Ɛbɛ Pɩtɛŋnɩ Ɛyʋ Weyi Ɛsɩba Yɔ?

Ɛyʋ sɩkɩ lɛ, ɛɛtasɩɣ wɛʋ wezuu ɖoli. Sɩm wɛ ɛzɩ ɖom yɔ. (Yohanɛɛsɩ 11:11-14) Sɩɖaa ɩɩpɩzɩɣ panɩɩ, pana, pɔyɔɔdɩ yaa pamaɣzɩ natʋyʋ. (Eklesɩyastɩ 9:5, 10) Cɛtɩm Ɛsɔ sɛtʋ agbaa wɩlɩɣ se ɛyʋ sɩkɩ lɛ, etiki hadɛdɩnaa cɔlɔ. Ɛlɛ Bibl ñaayɔɔdʋʋ mbʋ.

Sɩɖaa ɩɩpɩzɩɣ pasɩnɩ-ɖʋ, nɛ paapɩzɩɣ palabɩ-ɖʋ kɩdɛkɛdɩm. Paa le ɛyaa lakɩ sɩɖaa sɔnzɩ nɛ palaɣ-wɛ kɩlaŋ, mbʋ pʋyɔɔ yɔ pamaɣzɩɣ se pɩkɛdɩnɩ-wɛ. Lakasɩ nzɩ sɩɩkɛdɩɣnɩ Ɛsɔ mbʋ pʋyɔɔ yɔ pɩkɛ cɛtɩm mbʋ pɩlɩnɩ Sataŋ cɔlɔ yɔ. Sɩɩpɩzɩɣ ɖɔɖɔ sɩkɛdɩnɩ sɩɖaa mbʋ pʋyɔɔ yɔ, patɩtasɩ wɛʋ wezuu. Pɩtɩmʋnaa ɖise sɩɖaa sɔɔndʋ yaa ɖɩsɛɛ-wɛ. Ɛsɔ yeke koŋ pʋmʋnaa ɖɩsɛɛ.—Maatiyee 4:10.

Sɩɖaa kaɣ tasʋʋ wezuu caɣʋ. Yehowa kaɣ kʋsʋʋ sɩɖaa se pacaɣ wezuu paradisuu taa tɛtʋ yɔɔ. Ɛlɛ, alɩwaatʋ ndʋ tɩwɛnɩ ɛzɩdaa. (Yohanɛɛsɩ 5:28, 29; Tʋma 24:15) Ɛsɔ pɩzɩɣ efezi mba pasɩba yɔ, ɛzɩ ŋpɩzɩɣ ɖɔɖɔ se ŋfezi ɛyʋ nɛ ɖom yɔɔ yɔ.—Maarkɩ 5:22, 23, 41, 42.

Sataŋ cɛtɩɣnɩ ɛyaa se ɛyʋ ɛsɩba yɔ ewoki ɖoli. Sataŋ nɛ ɛ-aleewaa yekina nɛ ɛyaa maɣzɩɣ se ɛyʋ kalɩzaɣ ɛɛsɩkɩ nɛ kapɩzɩɣ kaɖʋ kʋdɔŋ nɛ kanazɩ ɛyaa. Nabʋyʋ taa, Sataŋ tɩŋɩɣnɩ ɖoza nɛ ñazɩñazɩŋ yɔɔ nɛ ɛcɛtɩɣ ɛyaa. Yehowa ɛɛkatɩɣ mba pañɩnɩɣ se pɔyɔɔdɩnɩ sɩɖaa yɔ.—Wayɩ Wayɩ Paɣtʋ 18:10-12.