Paa nazɩm mbʋ lɛ, pɩ-tɛm alɩwaatʋ wɛɛ

Nazɩm pɩzɩɣ piyele nɛ pitibi-ɖʋ yɔɔɔ kɔzɩ kɔzɩ ye ɖɩwɛ pɩ-taa alɩwaatʋ sakɩyɛ yɔ. Daviid kaanawa se nazɩm mbʋ pɩ-taa Wiyaʋ Sɔɔlɩ kaayeba nɛ ɛsʋʋ yɔ, pɩkaɣ sɩʋ tɩnaɣ wiɖiyi nɛ ɛkaɣ pɩsʋʋ wiyaʋ ɛzɩ Yehowa kaaheyuu-i yɔ. (1Sam 16:13) Daviid tisuu kaasɩnɩ-ɩ nɛ ɛɖʋ suuɖu nɛ ɛɖaŋ Yehowa.

Ye ɖɩwɛ nazɩm taa yɔ, ɖɩpɩzɩɣ nɛ ɖɩlabɩnɩ tʋmɩyɛ lɛɣtʋ, sɩmtʋ nɛ lɔŋsɩnɖɛ se ɖɩlɛɣzɩ wɛtʋ ndʋ tɩ-taa ɖɩwɛɛ yɔ. (1Sam 21:12-14; Adu 1:4) Ɛlɛ kala naayɛ pɩzɩɣ nɛ awɛɛ mbʋ paa ɖɩlabɩ mbʋ payɩ pɩlabɩ nɔɔ kʋyʋmaɣ nɛ Bibl paɣtʋ kila se ɖɩlɩɩ a-taa yɔ. Ye pɩwɛ mbʋ yɔ pɩpɔzʋʋ se ɖɩɖʋ suuɖu nɛ ɖɩɖaŋ Yehowa. Pɩkazɩ pazɩ eyeki nɛ kʋñɔmɩŋ kpeekpe sɩɩ tɩnaɣ nɛ “ɛkaɣ hɩzʋʋ ɛsɩtɛɣlɩm kpeekpe” ɖɛ-ɛsɩndaa. (Nat 21:4) Paa Yehowa eyekina se nazɩm mbʋ pɩ-taa ɖɩwɛɛ yɔ, pɩsɩɩ tɩnaɣ yaa paa nabʋyʋ cɔlɔ pɩlɩɣna se pɩsɩɩ tɩnaɣ yɔ, ɖɩɩpɩtɩɣ tɔm tʋnɛ tɩ-yɔɔ: Paa nazɩm mbʋ lɛ, pɩ-tɛm alɩwaatʋ wɛɛ. Toovenim tɔm tʋnɛ tɩpɩzɩɣ nɛ tɩhɛzɩ ɖa-laŋɩyɛ.

CƆNƖ VIDEO SAMAƔ ŊGA KƐWƐ NƆƆ KƲYƲMAƔ TAA, ƐJAÐƐ NÐƖ ÐƖTAYAA YƆ ÐƖ-TAA YƆ; NƐ PƲ-WAYƖ LƐ ŊCOSI TƆM TƲNƐ TƖ-YƆƆ:

• Kala wena Krɩstʋ ñɩma mba pɛwɛ Etaazuunii hadɛ kiŋ hɔɔlʋʋ taa yɔ, pa-taa nabɛyɛ kataa?

• Ɛzɩma pawɩlaa se pɛwɛnɩ suuɖu nɛ sɔɔlɩm?

• Ɛzɩma powobi pɩ-yɔɔ nɛ pakaŋ pa-lɩmaɣza “mbʋ pɩ-tɔm kɩlɩ cɛyʋʋ yɔ” pɩ-yɔɔ? —Fil 1:10