Labɩnɩ tʋmɩyɛ jw.org ñɔ-tɔm susuu taa​—“Kɛ Yehowa taabalʋ”

Ðɛ-tɛ intɛrnɛɛtɩ lone hɔɔlʋʋ La Bible et vous yɔɔ paɖʋ tɔm ñʋʋ Deviens l’ami de Jéhovah se kɩsɩnɩ piya; nɛ kɩ-taa nɛ hendu, videowaa nɛ tʋma ndɩ ndɩ. Ŋtɛm hɔɔlʋʋ kʋnɛ tʋmɩyɛ labɩnʋʋ ñɔ-tɔm susuu taa? Ye ŋkpɛlɩkɩɣnɩ lʋlɩyʋ weyi ɛwɛnɩ piya cikpesi yɔ, pɩwɛɣ ɖeu se ŋwɩlɩ-ɩ hɔɔlʋʋ kʋnɛ. Ŋlabɩ mbʋ yɔ, piseɣtiɣ-i nɛ ewolo ɖɛ-tɛ intɛrnɛɛtɩ lone hɔɔlɩŋ lɛɛŋ yɔɔ ɖɔɖɔ.

Koobu nɔɔyʋ tayaɣ Kewiyaɣ tɔm No. 38 tɛ traktɩ, nɛ ɛkatɩ halʋ nɔɔyʋ nɛ ɛha-ɩ kʋ, nɛ ɛlɛ paɣzɩ-kʋ kalʋʋ kpaagbaa. Halʋ ɛnʋ ɛɛwɛnɩ piya nɛ sɩɩsɔɔlaa se sɩtɩlɩ traktɩ ŋgʋ kɩ-taa tɔm. Koobu ɛnɛ ɛyɔɔdɩ kɩ-taa tɔm pazɩ nɛ ɛtɛ lɛ, ɛwɩlɩ halʋ ɛnʋ ɖɛ-tɛ intɛrnɛɛtɩ lone tɛ adɖɛɛsɩ ŋgʋ kɩwɛ traktɩ wayɩ yɔ. Ɛzɩma tɔm tʋnɛ tɩɩkɛdɩnɩ halʋ siŋŋ yɔ, koobu ɛnɛ, ewolo pɩ-yɔɔ nɛ ɛwɩlɩ halʋ ɛnʋ Kalɛɛb videowaa mba ɛɛkpaɣ ɛ-pɔrtaabɩlɩ yɔɔ yɔ, pa-taa nakʋyʋ.

Ðo-koobu halɩñɩnʋ nɔɔyʋ wɩlɩ ɛ-tʋmɩyɛ taa halʋ weyi ɛɛwɛnɩ piya cikpesi yɔ, ɖɛ-tɛ intɛrnɛɛtɩ lone nɛ mbʋ mbʋ pɩwɛ ɖɩ-taa se pɩsɩnɩ hɔŋ yɔ. Peeɖe halʋ ɛnɛ ɛ nɛ e-piya papaɣzɩ ɖɩ-yɔɔ wobu. Pʋwayɩ lɛ halʋ ɛnɛ ɛkɔɔ nɛ eheyi ɖo-koobu halɩñɩnʋ se e-piya wɛɛ nɛ siteɣ hendu ndʋ tɩ-ñʋʋ tɔŋ se “Prêche la parole” ndʋ tɩwɛ hɔɔlʋʋ “Deviens l’ami de Jéhovah” yɔɔ yɔ paa ɖooye.

Pɩwɛɣ ɖeu se ña ɖɔɖɔ hɔɔlʋʋ kʋnɛ kɩ-yɔɔ wobu ɛmalɩnɩ-ŋ nɛ ŋkpakɩɣ videowaa, hendu nɛ tʋma ndɩ ndɩ wena awɛ peeɖe yɔ, ñɔ-pɔrtaabɩlɩ yɔɔ. Ye ŋlakɩ mbʋ yɔ, pɩwɛɣ-ŋ kɛlɛʋ se ŋlabɩnɩ tʋmɩyɛ jw.org hɔɔlʋʋ kʋnɛ tɔm susuu taa camɩyɛ. Wonuu kɩbaŋʋ kʋnɛ kɩkaɣ-ɖʋ sɩnʋʋ nɛ ɖɩkɛ Kɩbaɣlʋ yomaa mba palakɩ pa-tʋmɩyɛ camɩyɛ yɔ.​—Tʋma 20:19.