Politiki laɖaa wɛɛ nɛ papakɩ ɛyaa se Armaagedɔɔ ñɔtɩ kpam—Suwe Bibl yɔɔdʋʋ?

Paatɔ bɔmbɩ nakʋyʋ nɛ kɩyɔkɩ kondoloko sɔsɔʋ ŋgʋ kɩwɛ Krimee nɛ Rusii ajɛɛ hɛkʋ taa yɔ, nɛ kɩyakɩŋ naalɛ wayɩ 10 octobre 2022 wiye lɛ, Rusii tɔ bɔmbɩwaa nabɛyɛ Ukrɛɛnɩ ɛjaɖɛ tɛtʋ sɔsɔtʋ sakɩyɛ taa. Politiki laɖaa nabɛyɛ kaawɛɛ nɛ pɔyɔɔdʋʋ se pɩpɩzɩɣ nɛ pɩla se piileɖiɣ lɛ Armaagedɔɔ you paɣzɩɣ nɛ pɩla alɩwaatʋ pazɩ lɛ pɔtɔ bɔmbɩwaa mba.

• «[Etaazuunii ɛjaɖɛ ñʋʋdʋ John F.] Kennedy alɩwaatʋ taa, Amerika nɛ Kubaa pacaɣaɣ labɩnʋʋ tʋmɩyɛ bɔmbɩwaa you taa, nɛ kpaɣnɩ alɩwaatʋ ndʋ nɛ pɩtalɩ sɔnɔ wɛtʋ natʋyʋ tɩtasɩ labʋ nɛ tɩwɩlɩɣ se Armaagedɔɔ ñɔtɩ kpam. . . . Mamaɣzɩɣ se ɛyaa ɩɩpɩzɩɣ nɛ palabɩnɩ tʋmɩyɛ bɔmbɩwaa nɛ pɩɩtɛŋnɩ Armaagedɔɔ you.»—Etaazuunii ɛjaɖɛ ñʋʋdʋ Joe Biden yɔɔdɩnɩ tɔm ndʋ 6 octobre 2022 wiye.

• «Mentisiɣ se pɩpɩzɩɣ pɩtɛmnɩ Armaagedɔɔ mbʋ pʋyɔɔ yɔ ɛjaɖɛ kpeekpe sʋ kaɖɛ taa.»—Ukrɛɛnɩ ɛjaɖɛ ñʋʋdʋ Volodymyr Zelensky cosini tɔm ndʋ 8 octobre 2022 wiye alɩwaatʋ ndʋ pɔpɔzɩ-ɩ tɔm BBC News yɔɔ pɩlɩɩnɩ mbʋ pɩpɩzɩɣ nɛ pɩla ye palabɩnɩ tʋmɩyɛ bɔmbɩwaa you taa yɔ.

Ɛzɩ bɔmbɩwaa tʋmɩyɛ labɩnʋʋ kaɣnɩ yebu nɛ Armaagedɔɔ you paɣzɩ? Suwe Bibl yɔɔdʋʋ?

Ɛzɩ bɔmbɩwaa kaɣnɩ yebu nɛ Armaagedɔɔ you paɣzɩ?

Aayɩ. Bibl taa lɛ Natʋ 16:16 taa ɖeke ɖɩnaɣ tɔm piye «Armaagedɔɔ.» Pɩtɩkɛ you ŋgʋ ajɛɛ kaɣ labɩnʋʋ ɖama yɔ ɛlɛ pɩkɛ you ŋgʋ Ɛsɔ kaɣ labɩnʋʋ «tɛtʋ kpeekpe yɔɔ awiya» yɔ. (Natʋ 16:14) Ɛsɔ kaɣ tɩŋnʋʋ Armaagedɔɔ you yɔɔ nɛ eyele nɛ ɛyaa kewiyitu tɔɔʋ sɩɩ tɩnaɣ.—Danɩyɛɛlɩ 2:44.

Ye ŋsɔɔlaa se ŋtɩlɩ ɛzɩma Armaagedɔɔ kaɣ tukunuu tɛtʋ yɔ, kalɩ tɔm ñʋʋ Ɛbɛ Armaagedɔɔ you kɛnaa?

Yoŋ weyi ɩ-taa pɔtɔʋ bɔmbɩwaa yɔ ɩkaɣ ɖɩzʋʋ tɛtʋ nɛ ɛyaa mba pɛwɛ tɩ-yɔɔ yɔ?

Aayɩ. Paa ɛjaɖɛ ñʋndɩnaa ɩkɔma nɛ palabɩnɩ tʋmɩyɛ bɔmbɩwaa nɛ ɛsɩndaa yɔ, Ɛsɔ ɛɛkaɣ haʋ nʋmɔʋ se paɖɩzɩ tɛtʋ. Bibl yɔɔdʋʋ se:

• «Tɛtʋ wɛɣ ti-ɖeɖe tam.»—Eklezɩyasɩtɩ 1:4.

• «Tɛtʋ kaɣ pɩsʋʋ ɛyaa siɣsiɣ tɩnaa ñɩm, nɛ pakaɣ caɣʋ tɩ-yɔɔ tam.»—Keɣa 37:29.

Paa mbʋ yɔ, Bibl taa natʋ tɔm nɛ mbʋ pɩwɛɛ nɛ pɩlakɩ ɛjaɖɛ yɔɔ yɔ pɩwɩlɩɣ se pɩkazɩ pazɩ lɛ lɛɣzɩtʋ sɔsɔtʋ natʋyʋ kaɣ labʋ tɛtʋ yɔɔ. (Maatiyee 24:3-7; 2 Timootee 3:1-5) Pɩsa nɛ ŋtɩlɩ tɔm ndʋ Bibl yɔɔdʋʋ cee wayɩ yɔɔ lɛ ɖɩwɛnɩ Bibl kpɛlɩkʋʋ ɖʋtʋ ndʋ tɩwazɩɣ-ŋ yɔ.