Wiɖiyi ɛtɛlɛmwaa lakasɩ kaɣ sɩʋ tɩnaɣ na?

Ɛtɛlɛmwaa lakasɩ nasɩyɩ lakɩ lɛ, ŋpɩzɩɣ nɛ ŋpɔzɩ ña-tɩ tɔm tʋnɛ: ‘Suwe Ɛsɔ maɣzɩɣ lakasɩ nzɩ sɩ-yɔɔ? Ɛbɛ yɔɔ lakasɩ nzɩ sɩlakɩ? Wiɖiyi ɛtɛlɛmwaa lakasɩa kaɣ sɩʋ tɩnaɣ na? Ɛzɩma manpɩzɩɣ nɛ mancaɣ wezuu paa sɔɔndʋ ɛkpaɣ-m nɛ ɛtɛlɛmwaa lakasɩ yɔ?’ Ɛzɩma Bible cosi tɔm ndʋ tɩ-yɔɔ yɔ pɩpɩzɩɣ nɛ pɩhɛzɩ ña-laŋɩyɛ.

Ɛsɔ maɣzɩɣ suwe ɛtɛlɛmwaa lakasɩ yɔɔ?

Ɛsɔ paɖɩɣ puuyaɣ nɛ ɛtɛlɛmwaa lakasɩ. (Keɣa 10:5; Aduwa 6:16, 17) Nɛ Ɛsɔ lone taa caɣyʋ Yesu kaakizini ɛ-tɔmkpɛlɩkɩyaa se pataalakɩ puuyaɣ lakasɩ. (Maatiyee 26:50-52) Paa nabɛyɛ ɛyɔɔdʋʋ se Ɛsɔ hɩɖɛ taa palakɩ ɛtɛlɛmwaa lakasɩ yɔ, toovenim taa lɛ lakasɩ nzɩ sɩɩkɛdɩɣnɩ Ɛsɔ. Halɩ Ɛsɔ eewelisiɣ pa-adɩma.—Izaayii 1:15.

Ɛsɔ maɣzɩɣ mba payɩ palakɩ kʋñɔŋ yɔ pɔ-yɔɔ, pɩkpɛndɩnɩ mba payɩ ɛtɛlɛmwaa lakasɩ kɔnɩ asɛyʋʋ pɔ-yɔɔ yɔ. (Keɣa 30:8; 1 Pɩyɛɛrɩ 5:7) Bibl wɩlɩɣ ɖɔɖɔ se Ɛsɔ kaɣ yebu nɛ puuyaɣ lakasɩ sɩɩ tɩnaɣ.—Izaayii 60:18.

Mbʋ pʋ-cɔlɔ ɛtɛlɛmwaa lakasɩ lɩɣnɩ ɖeyi ɖeyi yɔ

Bibl heyiɣ-ɖʋ mbʋ pʋ-cɔlɔ ɛtɛlɛmwaa lakasɩ lɩɣna ɖeyi ɖeyi yɔ: “Ɛyʋ tɔkɩ kewiyitu ɛyʋ lɛlʋ yɔɔ se pɩkɔnɩ ɛlɛ kaɖɛ.” (Eklesɩyastɩ 8:9) Kpaɣnɩ ɖooo caanaʋ taa nɛ pɩtalɩ sɔnɔ ɛyaa mba pɛwɛnɩ ɖoŋ lalaa yɔɔ yɔ, palakɩ lalaa kañatʋ nɛ pawɩlɩɣ-wɛ kʋñɔmɩŋ. Nɛ mba palakɩ-wɛ kañatʋ ndʋ yɔ, pituyuu-wɛ se patɩŋnɩ ɛtɛlɛmwaa lakasɩ yɔɔ nɛ pɛlɛdɩ.—Eklesɩyastɩ 7:7.

Ɛtɛlɛmwaa lakasɩ kaɣ sɩʋ tɩnaɣ

Ɛsɔ labɩ tamaɣ se ɛkaɣ yebu nɛ sɔɔndʋ nɛ puuyaɣ lakasɩ pasɩɩ tɩnaɣ nɛ laŋhɛzɩyɛ wɛɛ tɛtʋ yɔɔ. (Izaayii 32:18; Mikee 4:3, 4) Mbʋ ɛkaɣ labʋ yɔ mbʋ yɔ:

• Ɛkaɣ yebu nɛ mbʋ pʋ-cɔlɔ ɛtɛlɛmwaa lakasɩ lɩɣnɩ ɖeyi ɖeyi yɔ, pɩsɩɩ tɩnaɣ. Ɛkaɣ yebu nɛ e-komina ŋgʋ kɩkaɣ tɔɔʋ kewiyitu ɛjaɖɛ kpeekpe yɔɔ yɔ kɩlɛɣzɩ ɛyaa kominawaa lone taa. Komina ŋgʋ kɩ-ñʋʋdʋ Yesu Krɩstʋ ɛɛkaɣ labʋ tɛ yɔɔ tɛ yɔɔ lakasɩ nɛ ɛkaɣ yebu nɛ kañatʋ lakasɩ nɛ puuyaɣ lakasɩ, pasɩɩ tɩnaɣ. (Keɣa 71:2, 14) Alɩwaatʋ ndʋ tɩ-taa lɛ, nɔɔyʋ ɛɛkaɣ tasʋʋ labʋ ɛtɛlɛmwaa lakasɩ. Ɛyaa kaɣ wɛʋ “tamtam ɖɩhɛzɩyɛ taa”.—Keɣa 36:10, 11.

• Ɛkaɣ ñɔɔzʋʋ mbʋ payɩ ɛtɛlɛmwaa lakasɩ wɛɛkaa yɔ. Ɛsɔ kaɣ waʋ heŋ weyi payɩ ɛtɛlɛmwaa lakasɩ kɔnɩ ɛyaa yɔɔ yɔ, paa pɩtɩɩkɛ tomnaɣ yɔɔ heŋ yaa ɖoŋ weyi lakasɩ nzɩ sɩwɛnɩ ɛyaa lɩmaɣza yɔɔ yɔ. (Izaayii 65:17; Natʋ 21:3, 4.) Halɩ ɛlabɩ tamaɣ se ɛkaɣ fezuu sɩɖaa nɛ pacaɣ wezuu laŋhɛzɩyɛ taa tɛtʋ yɔɔ.—Yohanɛɛsɩ 5:28, 29.

Bibl heyiɣ-ɖʋ mbʋ pʋyɔɔ ɖa-taa pɩzɩɣ nɛ pɩtɛ se piileɖiɣ lɛ, Ɛsɔ ɖɩzɩɣ ɛtɛlɛmwaa lakasɩ nɛ sɩsɩɩ tɩnaɣ yɔ. Ɛlɛ ŋpɩzɩɣ nɛ ŋpɔzɩ se ‘ɛbɛ yɔɔ Ɛsɔ yeba nɛ ɛtɛlɛmwaa lakasɩ wɛɛ halɩ nɛ sɔnɔ?’ Ye ŋsɔɔlaa se ŋtɩlɩ tɔm ndʋ tɩ-yɔɔ cosuu yɔ, cɔnɩ video Ɛbɛ yɔɔ Ɛsɔ ha nʋmɔʋ nɛ kʋñɔmɩŋ wɛɛ ɛjaɖɛ yɔɔ?