Yeremii tiyele ɛyaa Yehowa tɔm susuu kaaʋ

Ɛyaa mba ɖisusuu tɔm yɔ, pa-taa nabɛyɛ woŋuu-ɖʋ yaa pa-taa wɩɣnɩ-ɖʋ. Pʋnɛ pɩpɩzɩɣ pɩla nɛ ɖiyele Yehowa tɔm susuu. Pɩtalɩ-ŋ mbʋ wiɖiyi nɛ ŋna?— Bibl heyiɣ-ɖʋ abalɩbɩɣa nakɛyɛ tɔm se kaasɔɔlɩ Yehowa siŋŋ ɛlɛ pɩkɔm alɩwaatʋ natʋyʋ lɛ, pɩsaɣ pazɩ yem se keyele Yehowa tɔm susuu. Ka-hɩɖɛ lɛ Yeremii. Yele nɛ ɖɩkpɛlɩkɩ kɔ-yɔɔ tɔm pazɩ.

Yeremii kaakɛ pɩɣa evelaɣ lɛ, Yehowa heyi-i se esusi samaɣ ɛ-tɔm nɛ eheyi-kɛ se ye katiyele lakasɩ kɩdɛkɛdɩsɩ labʋ yɔ, pakaɣ-kɛ tɔm hʋnʋʋ. Sɔɔndʋ kpaɣaɣ Yeremii nɛ tʋmɩyɛ nɖɩ, mbʋ pʋyɔɔ yɔ ɖɩ-labʋ kaawɛ-ɩ kaɖɛ siŋŋ. Nɛ eheyi Yehowa se: ‘Maasɩŋ ndʋ mɔyɔɔdɩ yɔ. Pɩɣa yem mɛnkɛnaa.’ Ɛlɛ, Yehowa cosi-i se: ‘Sɔɔndʋ ɛtaakpa-ŋ, mankaɣ-ŋ sɩnʋʋ.’

Peeɖe Yeremii paɣzɩ samaɣ tɔm susuu nɛ eheyi-kɛ se ye katɩlɛɣzɩ yɔ, pakaɣ ka-nɩŋgbaaŋ hɔm. Ŋmaɣzɩɣ se samaɣ welisini Yeremii nɛ kɔɖɔ ɛ-tɔm yɔɔ?— Aayɩ, keyeba nɛ kohoŋuu-i kihoŋu nɛ ka-taa wɩɣnɩ-ɩ pɩdɩɩfɛyɩ. Halɩ nabɛyɛ ñɩnaɣ se pakʋ-ɩ. Ŋmaɣzɩɣ se ɛzɩma pɩɩlabɩ Yeremii?— Sɔɔndʋ kpa-ɩ nɛ ɛtɔ se: ‘Maatasɩɣ susuu Yehowa tɔm kpa.’ Ɛlɛ toovenim se eyebi Yehowa tɔm susuu na?— Aayɩ etiyele kaaʋ. Ɛzɩma ɛɛsɔɔlɩ Yehowa siŋŋ yɔ, pɩɩwɛ-ɩ kaɖɛ se eyele Yehowa tɔm susuu. Nɛ ɛzɩma etiyele yɔ, pʋyɔɔ lɛ, Yehowa huuzi ɛ-yɔɔ.

Kɩyakʋ nakʋyʋ lɛ, mba pataasɔɔlɩ Yeremii yɔ, pa-taa nabɛyɛ wolo nɛ pakpa-ɩ nɛ pɔlɔ-ɩ ahɔya taa, lɔkɔ nakʋyʋ taa. Ɛɛnaɣ se ɛtɔɔ we, yaa ɛñɔɔ we. Ɛyaa mba, paalɔ-ɩ peeɖe yɔ, paasɔɔlaa se ɛsɩ. Ɛlɛ Ɛsɔ ɖoŋ taa lɛ, ɛkɔm nɛ ɛlɩɩ pɩ-taa!

Ɛbɛ Yeremii kɩɖaʋ kʋnɛ kɩpɩzɩɣ nɛ kɩkpɛlɩkɩ-ŋ?— Paa sɔɔndʋ kaakpa Yeremii alɩwaatʋ natʋyʋ taa yɔ, etiyele Yehowa tɔm susuu kaaʋ. Alɩwaatʋ ndʋ ŋsusuu tɔm yɔ, nabɛyɛ pɩzɩɣ nɛ powoŋuu-ŋ yaa pa-taa wɩɣnɩ-ŋ. Nɛ pɩpɩzɩɣ nɛ pɩcɛyɩ-ŋ yaa pɩha-ŋ sɔɔndʋ. Ɛlɛ taayele Yehowa tɔm susuu kaaʋ. Yehowa kaɣ-ŋ sɩnʋʋ tam, ɛzɩ ɛɛsɩnʋʋ Yeremii yɔ.