Ɛzɩ kedeŋa kpeekpe yɔɔ ajɛɛ pombo mabʋ ɖʋtʋ kaɣ yebu nɛ nɔɔ kʋɖʋmaɣ wɛɛ ajɛɛ hɛkʋ taa toovenim na?—Suwe Bibl yɔɔdʋʋ?

Pataɣ liu se ɛyaa ɛzɩ miiliyaarɩwaa kagbanzɩ mbʋ yɔ, kaɣ cɔnʋʋ kedeŋa kpeekpe yɔɔ ajɛɛ pombo mabʋ ɖʋtʋ kpaɣnɩ 20 novembre nɛ piwolo 18 décembre 2022. Ɛyaa sakɩyɛ taɣ liu se pombo mabʋ ɖʋtʋ ndʋ tɩpɩzɩɣ tiyele nɛ nɔɔ kʋɖʋmaɣ wɛɛ ajɛɛ hɛkʋ taa nɛ halɩ tɩpɩzɩɣ tɩwazɩ ajɛɛ nɛ pɩkpaɖɩ mbʋ.

• «Hola aleɣya wɛnɩ ɖoŋ se alɛɣzɩ ɛjaɖɛ. Aseɣtiɣ ɛyaa. Awɛnɩ ɖoŋ weyi ɩ-wayɩ fɛyɩ yɔ se asɩnɩ ɛyaa nɛ pala nɔɔ kʋɖʋmaɣ.»—Nelson Mandela, Afrika Hadɛ Kiŋ ɛjaɖɛ ñʋʋdʋ kɩbɩnʋ.

• «Pombo mabʋ sɩɣnɩ ɛyaa se pala nɔɔ kʋɖʋmaɣ nɛ pɛwɛɛnɩ lidaʋ, pɛwɛɛ taa leleŋ, koboyaɣ nɛ sɔɔlɩm taa paa palɩnɩ ajɛɛ ndɩ ndɩ taa yɔ.»—Gianni Infantino, ɛgbɛyɛ nɖɩ payaɣ se FIFA yɔ ɖɩ-ñʋʋdʋ.a

Ɛzɩ kedeŋa kpeekpe yɔɔ ajɛɛ pombo mabʋ ɖʋtʋ yaa hola aleɣya lɛɛna pɩzɩɣ piyele nɛ ɛyaa talɩ kaɖʋwa ŋga? Lidaʋ wɛɛ se laŋhɛzɩyɛ nɛ nɔɔ kʋɖʋmaɣ kaɣ wɛʋ ajɛɛ hɛkʋ taa wiɖiyi?

Mbʋ kaɣnɩ yebu nɛ nɔɔ kʋɖʋmaɣ wɛɛ ɛjaɖɛ yɔɔ?

Pɩnaɣ kanɛ ka-taa, kedeŋa kpeekpe yɔɔ ajɛɛ pombo mabʋ ɖʋtʋ tɩkɛ pombo mabʋ ɖʋtʋ yem. Ðʋtʋ ndʋ tɩkɔnɩ nɔɔhɔnɖɛ ɛyaa wezuu caɣʋ nɛ politiki hɔɔlɩŋ taa pɩlɩɩnɩ wala wena pɩwɛɛ se paa ɛyʋ weyi ɛwɛɛnɩ yɔ, tɛtɛ pɛm ɛyaa po-tomnaɣ tɔlɩm yɔɔ nɛ ɛzɩma ɛya fɛyɩ kɩmaŋ liidiye hɔɔlʋʋ taa yɔ pɩ-yɔɔ.

Paa mbʋ yɔ, ɛyaa sakɩyɛ sɔɔlɩ cɔnʋʋ hola aleɣya ɛzɩ kedeŋa kpeekpe yɔɔ ajɛɛ pombo mabʋ ɖʋtʋ mbʋ yɔ. Pataɣ liu se aleɣya ana akaɣ yebu nɛ nɔɔ kʋɖʋmaɣ wɛɛ ɛyaa hɛkʋ taa ɛjaɖɛ kpeekpe yɔɔ. Ɛlɛ nɔɔ kʋɖʋmaɣ ŋga kaaleɖiɣ. Mbʋ pɩtɛzɩ wɛɛkʋʋ yɔ lɛ se ɖʋtʋ ndʋ tiyeki nɛ ɖɩnaɣ wɛtʋ nɛ lakasɩ nzɩ sɩtazɩɣ tayʋʋ ɛyaa hɛkʋ taa yɔ, nɛ ɛzɩ Bibl yɔɔdʋʋ yɔ, lakasɩ nzɩ pakaɣ naʋ alɩwaatʋ ndʋ payaɣ se «kɛdɛzaɣ kɩyakɩŋ» yɔ tɩ-taa.—2 Timootee 3:1-5.

Lidaʋ wɛɛ se ɛjaɖɛ kpeekpe yɔɔ ɛyaa kaɣ caɣʋ wezuu nɔɔ kʋɖʋmaɣ taa

Bibl haɣ-ɖʋ lidaʋ siŋŋ se ɛjaɖɛ kpeekpe yɔɔ ɛyaa kaɣ caɣʋ wezuu nɔɔ kʋɖʋmaɣ taa. Kɩhaɣ-ɖʋ lidaʋ se ɛyaa mba pɛwɛ tɛtʋ yɔɔ yɔ, pa-tɩŋa pakaɣ caɣʋ wezuu nɔɔ kʋɖʋmaɣ taa ɛsɔdaa komina ŋgʋ payaɣ se «Ɛsɔ Kewiyaɣ» yɔɔ kɛ-tɛɛ.—Luka 4:43; Maatiyee 6:10.

Kewiyaɣ ŋga ke-Wiyaʋ Yesu Krɩstʋ kaɣ yebu nɛ laŋhɛzɩyɛ wɛɛ ɛjaɖɛ kpeekpe yɔ. Bibl yɔɔdaa se:

• «Ɛyaa siɣsiɣ tɩnaa kaɣ nɛɣdʋʋ, nɛ laŋhɛzɩyɛ kaɣ tɔyʋʋ.»—Keɣa 72:7.

• «Ɛkaɣ holuu kʋñɔndʋ weyi ekou se pasɩnɩ-ɩ yɔ, . . . nazɩm nɛ puuyaɣ lakasɩ taa.»—Keɣa 72:12, 14.

Halɩ sɔnɔ maɣmaɣ, Yesu wɩlɩtʋ sɩnɩ ɛyaa miiliyɔɔwaa sakɩyɛ ajɛɛ 239 taa nɛ nɔɔ kʋɖʋmaɣ wɛɛ pɛ-hɛkʋ taa. Pɛkpɛlɩkɩ ɛzɩma peyele paɖʋʋ ɛyaa lalaa yɔ. Pɩsa nɛ ŋtɩlɩ nɛ pɩkpaɖɩ lɛ, kalɩ tɔm ñʋŋ «Ðɩpɩzɩɣ ɖiyele nɛ paɖɩyɛ sɩɩ tɩnaɣ.»