KPƐLƖKƲƲ 5
Samɩyɛɛlɩ lakaɣ mbʋ pɩwɛ ɖeu yɔ tam
Samɩyɛɛlɩ kaakɛ pɩɣa evelaɣ lɛ, ewobi kediɣzaɣ kuduyuu tɛɛ ɖenɖe, ɛyaa wokaɣ nɛ pɛsɛɣ Yehowa yɔ, nɛ ɛlakɩ tʋmɩyɛ peeɖe. Ŋsɩm mbʋ pɩlaba nɛ Samɩyɛɛlɩ wolo kediɣzaɣ kuduyuu tɛɛ peeɖe yɔ? Yele nɛ ɖɩpaɣzɩnɩ yɔɔdʋʋ e-ɖoo Hana tɔm.
Hana ñɩnaɣ kpem se ɛlʋlɩ pɩɣa, ɛlɛ pɩnzɩ sakɩyɛ kɔɔ nɛ sɩɖɛɛ, ɛtɩpɩzɩ nɛ ɛlʋlɩ pɩɣa. Pʋyɔɔ ɛtɩmnɩ Yehowa nɛ etendi-i se ɛsɩnɩ-ɩ. Eheyi Yehowa se ye ɛlɛ ɛha-ɩ abalɩbɩɣa yɔ, ɛkaɣ-kɛ yebu se kowolo nɛ kala tʋmɩyɛ kediɣzaɣ kuduyuu tɛɛ. Yehowa cosi Hana adɩma yɔɔ, ɛlʋlɩ abalɩbɩɣa nɛ ɛyaa-kɛ se Samɩyɛɛlɩ. Nɛ Samɩyɛɛlɩ kɔm nɛ ɛwɛɛnɩ ɛzɩ pɩnzɩ naadozo yaa naanza lɛ, Hana kpaɣ-ɩ nɛ ewoni kediɣzaɣ kuduyuu tɛɛ, ɛzɩ ɛɛyɔɔdʋʋ yɔ, se ɛla Ɛsɔ tʋmɩyɛ peeɖe.
Elii kaakɛnɩ cɔjɔ sɔsɔɔ kediɣzaɣ kuduyuu tɛɛ. Ɛ-pɩyalaa naalɛ lakaɣ ɖɔɖɔ tʋmɩyɛ peeɖe. Tɔzɩ se ɖɩɣa ŋga ka-taa pɛsɛɣ Ɛsɔ yɔ, ŋga payaɣ se kediɣzaɣ kuduyuu nɛ pʋpɔzʋʋ se mba palakɩ tʋmɩyɛ peeɖe yɔ, pacaɣ wezuu ŋgʋ kʋtʋʋzaa yɔ. Ɛlɛ Elii pɩyalaa ñalakaɣ kɩdɛkɛdɩm. Samɩyɛɛlɩ naɣaɣ mbʋ palakaɣ yɔ. Ɛlɛ Samɩyɛɛlɩ labɩ kɩdɛkɛdɩm ɛzɩ Elii pɩyalaa yɔ?— Aayɩ, Samɩyɛɛlɩ wobi pɩ-yɔɔ nɛ ɛlakɩ mbʋ pɩtʋʋzaa yɔ, ɛzɩ ɛ-lʋlɩyaa kaawɩlɩɣ-ɩ yɔ.
Ŋmaɣzɩɣ se ɛbɛ pɩɩwɛɛ se Elii ɛla ɛ-pɩyalaa pe-wezuu caɣʋ ŋgʋ kɩ-yɔɔ?— Pɩɩpɔzaa se ɛhɔ pa-nɩŋgbaaŋ nɛ ɛtaatasɩ-wɛ yebu nɛ pala tʋmɩyɛ Ɛsɔ ɖɩɣa taa. Ɛlɛ Elii tɩla mbʋ, pʋyɔɔ Yehowa taa kaawɩnɩ ɛ nɛ ɛ-pɩyalaa nɛ ɛɖʋ se ɛhɔŋ pa-nɩŋgbaaŋ.
Samɩyɛɛlɩ heyi Elii tɔm ndʋ Yehowa yɔɔdaa yɔ
Ðoo naayɛ taa Samɩyɛɛlɩ hɩnaa nɛ eɖou lɛ, ɛnɩɩ nɔɔyʋ yaɣ-ɩ se: ‘Samɩyɛɛlɩ!’ Ɛnɩ mbʋ lɛ, ese nɛ ewolo Elii cɔlɔ, ɛlɛ Elii heyi-i se: ‘Mantɩya-ŋ.’ Pɩtasɩ-ɩ yaʋ mbʋ tam nabʋlɛ. Paya Samɩyɛɛlɩ tozo ɖeɖe lɛ, Elii heyi-i se ye pɩtasɩ-ɩ yaʋ mbʋ lɛ, ɛtɔ se: ‘Yehowa mentendi-ŋ, yɔɔdɩ, ña-lɩmɖʋyʋ ɖiɣni welisuu.’ Samɩyɛɛlɩ la mbʋ nɛ Yehowa heyi-i se: ‘Heyi Elii se mankaɣ hɔm ɛ-hɔʋ taa mba nɩŋgbaaŋ, pa-azuluma lakasɩ yɔɔ.’ Ŋmaɣzɩɣ se pɩɩwɛ kɛlɛʋ se Samɩyɛɛlɩ eheyi tɔm ndʋ Elii yaa we?— Aayɩ, pɩɩwɛ-ɩ kaɖɛ. Ɛlɛ paa sɔɔndʋ ɛɛkpa-ɩ yɔ, ɛlabɩ mbʋ Yehowa pɔzɩ-ɩ se ɛla yɔ. Nɛ tɔm ndʋ Yehowa heyi-i yɔ tɩkɔm pɩ-taa. Pakʋ Elii pɩyalaa mba nɛ Elii sɩ ɖɔɖɔ.
Samɩyɛɛlɩ kɛnɩ-ɖʋ kɩɖaʋ kɩbaŋʋ. Ɛlabɩ mbʋ pɩtʋʋzaa yɔ, paa lalaa ɩɩlakaɣ kɩwɛɛkɩm ɛ-cɔlɔ yɔ. Nɛ ña yɔ? Ɛzɩ Samɩyɛɛlɩ yɔ, ŋkaɣ wobu pɩ-yɔɔ nɛ ŋlakɩ mbʋ pɩtʋʋzaa yɔ? Ye ŋlabɩ mbʋ yɔ, Yehowa nɛ ña-lʋlɩyaa pa-taa kaɣ labʋ leleŋ siŋŋ.