Ɛbɛ pɩtɛŋnɩ ɛyʋ weyi ɛsɩba yɔ?

Ñɛ-ɛyʋ kʋsɔɔlʋ nɔɔyʋ sɩba? Siziŋ nɩʋ alɩwaatʋ ndʋ tɩ-taa ŋpɩzɩɣ nɛ ŋpɔzɩ se: «Ɛbɛ pɩtɛŋnɩ ɛyʋ weyi ɛsɩba yɔ? Ɛzɩ lidaʋ nakʋyʋ wɛɛ se ɖɩkaɣ tasʋʋ naʋ ɖɛ-ɛyaa kʋsɔɔlaa mba pasɩba yɔ?» Tɔm ñʋʋ kʋnɛ nɛ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma Bibl cosi tɔm ndʋ tɩ-yɔɔ yɔ nɛ ɛzɩma pɩhɛzɩɣ ɖa-laŋa yɔ.

1. Ɛbɛ pɩtɛŋnɩ ɛyʋ weyi ɛsɩba yɔ?

Yesu kpaɣ sɩm nɛ ɛmaɣzɩnɩ ɖom cukaŋ ñɩmbʋ nabʋyʋ. Ɛyʋ weyi eɖou yɔ, ɛɛpɩzɩɣ nɛ ɛna mbʋ piɖiɣni labʋ ɛ-cɔlɔ yɔ. Ɛbɛ yɔɔ pɔtɔŋ se sɩm wɛ ɛzɩ ɖom yɔ? Ɛyʋ sɩkɩ lɛ, ɛɛtasɩɣ nɩʋ siziŋ. Paa ɛɛsɔɔlɩ ɛ-taabalaa nɛ ɛ-hɔʋ taa mba siŋŋ yɔ, pɩɩlakɩ-ɩ ɛzɩ ɛwɛ ɛ-ɖeke yɔ. Bibl yɔɔdaa se: «sɩɖaa ɩɩsɩŋ natʋyʋ paa ññɩɩ.»—Kalɩ Eklezɩyasɩtɩ 9:5.

2. Ye ɖɩtɩlɩ sɩm yɔɔ toovenim tɔm yɔ, ɛzɩma pɩpɩzɩɣ nɛ pɩwazɩ-ɖʋ?

Ɛyaa sakɩyɛ seɣ sɩm sɔɔndʋ nɛ halɩ peseɣ sɩɖaa sɔɔndʋ ɖɔɖɔ. Ɛlɛ tɔm ndʋ Bibl yɔɔdʋʋ sɩm yɔɔ yɔ, tɩhɛzɩɣ ɛyaa laŋa. Yesu yɔɔdaa se: «Toovenim kaɣ-mɩ holuu.» (Yohanɛɛsɩ 8:32) Ɛsɔ sɛtʋ agbaa sakɩyɛ wɩlɩɣ se ɛyʋ wɛnɩ kalɩzaɣ ŋga kaasɩkɩ nɛ kacakɩ wezuu ɛ-sɩm wayɩ yɔ. Ɛlɛ pɩtɩkɛ tɔm ndʋ Bibl wɩlɩɣ. Toovenim taa lɛ, ɛyʋ ɛɛlakɩ kʋñɔŋ ɛ-sɩm wayɩ. Pɩtasɩ lɛ, sɩɖaa ɩɩsɩŋ natʋyʋ; pʋyɔɔ lɛ, paapɩzɩɣ nɛ panazɩ nɔɔyʋ. Ye mbʋ pɩtɩcɛyɩ se pɛhɛzɩ pa-laŋa, ɖɩsɛɛ-wɛ yaa ɖɩsɛɛ Ɛsɔ pɔ-yɔɔ.

Ɛyaa nabɛyɛ yɔɔdʋʋ se papɩzɩɣ nɛ pɔyɔɔdɩnɩ sɩɖaa. Ɛlɛ pɩɩpɩzɩɣ nɛ pɩla mbʋ kpa. Ɛzɩ ɖɩnaʋ yɔ sɩɖaa «ɩɩsɩŋ natʋyʋ paa ññɩɩ.» Mba pamaɣzɩɣ se pɛ-ɛyaa kʋsɔɔlaa mba pasɩba yɔ pɔyɔɔdʋʋnɩ yɔ, toovenim taa lɛ, aleewaa pɔyɔɔdʋʋna. Aleewaa mba, palakɩ ɛzɩ mba kɛnɩ ɛyaa mba pasɩba yɔ. Pʋyɔɔ lɛ ye ɖɩtɩlɩ toovenim yɔ, pɩkandɩyɩɣ ɖɔ-yɔɔ se ɖɩtaatɔlɩ aleewaa kpaca taa. Yehowa paɣ-ɖʋ se ɖɩtaañaɣ pana se ɖɩyɔɔdɩnɩ sɩɖaa mbʋ pʋyɔɔ yɔ ɛnawa se ye ɖɩyɔɔdʋʋnɩ aleewaa yɔ, pɩkɔŋnɩ-ɖʋ kala.—Kalɩ Wayɩ Wayɩ Paɣtʋ 18:10-12.

3. Wɛtʋ ndʋ taa sɩɖaa wɛɛ?

Ɛjaɖɛ kpeekpe yɔɔ, ɛyaa wɛnɩ lɩmaɣza ndɩ ndɩ wɛtʋ ndʋ tɩ-taa sɩɖaa wɛɛ yɔ tɩ-yɔɔ. Toovenim taa lɛ, lɩmaɣza ana a-tɩŋa aapɩzɩɣ nɛ akɛ toovenim.

• Lɩmaɣza wena ñe-egeetiye taa ɛyaa wɛnɩ sɩm yɔɔ?

VIDEO: Ɛbɛ pɩtɛŋnɩ ɛyʋ weyi ɛsɩba yɔ?—Hɔɔlʋʋ nakʋyʋ (1:19)

Ɩkalɩ Eklezɩyasɩtɩ 3:20, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩ mayaɣ kanɛ kɔyɔɔdʋʋ yɔ, ɛbɛ pɩtɛŋnɩ ɛyʋ weyi ɛsɩba yɔ?

• Ɛyʋ sɩkɩ lɛ, ɛ-hɔɔlʋʋ nakʋyʋ woki pɩ-yɔɔ nɛ kɩcakɩ wezuu na?

Bibl yɔɔdɩ Lazaarɩ weyi ɛɛkɛ Yesu taabalʋ yɔ ɛ-sɩm tɔm. Ŋŋkalɩɣ Yohanɛɛsɩ 11:11-14 lɛ, cɔna nɛ ŋna se Yesu yɔɔdaa se Lazaarɩ sɩba lɛ, wɛtʋ ndʋ taa ɛlɛ kaawɛɛ. Pʋwayɩ lɛ ɩtazɩ tɔm tʋnɛ tɩ-taa:

• Ɛbɛ Yesu kpaɣ sɩm nɛ ɛmaɣzɩna?

• Ɛbɛ pɩwɩlɩɣ-ɖʋ wɛtʋ ndʋ tɩ-taa sɩɖaa wɛɛ yɔ tɩ-yɔɔ?

• Tɔm ndʋ Bibl yɔɔdʋʋ sɩm yɔɔ yɔ, ŋmaɣzɩɣ suwe tɩ-yɔɔ?

4. Ye ɖɩsɩm sɩm yɔɔ toovenim tɔm yɔ, pɩwazɩɣ-ɖʋ

Ye ɖɩsɩm sɩm yɔɔ toovenim tɔm yɔ, piyeki nɛ sɔɔndʋ ɛtaasɩɣ-ɖʋ kpaʋ nɛ sɩɖaa. Ɩkalɩ Eklezɩyasɩtɩ 9:10, nɛ pʋwayɩ lɛ ɩtazɩ tɔm tʋnɛ tɩ-taa:

• Sɩɖaa pɩzɩɣ nɛ palabɩ-ɖʋ kɩdɛkɛdɩm na?

Tɔm ndʋ Bibl wɩlɩɣ yɔ, tɩsɩɣnɩ-ɖʋ ɖɔɖɔ se ɖise lɩmaɣza wena aseɣtiɣ ɛyaa nɛ pañɩnɩɣ se pɛhɛzɩ sɩɖaa laŋa nɛ halɩ pɛsɛɣ-wɛ yɔ. Ɩkalɩ Izaayii 8:19 nɛ Natʋ 4:11, nɛ pʋwayɩ lɛ ɩtazɩ tɔm tʋnɛ tɩ-taa:

• Ña-naʋ taa yɔ, ɛyʋ weyi ɛsɛɣ sɩɖaa yaa ɛyʋ weyi ɛñɩnɩɣ se sɩɖaa ɩsɩnɩ-ɩ yɔ, Yehowa maɣzɩɣ suwe ɛ-yɔɔ?

5. Ye ɖɩsɩm sɩm yɔɔ toovenim tɔm yɔ, pɩhɛzɩɣ ɖa-laŋa

Pawɩlɩ ɛyaa sakɩyɛ se pɔhɔŋ pa-nɩŋgbaaŋ pa-sɩm wayɩ kɩdɛkɛdɩm mbʋ paalaba nɛ pɩɖɛɛ yɔ pɩ-yɔɔ. Ɛlɛ ɛyaa, halɩ pɩkpɛndɩnɩ mba paalabɩ kɩdɛkɛdɩm siŋŋ yɔ, paalakɩ kʋñɔŋ pa-sɩm wayɩ. Alɩwaatʋ ndʋ ɖɩtɩlɩɣ tɔm ndʋ yɔ, pɩhɛzɩɣ ɖa-laŋa. Ɩkalɩ Roma mba 6:7, nɛ pʋwayɩ lɛ ɩtazɩ tɔm tʋnɛ tɩ-taa:

• Ye ɛyʋ weyi ɛsɩba yɔ, ɛlɩ ɛ-kɩwɛɛkɩm taa ɛzɩ ɖɩkalʋʋ Bibl taa yɔ, ŋmaɣzɩɣ se sɩɖʋ nɔɔyʋ lakɩ kʋñɔŋ kɩwɛɛkɩm mbʋ ɛɛlaba nɛ pɩɖɛɛ yɔ pɩ-yɔɔ?

Ye ɖɩsɩm Yehowa camɩyɛ yɔ, ɖɩnaɣ se ɛɛpɩzɩɣ nɛ eyele kpa nɛ ɛyaa lakɩ kʋñɔŋ pa-sɩm wayɩ. Ɩkalɩ Wayɩ Wayɩ Paɣtʋ 32:4 nɛ 1 Yohanɛɛsɩ 4:8, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛsɔ weyi ɛwɛnɩ wɛtʋ kɩbandʋ ndʋ tɩ-tɔm pɔyɔɔdɩ masɩ sɩnɛ sɩ-taa yɔ, ɛpɩzɩɣ nɛ ɛha nʋmɔʋ nɛ panazɩɣ ɛyaa mba pasɩba yɔ?

• Ŋmaɣzɩɣ se ɛyʋ ɛtɩlɩ sɩm yɔɔ toovenim tɔm yɔ, pɩhɛzɩɣ ɛ-laŋɩyɛ na? Ɛbɛ yɔɔ?

TOBI LƐ

Ɛyʋ sɩkɩ lɛ e-wezuu sɩ tɩnaɣ. Sɩɖaa ɩɩlakɩ kʋñɔŋ nɛ paapɩzɩɣ ɖɔɖɔ nɛ pala kañatʋ ɛyaa mba pɛwɛ wezuu yɔ.

Tɔm taa tazʋʋ

• Ɛyʋ sɩkɩ lɛ ɛbɛ pɩtɛŋnɩ-ɩ?

• Ye ɖɩtɩlɩ sɩm yɔɔ toovenim tɔm yɔ, ɛzɩma pɩwazɩɣ-ɖʋ?

• Ye ɖɩtɩlɩ sɩm yɔɔ toovenim tɔm yɔ, ɛzɩma pɩhɛzɩɣ ɖa-laŋa?

WONDU LƐƐTƲ

Kalɩ nɛ ŋna ɛzɩma Bibl lɩzɩɣ tɔm piye «kalɩzaɣ» tɔbʋʋ yɔ.

«Qu’est-ce que l’âme?» (Intɛrnɛɛtɩ yɔɔ tɔm ñʋʋ)

Cɔna nɛ ŋna mbʋ pɩwɩlɩɣ se Ɛsɔ ɛɛnazɩɣ ɛyaa miŋ maatɛŋ taa yɔ.

Toovenim se miŋ maatɛŋ wɛɛ? (3:07)

Pɩwɛɛ se ŋse sɩɖaa sɔɔndʋ na?

Les esprits des morts: Peuvent-ils vous aider ou vous nuire? Existent-ils vraiment? (hatʋ cabɩ takayaɣ)

Kalɩ nɛ ŋna ɛzɩma abalʋ nɔɔyʋ kɔma nɛ ɛtɩlɩ mbʋ pɩtɛŋnɩ ɛyʋ weyi ɛsɩba yɔ nɛ pɩhɛzɩ ɛ-laŋɩyɛ yɔ.

«J’étais impressionné par les réponses claires et logiques de la Bible» (La Tour de Garde, 1^er fevrier 2015)