Kɛ tʋmlaɖʋ weyi ɛɖɛɣnɩ ɛzɩdaa yɔ
1. Kajalaɣ pɩnzɩ mɩnʋʋ taa kɩɖaŋ weyi wɩlɩɣ se pɩcɛyaa se ɖɩkɛnɩ tɔm susuyaa mba pɛɖɛɣnɩ ɛzɩdaa tam yɔ?
1 Pɩwɛɛ se Krɩstʋ mba ɩkɛnɩ tɔm susuyaa mba pɛɖɛɣnɩ ɛzɩdaa tam yɔ. Pʋyɔɔ Yesu kaafalɩsaɣ ɛ-wayɩ tɩŋɩyaa pazɩ pazɩ se pakpasɩ tɔm susuu tʋmɩyɛ taa. (Luka 9:1-5; 10:1-11) Lɩmaɣzɩyɛ kʋɖʋmɖɩyɛ nɖɩ ɖɩ-yɔɔ ɖɔɖɔ Akiila nɛ Prisiila paamʋ Apoloosi nɛ “patasɩ-ɩ wɩlʋʋ Ɛsɔ nʋmɔʋ . . . tɔm camɩyɛ ɖeyi ɖeyi.” (Tʋma 18:24-26) Pʋyɔɔ ɖɔɖɔ Pɔɔlɩ kaatasɩ lɔŋ Timootee weyi ɛɛkpasɩ tɔm susuu taa siŋŋ yɔ se ewolo pɩ-yɔɔ nɛ ɛka ñʋʋ nɛ ɛ-tɔm wɩlʋʋ nɛ ’pe-kpeekpe pana se ewokini ɛzɩdaa.’ (1 Tim. 4:13-15) Paa pɩnzɩ ɛzɩma ɖɩɩwɛ Kɩbaɣlʋ tʋmɩyɛ taa nɛ ɖisusuu laŋhɛzɩyɛ tɔm yɔ, pɩcɛyaa se ɖiwolo pɩ-yɔɔ nɛ ɖɩfalɩsɩɣ ɖa-tɩ nɛ ɖɩɖaɣnɩ kpasʋʋ tʋmɩyɛ nɖɩ ɖɩ-taa nɛ pɩkpaɖɩ.
2. Ɛzɩma ɖɩpɩzɩɣ nɛ ɖɩkpɛlɩkɩ lɛɣtʋ lalaa cɔlɔ?
2 Kpɛlɩkɩ lɛɣtʋ lalaa cɔlɔ: Ɛzɩ kajalaɣ pɩnzɩ mɩnʋʋ taa yɔ, nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩkpasɩ camɩyɛ tɔm susuu tʋmɩyɛ taa yɔ lɛ se ɖɩkpɛlɩkɩ lɛɣtʋ ɖa nɛ mba ɖɩlakɩ-ɖɩ yɔ, pɔ-cɔlɔ. (Adu. 27:17) Pʋyɔɔ lɛ, alɩwaatʋ ndʋ ña nɛ weyi eɖiɣni tɔm susuu yɔ, ɛɛyɔɔdʋʋ tɔm lɛ, cɔnɩ-ɩ camɩyɛ nɛ ŋkpɛlɩkɩ lɛɣtʋ ɛ-cɔlɔ. Pɔzɩ mba pakpasɩ tɔm susuu tʋmɩyɛ taa camɩyɛ yɔ se patasɩ-ŋ lɔŋ hɔɔlɩŋ weyi ɩ-taa pɩpɔzʋʋ se ŋɖɛɛnɩ ɛzɩdaa yɔ, nɛ paayɔɔdʋʋ lɛ, ŋwelisini-wɛ camɩyɛ. (Adu. 1:5) Pɩwɛ-ŋ kaɖɛ se ŋlakɩ pɩsɩ nɛ ŋna-ɩ, ŋpaɣzɩ Bibl kpɛlɩkʋʋ nɛ nɔɔyʋ yaa ŋlabɩnɩ tʋmɩyɛ tɔm susuu nʋmɔʋ nakʋyʋ? Pɔzɩ sɩnʋʋ weyi ɛcɔŋnɩ mɩ-tɔm susuu kooka yɔɔ yɔ, yaa tɔm susuyu weyi ɛkpasɩ tɔm susuu taa camɩyɛ yɔ. Taasɔɔ ɖɔɖɔ se Yehowa fezuu kiɖeɖeu pɩzɩɣ nɛ kɩsɩnɩ-ɖʋ nɛ ɖɩkpasɩ tʋmɩyɛ ɖɩnɛ ɖɩ-labʋ taa; pʋyɔɔ lɛ, tɩmɩɣnɩ-ɩ ɖoŋ ɖoŋ se ɛha-ŋ kʋ.—Luka 11:13.
3. Paa ɖɩtaapɔzɩ nɔɔyʋ lɔŋ tasʋʋ, ɛlɛ ɛ-maɣmaɣ ɛtasɩ-ɖʋ pʋ yɔ, ɛzɩma pɩwɛɛ se ɖɩla?
3 Paa ŋtaapɔzɩ nɔɔyʋ lɔŋ tasʋʋ, ɛlɛ ɛ-maɣmaɣ ɛtasɩ-ŋ pʋ se pɩsɩnɩ-ŋ nɛ ŋɖɛɛnɩ ɛzɩdaa tɔm susuu tʋmɩyɛ taa yɔ, taamʋ pana. (Ekl. 7:9) Ɛzɩ Apoloosi kaalabʋ yɔ, wɛnɩ tɩ luzuu nɛ ŋyele nɛ pasɩnɩ-ŋ nɛ ŋnɩɩ leleŋ lɔŋ weyi patasɩ-ŋ yɔ, ɩ-yɔɔ. Ye ŋlakɩ mbʋ yɔ, pɩwɩlɩɣ se ŋkɛ lɔŋsɩnɖʋ siŋŋ.—Adu. 12:15.
4. Tɔm ndʋ Yesu yɔɔdaa yɔ, tɩwɩlɩɣ se ɛbɛ yɔɔ pɩcɛyɩ siŋŋ se ɖɩkɛnɩ tɔm susuyaa mba pɛɖɛɣnɩ ɛzɩdaa camɩyɛ yɔ?
4 Ye ɖɩɖɛɣnɩ ɛzɩdaa yɔ, pɩɖʋ Ɛsɔ hɩɖɛ: Yesu tɩŋnɩ kɩɖaʋ nakʋyʋ yɔɔ nɛ eseɣti ɛ-wayɩ tɩŋɩyaa se pɛɖɛɛnɩ ɛzɩdaa nɛ pɛkɛnɩ ɛ-tʋmlaɖaa kɩbama. Ɛkpaɣ ɛ-tɩ nɛ ɛmaɣzɩnɩ viiñi tɩʋ nɛ ɛkpaɣ ɛ-wayɩ tɩŋɩyaa mba pata-wɛ num yɔ nɛ ɛmaɣzɩnɩ ki-pilinzi. Ɛyɔɔdaa se ɛ-Caa kpalɩɣ piliŋa ŋga kalʋlʋʋ pee camɩyɛ yɔ “piyele nɛ kalʋlɩ sakɩyɛ.” (Yoh. 15:2) Ɛzɩ viiñi tɩŋ haɖʋ ñɔɔzʋʋ tɩŋ ɛnɩ i-pilinzi se sɩpɩzɩ sɩlʋlɩ camɩyɛ yɔ, mbʋ ɖɔɖɔ Yehowa sɔɔlaa se ɖiwolo pɩ-yɔɔ nɛ ɖɩkpasɩ nɛ ɖɩɖɛɣnɩ ɛzɩdaa nɛ “ɖɩsaŋ ɛ-hɩɖɛ nɛ ɖo-ndomee” camɩyɛ. (Ebr. 13:15) Ye ɖɩkɛnɩ tɔm susuyaa mba pɛɖɛɣnɩ ɛzɩdaa camɩyɛ yɔ, ɛbɛ pɩlʋlʋʋ? Yesu cosi tɔm tʋnɛ tɩ-yɔɔ se: “Man-Caa hɩɖɛ sɛʋ kɛlɛ se: Ɩla tʋmɩyɛ kɩbanɖɛ sakɩyɛ.”—Yoh. 15:8.