Pɩwɛɛ se Ɛsɔ sɛtʋ ɛgbɛyɛ ɛɖʋ nɔɔ politiki tɔm taa?

Ɛjaɖɛ hɔɔlɩŋ tɩŋa taa, ɛyaa sakɩyɛ mba payaɣ pa-tɩ se Yesu Krɩstʋ wayɩ tɩŋɩyaa yɔ, paɖʋʋ pɔ-nɔsɩ politiki tɔm taa siŋŋ. Nabɛyɛ ɖʋʋ nesi politiki agbaa taa mba nabɛyɛ yaa politiki agbaa naayɛ se pɩsa nɛ ɛyaa tɩlɩ pɛ-Ɛsɔ sɛtʋ, yaa lɩmaɣza wena pɛwɛnɩ wezuu kɩbaŋʋ caɣʋ paɣtʋ yɔɔ yɔ. Piyeba nɛ sakɩyɛ taa lɛ, politiki laɖaa tɩŋɩɣnɩ tɔm ndʋ titukuuni ɛyaa wezuu caɣʋ yɔ tɩ-yɔɔ se peyele nɛ Ɛsɔ sɛyaa tɩnɩ pɔ-yɔɔ. Hɔɔlɩŋ nɩɩyɩ taa lɛ, halɩ Ɛsɔ sɛtʋ ñʋndɩnaa nabɛyɛ ñɩnɩɣ se palɩzɩ-wɛ nɛ pɛwɛɛnɩ lona naayɛ komina taa. Halɩ ajɛɛ naayɛ taa, komina pɩzɩɣ nɛ kɩha waɖɛ Cooci nakʋyʋ nɛ kɩkɛ Ɛsɔ sɛtʋ ɛgbɛyɛ nɖɩ ɖɩwɛ kajalaɣ lone taa ɛjaɖɛ nɖɩ ɖɩ-taa yɔ.

Suwe ŋmaɣzɩɣ? Pɩmʋnaa se Yesu Krɩstʋ wayɩ tɩŋɩyaa ɩɖʋ pɔ-nɔsɩ politiki tɔm taa? Yesu kɩɖaʋ pɩzɩɣ kɩsɩnɩ-ŋ nɛ ŋcosi tɔm ndʋ tɩ-yɔɔ. Ɛyɔɔdaa se: «Maha-mɩ kɩɖaʋ se ɛzɩ malabʋ-mɩ yɔ, mɩ ɖɔɖɔ pɩwɛɛ se ɩla mbʋ.» (Yohanɛɛsɩ 13:15) Ye mbʋ, kɩɖaʋ ŋgʋ Yesu ha politiki hɔɔlʋʋ taa?

Yesu kaaɖʋ ɛ-nɔɔ politiki tɔm taa?

Aayɩ. Alɩwaatʋ ndʋ Yesu kaawɛ tɛtʋ yɔɔ yɔ, ɛtaaɖʋ ɛ-nɔɔ politiki tɔm taa.

Yesu taañɩnɩ se ɛwɛɛnɩ ɖoŋ politiki hɔɔlʋʋ taa. Alɩwaatʋ ndʋ Sataŋ Eleeu ñɩnaɣ se ɛcɛlɩ-ɩ «ɛjaɖɛ yɔɔ kewiyisi tɩŋa» yɔ, ekizaa mbʋ pʋyɔɔ yɔ ɛtaasɔɔlɩ se ɛwɛɛnɩ ɖoŋ ɛyaa kominawaa yɔɔ. (Maatiyee 4:8-10)a Alɩwaatʋ natʋyʋ taa, ɛyaa nabɛyɛ ñɩnaɣ se pañɩɣ Yesu yɔɔ nɛ ɛpɩsɩ politiki laɖʋ mbʋ pʋyɔɔ yɔ panawa se ɛpɩzɩɣ nɛ ɛkɛ ɖiyiyu kɩbanʋ. Bibl yɔɔdaa se: «Yesu nawa se pacaɣaɣ kɔm se pakpa-ɩ nɛ pasɩɩ-ɩ wiyaʋ lɛ, ɛkʋyɩ nɛ ɛɖaɣnɩ ɖɛʋ pʋʋ taa e-ɖeke.» (Yohanɛɛsɩ 6:15) Yesu titisi nɛ ɛla mbʋ ɛyaa mba pañɩnaɣ se ɛla yɔ. Ekizaa se ɛɛɖʋʋ ɛ-nɔɔ politiki tɔm taa.

Yesu tɩtɩnɩ politiki hɔɔlʋʋ nakʋyʋ yɔɔ. Kɩɖaʋ nakʋyʋ yɔ, Yesu alɩwaatʋ taa, Yuuda mba taasɔɔlɩ se pɛhɛyɩ lambuu ŋgʋ Roma komina pɛlɩɣ-wɛ se pɛhɛyɩ yɔ nɛ pamaɣzɩɣ se pɩkɛnɩ mulum lakasɩ. Alɩwaatʋ ndʋ pañɩnaɣ se Yesu ɛɖʋ ɛ-nɔɔ tɔm ndʋ tɩ-taa yɔ, ɛlɛ titisi nɛ ɛɖʋ ɛ-nɔɔ politiki nɔɔhɔnɖɛ nɖɩ ɖɩ-taa se ɛwɛlɩ se pɩmʋnaa yaa pɩtɩmʋna se pɛhɛyɩ lambuu ŋgʋ. Eheyi-wɛ se: «Ɩcɛlɩ Sezaarɩ mbʋ pɩkɛ Sezaarɩ pʋyʋ yɔ, ɛlɛ ɩcɛlɩ Ɛsɔ mbʋ pɩkɛ Ɛsɔ pʋyʋ yɔ.» (Maarɩkɩ 12:13-17) Ɛtɩtɩnɩ politiki lɩmaɣzɩyɛ naɖɩyɛ yɔɔ, ɛlɛ ɛwɩlaa se pɩwɛɛ se pɛhɛyɩ lambuu ŋgʋ Sezaarɩ pɔzʋʋ yɔ, pʋ-tɔbʋʋ se lambuu ŋgʋ Roma komina pɔzʋʋ yɔ. Alɩwaatʋ kʋɖʋmtʋ ndʋ tɩ-taa lɛ, ɛwɩlaa se ñamtʋ ndʋ pɩwɛɛ se pɛcɛlɩ ɛyaa kominawaa yɔ, tɩwɛnɩ tɩnaɣ. Pɩtɩmʋna se ɛyʋ ɛcɛlɩ komina nakʋyʋ mbʋ pɩwɛɛ se pɛcɛlɩ Ɛsɔ yɔ, paa pɩtɩɩkɛ ñamtʋ yaa sɛtʋ yɔ.—Maatiyee 4:10; 22:37, 38.

Ɛsɔ Kewiyaɣ ŋga kɛkɛ ɛsɔdaa komina yɔ kɔ-yɔɔ Yesu lʋba. (Luka 4:43) Ɛtɩɖʋ ɛ-nɔɔ politiki tɔm taa, mbʋ pʋyɔɔ yɔ ɛɛnawa se ɛyaa kominawaa ɩɩkaɣ pɩzʋʋ nɛ pala mbʋ Ɛsɔ sɔɔlaa yɔ tɛtʋ yɔɔ, ɛlɛ Ɛsɔ Kewiyaɣ ɖeke pɩzɩɣna nɛ kala mbʋ. (Maatiyee 6:10) Eeɖiɣzinaa se Ɛsɔ Kewiyaɣ ɛɛkaɣ tɩŋnʋʋ ɛyaa kominawaa yɔɔ nɛ kala mbʋ Ɛsɔ sɔɔlaa yɔ, ɛlɛ kakaɣ lɛɣzʋʋ ɛyaa kominawaa mba po-lone taa.—Danɩyɛɛlɩ 2:44.

Kajalaɣ pɩnzɩ mɩnʋʋ taa Krɩstʋ mba kaaɖʋ pɔ-nɔsɩ politiki tɔm taa?

Aayɩ. Yesu wayɩ tɩŋɩyaa kaaɖɔm paɣtʋ ndʋ ɛɖʋwa se ‘pataakɛ ɛjaɖɛ yɔɔ mba’ yɔ tɩ-yɔɔ. (Yohanɛɛsɩ 15:19) Patɩŋ ɛ-kɩɖaʋ nɛ patɩɖʋ pɔ-nɔsɩ ɛjaɖɛ yɔɔ politiki tɔm taa. (Yohanɛɛsɩ 17:16; 18:36) Patɩɖʋ pɔ-nɔsɩ politiki tɔm taa, ɛlɛ palabɩ tʋmɩyɛ nɖɩ Yesu ɖʋ-wɛ yɔ; nɖɩ lɛ se posusi Ɛsɔ Kewiyaɣ tɔm nɛ papɩsɩ ɛyaa tɔmkpɛlɩkɩyaa.—Maatiyee 28:18-20; Tʋma Labʋ 10:42.

Kajalaɣ pɩnzɩ mɩnʋʋ taa Krɩstʋ mba kaasɩ Ɛsɔ ñamtʋ kajalaɣ ɖeɖe pe-wezuu caɣʋ taa, ɛlɛ paanawa ɖɔɖɔ se pɩwɛɛ paña ɛyaa kominawaa. (Tʋma Labʋ 5:29; 1 Pɩyɛɛrɩ 2:13, 17) Pañaŋaɣ paɣtʋ ndʋ komina ɖʋwaɣ yɔ nɛ peheyiɣ lambuu. (Roma mba 13:1, 7) Paa pataaɖʋʋ pɔ-nɔsɩ politiki tɔm taa yɔ, paalabɩnɩ tʋmɩyɛ wala wena komina haɣaɣ se pɩkandɩyɩ ɛyaa yɔɔ yɔ nɛ tʋma wena komina haɣaɣ waɖɛ se pala ɛyaa yɔ.—Tʋma Labʋ 25:10, 11; Filiipi mba 1:7.

Ða-alɩwaatʋ taa Krɩstʋ mba ɩɩɖʋʋ pɔ-nɔsɩ politiki tɔm taa

Bibl wɩlɩɣ kpayɩ kpayɩ se Yesu nɛ ɛ-wayɩ tɩŋɩyaa kajalaɣ ñɩma taaɖʋ pɔ-nɔsɩ politiki tɔm taa. Pʋyɔɔ Yehowa Aseɣɖe Tɩnaa mba pɛwɛ ɛjaɖɛ kpeekpe yɔɔ yɔ paaɖʋʋ pɔ-nɔsɩ politiki tɔm taa paa ññɩɩ. Posusuu «Kewiyaɣ tɔm kɩbandʋ» ɛzɩ kajalaɣ pɩnzɩ mɩnʋʋ taa Krɩstʋ mba yɔ; tʋmɩyɛ nɖɩ Yesu ɖʋ paɣtʋ se pala.—Maatiyee 24:14.