Yesu labɩ piti lakasɩ sakɩyɛ

Yesu kɔm tɛtʋ yɔɔ se esusi Ɛsɔ Kewiyaɣ tɔm kɩbandʋ. Yehowa ha Yesu fezuu kiɖeɖeu se ɛla piti lakasɩ nɛ ɛtɩŋnɩ sɩ-yɔɔ nɛ ɛwɩlɩ mbʋ ɛkaɣ labʋ alɩwaatʋ ndʋ ɛpɩsɩɣ Wiyaʋ yɔ. Ɛpɩzɩɣ nɛ ɛwaa kʋdɔmɩŋ tɩŋa. Lona wena a-taa payɩ ewokaɣ yɔ, kʋdɔndɩnaa wokaɣ ɛ-cɔlɔ se ɛsɩnɩ-wɛ, nɛ ɛwaɣaɣ pa-kʋdɔmɩŋ. Eyeba nɛ yʋlʋmaa paɣzɩ naʋ, tandamaa paɣzɩ nɩʋ, kaakalasɩ paɣzɩ ɖɔm nɛ aliikenaa hiɣ ñʋʋ yabʋ. Paa e-toko nɔɔ maɣmaɣ ɛyaa itukunaa yɔ, pɔ-yɔɔ cɛkɩ. Hɔɔlɩŋ weyi ɩ-taa payɩ Yesu wokaɣ yɔ, ɛyaa tɩŋaɣ-ɩ. Yesu tɩɖɔɔnɩ pa-taa nɔɔyʋ, halɩ pɩkpɛndɩnɩ alɩwaatʋ ndʋ ɛñɩnaɣ se ɛwɛɛ e-ɖeke yɔ.

Kɩyakʋ nakʋyʋ, ɛyaa nabɛyɛ kɔnɩ kaakalaɣ nakɛyɛ ɖɩɣa ŋga ka-taa Yesu kaawɛɛ yɔ. Ɛlɛ ɛyaa kaasu ɖɩɣa ŋga ka-taa nɛ pataapɩzɩɣ se pasʋʋ. Pʋyɔɔ palabɩ pɔʋ nakʋyʋ kuduyuu ñʋʋ taa nɛ petisi kaakalaɣ ŋga Yesu cɔlɔ. Peeɖe Yesu heyi-kɛ se: “Kʋyɩ nɛ ŋɖɔ.” Kakʋyaa nɛ kapaɣzɩ ɖɔm lɛ, pɩɖɩɣzɩ ɛyaa siŋŋ.

Alɩwaatʋ lɛɛtʋ taa, Yesu sʋwaɣ tɛtʋ cikpetu natʋyʋ taa lɛ, canasɩ 10 sɩŋ poliŋ taa nɛ sikoo nɛ siheyi-i se: “Yesu, sɩnɩ-ɖʋ!” Alɩwaatʋ ndʋ tɩ-taa lɛ, pataahaɣ waɖɛ canasɩ se sɩñɔtɩnɩ ɛyaa lalaa. Yesu heyi canasɩ nzɩ se siwolo templo taa, mbʋ pʋyɔɔ yɔ Yehowa Paɣtʋ pɔzaɣ canasɩ nzɩ pawa sɩ-kʋdɔŋ yɔ se sɩla mbʋ. Sɩkpaɣ nʋmɔʋ nɛ sɩɖɛɣ lɛ, sɩna se sɩ-yɔɔ cɛba. Canasɩ nzɩ, sɩ-taa nakɛyɛ nawa se kɔ-yɔɔ cɛba lɛ, kapɩsɩ kɔkɔɔ Yesu cɔlɔ se kɛsɛɛ-ɩ se ɛlabaɣ lɛ nɛ kasa ɖɔɖɔ Ɛsɔ. Canasɩ nzɩ, sɩ-taa kʋɖʋmaɣ ɖeke pɩsɩna nɛ kɛsɛɛ Yesu se ɛlabaɣ lɛ.

Halʋ nɔɔyʋ maɣzaɣ se ɛ-tɔm tɛma, mbʋ pʋyɔɔ yɔ ɛhɩnɩ kʋdɔŋ pɩnzɩ 12. Ɛkɔmnɩ Yesu wayɩ nɛ ɛsʋʋ samaɣ taa nɛ etukuni e-toko kɩtɩnʋʋ nɔɔ. Nɛ ɛ-yɔɔ cɛ kpaagbaa. Pɩlabɩ mbʋ lɛ, Yesu pɔzɩ se: «Atukuni-m?» Sɔɔndʋ kpa halʋ ɛnʋ, ɛlɛ ɛɖɔ nɛ ɛñɔtɩnɩ Yesu nɛ eheyi-i toovenim. Yesu hɛzɩ ɛ-laŋɩyɛ nɛ eheyi-i se: “Mɛn-pɛlɛ, wobini laŋhɛzɩyɛ.”

Payaɣaɣ tʋmlaɖʋ sɔsɔ nɔɔyʋ se Yayiruusi; etendi Yesu se: “Kɔɔ man-ɖɩɣa taa! Pɩwɩɣ mɛn-pɛlɛ siŋŋ.” Ɛlɛ halɩbɩɣa ŋga kasɩba pʋcɔ nɛ Yesu talɩ Yayiruusi tɛ. Yesu talaa lɛ, ɛna se ɛyaa sakɩyɛ wobi peeɖe se pɛhɛzɩ Yayiruusi hɔʋ taa mba laŋɩyɛ. Yesu heyi-wɛ se: “Itaawii, koɖou kiɖou.” Pʋwayɩ lɛ, ɛɖɔkɩ halɩbɩɣa ŋga ke-nesi taa nɛ ɛtɔ se: «Pɩɣa ña, kʋyɩ!» Kakʋyɩ kpaagbaa nɛ Yesu heyi ka-lʋlɩyaa se paha-kɛ nabʋyʋ nɛ kɔtɔɔ. Maɣzɩ nɛ ŋna ɛzɩma ka-lʋlɩyaa taa kaalabɩ leleŋ siŋŋ yɔ!