Taabalʋ Kɩbanʋ Weyi Ŋpɩzɩɣ Ŋwɛɛna Yɔ Lɛ Ɛsɔ

Ye ŋpɩsɩ Ɛsɔ taabalʋ yɔ, nabʋyʋ fɛyɩ wazaɣ pɩtalɩ mbʋ. Ɛsɔ kaɣ-ŋ wɩlʋʋ ɛzɩma ŋla nɛ ŋhiɣ koboyaɣ nɛ laŋhɛzɩyɛ yɔ; ɛkaɣ-ŋ holuu cɛtɩm sɔnzɩ nɛ lakasɩ kɩdɛkɛdasɩ taa. Ɛsɔ kaɣ ña-adɩma welisuu. Ɛkaɣ-ŋ sɩnʋʋ nɛ ŋhiɣ laŋhʋlʋmɩyɛ nɛ lidaʋ. (Keɣa 70:5; 72:28) Ɛsɔ kaɣ-ŋ ɖɔkʋʋ alɩwaatʋ kaɖɛ ndʋ taa. (Keɣa 17:19) Nɛ pɩtasɩ lɛ, Ɛsɔ kaɣ-ŋ haʋ wezuu maatɛŋ.—Roma 6:23.

Ye ŋpɩsɩ Ɛsɔ taabalʋ yɔ, ŋpɩsɩɣ ɖɔɖɔ Ɛsɔ taabalaa lalaa taabalʋ. Toovenim taa lɛ, pɛwɛɣ ɛzɩ ño-koobiya yɔ. Pakaɣ-ŋ wɩlʋʋ Ɛsɔ tɔm, pakaɣ-ŋ sɩnaʋ, pakaɣ-ŋ sazʋʋ nɛ taa leleŋ.

Ða nɛ Ɛsɔ ɖɩfɛyɩ kɩmaŋ. Ye ŋñɩnɩɣ se ŋpɩsɩ Ɛsɔ taabalʋ yɔ, pʋwɛɛ se ŋnɩɩ tɔm tʋnɛ tɩ-taa camɩyɛ. Taabalɩyɛ nɖɩ ɖɩwɛ ɖa nɛ Ɛsɔ ɖɛ-hɛkʋ taa yɔ, ɖɩfɛyɩ ɛzɩ taabalɩyɛ nɖɩ ɖɩwɛ mba pɛwɛ kɩmaŋ yɔ pɛ-hɛkʋ taa yɔ. Ɛsɔ kɩlɩ-ɖʋ pɩnzɩ, ɛkɩlɩ-ɖʋ lɔŋsɩnɖɛ nɛ ɛkɩlɩ-ɖʋ ɖoŋ. Ɛnʋ pʋmʋnaa se ɛwɩlɩ-ɖʋ nʋmɔʋ. Pɩ-yɔɔ lɛ, ye ɖɩsɔɔlaa se ɖɩkɛ ɛ-taabalʋ yɔ, pʋmʋnaa se ɖikemsina-ɩ nɛ ɖɩla mbʋ mbʋ ɛpɔzʋʋ-ɖʋ yɔ. Ðɩlakɩ mbʋ kɔyɔ, pɩkaɣ-ɖʋ wazʋʋ paa ɖooye.—Izayii 48:18.