Ɛbɛ Sɩɣna-ŋ Nɛ Ŋtɩlɩ Toovenim Ɛsɔ Sɛtʋ Ɛgbɛyɛ?

Ye ŋñɩnɩɣ se ŋkɛ Ɛsɔ taabalʋ yɔ, pʋpɔzʋʋ ŋwɛɛ Ɛsɔ sɛtʋ ɛgbɛyɛ nɖɩ ɖɩ-yɔɔ Ɛsɔ ñɩɣ niye yɔ ɖɩ-taa. Yesu tɔm se “luŋiyaa siŋŋ [Ɛsɔ sɛyaa toovenim mba]” sɛɣ Ɛsɔ nɛ “toovenim.” (Yohanɛɛsɩ 4:23, 24) Ɛsɔ sɛtʋ nʋmɔʋ kɩbaŋʋ kʋyʋmʋʋ yeke wɛna. (Efɛɛzɩ 4:4-6) Toovenim Ɛsɔ sɛtʋ ɛgbɛyɛ wokini ɛyaa wezuu maatɛŋ taa. Ɛlɛ, cɛtɩm Ɛsɔ sɛtʋ ɛgbɛyɛ ñowokini ɛyaa sɩm taa.—Maatiyee 7:13, 14.

Ŋpɩzɩɣ ŋtɩlɩ toovenim Ɛsɔ sɛtʋ ɛgbɛyɛ ye ŋcɔŋna mba pɛwɛ ɖɩ-taa yɔ. Yehowa kɛ Ɛsɔ kɩbanʋ, pʋmʋnaa se toovenim Ɛsɔ sɛyaa ɩkɛ ɛyaa kɩbama. Toovenim Ɛsɔ sɛtʋ ɛgbɛyɛ lʋlʋʋ ɛyaa kɩbama ɛzɩ leemuu tɩʋ kɩbaŋʋ lʋlʋʋ leemiŋ kɩbaŋ yɔ.—Maatiyee 7:15-20.

Yehowa taabalaa iileyiɣni Bibl. Panawa se Bibl lɩnɩ Ɛsɔ cɔlɔ. Peyeki se kɩwɩlɩ-wɛ nʋmɔʋ, kɩsɩnɩ-wɛ nɛ palɩɩ tɩlasɩ taa nɛ patɩlɩ Ɛsɔ. (2 Timootee 3:16) Pañakɩ pana se pɔɖɔ ndʋ pawɩlɩɣ lɛlaa yɔ, tɩ-yɔɔ.

Yehowa taabalaa lɩzɩɣ sɔɔlɩm pawɩlɩɣ ɖama. Yesu lɩzɩ sɔɔlɩm ɛwɩlɩ ɛyaa, pʋyɔɔ yɔɔ ɛwɩlɩ-wɛ Ɛsɔtɔm nɛ ɛwaa ɖɔɖɔ kʋdɔndɩnaa. Mba pɛwɛ toovenim Ɛsɔ sɛtʋ ɛgbɛyɛ taa yɔ, pʋpɔzʋʋ ɖɔɖɔ se sɔɔlɩm ɛwɛɛ pɛ-hɛkʋ taa. Ɛzɩ Yesu yɔ, paapɛŋɩɣ tɛtɛ kʋñɔndɩnaa yaa mba paayɔɔdʋʋ pa-kʋnʋŋ yɔ. Yesu kaatɔm se sɔɔlɩm yekini patɩlɩ ɛ-tɔmkpɛlɩkɩyaa.—Yohanɛɛsɩ 13:35.

Ɛsɔ hɩɖɛ lɛ Yehowa nɛ ɛ-taabalaa ñaŋ-ɖɩ. Ye ŋwɛnɩ taabalʋ nɛ ɛɛyaɣ-ŋ nɛ ña-hɩɖɛ, mɩ-taabalɩyɛ wokini ɛzɩdaa? Aayɩ. Ye ɖɩwɛnɩ taabalʋ yɔ, ɖɩyaɣ-ɩ nɛ ɛ-hɩɖɛ nɛ ɖɩyɔɔdʋʋ ɛ-tɔm kɩbandʋ lɛlaa cɔlɔ. Ye mbʋ, mba pɔsɔɔlaa pɛkɛ Ɛsɔ taabalaa yɔ, pʋmʋnaa se payaɣ-ɩ nɛ ɛ-hɩɖɛ nɛ pawɩlɩ ɛ-tɔm ɛyaa lɛlaa. Yehowa sɔɔlaa se ɖɩla mbʋ.—Maatiyee 6:9; Roma 10:13, 14.

Ɛzɩ Yesu labʋ yɔ, Ɛsɔ taabalaa wɩlɩɣ ɛyaa Ɛsɔ Kewiyaɣ tɔm. Ɛsɔ Kewiyaɣ kɛ ɛsɔdaa komina ŋgʋ kɩkaɣ pɩsʋʋ tɛtʋ paradisuu yɔ. Ɛsɔ taabalaa susuu Ɛsɔ Kewiyaɣ tɔm kɩbandʋ.—Maatiyee 24:14.

Yehowa Aseɣɖe tɩnaa ñakɩ pana se pɛkɛ Ɛsɔ taabalaa. Paaleyiɣni Bibl. Sɔɔlɩm wɛ pɛ-hɛkʋ taa. Payaɣ Ɛsɔ nɛ ɛ-hɩɖɛ nɛ pañaŋ ɖɔɖɔ ɛ-hɩɖɛ nɖɩ. Pawɩlɩɣ lɛlaa Ɛsɔ Kewiyaɣ tɔm. Yehowa Aseɣɖe tɩnaa wɛnɩ toovenim Ɛsɔ sɛtʋ ɛgbɛyɛ taa sɔnɔ.