛ-tɛɛ.”—Keɣa 2:6, 8.

• Ɛtɔkɩ Kewiyitu Wiyaʋ Daviid lone taa. “Palʋlɩ-ɖʋ pɩɣa ɛjam, paha-ɖʋ pɩyalʋ . . . E-Kewiyaɣ kaɣ kɛʋ sɔsɔɔ, nɛ laŋhɛzɩyɛ ɛɛkaɣ tɛm Daviid Kewiyaɣ kpelaɣ yɔɔ nɛ e-kewiyaɣ taa, nɛ kaka camɩyɛ.”—Izaayii 9:5, 6.

• Palʋlɩ-ɩ Bɛtɩlɛhɛm. “Bɛtɩlɛhɛm . . . ña-taa ɛkaɣ-m lʋlʋʋ weyi ɛɛkɛ Izrayɛɛlɩ taa ñazɩyʋ yɔ . . . ɛkaɣ kɛʋ sɔsɔ nɛ piwolo pɩtalɩ tɛtʋ kamaɣ yɔɔ.”—Mikee 5:1, 3.

• Ɛyaa lɔʋ-ɩ nɛ pakʋ-ɩ. “Ðinimi-i, ɖɩtaayaa-ɩ se pʋyʋ . . . ɖa-kɩwɛɛkɩm yɔɔ ɛ-yɔɔ kpɛzaa, pɔtɔyɩtɩ-ɩ ɖɔ-kʋzɔɔtʋ lakasɩ yɔɔ.”—Izaayii 53:3, 5.

• Pefezi-i nɛ sɩɖaa taa nɛ paɖʋ-ɩ hɩɖɛ. “Ŋŋyeki-m [pɩlaʋ taa], ŋŋtisiɣ se ñɛ-ɛgbaɣdʋ ɛɖazɩ! . . . ña-nɩwaŋ tɛɛ, leleŋ maatɛŋ wɛna.”—Keɣa 15:10, 11.

Yesu Krɩstʋ mʋnɩna se ɛkɛ Wiyaʋ

Kpaɣnɩ ɖooo caanaʋ taa nɛ sɔnɔ, ɛyʋ kʋɖʋm weyi ɛmʋnaa se ɛkɛ Ðiyiyu nɛ ɛ-wɛtʋ labɩ nɔɔ kʋɖʋmaɣ nɛ tɔm ndʋ Bibl mayaa yɔɔdaa yɔ, ɛnʋ lɛ Yesu Krɩstʋ. Tiyiyu nɔɔyʋ kaaheyi Yesu ɖoo Maarɩɩ se: “Ɛsɔ kaɣ-kɛ cɛlʋʋ ka-caa Daviid kewiyaɣ kpelaɣ, . . . nɛ ke-Kewiyaɣ ɛɛkaɣ sɩʋ tɩnaɣ.”—Luka 1:31-33.

Yesu tɩpɩsɩ Wiyaʋ tɛtʋ yɔɔ wiɖiyi kaaʋ. Ɛlɛ ɛkɛɣ Wiyaʋ Ɛsɔ Kewiyaɣ taa ɛsɔdaa nɛ ɛtɔɔ Kewiyitu kedeŋa kpeekpe yɔɔ. Ɛbɛ yɔɔ ɛkɛnɩ Wiyaʋ weyi ɛmʋnaa yɔ? Iyele nɛ ɖɩna mbʋ Yesu kaalaba alɩwaatʋ ndʋ ɛɛwɛ tɛtʋ yɔɔ yɔ.

• Yesu maɣzaɣ ɛyaa yɔɔ. Yesu kaasɩnɩ abalaa nɛ halaa, piya nɛ sɔsaa, ɛtaaɖʋʋ tʋkaɣ ɛyaa taa. (Maatiyee 9:36; Maarkɩ 10:16) Alɩwaatʋ ndʋ canaɣ nakɛyɛ tendi Yesu se: “Ye ŋsɔɔlaa yɔ, ŋpɩzɩɣ ŋla nɛ mɔ-yɔɔ cɛ” yɔ, kɔ-tɔm labɩ-ɩ pʋtɔdɩyɛ nɛ ɛwaa-kɛ.—Maarkɩ 1:40-42.

• Yesu wɩlɩ-ɖʋ mbʋ ɖɩla nɛ ɖɔ-tɔm kɛdɩnɩ Ɛsɔ yɔ. Ɛyɔɔdaa se: “Ɩɩpɩzɩɣ nɛ ɩkɛ Ɛsɔ yomaa nɛ ɩtɛ ɩkɛ Ñɩm yomaa.” Ɛtasɩ yɔɔdʋʋ ɖɔɖɔ se ɖɩla ɛyaa mbʋ ɖɩsɔɔlaa se palabɩ-ɖʋ yɔ. Nɛ paɣtʋ kiɖe nɖɩ, ɖɩkɔm nɛ ɖɩpɩsɩ paɣtʋ ndʋ payaɣ se sika paɣtʋ yɔ. Pɩtasɩ lɛ, ɛwɩlɩ-ɖʋ ɖɔɖɔ se mbʋ ɖɩlakɩ, ndʋ ɖɩmaɣzɩɣ nɛ ɛzɩma pɩlakɩ-ɖʋ yɔ, Ɛsɔ naɣ pɩtɩŋa. Ye mbʋ, ye ɖɩsɔɔlaa se ɖɔ-tɔm ɛkɛdɩnɩ Ɛsɔ yɔ, pɩwɛɛ se ɖɩkpa ɖa-tɩ nɛ ndʋ ɖɩmaɣzɩɣ ɖooo ɖa-laŋɩyɛ taa yɔ. (Maatiyee 5:28; 6:24; 7:12) Pɩtasɩ ɖɔɖɔ lɛ, Yesu yɔɔdaa se ye ɖɩsɔɔlaa se ɖihiɣ koboyaɣ siŋŋ yɔ, pɩwɛɛ se ɖɩkpɛlɩkɩ nɛ ɖɩtɩlɩ Ɛsɔ sɔɔlɩm nɛ ɖɩñaɣ pana nɛ ɖɩlabɩ-pʋ.—Luka 11:28.

• Yesu wɩlɩ-ɖʋ se ɖɩsɔɔlɩ lalaa. Yesu yɔɔdaɣ nɛ ɛ-lakasɩ kaatukuni ɛyaa mba pewelisaɣni-i yɔ pa-laŋa siŋŋ. “Pɩɖɩɣzɩ ɛyaa samaɣ pɩŋŋ nɛ ɛzɩma ɛwɩlɩ tɔm yɔ, mbʋ pʋyɔɔ yɔ, ɛwɩlaɣ-wɛ tɔm ɛzɩ ɛyʋ weyi ɛwɛnɩ ɖoŋ yɔ.” (Maatiyee 7:28, 29) Ɛwɩlɩ-wɛ se: “Ɩsɔɔlɩ mi-koyindinaa.” Halɩ, ɛtɩmɩ mba paɖʋ nesi nɛ pakʋyɩ-ɩ yɔ pa-taa nabɛyɛ yɔɔ. Ɛtɩmaa se: “Caa, kpeɣ-wɛ, mbʋ pʋyɔɔ yɔ paasɩŋ mbʋ peɖiɣni labʋ yɔ.”—Maatiyee 5:44; Luka 23:34.

Yesu mʋnɩnɩ ɖeyi ɖeyi se ɛtɔɔ Kewiyitu kedeŋa kpeekpe yɔɔ mbʋ pʋyɔɔ yɔ, ɛpɩzɩɣ ɛsɩnɩ ɛyaa nɛ ɛlabɩ-wɛ camɩyɛ lakasɩ. Ɛlɛ, ɛzɩmtaa ɛpaɣzɩ Kewiyitu tɔɔʋ?