Pɩwɛɛ se Krɩstʋ mba ɩla you na?—Suwe Bibl yɔɔdʋʋ?

Ɛzɩ Ukrɛɛnɩ you wɩlʋʋ yɔ, Krɩstʋ mba Ɛsɔ sɛtʋ agbaa ñʋndɩnaa sakɩyɛ ɖʋʋ pɔ-nɔsɩ yoŋ taa. Iyele nɛ ɖɩna ɛzɩma Ɛsɔ sɛtʋ agbaa ñʋndɩnaa nabɛyɛ ɖʋʋ nesi hɔɔlʋʋ kʋɖʋmʋʋ nɛ lalaa ñaɖʋʋ nesi hɔɔlʋʋ lɛɛkʋ yɔ.

• «Ðɔ-sɔɔjanaa mba payɩ pɛwɛɛ nɛ palʋkɩnɩ koyindu weyi ɛkɔm pɛ-ɛjaɖɛ Ukrɛɛnɩ wayɩ yɔ, pamʋnɩ hɩɖɛ ɖʋʋ nɛ ɖɩwɛnɩ ɛsɩmɩyɛ pɔ-yɔɔ. Ðɩsɔɔlɩ-mɩ, ɖɩwɛ mɩ-hɔɔlʋʋ yɔɔ nɛ ɖɩtɩmɩɣ mɩ-yɔɔ siŋŋ paa ɛzɩmtaa.» (Kiev tɛtʋ taa orthodoxe cooci ñʋʋdʋ Épiphane 1^er yɔɔdɩnɩ tɔm ndʋ The Jerusalem Post taa 16 mars 2022 wiye).

• «Rusii orthodoxe cooci ñʋʋdʋ labɩ ŋgee cooci nakʋyʋ Rusii sɔɔjanaa yɔɔ Kujuka wiye nɛ eseɣti-wɛ se palʋ pɛ-ɛjaɖɛ yɔɔ alɩwaatʋ ndʋ payɩ Rusii komina woki pɩ-yɔɔ nɛ kiyouni Ukrɛɛnɩ yɔ mbʋ pʋyɔɔ yɔ nɔɔyʋ ɛɛpɩzɩɣ nɛ ɛla mbʋ po-lone taa.» (Reuters, 3 avril 2022).

Pɩpɔzʋʋ se Krɩstʋ mba ɩla you na? Suwe Bibl yɔɔdʋʋ?

Ndʋ Bibl yɔɔdʋʋ toovenim taa yɔ

Bibl wɩlɩɣ se mba patɩŋɩɣ Yesu Krɩstʋ wayɩ toovenim taa yɔ, pɩtɩpɔzɩ se paɖʋ pɔ-nɔɔ yoŋ taa.

• «Pɩsɩnɩ ña-laɣɖɛ ɖi-lone taa, mbʋ pʋyɔɔ yɔ mba pa-tɩŋa payɩ pakpakɩɣ laɣɖɛ lalaa yɔɔ yɔ, pakaɣ-wɛ kʋʋ nɛ laɣɖɛ» (Maatiyee 26:52).

  Ye ɛyʋ ɛɖʋʋ nesi you yaa ɛlakɩ you yɔ, ɛzɩ toovenim taa lɛ ɛwɛɛ nɛ ɛɖɔŋ Yesu tɔm yɔɔ?

• «Manɖʋʋ-mɩ paɣtʋ kɩfatʋ, se ɩsɔɔlɩ ɖama; ɛzɩ mɔnsɔɔlʋʋ-mɩ yɔ, mɩ ɖɔɖɔ ɩsɔɔlɩ ɖama mbʋ. Ye sɔɔlɩm ɛwɛ mɩ-hɛkʋ taa yɔ, piyeki nɛ ɛyaa tɩŋa tɩlɩ se ɩkɛ mɔn-tɔmkpɛlɩkɩyaa.» (Yohanɛɛsɩ 13:34, 35).

  Weyi ɛtɩnɩɣ hɔɔlʋʋ nakʋyʋ yɔɔ you taa yɔ ɛwɛɛ nɛ ɛwɩlɩɣ sɔɔlɩm mbʋ patɩlɩɣnɩ Yesu tɔmkpɛlɩkɩyaa yaa ɛ-wayɩ tɩŋɩyaa yɔ?

Ye ŋsɔɔlaa se ŋtɩlɩ nɛ pɩkɩlɩ yɔ, kalɩ tɔm ñʋʋ «Peut-on concilier guerre et christianisme?»

Pɩwɛɛ se Krɩstʋ mba ɩla you sɔnɔ?

Ðɩpɩzɩɣ nɛ ɖitisi se Krɩstʋ mba ɩɩkaɣ ɖʋʋ pɔ-nɔɔ yoŋ weyi ɩwɛ sɔnɔ ɩ-taa? Ɛɛɛ. Bibl kaayɔɔdaa se ɖa-alɩwaatʋ taa, pʋ-tɔbʋʋ se «kɛdɛzaɣ kɩyakɩŋ taa», ɛyaa kaɣ lɩnʋʋ ajɛɛ tɩŋa taa, nɛ «paakaɣ tasʋʋ kpɛlɩkʋʋ you labʋ» nɛ tɔm ndʋ Yesu kaawɩlaa. (Izaayii 2:2, 4, pɩ-tɛɛ tɔm).

• Kalɩ Feŋuu Tilimiye taa tɔm ñʋŋ «La guerre: qu’en pense Dieu?» nɛ ŋtɩlɩ nɛ pɩkɩlɩ.

Pɩkazɩ pazɩ lɛ, «laŋhɛzɩyɛ tɛ Ɛsɔ» Yehowaa kaɣ tɩŋnʋʋ e-Kewiyaɣ ŋga kɛwɛ ɛsɔdaa yɔ kɔ-yɔɔ nɛ eholi ɛyaa «nazɩm nɛ puuyaɣ lakasɩ taa» (Filiipi mba 4:9; Keɣa 72:14).

• Pɩsa nɛ ŋna ɛzɩma ɛkaɣ labʋ mbʋ yɔ lɛ, cɔnɩ video Ɛbɛ Ɛsɔ Kewiyaɣ kɛnaa?