«Ɩɖɔkɩ mɩ-maɣzɩm, ifeŋiɣ!»

1. (a) Tɔm ndʋ Yesu heyi ɛ-tɔmkpɛlɩkɩyaa pɩlɩɩnɩ ɛjaɖɛ tɛm alɩwaatʋ yɔɔ? (b) Nɛ ɛpaɣ-wɛ se pala we?

KƖYAKƖŊ pazɩ pʋcɔ nɛ Yesu sɩkɩ lɛ, ɛ-wayɩ tɩŋɩyaa taa naanza pɔzɩ-ɩ tɔm tʋnɛ: «Ɛbɛ kaɣ kɛʋ . . . ɛjaɖɛ yɔɔ ɖʋtʋ tɛm alɩwaatʋ yʋsaɣ?» (Mat. 24:3) Pɩtɩla tɔmkpɛlɩkɩyaa mba pañɩnaɣ se patɩlɩ mbʋ pɩpɩzaɣ se pɩsɩnɩ-wɛ nɛ patɩlɩ alɩwaatʋ ndʋ pakaɣ ɖɩzʋʋ Yeruzalɛm nɛ kɩ-tɛ templo yɔ. Yesu cosaɣ-wɛ lɛ, ɛtɩyɔɔdɩ Yeruzalɛm nɛ kɩ-tɛ templo ɖɩzʋʋ ɖeke tɔm na, ɛlɛ ɛyɔɔdɩ «ɛjaɖɛ yɔɔ ɖʋtʋ tɛm alɩwaatʋ» tɔm ɖɔɖɔ; nɛ alɩwaatʋ ndʋ tɩ-taa ɖɩwɛɛ. Yesu yɔɔdaɣ ɛjaɖɛ tɛm alɩwaatʋ tɔm lɛ, ɛtɔm se: «Piyele nɛ kɩyakʋ ŋgʋ yaa ñɩɣyʋʋ ŋgʋ lɛ, nɔɔyʋ ɛɛsɩŋ, Ɛsɔ tiyiyaa mba pɛwɛ ɛsɔdaa yɔ nɛ ɛyʋ Pɩyalʋ ɖɔɖɔ paasɩŋ, ɛlɛ Caa sɩmna.» Pʋwayɩ lɛ, ɛpaɣ ɛ-tɔmkpɛlɩkɩyaa tɩŋa se ‘pacaɣnɩ pɛ-ɛsa’ nɛ ‘pɛwɛɛ nɛ pefeŋiɣ.’—Mark. 13:32-37.

2. Ɛbɛ yɔɔ pɩɩcɛyaa se kajalaɣ pɩnzɩ mɩnʋʋ taa Krɩstʋ ñɩma ɩwɛɛ nɛ pefeŋiɣ?

² Pɩɩwɛɛ se kajalaɣ pɩnzɩ mɩnʋʋ taa Yuuda ñɩma mba paakɛ Krɩstʋ ñɩma yɔ, powolo pɩ-yɔɔ nɛ pefeŋiɣ nɛ pɩsa nɛ pɩya pa-ñʋʋ. Yesu heyi ɛ-wayɩ tɩŋɩyaa mbʋ pakaɣ naʋ nɛ pɩsɩnɩ-wɛ nɛ patɩlɩ se Yeruzalɛm nɛ kɩ-templo yɔkʋʋ alɩwaatʋ talaa yɔ. Ɛyɔɔdaa se: «Alɩwaatʋ ndʋ ɩnaɣ sɔɔjanaa cɔ Yeruzalɛm nɛ pata yɔ, ɩtɩlɩ se kɩ-yɔkʋʋ ñɔtaa.» Alɩwaatʋ ndʋ lɛ, pɩɩwɛɛ se pɔɖɔ Yesu paɣtʋ yɔɔ nɛ «papaɣzɩ seu nɛ pakpa pʋŋ taa.» (Luka 21:20, 21) Mba pɔɖɔm Yesu paɣtʋ ndʋ tɩ-yɔɔ yɔ, pehiɣ ñʋʋ yabʋ alɩwaatʋ ndʋ Roma mba yɔkɩ Yeruzalɛm yɔ.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Sɔnɔ, ɖɩwɛ ɛjaɖɛ kɩdɛkɛdɩyɛ ɖɩnɛ ɖɩ-kɛdɛzaɣ alɩwaatʋ taa. Pʋyɔɔ lɛ, pɩpɔzʋʋ se ɖa ɖɔɖɔ ɖɩɖɔkɩ ɖa-maɣzɩm nɛ ɖifeŋiɣ. Tɔm ñʋʋ kʋnɛ kɩ-taa, ɖɩkaɣ naʋ mbʋ pɩpɔzaa se ɖɩla nɛ ɖɩwɛɛnɩ maɣzɩm mbʋ pɩmʋnaa yɔ alɩwaatʋ ndʋ ɖɩcɔŋnɩ mbʋ pɩwɛɛ nɛ pɩlakɩ ɛjaɖɛ yɔɔ yɔ, ɛzɩma ɖɩpɩzɩɣ nɛ ɖɩkpa ɖa-tɩ yɔ, nɛ ɛzɩma ɖɩpɩzɩɣ nɛ ɖɩlabɩnɩ alɩwaatʋ ndʋ tɩkazaa yɔ tʋmɩyɛ camɩyɛ yɔ.

WƐƐNƖ MAƔZƖM MBƲ PƖMƲNAA YƆ ALƖWAATƲ NDƲ ŊCƆŊNƖ MBƲ PƖWƐƐ NƐ PƖLAKƖ ƐJAÐƐ YƆƆ YƆ

4. Ɛbɛ yɔɔ pɩwɛɛ se ɖɩsɔɔlɩ se ɖɩna mbʋ pɩwɛɛ nɛ pɩlakɩ ɛjaɖɛ yɔɔ nɛ piyeki se Bibl taa natʋ tɔm ɛla yɔ?

⁴ Lɩmaɣza kɩbana yɔɔ ɖɩcɔŋnɩ mbʋ pɩwɛɛ nɛ pɩlakɩ ɛjaɖɛ yɔɔ nɛ piyeki se Bibl taa natʋ tɔm ɛla yɔ. Yesu heyi-ɖʋ mbʋ pɩkaɣ labʋ nɛ pɩsɩnɩ-ɖʋ nɛ ɖɩna se Sataŋ ɛjaɖɛ tɛm wɛɛ nɛ pɩñɔtʋʋ yɔ. (Mat. 24:3-14) Apostoloo Pɩyɛɛrɩ seɣti-ɖʋ se ɖɩka ɖa-lɩmaɣza ɛzɩma natʋ tɔm wɛɛ nɛ tɩlakɩ yɔ pɩ-yɔɔ nɛ pɩsa nɛ ɖe-tisuu kpaɣ ɖoŋ tam. (2 Pɩy. 1:19-21) Bibl taa kɛdɛzaɣ takayaɣ paɣzɩnɩ tɔm tʋnɛ: «Natʋ ndʋ tɩ-yɔɔ Yesu Krɩstʋ kulaa yɔ, ndʋ Ɛsɔ cɛlɩ-ɩ se ɛwɩlɩ e-yomaa mbʋ piileɖiɣ lɛ, pɩwɛɛ se pɩla yɔ.» (Natʋ 1:1) Ye mbʋ, ɖɩsɔɔlɩ kpem se ɖɩtɩlɩ mbʋ pɩwɛɛ nɛ pɩlakɩ ɛjaɖɛ yɔɔ sɔnɔ yɔ nɛ ɖɩna ɛzɩma piyeki se Bibl taa natʋ tɔm ɛla yɔ. Nɛ ɖɩsɔɔlɩ kpem se ɖa nɛ ɛyaa lalaa ɖɩkɛdɩ mbʋ pɩwɛɛ nɛ pɩlakɩ yɔ pɩ-tɔm.

5. Ɛbɛ pɩwɛɛ se ɖikizi labʋ, ɛlɛ ɛbɛ pɩwɛɛ se ɖɩla? (Cɔnɩ ɖɔɖɔ kɩlɛmɩŋ.)

⁵ Ɛlɛ alɩwaatʋ ndʋ ɖɩlakɩ kɛdaɣ Bibl taa natʋ tɔm yɔɔ yɔ, pɩfɛyɩ se ɖɩyɔɔdʋʋ ndʋ ɖa-maɣmaɣ ɖɩmaɣzɩɣ se pɩtɩla pɩkaɣ labʋ yɔ pɩ-tɔm. Ɛbɛ yɔɔ? Mbʋ pʋyɔɔ yɔ ɖɩtɩsɔɔlɩ se ɖɩyɔɔdɩ natʋyʋ nɛ tɩkɔnɩ tayʋʋ ɛgbɛyɛ taa. Kɩɖaʋ nakʋyʋ yɔ: Pɩtɩla ɖɩnɩ ajɛɛ ñʋndɩnaa yɔɔdʋʋ ɛzɩma papɩzɩɣ nɛ pɔcɔnɩ you nakʋyʋ ɖeɖe nɛ pɔkɔnɩ laŋhɛzɩyɛ nɛ pɛɛyɛ yɔ pɩ-tɔm. Mbʋ ɛzɩ ɖɩpaɣzɩ yɔɔdʋʋ se 1 Tesalooniiki mba 5:3 taa natʋ tɔm wɛna nɛ tɩlakɩ lɛ, pɩwɛɛ se ɖɩñɩnɩ nɛ ɖɩtɩlɩ tɔm kɩfatʋ ndʋ Yehowa ɛgbɛyɛ yɔɔdɩ tɔm ndʋ tɩ-yɔɔ yɔ. Alɩwaatʋ ndʋ ɖɩlakɩ kɛdaɣ yɔ, ye ɖɩyɔɔdʋʋ tɔm ndʋ tɩlɩnɩ wondu ndʋ Yehowa ɛgbɛyɛ lɩzaa yɔ tɩ-taa yɔ, ɖɩsɩɣnɩ ɛgbɛyɛ se ɖɩwɛɛ nɔɔ kʋɖʋmaɣ taa nɛ ɖɩwɛɛnɩ «lɩmaɣza kʋɖʋma.»—1 Kɔr. 1:10; 4:6.

6. Lɔŋ weyi ɖɩpɩzɩɣ nɛ ɖɩkpɛlɩkɩ 2 Pɩyɛɛrɩ 3:11-13 taa?

⁶ Kalɩ 2 Pɩyɛɛrɩ 3:11-13. Apostoloo Pɩyɛɛrɩ sɩnɩ-ɖʋ se ɖɩwɛɛnɩ lɩmaɣza wena amʋnaa yɔ alɩwaatʋ ndʋ ɖɩtazɩɣ Bibl taa natʋ tɔm taa yɔ. Eseɣti-ɖʋ se ‘ɖɩtɔzʋʋ tam Yehowa kɩyakʋ wɛʋ alɩwaatʋ yɔɔ.’ Ɛbɛ yɔɔ? Ðɩɩlakɩ mbʋ nɛ lɩmaɣzɩyɛ se ɖɩtɩlɩ kɩyakʋ nɛ ñɩyʋʋ ŋgʋ kɩ-yɔɔ Yehowa kaɣ kɔnʋʋ Armaagedɔɔ yɔ; ɛlɛ ɖɩlakɩ mbʋ, mbʋ pʋyɔɔ yɔ ɖɩsɔɔlaa se ɖɩlabɩnɩ tʋmɩyɛ alɩwaatʋ ndʋ tɩkazaa yɔ nɛ ‘ɖɩɖɔ ɖɔnɛ kiɖeɖeye taa nɛ lakasɩ nzɩ sɩwɩlɩɣ se ɖɩñɔnɩ Ɛsɔ yɔ sɩ-taa.’ (Mat. 24:36; Luka 12:40) Pʋ-tɔbʋʋ lɛ se ɖɩsɔɔlaa se ɖiwolo pɩ-yɔɔ nɛ ɖɩɖɔ ɖɔnɛ nɖɩ ɖɩtʋʋzaa yɔ nɛ ɖɩñaɣ pana nɛ ɖɩwɩlɩ se ɖɩsɔɔlɩ Yehowa siŋŋ, pʋyɔɔ ɖɩñakɩ pana nɛ ɖɩlakɩ mbʋ payɩ ɖɩlakɩ ɛ-sɛtʋ taa yɔ. Pɩsa nɛ ɖɩtalɩ kaɖʋwa ŋga lɛ, pɩwɛɛ se ɖɩkpa ɖa-tɩ.

YE PƆTƆM SE ÐƖKPA ÐA-TƖ PƲ-TƆBƲƲ LƐ SUWE?

7. Ɛzɩma ɖɩpɩzɩɣ nɛ ɖɩwɩlɩ se ɖɩwɛɛ nɛ ɖɩkpaɣ ɖa-tɩ? (Luka 21:34)

⁷ Pɩtasɩnɩ se Yesu heyi ɛ-tɔmkpɛlɩkɩyaa se pakpa pa-tɩ nɛ mbʋ pɩlakɩ ɛjaɖɛ yɔɔ yɔ lɛ, eheyi-wɛ ɖɔɖɔ se pakpa pa-tɩ nɛ pa-mamaɣ pɛ-wɛtʋ nɛ pa-lakasɩ. Ðɩnaɣ lɩmaɣzɩyɛ nɖɩ kpayɩ kpayɩ tɔm ndʋ ɛyɔɔdɩ Luka 21:34 taa nɛ ɛpaɣ-wɛ yɔ tɩ-taa. (Kalɩ Luka 21:34.) Yesu yɔɔdaa se: «Ɩkpa mɩ-tɩ.» Ɛyʋ weyi ɛkpaɣ ɛ-tɩ yɔ, ɛcakɩnɩ ɛ-ɛsa se pɩsa nɛ ɛtɩlɩ mbʋ payɩ pɩpɩzɩɣ nɛ pɩkɔnɩ kaɖɛ ɛ nɛ Yehowa pa-taabalɩyɛ yɔ, nɛ ɛkpɛzɩɣ nɩŋgbanzɩ nzɩ pɩpɔzʋʋ yɔ se ɛfɛɛ-pʋ. Ye ɛlakɩ mbʋ yɔ, piyeki nɛ ɛɖɔkɩ ɛ-tɩ Ɛsɔ sɔɔlɩm taa.—Adu. 22:3; Yud. 20, 21.

8. Lɔŋ weyi apostoloo Pɔɔlɩ tasɩ Krɩstʋ ñɩma?

⁸ Apostoloo Pɔɔlɩ tasɩ lɔŋ Krɩstʋ mba se pakpa pa-tɩ. Kɩɖaʋ nakʋyʋ yɔ: Eheyi Krɩstʋ ñɩma mba paawɛ Efɛɛzɩ yɔ se: «Ɩcɔnɩ ɛzɩma ɩɖɔŋ yɔ pɩ-yɔɔ camɩyɛ nɛ pɩtaawɛɛ ɛzɩ ɛyaa mba pɛfɛyɩnɩ lɔŋsɩnɖɛ yɔ, ɛlɛ ɛzɩ lɔŋsɩnɖaa yɔ.» (Efɛz. 5:15, 16) Sataŋ ñakɩ pana kaahɛzaɣ se ɛwɛɛkɩ ɖa nɛ Yehowa ɖa-taabalɩyɛ, pʋyɔɔ Bibl tasɩɣ-ɖʋ lɔŋ se ‘ɖiwolo pɩ-yɔɔ nɛ ɖɩtɩlɩ mbʋ Yehowa sɔɔlɩm kɛnaa yɔ’ nɛ pɩsa nɛ ɖɩpɩzɩ nɛ ɖɩkandɩyɩ ɖa-tɩ yɔɔ nɛ ɖɩtaatɔlɩ ɛ-kpacanaa taa.—Efɛz. 5:17.

9. Ɛzɩma ɖɩpɩzɩɣ ɖɩla nɛ ɖɩtɩlɩ mbʋ Yehowa sɔɔlaa se ɖɩla yɔ?

⁹ Bibl tiheyi-ɖʋ mbʋ payɩ pɩpɩzɩɣ nɛ pɩkɔnɩ kaɖɛ ɖa nɛ Yehowa ɖa-taabalɩyɛ yɔ pɩ-tɔm. Ðoŋ ɖoŋ lɛ, pɩpɔzʋʋ se ɖɩkpaɣ lɩmaɣza pɩlɩɩnɩ tɔm ndʋ patɩyɔɔdɩ tɩ-tɔm ɖeyi ɖeyi Masɩ taa yɔ pɩ-yɔɔ. Pɩsa nɛ ɖɩkpaɣ lɩmaɣza kɩbana lɛ, pɩpɔzʋʋ se ɖɩtɩlɩ «mbʋ Yehowa sɔɔlɩm kɛnaa yɔ.» Ðɩpɩzɩɣ nɛ ɖɩla mbʋ ye ɖɩkpɛlɩkɩɣ Ɛsɔtɔm ɖoŋ ɖoŋ nɛ ɖɩmaɣzɩɣ tɩ-yɔɔ yɔ. Ðɩwɛɣ nɛ ɖɩnɩɣ Ɛsɔ sɔɔlɩm taa nɛ ɖɩwɛɣnɩ «Krɩstʋ maɣzɩm» nɛ pɩkɩlɩɣ lɛ, ɖɩkaɣ pɩzʋʋ nɛ ɖɩɖɔ «ɛzɩ lɔŋsɩnɖaa yɔ» nɛ pɩkɩlɩ, halɩ pɩkpɛndɩnɩ alɩwaatʋ ndʋ paɣtʋ natʋyʋ fɛyɩ ɖeyi ɖeyi nɛ tɩwɩlɩɣ-ɖʋ mbʋ pɩwɛɛ se ɖɩla yɔ. (1 Kɔr. 2:14-16) Nabʋyʋ taa pɩwɛ kɛlɛʋ se ɖiɖiɣzini mbʋ pɩwɛɛ se ɖikizi yɔ, ɛlɛ alɩwaatʋ natʋyʋ lɛ pɩfɛyɩ kɛlɛʋ.

10. Mbʋ pɩpɔzʋʋ se ɖikizi yɔ pɩ-taa nabʋyʋ lɛ we?

¹⁰ Mbʋ pɩpɔzʋʋ se ɖikizi yɔ pɩ-taa nabʋyʋ lɛ cɛbɛlʋʋ, sʋlʋm kpaŋʋʋ, hiluu, tɔm ndʋ tɩɖʋʋ ɖɩwɩzɩyɛ yɔ tɩ-yɔɔdʋʋ, aleɣya wena a-taa palakɩ puuyaɣ lakasɩ yɔ a-cɔnʋʋ, kʋzʋʋ kɩlɛmɩŋ cɔnʋʋ nɛ lakasɩ lɛɛsɩ nzɩ sɩnɩɣzɩnɩ mbʋ yɔ. (Keɣa 100:3) Ðo-koyindu Eleeu wɛɛ nɛ ɛñakɩ pana kaahɛzaɣ se ɛñɩnɩ nʋmɔŋ weyi ɩ-yɔɔ ɛtɩŋna nɛ ɛwɛɛkɩ ɖa nɛ Yehowa ɖa-taabalɩyɛ yɔ. (1 Pɩy. 5:8) Ye ɖiifeŋiɣ yɔ, Sataŋ pɩzɩɣ nɛ eɖuu ɖa-maɣzɩm nɛ ɖa-laŋɩyɛ taa ɛsɩsɛmɩyɛ, mulum lakasɩ, ɛsa naɣ naɣ, paɖɩyɛ, tɩ kpazʋʋ nɛ ɛyaa caɣnʋʋ ɖomaɣ. (Gal. 5:19-21) Kiɖe tɛɛ lɛ, ɖɩpɩzɩɣ nɛ ɖɩmaɣzɩ se lakasɩ nzɩ sɩɩkɔŋnɩ-ɖʋ kaɖɛ naɖɩyɛ. Ɛlɛ ye ɖɩtɩla nabʋyʋ kpaagbaa nɛ ɖɩlɔ lakasɩ nzɩ yɔ, sɩkaɣ wobu pɩ-yɔɔ nɛ sɩpaɣlɩɣ ɖa-taa ɛzɩ ñɩyʋʋ sɔtʋ ñɩŋgʋ paɣlʋʋ yɔ nɛ pɩkɔnɩ-ɖʋ kaɖɛ.—Yak. 1:14, 15.

11. Mɛsaɣ tɛɛ kpaca ŋgʋ taa pɩfɛyɩ se ɖɩtɔlɩ, nɛ ɛbɛ yɔɔ?

¹¹ Mɛsaɣ tɛɛ kpaca nakʋyʋ lɛ taabalɩyɛ kɩdɛkɛdɩyɛ ɖʋʋ. Iyele nɛ ɖɩmaɣzɩ wɛtʋ tʋnɛ tɩ-yɔɔ: Ña nɛ ɛyʋ nɔɔyʋ ɩkpɛndɩɣ nɛ ɩlakɩ tʋmɩyɛ nɛ ɛyʋ ɛnʋ ɛtɩkɛ Yehowa Aseɣɖe Tʋ. Ŋsɔɔlaa se ña-tʋmɩyɛ taa taabalʋ ɛnʋ ɛwɛɛnɩ lɩmaɣza kɩbana Yehowa Aseɣɖe Tɩnaa yɔɔ; pʋyɔɔ lɛ, ŋlakɩ-ɩ kɩbandʋ nɛ ŋsɩɣnɩ-ɩ. Halɩ nabʋyʋ taa ña nɛ ɩ ɩkpɛndɩɣ nɛ ɩtɔkɩ wɩsɩ taa tɔɔnaɣ. Pitileɖi lɛ, ña nɛ ɩ ɩpaɣzɩ kpɛndʋʋ nɛ ɩtɔkɩ-kɛ ɖoŋ ɖoŋ. Nabʋyʋ taa ɩlakɩ kɛdaɣ lɛ, ɛyɔɔdʋʋ tɔm ndʋ tɩtɩmʋna yɔ; ɛlɛ kiɖe tɛɛ lɛ ŋtaasɔɔlɩ-tʋ. Alɩwaatʋ wɛɛ nɛ tɩɖɛɣ lɛ, tɔm ndʋ tɩmalɩnɩ-ŋ nɛ tɩɩtasɩɣ-ŋ cɛyʋʋ. Kɩyakʋ nakʋyʋ ɩtɛm tʋmɩyɛ lɛ ña-tʋmɩyɛ taa taabalʋ ɛnʋ ɛya-ŋ se iwolo nɛ ɩñɔɔ sʋlʋm nɛ ŋtisi. Pɩtɛmnaa se ŋkɔma nɛ ŋpaɣzɩ wɛnʋʋ ña-tʋmɩyɛ taa taabalʋ lɩmaɣza. Pɩɩkaɣ leɖuu pʋcɔ nɛ ŋpaɣzɩ labʋ lakasɩ nzɩ ña-tʋmɩyɛ taa taabalʋ ɛnʋ ɛlakɩ yɔ. Pɩkɛ toovenim se ɖɩñaŋ paa weyi nɛ ɖɩlakɩ-ɩ kɩbandʋ; ɛlɛ pɩwɛɛ se ɖɩtɔzɩ se mba ɖɩlɩzɩɣ nɛ ɖa nɛ wɛ ɖɩkpakɩɣ alɩwaatʋ nɛ ɖɩcakɩ yɔ pakaɣ wɛnʋʋ ɖoŋ siŋŋ ɖɔ-yɔɔ. (1 Kɔr. 15:33) Ye ɖɩkpaɣ ɖa-tɩ ɛzɩ Yesu seɣtuu-ɖʋ se ɖɩla yɔ, ɖɩɩkaɣ ɖʋʋ taabalɩyɛ nɛ ɛyaa mba paaɖɔŋ Yehowa paɣtʋ nɛ ɛ-paɣtʋ kila yɔɔ yɔ. (2 Kɔr. 6:15) Ðɩkaɣ naʋ kaɖɛ nɖɩ taabalɩyɛ nɖɩ ɖɩpɩzɩɣ nɛ ɖɩkɔnɩ-ɖʋ yɔ nɛ ɖɩfɛɛ-ɖɩ.

LABƖNƖ ÑA-ALƖWAATƲ TƲMƖYƐ CAMƖYƐ

12. Ɛbɛ pɩɩwɛɛ se Yesu tɔmkpɛlɩkɩyaa ɩla alɩwaatʋ ndʋ pɛwɛɛ nɛ paɖaŋɩɣ Yeruzalɛm nɛ kɩ-tɛ templo yɔkʋʋ yɔ?

¹² Yesu kaasɔɔlaa se pɩɖɔkɩnɩ ɛ-tɔmkpɛlɩkɩyaa alɩwaatʋ ndʋ pɛwɛɣ nɛ paɖaŋɩɣ Yeruzalɛm nɛ kɩ-tɛ templo yɔkʋʋ yɔ. Ɛɛɖʋ-wɛ tʋmɩyɛ se pala. Ɛɛɖʋ-wɛ paɣtʋ se posusi tɔm kɩbandʋ «Yeruzalɛm taa, Yuudee tɩŋa taa nɛ Samaarii taa, nɛ piwolo pɩtalɩ tɛtʋ kamaɣ yɔɔ.» (Tʋma 1:6-8) Tʋmɩyɛ nɖɩ ɖɩɩkɛ tʋmɩyɛ sɔsɔyɛ kpem. Alɩwaatʋ ndʋ palakɩ mbʋ payɩ papɩzɩɣ yɔ se posusi ɛyaa lalaa tɔm yɔ, pɛwɛɛ nɛ palakɩnɩ pa-alɩwaatʋ tʋmɩyɛ camɩyɛ.

13. Ɛbɛ yɔɔ pɩcɛyaa se ɖɩlabɩnɩ ɖa-alɩwaatʋ tʋmɩyɛ camɩyɛ? (Koloosi mba 4:5)

¹³ Kalɩ Koloosi mba 4:5. Pɩsa nɛ ɖɩkpa ɖa-tɩ lɛ, pɩpɔzʋʋ se ɖɩmaɣzɩ ɛzɩma ɖɩlakɩnɩ tʋmɩyɛ ɖa-alɩwaatʋ yɔ pɩ-yɔɔ camɩyɛ. ‘Kʋñɔŋ pɩzɩɣ nɛ kɩtɔlɩ’ ɖa-taa paa weyi lɛ ɛ-yɔɔ nɛ ɛtɩɖʋna. (Ekl. 9:11) Ðe-wezuu pɩzɩɣ nɛ kɩsɩɩ tɩnaɣ yem tuda.

14-15. Ɛzɩma ɖɩpɩzɩɣ nɛ ɖɩlabɩnɩ ɖa-alɩwaatʋ tʋmɩyɛ camɩyɛ? (Ebree mba 6:11, 12) (Cɔnɩ ɖɔɖɔ kɩlɛmʋʋ.)

¹⁴ Ðɩpɩzɩɣ nɛ ɖɩlabɩnɩ ɖa-alɩwaatʋ tʋmɩyɛ camɩyɛ ye ɖɩlakɩ Yehowa sɔɔlɩm nɛ ɖɩcɛyɩsɩɣ ɖa nɛ ɩ ɖa-taabalɩyɛ yɔ. (Yoh. 14:21) Pɩcɛyaa se ‘ɖɩɖɔkɩ ɖa-tɩ kpam, pɩtaacɛŋɛsɩ-ɖʋ; paa ɛzɩmtaa lɛ, ɖɩwɛɛnɩ tʋma sakɩyɛ Kɩbaɣlʋ tʋmɩyɛ taa.’ (1 Kɔr. 15:58) Ðɩnɛ ɛlɛ, alɩwaatʋ ndʋ ɖe-wezuu yaa ɛjaɖɛ ɖɩnɛ ɖɩtɛŋ yɔ, pɩɩkaɣ-ɖʋ labʋ ɛzɩ ɖɩtɩla sakɩyɛ Yehowa sɛtʋ taa yɔ.—Mat. 24:13; Roma 14:8.

¹⁵ Sɔnɔ, Yesu wɛɛ ewoki pɩ-yɔɔ nɛ eɖiyiɣ ɛ-tɔmkpɛlɩkɩyaa nɛ posusuu Ɛsɔ Kewiyaɣ tɔm tɛtʋ kpeekpe yɔɔ. Ɛwɛɛ nɛ ɛɖɔŋ tɔm ndʋ ɛyɔɔdaa yɔ tɩ-yɔɔ. Yesu tɩŋɩɣnɩ Yehowa ɛgbɛyɛ yɔɔ nɛ ɛfalɩsɩɣ-ɖʋ se ɖɩna ɛzɩma ɖisusi tɔm yɔ nɛ ɛhaɣ-ɖʋ wondu ndʋ pɩpɔzʋʋ-ɖʋ yɔ se ɖiwolo pɩ-yɔɔ nɛ ɖisusi tɔm kɩbandʋ. (Mat. 28:18-20) Alɩwaatʋ ndʋ ɖɩɖaŋaa se Yehowa eyele nɛ ɛjaɖɛ ɖɩnɛ ɖɩsɩɩ tɩnaɣ yɔ, ye ɖɩwɛɛ nɛ ɖɩñakɩ pana tɔm susuu nɛ tɔm wɩlʋʋ tʋmɩyɛ taa nɛ ye ɖɩwɛɛ nɛ ɖifeŋiɣ yɔ, pʋbʋ lɛ ɖɩwɩlɩɣ se ɖɩlakɩ ɖo-ɖoŋ ɖeɖe. Ye ɖɩɖɔŋ lɔŋ tasʋʋ mbʋ pɩwɛ Ebree mba 6:11, 12 taa yɔ pɩ-yɔɔ yɔ, ɖɩkaɣ ñɔnʋʋ ɖe-lidaʋ kpam nɛ «pɩkɔɔ pɩtalɩ tɩnaɣ yɔɔ.»—Kalɩ Ebree mba 6:11, 12.

16. Ɛbɛ ɖɩtɛm ɖa-taa se ɖɩlakɩ?

¹⁶ Yehowa lɩzɩ kɩyakʋ nɛ ñɩyʋʋ ŋgʋ kɩ-yɔɔ ɛkaɣ yebu nɛ Sataŋ ɛjaɖɛ ɖɩnɛ ɖɩsɩɩ tɩnaɣ yɔ. Alɩwaatʋ ndʋ lɛ, Yehowa kaɣ yebu nɛ natʋ tɔm ndʋ payɩ eyeba nɛ pama ɛ-Tɔm taa nɛ tɩyɔɔdʋʋ ɛjaɖɛ kɩfaɖɛ tɔm yɔ tɩla. Ɛlɛ nabʋyʋ taa pɩpɩzɩɣ nɛ pɩlabɩ-ɖʋ ɛzɩ ɛjaɖɛ ɖɩnɛ ɖɩ-tɛm ɛɛkɔŋ lɔŋ yɔ. Paa mbʋ yɔ Yehowa kɩyakʋ ‘ɛɛcakɩ wayɩ.’ (Hab. 2:3) Ye mbʋ, tɛtɛ nɛ ɖɩtɛ ɖa-taa se ‘ɖɩkpazɩɣ Yehowa nɛ ɛsa nɛ ɖɩwɩlɩ se ‘ɖɩtaɣ liu Ɛsɔ ɖa-ñʋʋ yaɖʋ.’—Mik. 7:7.