Ðɩtɩŋnɩ Laŋhɛzɩyɛ Tɔm takayaɣ yɔɔ nɛ ɖɩkpɛlɩkɩnɩ ɛyaa Bibl
1. Ɛzɩma pɔñɔɔzɩ Laŋhɛzɩyɛ Tɔm takayaɣ?
1 Ɛzɩ paatɛm yɔɔdʋʋ juillet tɛ Kewiyaɣ Ɛsɔ Sɛtʋ Tʋmɩyɛ takayaɣ taa yɔ, Laŋhɛzɩyɛ Tɔm takayaɣ kɛnɩ wonuu kɩbaŋʋ ŋgʋ kɩsɩɣnɩ-ɖʋ se ɖɩwɩlɩ tɔm camɩyɛ yɔ. Patɩma Bibl masɩ nzɩ sɩwɛ ka-taa yɔ sɩ-taa tɔm, mbʋ pʋyɔɔ yɔ pañɩnɩɣ se ɖɩɣdʋ taa ɛla leleŋ alɩwaatʋ ndʋ ɛ-maɣmaɣ ɛkalɩɣ-sɩ Bibl taa yɔ. Ða-takayɩsɩ kalɩyaa pɩzɩɣ nɛ pakalɩ ɖa-takayɩsɩ sakɩyɛ pe-ɖeke nɛ panɩɩ sɩ-taa, ɛlɛ pɔñɔɔzɩ hatʋ cabɩ takayaɣ kanɛ se pɩsɩnɩ-ɖʋ nɛ ɖɩkpɛlɩkɩnɩ ɛyaa Bibl. Pʋyɔɔ pɩwɛɛ se alɩwaatʋ ndʋ ɖɩcɛlɩɣ ɖɩɣdʋ takayaɣ ŋga yɔ, ɖɩñaɣ pana nɛ ɖɩwɩlɩ-ɩ ɛzɩma ɖɩkpɛlɩkɩɣnɩ ɛyaa Bibl yɔ. Piyeki nɛ laŋhɛzɩyɛ tɔm ndʋ tɩwɛ Bibl taa yɔ, tɩ-kpɛlɩkʋʋ labɩ-ɩ leleŋ.—Mat. 13:44.
2. Ðɩcalɩɣ ɛyʋ katʋʋ kajalaɣ wiye lɛ, ɛzɩma ɖɩpɩzɩɣ nɛ ɖɩlabɩnɩ tʋmɩyɛ Laŋhɛzɩyɛ Tɔm takayaɣ?
2 Ðɩcalɩɣ ɛyʋ katʋʋ kajalaɣ wiye lɛ: Ŋpɩzɩɣ nɛ ŋyɔɔdɩ se: “Sɔnɔ ɛyaa sakɩyɛ nɩɣzɩɣ cee wayɩ yɔɔ. Ŋmaɣzɩɣ se wiɖiyi ɛjaɖɛ yɔɔ wɛtʋ kaɣ lɛɣzʋʋ na? [Ha-ɩ alɩwaatʋ nɛ ecosi.] Tɔm kɩbandʋ natʋyʋ wɛ Bibl taa nɛ tɩhaɣ-ɖʋ lidaʋ. Cɔnɩ tɔm pɔzʋʋ mbʋ pɩ-yɔɔ Bibl cosuu yɔ, pɩ-taa nabʋyʋ.” Cɛlɩ ɖɩɣdʋ hatʋ cabɩ takayaɣ nɛ ŋpɔzɩ-ɩ se ɛlɩzɩ tɔm pɔzʋʋ mbʋ pɩwɛ kɛdɛzaɣ hɔɔlʋʋ yɔɔ yɔ, pɩ-taa nabʋyʋ. Pʋwayɩ lɛ, tɩŋnɩ hɔɔlʋʋ ŋgʋ ɛlɩzaa yɔ kɩ-kajalaɣ tayʋʋ yɔɔ nɛ ŋwɩlɩ-ɩ ɛzɩma ɖa nɛ ɛyaa ɖɩkpɛlɩkɩɣ Bibl yɔ. Yaa ña-maɣmaɣ ŋpɩzɩɣ nɛ ŋlɩzɩ tɔm ñʋʋ ŋgʋ kɩkɛdɩɣnɩ-ɩ yɔ, nɛ ŋtɩŋnɩ kɩ-yɔɔ nɛ ŋwɩlɩ-ɩ ɛzɩma takayaɣ kanɛ kapɩzɩɣ nɛ kasɩnɩ-ɩ nɛ ɛna ndʋ Bibl cosuu tɔm ndʋ tɩ-yɔɔ yɔ. Ye jw.org yɔɔ video nakʋyʋ ɛyɔɔdʋʋ ñʋʋ ŋgʋ kɩ-tɔm yɔ, tɔm susuyaa nabɛyɛ yeki se pe-Bibl kpɛlɩkɩyaa ɩcɔnɩ-kʋ.
3. Ɛzɩma ɖɩpɩzɩɣ nɛ ɖɩkpɛlɩkɩnɩ ɛyʋ Laŋhɛzɩyɛ Tɔm takayaɣ?
3 Ɛzɩma ɖɩpɩzɩɣ nɛ ɖɩkpɛlɩkɩnɩ ɛyʋ takayaɣ kanɛ yɔ: (1) Kalɩ tɔm pɔzʋʋ mbʋ pipiyaa nɛ pɩkɩlɩ yɔ, nɛ pɩsɩnɩ ɖɩɣdʋ nɛ ɛka ɛ-lɩmaɣza tɔm kɩcɛyɩtʋ yɔɔ. (2) Kalɩ tayʋʋ mbʋ pɩwɛ tɔm pɔzʋʋ mbʋ pɩ-tɛɛ yɔ. (3) Kalɩ mayaɣ ŋga pama kɔ-cɔlɔ se “kalɩ” yɔ, nɛ ŋpɔzɩ ɖɩɣdʋ tɔm nɛ lɛɣtʋ nɛ ŋsɩnɩ-ɩ nɛ ɛna ɛzɩma masɩ nzɩ sicosuu tɔm pɔzʋʋ mbʋ pɩ-yɔɔ yɔ. (4) Ye tayʋʋ nabʋyʋ ɛkazɩ tɔm pɔzʋʋ mbʋ pɩ-tɛɛ yɔ, la ɛzɩ pɔtɔm se pala tayʋʋ pʋnɛ pɩ-hɔɔlɩŋ 2 nɛ 3 taa yɔ. Ye video nakʋyʋ ɛlabɩ nɔɔ kʋɖʋmaɣ nɛ tɔm pɔzʋʋ mbʋ nɛ ɩtatɩɩcɔnɩtɩ-kʋ yɔ, pʋbʋ lɛ, lɩzɩ alɩwaatʋ ndʋ tɩmʋnaa yɔ nɛ ɩcɔnɩ-kʋ. (5) Kɛdɛzaɣ ɖeɖe lɛ, ɖaɣnɩ ɖɩɣdʋ tɔm pɔzʋʋ nɛ ŋna se ɛnɩ kpɛlɩkʋʋ taa camɩyɛ na.
4. Ɛbɛ kaɣ-ɖʋ sɩnʋʋ nɛ ɖɩwɛɛ niye nɛ ɖɩlabɩnɩ wonuu kɩbaŋʋ kʋnɛ tʋmɩyɛ camɩyɛ?
4 Yele nɛ takayaɣ kanɛ ka-taa tɔm malɩnɩ-ŋ. Labɩnɩ-kɛ tʋmɩyɛ alɩwaatʋ ndʋ pɩmʋnaa yɔ. Pʋcɔ nɛ ŋwolo paa Bibl kpɛlɩkɩyʋ weyi ɛ-cɔlɔ lɛ, maɣzɩ ɛ-yɔɔ nɛ ŋna ɛzɩma ŋpɩzɩɣ nɛ ŋtɩŋnɩ masɩ yɔɔ nɛ ŋsɩnɩ-ɩ nɛ ɛnɩɩ tɔm taa camɩyɛ yɔ. (Adu. 15:28; Tʋma 17:2, 3) Ye ŋlabɩnɩ tʋmɩyɛ hatʋ cabɩ takayaɣ kanɛ nɛ pɩmalɩnɩ-ŋ yɔ, ŋkaɣ naʋ se kɛkɛnɩ wonuu kɩbaŋʋ ŋgʋ ŋpɩzɩɣ ŋkpaɣ nɛ ŋwɩlɩnɩ ɛyaa toovenim tɔm yɔ.