Lɩmaɣza taa kʋdɔŋ tukuuni ɛjaɖɛ kpeekpe
«Paa ɛzɩmtaa lɛ manɩɣzɩɣ pazɩ, paa mancaɣ men-ɖeke yem ɖaŋ nakʋyʋ taa yɔ.»
«Alɩwaatʋ ndʋ pɩlakɩ-m ɛzɩ pɩtɩŋa pɩɖɔŋ camɩyɛ kpem yɔ, sɔɔndʋ paɣzɩɣ-m kpaʋ. Menɖiɣzinaa se alɩwaatʋ ndʋ man-taa kɩlɩɣ leleŋ kpem yɔ, pɩlakɩ pazɩ pʋwayɩ lɛ, mansʋʋ laŋwɛɛkɩyɛ taa.»
«Mañakɩ pana se manka ma-lɩmaɣza mbʋ pɩlakɩ paa evemiye nɖɩ yɔ pɩ-yɔɔ. Ɛlɛ nabʋyʋ taa lɛ, avema sakɩyɛ kala haɣ-m nɩɣzɛ alɩwaatʋ kʋɖʋmtʋ taa.»
Ɛyaa mba pɔyɔɔdɩ tɔm tʋnɛ yɔ, pɛwɛɛ nɛ palʋkɩnɩ lɩmaɣza taa kʋdɔŋ. Pɩlakɩ ña-maɣmaɣ yaa ñɛ-ɛyʋ nɔɔyʋ ɛzɩ pɩlakʋʋ-wɛ yɔ?
Tɩlɩ se pɩtɩkɛ ñe-ɖeke ŋwɛnɩ wɛtʋ ndʋ tɩ-taa. Sɔnɔ, ɛyaa sakɩyɛ lʋkɩnɩ lɩmaɣza taa kʋdɔŋ, pɩpɩzɩɣ nɛ pɩla se kɩkpa pa-maɣmaɣ yaa pɛ-ɛyaa kʋsɔɔlaa.
Pɩtʋʋ fɛyɩ se ɖɩwɛ «alɩwaatʋ kaɖɛ ñɩndʋ ndʋ tɩ-lʋbɩnʋʋ [wɛ] kaɖɛ yɔ» tɩ-taa, nɛ ɛyaa wɛɛ nɛ palʋkɩnɩ kala wena ahaɣ-wɛ nɩɣzɛ yɔ. (2 Timootee 3:1) Akɔnta nakʋyʋ wɩlaa se ɛjaɖɛ kpeekpe yɔɔ lɛ, ye pakpaɣ ɛyaa 8 yɔ, pa-taa kʋɖʋm lʋkɩnɩ lɩmaɣza taa kʋdɔŋ. Pɩnaɣ 2020 taa, COVID-19 kʋdɔŋ yeba nɛ ɛyaa ɛzɩ miiliyɔɔwaa 78 mbʋ yɔ paɣzɩ lʋbɩnʋʋ nɩɣzɛ nɛ lɩmaɣza taa kʋdɔŋ.
Pɩcɛyaa se ɖɩtɩlɩ se sɔnɔ lɛ, ɛyaa sakɩyɛ wɛɛ palʋkɩnɩ nɩɣzɛ nɛ lɩmaɣza taa kʋdɔŋ. Ɛlɛ pɩcɛyaa nɛ pɩkɩlɩ se ɖɩtɩlɩ mbʋ ña nɛ ñɛ-ɛyaa kʋsɔɔlaa ɩpɩzɩɣ ɩla nɛ wɛtʋ ndʋ tɩtaawɛɛnɩ ɖoŋ mɩ-yɔɔ yɔ.
Ɛbɛ lɩmaɣza taa kʋdɔŋ kɛnaa?
Weyi ɛfɛyɩnɩ lɩmaɣza taa kʋdɔŋ yɔ, pɩlakɩ-ɩ se pɩɖɔŋnɩ-ɩ camɩyɛ nɛ ɛmaɣzɩɣ camɩyɛ yɔ. Ɛlʋkɩnɩ nɩɣzɛ wena ɛyaa tɩŋa katɩɣ yɔ camɩyɛ, ɛ-tʋmɩyɛ lʋlʋʋ pee camɩyɛ nɛ ɛnɩɣ leleŋ e-wezuu caɣʋ taa.
Lɩmaɣza taa siduu. . .
TƖKƐNƖ mbʋ pɩlɩɣnɩ nɔɔyʋ ɛjandʋ cɔlɔ yɔ.
KƐNƖ kʋdɔŋ ŋgʋ kɩkɔŋnɩ nɩɣzɛ siŋŋ yɔ, kɩwɛɛkɩɣ ɛyʋ maɣzɩm, kiyeki nɛ ɛɛpɩzɩɣ ɛ-tɩ ɖɔkʋʋ nɛ kɩwɛɣnɩ ɖoŋ ɖɔɖɔ ɛ-wɛtʋ yɔɔ yɔ.
Yeki nɛ ɖoŋ ɖoŋ lɛ pɩwɛɣ ɛyʋ kaɖɛ se taabalɩyɛ ɛwɛɛ ɛ nɛ lalaa pɛ-hɛkʋ taa nɛ pɩwɛɣ-ɩ kaɖɛ ɖɔɖɔ se ɛlʋbɩnɩ kala wena ɛkatɩɣ e-wezuu caɣʋ taa paa evemiye nɖɩ yɔ.
Pɩzɩɣ nɛ pitukuni ɛyaa tɩŋa paa pa-pɩnzɩ, pɔ-sɔnzɩ, pe-cejewe, pɛ-Ɛsɔ sɛtʋ yaa po-sukuli ɩwɛ ndɩ ndɩ yɔ.
Ye ŋwɛnɩ lɩmaɣza taa kʋdɔŋ yɔ ŋpɩzɩɣ nɛ ŋhiɣ sɩnʋʋ
Nabʋyʋ taa, nɔɔyʋ wɛtʋ pɩzɩɣ nɛ tɩlɛɣzɩ tam kʋɖʋm yem tuda, ɛpɩzɩɣ nɛ ɛkɩlɩɣ ɖou yaa eeɖou sakɩyɛ, ɛkɩlɩɣ tɔɔʋ yaa ɛɛtɔkɩ sakɩyɛ, ɛwɛɣ nɩɣzɛ taa siŋŋ yaa ɛkɔʋ pana lɛɛ lɛɛ. Ye pɩtalɩ nɔɔyʋ mbʋ yɔ, pɩpɩzɩɣ nɛ pɩpɔzɩ se ewolo nɛ ɛna ɖɔkɔtɔnaa nɛ pasɩnɩ-ɩ nɛ ɛna mbʋ pɩ-cɔlɔ pɩlɩnaa nɛ lɛɣzɩtʋ ndʋ tɩkɔɔ yɔ, nɛ ɛzɩma ɛpɩzɩɣ nɛ ɛcɔnɩ ti-ɖeɖe yɔ. Le ŋpɩzɩɣ nɛ ŋhiɣ sɩnʋʋ?
Ɛyaa mba payɩ pacaɣ wezuu tɛtʋ yɔɔ yɔ pa-taa lɛ, Yesu Krɩstʋ kɛnɩnɩ weyi ɛkpaɖɩ lɔŋ yɔ. Ɛyɔɔdaa se: «Ɛyaa mba pɛwɛnɩ pa-alaafɩya yɔ, pɩtɩkɛ mba pɩpɔzʋʋ ɖɔkɔtɔ, ɛlɛ kʋdɔndɩnaa pɩpɔzʋʋ ɖɔkɔtɔ.» (Maatiyee 9:12) Ɛyaa mba palʋkɩnɩ kʋdɔmɩŋ yɔ, ye ɖɔkɔtɔnaa ɩsɩnɩ-wɛ ɛzɩ pɩpɔzʋʋ yɔ nɛ paha-wɛ kɔ wena pɩpɔzʋʋ yɔ, pa-kʋdɔmɩŋ ɛnɩ ɩpɩzɩɣ nɛ ɩwaa nɛ paɖaɣnɩ nɩʋ leleŋ pe-wezuu caɣʋ taa. Mbʋ mbʋ pɩwɩlɩɣ se ɛyaa mba pahɩnɩ kʋdɔmɩŋ yɔ, ye pɩtɩsɩɩ tɩnaɣ yɔ, pɩkɛɣnɩ lɔŋsɩnɖɛ se peyele nɛ pawaa-wɛ kpaagbaa.a
Paa Bibl ɛtɩkɛ kɔyɛ labʋ nʋmɔŋ takayaɣ yɔ, tɔm ndʋ tɩwɛ kɩ-taa yɔ, tɩpɩzɩɣ nɛ tɩsɩnɩ-ɖʋ lɩmaɣza taa kʋdɔmɩŋ hɔɔlʋʋ taa. Ðiseɣtiɣ-ŋ kpem se ŋkalɩ tɔm ñʋŋ weyi ɩkɔŋ yɔ; ɩyɔɔdʋʋ ɛzɩma Bibl pɩzɩɣ nɛ kɩsɩnɩ-ɖʋ nɛ ɖɩlʋbɩnɩ lɩmaɣza taa kʋdɔmɩŋ yɔ.
a Feŋuu Tilimiye takayaɣ kanɛ kaawɩlɩɣ ɛyaa kɔyɛ labʋ nʋmɔʋ nakʋyʋ na. Paa weyi pɩwɛɛ se ɛmaɣzɩ kɔyɛ labʋ nʋmɔŋ weyi pasɩɣ ɛ-ɛsɩndaa yɔ ɩ-yɔɔ camɩyɛ nɛ ɛ-maɣmaɣ ɛkpaɣ lɩmaɣza.