Se Cɛtɩm Ɛsɔ Sɛtʋ Ɛgbɛyɛ!

Sataŋ nɛ ɛ-aleewaa tɩsɔɔlɩ se ŋsɛɛ Ɛsɔ. Pɔsɔɔlaa se, ye pɩlakɩ yɔ, ɛyaa kpeekpe ɛha Ɛsɔ siɣye. Nʋmɔŋ weyi yɔɔ patɩŋɩɣna? Patɩŋɩɣnɩ ɛzɩ cɛtɩm Ɛsɔ sɛtʋ ɛgbɛyɛ yɔɔ. (2 Kɔrɛntɩ 11:13-15) Ɛsɔ sɛtʋ ɛgbɛyɛ nɖɩ ɖɩɩwɩlɩɣ toovenim tɔm ndʋ tɩwɛ Bibl taa yɔ, ɖɩkɛ cɛtɩm Ɛsɔ sɛtʋ ɛgbɛyɛ. Cɛtɩm Ɛsɔ sɛtʋ ɛgbɛyɛ wɛ ɛzɩ mbɔm kɩdɛkɛdʋʋ yɔ. Ŋna-kʋ ɛza yɔɔ, ŋtɔŋ mbɔm kʋtɔɔʋ, ɛlɛ ŋtɩkpa ña-tɩ kɩpɩzɩɣ kɩkɔna-ŋ kaɖɛ.

Cɛtɩm Ɛsɔ sɛtʋ ɛgbɛyɛ wɩlɩɣ tɔm ndʋ yɔ, tɩɩkɛdɩɣnɩ Ɛsɔ toovenim tʋ, Yehowa. Yesu ɛɛwɛ ɛjaɖɛ yɔɔ lɛ, Ɛsɔ sɛtʋ ɛgbɛyɛ naɖɩyɛ taa ɛyaa ñɩnaɣ se pakʋ-ɩ. Paamaɣzaɣ se pɛ-Ɛsɔ sɛtʋ wɛnɩ ɖeu. Paayɔɔdaɣ se: “Ðɩwɛnɩ Caa kʋyʋm: Ɛsɔ.” Yesu kaatisi pɔ-tɔm yɔɔ? Aayɩ! Eeheyi-wɛ se: “Mɩ-caa kɛlɛ eleeu [Yiliyu].” (Yohanɛɛsɩ 8:41, 44) Sɔnɔ ɛyaa sakɩyɛ maɣzɩɣ se pɛsɛɣ Ɛsɔ ɛlɛ toovenim taa lɛ, Sataŋ nɛ ɛ-aleewa pɛsɛɣ.—1 Kɔrɛntɩ 10:20.

Ɛzɩ tɩʋ kɩdɛkɛdʋʋ lʋlʋʋ pee kɩdɛkɛdɛɛ yɔ, cɛtɩm Ɛsɔ sɛtʋ ɛgbɛyɛ lʋlʋʋ ɛyaa kɩdɛkɛdaa. Ɛyaa lakɩ kɩdɛkɛdɩm sakɩyɛ, pɩ-yɔɔ kɩdɛkɛdɩm su ɛjaɖɛ yɔɔ. Wezuu kɩdɛkɛdʋʋ caɣʋ, you, mɩlɩm, ɛyaa nazʋʋ, ɛyaa kʋʋ, halaa caʋ nɛ ɖoŋ tɔyɩ ɛjaɖɛ yɔɔ. Mba palakɩ mbʋ yɔ, pa-taa sakɩyɛ wɛ Ɛsɔ sɛtʋ agbaa taa, ɛlɛ pɛ-Ɛsɔ sɛtʋ agbaa ana aawɩlɩɣ-wɛ camɩyɛ lakasɩ nʋmɔʋ. Ye pañɩnɩɣ pɛkɛ Ɛsɔ taabalaa yɔ, pʋpɔzʋʋ peyele lakasɩ kɩdɛkɛdasɩ labʋ.—Maatiyee 7:17, 18.

Cɛtɩm Ɛsɔ sɛtʋ ɛgbɛyɛ wɩlɩɣ ɛyaa se pɛsɛɛ sɩʋkpelesi. Ɛsɔ tɔma se pataasɛɛ sɩʋkpelesi. Pʋmʋna mbʋ. Ye nɔɔyʋ ɛɛyɔɔdʋʋnɩ-ŋ kaaʋ nɛ ɛyɔɔdʋʋnɩ ña-kɩlɛmʋʋ na, pɩlakɩ-ŋ ɖeu na? Ɛyʋ ɛnʋ ɛpɩzɩɣ ɛkɛ ña-taabalʋ siŋŋ na? Aayɩ, yaa we. Yehowa sɔɔlaa se ɛyaa ɛyɔɔdɩnɩ ɛ-maɣmaɣ na, pataayɔɔdɩnɩ sɩʋkpelesi yaa kɩlɛmɩŋ.—Egipiti Lɩʋ 20:4, 5.

Cɛtɩm Ɛsɔ sɛtʋ ɛgbɛyɛ wɩlɩɣ se pɩwɛ ɖeu se ɛyaa ɩla you nɛ pakʋ ɖama. Yesu kaatɔm se sɔɔlɩm kaɣ wɛʋ ɛ-tɔmkpɛlɩkɩyaa hɛkʋ taa. Ðɩɩpɩzɩɣ ɖɩkʋ mba ɖɩsɔɔlaa yɔ. (Yohanɛɛsɩ 13:35) Halɩ pɩtɩmʋnaa ɖɩkʋ ɛyaa kɩdɛkɛdaa. Alɩwaatʋ ndʋ Yesu koyindinaa kɔm se pakpaɣ-ɩ yɔ, ɛtɩha ɛ-tɔmkpɛlɩkɩyaa nʋmɔʋ se poyoni-wɛ nɛ pakandɩyɩ ɛ-yɔɔ. —Maatiyee 26:51, 52.

Cɛtɩm Ɛsɔ sɛtʋ ɛgbɛyɛ wɩlɩɣ se pakaɣ ɖʋʋ ɛyaa kɩdɛkɛdaa miŋ sɔsɔŋ taa. Ŋgʋ Bibl ñawɩlɩɣ se kɩdɛkɛdɩm kɩhɛyʋʋ lɛ sɩm. (Roma 6:23) Yehowa kɛ Ɛsɔ sɔɔlɩm tʋ. Ɛsɔ sɔɔlɩm tʋ pɩzɩɣ ɛnazɩ ɛyʋ tam? Aayɩ, yaa we. Yehowa sɔɔlɩ Ɛsɔ sɛtʋ ɛgbɛyɛ nɖɩ yɔ, ɖi-yeke koŋ ɖɩkaɣnɩ wɛʋ Paradisuu taa. (Natʋ 15:4) Ɛsɔ sɛtʋ agbaa wena atisiɣ Sataŋ cɛtɩm yɔɔ yɔ, a-tɩŋa payɩ aatasɩɣ wɛʋ.