Yehowa yɔɔdɩnɩ Samɩyɛɛlɩ

Cɔjɔ kɩlɩm Elii kaawɛnɩ abalɩbiya naalɛ, sɩɩkɛ cɔjɔnaa Ɛsɔ sɛtʋ kɩɖanɖʋʋ tɛɛ. Sɩ-hɩla lɛ Hɔfɩnii nɛ Fineyaasɩ. Piya nzɩ sɩtaañaŋ Yehowa paɣtʋ, nɛ sɩnazaɣ samaɣ. Izrayɛɛlɩ mba kɔŋ se palaa kɩlaŋ Yehowa lɛ, Hɔfɩnii nɛ Fineyaasɩ pakpakɩɣ nandʋ ndʋ tɩkɩlɩ ɖeu yɔ. Elii kaana mbʋ ɛ-pɩyalaa lakaɣ yɔ, ɛlɛ ɛtɩla nabʋyʋ se ɛsɩnɩ-wɛ. Yehowa kaɣ yebu nɛ lakasɩ nzɩ sɩɖɛɛnɩ ɛsɩndaa?

Paa Hɔfɩnii nɛ Fineyaasɩ paakɩlɩ Samɩyɛɛlɩ nɛ pɩnzɩ sakɩyɛ yɔ, Samɩyɛɛlɩ tɩmaɣzɩnɩ-wɛ. Yehowa kaasɔɔlɩ Samɩyɛɛlɩ tɔm. Ðoo naayɛ taa Samɩyɛɛlɩ ɖowaɣ lɛ, ɛnɩɩ nɔɔ nakɛyɛ wɛɛ nɛ kayaɣ ɛ-hɩɖɛ. Ɛkʋyɩ nɛ ese ewolo Elii cɔlɔ nɛ eheyi-i se: “Ma yɔ!” Ɛlɛ Elii cosi-i se: “Mantɩya-ŋ, pɩsɩ nɛ ŋhɩnɩ.” Nɛ Samɩyɛɛlɩ pɩsɩ nɛ ɛhɩnɩ. Pʋwayɩ lɛ, ɛtasɩ nɩʋ nɔɔ ŋga ka-taŋ. Samɩyɛɛlɩ tasɩ nɔɔ ŋga ka-taŋ nɩʋ nabudozo ɖeɖe lɛ, Elii nɩɩ pɩ-taa se Yehowa wɛna nɛ ɛyaɣ-ɩ. Nɛ eheyi Samɩyɛɛlɩ se ye ɛtasɩ nɩʋ nɔɔ ŋga ka-taŋ yɔ, ɛyɔɔdɩ se: “Yehowa, yɔɔdɩ. Ña-lɩmɖʋyʋ ɖiɣni welisuu.”

Samɩyɛɛlɩ ɖaɣnɩ pɩsʋʋ nɛ ɛhɩnɩ. Pɩkɛdaa lɛ, ɛnɩɣ payaɣ-ɩ se: “Samɩyɛɛlɩ! Samɩyɛɛlɩ!” Nɛ ecosi se: “Yɔɔdɩ, ña-lɩmɖʋyʋ ɖiɣni welisuu.” Peeɖe Yehowa heyi-i se: “Heyi Elii se mankaɣ hɔm ɛ nɛ ɛ-hɔʋ pa-nɩŋgbaaŋ. Ɛsɩm kɩdɛkɛdɩm mbʋ payɩ e-piya ɖiɣni labʋ Ɛsɔ sɛtʋ kɩɖanɖʋʋ tɛɛ yɔ, ɛlɛ esum tamɩyɛ.” Tɛʋ fema lɛ, Samɩyɛɛlɩ wolo nɛ ɛtʋlɩ Ɛsɔ sɛtʋ kɩɖanɖʋʋ nɔnɔsɩ ɛzɩ ɛtɩɩlakʋʋ paa ɖooye yɔ. Sɔɔndʋ kpaɣaɣ-ɩ se eheyi cɔjɔ kɩlɩm tɔm ndʋ Yehowa heyi-i yɔ. Ɛlɛ Elii yaa-ɩ nɛ ɛpɔzɩ-ɩ se: “Tɔm ndʋ Yehowa heyi-ŋ? Heyi-m tɩ-tɩŋa. Taamɛsɩ-m natʋyʋ.” Nɛ Samɩyɛɛlɩ heyi Elii tɔm ndʋ tɩ-tɩŋa.

Samɩyɛɛlɩ wɛɛ nɛ ɛpaɣlɩɣ lɛ, Yehowa wolo pɩ-yɔɔ nɛ ɛwazɩɣ-ɩ. Izrayɛɛlɩ ageeta kpeekpe taa, paa anɩ ɛnawa se Yehowa lɩzɩ Samɩyɛɛlɩ se ɛkɛ nayʋ nɛ tɔm hʋyʋ.