Ɛsɔ wazɩɣ mba pasɩɣnɩ ɛyaa mba pɛwɛ kɩcɛyɩm taa yɔ

Ɛjaɖɛ kpeekpe yɔɔ, ɛyaa sakɩyɛ wɛ tɔɔnaɣ tanɩm taa nɛ pañɩnɩɣ ɖɩzʋyɛ. Nabɛyɛ lɛ, pɔsɔɔlaa se pɛwɛnɩ cee wayɩ lidaʋ nakʋyʋ. Ɛsɔ sɔɔlaa se ɖɩsɩnɩ pɩ-tɛ ɛyaa mba, nɛ ye ɖɩsɩnɩ-wɛ yɔ Ɛsɔ wazɩɣ-ɖʋ.

SUWE MASƖ KIÐEÐESI YƆƆDƲƲ?

“Weyi ɛnaɣ kʋñɔndʋ pʋtɔdɩyɛ yɔ, ɛkɩndɩɣ Yehowa na, weyi ɛkaɣ-ɩ pɩsɩnʋʋ pi-ɖeɖe yɔ.”—ADUWA 19:17.

YE PƆTƆMA PASƖNƖ MBA PƐWƐ KƖCƐYƖM TAA YƆ PƖ-TƆBƲƲ LƐ SUWE?

Yesu tuu eduuye naɖɩyɛ, nɛ ɖɩ-taa lɛ ɛɛyɔɔdɩ abalʋ nɔɔyʋ tɔm. Abalʋ ɛnʋ mɩlaa mabɩ-ɩ sɩm yɔɔ sɩm yɔɔ nɛ pɩkazɩ-ɩ fezuu ɖaɣlaa nɛ pɔlɔ-ɩ. (Luka 10:29-37) Nɛ ɛgɔm nɔɔyʋ na abalʋ ɛnʋ ɛ-pʋtɔdɩyɛ nɛ ɛsɩŋ nɛ ɛlabɩ-ɩ kɔyɛ. Ɛgɔm ɛnʋ ɛsɩnɩ abalʋ ɛnʋ paa ɛ nɛ ɩ patɩkaa kʋnʋŋ yɔ.

Ɛgɔm pʋtɔdɩyɛ nayʋ ɛnʋ, pɩtasɩna se ɛlabɩ-ɩ kɔyɛ nɛ ɛsɩnɩ-ɩ tomnaɣ yɔɔ lɛ, ɛhɛzɩ ɛ-laŋɩyɛ nɛ pɩkpazɩ-ɩ ɖoŋ nɛ ɛ-yɔɔ waa.

Lɔŋ weyi eduuye nɖɩ ɖɩkpɛlɩkɩɣ-ɖʋ? Yesu wɛɛ nɛ ɛwɩlɩɣ-ɖʋ se pɩmʋnaa se ɖɩla ɖo-ɖoŋ ɖeɖe nɛ ɖɩsɩnɩ mba pɛwɛ kɩcɛyɩm taa yɔ. (Aduwa 14:31) Masɩ Kiɖeɖesi wɩlɩɣ se pileɖiɣ lɛ Ɛsɔ kaɣ yebu nɛ kʋñɔndʋtʋ nɛ kʋñɔmɩŋ pasɩɩ tɩnaɣ. Pɩtɩla, ɖɩpɩzɩɣ nɛ ɖɩmaɣzɩ se ɛzɩmtaa nɛ ɛzɩma Ɛsɔ kaɣ labʋ mbʋ? Ñʋʋ ŋgʋ kɩkɔŋ yɔ kɩ-taa, ɖɩkaɣ naʋ wazasɩ nzɩ ɖa-Lɩzɩyʋ sɔɔlɩm tʋ ɖʋwa se ɛkɔŋnɩ ɖɔ-yɔɔ yɔ.