Yehowa tiyi Yereemii se ewolo nɛ esusi tɔm

Yehowa kaalɩzɩ Yereemii se ɛkɛ nayʋ Yuuda ɛjaɖɛ taa. Eheyi-i se esusi tɔm samaɣ nɛ eheyi-kɛ se keyele lakasɩ kɩdɛkɛdɩsɩ labʋ. Yereemii cosi se: “Yehowa, pɩɣa yem mɛnkɛnaa. Maasɩŋ ɛzɩma pɔyɔɔdɩnɩ samaɣ yɔ.” Yehowa pɩsɩnɩ-ɩ se: “Sɔɔndʋ ɛtaakpa-ŋ. Mankaɣ-ŋ heyuu ndʋ pɩwɛɛ se ŋyɔɔdɩ yɔ. Mankaɣ-ŋ sɩnʋʋ.”

Yehowa heyi Yereemii se ekpeɣli tɛtʋ taa sɔsaa nɛ ɛyɔkɩ pɛ-ɛsɩndaa cʋʋ ɖeɣa nɛ eheyi-wɛ se: “Ɛzʋnɔ ɖɔɖɔ pakaɣ yɔkʋʋ Yeruzalɛm.” Yereemii labɩ mbʋ ɖeyi ɖeyi lɛ, tɛtʋ taa sɔsaa kɔ pana siŋŋ. Cɔjɔ weyi payaɣaɣ se Pasuri yɔ, ɛkpa Yereemii nɛ ɛmabɩ-ɩ nɛ ɛɖʋ-ɩ salaka. Pahʋyɩ kpoŋgbolonaa pɔŋ nɛ paɖʋ e-nesi nɛ ɛ-nɩŋgbanzɩ nɛ ɛ-ñʋʋ pɔŋ ɛnɩ ɩ-taa, nɛ ɖoo kpeekpe ɛtɩpɩzɩ eciɣdi ɛ-tɩ. Tɛʋ fema nɛ Pasuri yebi-i lɛ, ɛyɔɔdɩ se: “Lɛɛlɛɛyɔ pɩmaɣ mbʋ. Maatasɩɣ tɔm susuu.” Ɛlɛ toovenim se eyebi tɔm susuu na? Aayɩ. Yereemii ɖaɣnɩ maɣzʋʋ tɔm ndʋ pɩɩwɛɛ se esusi yɔ tɩ-yɔɔ lɛ, ɛyɔɔdɩ se: “Yehowa tɔm wɛ man-taa ɛzɩ miŋ yɔ. Pɩɩsaŋ se meyele ti-susuu.” Nɛ Yereemii wolo tɔm susuu yɔɔ nɛ ɛpakɩ samaɣ.

Pɩnzɩ sakɩyɛ wayɩ lɛ, wiyaʋ kɩfalʋ nɔɔyʋ paɣzɩ tɔɔʋ kewiyitu Yuuda ɛjaɖɛ taa. Cɔjɔnaa nɛ cɛtɩm nayaa pataasɔɔlɩ tɔm ndʋ Yereemii susaɣ yɔ. Peheyi tɛtʋ taa awumbiya se: “Ɛyʋ ɛnɛ yɔ ɛmʋnɩ sɩm.” Nɛ Yereemii cosi-wɛ se: “Ye ɛkʋ-m kɔyɔ imuli-m kimuluu. Yehowa tɔm monsusuu, pɩtɩkɛ ma-maɣmaɣ ma-ñɩndʋ.” Nɛ awumbiya nɩ tɔm ndʋ Yereemii yɔɔdaa yɔ lɛ, pɔyɔɔdɩ se: “Ɛyʋ ɛnɛ yɔ, pɩtɩpɔzɩ se pakʋ-ɩ.”

Yereemii wolo pɩ-yɔɔ nɛ esusuu tɔm, nɛ awumbiya ɖaɣnɩ pana kɔʋ siŋŋ. Powolo peheyi wiyaʋ se pɩwɛɛ se ɛkʋ Yereemii. Wiyaʋ cosi-wɛ se powolo nɛ palabɩ-ɩ mbʋ payɩ pɔsɔɔlaa yɔ. Peeɖe powoba nɛ pakpa Yereemii nɛ pɛpɛɖɩ-ɩ lɔkɔ sɔsɔʋ nakʋyʋ taa, kɩwɛ cukaŋ pɩdɩɩfɛyɩ, kɩ-taa nɛ ahɔya; nɛ pamaɣzaa se ɛkaɣ sɩbʋ kɩ-taa peeɖe. Ahɔya ana awɛɛ nɛ aliki Yereemii pazɩ pazɩ.

Peeɖe wiyaʋ ɖɩɣa taa tʋmlaɖʋ weyi payaɣ se Ebɛɛdɩ-Melɛɛkɩ yɔ, ewoba nɛ eheyi wiyaʋ se: “Awumbiya kpaɣ Yereemii nɛ pɛpɛɖɩ-ɩ lɔkɔ nakʋyʋ taa! Ye patɩlɩzɩ-ɩ yɔ ɛsɩkɩ.” Wiyaʋ heyi Ebɛɛdɩ-Melɛɛkɩ se ɛkpaɣ ɛyaa 30 nɛ powolo palɩzɩ Yereemii lɔkɔ taa. Ɛzɩ ɖɩnaʋ yɔ, Yereemii tiyele se nabʋyʋ ɛɖɩɣ-ɩ nʋmɔʋ nɛ eyele tɔm susuu. Ŋŋmaɣzɩɣ se ɖɩpɩzɩɣ nɛ ɖɩmaɣzɩnɩ-ɩ yaa we?