Kɩgalʋʋ 6:24-26—«Kɩbaɣlʋ ɛwazɩ ñɔ-yɔɔ nɛ ɛɖɔkɩ-ŋ!»

«Yehowa ɛwazɩ-ŋ nɛ ɛkandɩyɩ ñɔ-yɔɔ. Yehowa eyele nɛ ɛ-ɛsɩndaa ñandɩ ñɔ-yɔɔ, nɛ ɛna ña-pʋtɔdɩyɛ. Yehowa ɛkʋsɩ ɛ-ɛsa nɛ ñɔ-yɔɔ kiŋ nɛ ɛha-ŋ laŋhɛzɩyɛ.»—Kɩgalʋʋ 6:24-26, Ɛjaɖɛ kɩfaɖɛ tɔm ɖɛzʋʋ.

«Kɩbaɣlʋ ɛwazɩ ñɔ-yɔɔ nɛ ɛɖɔkɩ-ŋ! Kɩbaɣlʋ ɛtʋsɩ ñɔ-yɔɔ ɛ-ɛsɩndaa mintʋsʋʋ nɛ ɛna ña-pʋtɔdɩyɛ. Kɩbaɣlʋ ɛpamɩ-ŋ nɛ ɛsa nɛ ɛhɛzɩ ña-laŋɩyɛ!»—Kɩgalʋʋ 6:24-26, TAKAYAƔ KIÐEÐEA, Verbum Bible, 1997.

Kɩgalʋʋ 6:24-26 tɔbʋʋ nɩʋ

Tɔm ndʋ tɩwɛ masɩ sɩnɛ sɩ-taa yɔ, ndʋ cɔjɔnaa yaa Aarɔɔnɩ lʋlʋʋ taa mba kpakaɣ nɛ pawazɩɣnɩ Ɛsɔ samaɣ (Aarɔɔnɩ kaakɛnɩ Izrayɛɛlɩ mba cɔjɔ kɩlɩm kajalaɣ ñɩnʋ). (Ejipiti Lɩʋ 28:1) Tɔm ndʋ tɩɩlɩnɩ Ɛsɔ cɔlɔ. (Kɩgalʋʋ 6:22, 23) Ɛsɔ kaaheyi Moyizi se: «Heyi Aarɔɔnɩ nɛ ɛ-pɩyalaa se: “Ɛzʋnɔ pɩwɛɛ se ɩwazɩ Izrayɛɛlɩ samaɣ”» nɛ pʋwayɩ lɛ ɛyɔɔdɩ tɔm ndʋ tɩwɛ Kɩgalʋʋ 6:24-26 taa yɔ. Cɔjɔnaa mba paawɛ siɣsiɣ yɔ paañam Ɛsɔ paɣtʋ ndʋ. Paaɖʋ hɩɖɛ ɖɔɖɔ Ɛsɔ hɩɖɛ Yehowa.a Ðɩkalɩɣ kalɩtʋ 27 taa se: «Nɛ pɩwɛɛ se [cɔjɔnaa ɩsɩɩ] ma-hɩɖɛ Izrayɛɛlɩ samaɣ yɔɔ, nɛ mawazɩ-kɛ.»

«Yehowa ɛwazɩ-ŋ nɛ ɛkandɩyɩ ñɔ-yɔɔ.» Yehowa tɩŋɩɣnɩ ɛzɩma ɛkandɩyɩɣ ɛ-sɛyaa yɔɔ, eɖiyiɣ-wɛ nɛ eyeki nɛ pehikiɣ taa leleŋ pe-wezuu caɣʋ taa yɔ pɩ-yɔɔ nɛ ɛwazɩɣ-wɛ. (Aduwa 10:22) Kɩgalʋʋ 6:24-26 taa Yehowa yɔɔdʋʋnɩ pa-taa weyi kʋɖʋm kʋɖʋm. Tɔm ndʋ tɩpɩzɩɣ nɛ tɩwɩlɩ se pɩtasɩna se Ɛsɔ sɔɔlaa se ɛwazɩ samaɣ tɩŋa lɛ ɛsɔɔlaa ɖɔɖɔ se ɛwazɩ pa-taa paa weyi lɛ kʋɖʋm kʋɖʋm.

«Yehowa eyele nɛ ɛ-ɛsɩndaa ñandɩ ñɔ-yɔɔ, nɛ ɛna ña-pʋtɔdɩyɛ.» Ye pɔpɔzɩ Ɛsɔ se «eyele nɛ ɛ-ɛsɩndaa ñandɩ» nɔɔyʋ yɔɔ yɔ, pɩɩkɛ adɩma wena palakaɣ Ɛsɔ se ɛna pʋdʋ ɛnʋ ɛ-pʋtɔdɩyɛ yaa pʋdʋ ɛnʋ ɛ-tɔm ɛkɛdɩnɩ-ɩ yɔ.b Papɩzɩɣ nɛ pɛɖɛzɩ tɔm ndʋ ɖɔɖɔ se «KƖBAƔLƲ ɛmʋʋyɩnɩ-ŋ.» (Kɩgalʋʋ 6:25, New International Reader’s Version) Yehowa tɩŋɩɣnɩ ɛzɩma ɛlakɩ ɛ-samaɣ kɩbandʋ nɛ ɛnɩɣ ka-wɩzasɩ yɔ pɩ-yɔɔ nɛ ɛnaɣ ka-pʋtɔdɩyɛ.—Izaayii 30:18.

«Yehowac ɛkʋsɩ ɛ-ɛsa nɛ ñɔ-yɔɔ kiŋ nɛ ɛha-ŋ laŋhɛzɩyɛ.» Yehowa maɣzɩɣ ɛ-sɛyaa yɔɔ nɛ sɔɔlɩm nɛ ɛhaɣ-wɛ laŋhɛzɩyɛ nɛ pɩwɩlɩɣ se «ɛkʋsɩ ɛ-ɛsa» nɛ pɔ-yɔɔ kiŋ. Takayaɣ nakɛyɛ lɩzɩ pɩ-taa se «Ebree tɔm piye (shalom) nɖɩ pɛɖɛzɩ cɩnɛ se laŋhɛzɩyɛ yɔ, ɖɩɩwɩlɩɣ wɛtʋ ndʋ tɩ-taa ɛyʋ wɛɣ alɩwaatʋ ndʋ you nakʋyʋ fɛyɩ ɛ nɛ nɔɔyʋ pɛ-hɛkʋ taa yɔ ti-ɖeke, ɛlɛ ɖɩwɩlɩɣ ɖɔɖɔ pɛɛyɛ nɖɩ ɖɩ-taa ɛyʋ wɛɣ tomnaɣ yɔɔ nɛ alɩwaatʋ ndʋ taabalɩyɛ kɩbanɖɛ wɛɣ ɛ nɛ Ɛsɔ pɛ-hɛkʋ taa yɔ.»

Pʋcɔ nɛ Izrayɛɛlɩ mba hiɣ wazasɩ nzɩ sɩ-tɔm pɔyɔɔdɩ masɩ sɩnɛ sɩ-taa yɔ lɛ, pɩɩwɛɛ se paña Yehowa. (Levitiki 26:3-6, 9) Mbʋ mbʋ pɩɩlabɩ pa-awiya naayɛ ɛzɩ Salomɔɔ nɛ Ezekiyaasɩ alɩwaatʋ taa yɔ, pɩwɩlɩɣ kpayɩ kpayɩ se alɩwaatʋ ndʋ Izrayɛɛlɩ mba ñaŋaɣ Yehowa yɔ, ɛwazaɣ-wɛ ɛzɩ ɛɛlabʋ tamaɣ yɔ.—1 Awiya 4:20, 25; 2 Kroniiki 31:9, 10.

Pɩtɩkɛnɩ Krɩstʋ mba kɩjɛyʋʋ se papʋlʋtʋʋ tɔm ndʋ tɩwɛ masɩ nzɩ sɩ-taa yɔ, paa mbʋ yɔ, alɩwaatʋ ndʋ paatɩmɩɣnɩ Ɛsɔ lalaa yɔɔ yaa paakpazɩɣ po-koobiya Krɩstʋ mba ɖoŋ lɛ, papɩzɩɣ nɛ palabɩnɩ tʋmɩyɛ lɩmaɣza wena awɛ sɩ-taa yɔ. (1 Tesalooniiki mba 5:11, 25) Yehowa tɩlɛɣzɩ. Paa ɛzɩmtaa lɛ, ɛsɔɔlaa se ɛwazɩ ɛ-sɛyaa siɣsiɣ tɩnaa nɛ ɛkandɩyɩ pɔ-yɔɔ. Pʋyɔɔ lɛ, Krɩstʋ mba toovenim mba pɩzɩɣ nɛ pɛwɛɛ laŋhɛzɩyɛ taa mbʋ pʋyɔɔ yɔ panawa se pɔ-tɔm kɛdɩnɩ Yehowa nɛ «ɛ-ɛsɩndaa» ñandɩɣ pɔ-yɔɔ.

Tɔm ndʋ tɩcɔ Kɩgalʋʋ 6:24-26 nɛ tɩta yɔ

Izrayɛɛlɩ mba ɖɛɣaɣ Lidaʋ Tɛtʋ taa nɛ patalɩ pasɩŋ Sinayii Pʋʋ cɔlɔ lɛ, paɣtʋ ndʋ Ɛsɔ kaaɖʋ-wɛ peeɖe yɔ, ndʋ wɛnɩ Kɩgalʋʋ takayaɣ tɛ kajalaɣ ñʋŋ 10 taa. Paalabɩ peeɖe ɛzɩ pɩnaɣ mbʋ yɔ, nɛ alɩwaatʋ ndʋ tɩ-taa Yehowa kaañɔɔzɩ ɛ-samaɣ nɛ kapɩsɩ ɛjaɖɛ nɛ ɛɖʋ-kɛ paɣtʋ ndɩ ndɩ ndʋ pɛkpɛndaa nɛ payaa se Paɣtʋ ɛgbɛyɛ yɔ.

Yehowa kaaheyi ɖɔɖɔ Moyizi ɛzɩma pɩɩwɛɛ se Aarɔɔnɩ nɛ ɛ-pɩyalaa mba paalɩzaa se pɛkɛ cɔjɔnaa yɔ pawazɩ Izrayɛɛlɩ mba yɔ. (Kɩgalʋʋ 6:22, 23) Pʋwayɩ lɛ, Aarɔɔnɩ nɛ ɛ-lʋlʋʋ taa mba palakaɣnɩ tʋmɩyɛ tɔm ndʋ tɩwɛ Kɩgalʋʋ 6:24-26 taa yɔ nɛ pawazɩɣ samaɣ. Pɩkɔm nɛ pɩpɩsɩ sɔnzɩ cɔjɔnaa nɛ pɔyɔɔdʋʋ tɔm ndʋ alɩwaatʋ ndʋ palaɣ evemiye taa kɛdɛzaɣ kɩlaʋ templo taa yɔ.

Cɔnɩ video cikpeluu kʋnɛ nɛ ŋtɩlɩ Kɩgalʋʋ takayaɣ taa lɩmaɣza sɔsɔna.