Yesu ñaŋaɣ Yehowa nɛ ɛ-lʋlɩyaa tam

Alɩwaatʋ tɩŋa pɩwɛ-ŋ kɛlɛʋ se ŋña ña-lʋlɩyaa na?— Pɩtʋʋ fɛyɩ se nabʋyʋ taa lɛ, pɩwɛ kaɖɛ. Ɛlɛ ŋnawa se Yesu ñaŋaɣ Yehowa nɛ ɛ-lʋlɩyaa na?— Ɛ-kɩɖaʋ pɩzɩɣ nɛ kɩsɩnɩ-ŋ nɛ ña ɖɔɖɔ ŋña ña-lʋlɩyaa paa pɩwɛ kaɖɛ yɔ. Yele nɛ ɖɩkpɛlɩkɩ pɩ-yɔɔ tɔm pazɩ.

Pʋcɔ nɛ Yesu kɔŋ tɛtʋ yɔɔ lɛ, ɛɛwɛ ɛ-Caa Yehowa cɔlɔ ɛsɔdaa. Ɛlɛ ɛkɔm tɛtʋ yɔɔ lɛ, ɛɛwɛnɩ ɖɔɖɔ lʋlɩyaa. Mba payaɣ se Yosɛɛfʋ nɛ Maarɩɩ. Ŋna ɛzɩma pɩlaba nɛ papɩsɩ Yesu lʋlɩyaa yɔ?—

Yehowa kaakpaɣ Yesu wezuu nɛ ɛɖʋ Maarɩɩ lotu taa, mbʋ yebina nɛ papɩzɩ nɛ palʋlɩ-ɩ tɛtʋ yɔɔ. Pɩɩkɛ piti lakasɩ nasɩyɩ na! Yesu kaapaɣlɩ Maarɩɩ lotu taa ɛzɩ piya lɛɛsɩ paɣlʋʋ ɖɔɖɔ si-ɖoonaa lotu taa yɔ. Pɩlabɩ ɛzɩ fenasɩ nakʋ mbʋ yɔ lɛ, palʋlɩ Yesu. Pʋyɔɔ pɩtɩŋnaa nɛ Maarɩɩ nɛ ɛ-walʋ Yosɛɛfʋ papɩsɩ Yesu lʋlɩyaa tɛtʋ yɔɔ.

Yesu kɔm nɛ ɛwɛɛnɩ pɩnzɩ 12 lɛ, ɛla nabʋyʋ nɛ pɩwɩlɩ se ɛsɔɔlɩ ɛ-Caa Yehowa pɩdɩɩfɛyɩ. Alɩwaatʋ ndʋ tɩ-taa, Yesu nɛ ɛ-lʋlɩyaa paaɖɔm nʋmɔʋ sɔsɔʋ nakʋyʋ nɛ powolo Yerusalɛm se pɔtɔɔ Paska. Yosɛɛfʋ nɛ Maarɩɩ palɩ nʋmɔʋ taa se papɩsɩɣ kpem lɛ, pɩkɛdaa lɛ, pañɩnɩɣ Yesu, ɛlɛ paanaɣ-ɩ. Ŋsɩm ɖenɖe Yesu kaawɛɛ yɔ?—

Ɛbɛ yɔɔ Yesu kaawɛ Ɛsɔ kpaaŋ taa?

Yosɛɛfʋ nɛ Maarɩɩ pese lɔŋ nɛ papɩsɩ Yerusalɛm nɛ pañɩnɩɣ Yesu paa le. Sɔɔndʋ wɛɛ nɛ pɩkpaɣ-wɛ mbʋ pʋyɔɔ yɔ paanaɣ ɖenɖe ɛwɛɛ yɔ. Ɛlɛ kɩyakɩŋ naadozo wayɩ lɛ, pana-ɩ, ɛwɛ Ɛsɔ kpaaŋ taa! Ŋna mbʋ pʋyɔɔ Yesu kaawɛ kpaaŋ taa peeɖe yɔ?— Mbʋ pʋyɔɔ yɔ peeɖe ɛpɩzaɣ se ɛkpɛlɩkɩ ɛ-Caa Yehowa yɔɔ tɔm camɩyɛ. Ɛsɔɔlɩ Yehowa siŋŋ nɛ ɛcaɣ se ɛla mbʋ pɩkɛdɩɣnɩ-ɩ yɔ. Paa Yesu ɛkɔm nɛ ɛpaɣlɩ nɛ ɛla ɛyʋ sɔsɔɔ yɔ, ɛñaŋaɣ Yehowa tam. Yesu ñaŋaɣ halɩ pɩkpɛndɩnɩ alɩwaatʋ ndʋ pɩɩwɛ-ɩ kaɖɛ yɔ, pʋ-tɔbʋʋ lɛ se paa pɩpɔzaa se ɛnɩɩ wɩzasɩ yɔ, etisaɣ nɛ ɛñaŋ Yehowa. Yosɛɛfʋ nɛ Maarɩɩ yɔ, Yesu ñaŋaɣ-wɛ ɖɔɖɔ yaa we?— Ɛɛɛ, Bibl heyiɣ-ɖʋ se ɛñaŋaɣ-wɛ camɩyɛ.

Ɛbɛ Yesu kɩɖaʋ kʋnɛ kɩpɩzɩɣ nɛ kɩkpɛlɩkɩ-ŋ?— Pɩwɛɛ se ŋña ña-lʋlɩyaa halɩ pɩkpɛndɩnɩ alɩwaatʋ ndʋ pɩwɛ kaɖɛ yɔ. Ŋsɔɔlaa se ŋla mbʋ?—