ÑƲƲ 47
Pɩɣa peleɣa nakɛyɛ sɩba nɛ kaɖaɣnɩ fem!
MAATIYEE 9:18, 23-26 MAARKƖ 5:22-24, 35-43 LUKA 8:40-42, 49-56
YESU FEZI YAYIRUUSI PƐLƐ
Yayiruusi na ɛzɩma Yesu wa halʋ weyi calɩm kpeŋaɣni-i lɛ, pɩha-ɩ lidaʋ se Yesu pɩzɩɣ nɛ ɛwaa ɛ-pɛlɛ paa ɛnawa se ɛzʋnɔ kɛtɛm sɩbʋ yɔ. (Maatiyee 9:18) Ye toovenim se kasɩba, Yesu pɩzɩɣ nɛ ɛtasɩ-kɛ sɩnʋʋ na?
Alɩwaatʋ ndʋ Yesu wɛɛ ɛyɔɔdʋʋnɩ halʋ weyi ɛwa ɛ-kʋdɔŋ yɔ lɛ, abalaa nabɛyɛ lɩɩnɩ Yayiruusi tɛ nɛ pɔkɔɔ peheyiɣ Yayiruusi ɛnʋ se: “Ñɛ-pɛlɛ sɩba, ɛbɛ yɔɔ ŋcazɩɣ Tɔm wɩlɩyʋ nɔɔ hɔm ɖɔɖɔ?”—Maarkɩ 5:35.
Tɔm tʋnɛ tɩwɛɛkɩ ɛ-laŋɩyɛ siŋŋ! Abalʋ ɛnɛ paa ɛyaa kaañaŋaɣ-ɩ siŋŋ yɔ, lɛɛlɛɛyɔ, pɩlaba se ɛfɛyɩ nɔɔyʋ. Pɩɣa kʋɖʋmaɣ ŋga ɛwɛna yɔ, kasɩba. Peheyaɣ-i mbʋ lɛ, Yesu nɩɩ nɛ ɛkɛzɩ ɛ-tɩ nɛ Yayiruusi yɔɔ nɛ eheyi-i laŋɩyɛ hɛzʋʋ tɔm tʋnɛ se: “Taase sɔɔndʋ, wɛɛ ŋtisiɣ yem!”—Maarkɩ 5:36.
Pʋwayɩ lɛ, Yesu tɩŋ Yayiruusi nɛ ewolo ɛ-tɛ. Ɛtalaa lɛ, ɛmaɣnɩ samaɣ sɔsɔɔ nakɛyɛ kʋñɔŋ taa. Peɖiɣni wiluu nɛ pamakɩ kubusi. Yesu sʋʋ ɖɩɣa taa nɛ ɛyɔɔdɩ tɔm tʋnɛ: “Pɩɣa tɩsɩ kɩsɩbʋ, ɛlɛ koɖou kiɖou!” (Maarkɩ 5:39) Ɛyaa nɩ mbʋ lɛ, pɩɖɩɣzɩ-wɛ nɛ papaɣzɩ Yesu woŋuu, mbʋ pʋyɔɔ yɔ, panawa se toovenim lɛ, pɩɣa sɩba. Peeɖe Yesu labɩnɩ tʋmɩyɛ ɖoŋ weyi Ɛsɔ ha-ɩ yɔ, nɛ ɛwɩlɩ se paa ɛyʋ ɛsɩba yɔ, papɩzɩɣ paɖaɣnɩ-ɩ fezuu ɛzɩ ɛyʋ ɖou nɛ pefeziɣ-i yɔ.
Yesu lɩzɩ ɛyaa tɩŋa awayɩ nɛ pɩsaɣ ɛ nɛ Pɩyɛɛrɩ, Yakubu, Yohanɛɛsɩ nɛ pɛlɛ weyi ɛsɩba yɔ, ɛ-lʋlɩyaa. Yesu nɛ ɛyaa kagbanzɩ waa panɛ pɛɖɛɛ pasʋʋ ɖenɖe paahɩzɩ sɩɖʋ yɔ. Pasʋwa lɛ, Yesu ɖɔkɩ pɩɣa nesi tɛɛ nɛ ɛyɔɔdɩ se: “‘Taliita kuum,’ pʋ-tɔbʋʋ lɛ se: ‘Pɩɣa peleɣa ña, mɔtɔŋnɩ-ŋ, ‘kʋyɩ!’’” (Maarkɩ 5:41) Peeɖe peeɖe ɛnʋ lɛ, kakʋyɩ kasɩŋ nɛ kapaɣzɩ ɖɔm. Maɣzɩ nɛ ŋna ɛzɩma pɩlabɩ Yayiruusi nɛ ɛ-halʋ yɔ! Wiɖiyi patɩnatɩ mbʋ. Pɩsa nɛ ɛyaa na se toovenim kefema lɛ, Yesu heyi-wɛ se paha-kɛ tɔɔnaɣ nɛ kɔtɔɔ.
Yesu kaacalɩ mba waʋ yɔ, eeheyi-wɛ se pataaheyi nɔɔyʋ mbʋ ɛɛlabɩ-wɛ yɔ, nɛ ndʋ ɖɔɖɔ eheyi halɩbɩɣa kanɛ ka-lʋlɩyaa. Paa mbʋ yɔ, ɛzɩma lʋlɩyaa panɛ pa-taa labɩ leleŋ siŋŋ yɔ, pa nɛ mba paawɛ peeɖe yɔ, peyeba nɛ “tɔm ndʋ tɩyɛlɩ tɛtʋ ndʋ ti-kpeekpe tɩ-taa.” (Maatiyee 9:26) Ye ñɛ-ɛyʋ kʋsɔɔlʋ nɔɔyʋ ɛsɩbɩna nɛ pefezi-i mbʋ, ɛzɩma pɩlakɩ-ŋ? Ŋŋheyiɣ-tʋ lalaa nɛ laŋhʋlʋmɩyɛ na? Bibl taa lɛ, tam nabʋlɛ ñɩmbʋ yɔ, Yesu fezuu sɩɖʋ yɔ.