Alɩwaatʋ ndʋ ŋlakɩ ño-ɖoŋ ɖeɖe Yehowa sɛtʋ taa yɔ, ŋpɩzɩɣ nɛ ŋhiɣ taa leleŋ

1. Ɛbɛ yeki se ɖihiɣ taa leleŋ siŋŋ?

YEHOWA sɔɔlaa se ɖɩwɛɛ taa leleŋ taa. Ðɩsɩm tɔm ndʋ mbʋ pʋyɔɔ yɔ taa leleŋ kɛ piye nɖɩ e-fezuu kiɖeɖeu lʋlʋʋ yɔ ɖɩ-hɔɔlʋʋ nakʋyʋ. (Gal. 5:22) Taa leleŋ wɛ haʋ taa nɛ pɩkɩlɩ mʋʋ taa; pʋyɔɔ lɛ, ɖihikiɣ taa leleŋ siŋŋ alɩwaatʋ ndʋ ɖɩlakɩ ɖɛ-Ɛsɔ sɛtʋ tʋma kiya nɛ ɖɩsɩɣnɩ ɖɔɖɔ ɖo-koobiya hɔɔlɩŋ ndɩ ndɩ taa yɔ.—Tʋma 20:35.

2-3. (a) Ɛzɩ Galaatii mba 6:4 yɔɔdʋʋ yɔ, wɛtʋ naalɛ ndʋ kaɣ-ɖʋ sɩnʋʋ nɛ ɖitaalesi taa leleŋ weyi ɖɩwɛnɩ Yehowa sɛtʋ taa yɔ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Galaatii mba 6:4 taa, apostoloo Pɔɔlɩ yɔɔdɩ wɛtʋ naalɛ ndʋ tɩsɩɣnɩ-ɖʋ se ɖitaalesi taa leleŋ weyi ɖɩwɛna yɔ tɩ-tɔm. (Kalɩ Galaatii mba 6:4.) Kajalaɣ lɛ, pɩpɔzʋʋ se ɖa-kaɖʋwa ɛkɛna se ɖɩlakɩ ɖo-ɖoŋ ɖeɖe Yehowa sɛtʋ taa. Ye ɖɩwɛɛ nɛ ɖɩlakɩ ɖo-ɖoŋ ɖeɖe Yehowa sɛtʋ taa yɔ, pɩwɛɛ se ɖa-taa ɛla leleŋ. (Mat. 22:36-38) Nabʋlɛ lɛ, pɩtɩpɔzɩ se ɖɩkpakɩɣ ɖa-tɩ nɛ ɖɩkɛdɩɣnɩ lalaa. Mbʋ payɩ ɖɔ-tɔnʋʋ taa alaafɩya, falɩsʋʋ mbʋ ɖɩmʋwa yɔ nɛ hɔɔlɩŋ weyi ɩ-taa ɖɩwɛ niye yɔ pɩhaɣ-ɖʋ waɖɛ se ɖɩla yɔ, pɩwɛɛ se ɖɩwɩlɩ Yehowa ɖɛ-ɛsɩmɩyɛ pɩ-yɔɔ. Mbʋ payɩ ɖɩwɛna yɔ, ɛnʋ hanɩ-ɖʋ pʋ. Hɔɔlʋʋ lɛɛkʋ taa lɛ, ye lalaa ɩwɛ niye Ɛsɔ sɛtʋ hɔɔlɩŋ nɩɩyɩ taa nɛ pɩkɩlɩ-ɖʋ yɔ, pɩwɛɛ se ɖa-taa ɛla leleŋ se palakɩnɩ tʋmɩyɛ hɔɔlɩŋ weyi ɩ-taa pɛwɛ niye yɔ se pasa Yehowa, nɛ paalakɩnɩ-ɩ tʋmɩyɛ se pawɩlɩ se pɛwɛ weewee nɛ pɩkpaɖɩ lalaa yaa se pañɩnɩ pa-maɣmaɣ pɛ-kɛzɛsɩ. Pʋyɔɔ lɛ, mbʋ ɛzɩ ɖɩɩwɛɛ nɛ ɖɩlʋkɩnɩ-wɛ lɛ, pɩwɛɛ se ɖɩkpɛlɩkɩ lɔŋ pɔ-cɔlɔ.

³ Tɔm ñʋʋ kʋnɛ kɩ-taa, ɖɩkaɣ naʋ mbʋ pɩpɩzɩɣ nɛ pɩsɩnɩ-ɖʋ alɩwaatʋ ndʋ pitiki-ɖʋ yɔɔɔ mbʋ pʋyɔɔ yɔ ɖɩɩpɩzɩɣ nɛ ɖɩlakɩ mbʋ payɩ ɖɩsɔɔlaa se ɖɩla ɖɛ-Ɛsɔ sɛtʋ taa yɔ. Ðɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩlabɩnɩ tʋmɩyɛ kʋjɔŋ weyi payɩ ɖɩwɛna yɔ nɛ mbʋ ɖɩpɩzɩɣ nɛ ɖɩkpɛlɩkɩ ɛyaa lalaa kɩɖaŋ taa yɔ.

ALƖWAATƲ NDƲ ÐƖƖPƖZƖƔ NƐ ÐƖLAKƖ MBƲ PAYƖ ÐƖSƆƆLAA YƆ ƐSƆ SƐTƲ TAA YƆ

4. Wɛtʋ ndʋ pɩzɩɣ tiyele nɛ pitii ɛyʋ yɔɔɔ? Ha kɩɖaʋ nakʋyʋ.

⁴ Ða-taa nabɛyɛ ɩɩpɩzɩɣ nɛ palakɩ mbʋ payɩ pɔsɔɔlaa yɔ Yehowa sɛtʋ taa, mbʋ pʋyɔɔ yɔ pɛwɛɛ nɛ pakpadɩyɩɣ yaa pɩwɩɣ-wɛ, nɛ piyeki nɛ pitiki-wɛ yɔɔɔ. Wɛtʋ ndʋ tɩ-taa Carol kaawɛɛ. Alɩwaatʋ natʋyʋ taa, eehiɣ waɖɛ nɛ ewolo esusi tɔm ɖenɖe pɩpɔzaɣ tɔm susuyaa nɛ pɩkɩlɩ yɔ. Alɩwaatʋ ndʋ tɩ-taa, ɛkpɛlɩkɩnɩ Bibl ɛyaa 35 nɛ ɛsɩnɩ sakɩyɛ nɛ powobini ɛsɩndaa nɛ paha pa-tɩ nɛ pamɩyɩsɩ-wɛ lɩm. Carol tɔm susuu kaalʋlɩ pee kɩbana! Pʋwayɩ lɛ ɛtɔlɩ kʋdɔŋ, nɛ sakɩyɛ taa lɛ ɛtaapɩzɩɣ se ɛlɩɩ ɖɩɣa. Carol yɔɔdaa se: “Maaɖiɣzinaa se man-kʋdɔŋ yɔɔ lɛ, mantaapɩzɩɣ se mala mbʋ lalaa pɩzɩɣ nɛ palakɩ yɔ; ɛlɛ pɩlakaɣ-m ɛzɩ mɛnfɛyɩ siɣsiɣ ɛzɩ lalaa yɔ. Mantaapɩzɩɣ se mala mbʋ payɩ maasɔɔlaa se mala yɔ, nɛ piyeba nɛ pitibi-m yɔɔɔ.” Carol sɔɔlaa se ɛla mbʋ payɩ ɛpɩzɩɣ yɔ Yehowa sɛtʋ taa. Toovenim taa lɛ, ɛmʋnɩ samtʋ siŋŋ! Ða-taa pɩzɩɣ nɛ pɩtɛ se ɖɛ-Ɛsɔ pʋtɔdɩyɛ nayʋ taa wɛ leleŋ nɛ Carol mbʋ pʋyɔɔ yɔ ɛwɛɛ nɛ ɛlakɩ e-ɖoŋ ɖeɖe.

5. (a) Ye pitiki-ɖʋ yɔɔɔ mbʋ pʋyɔɔ yɔ ɖɩɩpɩzɩɣ nɛ ɖɩlakɩ mbʋ payɩ ɖɩsɔɔlaa se ɖɩla yɔ, tɔm ndʋ yɔɔ pɩwɛɛ se ɖɩtɔzɩ? (b) Koobu weyi ɖɩnaɣ-ɩ kɩlɛmɩŋ taa yɔ, ɛzɩma ɛwɩlaa se ɛwɛɛ nɛ ɛlakɩ e-ɖoŋ ɖeɖe Yehowa sɛtʋ taa e-wezuu caɣʋ kpeekpe taa?

⁵ Ye nabʋyʋ taa pitiki-ŋ yɔɔɔ mbʋ pʋyɔɔ yɔ ŋŋpɩzɩɣ nɛ ŋlakɩ mbʋ payɩ ŋsɔɔlaa yɔ, pɔzɩ ña-tɩ tɔm tʋnɛ: ‘Ɛbɛ Yehowa sɔɔlaa se mala?’ Yehowa sɔɔlaa se ŋla ño-ɖoŋ ɖeɖe, pʋ-tɔbʋʋ se mbʋ wɛtʋ ndʋ tɩ-taa ŋwɛ lɛɛlɛɛyɔ yɔ tɩhaɣ-ŋ nʋmɔʋ se ŋla yɔ. Maɣzɩ wɛtʋ tʋnɛ tɩ-yɔɔ nɛ ŋna. Koobu halɩñɩnʋ nɔɔyʋ wɛnɩ pɩnzɩ 80, nɛ pitibi-i yɔɔɔ mbʋ pʋyɔɔ yɔ ɛɛpɩzɩɣ nɛ ɛlakɩ sakɩyɛ Ɛsɔ sɛtʋ tʋmɩyɛ taa ɛzɩ ɛɛlakʋʋ alɩwaatʋ ndʋ ɛɛwɛnɩ pɩnzɩ 40 yɔ. Ɛmaɣzɩɣ se paa ɛwɛɛ nɛ ɛlakɩ e-ɖoŋ ɖeɖe yɔ, pɩɩkɛdɩɣnɩ Yehowa. Ɛlɛ pɩkɛ toovenim na? Maɣzɩ pɩ-yɔɔ nɛ ŋna. Ye koobu ɛnʋ ɛlabɩ e-ɖoŋ ɖeɖe alɩwaatʋ ndʋ ɛɛwɛnɩ pɩnzɩ 40 yɔ nɛ ewoki pɩ-yɔɔ nɛ ɛlakɩ e-ɖoŋ ɖeɖe alɩwaatʋ ndʋ ɛwɛnɩ pɩnzɩ 80 yɔ, pʋbʋ etiyele labʋ e-ɖoŋ ɖeɖe kpa. Ye pɩpaɣzɩ-ɖʋ labʋ ɛzɩ mbʋ ɖɩlakɩ ɖɛ-Ɛsɔ sɛtʋ taa yɔ pɩtɩɖɔɔ se pɩkɛdɩnɩ Yehowa yɔ, pɩpɔzʋʋ se ɖɩtɔzɩ se Yehowa ɖʋʋnɩ mbʋ pɩkɛdɩɣnɩ-ɩ yɔ. Ye ɖɩlakɩ ɖo-ɖoŋ ɖeɖe yɔ, Yehowa kaɣ heyuu ɖa-taa paa anɩ se: “Ŋlabɩ camɩyɛ!”—Kpaɣ-tʋ nɛ ŋmaɣzɩnɩ Maatiyee 25:20-23.

6. Ɛbɛ ɖɩpɩzɩɣ nɛ ɖɩkpɛlɩkɩ Maria kɩɖaʋ taa?

⁶ Ye ɖɩkaŋ ɖa-lɩmaɣza mbʋ ɖɩpɩzɩɣ labʋ yɔ pɩ-yɔɔ nɛ ɖɩɩkaŋ-yɛ mbʋ ɖɩɩpɩzɩɣ labʋ yɔ pɩ-yɔɔ yɔ, pɩkaɣ-ɖʋ wɛʋ kɛlɛʋ se ɖihiɣ taa leleŋ. Payaɣ koobu halɩñɩnʋ nɔɔyʋ se Maria; ɛhɩnɩ kʋdɔŋ nakʋyʋ nɛ pʋyɔɔ lɛ, ɛɛpɩzɩɣ nɛ ɛlakɩ mbʋ payɩ ɛsɔɔlaa yɔ Ɛsɔ sɛtʋ taa. Kiɖe tɛɛ lɛ, piitibi-i yɔɔɔ nɛ pɩlakɩ-ɩ ɛzɩ ɛfɛyɩ wazaɣ nakɛyɛ yɔ. Ɛlɛ pʋwayɩ lɛ, ɛmaɣzɩ ɛgbɛyɛ taa koobu halɩñɩnʋ nɔɔyʋ yɔɔ, pɩwɩɣaɣ-ɩ nɛ ɛɛpɩzɩɣ se ɛkʋyɩ ɛ-kaɖʋʋ yɔɔ; peeɖe ɛkpaɣ lɩmaɣzɩyɛ se ɛsɩɣnɩ-ɩ. Maria yɔɔdaa se: “Maalabɩ ɖʋtʋ se ma nɛ ɩ ɖɩtɩŋnɩ kaŋgalaafu nɛ takayɩsɩ maʋ yɔɔ nɛ ɖisusuu tɔm. Alɩwaatʋ ndʋ payɩ ma nɛ ɩ ɖɩkpɛndaɣ nɛ ɖɩlakɩ tʋmɩyɛ yɔ, manpɩsaɣ ɖɩɣa nɛ taa leleŋ mbʋ pʋyɔɔ yɔ manpɩzaa nɛ mansɩnɩ mon-koobu halɩñɩnʋ.” Ða ɖɔɖɔ, ɖɩpɩzɩɣ nɛ ɖihiɣ taa leleŋ nɛ pɩkɩlɩ ye ɖɩkaŋ ɖa-lɩmaɣza mbʋ ɖɩpɩzɩɣ labʋ yɔ pɩ-yɔɔ nɛ ɖɩɩkaŋ-yɛ mbʋ ɖɩɩpɩzɩɣ labʋ yɔ pɩ-yɔɔ yɔ. Ɛlɛ ye ɖɩpɩzɩɣ ɖɩla nɛ pɩkɩlɩ yaa ɖɩlakɩ camɩyɛ siŋŋ Yehowa sɛtʋ hɔɔlɩŋ nɩɩyɩ taa yɔ, ɛzɩma ɖɩpɩzɩɣ nɛ ɖɩla?

YE ŊWƐNƖ KƲJƆƲ NAKƲYƲ YƆ—LABƖNƖ-KƲ TƲMƖYƐ

7. Lɔŋ kɩbaŋ weyi apostoloo Pɩyɛɛrɩ tasɩ Krɩstʋ ñɩma?

⁷ Takayaɣ kajalaɣ ñɩŋga ŋga apostoloo Pɩyɛɛrɩ mawa yɔ ka-taa, eseɣti e-koobiya Krɩstʋ ñɩma se palabɩnɩ tʋmɩyɛ kʋjɔŋ weyi payɩ pɛwɛna yɔ nɛ hɔɔlɩŋ weyi ɩ-taa pɛwɛ niye yɔ, nɛ pakpazɩnɩ po-koobiya ɖoŋ. Pɩyɛɛrɩ mawa se: “Ɛzɩ paa weyi ɛmʋʋ kʋjɔʋ yɔ, ɩkpaɣ-kʋ nɛ ɩɖʋnɩ ɖama lɩm ɛzɩ Ɛsɔ lootiye yɔɔ cɔnɩyaa kɩbama yɔ.” (1 Pɩy. 4:10) Pɩtɩpɔzɩ se ɖikizi nɛ ɖɩɩlakɩnɩ kʋjɔŋ weyi ɖɩwɛna yɔ tʋmɩyɛ kiya mbʋ pʋyɔɔ yɔ sɔɔndʋ kpaɣ-ɖʋ se pɩtaala nɛ lalaa sʋsʋʋ-ɖʋ yaa pitibi-wɛ yɔɔɔ. Ye ɖɩɩlakɩ ɖo-ɖoŋ ɖeɖe mbʋ pʋyɔɔ yɔ sɔɔndʋ kpaɣ-ɖʋ nɛ ndʋ lala kaamaɣzɩ yɔ, ɖɩɩkaɣ pɩzʋʋ nɛ ɖɩla ɖo-ɖoŋ ɖeɖe Yehowa sɛtʋ taa.

8. Ɛzɩ 1 Kɔrɛntɩ mba 4:6, 7 yɔɔdʋʋ yɔ, ɛbɛ yɔɔ pɩtɩpɔzɩ se ɖɩkʋndʋʋ kʋjɔŋ weyi ɖɩwɛna yɔ ɩ-yɔɔ?

⁸ Pɩpɔzʋʋ se ɖɩlabɩnɩ kʋjɔŋ weyi ɖɩwɛna yɔ tʋmɩyɛ kiya, ɛlɛ pɩwɛɛ se ɖɩkpa ɖa-tɩ nɛ ɖɩtaakʋndʋʋ kʋjɔŋ ɛnɩ ɩ-yɔɔ. (Kalɩ 1 Kɔrɛntɩ mba 4:6, 7.) Pɩtɩla pɩwɛ-ŋ kɛlɛʋ se ña nɛ ɛyaa ɩpaɣzɩ Bibl kpɛlɩkʋʋ, nɛ ŋwɛ niye siŋŋ hɔɔlʋʋ ŋgʋ kɩ-taa. Pɩtɩpɔzɩ se ŋkizi labɩnʋʋ tʋmɩyɛ kʋjɔʋ ŋgʋ! Ɛlɛ pɩcɛyaa se ŋtɔzɩ se pɩtɩpɔzɩ se ŋkpazɩ ña-tɩ kʋjɔʋ ŋgʋ kɩ-yɔɔ. Ðɩkpaɣ se pitileɖi yɔ, ŋkatɩ nɔɔyʋ tɔm susuu taa nɛ ña nɛ ɩ ɩla kɛdaɣ kɩbaŋa nakɛyɛ nɛ pɩtɛmna se ña nɛ ɩ ɩpaɣzɩ Bibl kpɛlɩkʋʋ. Ŋsɔɔlɩ siŋŋ se ŋkɛdɩ tɔm ndʋ ñɔ-tɔm susuu ɛgbɛyɛ taa koobiya. Ɛlɛ, alɩwaatʋ ndʋ ŋkatɩ-wɛ yɔ, koobu halɩñɩnʋ nɔɔyʋ wɛɛ nɛ ɛkɛdɩɣ-wɛ ɛzɩma ɛ nɛ nɔɔyʋ palabɩ kɛdaɣ nɛ ɛha-ɩ fenaɣ fenaɣ takayaɣ nakɛyɛ yɔ, pɩ-tɔm. Koobu halɩñɩnʋ ɛnʋ ɛha fenaɣ fenaɣ takayaɣ; piyele nɛ ña lɛ, ña nɛ nɔɔyʋ ɩpaɣzɩ Bibl kpɛlɩkʋʋ. Ɛbɛ ŋkaɣ labʋ? Ŋɖiɣzinaa se ye ŋkɛdɩ koobiya ɛzɩma pɩɖɔma nɛ ña nɛ ɛyʋ ɛnʋ ɩpaɣzɩ Bibl kpɛlɩkʋʋ yɔ pɩkpazɩɣ-wɛ ɖoŋ, ɛlɛ ŋpɩzɩɣ nɛ ŋɖaŋ nɛ alɩwaatʋ lɛɛtʋ taa lɛ ŋkɛdɩ-wɛ tʋ; mbʋ pʋyɔɔ yɔ ŋtɩsɔɔlɩ se ŋyele nɛ koobu halɩñɩnʋ weyi ɛha fenaɣ fenaɣ takayaɣ yɔ ɛmaɣzɩ se ɛfɛyɩ niye ɛzɩ ña yɔ. Ye ŋlabɩ mbʋ yɔ, pɩkɛɣnɩ camɩyɛ lakasɩ. Ɛlɛ paa pɩtɩɩkɛ suwe yɔ, taayele pɔzʋʋ ɛyaa se ña nɛ wɛ ɩkpɛlɩkɩ Bibl. Kʋjɔʋ ŋgʋ ŋwɛna yɔ, labɩnɩ-kʋ tʋmɩyɛ!

9. Ɛzɩma pɩwɛɛ se ɖɩlabɩnɩ ɖa-kʋjɔŋ tʋmɩyɛ?

⁹ Pɩwɛɛ se ɖɩtɔzɩ se hɔɔlɩŋ weyi ɩ-taa ɖɩwɛ niye yɔ, Ɛsɔ labɩnɩ-ɖʋ kʋjɔʋ. Pɩwɛɛ se ɖɩlabɩnɩ tʋmɩyɛ kʋjɔŋ ɛnɩ nɛ ɖɩkpazɩnɩ ɛgbɛyɛ ɖoŋ, ɖɩtaalabɩnɩ-ɩ tʋmɩyɛ se ɖɩwɩlɩ se ɖɩkpaɖɩ lalaa. (Fil. 2:3) Alɩwaatʋ ndʋ ɖɩlakɩnɩ tʋmɩyɛ ɖo-ɖoŋ nɛ hɔɔlɩŋ weyi ɩ-taa ɖɩwɛ niye yɔ se ɖɩla Ɛsɔ sɔɔlɩm yɔ, ɖɩkaɣ naʋ mbʋ pɩ-yɔɔ pɩwɛɛ se ɖa-taa ɛla leleŋ yɔ. Taa leleŋ ɛnɩ, ɛɛlɩɣnɩ ɛzɩma ɖɩlakɩ nɛ pɩcɛzɩɣ lalaa yɔ pɩ-cɔlɔ yaa ɛzɩma ɖɩñakɩ pana se ɖɩwɩlɩ se ɖɩkɩlɩ lalaa yɔ pɩ-cɔlɔ, ɛlɛ pɩlɩɣnɩ ɛzɩma ɖɩlakɩnɩ ɖa-kʋjɔŋ tʋmɩyɛ se ɖɩsa Yehowa yɔ pɩ-cɔlɔ.

10. Ɛbɛ yɔɔ pɩtɩmʋna se ɖɩkpakɩɣ ɖa-tɩ nɛ ɖɩmaɣzɩɣnɩ ɛyaa lalaa?

¹⁰ Ye ɛyʋ ɛtɩkpa ɛ-tɩ yɔ, ɛpɩzɩɣ nɛ ɛpaɣzɩ kpaɣʋ e-ɖoŋ nɛ ɛmaɣzɩɣnɩ ɛyʋ lɛlʋ ɛjandʋ. Kɩɖaʋ nakʋyʋ yɔ: Koobu nɔɔyʋ pɩzɩɣ nɛ ɛyɔɔdʋʋ samaɣ taa tɔm camɩyɛ kpem. E-ɖoŋ ɖeɖe lɛ. Ɛlɛ pɩtɩla ɛ-laŋɩyɛ taa lɛ, eniŋ koobu lɛlʋ weyi ɛfɛyɩ niye siŋŋ samaɣ taa tɔm yɔɔdʋʋ taa yɔ. Ɛlɛ koobu ɛnʋ, pɩtɩla yɔ, ɛlɛ wɛ niye siŋŋ ɛgɔndʋ mʋʋ nɛ e-piya falɩsʋʋ hɔɔlʋʋ taa, yaa ɛwɛ kpekpeka tɔm susuu taa. Ðɩwɛnɩ ɛsɩmɩyɛ kpem se ɖɩwɛnɩ koobiya sakɩyɛ mba palakɩnɩ tʋmɩyɛ kʋjɔŋ weyi pɛwɛna yɔ se pɛsɛɛ Yehowa nɛ pɛtɛ pasɩnɩ ɛyaa lalaa yɔ!

KPƐLƖKƖ LƆŊ ƐYAA LALAA KƖÐAŊ TAA

11. Ɛbɛ yɔɔ pɩwɛɛ se ɖɩñaɣ pana nɛ ɖɩmaɣzɩnɩ Yesu kɩɖaʋ?

¹¹ Paa pɩtɩpɔzɩ se ɖɩkpakɩɣ ɖa-tɩ nɛ ɖɩmaɣzɩɣnɩ ɛyaa lalaa yɔ, ɖɩpɩzɩɣ nɛ ɖɩkpɛlɩkɩ lɔŋ Yehowa sɛyaa lalaa cɔlɔ. Iyele nɛ ɖɩna Yesu kɩɖaʋ. Paa Yesu kaatalɩ pilim yɔ, ɖɩpɩzɩɣ nɛ ɖɩkpɛlɩkɩ lɔŋ ɛ-wɛtʋ kɩbandʋ ndɩ ndɩ taa nɛ tʋma kɩbana wena ɛlaba yɔ a-taa. (1 Pɩy. 2:21) Ye ɖɩlakɩ ɖo-ɖoŋ ɖeɖe se ɖɩmaɣzɩnɩ Yesu kɩɖaʋ ɖeyi ɖeyi yɔ, ɖɩpɩsɩɣ Yehowa sɛyaa kɩbama nɛ pɩkɩlɩ nɛ ɖɩwɛɣ niye tɔm susuu taa nɛ pɩkɩlɩ.

12-13. Ɛbɛ ɖɩpɩzɩɣ nɛ ɖɩkpɛlɩkɩ Wiyaʋ Daviid cɔlɔ?

¹² Ðɩnaɣ Ɛsɔ sɛyaa siɣsiɣ tɩnaa kɩɖaŋ sakɩyɛ Bibl taa; paa patɩtalɩ pilim yɔ ɖɩpɩzɩɣ nɛ ɖɩmaɣzɩnɩ-wɛ. (Ebr. 6:12) Maɣzɩ Wiyaʋ Daviid yɔɔ nɛ ŋna; Yehowa ya-ɩ se: “Me-liu ɛyʋ.” (Tʋma 13:22) Paa mbʋ yɔ, Daviid tɩtalɩ pilim. Toovenim taa lɛ, ɛlabɩ kɩwɛɛkɩm sɔsɔm. Ɛlɛ ɛkɛ-ɖʋ kɩɖaʋ kɩbaŋʋ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ pɔhɔm ɛ-nɩŋgbaŋʋʋ yɔ, ɛtɩñaɣ pana se ɛlʋ ɛ-tɩ yɔɔ. Ɛlɛ, ɛmʋ lɔŋ weyi patasɩ-ɩ yɔ nɛ ekpiɖi mbʋ ɛlaba yɔ pɩ-yɔɔ siŋŋ. Mbʋ pɩlɩ pɩ-taa yɔ lɛ se Yehowa kpaɣ nɛ ekpeɣ-i.—Keɣa 50:6, 7, 12-14.

¹³ Ðɩpɩzɩɣ nɛ ɖɩkpɛlɩkɩ lɔŋ Daviid cɔlɔ ye ɖɩpɔzɩ ɖa-tɩ tɔm tʋnɛ yɔ: ‘Alɩwaatʋ ndʋ patasɩɣ-m lɔŋ yɔ, ɛzɩma malakɩ? Mentisiɣ lɛɛ lɛɛ se picoɖi-m, yaa mañakɩ pana se malʋ man-tɩ yɔɔ? Mɔnsɔɔlɩ kʋʋ ɛyaa lalaa tɔm se mba yebina nɛ picoɖi-m? Mañakɩ pana siŋŋ se pɩtaatasɩ-m coɖuu na?’ Alɩwaatʋ ndʋ ŋkalɩɣ Bibl taa abalaa nɛ halaa siɣsiɣ tɩnaa lalaa tɔm yɔ, ŋpɩzɩɣ nɛ ŋpɔzɩ ña-tɩ tɔm ndʋ tɩ-ɖɔndɩ. Kala wena pakataa yɔ, a-ɖɔndɩ ŋwɛɛ nɛ ŋlʋkɩna? Wɛtʋ kɩbandʋ ndɩ ndɩ ndʋ palɩzaa nɛ pawɩlɩ? Paa hɔɔlʋʋ ŋgʋ kɩ-taa lɛ, pɔzɩ ña-tɩ tɔm tʋnɛ: ‘Ɛzɩma manpɩzɩɣ nɛ mamaɣzɩnɩ Yehowa sɛyaa siɣsiɣ tɩnaa mba nɛ pɩkɩlɩ?’

14. Ye ɖɩmaɣzɩɣ ɖo-koobiya Krɩstʋ ñɩma kɩɖaŋ yɔɔ yɔ, ɛzɩma pɩwazɩɣ-ɖʋ?

¹⁴ Ðɩpɩzɩɣ ɖɔɖɔ nɛ ɖɩkpɛlɩkɩ lɔŋ ɖo-koobiya Krɩstʋ ñɩma lalaa cɔlɔ, paa patɩɩkɛ pɛlaa, evebiya yaa akpadɩyaa yɔ. Pʋtɔma yɔ, ñɛ-ɛgbɛyɛ taa koobu nɔɔyʋ wɛɛ nɛ ɛɖɔkʋʋ e-siɣsiɣ wɛtʋ takɩm nabʋyʋ taa. Pɩtɩla ɛ-ɖaɣʋnaa wɛɛ nɛ pañɩkɩɣ ɛ-yɔɔ, yaa ɛ-hɔʋ taa mba wɛɛ nɛ pakaɖɩɣnɩ-ɩ, yaa ɛfɛyɩnɩ tɔnʋʋ taa alaafɩya camɩyɛ. Ŋpɩzɩɣ nɛ ŋkpaɣ alɩwaatʋ nɛ ŋmaɣzɩ ɛ-kɩɖaʋ yɔɔ? Ŋnaɣ koobu ɛnʋ ɛ-wɛtʋ kɩbandʋ natʋyʋ, ndʋ ŋsɔɔlaa se ŋmaɣzɩna yɔ? Ye ŋmaɣzɩ kɩɖaʋ ŋgʋ koobu ɛnʋ ɛhawa yɔ kɩ-yɔɔ yɔ, pɩtɩla yɔ ŋpɩzɩɣ nɛ ŋna nʋmɔŋ kɩbaŋ weyi ɩ-yɔɔ pɩwɛɛ se ŋtɩŋna nɛ ŋɖɔkɩ ña-tɩ takɩm mbʋ ña-maɣmaɣ ŋkatɩɣ yɔ pɩ-taa yɔ. Ðɩwɛnɩ ɛsɩmɩyɛ kpem se koobiya mba, pahaɣ tisuu kɩɖaŋ kɩbaŋ weyi ɖɩpɩzɩɣ nɛ ɖɩmaɣzɩna yɔ!—Ebr. 13:7; Yak. 1:2, 3.

HIƔ TAA LELEŊ YEHOWA SƐTƲ TAA

15. Lɔŋ weyi Pɔɔlɩ tasaa nɛ ɛpɩzɩɣ ɛsɩnɩ-ɖʋ nɛ ɖiwolo pɩ-yɔɔ nɛ ɖɩwɛɛ taa leleŋ taa Yehowa sɛtʋ taa?

¹⁵ Pɩsa nɛ laŋhɛzɩyɛ nɛ nɔɔ kʋɖʋmaɣ wɛɛ ɛgbɛyɛ taa lɛ, pɩpɔzʋʋ se ɖa-taa paa anɩ ɛla e-ɖoŋ ɖeɖe. Iyele nɛ ɖɩna kajalaɣ pɩnzɩ mɩnʋʋ taa Krɩstʋ ñɩma kɩɖaʋ. Paawɛnɩ kʋjɔŋ ndɩ ndɩ nɛ tʋma ndɩ ndɩ. (1 Kɔr. 12:4, 7-11) Ɛlɛ pitiyele nɛ palʋkɩnɩ ɖama yaa tayʋʋ wɛɛ pɛ-hɛkʋ taa. Pɔɔlɩ seɣti pa-taa paa anɩ se ɛla mbʋ pɩpɔzʋʋ yɔ nɛ “ɛma Krɩstʋ tomnaɣ.” Pɔɔlɩ ma Efɛɛzɩ mba se: “Alɩwaatʋ ndʋ paa piliŋa ŋga lɛ kalakɩ tʋmɩyɛ camɩyɛ yɔ, piyeki se tomnaɣ ɛpaɣlɩ, mbʋ pʋyɔɔ yɔ kamaɣ ka-tɩ sɔɔlɩm taa.” (Efɛz. 4:1-3, 11, 12, 16) Mba paalabɩ mbʋ yɔ, pɩsɩnaa nɛ laŋhɛzɩyɛ nɛ nɔɔ kʋɖʋmaɣ wɛɛ, nɛ wɛtʋ ndʋ ɖɩnaɣ ɖa-agbaa taa sɔnɔ.

16. Pɩwɛɛ se ɖɩtɛ ɖa-taa se ɖɩlakɩ we? (Ebree mba 6:10)

¹⁶ Tɛ ña-taa se ŋŋkpakɩɣ ña-tɩ nɛ ŋmaɣzɩɣnɩ ɛyaa lalaa. Ɛlɛ kpɛlɩkɩ lɔŋ Yesu cɔlɔ, nɛ ŋñaɣ pana nɛ ŋmaɣzɩnɩ ɛ-wɛtʋ kɩbandʋ ndɩ ndɩ. Bibl taa nɛ ɖa-alɩwaatʋ taa ɛyaa mba paha tisuu kɩɖaŋ yɔ, kpɛlɩkɩ lɔŋ pɔ-cɔlɔ. Alɩwaatʋ ndʋ ŋwoki pɩ-yɔɔ nɛ ŋlakɩ ño-ɖoŋ ɖeɖe yɔ, ña-taa ɛtɛ se Yehowa ‘tɩkɛ weyi ɛfɛyɩ siɣsiɣ yɔ se ɛsɔɔ ña-tʋmɩyɛ yɔɔ.’ (Kalɩ Ebree mba 6:10.) Wolo pɩ-yɔɔ nɛ ŋwɛɛ taa leleŋ taa Yehowa sɛtʋ taa, nɛ tɩlɩ se alɩwaatʋ ndʋ ɛnaɣ-ŋ ŋwɛɛ nɛ ŋlakɩ ño-ɖoŋ ɖeɖe se ñɔ-tɔm ɛkɛdɩnɩ-ɩ yɔ, ɛ-taa lakɩ leleŋ.