Tɔm ñʋʋ ŋgʋ kɩsɩɣnɩ halaa mba palakɩ-wɛ kañatʋ yɔ

Tɔm ndʋ papaɣzɩnɩ jw.org yɔɔ tɔm ñʋʋ «Bibl ɛsɩndaa lɛ, pɩcɛyaa se pohuuzi halaa yɔɔ.» Lien nakʋyʋ wɛ tɔm ñʋʋ ŋgʋ kɩ-ɖɩdɛnɖɛ nɛ ye ŋñɩɣ kɩ-yɔɔ yɔ piyeki nɛ ŋkpaɣ tɔm ñʋʋ ŋgʋ kɩ-tɛ PDF. Nɛ ye ŋlabɩ PDF ŋgʋ kɩ-tɛ photocopie yɔ kɩmakɩnɩ traktɩ kʋɖʋmʋʋ walanzɩ. Payaɣ koobu halɩñɩnʋ nɔɔyʋ se Stacy, ɛwɛ Etaazuunii ɛjaɖɛ taa. Ɛyɔɔdaa se: «Malabɩ photocopie tɔm ñʋʋ ŋgʋ nɛ ma nɛ koobu halɩñɩnʋ nɔɔyʋ ɖiwoni-kʋ halaa mba palakɩ-wɛ kañatʋ yɔ pa-kʋyʋʋ ɖɩɖʋyɛ taa; lone nɖɩ, ɖɩɩwɛ mɛ-ɛgbɛyɛ kooka taa.»

Ðɩha takayaɣ ŋga lone nɖɩ ɖɩ-taa tʋmlaɖʋ nɔɔyʋ lɛ, ɛpɔzɩ se ɖɩtasɩ-ɩ sɔzʋʋ nɛ ɛha lone nɖɩ ɖɩ-taa ɛyaa lalaa. Piyeba nɛ ɖɩha takayɩsɩ nzɩ sɩcɛzɩ 40 yɔ, nɛ ɖɩha ɖɔɖɔ jw.org tɛ carte de visite waa 30. Ðɩpɩsɩ pʋwayɩ lɛ, lone nɖɩ ɖɩ-yɔɔ cɔnɩyʋ heyi-ɖʋ se ɛsɔɔlaa se ɖɩwɩlɩ halaa mba pɛwɛ peeɖe yɔ ɛzɩma ɖɩkpɛlɩkɩɣnɩ ɛyaa Bibl yɔ.

Stacy nɛ koobiya halɩñɩma lalaa 2 powobi kʋyʋʋ ɖɩɖʋyɛ lɛɛɖɛ taa nɛ patayɩ takayɩsɩ 5, nɛ tʋmlaɖaa heyi-wɛ se pʋwayɩ lɛ patasɩ-wɛ wonuu takayɩsɩ nzɩ. Tʋmlaɖʋ nɔɔyʋ yɔɔdaa se: «Takayaɣ kanɛ kakaɣ sɩnʋʋ halaa mba pɛwɛ cɩnɛ yɔ.» Ɛtasɩ yɔɔdʋʋ se: «Pɩpɔzʋʋ-ɖʋ kɛ.» Koobiya halɩñɩma mba, papɩsɩ pʋwayɩ lɛ halaa mba paawɛ peeɖe yɔ pa-taa sakɩyɛ kpeɣli se pana ɛzɩma ɖɩkpɛlɩkɩɣnɩ ɛyaa Bibl yɔ. Nɛ pa-taa 2 yɔɔdɩ se pɔsɔɔlaa se powolo kpɩtaʋ ɖɩdɛnɖɛ kediɣzaɣ ŋga pakaɣ labʋ Kewiyaɣ kpaaŋ taa yɔ.

Stacy yɔɔdaa se: «Ɛzɩma ɛyaa mʋ tɔm ñʋʋ kɩbaŋʋ kʋnɛ yɔ pɩɖɩɣzɩ-ɖʋ kpem. Alɩwaatʋ ndʋ ɖɩlakɩ tɔm ñʋʋ ŋgʋ photocopie nɛ ɖikpiyi-kʋ nɛ kɩwɛɛ ɛzɩ traktɩ yɔ kɩwɛ cɔnʋʋ, nɛ pɩkɛ nʋmɔʋ kɩbaŋʋ ŋgʋ kɩ-yɔɔ ɖɩtɩŋɩɣna nɛ ɖisusuu Ɛsɔ Kewiyaɣ tɔm halaa mba palakɩ-wɛ kañatʋ yɔ. Ðɩna ɛzɩma tɔm ñʋʋ ŋgʋ kɩkɛdɩnɩ ɛyaa yɔ lɛ, pitukuni-ɖʋ siŋŋ, nɛ ɖa-taa tɛma se Yehowa kaɣ-ɖʋ sɩnʋʋ nɛ ɖiwolo pɩ-yɔɔ nɛ ɖisusuu tɔm kɩbandʋ halaa mba nɛ pɩkɩlɩ.»