CAƔ WEZUU ƐZƖ KRƖSTƲ TƲ YƆ
Yehowa sɩɣnɩ-ɖʋ kala alɩwaatʋ taa
Kɛdɛzaɣ kɩyakɩŋ ɩnɛ ɩ-taa ɖɩkatɩɣ kala sakɩyɛ. Nabʋyʋ taa, pɩpɩzɩɣ nɛ pɩlabɩ-ɖʋ ɛzɩ kala wena ɖɩkatɩɣ yɔ, acɛzɩ ɖo-ɖoŋ kamaɣ yɔɔ nɛ ɖɩɩpɩzɩɣ nɛ ɖɩlʋbɩnɩ-yɛ. Ɛlɛ ye ɖiwobi pɩ-yɔɔ nɛ ɖɩñɔɔnɩ Yehowa yɔ, ɛkaɣ-ɖʋ sɩnʋʋ nɛ ɖɩɖɔkɩ kpam halɩ pɩkpɛndɩnɩ kala wena akɔŋnɩ-ɖʋ laŋwɛɛkɩyɛ siŋŋ yɔ a-taa. (Iza 43:2, 4) Ɛzɩma ɖɩpɩzɩɣ nɛ ɖɩñɔɔnɩ Yehowa alɩwaatʋ ndʋ ɖɩkatɩɣ kala yɔ?
Adɩma. Ye ɖikuluu ɖa-laŋa nɛ ɖiheyiɣ Yehowa ɖa-taa tɔm yɔ, ɛhaɣ-ɖʋ laŋhɛzɩyɛ nɛ ɛkpazɩ-ɖʋ ɖoŋ nɛ ɖɩpɩzɩ nɛ ɖɩɖɔkɩ kpam.—Fil 4:6, 7; 1Te 5:17.
Kediɣzisi. Lɛɛlɛɛyɔ kpem pɩpɔzʋʋ se ɖɩtɔkɩ fezuu taa tɔɔnaɣ nɛ ɖa nɛ ɖo-koobiya ɖikpeɣliɣ ɖɔɖɔ kediɣzisi taa. (Ebr 10:24, 25) Ye ɖɩñɔɔzʋʋ ɛgbɛyɛ taa kediɣzisi, ɖiwoki-sɩ nɛ ɖicosuu tɔm yɔ, ɖɩhaɣ nʋmɔʋ Yehowa fezuu kiɖeɖeu se kɩsɩnɩ-ɖʋ nɛ pɩkɩlɩ.—Nat 2:29.
Tɔm susuu. Ye ɖɩlakɩ mbʋ payɩ ɖɩpɩzɩɣ yɔ se ɖisusi tɔm nɛ kpekpeka yɔ, pɩsɩɣnɩ-ɖʋ nɛ ɖa-lɩmaɣza wɛɛ mbʋ pɩkpazɩɣ-ɖʋ ɖoŋ yɔ pɩ-yɔɔ. Piyeki ɖɔɖɔ se ɖɩcɛyɩsɩ taabalɩyɛ nɖɩ ɖɩwɛ ɖa nɛ ɖo-koobiya nɛ ɖa nɛ Yehowa ɖɛ-hɛkʋ taa yɔ.—1Kɔ 3:5-10.
CƆNƖ VIDEO YEHOWA KAƔ-Ŋ MƲƲ, NƐ PƲWAYƖ LƐ ŊCOSI TƆM TƲNƐ TƖ-YƆƆ:
Ɛbɛ sɩnɩ Malu nɛ ɛñɔɔnɩ Yehowa kpam kala alɩwaatʋ taa?
Ɛzɩ Malu yɔ, ɛzɩma tɔm ndʋ tɩwɛ Keɣa 33:19 taa yɔ tɩhɛzɩɣ ɖa-laŋa kaɖɛ alɩwaatʋ taa?
Ɛzɩma Malu kɩɖaʋ wɩlɩɣ se Yehowa «haɣ-ɖʋ ɖoŋ weyi ɩcɛzɩ ɛyʋ ɖoŋ» yɔ kaɖɛ alɩwaatʋ taa?—2Kɔ 4:7