Cɛtɩm Ɛsɔ sɛtʋ pisiɣ Ɛsɔ hɩɖɛ

Ɛsɔ kɛ sɔɔlɩm; ye mbʋ, ɛbɛ yɔɔ agbaa wena ayɔɔdʋʋ se asɛɣ-ɩ yɔ alakɩ kɩdɛkɛdɩm sakɩyɛ mbʋ? Agbaa ana akɛ cɛtɩm Ɛsɔ sɛtʋ agbaa nɛ apisiɣ Ɛsɔ hɩɖɛ. Ɛzɩma tɩyɛ apisiɣ Ɛsɔ hɩɖɛ? Ɛsɔ maɣzɩɣ suwe a-lakasɩ nzɩ sɩ-yɔɔ? Nɛ ɛbɛ kaɣ talʋʋ agbaa ana?

1. Ɛzɩma cɛtɩm Ɛsɔ sɛtʋ agbaa wɩlɩtʋ pisiɣ Ɛsɔ hɩɖɛ?

Cɛtɩm Ɛsɔ sɛtʋ agbaa kpaɣ «cɛtɩm nɛ [alɛɣzɩ] Ɛsɔ yɔɔ toovenim tɔm lone taa.» (Roma mba 1:25) Kɩɖaʋ nakʋyʋ yɔ: Ɛsɔ sɛtʋ agbaa sakɩyɛ ɩɩwɩlɩɣ Ɛsɔ hɩɖɛ ɛyaa. Ŋgʋ Bibl wɩlɩɣ se pɩpɔzʋʋ se palabɩnɩ Ɛsɔ hɩɖɛ tʋmɩyɛ. (Roma mba 10:13, 14) Ɛsɔ sɛtʋ agbaa ñʋndɩnaa nabɛyɛ wɩlɩɣ se ye asɛyʋʋ nakʋyʋ ɛlaba yɔ, Ɛsɔ cɔlɔ pɩlɩnaa. Ɛlɛ pɩkɛ cɛtɩm. Kɩdɛkɛdɩm nabʋyʋ ɛɛlɩɣnɩ Ɛsɔ cɔlɔ. (Kalɩ Yakubu 1:13.) Pɩlabɩ pʋtɔdɩyɛ se Ɛsɔ sɛtʋ agbaa cɛtɩm yɔɔ lɛ, ɛyaa sakɩyɛ posi pa-tɩ nɛ Ɛsɔ.

2. Ɛzɩma cɛtɩm Ɛsɔ sɛtʋ agbaa lakasɩ pisiɣ Ɛsɔ hɩɖɛ?

Cɛtɩm Ɛsɔ sɛtʋ agbaa ɩɩlakɩ ɛyaa kɩbandʋ ɛzɩ Yehowa lakʋʋ yɔ. Bibl yɔɔdaa se cɛtɩm Ɛsɔ sɛtʋ agbaa kɩwɛɛkɩm «kpa huuye nɛ pɩtalɩ ɖooo ɛsɔdaa.» (Natʋ 18:5) Pɩlakɩ pɩnzɩ mɩnɩŋ sakɩyɛ yɔ, cɛtɩm Ɛsɔ sɛtʋ agbaa wɛʋ nɛ aɖʋʋ a-nɔsɩ politiki tɔm taa, asɩɣnɩ you laɖaa nɛ aɖʋʋ nesi nɛ pakʋʋ ɛyaa miiliyɔɔwaa sakɩyɛ yɔ. Cɛtɩm Ɛsɔ sɛtʋ agbaa ñʋndɩnaa nabɛyɛ sɔɔlɩ ñɩm wondu nɛ pɔpɔzʋʋ pa-agbaa taa mba se pɔcɔɔ liidiye nɛ papɩzɩ nɛ pɛwɛɛnɩ ñɩm wondu ndʋ. Pa-lakasɩ nzɩ sɩwɩlɩɣ se toovenim taa lɛ, paasɩŋ Ɛsɔ nɛ patɩmʋna se pɛkɛ Ɛsɔ lone taa caɣyaa.—Kalɩ 1 Yohanɛɛsɩ 4:8.

3. Suwe Ɛsɔ maɣzɩɣ cɛtɩm Ɛsɔ sɛtʋ agbaa yɔɔ?

Ye mbʋ cɛtɩm Ɛsɔ sɛtʋ agbaa lakɩ yɔ pɩɖʋʋ-ŋ ɖɩwɩzɩyɛ yɔ, maɣzɩ nɛ ŋna ɛzɩma pɩlakɩ Yehowa yɔ! Ɛsɔɔlɩ ɛyaa, ɛlɛ ɛ-taa wɩɣnɩ Ɛsɔ sɛtʋ ñʋndɩnaa mba pepisiɣ ɛ-hɩɖɛ nɛ palakɩ kañatʋ pa-agbaa taa mba yɔ. Ɛyɔɔdaa se ɛkaɣ ɖɩzʋʋ cɛtɩm Ɛsɔ sɛtʋ agbaa «nɛ [paakaɣ-yɛ] tasʋʋ naʋ wiɖiyi.» (Natʋ 18:21) Pɩkazɩ pazɩ Ɛsɔ ɖɩzɩɣ cɛtɩm Ɛsɔ sɛtʋ agbaa kpeekpe.—Natʋ 18:8.

TAZƖ NƐ PILIMI

4. Pɩtɩkɛ Ɛsɔ sɛtʋ agbaa tɩŋa tɔm kɛdɩɣnɩ Ɛsɔ

Ɛyaa sakɩyɛ maɣzɩɣ se Ɛsɔ sɛtʋ agbaa kɛ nʋmɔŋ ndɩ ndɩ weyi iwokini ɛyaa Ɛsɔ cɔlɔ yɔ. Ɛlɛ pɩkɛ toovenim na? Ɩkalɩ Maatiyee 7:13, 14; nɛ pʋwayɩ lɛ ɩtazɩ tɔm tʋnɛ tɩ-taa:

• Suwe Bibl yɔɔdɩ nʋmɔʋ ŋgʋ kiwokini wezuu taa yɔ kɩ-yɔɔ?

Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.

VIDEO: Ɛsɔ sɛtʋ tɩŋa kɛdɩnɩ Ɛsɔ?—Hɔɔlʋʋ nakʋyʋ (3:22)

• Ɛzɩ Bibl yɔɔdaa se Ɛsɔ sɛtʋ agbaa sakɩyɛ tɔm kɛdɩnɩ Ɛsɔ?

5. Cɛtɩm Ɛsɔ sɛtʋ agbaa ɩɩmaɣzɩɣnɩ Ɛsɔ, sɔɔlɩm nʋmɔʋ taa

Ɛsɔ sɛtʋ agbaa pisi Ɛsɔ hɩɖɛ hɔɔlɩŋ sakɩyɛ taa. Hɔɔlɩŋ ɛnɩ ɩ-taa sɔsɔʋ nakʋyʋ lɛ ɛzɩma aɖʋʋ nesi yoŋ yɔ. Pɩsa nɛ ɩna pɩ-kɩɖaʋ nakʋyʋ lɛ, ɩcɔnɩ VIDEO. Pʋwayɩ lɛ ɩtazɩ tɔm tʋnɛ tɩ-taa.

VIDEO: Ɛzɩma Ɛsɔ sɛtʋ agbaa ɖʋ nesi Caama you 2 ñɩŋgʋ yɔ (2:22)

• Ɛbɛ Ɛsɔ sɛtʋ agbaa labɩ Caama you naalɛ ñɩŋgʋ alɩwaatʋ taa?

• Ŋmaɣzɩɣ suwe mbʋ agbaa ana alaba yɔ pɩ-yɔɔ?

Ɩkalɩ Yohanɛɛsɩ 13:34, 35 nɛ 17:16. Pʋwayɩ lɛ, ɩtazɩ tɔm tʋnɛ tɩ-taa:

• Ŋmaɣzɩɣ se Ɛsɔ sɛtʋ agbaa ɖʋʋ nesi yoŋ lɛ, ɛzɩma pɩlakɩ Yehowa?

• Cɛtɩm Ɛsɔ sɛtʋ agbaa cɔlɔ kɩdɛkɛdɩm sakɩyɛ mbʋ pɩlakɩ ɛjaɖɛ yɔɔ yɔ, pɩlɩɣna. Ŋpɩzɩɣ nɛ ŋha kɩɖaŋ nɩɩyɩ weyi ɩwɩlɩɣ se Ɛsɔ sɛtʋ agbaa ɩɩmaɣzɩɣnɩ Ɛsɔ, sɔɔlɩm nʋmɔʋ taa yɔ?

6. Ɛsɔ sɔɔlaa se ɛlɩzɩ ɛyaa cɛtɩm Ɛsɔ sɛtʋ agbaa yomiye taa

Ɩkalɩ Natʋ 18:4,a nɛ pʋwayɩ lɛ ɩtazɩ tɔm tʋnɛ tɩ-taa:

• Ŋtɩlʋʋ se Ɛsɔ sɔɔlaa se ɛlɩzɩ ɛyaa cɛtɩm Ɛsɔ sɛtʋ yomiye taa yɔ, ɛzɩma pɩlakɩ-ŋ?

7. Wolo pɩ-yɔɔ nɛ ŋkpɛlɩkɩ nɛ ŋtɩlɩ Ɛsɔ toovenim tʋ nɛ pɩkɩlɩ

Pɩpɔzʋʋ se ŋyele nɛ mbʋ cɛtɩm Ɛsɔ sɛtʋ agbaa lakɩ yɔ pɩwɛɛnɩ ɖoŋ lɩmaɣza wena ŋwɛnɩ Ɛsɔ yɔɔ yɔ a-yɔɔ? Maɣzɩ se pɩɣa nakɛyɛ kizaa se kaalakɩnɩ tʋmɩyɛ lɔŋ kɩbaŋ weyi ka-caa tasɩ-kɛ yɔ. Pɩɣa ŋga kalɩɩ ka-caa ɖɩɣa nɛ kalakɩ kɩdɛkɛdɩm. Ka-lakasɩ tɩkɛdɩnɩ ka-caa. Ɛbɛ yɔɔ pɩtɩmʋna se ɖɩmaɣzɩ se kaañamtʋ pɩɣa ŋga, ka-lakasɩ lɩnɩ ka-caa cɔlɔ na?

• Pɩwɛɣ ɖeu se cɛtɩm Ɛsɔ sɛtʋ agbaa lakasɩ yɔɔ lɛ, ɖɩkʋ Ɛsɔ tɔm nɛ ɖiyele kpɛlɩkʋʋ se ɖɩtɩlɩ-ɩ?

TOBI LƐ

Cɛtɩm Ɛsɔ sɛtʋ agbaa tɩŋɩɣnɩ a-cɛtɩm wɩlɩtʋ nɛ a-lakasɩ kɩdɛkɛdɩsɩ yɔɔ nɛ apisiɣ Ɛsɔ hɩɖɛ. Ɛsɔ kaɣ ɖɩzʋʋ cɛtɩm Ɛsɔ sɛtʋ agbaa.

Tɔm taa tazʋʋ

• Lɩmaɣza wena ŋwɛnɩ cɛtɩm Ɛsɔ sɛtʋ agbaa wɩlɩtʋ nɛ a-lakasɩ yɔɔ?

• Lɩmaɣza wena Yehowa wɛnɩ cɛtɩm Ɛsɔ sɛtʋ agbaa yɔɔ?

• Ɛbɛ Ɛsɔ kaɣ labʋ cɛtɩm Ɛsɔ sɛtʋ agbaa?

WONDU LƐƐTƲ

Ɛsɔ sɛtʋ agbaa tindima sɔsɔna naalɛ wena aakɛdɩɣnɩ Ɛsɔ yɔ.

«Toutes les religions se valent-elles? Mènent-elles toutes à Dieu?» (Intɛrnɛɛtɩ yɔɔ tɔm ñʋʋ)

Ɛbɛ yɔɔ Yehowa sɔɔlaa se ɖa nɛ lalaa ɖɩkpɛndɩ nɛ ɖɩsɛɛ-ɩ?

«Est-il nécessaire d’appartenir à une religion organisée?» (Intɛrnɛɛtɩ yɔɔ tɔm ñʋʋ)

Fada nɔɔyʋ wɛɛ nɛ ɛpɩtɩɣ ɛ-Ɛsɔ sɛtʋ ɛgbɛyɛ yɔɔ. Paa mbʋ yɔ, etisaa nɛ ɛkpɛlɩkɩ Ɛsɔ yɔɔ toovenim tɔm.

«Pourquoi un prêtre a quitté son Église» (Réveillez-vous!, février 2015)

Pɩnzɩ sakɩyɛ yɔ, Ɛsɔ sɛtʋ agbaa wɛʋ nɛ awɩlɩɣ cɛtɩm tɔm ndʋ tiyeki nɛ ɛyaa maɣzɩɣ se Ɛsɔ posini-ɖʋ nɛ ɛkɛ kañatʋ tʋ yɔ.

«Des mensonges qui empêchent d’aimer Dieu» (La Tour de Garde, 1^er novembre, 2013)