Tɔm ndʋ Bibl wɩlɩɣ? takayaɣ: Ɛzɩma pɩwɛɛ se ɖɩlabɩnɩ-kɛ tʋmɩyɛ?

Tɔm ndʋ Bibl wɩlɩɣ? nɛ Tɔm Ndʋ Bibl Wɩlɩɣ Toovenim Taa? takayɩsɩ nɩɣzɩnɩ ɖama kpem. Ðɩpɩzɩɣ nɛ ɖɩyɔɔdɩ kɛlɛʋ yem se tɔm kʋɖʋmtʋ wɛnɩ sɩ-taa. Ɛlɛ tɔm pee wena palabɩnɩ tʋmɩyɛ Tɔm ndʋ Bibl wɩlɩɣ? takayaɣ taa nɛ ɛzɩma pɔcɔlɩ ka-taa tɔm yɔ, piyeba nɛ ka-taa nɩʋ wɛɛ kɛlɛʋ nɛ pɩkpaɖɩ. Kapɩzɩɣ nɛ kasɩnɩ mba pɩwɛ-wɛ kaɖɛ se panɩɩ Tɔm Ndʋ Bibl Wɩlɩɣ Toovenim Taa? takayaɣ taa camɩyɛ yɔ. Tɔm kɩsɔzɩtʋ fɛyɩ ka-taa, ɛlɛ pɔsɔzɩ Tɩnaɣ yɔɔ tɔm natʋyʋ nɛ palɩzɩ tɔm ndʋ tɩwɛ ka-taa nɛ tɩ-taa nɩʋ pɩzɩɣ nɛ pɩla kaɖɛ Bibl kpɛlɩkɩyʋ yɔ tɩ-taa. Tɔm pɔzʋʋ nabʋyʋ fɛyɩ ñʋŋ ɖɩbazɩyɛ nɛ tɔm taa cuuzuu aɖakasɩ fɛyɩ ɖɔɖɔ ka-taa. Ɛlɛ paa tɔm ñʋʋ ŋgʋ kɩ-ɖɩdɛnɖɛ lɛ, paɖaɣnɩ kɩ-lɩmaɣza sɔsɔna yɔɔ pɩsʋʋ. Takayaɣ ŋga, ɖɩpɩzɩɣ nɛ ɖɩha-kɛ paa ɛzɩmtaa tɔm susuu taa. Ɛzɩma ɖɩpɩzɩɣ ɖɩlabɩnɩ tʋmɩyɛ Lɩmaɣza sɔsɔna nɛ Tɩnaɣ yɔɔ tɔm?

LƖMAƔZA SƆSƆNA: Ða nɛ ɛyaa sakɩyɛ ɖɩɩkpɛlɩkɩɣ Bibl lɛ, ɖɩkalɩɣ tayʋʋ nɛ ɖɩpɔzʋʋ tɔm se pɩsɩnɩ-ɖʋ nɛ ɖɩkpɛlɩkɩnɩ-wɛ nɛ pɩlʋlʋʋ pee kɩbana. Ɛlɛ kpaɣ se kʋnʋŋ ŋgʋ ɩlakɩnɩ tʋmɩyɛ yɔ, Bibl kpɛlɩkɩyʋ ɛɛnɩɣ-kʋ camɩyɛ yaa ɛɛsɩŋ kɩ-kalʋʋ camɩyɛ. Ye mbʋ yɔ, ŋpɩzɩɣ nɛ ŋlabɩnɩ tʋmɩyɛ Tɔm ndʋ Bibl wɩlɩɣ? taa Lɩmaɣza sɔsɔna nɛ ŋkpɛlɩkɩnɩ-ɩ nɛ ŋseɣti-i se ɛñaɣ pana nɛ ɛ-maɣmaɣ ɛkalɩ tɔm ñʋŋ ɛ-tɩ yɔɔ. Ŋpɩzɩɣ nɛ ŋkpaɣ ɛzɩ cɛcɛsɩ 15 mbʋ yɔ nɛ ŋkpɛlɩkɩnɩ-ɩ paa Toovenim tɔm ndʋ. Lɩmaɣza wena awɛ tɔm ñʋʋ maɣmaɣ taa yɔ, patɩɖʋ a-tɩŋa Lɩmaɣza sɔsɔna hɔɔlʋʋ taa; pʋyɔɔ lɛ pɩcɛyɩ kpem se tɔm susuyu ɛmaɣzɩ kpɛlɩkɩyʋ kɩcɛyɩm yɔɔ nɛ ɛñɔɔzɩ ɛ-tɩ camɩyɛ. Ɛlɛ ye tɔm susuyu ɛtɩŋɩɣnɩ tɔm ñʋŋ maɣmaɣ yɔɔ nɛ ɛkpɛlɩkɩɣnɩ nɔɔyʋ yɔ, papɩzɩɣ patɩŋnɩ Lɩmaɣza sɔsɔna yɔɔ nɛ pocuuzi tɔm taa.

TƖNAƔ YƆƆ TƆM: Paa tɩnaɣ yɔɔ tɔm ndʋ lɛ, tɩlabɩ nɔɔ kʋɖʋmaɣ nɛ takayaɣ taa tɔm ñʋʋ nakʋyʋ. Tɔm susuyu naɣna se pɩcɛyaa yaa pɩtɩcɛyɩ se ɛ nɛ Bibl kpɛlɩkɩyʋ patazɩ Tɔm ndʋ Bibl wɩlɩɣ? takayaɣ taa tɩnaɣ yɔɔ tɔm natʋyʋ taa.