Pɩɣa evelaɣ Yesu

Yosɛɛfʋ nɛ Maarɩɩ paawɛ Nazarɛɛtɩ, pa nɛ Yesu nɛ pe-piya lɛɛsɩ, abalɩbiya nɛ halɩbiya. Yosɛɛfʋ lakaɣ kafɩnda tʋmɩyɛ nɛ ɛcɔŋnɩ ɛ-hɔʋ yɔɔ. Ɛwɩlaɣ ɛ-hɔʋ taa mba Yehowa yɔɔ tɔm nɛ ɛkpɛlɩkɩɣ-wɛ ɖɔɖɔ ɛ-Paɣtʋ. Yosɛɛfʋ hɔʋ taa mba wokaɣ Sinaagɔɔgɩ taa ɖoŋ ɖoŋ nɛ pɛsɛɣ Yehowa, nɛ paa pɩnaɣ ŋga lɛ, powoki Yeruzalɛm se pɔtɔɔ Paska kazandʋ.

Alɩwaatʋ ndʋ Yesu wɛnɩ pɩnzɩ 12 yɔ, ɛ-hɔʋ taa mba tasɩ ɖɔm nʋmɔʋ kɩɖaɣlʋʋ nɛ powolo Yeruzalɛm ɛzɩ patɩɩlakʋʋ yɔ. Ɛyaa sakɩyɛ kaawobi Yeruzalɛm se pɔtɔɔ Paska kazandʋ. Paska tɛma lɛ, Yosɛɛfʋ nɛ Maarɩɩ pakpaɣ nʋmɔʋ nɛ papɩsɩɣ pɛ-tɛ. Pamaɣzaɣ se Yesu wɛ samaɣ ŋga pa nɛ kɛ pɔɖɔŋaɣ yɔ ka-taa. Ɛlɛ pañɩnɩ-ɩ pɔ-hɔʋ taa mba lalaa cɔlɔ nɛ pawɩɩ.

Peeɖe papɩsɩ Yeruzalɛm nɛ pañɩnɩ-ɩ kɩyakɩŋ 3. Pɩkɛdaa lɛ, pana Yesu templo taa, ɛcaɣ wɩlɩyaa hɛkʋ taa nɛ ewelisiɣni-wɛ camɩyɛ nɛ ɛpɔzʋʋ-wɛ ɖɔɖɔ tɔm camɩyɛ. Pɩɖɩɣzɩ wɩlɩyaa siŋŋ nɛ papaɣzɩ Yesu tɔm pɔpɔzʋʋ. Nɛ ɛzɩma ecosaɣ-wɛ yɔ, pɩlakaɣ-wɛ piti kpem. Ɛ-tɔm cosuu wɩlaɣ se ɛnɩɣ Yehowa Paɣtʋ taa camɩyɛ.

Sɔɔndʋ kaakpa Yosɛɛfʋ nɛ Maarɩɩ pɩŋŋ. Maarɩɩ pɔzɩ-ɩ se: “Man-pɩyalʋ, le ŋŋwɛɛ nɛ ɖɩñɩnɩɣ-ŋ nɛ ɖɩɩnaɣ-ŋ?” Yesu cosi-wɛ se: “Ɩtɩna se man-Caa ɖɩɣa taa cɩnɛ pɩwɛɛ se mɛwɛɛ?”

Yesu tɩŋ ɛ-lʋlɩyaa nɛ pekpe pɛ-tɛ Nazarɛɛtɩ. Yosɛɛfʋ kpɛlɩkɩ Yesu kafɩnda tʋmɩyɛ. Ŋmaɣzɩɣ se ɛzɩma Yesu kaawɛɛ, alɩwaatʋ ndʋ ɛɛkɛ pɩɣa evelaɣ yɔ? Yesu wɛɛ nɛ ɛpaɣlɩɣ nɛ ɛwɛɛ lɛɣtʋ nɛ ɛ-tɔm kɛdɩɣnɩ Ɛsɔ nɛ ɛyaa.